酒店就位於台北轉運站樓上, 由機場搭國光客運到台北火車站, 步行過對面馬路(途經地下街及商場)就到, 因為明天一早要搭火車到花蓮, 所以住呢度就非常方便.
房間都很寛敞, 而且露台可以望到101~ 房間設備用品齊備, 不過燈光就略為暗一啲.  房間位於16樓, 所以位置在鬧市都覺得寧靜
 

安頓好後再休息一陣, 就出發去醫肚嘞

通常嚟台北都係掃夜市小食當一餐, 朋友大力推介下, 今晚就嚟試吓打邊攎~

這店在台灣有幾間分店, 出發前先在網上預約訂位, 準時嚟到就有得食嘞

店內環境舒適, 通風做得好所以食完個身唔會有陣'火鍋味'.

兩個人點了: 養顏美容鍋, 沙朗牛肉, 油條, 菜&一個海鮮拼盤(細)

這裡的鍋是以位計的, 而沙朗牛就勁大盤, 兩個人食其實幾'吃力', 油條比較香港食的硬&乾身, 用嚟打邊爐真係超好食! 海鮮拼盤有: 蝦, 蘭花蚌, 鯛魚片, 扇貝, 份量二人剛好, 亦很新鮮

其實個湯底都有'料'的, 最好未係啲豬紅, 好爽口, 仲有條蔘呢~

醬料選擇唔多, 不過有白飯任裝! 我見啲台灣人食完就會加啲飯落個湯底度再連埋啲湯食清~ 好似好正咁, 但我兩個人已經食飽飽, 試唔到呢個'湯飯'嘞~

而最最特別ge係: 個湯底可以打包攞走ga (我當然冇咁做啦.....)

另外值得一讚的係呢度啲服務員, 真係勁勁勁有禮貌, 下下都九十度躹躬, 真係有啲唔好意思

仲有仲有, 食完會有張滿一千減二百的coupon, 我用了朋友俾我嗰張(佢前兩日先幫襯~), 所以又再抵啲

由無老鍋出發, 步行去'地圖上較近的夜市' - 寧夏夜市
最終行咗差唔多25分鐘.
食飽飽就當散下步啦~ 

第一次嚟呢個夜市, 感覺很地道, 遊客(好似)比較少, 賣的都係地道小食, 也有一啲遊戲小攤, 雖然規模唔大, 但都幾多嘢食選擇, 食飽都忍唔住再食個臭豆腐呢~

閒逛完就步行到捷運雙連站, 搭捷運回酒店休息了. 

到花蓮後, 先到民宿存好行李後, 就出發去光復站的糖廠參觀

原本打算坐客運去的, 但民宿住人建議搭火車仲快, 因為客運很疏而且會兜路, 搭火車只需約40分鐘. 於是又再搭番火車, 去光復站, 再行約15分鐘(差啲曬溶了)就到糖廠嘞(其實可以打的).

看過糖廠網頁&人家的網誌, 糖廠最出名之一就是---- 雪糕~

呢度啲雪糕有幾十種味道, 來到揀好'Number'之後到一個窗口付款, 就到另一個窗口最雪糕嘞

我揀的洛神花味有果肉的, 味道清甜, 酸酸地, 好正(熱到冇乜胃口, lunch都冇食, 成個晏晝就只係食咗呢杯雪糕, 所以特別好食)

園內有些小商戶, 有呢度另一名產---香茅驅蚊油.  嚟到一定會買, 因為呢度實在好多蚊! 我都即買即用, work~

食完就周圍參觀下, 園內有個關於糖廠的博物館仔, 好細, 講下糖廠創辦人及歷史.  糖廠其實有導覽服務, 不過要預約, 所以我哋就只係周圍遊覽下就走了.

離開之後, 本來打算去去其他景點, 但因為實在太熱, 約果決定回民宿攞房休息下先

 

由糖廠回到民宿都差不多下午4點了, 回來時行李己送到房間.

房間很大, 窗外可以望到中山公園呢, 房內用品齊全, 和酒店沒分別.  民宿約有4間房, 我的房間位於4樓, 要很樓梯呢, 不過只係走嗰日攞行李落樓有啲吃力, 其實都ok的

民宿包早餐, 打電話去訂, 很快就會送到房間, 第二朝早訂了蛋餅(以前未食過呢), 夠熱, 煙煙勒勒的, 好好食
 

休息完又出發去行街搵食

目的地係離民宿有一段距離的'舊鐵道行人徒步區', 徒步區就在以前穿過花蓮市區的火車軌上, 沿路的小攤檔買的都是手作仔或衣服鞋襪之類, 不過可能係平日吧, 攤檔數目唔多, 我哋逛咗一陣, 就走去搵食嘞 

花蓮美食眾多, 其中一名店就係'公正包子'~

由民宿出發, 逛完徙步區, 再轉個彎就見到呢間店 (其實係見到條人龍先發現)

店面不大, 座位都非常迫. 排咗大約15分鐘, 被安排坐响門口位, 由於多人出入, 雖然店內有冷氣, 我都食到成頭成身汗......

兩個人點了包子, 貢丸湯, 肉焿冬粉和豆漿, 原以為一籠10個的小籠包只係小食(TWD5/個), 但原來並唔係香港食開的薄皮細包子, 而每個都只係比雞包仔細一點的厚皮包...包餡係豬肉, K.O.貢丸湯, 肉焿冬粉和十個'包子'之後, 本來想試埋個鍋貼(餃子), 但因為太飽放棄了 (後來才知道餃子仲出名!)

每人只花了65台幣就攪掂個晚餐~~ 

紅茶店就在公正包子店對面, 因為我飲咗豆漿再加埋啲包已經好飽了, 所以得老公買了一杯紅茶試試. 店內老伯由綱管的水龍頭口倒出紅茶, 味道偏甜, 沒有加冰但也夠凍.

晚飯後再周圍逛下, 附近都有些小商戶及大型家品店, 不過就沒有如台北夜市般熱鬧, 所以逛了一會就步行回民宿了.

沿住中山路行, 途中'遇到'這間地道小店, 門口攤著不同口味的台式滷味, 我哋觀察咗一陣, 就學著台灣人將食物夾到小盤內, 店員在將滷味切成小塊再用滷水浸泡一會, 打包就成為我哋帶回民宿的消夜了

滷味味道有點點咸, 最好味係豆腐, 夠入味, 其他如雞腎也很爽口, 正~

其實間中也會遇到呢啲滷味小店, 相信不同小店的滷味味道應各有特色, 未試過真係值得試一下 

10點鐘食完早餐後就出發嘞~ 包車司機大姐準時到達, 還準備了兩支冰俾我哋呢.

一路上大姐都會介紹沿路的所見所聞, 在前往清水斷崖途中, 她介紹我哋飲這店的檸檬水, 因為係每天製造, 買完即止, 我哋約10點半左右到達, 但杯裝已經售完, 所以買了一大支. 不過大熱天時, 飲這個確實好清新又解渴, 回程前我哋都飲得晒

買完果汁, 林大姐就車我哋去第一個景點: 清水斷崖

車程約15分鐘左右, 過了崇德隧道, 已見到一大地的士旅遊車停在一旁就即係到咗嘞

一落車, 已經嘩嘩聲! 除咗因為超級晒, 就係因為睇前靚到冇得輸的景色!

林大姐說遊清水斷崖仲冇另一個方法: 爬獨木舟

我哋在崖上真的看到有一大堆人跟著教練在海中暢'爬', 林大姐話一般都會爬大半天....我哋都係繼續坐車算了

 

為了避開遊行團人潮, 林大姐建議我們先吃午餐

11點半左右來到, 已有其他食客比我們早到了

餐廳以套餐形式, 可選300-500台幣(一人計), 我們點了300台幣的, 差啲食唔晒.

食品有10樣以上(相中只是部份...), 除了白飯外, 每樣餸菜我都係第一次食, 個湯比較清淡了點, 其他餸都好好食, 可以一試原住民的美食, 呢餐物有所值.

呢度屬於室外地方, 沒有冷氣只有數把風扇, 但不覺得太熱. 不過蚊蟲就難免了, 搽定防蟲劑就隱陣嘞

食飽飽又繼續行程.  

來太魯閣國家公園之前, 一定要做定功課, 因為公園佔地甚廣, 當中有不少步道(即係要用腳行的), 所以最好先同包車公司溝通下, 考慮景點(距離), 時間及個人體力應付到與否 (近日有景點有落石傷人的新聞, 包車公司都會因應情況告知遊客邊啲景點唔開放).

我哋的行程如下:
砂卡礑步道->長春祠->布洛灣+燕子口->錐麓斷崖 ->慈母橋->太魯閣牌樓

雖然有包車, 但好多景點都要步行的, 林大姐放低我哋再去泊車, 之後也跟著我哋走, 沿路再介紹景點, 所以雖然有點攰, 但看到大自然的鬼斧神工, 很值得一遊. 

包車行程最後一個景點: 七星潭

雖然叫做潭, 但其實係一個佈石春的石灘.  傳聞以前附近真係有零星的小水潭, 不過因為發展所以填了, 但因為七星潭個名好聽, 所以繼續用番~

來這裡吹吹海風, 感覺不錯, 稍為休息之後, 開始有點肚餓, 就坐車回市區了 

林大姐車我地到自強夜市後, 我們就道別(&付款)了.

這個自強夜市, 民宿主人已跟我們說過可以不去, 不過話晒都係地標之一, 而且都要食晚飯了, 咪嚟行一轉囉, 點知...

真係行一轉就完了

6點左右, 攤檔只開了6成左右, 大部份都係食店, 但全場都唔超過30檔(目測), 而且因為人多又迫, 好鬼熱.  試咗幾檔, 唔算好飽, 叫試過地道小食就走了. 

第一烤肉: 食品種類都幾多, 場內好似得呢一家.  試了牛肉, 雞肉及冬菇串, OK, 但個人覺得元朗的串X正啲

法式官財板: 唔知係咪最出名, 不過見係"長龍"店就排隊試試. 選了個黑椒牛肉味, 幾惹味, 似煎過的三文治, 有點油, 但唔錯, 每件送一杯凍紅茶, 正(因為實在太熱)
 

這間燒番麥, 即係粟米, 都幾有名氣的 (場內播著電視節目訪問), 人氣也不少, 因為等呢條粟米都等咗成半粒鐘...

粟米有三款'口味', 軟.硬.Q., 價錢以粟米的重量計, 我揀嗰條要100台幣

未試過咩為之Q, 所以就揀嚟試下

面層的醬汁咸咸甜甜的, 而Q的口感就幾特別, 啲粟米係煙煙靱靱的好似咬緊糯米咁

是日'行'程多, 所以食力下降, 食完條粟米就番民宿休息了. 

由民宿乘的士前往, 大約5分鐘左右就到了

松園別館位處一個小山丘之上, 可以遠眺花蓮市的景色.  別館前身為日軍海軍辦公室, 而家改為活動及展覽用途, 不過我哋呢日去到沒有活動又冇展覽, 但淨係嚟睇下景&呢度特別的日式建築也值回票價(門票票尾可當50台幣作園內消費添~)

因為的士司機介紹, 行完別館後, 我哋走到附近的日式將軍府參觀, 可惜這裡似乎日久失修又欠管理, 好多樓房都很破舊, 逛了一圈我哋就搭的士回程了 

搭的士回民宿攞行李後, 就往火車站走, 見仲有時間, 就在附近這家COFFEE SHOP食啲嘢再搭火車

兩個人點了一杯凍咖啡, 一杯凍蜂蜜檸檬茶+一客雪糕窩夫.  店員很細心提議叫個套餐+一杯嘢飲比較抵, 讚~

窩夫焗得很鬆脆, 熱炙炙的, 加埋朱古力漿, CREAM&雪糕, perfect match啦
蜂蜜檸檬茶好清新, 大大杯的又夠凍.

店內寧靜舒適, 客人唔多, 火車站附近食肆好少, 出發前來坐低飲杯嘢都唔錯 (尤其是在這大熱天時).

 

搭火車來到羅東, 時間尚早, 民宿還未有房攞, 所以放低行李後, 又搭番火車去蘇澳站, 去浸下冷泉~

冷泉分大眾池及個人湯屋, 我哋買咗個人湯屋(2人300台幣, 40分鐘), 原可以玩埋大眾池, 點知嚟到先發現攞漏咗泳衣, 結果只能浸個人湯屋了...

夏天嚟呢度, 真係樂而忘返的, 泉水好冰凍, (睇落)好乾淨, 池底舖咗石春, 浸一陣會發現身上有好多氣泡的, 好過癮~



 

午餐食得太少, 浸完冷泉之後我哋都好肚餓, 就到附近搵食嘞

下晝3點幾, 周圍的食肆唔多, 仲營業的更少, 行行下就搵到呢間小店

兩個人點了滷肉飯, 排骨麵, 老公無啦啦話想飲湯, 所以又點了個淮山湯.

滷肉飯好好味, 唔會話太咸; 排骨麵麵條煙靱; 個湯好清好甘甜, 試下無仿~ 

回民宿攞房~ 房間在二樓, 乾淨舒適, 設備用品都齊全, 最鍾意呢度個天台, 夜晚行完夜市, 買了點宵夜, 可以靜靜哋响度一邊食一邊睇星星, relax~

時值黃昏, 又未肚餓, 所以去行下公園~

這個林業文化園區佔地約20公頃, 非常之大, 中間有個生態池, 响呢度會見到好多唔同品種的雀鳥, 我哋沿住生態池邊的小路走了一圈, 感覺寧靜舒服

園內亦有堆小屋, 會有些文化藝術活動舉行及一些小店, 不過可能也晚了, 所以好多都已關門.

另外亦有一些舊火車卡及木製遊樂設施, 慢慢的走, 也閒遊了一個小時.

回民宿稍作小休, 就去羅東夜市搵嘢食.  由民宿到夜市, 只需2分鐘, 超方便.

夜市圍住羅東中山公園 (台灣真係好多中山公園~), 食肆小食檔林立, 亦有不少飾精品店, 一路行一路食, 我哋試咗幾檔地道美食, 都唔錯:

花技羮@魷魚王 (NT70) - 花技好爽口, 湯羮唔會太咸, 加了點沙茶醬(我估係), 好味

麻油雞&藥燉排骨@香城(NT100 & NT60) - 排骨好林, 個湯藥味勁重; 麻油雞就麻麻, 雞肉有點鞋, 個湯酒味太濃.

炸物@赤炸(NT130) - 揀了卜肉, 魷魚鬚&龍珠, 麻麻地, 食落幾樣嘢好似差唔多, 係熱炙炙, 不過個炸皮有點靱

蜂蜜芥末臭薯條@臭薯條 (NT40) - 仲以為係臭豆腐味的薯條, 原來真係臭豆腐嚟ga 只係變咗長條形~ 又幾好味喎, 還有帥哥睇檔

 

羅東夜市內有好多間買粉圓的甜品店, 全都晒魏姐和另一品牌的, 我哋食飽小食, 再周圍逛一陣, 就揀咗呢間試試, 因為店面較大較濶落, 座住亦交多

甜品組合有成幾十種, 不過都係豆花呀, 粉圓呀, 綠豆呀....之類的, 我就點了個綜合豆花, 乜都有啲

豆花和粉圓是分開上的, 豆花好滑, 不過口味就較淡, 好多豆, 所以好飽肚; 粉圓好似透明的湯丸, 又有啲似珍珠奶茶啲珍珠, 中間包住粒紅豆, 甜甜的, 好煙靱.

如果以經食飽小食, 其實兩個人叫一份已經好夠了~

之後就帶住包'臭薯條' 番民宿天台做夜宵~


 

沿住舊城南路行, 途中會經過一個大型商場 - 新月廣場, 原以為咁大個商場會有好多嘢食啦, 點知咁早得地下幾間連鎖coffee shop開咗, 食咗個星xx早餐, 食完行過馬路就到宜蘭設治紀念館~

紀念館其實以前一直係宜蘭首長的官邸, 1997年再整建成紀念館.

紀念館為日式建築, 入到去就好似去咗古時日本咁, 館內有關於宜蘭的歷史的展品; 面積唔大, 屋外有日式花園.  來認識一下宜蘭, 影下相也不錯

此館就在設治紀念館旁, 不過已改為一間茶室.  店主容許參觀茶室的一角, 我哋順道來影個相就走了

(這裡還有一賣點: 金城武嚟過呢度拍廣告喎...)
 

由設治紀念館出發, 再行多5分鐘, 又到另一景點: 台灣都幾多的 - 酒廠

之前响七星潭都有個觀光酒廠的, 不過因為時間唔夾所以冇去到, 今次順路就嚟宜蘭呢間睇下

酒廠有幾個館, 有銷售酒品的, 有展示釀酒過程及酒的歷史, 外面陽光猛烈, 入嚟行下睇下仲有紅

 麴香腸食, 唔錯呀~

臨走仲買咗兩個花雕.....雞碗麵今晚消夜

行完走廠, 就打的去另一個觀光工廠- 橘之鄉

嚟到呢度感覺似去到一啲遊客買手信的店, 店內有很多蜜餞款式, 也可以試食, 不過店內人唔多, 可以舒舒服服咁行

這裡會有蜜餞工作坊, 費用唔貴, 但需要預約

行行下見到呢度原來有間coffee shop, 就坐低抖下relax下

點了兩杯飲品, 加個橘子窩夫, 酸酸甜甜的, 好味~

悠悠閒閒咁坐咗成個鐘, 因為呢間coffee shop真係好舒服, 令人好relax.
 

又是一間觀光工廠, 但感覺折然不同, 因為呢度更像一間手信店

因為的士司機推介, 遊完橘之鄉, 沿大路行約7分鐘就會到阿典蛋糕, 話好多人都這樣玩呢, 所以我哋又行去睇下

一入到去, 左面玻璃房內會見到工人在焗連輪蛋糕, 整豆沙包(銅鑼燒), 中間就係商品區, 右面就一大堆遊客

見蛋糕幾得意, 於是買完蛋糕就走了, 相都冇影 

阿典蛋糕門口有免費巴士往宜蘭火車站, 不過就非常之疏, 好彩走嗰陣夾到時間, 所以就坐到嘞 (否則等的士都唔知要等幾耐...)

到咗宜蘭火車站, 見到附近有呢個好似荒廢的建築, 內裡原來有間二手書兼茶室, 我哋就行多陣先去搭火車嘞

書店唔大, 店外放了不少舊漫畫, 店內就有行多二手小說, 工具書, 旅遊書等, 仲有少少精品發售.

打咗一陣書釘, 都買咗一本二手書, 就結束是日大半DAY的宜蘭之旅, 搭火車去台北了 

因為係weekend, 所以台北的酒店好多一早就full booking了, book唔到心儀的, 唯有退而求其次搵咗呢間近火車站的商務酒店.

由火車站行去酒店, 原來都唔係咁近, 拉住行李都幾辛苦吓, 好彩Y13出口有電梯, 唔駛搬行李行樓梯算好彩了(但要注意Y13出口的開放時間, 因為試過夜歸(晚約10點後), 個出口係封咗的)

由出口行去酒店就好快, 2分鐘就到

酒店設在一座大廈的3樓, 房間如預料中細, 但算是OK的, 可以放到開到行李, 基本用品亦齊全.  最意外的是在房間櫃桶發現一張訂購熱門手信(如豬肉紙, 鳳梨酥)的order紙, 今日訂第二日就送到仲會pack好晒手提上機, 咁方便我緊係第一時間落order啦, 不過只收cash~ 

每次嚟台北都會嚟呢個夜市, 因為想食咩台灣小食都可以响呢度搵到.  以往嚟呢度都係搭巴士, 而家方便好多了, 一出松山捷運站就係~

一條街內, 台灣美食與精品服飾等等應有盡有, 如果同行友人唔多, 建議先行一圈, 揀選最想食得之後才'落手', 因為美食實在太多, 半條街都未行完就已經可以食飽了~

 

因為招牌寫住'百年老店' 而且店內冷氣開放喎, 所以就入去食碗蚵仔麵線~

店內座位都比較迫, 好唔容易先搵到個位, 一坐低店員就會問你食咩, 點完唔駛2分鐘碗麵線就送上, 超有效率~

蚵仔好脆口, 肥嘟嘟的好飽滿, 麵線唔會太碎, 湯底唔錯, 唔會太咸, 我個人比較LIKE呢間的口味

行完食飽飽再戰師大夜市, 可惜夜市已經冇以前咁熱鬧, 逛咗一陣, 買咗杯最愛的柳橙檸檬, 就打道回酒店休息了
 

是日車程係參考某台灣人的BLOG的, 因為由台北坐火車往新竹的車程較耐, 而且又要夾內灣線(車次約每小時一班), 所以就先搭高鐵至新竹(網上訂飛仲有早鳥優惠呢~), 高鐵站行去內灣線六家站(就响隔離), 搭內灣線至竹中再轉車遊內灣線, 車程如下:

9:00 – 9:31  台北高鐵à新竹高鐵

9:47 – 9:52  內灣線六家站至竹中站

10:10 – 10:43  竹中站至合興車站

11:43 – 11:52 合興車站至內灣站

(Ref.: 台灣鐵路網: http://twtraffic.tra.gov.tw/twrail/)

來到合興, 一落車就要開始拍照, 因為呢個站被打造成一個'愛情車站' (有關故事可以在網上找), 到處都是浪漫的拍攝點, 所以嚟呢度我影得最多相.  不過地方唔大, 遊一個鐘就夠, 天氣熱, 車站有雪糕飲品, 一路食/飲一路等車~

來到這裡, 覺得呢度有啲似九份+十分, 當然這裡路比較宽, 遊人亦相對較少, 店舖都係售賣一啲台灣小食, 麻糬呀米酒之類, 我哋响老街逛咗一陣, 行到盡頭就係出名的景之一: 內灣吊橋

在老街逛咗一陣, 就嚟到內灣村東面的地標 - 內灣吊橋

吊橋橫跨的河叫'油羅溪', 雖然望落好破舊, 但行過完全冇搖的感覺 (如果有就刺激了)

行到橋的盡頭, 那邊一片荒涼, 本來打算掉頭就走, 但被我哋發現咗一張寫住'往河道'的紙牌, 我哋就依指示方向走, 結果真的走到'油羅溪'呢~ (後來覺得有點危險, 好彩當時天氣好)

玩咗一陣水就沿路回橋上, 到內灣老街食晏 

雖然招牌寫住係'內灣戲院', 但內裡已經修復, 而家係一間客家菜館

不過, 裡面依然會放映一啲舊日的電影, 而我當日播的就係一套叫'小丑與天鵝'的台灣電影

講番個午餐, 雖然餐廳咁有特色, 但菜式又唔算貴喎, 平均都係幾十至三百台幣左右, 兩個人點一個炒板條+客家油雞

炒皮條類似炒河, 裡面有啲菜絲&咸肉條, 唔會太油, ok; 客家油雞原來係凍食的, 皮脆肉滑, 好鮮味, 正!

呢度唔可以齋入嚟參觀的, 內灣食肆唔多, 嚟食個客家午餐, 又有得食又有戲睇又可以參觀, 一舉幾得呢

遊完內灣, 就搭番小火車再轉火車回新竹市了

首先要解決的是兌台幣的問題, 原以為可以到新竹市的銀行兌台幣再玩, 點知番到新竹先知呢度啲銀行收3點半, 雖然我哋一落車已經跑去銀行sssss, 但好多一係收咗工, 一係冇得兌....响嗰個無助的情況下, 原以為要打道回台北了, 上網係咁search, 發現原來台灣郵局(地址: 新竹市北區英明街10號)係可以兌台幣的, 而且收5點, 所以最終有台幣可以繼續玩~ (但要帶台證, 手續也需時)

攞到台幣就去下午茶嘞~ (雖然呢度可以刷卡的)

因為驚好似香港嗰間要排長龍, 所以先在網上(openrice新竹page)訂位, 不過可能因為係平日, 所以嚟到冇乜人

兩個人每日各點了一杯嘢飲+一份蜜糖吐司(名字已忘記, 不過menu有圖參考)

吐司烤得好香脆, 濃濃的蜜糖味, 加埋豐富的cream&雪糕, 減肥計劃又要暫停

果茶係列配吐司會比較好, 因為朋友點了咖啡就非常後悔, 唔係杯咖啡唔好味, 係加埋個吐司真係超級之飽....(攪到之後個要食米粉都食唔落).

以下午茶嚟講算貴了, 不過服務好, 個場又舒服又靚, 都抵番ge.

除甜品外, 呢度仲有意粉之類的主餐, 唔啱食(尤其係男士們)都可以嚟(陪人)試試

食飽飽, 响大遠百貨(典型的日式百貨)逛了一圈, 就到附近周圍行吓

諗住再夜啲先去城隍廟夜市, 不過行咗一陣就到, 見商戶都開晒了, 所以就入去行吓

呢度最多的, 就係新竹最出名的 - 米粉

 

嚟到點到要食番出名的新竹米粉啦~

一入去夜市, 遠遠就望到大大個紫色招牌 "阿城號", 就揀咗呢間試

由於之前嗰餐 (約半個鐘前)實在太飽, 所以兩個人只點了一個炒米粉+貢丸湯

炒米粉個賣相平平無奇, 但食落先知正嘢! 好爽口, 炒得唔會太油, 如果唔係太飽, 我一個人可以食兩碟; 貢丸就一般啦, 彈牙的, 個湯就好淡. 

行完城隍廟夜市, 我哋就周圍閒逛, 行行吓就俾呢座建築物吸引

原本只在門外望下望下, 守門的警員話可以入內參觀, 只要保持安靜就可以了, 我哋就入去見識見識

大樓興建於日治時期, 西洋建築的風格保存至今, 有相當的建築藝術與歷史價值. 不過始終係政府機關的辦工室, 所以我哋都係安安靜靜咁行咗一陣, 影咗少少相就走了, 以免影響人哋做嘢(雖然當時已經晚上七點幾了).

 

遊完新竹市政府大樓, 我哋就沿住中正路走, 打算行去火車站回程了.

不過行到半路, 就被呢度的音樂聲和舞台燈光吸引住, 所以就停低睇下.

原來城門下係一個露天廣場, 當晚正舉行緊一個音樂舞蹈會, 好多年輕人响度跳舞唱歌, 好熱鬧~

能夠將古蹟融入城市中, 既係地標又為市民提供一個表演及發展藝術的地方, 真係值得借鏡一下. 

沿住中正路走到火車站, 就結束新竹一天之旅 

酒店冇包早餐的, last day的早餐, 我就落咗去酒店樓下, 即係華陰街睇下有咩好食

其實呢條街都幾多嘢食, 嚟嗰日見到有不少仲要係長(人)龍店呢~ 不過一早開的食店唔多, 見呢間都幾熱鬧, 所以就揀佢, 點咗兩個外賣攞番上酒店食

早餐選擇勁多, 有選擇困難症的我, 攞住張點餐卡揀咗好耐先揀到

揀咗一個叫'幸福' 一個叫'樂活'的套餐, 真係幾豐富, 有吐司有腸仔有沙律菜, 沙律菜會另外配一包醬汁的, 不過我冇用到, 就咁食都好fresh.  外賣的奶茶都夠凍~ 

食飽飽就執好行李check-out 了 

因為佢响香港的名氣, 我排咗成個鐘就係為咗一試呢個三文治....

之前一日去新竹已諗住嚟買件做早餐, 點知嚟到冇人, 只棟咗個牌寫住星期六開11am, 所以是日食完早餐check-out就過嚟買件試試

11點嚟到但仲未有人响店(counter)內, 不過就已經有廿幾人响度排緊隊, 等咗大概20分鐘, 卒之見到大人搭的士(?!)送嚟大大包一盒盒的三文治.

因為得一個店員, 而且要處理勁多的預訂單, 雖然得嗰廿幾人排隊, 結果都排咗成粒鐘...

買咗兩件：草莓起司&招牌起司

um...先試咗件草莓起司, ok啦, 士多啤梨醬多士囉, 麵包切到起角好整齊, 不過就....冇乜特別
另外嗰件招牌起司我哋攞到機場先食, 都係冇乜特別, 試過就算了, 台幣28蚊我覺得值ge~ 

食完件三文治, 就例牌去行吓'江南大批發', 入完貨就再去西門町行街嘞.

行到咁上下又肚餓, 就嚟呢間試下台灣出晒名的臭臭鍋~

原以為只係110台幣冇乜料到, 點知我實在太睇'小'佢嘞, 一人一爐, 食物份量同香港啲快餐一人一爐有得fight, 大腸臭臭鍋裡面有肉丸, 大腸, 菜, 大大件臭豆腐等, 仲配埋一小碗白飯, 嘢飲仲要係任飲的(雖然飲品味道一般), 唔駛加料都食到你飽飽, 真係超值!

台灣周圍都好多臭臭鍋, 三媽呢間响西門紅樓附近, 都幾就腳, 行到攰嚟打個邊爐都幾好.

之後行多陣就回酒店攞行李, 坐國光客運往機場了, 臨上機仲响候機室附近的食肆(好饗廚房)買咗個貢丸米粉餐(約200台幣)食埋先上機, 以'食'結束呢次台灣之旅