![]() | 最近分享過的旅程 | ![]() |
10多年前跟團到訪過首爾,當時仲稱為漢城,今回再次踏足韓國,目的地喺釜山、慶州、濟洲三地。香港人到外地自由行,喜歡「喪食」、「狂玩」、「瘋買」,我哋一行4人(小弟、太太、姨仔、舅仔)都喺「風遊」,只喺寒風伴遊,去到邊就吹到邊,寒風凜凜,吹到頭暈。
原打算11月中去喺最佳時節,但多方因素,難以成行,所以才推遲至12月中起行,開始此趟8天艱辛之旅。除咗寒風,讓我哋食咗唔少苦頭仲有氣溫同天氣,氣溫長期徘徊晌-1℃~6℃,晌慶州整日嘅長命雨,又食錯嘢,令我哋痾嘔肚痛發燒都嚟埋,亦喺小弟第一次外遊病到要睇醫生,仲有仲有……,想知我哋嘅行程喺點,請繼續觀看下文。
坐港龍飛釜山,開凌晨02:35機,對於唔慣捱夜嘅我哋,其實有啲辛苦,但每日就只得依個航班。06:40抵達釜山金海國際機場,第一時間去酒店寄存行李先,再去海雲臺Spa Land體會一下地道汗蒸幕,順道「恰一恰」瞓陣先
。食完午飯逛下好出名嘅海雲臺海水浴場逛,而路經嘅海雲台市場,亦值得打個轉了解當地(街)市況,黃昏時份,行完沙灘就啱啱好行到冬柏島,喺市內嘅睇日落勝地
。
大家行得攰,搵間麵包咖啡店嘆杯啡兼歇一歇,晚上再返回南蒲洞,逛一逛光復洞美食街,一嚐當地美食。因為我哋住晌中央洞附近嘅東橫Inn酒店,都喺隔一個地鐵站,行返去都喺十多廿分鐘嘅事。第一日行程到此結束,大家都要好好休息回下氣,明日再戰。
是日天氣:2℃ ~ 5℃ 天晴













尋日行咗咁多路,自不然好瞓。自由行有樣好,就喺唔使被領隊催起身趕行程。9:00am起身落去食早餐,早餐喺酒店包埋嘅,唔算好豐富,但一定夠飽肚。
今日第一個「景點」就喺距酒店幾個街口嘅40階梯文化觀光主題街,以及伏兵山壁畫村,然後順路行過去龍頭山公園,依刻日光日白睇睇釜山全景,原打算夜晚再上過嚟,登釜山塔睇埋夜景,但行程有變。之後行完都成1:00pm,都喺時間食晏,晌龍頭山公園另一邊路下山,偶爾經過一間日式飯堂,好多本地打工仔晌度食,我哋又走咗入去試吓。
下午行程,都比較輕鬆,就喺去太宗台行吓山同睇日落,因為擔心日落快,所以預鬆啲,不過又確喺預得太多時間,因為我哋晌南蒲洞坐巴士過去,其實幾近,半小時車程左右。睇完日落就出返去札嘎其市場。
因為咁啱姨仔有同事都嚟韓國玩,佢哋就遊首爾 + 釜山,今日下午由首爾過到嚟釜山,所以就相約晌札嘎其市場食海鮮大餐。由於餐飯食到好夜,加上聽日預咗一早出發去慶州(尚慶北道一個古城),唔想太夜瞓,故此就無再上龍頭山睇夜景。搭地鐵去釜山站買定聽日KTX火車票之後(KTX喺韓國嘅高鐵),就打道回府。
是日天氣:4℃ ~ 6℃ 天晴









之前兩日晌釜山去咗唔少地方,今日衝出釜山,去慶州,新羅王朝嘅古都,當地文化遺址處處,仍有很多古建築,算喺保持唔錯嘅古城。老實講,如果唔喺揀正秋天紅楓漫山嘅季節,又或你基於信仰不便參神拜佛,依個被聯合國教科文定為世界文化遺産嘅古都,未必好啱你嚟
!
一早起身食個飽飽嘅早餐先,由東橫Inn行去釜山站都喺20分鐘,地鐵車錢都可以慳番,極之方便。而嚟釜山站,就喺一試韓國高鐵KTX,由釜山往慶州,都喺半小時車程,未夠10:00am,就到達慶州。不過,今日天氣極之差,全日近乎未停過落雨,煙雨濛濛,而且氣溫徘徊0℃之間,又凍又大風,唔多好受
!
先去國立慶州博物館,諗住當喺避吓雨,點知睇完都仲落緊。沿路再去雁鴨池、半月城、石冰庫、瞻星臺、路經雞林,行到去近慶州市中心。此時此刻真喺飢寒交迫,大陵苑側有好幾間食店,就搵咗間專做旅行團嘅韓菜館,品嚐當地特色飲食「菜包飯」,相信就喺依餐,食到我哋又痾又嘔。天氣實在太差,所以決定食完飯,行埋大陵苑就離開慶州返釜山,原計劃好嘅普門觀光園區(보문관광단지)、新羅千年公園(신라밀레니엄파크)、晚上睇韓國正統音樂劇「貞洞劇場美笑:神國之地-新羅」……等,亦無乜心情去
。
不過,因為小弟一個錯誤嘅決定,令大家苦上加苦。回程想試試坐傳統國鐵,其一行錯路關係,要大家晌風雨橫橫行咗好耐先搵到火車站,其二跟售票員溝通問題,買咗車票先知仲要等大半個鐘才有火車,而車程竟然要兩個多小時
!唉,真救命呀!慶州,留下好多非常唔愉快嘅回憶
。
是日天氣:0℃ ~ 1℃ 陰雨












未天光,已覺得自己唔多妥,成晚瞓得麻麻,感覺頭重重,有啲燒,快到清晨仲嘔咗一鑊,尋晚餐日本嘢無晒。勉強撐落去酒店「飯堂」,完全無胃口,再問番姨仔、舅仔,佢哋都不遑多讓,成晚又痾又嘔。
原先打算一早退房兼寄存行李,去行甘川洞文化區(감천동문화마을),依家4個人有3個咁榭,一於返房再抖。但最「撈攪」喺所計劃嘅行程,今日下午搭機飛過去濟州,都唔好諗咁多,抖多陣先再算。由於東橫Inn喺10:00am退房,延遲退房要加錢,仲KRW11,000一個鐘,都無辦法,實在需要休息吓。
瞓多幾個鐘,差唔多到12:00pm,大家感覺都OK啲,一致決定照飛過去濟州先,因為機票、民宿都訂好晒,回程都喺由濟州返香港,始終都要過去。所以收拾好行裝,唔好再操勞,寧願花KRW13,600打的一程車去機場,半個鐘頭就到。乘搭釜山航空(Air Busan)BX8113(14:45 – 15:40)航班,搞好機位登記,好彩搭內陸機安檢唔緊,發住燒幾怕上唔到機呀!入到候機室再瞓過,點知航班延誤,無緊要,繼續瞓
,卒之3:50pm起飛,4:45pm到濟州,預訂好嘅民宿晌濟州市中心,坐的士KRW4,000就夠。
原本今日濟州嘅行程,打算晌民宿安頓好,就先去睇龍頭岩(용두암),再行東門市場及夜市(동문시장)及中央地下商街(증앙지하상가),飯後再睇場韓國出名嘅「亂打劇場」(제주난타극장),但全部取消晒。取而代之就喺瞓覺、睇醫生
。幸好,決定過嚟濟州先真喺明智之舉,因為出門遇上貴人 x 2,點解?睇埋下文講「診所之旅」同「民宿」時,你就會完全明白。多多休息,總算捱過今日,明天會更好
!
是日天氣:3℃ ~ 4℃ 天陰




抖咗一晚精神好啲,而濟州嘅天氣又比釜山好啲,所以,今日大家嘅心情都同步好啲。話雖如此,腸胃仍然要小心吓,所以,早餐都喺繼續簡簡單單、清清淡淡,食屋主崔姐姐嘅愛心白粥。
想大家玩得輕輕鬆鬆,唔好太緊湊,所以今日都只安排睇4個景點,都喺屬於濟州東區,啱啱好可以話晌濟州東面逆時針兜咗個大圈。10:00am先出車起行,出發我哋晌濟州嘅第一個景點:3D奧妙藝術博物館(트릭아트뮤지엄),其實個位置都幾遠,由濟州市中心揸車,都要45分鐘先到。
食完晏,下一個景點就喺較出名嘅濟州民俗村博物館(大長今迷你主題公園)제주민속촌박물관(대장금미니테마파크),亦都花得較多時間晌度,因為個地方真喺幾大。然後沿東區海岸線驅車往上走,向世界文化遺產之一嘅城山日出峰(성산일출봉)進發,由遠而近咁接近個景點,加上沿路有燦爛陽光,有廣闊海景,依刻心情特別開朗。而是日最後一個景點萬丈窟(만장굴),又喺世界文化遺產,不過行完之後感覺流流哋。
行完萬丈窟先6:00pm,不過出到嚟天都已經黑齊,仲見到月亮伯伯。幸好,萬丈窟離市中心唔遠,唔使1個鐘已返回民宿。返到民宿,崔姐姐已為我哋預備好窩心晚飯,備註:崔姐姐嘅民宿只包早餐,唔包晚飯,都喺見我哋病得咁慘先有此特別安排啫。
是日天氣:10℃ ~ 12℃ 晴








由於今日景點較多(雖然每個景點所花嘅時間唔長),所以都想早少少出發,又要有勞包車司機梁先生喇。可惜今日天氣麻麻哋,大部時間天陰,久唔久有陣雨

朝早時段,喺先到晌濟州市附近嘅龍頭岩(용두암)影影相,順路經過神秘道路(신비의도로),跟住就一直南下,向偏西面進發,玩埋濟州西區,包括:噢雪綠茶博物館(설록차 뮤지엄 오설록)、玻璃城堡(제주유리의성),之後前往西歸蒲市。
午餐過後,開去旅館嘅路途上,順便參觀埋天帝淵瀑布(천제연폭포)及柱狀節理帶(주상절리대)兩個自然景觀。大概5:00pm梁先生送抵我哋晌西歸浦市住上兩晚嘅旅館!安頓好一切,晌附近打個轉,感覺西歸浦市無咁繁盛,屬大型啲嘅市鎮咁,由於附近無咩大商場或景點可去

是日天氣:8℃ ~ 9℃ 陰.陣雨













由於之前計劃要晌濟州遊覽嘅景點都去晒,所以今日行程好隨意,好輕鬆,但都要醫肚先。餐餐韓國嘢,突然有少少懷念漢堡包,故此早餐走咗去「每日多萊市場」附近嘅Lotteria食早餐。之後,打的前往中文觀光園區(중문관광단지)逛一逛。
天氣突然變差,個天又灰又黑,原以為落雨,點知原來落雪,嘩!真喺意外收鑊呀。晌中文觀光園區內,有好多博物館及頂級住宿酒店,例如:泰廸熊博物館、信不信由你博物館、如美地植物園、樂天飯店、新羅飯店……等等。不過,我哋就去咗樂天飯店及The Seaes Hotel & Resort(韓劇秘密花園外景場地之一),又去咗濟州國際會展中心!
晏晝4:00pm返回廉宿休息一下,5:00pm再出動,貪無聊走咗入當地藝術家李仲燮藝術館,可惜唔多嘢睇。傍晚又去「飯卷天國」搵食,跟住去附近嘅Family Mart入入貨買啲手信及零食,早啲返回廉宿,收拾定行李,準備聽日回歸之路。
是日天氣:3℃ ~ 4℃ 陰.雨.雪







嚟到嘅旅程最後一日,行程都無乜點計劃,唔好搞咁多嘢,等大家瞓晏啲,因為1:20pm航班,由西歸蒲市坐機場巴士返濟州市又要成個幾鐘車,計埋有可能遇到啲阻滯,所以提早10:00am出發去機場。不過,小弟可能年紀大,晨朝早就醒鬼咗,又瞓唔番,所以就一支公去咗附近嘅新緣島跨海大橋睇睇,回程時,又無意發現仲有多一個世遺「景點」
。
時近中午,出到濟州機場,因為大家仲未食早餐,所以先晌機場整番碗鮑魚粥先上機。之後,辦登機、搞離境,一切都順順利利,準時1:20pm起飛,結束依次8日韓國嘅「釜慶濟 」之旅。
是日天氣:3℃~ 4℃ 陰




