為食小花
我是為食小花。
留言  留言給此旅遊家
  遊記數目 1
  上載相片 29
  上載影片 0
最近分享過的旅程
曼谷渡蜜月Sweet Sweet大食之旅
國家/地點: 泰國
旅程日期: 2011-05-12 至 2011-05-15
曼谷渡蜜月Sweet Sweet大食之旅 (泰國)
(旅程日期: 2011-05-12 至 2011-05-15 ,  旅程性質: 蜜月旅遊, 飲食購物)
發表日期: 2011-05-30

未結婚之前, 一直都諗住渡蜜月唔係去歐洲就係去日本, 點知老公趕住要開工, 最後只得四日時間, 本來都諗住揀D浪漫D既地方, 不過最終都係揀左曼谷, 因為我地兩個都鍾意食, 曼谷又多野食又平, 最啱我地啦, 出年等老公儲返D大假先去歐洲啦.

為左爭取時間, 我地搭最早果班機, 朝早七點已經去到機場, 去到酒店check-in都只係下午一點多, 仲有大把時間食好多野. 我地淨係頭一日(其實得半日)已經食左好多餐. Food court 啦, 街頭小食啦, 法國菜啦, 翅啦, 海鮮啦... 我之前為左結婚減去果十幾磅, 肯定一下子返晒黎, 無所謂啦, 最緊要開心, 肥小小有咩所謂.  

仲要多謝老公book左間咁正既酒店, 係就係貴D, 不過D服務真係超好, 值既值既.

L‘Occitane Bathroom Amenities
L‘Occitane Bathroom Amenities
Rose & Fruits
Rose & Fruits
Strawberry
Strawberry
Rose Paddle Heart on Bed
Rose Paddle Heart on Bed
Hotel Entrance
Hotel Entrance
Bedroom
Bedroom
我同老公都係做酒店的, 所以對酒店既要求特別高, Four Seasons出名貴, 亦出名得, 所以決定豪一次咁多啦.

我老公之前已經send 左email去酒店話呢個係honeymoon trip, 問佢地有無honeymoon amenities. 酒店好快就覆左佢話可以安排咩咩咩同咩, 如果要加咩咩咩既收費又係幾多幾多.

咩咩咩同咩包括房間內已安排好的士多啤梨伴朱古力醬及杏仁脆片, 好靓既玫瑰花, 生果盆同埋晚上的surprise. 就係我地夜晚食完飯返黎見到床上用紅玫瑰花瓣鋪成既巨型心心圖案, 真係好靓.

唔記得講check-in果陣既experience添, 個receptionist好親切既笑容, 好有禮貌地幫我地完成手續後, 祝我地新婚愉快, 仲親自帶我地去搭電梯上房.

OH, 不得不提Lobby Lounge 既紫色蓮花擺設, 好有品味, 好型. 入到房間, 我地捉住送行李既bell boy問呢問路, 佢都好耐心咁回答我地既問題.

間房雖然係舊D, 但係amenities一流, 用L'Occitane 既沖涼用品, 連拖鞋D質地都靓過人, 最讚係個執房職員, 我地住左三晚, 一次都未見過佢, 不過佢永遠都係我地一出左去就執到間房整整齊齊, 每次返黎都好舒服, 有時我地只係出左去一陣, 佢都可以好快手咁執乾淨間房, 而且手勢仲好好, 真係一D錯漏都無, 簡直無懈可擊.

仲要大讚酒店門口個職員, 有次我老公落左的士入酒店大堂, 個職員追上黎, 我地以為漏左野係的士度, 點知原來佢見我老公個眼鏡檬晒 (因為架的士太凍所以有霞氣), 個職員跑入黎俾紙巾佢抺, 好細心體貼.

另外有一日我地係酒店四圍影相, 有個女職員行過, 主動話幫我地影合照, 影完一張之後, 佢話效果唔好 (因為背光), 提議我地去另一邊再影一張, 又嘗試張相機調較到另一個模式, 希望可以影得靓D, 好欣賞佢做事認真, 唔會馬虎求其影左就算, 當然笑容亦十分親切, 總知每個職員都令人有賓至如歸既感覺.

最後一樣要大讚, 就係我地發覺呢間酒店大部分都係商務客, 好多外國人同埋個個都著得斯斯文文, 雖然係泰國, 但係都著晒恤衫西裝, 有一晚仲好似有大型宴會, D女士個個都著晚裝. 而我地兩公婆因為係黎渡假, 所以日日都著得好隨便, 踢晒拖鞋短褲咁, 但係D職員一D都無歧視我地, 無俾面色我地睇, 咁多日都好nice, 恭恭敬敬.

真係好滿意, 住得好舒服, 好開心!

評分: 設備5   服務5   環境4   衛生5   抵住4
Baby Clam with Cheese
Baby Clam with Cheese
Warm Chocolate Pudding
Warm Chocolate Pudding
Lamb chop
Lamb chop
Thai style lemon tea
Thai style lemon tea
Lobster soup
Lobster soup
Mussel and clam in cream sauce
Mussel and clam in cream sauce
Spaghetti
Spaghetti
Scallop and Prawn Salad
Scallop and Prawn Salad

幾年前同朋友黎過一次, 沒有太深刻印象, 只記得是一間抵食和好多人幫襯的法國菜. 今次重遊舊地, 見旅遊書又極力推介, 決定今次帶老公去食. 去到門口, 老公突然醒起, 食法國菜, 男士著短褲波鞋入唔入得架? 既然已經來到門口, 即管入去問下啦.

我地問個waitress: "Do you have any dress code? Can we dine here with shorts and sports shoes?" 佢個答案好奇怪: "Which hotel you stay?". 我地答: "Four Seasons". 然後佢就帶我地坐底左. 坐底之後我地諗返轉頭, 點解佢要問我地住邊間酒店呢? 如果我地唔係住五星級酒店, 佢係咪唔俾我地入黎? Anyway, 既然已經坐底左, 就食埋餐飯啦, 不過入黎第一個印象已經唔係幾好囉.

我地叫左一個 tasting menu, 就係佢地出左名抵食果個八道菜超平套餐, 1200銖再加一同加稅, 我地只係叫左一set, 另外再加兩個 a la carte, 大蝦帶子沙律, 同埋BB蜆配芝士及莧菜.

佢送多左一份餐前小食俾我, 不過都只係兩片小小的燒吞拿魚, 無令我覺得好感動, 之後續一上菜, 先講套餐果八度菜啦:

1. 燒吞拿魚: 嘩! 咁就算一道菜架喇, 得兩片 size 仲細過一隻麻雀既吞拿魚片, 唔怪得佢咁大方豪多一客俾我啦, 味道淡淡, 無咩特別.

2. 煎鵝肝: size 尚算正常, 但係煎得過火, 黑炆炆咁, 又係無味既, 唯有自己落多D鹽同黑胡椒.

3. 忌廉汁煮青口大蜆: 起初以為法國菜梗係用歐洲既藍青口啦, 點知我地高估左佢, 只係D cheap cheap 貨色, 個忌廉汁希希的, 仲以位係個湯, 後來真係上個龍蝦湯先知原來呢個唔係湯.

4. 龍蝦湯: 味道正常啦, 都算香濃, 不過真係唔夠熱.

5. 雪葩: 真正既法國菜係唔會當雪葩係其中一道菜架, 只係上主菜前俾你清一清個喉嚨.

6. 煙肉意粉: 太腍啦, 都做唔到 al dante, 失敗.

7. 洋架: 得一件, 太小家啦, 大盆點可以咁樣架, 望落好寒酸囉.

8. 暖心朱古力蛋糕配雪糕: D朱古力都無流出黎, 即係溫度唔對啦, 味道都OK既, 但係真係無一道菜值得推介囉.

講埋果兩道a la carte 先, 個大蝦帶子沙律可以話係成餐飯最好味既一道菜, 帶子煎到半生熟, 好鮮, 大蝦亦新鮮, 沙律個醬汁好開胃, 讚!

但係另外果味BB蜆就簡直係disaster, 全場最差, 油膩到不堪, 面頭D芝士焗過火, 好硬, BB蜆本來幾得意, 從未見過細到好似手指尾甲咁細粒既蜆, 不過真係好難食, 一碟有七堆, 我食左兩堆已經頂唔順, 寧願留返個肚去第二間再食過.

其實戲肉係佢地完全唔掂既service, 頭先講左一入黎既不愉快經驗, 之後全晚都無一個職員笑過, 個個都黑口黑面, 我問佢攞牙籤, 佢無應我但係好cool咁攞左俾我, 最憎就係D人唔答人, 無禮貌.

我果碟BB蜆差唔多無郁過就放抵, 佢地竟然一句都無問下你係咪有咩問題呀? 無呀, 就咁收左就算喇.

我地早黎(6PM), 根本無幾檯客, 成餐飯既中間我見個鬼佬大廚出入左樓面幾次, 但係佢都無話同D客人打下招呼, 傾下偈, 問下意見咁, 一D都唔pro 呀.

總知就係完全唔掂, 好想叫D旅遊書以後唔好再介紹呢間餐廳添呀.  

推介菜式: 無
每人消費: 約1000泰銖 (晚餐)
評分: 味道2   服務1   環境2   衛生2   抵食2
抵食海鮮 笑臉2011-05-30
Crab
Crab
Shark's Fin Soup
Shark's Fin Soup
Shark's Fin
Shark's Fin
炒蜆
炒蜆
鱸魚
鱸魚
獅蚶
獅蚶
魷魚
魷魚
到曼谷第一晚去左間好唔掂既法國餐廳食左個early dinner, 飯後係附近行左一陣, 好快又肚餓, 再去食消夜, 都係食返D穩陣D既, 去左李海泉食翅同海鮮.

紅燒翅600銖夠晒兩個人食, 仲有大大梳翅, 湯底味濃, 必食!

鹽燒鱸魚大大條, 隔離檯對鬼佬couple竟然一人食一條, 條魚燒到剛剛好, 又夠乾身, 正!

最後個明爐魷魚就差小小, 可能太大火, 好快就熟得滯, 有D "un", 早知叫燒魷魚啦, 應該會好食D.

有個識講廣東話既伙計, 服務好好, serve我地果檯有個女仔都好好招呼, 可能我地夜黎, 無咩客, 差唔多一檯一個人serve, 有貼身既服務.

隔左一日之後我地想食燒獅蚶, 醒起李海泉都有得食, 所以再去幫襯, D獅蚶雖然唔係好大隻, 但勝在夠新鮮, 燒好之後仲幫你開埋殼, 唔洗煩.

除左燒獅蚶, 仲叫左炒蜆同一隻燒肉蟹, 隻蟹真係啖啖肉, 好味!

個識講中文既侍應認得我地, 仲多謝我地再黎幫襯添.
推介菜式: 紅燒翅, 燒爐魚, 燒獅蚶, 燒肉蟹
評分: 味道4   服務4   環境3   衛生3   抵食5
炸蝦餅
炸蝦餅
椒鹽大蝦
椒鹽大蝦
燒魷魚
燒魷魚
我同老公都勁鍾意食海鮮, 所以不停去搵好食既海鮮, 呢間Somboon我地幾年前仲拍緊拖果陣黎過, 今次舊地重遊, 勾起不少甜蜜回憶.

我地叫左椒鹽炒大蝦, 炸蝦餅, 燒魷魚, 燒肉蟹, 同泰國芒果.

椒鹽大蝦略嫌濕左D, 唔夠香口. 炸蝦餅好鮮好彈牙. 燒魷魚就一般, 無咩特別. 隻肉蟹最正, 隻蟹鉗超大隻, 好似手掌咁大, 啖啖肉, 好鮮甜, 好味.

我見檯檯都有點咖喱蟹, 應該係招牌菜, 不過我地都係鍾情於燒蟹, 因為香港好少地方食到好味既燒蟹.
推介菜式: 炸蝦餅, 燒肉蟹
評分: 味道4   服務3   環境3   衛生3   抵食4
香薰
香薰
木雕
木雕
榴槤
榴槤
香港人最鍾意shopping, 去曼谷一定要去翟道翟, 好多野買, 用黎做手信最啱.

翟道翟只係星期六日先開, 我地去果日落勁大雨, 又無帶傘, D坑渠塞住晒垃圾, 真係無晒心情.

最後只係買左三樣野:

1. 香薰油 - 有幾間望落好靓, 離遠已經聞到香味, 但係價錢重靓, 同香港差唔多, 梗係唔買啦, 後尾見到一間up up dup dup既, 但係超平, 有好多種味道, 當然有D係古怪味, 但係亦有最common 既jasmine, lavender, rosemary等等, 我一次過掃左四大樽. 而家屋企點緊jasmine, 起初以為咁平實好淡味, 點知又唔係喎, D味道可以last好耐, 有時支蠟燭熄左, D味都可以維持好耐.

2. 木雕 - 買左個元寶形既木碗, 手工好好, 行均成個翟道翟得一間有呢個款, 250銖講價講到200銖, 而家用黎裝大銀, perfect!
 
3. 榴槤 - 我最愛榴槤, 一個人可以食半個, 去到泰國點可以唔食返夠本. 翟道翟附近有個街市, 有冷氣有椅坐, D榴槤一舊舊用紙包住下半部, 方便客人即買即食, 唔會整污糟隻手, 排得整整齊齊, 仲可以試味, 試啱邊舊買邊舊. 泰國D榴槤同香港買到的泰國榴槤好唔同, 特別香濃幼滑, 但係都唔平架, 我買左一大舊(有三粒核)都要成港幣50幾蚊, 不過真係好好食呀, 香港完全食唔到. 

 
推介項目: 香薰油, 榴槤, 木雕
參觀時段: 早上
入場價錢: 每人0泰銖
評分: 值得去5  
  3 個留言    |  加入你的留言