check in完，食過蕎麥麵，我地便坐長野電鐵去須坂市的臥竜公園。

臥竜公園是全國100大賞櫻名所之一，我地都好期待，希望可以再一睹櫻花怒放的壯觀場面。

到達須坂站後，唔知坐咩車可以去到公園，只知旅遊書話可以步行約廿分鐘即達，於是我又利用僅識的三兩個單字日語加文字表述去問路。問左幾個路人，都係雞同鴨講，終於問到個靚女，居然肯推著單車，陪我地由車站一直行成三十分鐘，身水身汗到達臥竜公園，實在感激不盡！

到達公園外圍，已見湖畔櫻花處處，遊人絡繹不絕，有Ｄ人坐船仔遊湖，有Ｄ人就地野餐，櫻花樹下更有不少飲食和玩樂攤檔，好似園遊會咁熱鬧，不過非常有秩序，一Ｄ都唔擠擁，又唔嘈吵，日本人的民族性真係值得我地學習。

我同朋友當然不斷係咁影，朋友又再次長短鏡交換拍攝，再加傻瓜機同Standard鏡，三鏡一機輸流係咁影，影到不亦樂乎！

須坂市臥竜公園

交通：由長野電鐵坐車至須坂站（約廿分鐘），下車後在站的右方向上行，約步行三十分鐘

第二日，我地坐車去長野，又再搭長野電鐵，不過今次坐特急快車前往湯田中總站，然後再坐前往上林溫泉巴士，約十分鐘下車，慢慢行上山去野猿公苑睇馬騮仔出浴！

由於前兩日天氣下降，加上呢度係高山地區，所以沿途仍然見到唔少積雪，部分開始融雪，搞到山路濕立立，一腳都係泥濘！不過，見到積雪，乜都值回票價啦！再污糟都無問題啦！

經過半小時的山路後，終於到達地獄谷溫泉，據講馬騮仔就係睇到呢度旅館的人浸溫泉，於是有樣學樣，浸埋一份！

平時見城門水塘的馬騮蝦蝦霸霸，就見得多，但講到睇佢地出浴，仲要係浸溫泉，真係奇景！而且呢度的馬騮仔好乖，唔怕人，但又唔會騷擾人，更加唔會搶人野咁兇險，完全活在自己的世界之內！你有你影，佢有佢浸溫泉、曬太陽、嬉戲玩樂，不知幾開心！

地獄谷野猿公苑
入場費：500日圓
開放時間：夏季8時30分～17時 冬季9時～16時
交通：搭長野電鐵長野線湯田中站下車，再在車站旁轉搭巴士約10分鐘，在上林温泉站下車，再徒步30分
網址：http://www.jigokudani-yaenkoen.co.jp

逛完郊外風光，係時候在長野市內遊。

一直打算去長野市的觀光中心－－善光寺，可惜日日行完原定景點後，都接近傍晚，搞到第三日先至可以探訪呢間著名古剎！

我地由長野站出面坐一號巴士，十分鐘便到達善光寺。我地先經過商店街，兩旁的商店充滿江戶時代的建築特色，賣的都係當地著名土產和精品，當然唔少得栗子、蕎麥麵等。善光寺據說創建於7世紀，係國家級重要文物，面積達6萬平方米，我地左行行右行行，見到好多唔同的神像，亦都見到唔少盛放的櫻花樹，在古剎映襯下，景致更迷人，於是我地把握最後機會，狂拍照留念！

影夠相後，先到達主殿，只見參拜者絡繹不絕，就連售賣平安符的小店都擠滿左人！

拜完佛後，我地開始最後掃貨，首次來日本的朋友結果買到一手都係野，搞到要去無印良品買左個大袋裝佢的戰利品，都咪話唔誇張！

善光寺
開放時間：5時30分～16時30分
網址：http://www.zenkoji.jp/
交通：長野新幹線長野站下車，轉搭一號巴士10分鐘在善光寺大門站下車

長野位於日本中部，出名的係蕎麥麵，而非拉麵。既然如此，當然要搵一餐品嚐呢度的招牌食品啦～

結果我地揀左呢個旅程最後一餐，到長野車站左面旁的食街，搵左一間人氣極盛的食店－－高山亭蕎麥麵店，試試呢度出名的美食。

我揀左配熱湯的蕎麥麵套餐，朋友就揀店內熱門推介的凍食蕎麥麵套餐。

食完呢餐，為呢次賞櫻見雪長野行劃上一個完美句號。

有機會的話，我相信我都會再到長野呢個中部地區，享受森呼吸的大自然之旅。