Handsome XO
我是Handsome XO。 我最喜愛到日本旅遊 , 最鍾意遊覽主要地標, 住宿通常會揀4星酒店。
留言  留言給此旅遊家
  遊記數目 117
  上載相片 4013
  上載影片 3
最近分享過的旅程
2018年聖誕遊東京
國家/地點: 日本
旅程日期: 2018-12-23 至 2018-12-28
2019瑪麗皇后二號郵輪八天遊
國家/地點: 新加坡, 越南
旅程日期: 2019-03-05 至 2019-03-12
2018台灣四天美食之旅
國家/地點: 台灣
旅程日期: 2018-11-23 至 2018-11-26
2018美加探親兩週遊
國家/地點: 加拿大, 美國
旅程日期: 2018-03-27 至 2018-04-07
2017京阪神六天遊
國家/地點: 日本
旅程日期: 2017-11-08 至 2017-11-13
2017台灣婚禮三天遊
國家/地點: 台灣
旅程日期: 2017-04-20 至 2017-04-23
2017溫馨家庭大阪四天遊
國家/地點: 日本
旅程日期: 2017-02-23 至 2017-02-26
東京豪食三日兩夜自由行
國家/地點: 日本
旅程日期: 2016-09-09 至 2016-09-11
2016鑽石公主郵輪東瀛遊
國家/地點: 日本, 俄羅斯
旅程日期: 2016-08-30 至 2016-09-09
2015台北怒食三天遊
國家/地點: 台灣
旅程日期: 2015-11-18 至 2015-11-21
多倫多探親五天遊 (加拿大)
(旅程日期: 2011-04-13 至 2011-04-17 ,  旅程性質: 探訪親友)
發表日期: 2011-05-09

為左善用只有七日既有薪年假,今次專登喺復活節假期前七日出發,並揀選左國泰最早嗰班直航機先去加拿大探望契公契婆。

我地乘搭CX 828,早上10點幾起飛,所以7點前已經出左門口,真係返工都冇咁早。唔知係咪冇乜人咁早出門呢,國泰嗰經濟同商務counter都唔洗排隊,我地15分鐘內就辦妥好登機手續。香港機場亦冇好似往年咁繁忙,離境手續同保安檢查效率更高,10分鐘搞掂。結果我地喺國泰個貴賓室磨左個幾鐘頭先上機。

服務奇差 ok喇2011-05-09
Duck Confit & Goose Liver Terrine
Duck Confit & Goose Liver Terrine
Tomato Salad
Tomato Salad
agnès b. Amenity Kit
agnès b. Amenity Kit
Steamed Chicken w/ Yunnan Ham & Bamboo Shoot
Steamed Chicken w/ Yunnan Ham & Bamboo Shoot
Fresh Seasonal Fruits
Fresh Seasonal Fruits
Garlic Bread
Garlic Bread
Flat Egg Pasta w/ Pumpkin, Mushrooms & Cheese
Flat Egg Pasta w/ Pumpkin, Mushrooms & Cheese
Barbequed Duck in Wonton Noodle Soup
Barbequed Duck in Wonton Noodle Soup

因為爸爸太大隻,要坐15個鐘頭既經濟客位太辛苦,所以一家人遠行就益埋小肥既XO仔有得坐商務機艙

座位用cubicle式隔開,打斜形設計,腳向住路口,好夠私人空間。張櫈更可以180度平訓,對腳可以伸展得非常舒服。不過請留意:體重二百磅(二百頭嗰隻wor),身高5尺10既爸爸有個大肚腩,佢都只係覺得個位既size啱啱好,所以唔知道如果再肥D坐唔坐得落架

電視機喺座位既內側撳出黎,好容易操控。機上提供既影片,音樂,遊戲,夠新夠多選擇,訓唔着都大把野可以做。Headphone既隔音亦做得好好,成功地增加左喺飛機上睇戲同聽歌既享受,讚。

上機後,擺放好行李,扣好安全帶,空中小姐好快就比杯飲品我地(共有四種選擇:橙汁,蘋果汁,香檳,水)。起飛後冇耐佢就攞左個 "agnès b." 既 Amenity Kit同餐牌比我地睇。唔知印刷費係咪好貴呢,定係個餐牌有寶,揀完食乜做午餐,佢好快就收左個餐牌,搞到我要上網抄錄返食左D乜。

中午前空中小姐們就開始忙碌地派上我地揀左既午餐同餐飲:

1)     Duck Confit & Goose Liver Terrine:一款涷到我牙都震埋既頭盤,係人都有既;雖然味道唔錯,不過因為涷得滯所以硬左少少。

2)     Tomato Salad:都係涷,不過好在唔酸,所以都食哂。

3)     Steamed Chicken w/ Yunnan Ham & Bamboo Shoot:中式主菜;雞肉同飯都夠熱,不過D飯就硬左D,雞肉個汁就太過味精,搞到XO仔要食藥同飲可樂去解返。

4)     Fresh Seasonal Fruits:唔甜唔酸,不過就好涷好硬。

食飽後睇左陣電影,再午睡片刻,大概六點半又有得食啦,今次係晚餐:

1)        Garlic Bread:成程機最美味既一味;麵包熱辣辣軟腍腍,蒜味好香濃。

2)        Flat Egg Pasta w/ Pumpkin, Mushrooms & Cheese:西式主菜;味道淡,麵條偏硬,個汁又杰又槳住個口,非常之溜,食完重有少少胃痛添,失敗!

除左用餐時間,全程都好少見倒有空中小姐經過;只係關大燈後攞過樽水黎就失哂蹤。因為個晚餐唔係好得,大概深夜時個肚就喺到叫,諗起餐牌中提及過有燒鴨瀨粉同雲吞麵食,所以就撳左個制問空中小姐。唔知係咪嘈醒左佢呢,佢個樣好兇地話要睇下有冇wor。等左佢成十分鐘後先返黎話我知機上有燒鴨同雲吞,不過冇瀨粉,燒鴨只可以配雲吞麵。(唔怪得知要咁快收返個餐牌啦。)因為曾經喺機上食完雲吞眼都腫埋,所以今次就叫左碗燒鴨跟雲吞麵;意外地鴨肉好嫩,不過個湯同麵就太勁味精,食完喉嚨又乾又粉。

總結:對我個人黎講,座位舒適,娛樂豐富,不過膳食太過依賴味精,最差勁既就係空中小姐既服務態度,不單唔會睇下乘客有乜需要,有需要時重要黑面神上身,惡劣中之惡劣!

每人消費: 約20837港元 (其他)
評分: 味道2   服務1   環境4   衛生2   抵食1
  0 個留言    |  加入你的留言
發表日期: 2011-05-18

其實早十多年前我地一家四口曾經黎過加拿大遊玩同探望契公契婆。大家講起既時候,哥哥重記得好多細節;無奈XO仔當年年紀小,記憶實在太模糊,只係有印象坐過飛機同玩過雪球。

今次契公契婆專登安排喺我地訪多倫多既第一日,帶我地上全國最高既CN Tower內既旋轉餐廳食lunch,一覽多年來既變化同發展。攞左國際車牌既XO仔,為方便大家出入就租左架有GPS既七人車代步。有契公帶路,第一站既CN Tower都好易去;加上有GPS教路,搵位泊車一D都唔難。

食完一頓豐富既午餐,睇完咁靚既景,大家返去午睡片刻,黃昏再出動返回市中心既Epic餐廳食晚飯,慶祝一個特別既日子。

一覽無遺 笑臉2011-05-18
多倫多市中心
多倫多市中心
多倫多市中心
多倫多市中心
多倫多 + 魚魚
多倫多 + 魚魚
魚兒在空中游玩
魚兒在空中游玩
多倫多一掃全景
多倫多一掃全景
多倫多高速公路
多倫多高速公路
The Billy Bishop Toronto City Airport
The Billy Bishop Toronto City Airport
CN Tower 中之 360 Restaurant Menu
CN Tower 中之 360 Restaurant Menu

CN Tower原名為“Canadian National Tower”,後因股權變動關係而改名為“Canada’s National Tower”,但加拿大人普遍都只用簡稱“CN Tower”。據小册子講:自1976年建成後,CN Tower就成為世界紀錄大全中全球最高既塔。不過,經求知慾極強既XO仔上網查證後,發覺有一點小册子係冇提及到既:就係依項世界紀錄已經喺2010年9月被中國有“「小蠻腰」之稱既廣州塔打破左啦!

唔知係咪驚有恐怖襲擊呢,一入門口就要排隊過一個好大風既檢測機,測試睇下我地身上會唔會有炸藥或武器既殘餘物。排隊時有位工作人員幫大家影合照既,遊客離開時可以憑票買相;諗深一層,就算遊客唔攞走幅相,佢地都可以攞黎做記錄bor!喺檢測機內過程長達分幾鐘,頭髮被吹散哂之餘,有耳鳴既媽咪比佢搞到又暈又耳痛,大叫辛苦。過完機,重有位手持電子棒既保安哥哥抽人掃身檢查!計下條數先發現入去CN Tower觀光總共要過三種保安系統,都幾誇張!

契公契婆當日喺CN Tower為我地訂左既午餐(48加幣)已經包埋上塔內既“Look Out” 同 “Glass Floor” 觀光層,不過條件係每人要叫一個主菜。請注意:如果唔食午餐,依兩層“淨睇”既入場費都要成22.99加幣,所以個人覺得食埋個lunch低好多囉!

顧名思義,“Glass Floor” 既賣點係佢用玻璃造成既「地窗」,比冇懼高既朋友們企喺342米高空上感受下。講真嗰句,小弟未行到埋去已經覺得搖搖欲墜,暈暈地;哥哥就犀利啦,企完喺「地窗」上,重可以出埋去露天處吹風添,當真佩服佩服。

至於“Look Out”層呢,雖然有收費望遠鏡,不過點都唔及旋轉餐廳內睇景咁舒適;唔洗同人爭位影相外,旋轉餐廳既景係360度既,而“Look Out”既景只係180度。
(以上既相片全部都係喺餐廳內拍攝既。)

推介項目: Glass Floor
參觀時段: 下午
入場價錢: 每人22.99加元
評分: 值得去5  
餐桌上既擺設
餐桌上既擺設
Warm Cauliflower Veloute w/ Blue Ermite Cheese
Warm Cauliflower Veloute w/ Blue Ermite Cheese
360 Caesar Salad
360 Caesar Salad
360 Seafood Salad
360 Seafood Salad
Braised Rosemary Scented Lamb Shank
Braised Rosemary Scented Lamb Shank
Slow Roasted, Aged, Canadian AAA Prime Rib of Beef
Slow Roasted, Aged, Canadian AAA Prime Rib of Beef
Warm Apple & Almond Strudel
Warm Apple & Almond Strudel
Dark Chocolate Tower w/ Preserved Summer Fruits
Dark Chocolate Tower w/ Preserved Summer Fruits

好欣賞餐廳定名為360,簡單而又包含到旋轉餐廳既特點,好有深度!上得黎食野都係為左個靚景姐,所以室內裝修光猛得黎要保持得簡潔,先唔會喧賓奪主。樓面好夠高,無論係咪坐喺窗口旁,每位客人都可以透過大大塊既玻璃窗欣賞倒多倫多既景色。好感動佢連餐具都亮潔如新,唔講真係唔知個塔年紀重大過哥哥。

每份午餐定價為48加幣(未加稅同服務費),包左頭盤,主菜,同甜品;淨係睇相都知道份量大得驚人。

頭盤:

1)  湯:Warm Cauliflower Veloute with Blue Ermite Cheese埋到個位先酙落個碗,夠哂熱辣辣,而且幾有睇頭;哥哥話味道比較濃郁。值得一讚既係餐廳非常落意地為媽咪同契婆攞起佢地唔係好食既Blue Cheese。

2)  沙律:360 Caesar SaladD菜夠新鮮爽脆,不過D煙肉就比較硬同韌。

主菜:

1)    360 Seafood Salad with Shrimp, Scallops, Smoked Salmon, Crab and Mussels哥哥話所有海鮮都好夠味,而且好新鮮,所以極力推薦依款唔肥膩既海鮮拼盤!

2)    Braised Rosemary Scented Lamb Shank媽咪話好少香港人會選擇依個部位黎煮。喜歡食羊既爸爸話個羊膝好滑好腍,非常野味,又夠火候,煮得好有技巧,一D都唔肥膩,讚不絕口!

3)    Slow Roasted, Aged, Canadian AAA Prime Rib of Beef每客成隻碟咁大,以我同媽咪既食量只可以分一份黎食,然後打包另外嗰份。烹調既時間掌握得好好,牛扒好夠味,非常之啱我依個食肉獸既口味。

甜品:

1)    Warm Apple and Almond Strudel對媽咪黎講就甜左少少,不過哥哥話可以接受;暖食個味道好溫和地清香。

2)    Dark Chocolate Tower with Preserved Summer Fruits味道比平時既Dark Chocolate甜,所以伴碟既生果係必需既,因為可以令到整個朱古力塔冇咁溜。

可以一邊食好野,一邊欣賞靚景,一次過可以滿足哂視覺同味蕾既享受,掂!

推介菜式: 360 Seafood Salad,Braised Rosemary Scented Lamb Shank,Canadian AAA Prime Rib of Beef
每人消費: 約70加元 (午餐)
評分: 味道4   服務4   環境5   衛生5   抵食4
開放式廚房
開放式廚房
Truffle Mushroom Cappuccino
Truffle Mushroom Cappuccino
Lobster Risotto
Lobster Risotto
Vanilla Creme Brulee
Vanilla Creme Brulee
超正麵包
超正麵包
Seared Bigeye Tuna & Peekytoe Crab Cake
Seared Bigeye Tuna & Peekytoe Crab Cake
Northern Woods Field & Forest Mushroom Chowder
Northern Woods Field & Forest Mushroom Chowder
British Columbia Black Cod
British Columbia Black Cod

當日喺媽咪既生日,所以為免有任何閃失,爸爸喺香港未出發前已經做定功課,搵左間連佢喺加拿大既朋友們都大讚既西餐廳同媽咪食晚飯慶祝。由選擇,到訂位,確認,以至所有特別安排都係爸爸一手包辦,佢對媽咪既愛簡直係盡在不言中啦!

爸爸選擇既Epic係多倫多一間歷史悠久既殖民地式酒店內既法國餐廳;據佢形容,依間Fairmont Royal York酒店同香港既半島酒店有異曲同工之妙。酒店位於多倫多核心地段,而且好近我地朝早去過既CN Tower,所以都好容易搵;佢地亦有代客泊車服務,非常方便。

餐廳內暗淡既光線好有情調,氣氛都好羅曼蒂克。古式既傢俬襯托住開放式既廚房,令大家可以感受到室內設計師既心思:保留倒酒店既歷史味得黎又追得上潮流。不過似乎歷史悠久既唔止係間酒店囉,因為服務生都屬於叔叔伯伯級。

餐牌只有一頁,大家可以選擇Prix Fixe(45加幣/配埋酒就75加幣)或散叫。我地叫完哂食物同飲品,佢就攞出熱烘烘既雙色餐包出黎。嘩,個樣已經夠靚,食埋落口簡直係頂呱呱:新鮮熱辣既麵包好軟熟,又唔乾,加埋牛油既香味,真係超正!(大家黎幫襯就一定要試,唔係真係走寶!)

頭盤:

1)    Prix Fixe湯)Truffle Mushroom Cappuccino松露味唔重,蘑菇蓉唔杰,味道夠得黎又唔會溜,所有材料既份量都掌握得非常好,好精彩!

2)    Northern Woods Field and Forest Mushroom Chowder(14加幣):味道好濃烈,但都可以做到唔溜。

3)    Seared Bigeye Tuna & Peekytoe Crab Cake(20加幣):蟹餅皮脆餡嫩,蟹肉鮮甜,契公大讚且推介!

主菜:

1)    Prix FixeLobster Risotto意外地,做得好細膩既一味,雖然談不上嫩滑,但係好難得龍蝦肉完全唔嚡,代表廚藝有返咁上下;味道可以做到濃而不咸亦要讚賞;飯既份量適中,所以飽肚得黎唔會滯,好啱feel既一味!

2)    British Columbia Black Cod(34加幣)契公契婆都拍手叫絕,美味香口,魚肉夠嫩。

3)    ‘Spring Creek Ranch’ Beef Striploin Steak 10oz(43加幣)哥哥話好有肉味,肉質正常,汁液既味道調教得唔錯。

甜品:

1)    Prix FixeVanilla Crème Brûlée好睇得,只係甜左少少,生日蛋糕好食D。

2)    生日蛋糕掛住唱歌,所以唔記得影相。蛋糕每人兩小片,一黑一白,份量安排得剛剛好,味道又唔會太甜,又一讚!

可以食倒依頓色香味俱全既大餐,全部都係爸爸既功勞,真係感激萬分!

推介菜式: Truffle Mushroom Cappuccino,Seared Bigeye Tuna & Peekytoe Crab Cake,British Columbia Black Cod,Lobster Risotto
每人消費: 約150加元 (晚餐)
評分: 味道4   服務4   環境5   衛生5   抵食4
  0 個留言    |  加入你的留言
發表日期: 2011-05-20

我同爸爸都有個「中餐肚」,每次去親遊埠都必定要周圍搵中餐食既。今次黎多倫多我地一D都冇擔心過,因為一早已經聽聞九七好多中國人移民左去加拿大,當中包括好多大廚,所以多倫多有好多正斗既中國野食。

咁啱日日架車都經過幾間粥舖,我地就向契公契婆提議搵日午餐食粥,佢地就好客氣地立刻打電話訂定位。佢地揀既皇后名粥喺嗰區附近都有三間分店,一D都唔講得笑!我地一家人食後既感想都係皇后名粥比香港任何一間粥店簡直係有過之而無不及呀,所以真係旺得有理,大家黎多倫多一定要試下!

旺得有理 笑臉2011-05-20
燒味雙拼(燒鴨 + 燒腩仔)
燒味雙拼(燒鴨 + 燒腩仔)
雜菌竹笙六穀粥
雜菌竹笙六穀粥
香茜牛肉炸兩
香茜牛肉炸兩
白雪公主?!
白雪公主?!
牛利酥
牛利酥
皇后大粥
皇后大粥
豉椒排骨河
豉椒排骨河

環境,衛生,服務:

皇后名粥位置非常顯眼,個招牌又夠大,好容易搵倒。門外全部都係免費車位,真係好方便。雖則係粥店,但地方一D都唔「up dup」;裝修簡單,唔老土,間隔闊落,樓面高,又夠光猛;坐卡位或者散枱都咁舒服。最特別係粥店入面設有個外賣部,重要好多人出出入入架:好多都係打定電話黎叫埋野食,其他就因為黎到冇位,又唔想等,所以索性買返去食。

星期五既午市,一間喺外國既粥舖都可以由十一點爆到下午茶時間,天氣咁涼條隊重要排到出門口,真係厲害!契公契婆訂定位我地都要等成十分鐘,真係唔敢想像冇訂枱要企喺到等幾耐。

所有乾淨既餐具都擺放喺個大膠盤入面,又唔洗用枱布,所以熟手既伙計們執枱都好快捷。負責我地張枱嗰位哥哥仔都算有耐性,幫我地開完茶又冇吹我地落單;我地諗緊既時候又肯解答我地D問題,重提點我地可以點叫餸,感激感激!

味道:

1)    油條($1.60)油條既色澤清而不濁,好似新鮮炸出黎咁,而且油應該唔係翻用既;咬落清脆唔油膩,雖然係食緊炸物,但感覺都好健康。

2)    牛脷酥($1.60)真係好巨型呀,好在佢同我地切埋。牛脷酥似乎重少油過油條,味道唔會過甜,非常香口,買黎做早餐一流,正!

3)    香茜牛肉炸兩($3.99)喺餐牌倒見倒咁特別既配搭,所以就叫左黎試下。炸兩就食得多,有餡既炸兩都係第一次食倒,可以一次過食兩款腸粉,認真有創意!炸兩夠脆,同香茜牛肉既味道好夾,連豉油都調教得好,簡直係冇得彈呀!

4)    雜菌竹笙六穀粥($6.99)據餐牌所寫,六穀為「短糙米、去穀大麥、法國赤米、莓子黑米、紫大麥、日本超短米」,「有助改善肌膚、美白、舒緩神經緊張、低膽固醇」,聽落咁健康,所以就叫左碗細既黎試下。味道比想像中好,起碼唔苦,又唔會淡而無味;只係六穀米好容易黐牙。

5)    燒味雙拼(燒鴨 + 燒腩仔)($9.75)燒腩仔皮脆肉嫩,肥瘦均勻,香口又夠肉汁,真係頂呱呱!燒鴨一D都唔肥,但係肉質都可以咁嫩,而且唔乾,真係非常難得,大家都好欣賞!

6)    皇后大粥($9.95)雖然餐牌上有「皇帝大粥」(材料包括蝦球、五丸、墨魚片、柏葉、肉片、雞蛋、牛肉片),不過黎得皇后名粥就更係要試左「皇后大粥」先啦!材料包括櫻花蚌、蝦球、帶子、三文魚、斑球、蟹柳。因為好足料,所以淨食粥都已經好鮮甜;粥料既質感一D都唔會過熟而老,掂呀!

7)    豉椒排骨河($7.50)熱辣辣好夠鑊氣,河粉唔會黐埋一舊舊或炒到一pat pat,河粉同排骨既比例又啱,味道好香,又一推介!

8)    星州炒蘿蔔糕($5.50)一款少辣既一味,當中更咸而帶甜,筆墨難以形容。師傅炒功了得,蘿蔔糕每一小件完整無缺,又夠乾身,非常精彩,簡直係一流既傑作呀!

9)    蒜茸白菜苗($7.95)蒜味唔會太濃,味道調教得好好,可惜雖然白菜苗夠嫩,整體煮得油膩左少少。

總括黎講,皇后名粥地點方便,環境舒適,服務優等,食物款式新穎,配搭新鮮,味道奇佳,旺得有理!

後記:

1)  光顧既客人乜野種族都有,真係好難得,簡直係中國人之光呀!

2)  「黑牛」(可樂 + 雪糕)真係飲得多,不過睇餐牌時先知道佢有個親戚叫「白雪公主」(雪碧 + 雪糕)。(請看相)

3)   其實當日如果唔係已經食得太飽,真係好想試埋佢兩個比較特別既甜品架:炸香蕉加雪糕、皇后秘制甜品。

4) 我地訪多倫多既第四日,當表姐由紐約黎會合我地既時候,我地再幫襯皇后名粥既第二間分店;表姐同表姐夫對個星州炒蘿蔔糕尤其讚賞。
推介菜式: 燒味,香茜牛肉炸兩,牛利酥,皇后大粥,星州炒蘿蔔糕,豉椒排骨河
每人消費: 約15加元 (午餐)
評分: 味道5   服務5   環境5   衛生4   抵食5
  0 個留言    |  加入你的留言
發表日期: 2011-05-24

因工作繁忙,長假有限,喺紐約定居既表姐自從生完BB後,大家都未有機會碰過頭,所以今次佢襯住週末有時間,專登同老公仔帶埋幾個月大既BB女飛上黎多倫多見我地。

佢地當日乘搭早機,租埋車,大概一點同我地回合。佢地黎到既時候,因為大家都肚餓啦,而且又有個BB,所以為免等完位又要等食物,我地就決定左叫外賣。真係好高興大家對小弟極力推薦既皇后名粥都非常滿意!

整個下午我地喺契公契婆屋企一邊做簡單既瑜伽一邊同BB女玩,傍晚先出發去食晚飯。食完飯就去機場還車,入住一晚機場酒店,方便我地第二朝搭早機去拉斯維加斯。

盛設 笑臉2011-05-24
大紅乳豬件海蜇
大紅乳豬件海蜇
柚子明蝦球
柚子明蝦球
腿汁原隻中東鮑魚
腿汁原隻中東鮑魚
金牌手淋脆皮雞
金牌手淋脆皮雞
蔥油蒸魚中皇
蔥油蒸魚中皇
極品頭柚焗雙龍蝦
極品頭柚焗雙龍蝦
櫻花蝦炒飯
櫻花蝦炒飯
美點雙輝
美點雙輝

契公契婆專程請我地去左間高級中餐廳為我地餞行,重預訂左席「滋補鮑魚宴」,真係太客氣啦!

一入門口就見倒好歐陸式既裝修,感覺好貴族,同餐廳個名好襯。聽契公契婆同姐姐仔們既對答,佢地應該係常客,所以服務都唔同D。攞BB高櫈,掛衫,沖茶,分餸,換碟,清枱,全部都係自動波,非常細心體貼,無可挑剔。

大紅乳豬件海蜇:乳豬皮脆,肉質又夠軟,最重要係唔肥,所以我地唔需要費神去切開任何肥膏。

柚子明蝦球:蝦球爽口,甜甜酸酸既柚子味唔會太過濃,好開胃;拌碟既西蘭花都好爽脆。

菘茸菇蜜豆炒帶子:蜜糖豆同帶子都好鮮甜爽口。

雲腿四寶燉翅群:個湯煲得好夠火候,好足料,所以味道濃郁,非常美味。

腿汁原隻中東鮑魚:依味個腿汁就比較咸,不過鮑魚都做得唔錯,夠腍。

金牌手淋脆皮雞:隻雞唔肥,黑肉好嫩,皮都好脆,不過胸肉就有少少乾,味道亦可以調咸少少。

蔥油蒸魚中皇:魚肉鮮甜嫩滑,蒸得又冇話過火,個豉油甜咸適中,送飯一流!

極品頭柚焗雙龍蝦:食到依味個肚已經個脹,所以BB女喺我肚腩上訓得好舒服,我都成機休息一下,食慢D。香口既龍蝦一D都唔嚡,好新鮮,海鮮皇哥哥重食到停唔倒手添。

櫻花蝦炒飯:炒飯好夠乾身,大大粒既櫻花蝦並非急涷,超級新鮮爽甜,讚!

鮑汁炆伊麵:真係開始食唔落啦,不過同媽咪都分左碗。唔會太油膩,味道帶甜,伊麵夠腍,都好ok。

滋潤甜品 - 紅豆沙:小弟唔係一個紅豆沙fans,不過見倒個碗內有大大粒既紅豆,就覺得廚房唔係開粉溝出黎既,所以都食左半碗。味道唔係太甜,只係有少少槳住個口。

美點雙輝:芒果綠茶糕清而不甜。

加拿大既海鮮真係名不虛傳,每樣都係咁精彩,真係食到攬住個肚!
值此機會,想再一次多謝契公契婆咁多日黎既照顧!
推介菜式: 柚子明蝦球,金牌手淋脆皮雞,極品頭柚焗雙龍蝦,櫻花蝦炒飯,美點雙輝
每人消費: 約90加元 (晚餐)
評分: 味道4   服務5   環境5   衛生5   抵食4
小心睇單 ok喇2011-05-24

為方便出入,今次喺出門前爸爸同哥哥已經打點好一切,喺網上租定架七人車,等我地一到步就可以有車用。攞車同還車既地方都係一樣,機場內既指示都好清晰,所以都好容易搵倒。

Budget租既車好新正,不過做野既人就比較慢,冇人排隊都要等佢做成半個鐘頭paperwork,所以還車時大家最好預多少少時間。找數既時候大家記住要check下單上列明既項目,因為佢所用既全部係簡寫。其實有好多費用都由得佢架啦,不過“電油”依項比較易睇,而且自己交車前專登入滿個油江,所以特別敏感;當發現要收我油錢時,小弟就盡量心平氣和地叫佢攞份驗車報告出黎對一對,而工作人員最終亦幫我地減返條數出黎。

入場價錢: 每人165加元
評分: 值得去3  
方便 ok喇2011-05-24

因為第日搭早機,所以哥哥就特別安排我地早一晚入住機場酒店,等我地可以訓耐少少,真係夠細心。佢揀選Sheraton既主要原因係因為無論還車定係去機場,步行都唔會超過十分鐘,更加唔需要經過任何路面,認真方便到極!

我地大概晚上11點半到酒店,櫃面非常繁忙,所以都等左成廿分鐘先有得上房。幫我地攞行李既叔叔都好友善,除左冇好粗暴地亂咁擺放我地D重量喼之外,重問我地有冇其他需要,例如熱水,毛巾。整體冇乜野要投訴。
每晚價錢: 195加元
評分: 設備4   服務4   環境4   衛生4   抵住3
  0 個留言    |  加入你的留言
發表日期: 2011-05-24
飛雪送行 2011-05-24
太陽出來了
太陽出來了

喺多倫多咁多日,大多數係晴天,只係第四日有少少雨,微涼既氣溫非常舒服。點知我地離開當日,喺機場等機既時候突然落起濕雪黎,乘客們都紛紛攞起電話拍下飛雪既情境,地勤人員更馬上公佈話因天氣關係,我地班機將有延誤。不過,真係估都估唔倒呀,唔夠五分鐘,太陽伯伯又出返黎wor,斷斷續續咁都落到我地架機起飛都重喺到落緊。

今次真係好興奮,因為由細到大我都好鍾意睇雪架!其實當日係XO仔既生日,多倫多特別揀嗰日落雪就好似要送份生日禮物比我咁,好感動呀!

  0 個留言    |  加入你的留言