呢間小店外放滿左唔少韓式食品的相片，其中見有部隊鍋，又有綠豆餅，正合心意！我地先叫部隊鍋，以為一個鍋就搞掂晒，點知店員話個鍋份量好少，兩人只吃一個唔夠飽！原來呢度賣的唔係網上見到的超大號部隊鍋，亦唔係開住爐烚下烚下的水鍋；奉上的其實係一個迷你石鍋，幸好鍋內都有齊部隊鍋的食品（午餐肉、香腸、拉麵等），而且同樣熱辣辣，湯底好濃郁惹味。食完迷你部隊鍋後，果然唔多夠喉，於是追加多一個海鮮綠豆煎餅。

海鮮綠豆煎餅超大塊，海鮮其實主要係八爪魚，勝在又係熱辣辣，煎得好香口。結果，兩人要監生先食得晒成塊煎餅，真係當堂飽晒！

埋單，合共28,000韓元，唔貴，亦好味！難怪咁多本地人幫襯啦！

由酒店坐地鐵在鍾路3街站下車，步行十分鐘左右便到達仁寺洞街頭。我地先尋找南怡島旅遊中心，以便盡早購買來往南怡島的直通巴士車票。幸好，旅遊中心唔難搵，大約在仁寺洞十字路口旁，在National Souvenir Center的二樓，中心可以預售直通巴士的來回車票和南怡島入場票，合共23,000韓元，方便快捷。

買票後，便開始閒逛仁寺洞。仁寺洞以中央大街為中心，四周有多條小巷，大家可以買到美術品、、韓服、陶瓷器、工藝品和旅遊紀念品等，當然唔少得無處不在的化妝品牌店。周末時分的仁寺洞非常熱鬧，皆因道路四周擺滿好多路邊攤擋，賣衫、賣擺設、賣小吃等一應俱全。

不過，我對工藝美術品沒有多大興趣，反而食左一條扭扭雪糕條（3,000韓元），凍到入心肺！

Western Coop Residence屬於公寓式酒店（service apartment），位置好方便，由機場坐6001號機場巴士直達，免卻坐地鐵（地鐵站的石級真係行到怕，日日上上落落都好吃力！）將行李搬上搬落的麻煩，步行往東大門幾個大型商場（Doota、Good Morning city、Hello aPM等）都只係十零分鐘腳程，而且有體育用品地下街可以直通東大門歷史文化公園站（地鐵路線包括2、4和5號線）12號出口，去邊度都咁就腳。酒店旁邊有CU 同埋GS 25便利店，要買T Money和增值都好方便。

房間方面，乾淨整潔，空間比想像中大，甫進入房門，先有一個方形廳，左面牆上有層架和檯椅，方便拽放和點算戰利品，廳的右邊則有廚櫃和鋅盤，並有少量家電（雪櫃、微波爐、電水煲等），想買東西返酒店下廚話咁易。

廳後放左兩張單人床，床鋪的確比較窄，只有兩呎半闊，肥人可能感覺迫狹不太舒適，不過，我覺得尚可接受啦。

浴室只有企缸，最初以為房間唔提供沐浴用品，結果發現居然有洗頭水和沐浴露，不過牙刷牙膏就要自備啦！

唯一不太方便的係鎖匙只有一條，若兩個人要分頭行動時，就有少少麻煩啦～

由仁川機場坐機場巴士到達Western Coop Residence，只係朝早八點幾，未到Check In時間（下午二時），所以決定放低行李，到韓劇主角們好鍾意去的汗蒸幕體驗一下！睇過網友推介，覺得東大門Sparex既近酒店兼且又夠新，價錢仲好抵（非繁忙時間只係7,000韓元）！Sparex位於Good Morning City商場地庫B3，由酒店步行約十零分鐘就到，好方便。

在櫃枱交了7,000韓元入場費後，店員就會俾一套衫褲、兩條毛巾和一條鎖匙（鞋櫃和儲物櫃共用呢條鎖匙）。先到鞋櫃放鞋，再到裡面的女更衣室放下行裝和除衫，就可以進入澡堂。澡堂內，大家記得先沖身和洗頭，然後先至跳入唔同溫度的浴池慢慢浸呀。呢度一共有六個池，有熱（30幾至42度左右）有凍（18度左右），仲有桑拿室和蒸氣室，單單在此已可以消磨一個小時。

浸完浴後，穿上店員俾的衣服，就可以落下一層吃東西和玩汗蒸幕～我地當然先醫肚，小食部只收現金，記得落去前帶定錢傍身！我地揀左呢度必飲的甜米汁（2,500韓元）再加炸醬麵（5,000韓元），兩者都係韓劇主角經常食用的東西，幾大要試試！甜米汁味道似薏米水，清清甜甜，幾好飲。炸醬麵甜甜的，完全唔辣，不過好大碗，實在食唔晒，而且味道不外如是。

 飲飽食醉之後，就出去搵地方眠一眠。大堂布置好有中國Feel，古色古香，見到唔少人就咁攤在地上，又或捐入窿窿內休息，其實呢度仲有睡眠室（男女分開，不過係碌架床，無乜Feel！），亦有唔同的小房可以攤屍，我地揀左間女士專用小房，便直接搵個枕頭在地上大覺訓啦～

睡足覺後，可以到另一邊的窰室試下烤箱的滋味，其中最熱（標示：中溫！）的高達82度！我入去感受一下，已經立時要出番來，坐得耐的話隨時變烤雞！仲有60、50、40幾度三個熱的窰室，60幾度個間其實都好熱，但我居然見到有人訓著左，仲要拉鼻鼾，勁！我都係坐到幾分鐘，已經要起身！除左熱窰室之外，亦有一個冰窰室，三溫暖的滋味原來就係咁架啦！

結果，我地由八點幾玩到下午一點，玩足四個幾鐘，只係幾十蚊，真係好超值！

其實，我對凍食的蕎麥麵麻麻，所以揀左配熱湯的蕎麥麵套餐，朋友就揀店內熱門推介的凍食蕎麥麵套餐。

蕎麥麵味道偏淡，清清地，午餐食都唔錯。朋友第一次食，都唔知點食最正宗，尤其有兩碗液體狀的湯料（一碗係冷麵湯汁，另一碗白色黐黐地的，Ｄ有似蛋白，但食落又唔多似！我試左一口都食唔出係乜東東！），佢見隔籬人客係咁撈，佢又照撈，又食得幾滋味！

食完，若意猶未盡，大家大可以在門口旁的位置，揀選蕎麥麵甚至當地土特產帶返屋企，送禮自用都咁正。

下巴士後，先經過商店街，兩旁的商店充滿江戶時代的建築特色，賣的都係當地著名土產和精品，當然唔少得栗子、蕎麥麵等。善光寺據說創建於7世紀，係國家級重要文物，面積達6萬平方米，我地左行行右行行，見到好多唔同的神像，亦都見到唔少盛放的櫻花樹，在古剎映襯下，景致更迷人，於是我地把握最後機會，狂拍照留念！

影夠相後先到達主殿，只見參拜者絡繹不絕，就連售賣平安符的小店都擠滿左人！

第二日，我地又坐車去長野，又再搭長野電鐵，不過今次坐特急快車前往湯田中總站，然後再坐前往上林溫泉巴士，約十分鐘下車，慢慢行上山去野猿公苑睇馬騮仔出浴！

由於前兩日天氣下降，加上呢度係高山地區，所以沿途仍然見到唔少積雪，部分開始融雪，搞到山路濕立立，一腳都係泥濘！不過，見到積雪，乜都值回票價啦！再污糟都無問題啦！

經過半小時的山路後，終於到達地獄谷溫泉，據講馬騮仔就係睇到呢度旅館的人浸溫泉，於是有樣學樣，浸埋一份！

平時見城門水塘的馬騮蝦蝦霸霸，就見得多，但講到睇佢地出浴，仲要係浸溫泉，真係奇景！而且呢度的馬騮仔好乖，唔怕人，但又唔會騷擾人，更加唔會搶人野咁兇險，完全活在自己的世界之內！你有你影，佢有佢浸溫泉、曬太陽、嬉戲玩樂，不知幾開心！

酒店check in後，食過蕎麥麵，我地便坐長野電鐵去須坂市的臥竜公園。

臥竜公園是全國100大賞櫻名所之一，我地都好期待，希望可以再一睹櫻花怒放的壯觀場面。

到達須坂站後，唔知坐咩車可以去到公園，只知旅遊書話可以步行約廿分鐘即達，於是我又利用僅識的三兩個單字日語加文字表述去問路。問左幾個路人，都係雞同鴨講，終於問到個靚女，居然肯推著單車，陪我地由車站一直行成三十分鐘，身水身汗到達臥竜公園，實在感激不盡！

到達公園外圍，已見湖畔櫻花處處，遊人絡繹不絕，有Ｄ人坐船仔遊湖，有Ｄ人就地野餐，櫻花樹下更有不少飲食和玩樂攤檔，好似園遊會咁熱鬧，不過非常有秩序，一Ｄ都唔擠擁，又唔嘈吵，日本人的民族性真係值得我地學習。

我同朋友當然不斷係咁影，朋友又再次長短鏡交換拍攝，再加傻瓜機同Standard鏡，三鏡一機輸流係咁影，影到不亦樂乎！