行程寫的明明係冰館，但結果去左睇 3D 影院和 3D 立體畫。


濟州特麗愛由立體繪畫館佔地麵積約2100平米。我地勁鍾意 3D 立體畫，不停擺甫士影疑幻似真的立體畫，難得有五個展館的立體畫（數量夾夾埋埋有幾十張咁多！）俾我地任影，好過癮，係整日玩得最開心的一個景點。

影到忘記左集合時間，搞到遲左十幾分鐘，要全車人等我地，真係唔係幾好意思。

跟著就去神秘道路。呢條路又名怪坡，有幾怪？就是睇起來係上坡的地方其實係下坡。司機踩煞車同埋熄掉引擎，大家透過駕駛座的玻璃往前面看，前方明明係不折不扣的上坡路，但沒有引擎動力的旅遊巴，卻在此時開始滑動，幾有趣。   

在車上體驗完神秘道路有幾神秘之後，就去睇雜技表演（凌空特技和電單車雜耍表演）。呢個免費表演活動比尋日的更精采，包括高難度凌空表演、挑戰人體極限的扭腰拗腳動作、最後幾架電單車在大圓鐵籠內的困獸鬥表演，惹來雷動的掌聲和讚嘆聲。 

離開小人國後，坐車到達西歸浦港口，停留時間1 小時10分。鳥島新緣橋作為連接濟州西歸浦港與鳥島的橋樑，造型奇特。漫步於新緣橋上，可以一眼望到西歸浦港、文島、虎島、西歸浦前海以及漢拿山等美景。

及後，我地按司機指示由左至右行一圈，先到達可遠眺剛才的西歸浦新緣橋位置拍照，然後順路前行，經過石灘，最後才到達望夫崖（韓劇《大長今》的拍攝地之一），可惜時間關係，我地無行過去睇望夫崖，只在指示牌上留照便算。

唔想步行的話，大可以自費乘坐西歸浦 70里遊覽船（17,500 韓元），出海欣賞海鳥島、正房瀑布、森島、蚊島、虎島、孤石浦和西歸浦海岸周圍景觀。

東部一日遊的第一個景點，就是參觀濟州島特產工藝展示場，展示場主要售賣濟州土特產（濟州柑橘、朱古力、朱古力米通、油菜花香水）。

我地齋睇無幫襯，幾分鐘後上車離開。

呢間店有中文餐牌，店員推介我地食兩人套餐（32,000韓元，即460港元），已經包括各款豬肉、蒸蛋、大醬湯、辣味八爪魚同埋冷麵，價錢比在首爾便宜。

烤好的豬肉香濃惹味（雖然食唔出同普通豬肉有咩分別！），熱辣辣夾住新鮮菜葉和泡菜辣醬同吃， 一Ｄ都唔油膩，好味道！辣八爪魚烤好後，辣味入口後微微散發出來，真係幾辣。大醬湯滾熱辣上檯，橙色的湯底極濃，內有海鮮同豆腐，亦係帶微辣。蒸蛋清清地夠滑溜，中和油膩最好不過。臨尾，朋友太飽，所以只叫一碗冷麵，冰凍兼且酸味近醋的湯底，唔太啱我口胃，不過都一樣照食晒落肚！飽晒！

由W Hotel坐大約 6,000 韓元的的士費，就已經到東門水產市場入口，穿過魚蝦蟹檔之後，就見到售賣黃澄澄的濟州柑橘、朱古力、蜜糖、米通等土特產攤檔，各檔的價錢都差不多，大盒米通朱古力約10,000 韓元四至五盒（視乎每盒有幾多粒，我地買的係 18 粒裝，買三送一，除開大約1蚊一粒米通朱古力），小盒8片裝脆脆朱古力就 5,000 韓元一盒，剛遇著有女檔販主動俾我地試食，食過柑橘同仙人掌米通朱古力，又試過脆脆朱古力，同樣好好味！一於幫襯佢買左大小各幾盒朱古力，再買埋濟州柑返酒店慢慢食，臨尾佢仲多送 12 粒散裝朱古力米通俾我地，真係幾抵！（在新濟州市的土產店既沒有試食，價錢也較東門市場貴，因此建議大家在此掃貨啦！）

東門市場盡頭旁，就係中央地下商街的入口，地下街被分成好幾個段，每一段都有各自主要專賣的東西，如嬰幼兒服飾玩具、化妝品、服飾、鞋類等等，價錢中下價，不過我地要返釜山，無謂買得太多拎餐死啦！

地下街行到盡頭，上地面就係濟州牧官衙，係朝鮮時代濟州道的政治、行政中心，主要設施有東軒、內衙建築物等。我地見時間尚早，順道入內參觀。黃昏時分，遊人極少，在古色古香的韓式建築閒逛，感覺好舒服。

今次又係上網訂酒店，見網友大力推介呢間濟州Hotel W Jeju，就決定揀佢住三晚。事實上，呢間Hotel W Jeju唔同全球其他W Hotel，級數只係三星左右，不過，交通真係好方便，由機場坐的士只係十分鐘車程，去舊濟州市又係十零分鐘車程，而且一出酒店轉右就係寶健路步行街，不遠處的大街之上，就係新羅免稅店，蓮洞購物商圈亦在附近，購物開餐都無難度。

除左地點方便就腳之外，酒店房間亦超大間，放落一張Queen Bed床同一張單人床之外，仲有大把位走動，而且乾淨整潔，浴室設施（沐浴露、洗髮水、護髮素大大支任你用）一應俱全，房間wifi亦相當強勁，唯一缺點係唔包早餐，但以每晚房價只係600元來計，真係無得挑剔！

就等我總結各地櫻花開花指數，等大家知道我呢次追櫻的心路歷程：

釜山櫻花（包括釜山西面周邊、海雲台、廣安里、龍頭山公園等）
追櫻日期：4 月 7 日 至 10 日
追櫻指數：＊＊
最初以為釜山在4月上旬先開花，點知3月的天氣回暖，提早至3月底已密密開，以至我地抵埗後（4月7日），大部分櫻花樹已有近半落花並已長出新葉。

鎮海櫻花（包括鎮海市內、鎮海海軍學校、余佐川及慶和站）
追櫻日期：4 月 8 日
追櫻指數：＊＊1/2
鎮海也跟釜山有類似的情形，余佐川、慶和站皆如是，幸好鎮海海軍學校近海較涼，所以櫻花未落得太多。

慶州櫻花（包括慶州市周邊如、佛國寺、石窟庵等）
追櫻日期：4 月 9 日
追櫻指數：＊＊＊＊＊
慶州在釜山的北面位置，天氣早晚仍較涼，所以街頭四周仍然盛放的櫻花樹，其中最令人嘆為觀止的係世界遺產佛國寺外的櫻花公園，數以百株的櫻花開得異常燦爛，大風吹時，櫻吹雪的場景煞是好看！

首爾櫻花（包括慶熙大學、汝矣島、梨花女子大學、新村、明洞、南山公園及南山谷韓國村）
追櫻日期：4 月 10 至 12 日
追櫻指數：＊
雖然汝矣島在4月12日開始舉行櫻花祭，可惜我地4月11日去到，仍然唔多見櫻花的蹤影。同日遊慶熙大學、梨大等賞櫻勝地，都係失望而回。最後在南山公園步道和南山谷韓國村，亦只見一兩株稍稍開了部分花蕾的櫻花，相信要多三數天日子，先至可以等到櫻花怒放的壯觀情況。

一個人在酒店大堂食左早餐後，由於八點半已到韓國村，見未開門，於是膽粗粗繼續往上直走，行下行下，居然見到南山北面環迴步道（North circuit）的指示牌，於是繼續行，原來係南山公園的一條步道。

天朗氣清，沿途見到好多晨運客散步和慢跑，兩旁更種左好多櫻花樹，可惜又係未開花，幸好有黃色小花點綴，令步道更賞心悅目，難得 N 首爾塔就在頭頂，一抬頭就望到，行左半小時，見差不多到南山纜車站，就無謂繼續行，原路折返落番韓國村。

在南山公園晨運賞花後，折返韓國村。估唔到不過一個小時的時間，韓國村由無人到人聲鼎沸，村內充斥小學生和唔同國籍的遊客，尤以內地人和香港人最多。

韓國村好大，大門入口有小山坡，山坡左側的蓮花池中央，設有泉雨閣，係傳統表演的主要舞台。一旁的五間傳統韓式建築，在朝鮮時代稱為韓屋，係必遊的景點之一，因為韓屋村內的建築都是首爾市內其他地方的住宅，為左保存呢Ｄ文化古物，先將這些傳統住宅遷移到韓屋村裡。韓屋內擺放左好多韓國古時的物品和用具，令人眼界大開。當然，影相留念更正，彷彿時光倒流，進入古裝韓劇裡面，扮演一個半個小腳色～哈哈！另外，韓國村有好多免費體驗活動，大家若有時間的話，不妨參加一下。

逛到十點幾，就打道回酒店！兩個小時的首爾晨運活動就此結束，真係有Ｄ唔夠喉！

我地坐地鐵到回基站下車，一出地鐵即登上1號穿梭巴（用 T Money 拍卡去程免費，回程都只係1,050韓圜），幾分鐘在總站下車。

慶熙大學（韓文:경희대학교），創立於1949 年，是韓國知名的私立高等學府。校園好大，而且有好多宏偉古典的建築大樓，好似置身在歐洲大學校園之內，好有歐陸情懷；聽說當櫻花盛開時，門口那條路會變成一條櫻花大道，可惜我地去到櫻花仍未盛開，只有幾棵白玉蘭做陪襯，先至顯得無咁蒼涼。其實，就算無花，只係在校園內行行逛逛，影相留念，都值得一遊。

順帶一提，上網睇過網友提供的資料，原來慶大出好多明星，好似Rain、尹恩惠、Super Junior 曹圭賢、Big Bang G-Dragon & 大聲、東方神起昌珉 & 有天、Kara 勝妍 、FTIsland 洪基、2AM 趙權等（其中我最熟的只有Rain同埋尹恩惠！）。

回程再坐巴士回地鐵站，然後再附近嘆杯咖啡和芝士餅，順便逛逛街，因為慶大和梨大一樣，附近周邊都有唔少咖啡店和購物小店。

之後再遊另一個賞櫻勝地－－汝矣島，同樣失望而回，真係不提也吧！（不過，唔明點解當地電視報道話首爾櫻花已盛開，仲話好多遊人去賞櫻，真係唔知邊度來呢？！）

遊完慶熙大學兼汝矣島，追櫻失敗後，到新村先醫肚。在新村大街（好似係 4 號）出左後，往左面的橫街走去，有好多唔同食店任你揀。

今次嘗新口味，試試春川辣雞專門店。呢間店除左有炒辣雞、炒辣雞加章魚（其實係魷魚鬚），仲有炒海鮮。我地揀左雞肉加章魚，只見店員將所有新鮮配菜、魷魚鬚、雞肉、辣醬統統放落我地面前的鐵鍋內，加蓋焗一焗，然後再開蓋係咁少炒炒炒（之前見店員在旁邊食的鐵板有拉麵，所以叫佢照辦煮碗，幫我地加麵），然後，加入麵條，再炒一陣間，熱辣辣又惹味的春川辣雞加麵即時食得啦！

一試之下，真係超好味！係就係辣左少少，但都可以接受得到，只覺惹味而不過嗆喉。雞肉嫩，連魷魚鬚都唔韌，加埋麵條就超飽肚。

呢餐埋單只係16,000 韓圜，即只係 112 港元，真係好超值！絕對值得向大家推薦！

午後遊埋梨大，繼續無櫻可賞。黃昏到明洞樂天免稅店加超市，可能有過上次血拚經驗，兼且護膚品仲有一大堆未用，所以好克制，最後只埋三幾支潤唇膏就閃，連卡都無簽！

晚上，由那度香的橫街直行幾步，試另一間叫濟州家生牛排的烤肉店。

呢間店主打係本地人，賣的是濟州牛肉，可惜我唔食牛，所以由朋友一力承擔，佢食的叫調味牛排（30,000韓圜），而我揀左濟州生豚三枚肉（應該即係五花腩）（11,000韓圜），再加一個豆腐湯和煎餅。

今次的烤肉唔用那度香的內陷龜背鍋，而係一個傾斜的平鐵板，然後將牛肉和豬肉放在鐵板上烤，烤出來的油慢慢沿斜斜的鐵板滴落長鐵盤內。不過，用呢塊無孔的平鐵板烤出來的肉唔夠香口，無乜燒烤味。朋友直頭佢烤得過熟先俾佢食，須知牛肉烤兩下都可以食，但店員居然等到豬烤好後，先一次過叫我地可以開餐，牛肉唔老就有鬼！而且佢地提供的包肉的菜葉又細又少，加上又無醬料，我真係唔覺得好味。

至於豆腐湯除有豆腐外，仲有菜絲蛋花等，微辣，都不錯！煎餅同樣係魷魚鬚做主打材料，點埋醬料入味好多。

埋單要加一，好似要六萬幾韓圜（折合約400幾港元）（上次那度香只係四萬幾，仲有益力多和明星相送！！！），係全程最貴的一餐，但我真係唔覺好好味！

由東萊站2號出口轉右，步行幾分鐘，便可以落去溫泉川漫步。溫泉川全長15公里，河水清澈，有些少似首爾的清溪川；若踏單車遊溫泉川，也要一小時才可以走畢全程。河川兩旁種左好多櫻花樹和油菜花，又設有行人步道和單車路，最適宜賞花、晨運和踏單車。

當日，櫻花又係落得七七八八，反而油菜花黃得燦爛，長長的黃色花田，好搶眼；相信若加上粉紅櫻花互相輝映，景色更美！

遊完東萊，即乘地鐵往南浦站，打算半天遊勻南浦洞周邊多個景點：龍頭山公園、國際市場、BIFF和札嘎其市場，一來呢幾個景點集中在南浦站和札嘎其站之間，二來下午要坐高鐵（KTX）往首爾，所以要抓緊時間。

我地先遊龍頭山公園，由南浦洞站 1 號有電動電梯登山（注意：電動扶手電梯只供上不供落，落山時要自己用腳行架！）。龍頭山公園原本係賞櫻熱點之一，可惜櫻花又係落得七七八八，只有一株白色重瓣櫻花怒放，吸引好多人影相留念。公園內有鮮花砌成的花鐘和忠武公李舜臣銅像，另外就係著名的釜山塔。釜山塔高120 公尺，你可以在釜山塔上觀看整個釜山市，不過，時間和金錢關係，我地無上釜山塔，逛遊一會，就原路行樓梯落山，轉右行幾分鐘，便到達國際市場。

際市場曾被稱為韓國交易規模最大的市場，只要進入市場一趟，就可以買齊日常必需品等。不過，我就覺得貨品質素一般，有些似香港的花園街貨式，不太吸引，行左兩三條通道，便出番大街，見Pizza Hut 轉入去，就去 BIFF 廣場。

BIFF 廣場原是南浦洞劇場街，1996 年開始舉辦釜山國際電影節（Pusan International Film Festival），於是將此劇場街一帶正式命名為「 PIFF 廣場（現稱 BIFF ）」。每年都會把刻有釜山電影節得獎人的手掌、腳印的銅盤和得獎作品的銅盤鑲在廣場地面。當日見到好多人包括我自己，都會蹲低同手印合照，不過不時會有車經過，要拍照人士緊記安全為上。

臨離開廣場，記得一定要吃堅果黑糖餅，其中一檔招牌寫著元祖的排晒長龍，就知係好野！每個糖餅 1,000 韓圜（7 蚊港幣）。堅果黑糖餅由搓粉、炸餅，再加入黑糖和堅果，整個過程唔算耐，但人龍實在太長，所以我地都等左 20 分鐘以上！黑糖餅食落軟中帶硬，內有堅果添加左口感，不太甜，幾好味。

跟住直落碼頭附近，就係札嘎其市場，右面係露天漁市場，有各式各樣的海鮮和海味乾貨發售，旁邊有食店，門前有即煎魚，不過我地都係無幫襯。行左小段，便轉到室內的札嘎其市場去。二樓係海鮮食肆，有各式海鮮套餐供選擇，後面較後位置，則有海味乾貨店，我地買左魚乾、紫菜、淡菜等，價錢適中，雙方都無開天殺價！

行完札嘎其市場，終於完成釜山市內半天疾走遊，返回西面站酒店取行李，再轉往釜山火車站，搭 KTX 到首爾去。

臨離開西面站時，買定兩卷紫菜包飯，以便 KTX (Korea Train eXpress)上做午餐。

呢間位於西面站 7 號出口的紫菜包飯專門店，位於我地每日必經之路上，經常隔著玻璃見阿珠媽幫客人即叫即做包飯，好似好吸引！

每條包飯 2,000 韓圜，裡面有蛋、黃蘿蔔、紅蘿蔔、菜甫、火腿、蟹柳等，長長的一條，好粗大，後尾食落，一條都好飽肚，兩個人其實買最多三條已經好足夠。

酒店在忠武路站的 8 號出口一出，見 World Pet 21 商場的右面小巷進入。雖然有指示牌，但好易錯過。呢條小巷好窄又污糟，兩旁都係印刷廠，入夜後好靜，一個女仔出入要好小心。

至於酒店內的布置則溫馨雅致，大堂細細，用左好多黑板仔手寫左一些溫馨提示，而且色彩鮮艷，好有女生宿舍Feel！不過，房間實在太細和窄，兩張三呎單人床之外，走動的位置差不多完全沒有，執行李就更唔方便。房間內無衣櫃，只有一個掛牆架，電視機居然係畫面充滿雪花的大膽老舊機！（爭在唔係黑白電視！）浴室只有一支牙膏和一隻小膠杯，其他沐浴用品全部欠奉。不過，熱水熱度和力度都超強勁，加上wifi好穩定，呢兩個優點就勝過釜山皇后汽車酒店啦！

論價錢，呢間酒店唔太貴（約 500 港元一晚），而且乾淨簡潔，不過有Ｄ缺點同規矩，大家要多多留意：

＊兩大缺點：
1. 酒店小巷難搵又太污糟（朋友鬧爆！）：雖然酒店近地鐵站（由忠武路站出 3 至 5 分鐘之內），但必須經過小巷，晚間又好靜，一個女仔要小心。若坐的士的話，的士司機也未必搵得到。我地兩晚都搭的士回來，的士司機都唔識路，就算俾埋卡片，佢地都唔知位置，結果要佢打俾酒店經理小姐Yong Yong，由佢親自教路先搵掂！

2. 酒店無Lift（朋友鬧爆！）：酒店樓高四樓，完全無Lift，若帶大件行李上落，都要好考腳骨力。

＊規矩多多（朋友鬧爆！）：
1. 波鞋放Locker：酒店上下走動時要著佢地的拖鞋，波鞋要放在大堂的Locker內，Locker鎖匙要俾 10,000 韓圜，退房時憑匙退錢。

2. 毛巾自理：每日用完的兩條毛巾要放出走廊的籃內，要再用就落大堂領取新毛巾。

3.房間無熱水供應：要取用熱水，只可以落一樓大堂或上四樓尾的service room，自己煲水。

4.早餐食完要洗碗：酒店小大堂供應咖啡機和麵包、花生醬、果醬，不過食完的話，要自己清潔所有用具。

5.房間垃圾自己倒：第二日返房間，唔知點解無人清潔？被鋪完全無執過？但經理小姐明明話會有人換床單，奇？退房時，發現房間垃圾要自己倒在走廊上的垃圾箱內。

若大家認為以上問題唔係問題的話，呢間酒店其實唔錯。畢竟搭一個站就到明洞，行十幾分鐘就到南山谷韓國村和南山公園，再加上在忠武路站 8 號出口旁，即有 6015 號機場巴士直達仁川機場，真係好方便！

坐地鐵到總站老圃站下車，走 3 號出口直達慶州高速巴士售票處，往慶州票價 4,800 韓圜，指定座位，9 點 30 分開車。購票後搭 Lift 落樓下搵月台登車，車程大概50分至1小時，10點半便到達慶州總站。

慶州是韓國新羅王朝的古都（睇過韓劇《善德女王》的韓迷應該都知唔少有關新羅王朝的故事！），據旅遊書形容慶州為「沒有屋頂的博物館」，古蹟處處，一日之內根本無可能遊勻所有名勝，必須作出取捨，我地鎖定必遊的景點為佛國寺、石窟庵、大陵苑、雞林、瞻星台等，遊玩次序由遠至近。從高速巴士下車後，即可旁邊的旅客中心取慶州地圖，並詢問佛國寺的巴士路線和穿梭石窟庵巴士的班次。

由旅客中心過對面馬路乘搭 10 或 11 號，大約半小時便到達佛國寺。在寺外有一個種左數以百株櫻花樹的櫻花公園，係賞櫻野餐的好地方。由於慶州位置較北，天氣較釜山和鎮海清涼，櫻花仍開得好燦爛，亦係整個行程見得最多最靚櫻花的追櫻勝地！

在巴士上結識左兩個阿珠媽，佢地好熱情，居然提議我地一齊在櫻花樹下野餐，仲請我地食年糕、蘋果、番薯、柑，又教我地韓文點樣祈禱和講一至十的韓文，最後，仲驚我地無錢食飯，想俾一萬圜我地，叫我地到附近攤檔買野食。當然，我地梗係無要啦，但佢地的熱情真係令人感動。

離開佢地之後，我地直上佛國寺。據史書《三國遺事》記載，佛國寺為751年新羅景德王的宰相金大城為紀念父母所建立。整個工程在 774 年由新羅王室在金大城去世後完工，並命名為佛國寺。

寺內的多寶塔、釋迦塔、藍雲橋和兩座金銅大佛等7個文物被列為韓國國寶。1995年，佛國寺和石窟庵一同被列為世界文化遺產。在寺內，居然俾我地見埋佛舍利，真的好難得。

遊完佛國寺，見仍未石窟庵的巴士到達時間，便在佛國寺櫻花公園旁的小檔食左魚板等小吃當午飯，爭取多些時間繼續遊玩。

距離佛國寺 4 公里的石窟庵，於 1962 年 12 月 20 日被指定為國寶第 24 號，位於吐含山，正式名稱為石窟庵石窟，是一座以花崗岩建成的人工石窟寺院，在1995年與佛國寺同被聯合國教科文組織指定為世界文化遺產。新羅時期 751 年由金大城開始建造，歷經 24 年終於在 774 年竣工完成。據說石窟庵與佛國寺同樣為金大城所創建，佢為左現世的父母而建造佛國寺，又為左前世的父母建造石窟庵。

由石窟庵牌匾到達石窟庵主室要經過迂迴的山路，需要至少 15 分鐘，一來一回便要半小時，由於返回佛國寺的穿梭巴士1小時一班，所以大家記得抓緊時間，快速前行！

抵達主室周邊，左邊放左唔少壁石，見有一韓僧為遊客講解，可惜聽唔明，再往上走就係主室，正前方掛滿七彩燈籠，室內有本尊像等菩薩及弟子像，本尊像坐在蓮花寶座上，姿態柔和表情慈祥，不過石像有玻璃保護，我地只可以透過玻璃觀看。

在外面稍稍停留拍照，又要急急腳經過山路返回出口，再等巴士返佛國寺。朋友在巴士站旁的小攤檔買左銀杏（白果）和栗子充飢，我試左一粒銀杏極苦，栗子太乾又硬身而且難搣殼，不建議購買。

由石窟庵坐 12 號巴士到佛國寺，下車處再等 10 或 11 號巴士返回市中心，巴士途經慶州好多個景點，可惜時間有限，而且都唔知係咩景點，所以最後決定在慶州驛下車，逛遊市內名勝！

下車後，不妨又在遊客中心問問大陵苑位置。大陵苑在驛站的左面，步行一會兒，見右面不遠處的丘陵小坡，就可以過對面馬路向右直走，約步行 15 分鐘左右，就係大陵苑入口。

大陵苑保存左 23 個巨大的古墳，其中以天馬塚最為著名，而天馬塚亦係大陵苑中唯一開放內部的古墳。天馬塚位於大陵苑入口的右面，發掘於1973 年，是新羅特有的積石木棺墳，由於出土的馬鞍墊子上繪有天馬，因而得名。天馬塚高度 12.7 米，直徑 50 米，在封土內部有以石頭堆積成的積石層。積石層裡有個長度6.5 米，寬度 4.2 米，高度 2.1 米的木房，中央放著木棺和屍體（我見已經化左灰，只隱約見到一個人形的輪廓！），出土的遺物有 11,526 件裡，其中天馬圖是韓國古墳中初次出土最珍貴的畫作。

參觀完天馬塚，向左面走，四周滿是黃黃的丘陵小坡，彷彿望不見盡頭，非常壯觀，感覺有點似在沙漠見的沙丘，不同的只係古墳小丘上有綠草，而沙漠的沙丘只有黃黃的沙土。

步行十零分鐘，到達大陵苑的另一個入口，就此路步出，幾分鐘即到瞻星台。瞻星台（睇過韓劇《善德女王》都會見過呢個台啦！）呈圓柱形，由 362 塊 30 公分大小的石塊分27層堆砌而成。距底部4.16公尺處有一扇門，呈正方形，每邊長 1 公尺，門下方還遺留著放置梯子的痕跡（不過我見唔到！）。

睇完瞻星台，繼續往上方斜坡走去，就係半月城和石冰庫。半月城係從西元 101 年婆娑王 22 年到西元935年新羅滅亡為止的一座宮殿，而家只見的係一大遍草地；至於在草地左上方位置的石冰庫建於朝鮮英祖 14 年（公元 1733 年），內部長 12.27 米，寬 5.76 米，其實係用石頭做的冰庫，是古代的冰箱。走到石冰庫的入口附近，就會有陣陣冷氣襲來。石冰庫的一半在地上，一半在地下，地面和墻壁是花崗岩的，頂部是拱形，有通風口。隔著鐵枝望進去，我覺得有少少似鐘乳石洞。

有人講過，來慶州不吃菜包飯和皇南餅，就枉來慶州。所以我地遊完石冰庫後，返回近瞻星台的大陵苑入口，往右邊馬路走，路邊即有多間貼住供應傳統菜包飯的韓式食肆，我地隨意走入其中一間試試地道的菜包飯。

食完晚飯，沿著大陵苑外牆的小馬路直走，盡頭的對面就係著名的皇南餅專門店。皇南餅從1939年起，歷經三代，是慶州的名產，好多人會買來做手信。軟軟的餅皮內有清淡不太甜的紅豆泥（煮紅豆並搗碎製而成），熱食尤其美味。

廚房採開放式設計，甫入門口即見裡面廚師正密密手炮製皇南餅的各個過程，保證新鮮熱辣。客人須先俾錢，再憑單取貨，最初見等候領取皇南餅的客人極多，朋友仍堅持要買兩盒做手信，幾驚要等好耐。好在由排隊到取貨大約15至20分鐘左右，都算相當有效率啦！

售價： 20 個裝 12,000 韓圜，30 個裝 18,000 韓圜，48 個裝 28,000 韓圜