最近分享過的旅程 |
共找到 67 篇遊記, 正顯示第 61 至 67 篇遊記 |
九鄉風景區基本上係屬於宜良縣嘅一個著名景點(宜良縣九鄉彝族、回族鄉境內),宜良係省會昆明嘅直屬郊縣,被譽為「滇中糧倉」和「烤鴨之鄉」,距昆明市區45公里(註:九鄉離昆明就成90公里),唔算遠,自己揸車應該好快到。不過,坐公車就煩啲。先由昆明市打的去市外嘅東部汽車客運站(30min,~RMB35),依個客運站主要目的地係雲南省嘅東部地區,如宜良縣、石林縣、羅平縣……。其實個客運站都係新搬過嚟,不過都有啲亂,最大件事係無書所講嘅直車去九鄉風景區,而先到宜良縣(1hr40min,@RMB18),再轉細巴去九鄉(1hr20min,@RMB8)。結果,由原先預算兩個零鐘昆明去九鄉風景區,就變咗9:30am由酒店出發,包埋等車、轉車、再等車、又轉車,晏晝2:00pm先到九鄉風景區,唉,為咗玩,連晏晝都未有時間食!好彩我哋都醒,帶咗唔少零食跟身,都頂得吓!
晌九鄉風景區,遊咗三個多鐘,不愧為「溶洞之鄉」,真係幾多嘢睇,景物夠多元化,值得一遊,跟團可能好啲,唔使好似我哋咁轉折,不過相對又要攝啲購物點入行程度,如果包車就幾貴,除非夠晒人多先諗得過吓。
去完九鄉,返回宜良,雖近傍晚,但趁有啲時間,一試宜良烤鴨滋味,雖然唔及我哋香港嘅燒鵝燒鴨,但味道都算係唔錯,不妨一試。晌外地食嘢,又唔需要吓吓都要同邊度邊度比嘅,抱著見識心態,自然有所體會!
搭番尾班車返昆明(7:20pm),差唔多成十點先到酒店,好肚餓,唔使怕,酒店對面就係祥雲美食城,超方便,平民大排檔,絕對平靚正之選。
Day 1 – 昆明(雲南省博物館,金馬碧雞坊)
Day 2 – 昆明(九鄉風景區)
Day 3 – 羅平(螺絲田油菜花田)
Day 4 – 羅平(金雞峰叢油菜花田,九龍瀑布,多依河)
Day 5 – 昆明(雲南民族村)
Day 6 – 昆明(石林風景區,雲南大學,翠湖公園)
Day 7 – 昆明(昆明動物園)
中午12:00機,所以唔使咁趕,由香港直飛,2.5鐘機程就到達昆明巫家霸國際機場,而由機場落市中心,都係廿多分鐘車程,車費二、三十蚊人仔。不過,等吓行李,搞吓搞吓,去到酒店都成四點鐘!頭兩晚晌昆明住,雲上四季快捷酒店,國內連鎖式酒店,平靚正,位處市中心,我哋一行三人(我、太太、舊同事),三人房都係RMB249,不過只包一份自助早餐,真騎尼!
安頓好之後,立即出發市內遊!首站去雲南省博物館,書寫去到7:00pm,點知4:45pm去到,話5:00pm閂門,4:30pm已經截止入場,即係摸門釘,依個係發展迅速嘅第一個「感受」。跟住提早下一個景點,昆明地標「金馬碧雞坊」,同埋附近嘅昆明老街,依區確係幾旺,感覺好似去完尖咀,再落佐敦。
晚餐返番去金馬碧雞坊旁,因為多嘢食,晌雲南嘅第一餐,梗係試試地道嘅過橋米線,所以揀咗「江氏兄弟橋香園」,見佢人氣夠旺,有信心嘛!食完行返酒店,都係20min腳程,所以間酒店真係幾方便。
尋日比較hea,早睡故然早起,今朝要早啲起身都係有原因,因為報名參加咗恆春半島半日遊(東海岸線)。首先,係食番個豐富嘅早餐先,因為酒店包咗自助早餐,當然要食飽飽啦,如果住民宿早餐就可能簡單一啲喇!
屏東客運(http://www.ptbus.com.tw)有搞恆春半島觀光巴士團,好似我依啲唔識揸車,景點咁散又無公車到,得兩個人包車唔划算,跟本地團就乜都解決晒,報團好方便,早一日搵酒店或民宿代辦就OK,到時先俾錢,又包埋來回接送、導遊解說、部份門券,真係一條龍,唔使煩!
觀光巴士團分為:
1. 恆春半島東海岸線(TWD450)08:00各飯店接駁-12:00返回各飯店
恆春-出火-港口吊橋-龍磐公園-鵝鑾鼻-貝殼砂島-船帆石(包鵝鑾鼻門票、吊橋門票)
2. 恆春半島西海岸線(TWD350)13:30各飯店接駁-18:00返回各飯店
恆春-海生館-貓鼻頭-關山日落(唔包海生館門票)
3. 恆春半島全島遊線(TWD1,100)
東海岸 + 西海岸 + 恆春風味餐
4. 古城溫泉巡禮行程(TWD1,000)16:00各飯店接駁-21:00返回各飯店
恆春-古城東門-福安宮-四重溪溫泉(南台灣飯店)(包溫泉風味餐、泡湯費用)
多種選擇,悉隨尊便!
晏晝就晌恆春古城自由行、隨意兜、亂咁行,話晒古城唔係好大。行到中山路(恆春老街)突然落大雨,勁大,就好隨意搵咗間小店食晏兼避雨。
四點幾,行到又有啲餓,就去咗小杜包子食包當下午茶,依檔嘢係之前撞到啲香港人介紹,去到果然好旺,包子亦好有特色,絕對要試!
之後返墾丁大街,逛入大街小巷,睇吓啲特色民宿,外觀裝修幾盞鬼。然後再行遠啲,參觀埋凱撒大飯店同福華渡假飯店,睇吓有幾豪!
傍晚返酒店竭一竭,夜啲先落墾丁大街搵食。因為今晚無晒雨,檔口開多咗,遊客亦都多咗,我哋都飽肚而歸!
今朝,先晌酒店斜對面嘅小店食菜肉煎包同蒸包做早餐,跟住輕鬆收拾行裝去東部汽車客運站,由昆明坐大巴要3.5hr先到羅平縣,RMB65位,全程高速公路,幾穩定。當進入羅平縣範圍,初初開始見到零星嘅油菜花田,跟住再見到一大幅一大幅油菜花田,高速咁駛過,已經覺得幾靚!
2:30pm到咗羅平縣縣城,羅雄鎮,第一件事搵酒店落腳先啦,搵咗幾間,卒之搵咗間距離羅平汽車站唔遠嘅羅平大酒店,佢自己標三星,我哋就覺得二星差唔多,三人房RMB268一晚,唔包早,上房睇過叫做住得吓,反正預咗晌羅平都係住得麻麻,而且都係兩晚,所以就扑鎚成交!
一搞掂好啲行李,準備出發去玩,經酒店介紹咗個包車師傅,毛師傅,大家咁上下年紀,啱傾,又幾好人。因為都已經成3:30pm,唔可以去得太遠,所以只去另一邊嘅牛街螺絲田睇油菜花,車程半個鐘。
離開縣中心,向著田間出發,已見到周山周田都係油菜花,多都你唔信,晌北海道富良野睇著名七色花海,都只係用一大遍嚟形容,而依度嘅油菜花田,真係漫山遍野,睇唔到盡頭,啲油菜花又越過高山又越過谷,毛師傅話今年油菜花開得好,二月尾開始開花(花期約42日),全縣開咗成四十萬畂,四十萬畂有幾多?我都真係唔知!總之去到邊,就見到邊!
晌高位睇完牛街螺絲田睇油菜花,就落咗去下面螺絲田睇,再入去田裡面睇,總之你想點睇,毛師傅都唔介意車我哋落去睇。所以,都搞到成五點幾先返番去縣城!
第一次嚟羅平,都唔知有咩好嘢食,旅遊書都無乜好介紹,所以搵咗毛師傅介紹,佢知我哋廣東人,偏清淡,唔嗜辣,所以介紹咗一間食竹笙雞鍋嘅小店俾我哋,果然好食啱口味!食完,再夜遊縣城,其實縣城主城區本身唔係好大,最旺嘅都係得條振興街,長度大概係太子行去旺角咁大把。所以,所謂夜遊縣城,其實係去當地超市逛吓,了解當地物價,買吓生果食,順路行返酒店啫!
9:00am巴士出發去墾丁,成架大巴只有5個客,而外面風雨未停過,接近墾丁時,沿岸白頭大浪處處,所以都一路擔心緊個行程,預咗三日兩夜晌墾丁,只好見步行步。
11:30am到咗酒店,原先都打算住民宿,但要去到10/9之後先收平日價,依家仍當旺季,嫌太貴,所以揀咗間平平哋嘅墾丁統茂高山青大飯店,查實都要成四百幾蚊港紙一晚,包早餐!安頓好之後,醫肚緊要,因為仲落緊大雨,就晌近酒店嘅「一品鹵味」搞掂餐晏仔。
照睇天色都係落足全日雨,所以,唯一景點可去嘅就只有國立海洋生物博物館(海生館),話晒全室內,好彩個博物館都幾夠大,足以俾我哋消磨成個下午,唔使無無聊。睇到個館閂門,不過,墾丁交通真係唔多方便,入到嚟海生館個位,話打風無公車返,幸好,遇到另一pair港人,夾份打的返墾丁大街。
原本一早網上訂好晌社頂自然公園嘅2小時夜間生態遊,天雨關係,中午到達酒店時已留有口訊,生態遊取消咗。故此,夜晚嘅節目就只有搵食一環,可惜係墾丁大街有開嘅檔口都係寥寥無幾,遊客都唔多!唯有早啲返酒店,睇吓台灣啲綜藝節目解解悶。
頭兩晚都係住晌高雄,搵咗間平平哋嘅酒店落腳,近捷運同近高雄火車站方便周圍去至係重點。
第二日嘅行程,計劃咗全日攻台南市,不過,天氣真係唔係幾好,遇正打風(吹向高雄),雖然唔係話好正,多少都有影響,但係,希望在台南,去到台南又完全無晒事,除咗抵達時落咗一場大雨,之後出晒太陽,真好呀!
先晌舊高雄火車站「到此一遊」,跟住過隔離新嘅火車站坐台鐵直踩台南,晌月台嘅小賣店有啲鐵路便當,都係TWD60,不過,唔肚餓,無買!大概50min,去到台南市,坐台鐵好過高鐵,因為起點、終點站都近市中心,而且又平啲呢!台南火車站,原來都有上百年歷史,自不然都要幫佢影張靚仔相。
買咗「好行府城自由行」套票(公車站有得買),TWD100,包兩條觀光路線巴士及市議員公車任搭,仲加埋2個台南市古蹟免費入場,凈係2個景點入場費都要TWD100,即係變相搭車免費。
我哋嘅台南攻略係先遠後近,所以先遊離市中心遠啲嘅安平區,首站係安平古堡,係台灣最早嘅城池,都幾多嘢睇,整個古堡地方唔太大,幾好行。跟住食個晏,周氐蝦捲搭體育公園杏仁豆腐冰,一個熱炸,一個冰涼,爽晒。安平樹屋亦晌附近,外望好似唔太特別,決定去下一個景點。
飯後遊億載金城,個名就勁,不過算得上廢墟一個,無乜嘢好睇,所以被佢「昆」咗,兜一圈唔使半粒鐘。依日都幾熱,啱啱億載金城對面就係伍角船板,當然要嚟個下午茶啦,視覺與味覺享受!
跟住入番市中心區,赤坎樓,既為國家一級古蹟,總要去望個究竟,裡面古樓處處,座遠佈局優雅,影相位都唔少,值得一遊。赤坎樓旁就有一間度小月担仔麵,時值傍晚,就不如嚟個early bird dinner。之彼,沿民族路、中山路行去台南車站,途經South Park休閒小區,跟住坐台鐵返高雄!
晌返酒店之前,遊一遊愛河之心,因為只係離酒店5min步程,逛埋先叫結束今日行程!基本上,小弟認為遊台南市即日來回一日行程都夠晒皮!
好多年前,太太去過一次台北(跟團嘅),印象非常差!所以計劃今次台灣南部之旅時,有啲「提心吊膽」,要提高心機計劃好,又要吊起膽量試去新點,佢無壓力,我有壓力,但最後不單令太太對台灣改觀,佢仲話好鍾意高雄添!
自由行在小弟嚟講就係心水遊,揀啲我哋自己想去嘅景點,絕無浪費時間晌啲「購物景點」度,亦唔會安排得太密集令行程太趕。
早上9:00am港龍機,好舒服咁10:30am就到達高雄小港機場。酒店安頓好之後,第一個景點就係屬於高雄近郊有台灣西湖之稱嘅澄清湖,天朗氣清,悠悠閒閒咁,感覺好舒服,爽呀!順便晌度食埋晏添。
傍晚,返入城,去新光碼頭睇日落,天空泛起一片橙黃,碼頭旁一艘疊一艘嘅貨船,在黃昏光下形成一個個剪形,景觀一流。附送埋85大樓黃昏景,全高雄最高嘅摩天大樓,總要望兩眼嘅。
跟住順道過去新堀江商圈走走,購物唔大興趣,「係咁二」兜個圈,主要為搵食!因為係晌高雄第一晚,要試夜市仲有大把機會,所以搵咗「斑鳩的窩」食晚飯,她係當地連鎖日式食店,而且價平質高,地方坐得舒服,一邊食,一邊又可以睇番今日影嘅相。行到攰,食到飽,都係返酒店嘅時候,因為聽朝要去台南。