相信濟州民俗村都算得上大部人嚟濟州嘅標準景點，因為佔地16萬平方米，超過100多間屋舍，展現番100年前嘅濟州傳統風貌，加上村內設有唔同嘅民俗工藝坊（如木雕、民俗酒、民俗畫……），以及唔同嘅特色民俗體驗（投壺、打糕杵、墊草棚……），令遊客更了解當時的生活史。

雖然整個民俗村地方頗大，但基本上沿著當中一條主步道圍繞一圈，就差不多行勻所有分區。我哋唔停咁行，唔停咁影，都行咗1.5小時，如果想悠閒啲，再細研吓村內啲資訊，仲想參與一吓工藝坊、體驗活動，相信預2.5小時適合啲。

究竟民俗村內有幾多嘢睇？我都唔嘥篇幅多講，掃描張地圖俾大家參考吓仲好。但喺，其中因晌度拍過大長今而設立嘅「大長今主題公園」，其實好鬼細，得間屋仔放滿唔同展品介紹吓，如劇中嘅道具、劇本……等等，所以唔好抱太大期望諗住晌度對大長今追憶一番。此外，都仲有唔少古裝韓劇晌度取景，如追奴、巨商、金萬德，以及小弟都幾鍾意嘅擁抱太陽的月亮，所以，對一啲好迷古裝韓劇嘅粉絲，又會有另一番味道。

題外話，小弟晌度足足影咗近300張相，之後執番出嚟都有230多張，可想而知民俗村確喺有幾多嘢影，可惜開飯遊蹤上載相片有限！

釜山往返濟州其實好方便，第一，有多間航空公司營運，釜山航空（Air Busan）、韓亞航空（Asiana Airlines，不過此航線韓亞喺由釜山航空營運）、濟州航空（Jeju Air）、大韓航空（Korean Air）；第二，每間航空公司每日都多達7、8班機，早午晚任何時段都有。而且，機程短，一般都唔使1小時，所以去得釜山，都值得飛埋過去濟州逛吓、睇吓！

咁多航空公司，最終揀釜山航空，不外乎錢作怪。其實之前準備行程時都有留意幾間航空公司嘅價錢，晌唔同時段大家各有平貴，依家15/12號下午嘅航班，時間較好及價錢較抵就喺釜山航空嘅BX8113（14:45 – 15:40）航班，成人價連稅及燃油附加費都喺KRW64,800（折合港紙HKD480），比早前睇到嘅貴咗少少，但都OK啦！

傍晚到咗民宿之後，都將我哋個情況向屋主崔姐姐講一聲，原本都無打算睇醫生，諗住食啲成葯再算，但最後崔姐姐好熱心，幫我哋搵到間仲有夜診服務嘅診所，仲叫埋本喺朋友嘅梁先生，亦喺我哋一早預先聯絡好嘅包車司機車我哋去，崔姐姐唔放心亦都跟埋嚟幫幫手。

無佢兩個真喺唔知點搞，去到診所非常多人，尤其小朋友。晌診所內全韓文，寫嘅、講嘅都喺，根本無法溝通，真喺叫到我哋都唔識應呀！此外，崔姐姐和梁先生曾晌中國及台灣讀過書，識講國語，跟佢哋溝通絕無問題，所以佢帶我哋搵診所之餘，又可以幫手做翻譯，講解我哋身體有咩問題，啲葯又點食法。擾擾攘攘搞咗成個鐘，確診我哋喺輕度食物中毒，要戒口，只可食粥水。

返到民宿，崔姐姐都知我哋食唔得其他嘢，特別為我哋即時煮咗餐愛心白粥，因為韓國唔似香港，落街就有粥鋪，仲要喺白粥喎，咁我哋都總算有啖食。所以，唔喺有佢哋兩個貴人，不知點算！

題外話講少少韓國啲診所，睇醫生還睇醫生，睇完即晌櫃枱交診金KRW16,000；跟住落去地下間附屬葯房再執葯，葯費盛惠KRW17,500，啲葯丸獨立包裝分好晒，一串3小包相連寫明早午晚分3次食（當然喺韓文啦），一共3串即3日葯，清楚易明唔複雜，更唔會溝亂啲葯有無食多食少。

芒果屋民宿就晌濟州市中心，交通非常方便，附近有Lotte-Mart同E-Mart，入貨買手信唔使煩。濟州市嘅樓一般都唔高，芒果屋民宿位處16/F，窗外景觀已經相當開揚，而且更對住漢拿山。基本上屋主崔姐姐都喺住晌上址，所以一室佈置花咗好多心思，有好多小擺設、掛畫，環境企理整潔，床舖感覺又很乾淨，很有家嘅感覺，令人感到舒適、溫馨。但始終喺人哋嘅屋企，總有少少規矩要留意，無住酒店咁隨便嘅，例如出入輕聲啲，唔好嘈到隔離屋；又例如盡量唔好太夜返，免得影響其他人。

屋內有2床房、4床房、6床房，全以碌架床為主，共可容納24人，而地板裝設咗發熱線，所以依家咁凍，但地方踩落都好暖，果然喺舒適、溫暖呀！收費以人頭計，每人每晚KRW30,000，話平唔平，話貴唔貴，況且有免費wi-fi，簡便零食，仲提供埋豐富韓式早餐，其實好划算。由於依期得我哋4個人，地方有鬆動，所以安排咗兩個房俾我哋。

屋內所有公共空間都可以用，如果想大顯廚藝，亦可以使用廚房內用具煮番幾味，有時，更可跟崔姐姐學整泡菜添。想感受吓韓國家庭氣氛嘅小規模民宿，芒果屋可謂不二之選。

此外，芒果屋仲附設包車轉介服務，因為跟崔姐姐相識嘅梁先生，就喺做包車生意，包車一日8小時收費KRW180,000，包晒所有燃油費、路費、停車場……等等雜費，人多嘅話真喺極划算，而且車內又有免費wi-fi，車廂寬敞，話就話超時要補錢，但兩日我哋都過鐘，梁先生都無收，非常爽快。難得大家溝通到，唔怕雞同鴨講，遊濟州景點散，公車未必咁方便，除非你曉揸車，否則包車都喺幾必需！

去旅行，除地鐵，火車亦都喺另一種重要交通工具。晌釜山有好多火車站，都有晒地鐵接駁，不過如果要搭韓國高鐵KTX，就要去「釜山火車站」，跟地鐵1號線釜山站（#113）相連，個火車站都幾大，一出地面就見。

想由釜山出發往慶洲，交通方面有三個選擇：
- 搭乘釜山地鐵1號線至『釜田站』步行至『釜田火車站』→搭乘火車至『慶州火車站』，車程約1.5 - 2小時，KRW6,800。（分「新村號」特快車、「無窮花號」快車）　
- 搭乘釜山地鐵1號線至『老浦洞站』步行至『釜山綜合巴士客運站』→搭乘巴士至『慶州市高速巴士站』，車程約1小時，約KRW5,000。
- 搭乘釜山地鐵1號線至『釜山站』步行至『釜山KTX站』→搭乘韓國高鐵至『新慶州KTX站』，車程約半小時，KRW10,700。

其實各有長短，舊式火車站站停、慢慢行，天氣好可以睇吓風景，而慶州火車站就在慶州市內，就算晌釜山嘅釜田站都屬市內區域，但班次疏落兼車程太長；而高鐵KTX夠晒快，無乜停站，行車穩定，全程晌山中隧道居多，但零景觀，車費較高，仲有新慶州站設於市外，接駁巴士唔密，又唔喺度度地方都到，我哋打的入市區都要成KRW18,000一程；而高速巴士就介乎兩者之間，不過如遇天雨可免則免，仲有就喺晌釜山嘅接駁點「釜山綜合巴士客運站」（老浦洞站）算喺市郊，都幾遠，所以揀咩車都要視乎時間、車費、方便度……等等。

雖然話KTX貴，不過都唔知因乜，我哋由釜山出發往慶洲，原價KRW10,700一位，每位另減KRW4,000，折後價即喺KRW6,700，仲平過搭舊式火車添。不過，唔知喺咪啲人嫌新慶洲唔方便，到站只有我哋4個人落車，下面大堂又喺空無一人，靜得緊要！

有90年歷史嘅國立慶州博物館，主要展示B.C.57 – A.D.935近千年新羅時期首都慶州地區嘅文化遺産，館內收藏咗10萬餘件物品，而展出嘅都有成3千多件。整個博物館分4部份：本館（考古館）、美術館、月池館及戶外展廳。另外晌本館側仲有個特別展館，不過依期無嘢展，又休館。

1. 考古館 - 到訪當日因耐震建設工程休館，休館期仲要由04-12-2012 ~ 05-08-2013。所以未能欣賞代表性嘅展品「新羅金冠」。
2. 美術館 – 樓高兩層，除好多出土美術工藝品文物，仲有個新羅王城復原模型歷史資料室。
3. 月池館 - 錯過了，其實值得入內一看，因為之後所參觀嘅雁鴨池，基本上空無一物喇，從雁鴨池水塘和周邊嘅建築物遺址中出土咗三萬多件遺物，部份700多件擺咗晌度展出，可以一窺新羅王室同貴族華麗生活嘅生活面貌。
4. 戶外展廳 - 因天雨不停，無乜心機多睇，有啲梵鐘（聖德大王神鐘）、古善寺址三層石塔、慶州地區嘅寺廟及宮殿遺址等搬嚟嘅石雕遺物。

如果對佛教或華麗嘅宮殿文化有興趣者，嚟參觀國立慶州博物館就啱啲。

雁鴨池原喺月城東北部東宮內嘅人造水塘，當時被稱為「月池」，但晌朝鮮時代先被改叫做「雁鴨池」。

據史書記載，新羅嘅文武王在位第14年（A.D.674）命令晌宮城裏挖一個蓮花池，做一座小山，種上花花草草，餵養珍奇動物，為紀念三國統一而下令修建嘅，名為「臨海殿」嘅行宮。不過，後被外族侵略而燒毀。雁鴨池就喺當時所挖出嘅蓮花池，位處月城外側東北部，據1974年挖掘時嘅調查結果，雁鴨池呈球形，東西200M，南北180M，有大小不等嘅3個小島。目前嘅雁鴨池接近圓形，喺沿護岸石重新修建而成。

當中好多殿址都無晒，只喺修復咗幾個，內裡有啲模型及文物簡介（韓英中日文），入到去真喺唔太多嘢睇，幸好大量文物，都被埋晌當年國王飼養寵物嘅池內，免遭洗難，要睇出土文物就要晌國立慶州博物館嘅月池館喇！

半月城，就晌雁鴨池對面，喺新羅時期具有代表性嘅宮殿基地。因為呈半月形，所以被稱為新月城或半月城，亦喺新羅王居住過嘅地方。據書講，以前依度有南門、正門、北門、玄德門、武平門等城門，又有月上樓、忘恩樓、鼓樓等樓閣，仲有談論國家大事嘅朝元殿，以及很更多建築物。不過，現況喺冬天顯得一片荒涼，剩低就得啲基石、石碑。

半月城裡面有個石冰庫，顧名思義就喺石做嘅冰庫，即喺古代冰箱。如果唔講，點都唔信眼前依個咁簡陋成個墓塚就喺個可以存冰嘅地方，望入去完全無乜特別，空空洞洞咁。不過，走近入口附近，陣陣陰風冷氣。又喺據講，石冰庫建晌地氣寒冷嘅地方，一半晌地上，一半晌地下，地面同牆壁喺花崗岩，拱形頂部，設有通風口，又用上很多很多石灰，喺有防止外部嘅濕氣同雨水進入嘅作用，再者，存冰時用咗稻草嚟隔熱，科學家做過試驗證明稻草隔熱存冰喺幾有效，真喺唔到你唔服古人智慧，咁神奇嘅結構就可以存放冰塊。

瞻星臺亦喺象徵慶州嘅代表遺跡之一，建於新羅時期第27代王善德女王（A.D.632~647），至今已有1,400多年歷史，但仲喺完整咁保持原貌。

佢喺東方現存最古老嘅天文臺，主要用於觀測天空中嘅雲氣及星座。石結構建築，呈圓筒井形，但直線同曲線嘅搭配十分和諧，臺高9.4M，底座直徑5.35M，由365塊30cm大小嘅花崗岩石塊分27層堆疊而成。正南側嘅第13至第15層之間有四方形出入口，可以進入內部，出入口下邊兩側配備長梯供人登上瞻星臺，當然依家你就唔會見到有條梯啦。

慶州有咩出名嘅食物？就喺菜包飯（쌈밥, Ssambap）同皇南餠（황남빵, Hwangnam-ppang），晌大陵苑周邊就有好幾間專做菜包飯嘅韓餐館，時值正下大雨，又已經差唔多近1:00pm，所以就搵一間似模似樣嘅店鋪試吓菜包飯，咁啱見其中一間有旅行團幫襯，應該都穩陣啩。

入到去，一貫韓式菜館格局，唔知點解，又被安排坐晌韓式矮枱嗰邊啲位。翻開個餐牌，得一版紙，勁簡單，正當我哋唔知點叫嘢好，隔離團個導遊喺帶台灣團，識講國語，充當我哋嘅臨時翻譯，佢話我哋4個人叫兩份菜包飯（KRW10,000 / 份），加個豆腐鍋（KRW8,000）就夠晒，好彩有佢，唔喺今餐實撐爆肚啦。

之前講過我哋懷疑就喺食咗依餐而又痾又嘔（因為之後除咗試過啲皇南餠，晚餐亦唔喺一齊食，此外就無再食過其他嘢，後來睇醫生亦證實輕度食物中毒），拋開依個事件，其實佢啲食物都幾好食，兩份菜包飯已經包咗好多嘢，兩碗白飯，十多款前菜，又有煎魚、煎蔥餅、醬炆肉，最正有鍋熱辣、清甜嘅牛骨湯，又香又好飲。菜包飯其實喺用菜（如白菜、生菜……）包住米飯同熟肉嚟食，鍾意又可以夾啲泡菜、醃菜，下點甜辣醬，味道變化多，富層次。而豆腐鍋要個走辣版，因為可以揀辣或唔辣都得。雖然未能百分百確實，我哋事後覺得最可疑出事喺啲「生」菜，好彩，都算喺不幸中之大幸，食啲葯都頂得住！

大陵苑喺新羅時代王陵及古墳嘅所在地，大大細細猶如小山丘嘅王陵古墳處處皆是，而周圍環境寧靜盎然，加上今日晏晝煙雨濛濛，感覺更顯淒美！

古墳內嘅壁畫蘊含數千年珍貴嘅歷史資料，晌1973年被發掘嘅古墳天馬塚，喺新羅時期典型嘅積石木棺墳，高12.7M，直徑成50M，周長157M，在封土內部有以石頭堆積成嘅積石層；積石層裡有個長6.5M，寬度4.2M，高度2.1M嘅木房，中央放著木棺同屍體，出土遺物多達11,500多件。天馬塚可以入去參觀，但就唔俾影相，裡面放有主要出土遺物嘅複製品

搭完火車晌釜田站轉地鐵，因為姨仔另有「代友入貨」任務，於是分道揚鑣，我哋3個人就索性返番酒店附近食，因為之前逛過中央洞都有幾多食肆。

兜咗個圈，有幾間心水，其實小弟心儀其中一間夠人氣嘅食店，不過望落非常地道，專做街坊生意，生怕溝通唔掂，結果就搵咗DoMoYa依間日式餐廳。一來單睇門面幾光鮮，二來門口棟咗個餐牌，可以睇啱晒先入去，三來就喺價位平宜，再者我哋又唔喺太想食韓國嘢。

入到去頓時感覺溫暖，因為近門口位就放咗部暖爐，我哋成日飽受風雨煎熬，依部暖爐真喺令人窩心。餐牌雖然全韓文，但靠睇圖都略知一二，食物主要分4類：吉列定食、米飯或便當、烏冬、蕎麥麵。跟個侍應落單，喺雙語廣播，佢講韓文，我講英文，加埋手指指，都OK啦，然後佢放低樽水，我哋就自斟自飲。早前都講過，依個喺韓式餐廳特色，無熱茶，一貫白開水，成樽放低，隔客自便！

김치냄비우동泡菜烏冬鍋 KRW5,000
有時啲圖片都唔太可靠，舅仔以為喺清湯烏冬，原來喺泡菜烏冬鍋，食就幾好食，滾熱燙，辛辣惹味，只喺舅仔都唔喺嗜辣嘅人，食起上嚟當然有點點吃力。依個時候，咪就喺發揮群眾力量囉，大家一人分享啲，唔使一個人獨撐！

해물냄비우동海鮮烏冬鍋 KRW5,000
依個跟圖又喺有啲分別，海鮮配料無圖咁多，但味道唔錯，湯頭幾鮮甜，啲烏冬好滑溜，海鮮有啲蟹柳、魷魚、蝦，以及雞蛋。烏冬鍋均會有醃蘿蔔同泡菜作為伴鍋前菜，兼且烏冬份量十足。

로스까스吉列豬扒定食 KRW6,000
依個吉列定食小弟覺得超值，晌香港點一客有啲質素嘅吉列豬扒定食，閒閒哋都要過百大洋，依家只喺KRW6,000，折番HKD45都未使。一客有齊兩大件吉列豬扒、滿滿嘅沙律汁椰菜絲、麵豉湯、大大碗白飯。吉列豬扒炸得非常脆，又唔油，蘸芝麻醬好正，椰菜絲幼細爽口，飯粒又軟熟綿綿，只欠一客牛乳布甸咋，哈哈！抱歉，店家唔賣甜品。

小店地方闊落，招呼又唔錯，人唔太多食得輕鬆自在，仲唔收加一，食3樣嘢夾埋都喺KRW16,000，即喺百二蚊左右，抵食！唯一唔抵咪就喺第二朝嘔番晒囉！

40階梯文化觀光主題街喺展示充滿韓國戰爭苦難時代嘅哀怨同鄉愁嘅一條主題街道，由國民銀行中央洞分行，經過40階梯，一直走到40階梯文化館，全長都只不過約450M左右，當中豎立咗好幾個當時難民區生活場景嘅雕塑，如「媽媽的心」、「爆米花的人」、「拉手風琴的人」……等等，順路嘅話不妨走走看看。

40階梯文於2004年6月被選定為釜山市綜合評價最優秀嘅街道，60多年前，40階梯於1950年6·25戰爭時位處喺交通行政中心「釜山中區」，當時有好多因躲避戰爭嘅難民逃難至此，晌附近搭咗好多簡陋棚屋聚居，從前方碼頭運嚟嘅貨物及救援物資亦晌度販賣及發放，因此形成咗一個市場。亦由於好多人都逃難於此，許多因逃難分散嘅家庭卻能夠在此重逢。故此，40階梯附近仍有著戰爭時逃難所遺留嘅50~60年代建築，可會勾起老一輩人嘅回憶。

龍頭山公園屬市內地標之一，尤其公園內嘅釜山塔，高度120M，晌上面嘅展望臺可360∘睇晒釜山全景及釜山港口，廣闊開揚，一覽無遺，夜景更喺迷住唔少遊客。夜間，藍色照明燈打晌塔身色彩迷幻，令釜山塔更加迷人。

由於公園形狀有啲似一條從海遊上陸地龍嘅頭部，因而得名，就算唔睇夜景，晌天朗氣清嘅日子，上到嚟公園感覺都好舒服。因為園內約有700多種生長繁茂嘅植物，園藝幾有佈局，深受釜山市民喜愛嘅休憩場所，當日所見都有幾多市民在此休閒、曬太陽、做吓器械運動、捉吓棋、放紙鳶。

除釜山塔，其他設施仲有天空咖啡館、世界文化遺產展示館、世界民俗樂器博物館、世界風俗文物紀行、紀念品館、鼓咖啡店、特別展示館……等等，喺公園晌2007年10月重新組建成嘅「世界文化體驗中心」設施。此外公園內仲豎立著朝鮮時代名將李舜臣將軍嘅銅像（高度12M），以及青銅龍塔、鐘閤（釜山市民的鐘）、花鐘（直徑5M）、文學碑等等。

補充資料：
龍頭山公園（免費參觀）
釜山塔（入場費KRW4,000）
世界民俗樂器博物館（入場費KRW2,500）
世界模型船展示館（入場費KRW1,000）

去完龍頭山公園，從另一邊出口落番去中央洞，附近幾條街都有好多食店，兜咗一個圈，睇見依間門口好似麻雀館，實質喺街坊食堂嘅「中央蕎麥」（註：佢無中文名，店內店外全韓文，極地道，真正街坊鋪，個中文名都喺小弟返嚟再幫佢譯番，再者小弟完全唔識韓文，都喺靠啲網上翻譯系統，下文啲菜式名字亦如是，如有錯誤請更正，多多指教）。食完走出嚟個阿叔一睇就知我哋喺遊客，即刻豎起手指公讚依度喺好嘢，從門縫望入去，真喺好旺、超人氣，膽粗粗走入去試試。

原來依間嘢喺賣烏冬同蕎麥麵，啱晒啦，第一日食咗兩餐韓國菜，辣得要命，今餐食餐日本嘢，可以好好緩和一吓。由於牆上嘅菜牌全韓文，只有日文翻譯，一粒字都唔識，完全睇唔掂，姨仔學緊韓文，都識少少，不過小弟都喺手指指就算，睇睇隔離枱有啲咩，篤篤手指搞掂。

場內有一般枱椅，亦有傳統韓式矮枱，第一次坐，感受吓韓式氣氛，不過真喺好唔慣，搞到小弟成日郁嚟郁去！另外，因為喺食日本嘢，無晒大堆頭嘅韓式前菜，只有啲漬蘿蔔同泡菜蘿蔔，我同舅仔食蕎麥麵，兩位女士就要湯烏冬，最難得喺有熱茶奉客，仲要喺玄米茶，香呀。

냄비우동湯烏冬KRW4,500
唔好睇佢細細份，都有幾多烏冬晌裡面，配料有鳴門卷、油豆腐，湯底清甜，晌寒冷嘅冬天，一鍋熱騰騰嘅烏冬食得令人窩心。

특오뎅우동特級烏冬鍋KRW5,000
比起上面個湯烏冬，依個烏冬鍋就抵食好多，只喺多KRW500，烏冬份量及餸料都多啲。

모밀국수蕎麥麵（兩份）KRW6,000
以每兩盆計，伴有醬油，口感超正，因為麥白質感整之滑溜！真喺好快一盆就放晒入口。

김초밤紫菜壽司卷KRW3,000
유부초밤炸豆腐壽司KRW3,000
因為單食蕎麥麵驚唔夠，所以點多兩客壽司。紫菜壽司卷一客有5件，而炸豆腐壽司則一客4件，兩者味道唔錯，飯料鬆軟。

其他仲有蝦天婦羅烏冬（새우튀김우동KRW5,000）、天婦羅烏冬面（튀김우동KRW4,000）、蕎麥鍋（모밀냄비KRW6,500）……等等。價錢實惠又無加一，抵食！

位處影島區嘅南端最終處，又喺另一景點名勝「太宗臺」，被稱為睇「絕景最美日落」嘅理想地點。由於昨日晌冬柏島睇日落嘅經驗，釜山日落都幾早，所以我哋預早少少出發。除日落，沿入去觀景台路途中亦見到有啲懸崖峭壁和奇岩怪石，都有一定可觀性。

影島喺由絕影島縮減而嚟嘅名稱，從前依度就以牧馬場聞名，生產跑速極快連影子都睇不到嘅名馬，故被冠為絕影島。而太宗臺喺新羅時期第29代太宗武烈王晌完成統一三國嘅偉業後，巡視全國時沉醉此處嘅美景中，並晌依度射箭遊玩，因而得名。太宗臺與五六島都喺釜山代表性嘅岩岸，都因波浪侵蝕海岸所形成，太宗臺海拔250M高，內有茂密嘅海松、熱帶性闊葉樹日本桂、楠木、冬柏樹、柃木等200多種樹木。

遊客主要會去太宗臺嘅觀景台，以及再往前沿燈塔木造步道樓梯落至底嘅神仙岩 (신선바위)。而太宗臺以外，影島區仲有2012年7月新開嘅國立海洋博物館（국립해양박물관, http://www.nmm.go.kr/china/）及東山洞貝塚等景點。

不過今次又預得時間多得滯，晌中央洞坐巴士入去太宗臺都喺半小時多啲，車程頗順。個人建議，去太宗臺觀光可以當行山咁嚟玩，條路唔難行，少少斜，但唔會大上大落，而且環境真喺好舒服，期間又設有一啲觀景台，望望壯闊海洋。由太宗臺入口行去最南端主觀景台，大概1個多小時，而由主觀景台順方向晌另一邊返回入口處都喺45分鐘。當然，有小朋友或行路不太方便者，就最好坐太宗臺小火車啦，來回計成人KRW1,500，青少年KRW1,000，兒童KRW600。

今日有啲可惜，天晴但多雲，又厚，等咗咁耐，太陽伯伯都落晒，但就瞇埋咗晌啲厚雲後面。據講，如果夠晒天氣晴朗時，仲可以清楚望到對面遙遠嘅日本對馬島添。

札嘎其市場喺韓國最有代表性嘅水產市場，充滿活力，她自19世紀末至今，韓國嘅海產、海鮮、乾魚貨等約有30~50%皆經由此地流通全韓國，可見其舉足輕重嘅地位。釜山港前嘅南海與附近沿海所捕獲嘅漁貨，一年四季都有著各種海鮮，貨源應有盡有。每年10月左右，更舉辦「札嘎其慶典」，除能盡情享受各種豐富嘅新鮮海產外，仲有許多精彩活動。

近南浦洞地鐵嗰邊有個乾漁貨市場，如果鍾意漁產乾貨，大可走過去睇睇，買啲當手信都好。不過我哋無去，主要都喺嚟搵食，所以一出地鐵都喺直踩去札嘎其市場。札嘎其市場樓高7層，地下喺經營海鮮水產嘅商店，2樓就喺魚生餐廳，亦即喺我哋嘅目標，而5、6樓仲有OASE自助餐廳，美食多到不得了，都喺折港紙三百幾，勁抵。不過，既然想地道啲，又有啲當地氣氛，去2樓搵食就啱心意啲。

札嘎其市場周邊仲有唔少魚類街頭小食，尤其炭火燒烤，最吸引到啲遊客。所以，食唔食海鮮，都值得一嚟！

期待已久嘅札嘎其市場海鮮大餐即將登場，不過未講食，先講環境。上到二樓，感覺就有啲似我哋康民署啲熟食市場咁，不過氣氛真喺一流，靠海一邊窗全部都喺客枱，不過要將就吓，全部都喺韓式矮枱，唔慣都要坐成晚。坐滿客人，好熱鬧，但其實當你一入內，各個檔位已不斷跟實你，游說你幫襯，因為一枱人隨時都食幾十萬韓圜，好似我哋一共6個人都食咗成KRW255,000，但其實好抵喎，因為折返港紙其實每人都喺三百鬆啲，全部都喺海產嘢，更要飽住走添。

先說明少少嘢，雖然拎咗佢卡片，都喺得韓日文，餐廳名字就無錯架喇，叫「거제키다리힛집」，不過「巨濟島刺身室」就我幫佢譯，上到二樓真喺有好多海鮮食店，每個檔口唔算劃分得好清晰，但上面都總有個鋪頭名！

檔口前有好多水缸，以新鮮海產「晒冷」自然少不了。另外餐牌亦分門別類，韓日英中文，雖然啲中文譯名跟我哋所認識略有不同，但大致睇得明，點菜難度唔大！而廚房就晌隔離，即點即煮，做好即上。

前菜
食韓國菜前菜多喺人都知，不過，今餐嘅前菜陣容之鼎盛，有啲無法想像。由於陸續咁嚟，我哋又不斷咁食，所以難有一張前菜「合照」，但前前後後，加埋都成10多樣，包括烚南瓜、灼蝦、天婦羅、豆腐、泡菜、椰菜絲、醃蘿蔔……等等，有啲就唔喺好知咩名，但竟然螄蚶同生蠔都喺前菜嚟，生蠔仲一人一隻，唔使爭，基本上前菜喺唔收錢嘅。好多款前菜都好食，不過烚南瓜同個豆腐最得我心，因為原味突出，南瓜清甜香軟，豆腐味濃質滑，正。

什錦海鮮KRW100,000（大）
分特大、大、中、細（KRW150,000 / KRW100,000 / KRW80,000 / KRW 50,000）
6個人，老闆娘就建議要份大嘅，每份什錦海鮮都包4樣海產，有鮑魚（每人一隻）、海鞘、法螺、八爪魚。新鮮鮑魚刺身都喺第一次食，鮑魚已鎅開一件件，口感爽，但有啲韌；海鞘唔多好食，好似食柴皮咁，又無乜味；法螺OK，點啲醬油食落幾鮮；八爪魚真喺可以用「鮮活」形容，篤一篤佢會仲郁，放入口亦會啜住啜住，挺有趣。

黃魚烤KRW50,000（大）
分大、中、細（KRW50,000 / KRW40,000 / KRW30,000）
黃魚烤都喺要份大，真喺頗大條，單睇賣相，燒得好香甘，肉嫩油香，又喺值得一讚嘅菜式。

盲長魚（盲鰻）KRW60,000（大）
分大、中、細（KRW60,000 / KRW50,000 / KRW40,000）
睇書介紹，已一心想試，所以喺是晚嘅指定菜式。不過，唔習慣嘅話有啲人會覺得好核突，因為啲盲鰻喺活劏，再由老闆娘粉墨登場晌你面前即煮，啲盲鰻邊煮邊郁，海國人可能嚇鬼暈。煮盲鰻其實都好簡單，配菜只有洋蔥同青椒，，撒啲胡椒粉，兜兜炒炒煮熟就喺，味道方面，盲鰻都幾鮮味，啖啖肉，帶點辣（辟腥）。

海味蔥餅KRW30,000（中）
分大、中、細（KRW40,000 / KRW30,000 / KRW20,000）
以鮮蝦為主，蛋餅加入大量香蔥，煎得非常脆香。不過賣到成KRW30,000一客，感覺有啲貴。

生魚片拌飯KRW15,000（中）
分中、細（KRW15,000 / KRW10,000）
反而個魚生飯就抵食喎，因為一客有好多魚生。老闆娘仲教咗個食法，將碗飯倒入魚生內，唧啲韓國甜辣醬，撈勻嚟食，滋味到極。

收費方面，所以前菜送嘅，你晌餐牌點咗幾多嘢，就按價照加，有單有據（不過完全喺韓文，俾番張單我都睇唔明），無加一，無小費，認真實際同實惠！認住「巨濟島」（거제）個名，或認住老闆娘個樣，就算唔喺搵依間「巨濟島」，都絕對要嚟札嘎其市場食番次海鮮大餐！

釜山地鐵一共有4條鐵路，分別叫1,2,3,4號線，每個站除咗有站名外，亦以3位數字號碼為代號，1號線址為1字頭，如之前轉車嘅2號線沙上站，代號喺#227。跟輕電鐵大同小異，收費分兩區間，KRW1,200（1區間：距始發站不超過10公里的地方） / 1,400（2區間：距始發站超過10公里的地方），而自助售票機一樣有中文介面，買票程序清楚易明。如果好好利用地鐵，其實可以慳唔少，因為有一日票選擇，都喺KRW4,000，以小弟當時匯率，折返港紙都唔使HKD30，全日無區間無限次任搭，好抵，真喺搭3程都回本。仲有隻7日票KRW19,000，7日間不受區間限制可使用20次，但喺相信遊客會使用嘅唔多。

記得去佢個網頁睇睇，了解路線圖及收費模式固然需要，但最正喺晌「地鐵乘車觀光」一欄，有晒4條線沿線主要景點，以及點樣前往及所需轉駁嘅巴士，好有參考價值，而大部份景點主要集中晌1,2號線。

此外，釜山嘅地鐵站都幾長，內有好多出入口，全以數字劃分，指示充足。記低要去嘅地鐵站代號，以及出口數字，搵景點就輕鬆得多。題外話講講，部份地鐵站與站之間，都有地下街，都幾長幾多嘢買，天熱可過吓「冷河」，落雨又可以避避雨。

睇韓劇久唔久見啲男女主角去嘆汗蒸幕，好似幾得意，想試好耐架喇。既然搭通宵機，酒店要4:00pm先可入住，姨仔一早提議去嘆汗蒸幕，舉腳贊成啦。

釜山有唔少汗蒸幕場所，要數最齊最新應該喺海雲台新世界百貨Centum City內嘅SPA Land，場內配套極現代化及齊全。據介紹，從地下千米深引入2種天然溫泉水（碳酸氫納溫泉、氯化納溫泉），打造出22個溫泉池、13個主題汗蒸慕、桑拿、戶外足浴池等。

1/F - 三溫暖及熱療區
天然溫泉浴池、三溫暖及熱療室盡在此層。溫泉浴池一天36次全面殺菌，大可安心享用。而汗蒸慕、桑拿花款多，有芬蘭桑拿浴、黃土泥浴、羅馬室、金字塔室、木炭室、土耳其浴室、峇里室、SEV室、冰房、Body Sound房……等等。另外又有個小食亭，口渴買吓水飲都方便。

2/F - 娛樂區
此樓層有休閒室、護膚室、頭皮及足部護理、商務室、餐廳、咖啡廳。

汗蒸幕跟焗桑拿有啲似，將體汗排出嚟舒緩神經緊張，所以見當地人焗到衣衫盡濕。我就無咁犀利，個個蒸浴室都試吓，志在體驗。多種設計不同、溫度不同嘅蒸浴室，又真喺幾有趣，記得最高一個蒸浴室叫「火釜」，真喺頂唔到30秒，因為成67.6℃，見裡面幾位「阿豬媽」排排坐有講有笑，佩服！佩服！焗完一輪汗蒸幕，上二樓有個大型休息區，幾大排梳化床，有獨立電視機，較點輕音樂，瞓番陣補足少少精神，臨尾再去浸浸溫泉，真喺疲勞盡消。

收費又點計？入場費成人收KRW12,000（平日）/ KRW14,000（週末/例假日），如果想再慳啲，早場（朝早8點以前入場）或夜場（晚上8點以後入場）都非常抵，成人收收KRW7,000（平日）/ KRW9,000（週末/例假日）。提提你，入場費唔喺任玩全日，每次入場費最多可享用4小時，超時每個鐘加收KRW3,000，記緊唔想俾「罰款」就要準時還匙。講真，為番起港紙HKD90都唔使，嘆足4個鐘，又焗又浸又瞓，真喺好抵嘆囉！

嘆完汗蒸幕都成2:00pm，所以費事周圍再搵食，索性晌番新世界9/F餐廳樓層搞掂，當中有日式，有西餐，有café。作為釜山嘅第一餐，食韓國菜好似有啲理所當然咁。

因為已過咗午飯高峰時段，食客唔算太多，而室內裝潢簡約，但氣氛柔和，感覺幾舒服。餐牌內容一眼睇晒，兩頁半紙，多款石頭窩飯及熱窩。點好菜之後，韓式餐廳喺唔喺都送上一大堆前菜，有泡菜、八爪魚、蝦乾、黑豆、海帶蘿蔔絲，款款小巧精緻，味道又各有特色，小弟就最鍾意啲黑豆，煙煙韌，又甜甜哋。除前菜多之外，韓式餐廳另一特色就喺佢哋唔興供應熱茶、熱水，通常一大樽白開水放晌枱上自斟。

翻開餐牌，韓英日對照，加上圖文並茂，大概會知道所有菜式喺乜。我哋點咗2個石頭窩飯、1個豆腐窩加1個全州式牛肉飯，無加一，埋單按價加埋KRW33,500，平衡折返港紙每人HKD60+，雖然晌大百貨公司裡面，又唔算貴喎！

돌솥비빔밥 牛肉石頭窩飯 KRW8,500
韓國菜賣相一向都幾別緻，好似兩個石頭窩飯，飯面伴以5色蔬菜，甚有養生意味，又寧捨好睇。飯粒分明又熱辣辣，不過飯焦唔多，5色蔬菜有洋蔥絲、蘿蔔絲、冬菇絲、菠菜及金針菜，加埋隻生雞蛋，伴飯幾好。雖然叫牛肉石頭窩飯，但牛肉唔多，且碎濕濕，變咗大配角咁！

나지돌솥비빔밥 八爪魚石頭窩飯 KRW9,000
相比起個牛肉石頭窩飯，依個八爪魚下得多好多，味道都幾辛辣，質感柔軟有咬口。而5色蔬菜又用咗另外幾款：大豆芽、紫椰菜絲、甘筍絲、椰菜絲及生菜。味道同樣不俗！

순두부찌개 石頭豆腐窩 KRW7,000
周時都見到有依個石頭豆腐窩，印象上，基本喺韓式餐廳都見佢蹤影。豆腐嫩滑，惹味刺激，但真喺幾辣，嗜辣嘅人一定鍾意，小弟唔好辣，所以要成日灌水。

저주저통비빔밥 全州式牛肉飯（Jeonju style rice topped with wild vegetables and meat）KRW9,000
小弟見識少，食完個全州式牛肉飯，都真喺唔知特別在晌邊。跟上面個牛肉石頭窩飯晌用料9乘似，唯一明顯咪就喺無用石窩。不過，依個牛肉飯都OK嘅！

海雲臺海水浴場稱得上釜山代表性嘅沙灘，因為擁有美麗嘅海岸線，灘長足足1,800米、寬50米。每年夏天遊客絡繹不絕，韓國人都會嚟釜山避暑，到時真喺擠得水洩不通。雖然依家冬天不宜下水，但在灘上漫步，看看藍天碧海，聽聽海風輕拂，感受一下冬日暖陽，美景伴以海鷗傲翔，加上遊人稀少，很有一份讓人寧靜，令人安心嘅感覺。

除沙灘，海雲臺海岸線週邊有唔少配套，如高級飯店、娛樂設施、釜山水族館（부산아쿠아리움），鄰近又有冬柏島、五六島……等景點，真喺足以消磨大半天。

過到嚟海雲臺海水浴場，如果唔行埋去冬柏島真喺好嘥。沿沙灘行到尾，就會見到釜山威斯汀朝鮮酒店，依部份喺酒店嘅後面，有條小路可以入到冬柏島公園，當中有950m散步道直去觀景台，而途經木梯級、人魚銅像、小吊橋等等，煞是有趣。

冬柏島出名在於2005年11月召開嘅第13屆世界首腦峰會就晌島上嘅世峰樓Nurimaru APEC House（누리마루 APEC하우스）舉行，喺釜山引以為傲嘅建築，Nurimaru即喺韓文嘅Nuri（世界）、Maru（頂峰），不過小弟就對此興趣不大，反而睇日落喺我杯茶。

冬柏島本身擁有茂密嘅冬柏樹和松樹，風景本己不錯，座落晌世峰樓側嘅觀景台，位置絕佳，環回270度海景，一眼望盡五六島、廣安大橋等壯觀美景。剛好今日天氣唔錯，算得天朗氣清，夕陽西下，餘暉裊裊，睇得令人陶醉。

晌冬柏島睇完日落，外間本已經幾凍，一入黑就仲凍。加上行得攰攰哋，姨仔提議坐吓休息兼飲杯嘢，就晌出咗冬柏島，過咗釜山威斯汀朝鮮酒店，再過埋橋晌十字路口對面，見到間麵包咖啡室，一於小休取暖嘆杯啡。

小店名字叫Arbor，其中一個意思喺由藤蔓攀爬或樹枝交織而成嘅涼亭或棚架，不過依家就變咗我哋個暖窩。其實隔幾個鋪位仲見到有間星巴克，不過，倒想支持吓啲本土小店。想像當地鋪租唔喺好貴，因為鋪內不單擺麵包嘅包櫃，抑或咖啡室嗰邊嘅枱櫈，都比較鬆動唔緊迫，好有空間感；再者，內裡裝修簡約，燈光柔和，確喺叫人輕鬆自在嘅好地方。

我哋各自點咗咖啡或熱茶，再揀啲小圓包墊墊肚。熱咖啡價錢由最平嘅美式咖啡KRW3,800到摩卡、焦糖咖啡KRW4,700，而熱茶均賣KRW4,000，有伯爵茶、茉莉香片、綠茶。此外，仲有啲果汁、沙律，甚至乎brunch都有。

Cappuccino KRW4,200
意大利泡沫咖啡沖得幾香濃，泡沫幾豐厚，口感唔錯。

Cafe Mocha KRW4,700
摩卡嘅賣相就靚啲，奶泡之上唧咗啲朱古力糠漿打個旋風造型。咖啡及朱古力味都幾夠平衡，不過，天寒地凍，只要一杯燙口熱飲，已足夠暖暖心窩。

小圓包
忘了價錢，唔喺咩好特別嘅包，有點西餐廳餐包嘅影子，難得店員主動幫我哋翻熱，雖然出嚟嘅效果唔喺好熱，但感受到佢哋一番心意。

南浦洞喺釜山市中心出名嘅購物點，加埋光復洞、新昌洞，購物飲食共聚一處。每年10月嘅釜山國際電影節，就為南浦洞帶嚟多好熱鬧，因為其中為紀念電影節而建成嘅PIFF(Pusan International Film Festival)廣場，每年刻有獲獎人手掌、腳印、得獎作品名稱嘅銅盤皆會被鑲晌廣場地面上。

大街小巷兩旁大大小小商鋪，有成過百家，由低價到名牌嘅時裝店，以至珠寶、相機、音響、電子產品、民俗工藝品……等等，加上到處皆有休憩區、雕刻作品，我哋去嘅時候正正臨近聖誕，滿街掛上相關燈飾佈置、璀璨照明，好值得一逛。

再者，附近周邊仲有龍頭山公園、札嘎其市場、釜山近代歷史館、國際市場（南浦洞雜貨街）、光復洞美食街……等等，夠你行半日喇。

閒逛完南浦洞，走過嚟光復洞搵食就最好，因為光復洞美食街，街道細細，兩旁卻開咗好多食店，但似乎都喺以韓式餐廳為多。我哋無跟書搵邊間「指定」，反而兜咗一轉，發覺依間멋있는門面醒目，裡面坐得座無虛席，人氣旺場，望落去似喺本地人居多，所以投佢信心一票！

睇門口個餐牌，就知佢專賣soft tofu stew & steamed kimchi，其實佢招牌都有寫明，不過喺韓文唔識睇啫，而門外易拉架又有多款豆腐鍋（순두부）推介。店內裝修頗為時尚，一室橙色為主系，好搶眼醒目，其實啲橙色咪就喺啲豆腐鍋嘅顏色。餐牌韓英日文對照，亦只喺少部份有圖片，行咗成日，晚餐當然要食得好，最後揀咗3款豆腐鍋及一份炒豬肉。

未嚟主食，先嚟前菜已經喺指定動作，前菜主要都喺啲醃菜，晌度唔多講，絕對喺韓式風味。

게살순두부 蟹肉豆腐鍋KRW6,000
幾款豆腐鍋外觀都差唔多，都喺橙紅色，辣度有番咁上下，對唔食辣嘅我真喺一項挑戰，小弟只好慢慢食啦。蟹肉豆腐鍋顧名思義，就喺蟹肉同豆腐，蟹肉唔算好多，而豆腐已經搗碎咗，味道不俗。

햄치즈순두부 火腿芝士豆腐鍋KRW6,000
第二個豆腐鍋喺配以火腿芝士，幾得意嘅組合，火腿芝士好平常，但夾落豆腐度，韓式煮法，效果OK喎，但稍嫌味道單一，就喺辣辣辣。

굴순두부 蠔豆腐鍋KRW6,000
蠔肉大大粒，味道頗鮮，釜山果然近海食海，海鮮產品靚又平。

두루치기 炒豬肉KRW15,000
要份細嘅炒豬肉，嘩！嚟到原來喺滿滿成一大盆，真喺錯估形勢。睇落材料十分之豐富，仲要明火滾住滾住食，真喺未食見到都要除咗件面褸，食咗就邊食邊滴汗呀！味道猶如泡菜鍋，酸酸辣辣，豬肉份量唔少，好似食極都有。

공기밥白飯KRW1,000
初頭見其他人猛添白飯，仲以為唔使錢任添，原來成千銀一碗，當然講韓圜啦。雖然喺白飯一碗，但唔喺普通白米，喺有味多穀米，口感黏糯有咬口。

費用已包咗銷售稅，但無加一，食到飽飽，非常抵食。

東橫Inn晌釜山車站有兩間酒店，一間正正晌釜山站側，另一間就晌釜山站同中央洞站之間，而小弟今次就喺住晌後者「Toyoko Inn Busan Station 2 (東橫Inn釜山車站2號店)」。其實離地鐵1號線中央洞站幾近，大概只有5-10分鐘腳程，而附近內街又有很多韓式、日式食肆及Cafe，附近仲有一個40階梯文化觀光主題街，距南浦洞、龍頭山公園、札嘎其市場等景點亦不遠。

睇名你都知，佢喺由日本人管理，屬集團式經營，晌日本好多地方都有其酒店設立。客房雖然有點逼狹，但整潔，又有wifi，免費早餐，Toyoko Inn 2確喺個經濟實惠不二之選！但有啲地方要留意，根據當地【資源節約和促進循環再利用有關的法律實施令】，法律上禁止免費提供牙具、剃鬚刀等消耗用品，所以一喺晌櫃台購買，一喺就自己帶去，而房內則有沐浴乳、洗髮水、潤髮露免費供應。其他酒店或房內設施，上佢網頁就一目了然。

最正喺洗手間內有自動坐廁，全電子控制，天冷都唔怕坐「冷板櫈」。相反，最唔好喺4:00pm先可以登記入住，10:00am就要退房，確實，退房時間10:00am就未免訂得有點早，如要延遲退房需額外付費KRW11,000 / 小時，好唔划算喎！

跟老婆一向都鍾意行吓山，尋晚玩咗水，今朝咪遊吓山囉，咁先真正叫遊山玩水丫嘛。因為黑沙呢邊嘅巴士比較鬆落，與其唔知等幾耐，索性由酒店行過去黑沙水庫，點知原來都要行半粒鐘先到，當做定行山前熱身啦！

黑沙水庫公園就晌水壩前面，有燒烤場，環境幾企理，夜晚仲有燈光設備，聽啲公園管理員講，個燒烤場都幾受歡迎，好多人鍾意夜晚嚟燒烤。此外，仲有羽毛球、籃球場，不過，對於遊客如我，依啲設施未必用得着。上水壩時，側旁仲有個滑草場，不過依日無開放，我估幾啱小朋友玩。

不過，條行山徑就幾唔錯，一個小時乜都行晒，成條徑沿住個黑沙水庫兜一個圈，景色就無乜，勝在易行，係無啦啦晌個細細嘅水庫上加建咗條吊橋，而另一邊有個咖啡茶座，對下有個所謂水上樂園，即係可以扒吓艇之類。

如果成日困晌鬧市裡，偶爾逃離繁囂，行下山，享受下短暫安寧，都係洗滌心身好去處！

由酒店出番嚟，其實晏晝餐飯無乜心水，不過酒店架穿梭巴士係路經路氹，就隨遇而安，落車後再行過去氹仔有咩好食。

經過地堡街，發現依間雪利斯寫住葡式咖啡美食，又見好多工友幫襯，格局好街坊，成間茶記咁，就入咗碰碰運氣。

嘩，果然係茶記一間，午餐，中西葡炒粉飯麵一應俱全，全部都係廿零三十蚊一碟，午市仲送熱飲，真係實惠非常。雖然係茶記，都盡量點番啲葡式嘢：葡式馬介休炒飯同葡國雞飯。

葡式馬介休炒飯 $28
好似我哋嘅鹹魚雞粒炒飯咁，不過鹹魚就用咗葡國貨，又多咗少少黑橄欖，味道鹹鹹香香，飯粒炒得爽身不油，仲要包杯奶茶，抵得無嘢講啦。

葡國雞飯 $28
兩公婆食唔晒，已經叫少飯，點知嚟到個飯一樣咁大碟。估唔過個葡國雞飯做得一啲唔馬虎喎，一大兜葡國雞，唔單只撒滿椰絲，內裡加咗唔少椰奶，所以個汁好香。再者，配料亦好多，甘筍、洋蔥、薯仔；雞件斬得大大件，不過就唔係好多，4件左右。加埋杯檸水，咁又一餐喇！

雪利斯除經營茶記，另一邊鋪面仲有做麵包、西餅、蛋糕，所以，橫掂依餐食得咁平，就再晌度買個木槺布甸（$8）埋位食，底面兩層瑪莉餅碎，中間一朕煉奶忌廉，都唔錯喎，唔算太甜，口感又幾細滑。除木槺布甸，仲有其他蛋糕，如意大利芝士餅、栗子蛋糕、朱古力蛋糕、拿破崙蛋糕……等等，都係$11-$15，非常之抵。

臨走，見佢有啲自家出品嘅杏仁薄脆，有禮盒裝（MOP49）同普通裝(MOP19.5)，前者買嚟俾同事食，後者買嚟梗係自己食啦。薄脆好似啲金錢餅咁，當中加埋杏仁碎，所以杏仁味頗香。

坐酒店穿梭巴士去關閘，嗰邊感覺好唔同，周圍啲樓又高又舊，啲靈台、窗口架晒鐵籠，好似返咗上大陸。晌附近有個「紀念孫中山市政公園位」，順道行下，介紹就講到好似好正，正入口豎立著孫中山先生嘅全身塑像，中式設計有人工湖、曲橋、涼亭、小樓，西式設計又有多功能體育設施同溫室，去到打個轉，不過真係無乜好睇，似我哋維園咁，好多阿叔阿伯打躉，鋤啤玩十五胡。

園中有個人工小山丘，上到去望過對面，就係珠海拱北，近在咫尺呀，好似望過對面村咁近，全部都係高樓大廈。反而最吸引我嘅，係公園中央嘅迴廊，種有多夥老榕樹，長滿氣根，值得細味！ 

1997年建成嘅望廈山市政公園，晌望廈山上面，由望廈炮台斜坡一路上，經過旅遊學院、望廈賓館，斜坡盡頭就係公園嘅羅馬式廣場，有噴泉、人工湖、瀑布、長廊、古老炮台等等，環境格外空曠。

沿一條舊斜坡再上，就搵到望廈砲台，晌19世紀末，佢係重要軍事防禦據點嚟架，不過，到1960年炮台就停用。砲台位置可監察關閘一帶嘅情況，依家，從炮台兜個圈，睇到望廈山周圍大部分地方，景觀都幾開揚架。黃昏，都見有啲市民上嚟做吓運動添。 

作為是次「懶懶hea遊澳門」之旅嘅最後行程，最後一站就係嚟嘉路米耶圓形地，咩地方？咪即係有小緬甸之稱嘅三盞燈囉，因為附近緬甸華僑多，實際應該四盞燈先啱，三細一大嘅波燈嚟架。其實過嚟三盞燈行，都係搭單，主要都係晌上船前食多餐先返香港，目的地就係「雅香粉麵咖啡」，點知嚟到剛閂門，就去佢隔離無幾遠嘅姊妹店「雅馨緬甸餐廳」，不過有心幫襯都宜早，店家收7:30pm。（題外話，佢哋仲有一間分店晌媽閣嗰邊，叫「雅香咖啡甸餐廳」，好似將兩間店個名夾埋咁。）

內裡環境比較「屈質」，但因為時間尚早，人客唔算多，順利搵到位之餘，亦唔算太過逼狹。由於早已諗定食乜，睇睇餐牌都只係想望望仲會唔會有咩特別嘢食。

紫米香豆漿 MOP10
剛啱睇到一版「特別推介」，紫米香豆漿、香滑鮮豆漿、營區烏豆漿、白果腐竹意米水，支支10蚊，就叫咗一支紫米香豆漿。色澤深紫色，紫米味頗濃，可惜蓋過豆香，而且可能太真材實料喇，質感過杰，口感比較糊口，唔係太鍾意。

魚湯粉MOP19
係緬甸常見嘅一種粉麵，我就正正坐晒拍牆位，睇住牆上剪報嘅介紹：將塘虱魚烚湯折肉，混合香茅、黑椒粉、咖喱粉、粘米粉，由於後四種材料甚燥，加上蕉樹心這種寒涼物作中和，務求湯底不燥不寒啱啱好。燥定寒就好難即刻知，不過個湯底味道幾特別，老實講，又唔係話好好食，但亦唔係難入口，係覺得比較油，而湯裡透明一條條應該就係蕉樹心，無乜味咬落爽爽咁。面頭仲放有兩塊馬豆餅，好似送粥嘅薄脆咁，都OK嘅，一試無妨。

椰汁雞撈麵MOP21
除咗撈麵，仲有個係放湯嘅椰汁雞麵（MOP19），當然係撈麵正啦，多數人都係為個汁嚟食依個麵啫。麵條以油麵為基本，無咗爽口彈牙，換嚟有咬口感；咖喱咁色嘅湯汁，以黃薑粉、緬甸咖喱粉為主，加上椰汁，帶有濃郁椰香，稠身而不糊，香滑得嚟好掛麵。雖然只係賣廿蚊碗，雞件份量無將貨就價，確係抵食！

睇佢卡片，印住「since 1978」，不愧為開業30多年，價錢相宜，俱特色又有風味，值得一訪。

住澳門，威尼斯人酒店好多人都識，尤其佢個大堂嘅天花油畫，同個運河商場，專燈朝拜嘅賣點。但講到威斯汀，就未必有幾多個人知。

位處路環篤篤嘅威斯汀，位置真係幾偏僻，坐酒店專車由外港碼頭（港澳客運碼頭）去到酒店都要近半粒鐘。不過，環境又確係幾正，一方座擁南中國海嘅無敵海景，另一方側靠景致怡人嘅黑沙海灘，少咗份繁囂，多咗份清幽。酒店外觀僕實，1993年開幕，近廿年歷史，以澳葡式建築風格為主，沿山坡而建嘅斜梯形設計，大部份客房都有個寬敞露台，望海一流，嘆杯啡食件餅就仲完美。最正佢係晌澳門少有無賭場嘅酒店，太太特別鐘意，話無咁俗氣，唔會成日見住大堂滿滿人患，拜金到死，所以，喻為城中清泉都未為過呀！

有人話周圍靜都死，食店都唔多間，交通又唔太方便，夜晚實悶爆，咁又未必，視乎你想要啲咩。我同太太就係想寧靜咁歇息下，又享受下酒店內嘅設施，消消工作積壓而嚟嘅悶氣。

因為酒店沿山坡而建，刻意設計成梯形，令到絕大部份房間都有獨立私人露台。小弟所住嘅尊貴客房，露台正正對住成個海，下望就係酒店內蔥蔥花草樹木，又帶有幾分熱帶園林景色，向外望就正正係遼闊無界嘅中國南海。可惜係天氣有啲凍，否則嚟個下午茶，睇睇書，望望海，不知幾「梳扶」。

黑沙灘算係威斯汀周圍唯一一個較著名嘅景點，講少少資料覺啦：海岸線全長1,200多米，因其沙粒獨特地呈黑色所以得此名，除咗長長嘅海灘之外，附近仲有一個遊樂設施完善嘅黑沙公園，同一個露營營地、燒烤場，一到週末、假日，更有唔少澳門居民去玩。

其實要行晒成個沙灘，唔使幾耐，半個鐘頭乜都搞掂；不過行吓，影吓相，欣賞吓日落，嗅一嗅海風嘅味道，感受一下浪漫嘅氣氛，都可以hea成粒鐘架。

住威斯汀，又行完黑沙海灘，晌度比較有名氣嘅葡菜館，首推法蘭度，除咗嘢食煮得有一手外，其「串串貢」規條更係為人談論：全年都無冷氣供應，話之理晧熱警告；雖然伴菜跟薯條，講明無茄汁；只收現金，無免費水提供（其實澳門大多數葡國餐廳都無免費水供應）；又唔俾訂枱喎。

初時睇定啲食評做參考，講到依間嘢好旺好多人排，同老婆星期日晚去，都驚等位耐，所以寧願食早啲，6:00pm就去定攞位。餐廳正正晌巴士站旁，但望過去門口，不單無人龍，入去睇睇，正門嘅大廳，人數寥寥可數，再經走廊、小花園，轉入另一幢紅磚小屋，先叫做人氣旺盛番啲，不過都只無四乘滿。7:00pm打後，又再多番啲人，可是，頂多只可以叫有八乘多人。始終黑沙海灘都幾偏遠，加上法蘭度嘅形象又負面啲嘅！

我哋被安排坐晌紅磚小屋，近窗口嘅二人枱，可以一覽無遺咁望晒成個場。講真，處身於紅磚小屋之內，昏黃燈光，有幾分晌歐洲用餐嘅氣氛。屋外周圍都係樹，幾有田園氣息！

未翻餐牌，燒乳豬已係指定一試嘅招牌菜，其次，上次無試嘅燒沙甸，老婆又好想試吓，加多個什菜湯，相信好夠飽喇。

先送上兩個重量級農夫飽，粗獷外型嘅歐陸包，外皮烤得香脆，包心細密煙韌。食開港式麵包嘅鬆軟，到食歐陸麵包，有啲人真係唔太慣。個人覺得最好食法，都係搵手搣一小舊一小舊塗牛油食，感覺唔會太韌。

什菜湯 $32
賣相認真麻麻，灰灰沉沉，一池死水咁，材料有薯仔、紅腰豆、洋蔥粒……感覺普通，味道算係OK。

燒沙甸魚 $98
一客有4大條，配兩大舊烚薯仔，加埋蕃茄、青椒、洋蔥沙律。沙甸魚燒得非常之香，幾有種鹹香味，要小心食，細骨頗多。烚薯仔，做得比較粗糙，齋烚無乜味。

燒乳豬 $152
期待嘅主菜上枱喇，問過服務員，原來啲豬仔得三個月大，一隻豬仔做到6份，所以，基本上廚房都會密密燒，所以，落單後都唔會話等得太耐，而且，保證上枱時熱辣辣。除乳豬外，仲有薯條墊底，洋蔥、沙律菜、青橄欖做伴菜。乳豬真係幾得，唧少少檸檬汁，減一減油膩，因為睇樣你唔覺得啲乳豬肥，但食落真係「幾漏」。外皮十分之酥脆，肉質算幾嫩，唔似食燒肉咁「實淨」，不過，始終係得三個月大嘅豬仔，豬肉味就必然稍欠。

兩公婆食到飽飽，拖住手仔又慢慢行返酒店！但係，入夜外面天氣有點寒。

今晚食飯食得早，所以返酒店都早，但是日精彩節目未完，上房抖一抖，依家先係餘興節目嘅開始。

酒店提供健身、娛樂多項設施，有獨特海濱環境，懾人氣勢嘅標準18洞高爾夫球場（小弟唔識打，所以無諗過會玩）、沿海緩跑徑、戶外小型草場、健身室、室內外游泳池、按摩池、桑拿室、蒸汽室、spa水療中心、活動室（可進行乒乓球、瑜珈活動），仲有個威斯汀兒童俱樂部。

威斯汀兒童俱樂部，每日朝10:00晚6:00，提供多種遊藝設施，又有多元化室內或室外活動，例如：臉部與手部彩繪、工藝與美術、兒童尋寶之旅、海灘遊戲、間諜探險……等等，內容精彩，包啲細路開心成日呀！（溫馨提示：全天活動需另收費，但係包括午餐同一個裝滿零食和紀念品嘅探索包，抵番晒啦）

咁「夜媽媽」，最好係游水啦，室內全天候恆溫池，無救生員當值，但泳池唔係好大，而且水深都係一米多，絕對安全。同老婆游咗一陣水，再晌隔離個按摩池浸下，夠熱，水力又夠勁，衝得肌肉好爽，疲勞盡消。而更衣室內嘅桑拿室同蒸汽室，又點可以錯過，個人比較鍾意蒸汽室，周不時打啲蒸汽，比桑拿乾煎無咁辛苦，所以，嬉水嬉汽得好愉快。

其實焗完桑拿同蒸汽室，個人醒神番晒，仲想玩下健身室，因為見到好多簇新嘅器材，跑步機、樓梯機、划艇機……應有盡有。之不過，個人就好精神，可惜唔多夠體能，下次吧！

尋日講過Siloso Beach Resort嘅環境，依家輪到講食，住宿包雙人自助早餐，餐廳Alfresco Café就晌酒店「後門」一入隔離個地下度，所以，都唔使再搵邊度食早餐。

餐廳環境貫徹整間酒店嘅風格，一樣好有叢林、野外嘅感覺。雙眼所見，有過半數都係露天位，細細張嘅膠枱、有柄嘅藤椅，啱晒2、3個人；亦有啲小稻草亭，亭下係可坐6-8人嘅長木枱，環境非常之咁寫意！雖然有室內部份，但基本上都好少客坐，感覺無露天咁正咁舒服。

食物種類同款式唔係大堆頭，但保證有啖好食整體質素都OK。熱盤有炒薯、雞肉腸、豬肉腸同茄汁焗豆；即煮檔口有喇沙、班戟、煎太陽蛋、炒蛋同一啲中式包點、點心；而最正係有個大焗爐放晌度，經常有新鮮出爐即焗牛角酥；仲有幾款新鮮生果、乳酪、粟米片…等等，而咖啡、紅茶、鮮果汁就任君選擇，多少隨意。

樣樣食啲，比起晌香港一個包一杯嘢飲，好豐富啦！最正都係晌個咁正環境hea住食，真係有幾何食早餐都食成個鐘架。

餘慶節目，晌酒店成日都見到有啲松鼠周圍走，係依度都見，你搵啲嘢食引吓佢，佢就乖乖走過嚟，好易氹，我都係第一次氹松鼠，好鬼得意啫！

既然晌Siloso Beach依頭住，無理由唔行吓個灘啫，所以，食飽早餐就去行海灘，一則欣賞吓個海灘有幾靚，二則影吓相留個念，三則散散步幫助消化。

個海灘都幾長幾寬闊，又種咗好多椰樹，都稱得上風景如畫，而且水清沙幼，就算晌度唔游水，齋行吹吹風都好舒服。再者，今日仲係閒日，成個灘望勻人唔多，視覺上仲正好多添，感覺更有渡假風情呀！偶有當地人晌度玩沙灘排球，雖然話有各式各樣嘅水上活動，但似乎時間尚早，又係星期五朝，就見唔到有咩水上活動有人玩緊。而對岸有幾個人工小島，當中有一個係設有浮橋可以橫過對面嘅。

海灘嘅盡頭，除見到香格里拉度假村外，仲有餐廳、咖啡座，可以嘆番個tea先走，而唔少得人人都會走埋去影相Siloso Beach嘅地標 - "Siloso"大字粒喇！6個大英文字，唔同顏色，擺法不一，影相幾盞鬼。如果再晌香格里拉度假村前嘅小石級向上行，可以去到西羅索炮台、海底世界、海豚樂園……等地方繼續玩。 

之前見到酒店內個泳池咁正，點可以唔游吓水架？所以，就趁行完沙灘，嚟酒店泳池落落水，游番一陣先！老婆游水麻麻哋，都話就算浸吓都一定要嚟囉！

其實個泳池究竟有幾正？去開公眾泳池嘅我哋，依度直情可以當係世外桃源啦，泳池環境成個熱帶雨林咁款，足足95米長，周圍高天大樹，泳池又唔係死死實實「直筆甩」，彎彎曲曲，甚有原始森林氣色，晌度游水感覺真係超爽架，玩完個人仲醒神咗，依啲先叫做享受嘛！

而且，晌泳池一頭又設計咗一個人工瀑布，成4、5層樓高，瀑布衝撞落嚟嘅水聲，令到置身泳池中嘅我哋，更覺得好似晌森林裡面咁，幾得架。瀑布下方仲有兩條專俾小朋友玩嘅滑水梯，以及幼童池，酒店又提供巨型車呔水泡，所以，細路仔多數玩到唔捨得走呀！

如果唔識游水都唔係問題喎，泳池邊擺有好多沙灘椅、太陽傘、原木嘅小茶几同吊床，椅背又可校高校低，曬曬日光浴幾咁舒服，又或撐住太陽傘，叫杯凍飲，睇睇書，聽聽音樂，都寫意到痺啦！再唔係，就晌泳池對下嘅花園草地，搵個小草亭抖涼，休息放鬆，都係件賞心樂事架。而靠近客房下面仲有個開放型嘅健身室，雖然器材唔多，但做做運動，強身健體丫嘛！

晌酒店已見過佢哋有介紹，海灘區嘅後花園，有好多環保小山徑，其實位置就正正係酒店正門嘅後山，亦即係Imbiah森林裡邊，1.8公里嘅自然之旅，透過多條高架浮橋連接，蜿蜒通過依個熱帶小雨林。

由於有很多指示牌，兼且整個山頭又唔係好大，基本上都唔會點盪失路。沿途仲有可能碰上一啲小動物，如：松鼠、長尾獼猴、超過20多種嘅雀鳥。我哋都係隨隨意意輕鬆咁行，志在親親大自然，享受吓叢林嘅優美！

雖然都成晏晝兩點幾，但因為今朝早餐都食得比平時多，所以，到依家又唔算好肚餓。不過，去到機場食可能仲唔抵，故此，既然怡豐城（Vivo City）係個必經中轉站，嗰度又有個大食代Food Repbulic，就不如食埋個輕怡午餐先再上路啦。

依度嘅大食代都幾大，佔地成27,000 呎，可容納900個食客，設計用上咗懷舊嘅新加坡風情，希望令人感到恍如置身於20世紀初嘅新加坡。場內有10多個攤檔，賣嘅都多數係地道星馬美食。我哋無乜點刻意搵，咁啱見有一檔客家嘅「擂茶」嘢，橫掂都未試過，就好奇一試。都有唔少選擇，如擂茶飯、擂茶糙米米粉、韭菜冬粉……同一啲小食。

收銀處有啲單張攞，原來擂茶都幾多功效，降低膽固醇，開胃健脾，明目清肝，平五臟，降血壓，睇落幾犀飛利。而且，店鋪講明不含有豬肉同豬油，係健康美食。兩公婆，要咗一個擂茶飯套餐，再加一客家鄉雞肉餅，唔夠先再加！

擂茶飯套餐 SGD7
大碗內裝有米飯、花生、豆角粒、菜粒、魚乾仔……等材料，細碗就裝有擂茶，兩者撈埋就食得。擂茶係客家人招待貴賓時嘅一種茶點，「擂」有研磨之意，以綠茶，加埋研磨後嘅芝麻、花生，就成為擂茶。雖然有益健康，但自覺味道麻麻。既為套餐，仲有一碟客家豆腐同九層塔煎蛋，前者一大磚三角形炸豆腐，幾香脆，不過豆腐唔算嫩滑；而後者就有趣啲，普通煎蛋餅，但落咗大量九層塔香料，味道多份個性。

家鄉雞肉餅SGD5
外貌有啲似炸豆皮卷，大大條，一客都有成10件，外層炸得鬆脆，內裡填滿免治雞肉，份量頗多，味道唔錯！

好喇，食飽就要起行。

都聽聞樟宜機場好大好有名氣，多次獲得全球最佳機場評比第一名。一直以為佢有3座客運大樓，原來有4個先啱，除經常聽到嘅T1、T2、T3外，晌機場南面仲有一座廉航嘅客運大樓。T1、T2、T3係相互連接，旅客可透過捷運同高架列車，或者徒步行路來往依3個客運大樓；廉航嘅客運大樓就要晌T2搭免費穿梭巴士來往喇。

其實，樟宜機場特別多大自然嘅「主題風景」，T1有仙人掌公園，T2亦有蘭花園、向日葵園、錦鯉池，T3則有蝴蝶園、錦鯉池，各有特色。而且，T3仲有一條巨型大滑梯，足足12米四層樓咁高，不過，要晌機場內單一消費滿SGD10嚟換取一次滑梯溜！如果時間有鬆動，值得走訪一下3座客運大樓哩！由於時間上有啲緊，只有晌T2同啲向日葵影影相，跟住等上機返香港，5:20pm機，9:00pm返到香港，飛機餐啱啱好當晚餐，題外話，香港航空嘅飛機餐都OK喎。

問人星洲肉骨茶邊檔正，總有人推介「阿水」，佢係乜水，咪就係「亞細」黃亞細肉骨茶餐室囉，「阿水」係老一輩由福建嚟嘅移民發嘅音！

出咗MRT，行咗好耐好耐都唔見，仲以為好似尋日咁要食白果，原來「黃亞細」真係離最近嘅MRT有一大段距離，搵得佢好苦。現場所見，都未係好多人，至少鋪內仲有大把位任坐，不過，店旁隔離嘅草地封咗，無得晌大樹蔭下食番餐。

睇資料話肉骨茶分為新加坡嘅潮州派同馬來西亞嘅福建派，前者就落較少藥材，味道比較清淡，反而多咗朕稍重嘅胡椒味，夏天飲有醒神嘅感覺；後者就下得藥材較多，所以味道比較濃郁，略帶甘苦，冬天飲有暖胃嘅作用，仲可提高身體抵抗力。

身處星洲，食到嘅自然係較淡嘅潮州派肉骨茶啦。點餐紙，長形一張睇晒，前面羅列咗十數款嘢食，背面就係功夫茶同其他飲嘢。唔好見佢係間老鋪，裝修幾骨子，服務員仲一人一台PDA，用嚟幫客人點菜添。由於係早餐，所以都係點夠就OK，佢哋無加一，但就另收7%銷售稅，總供食咁SGD15.7。

招牌肉骨湯 SGD5.5
好得意，佢哋個餐牌中文用咗肉骨湯，又唔係肉骨茶喎。份量唔係好多，一碗有3條肉骨，其實淨肉得幾啖，不過，湯裡嘅胡椒幾香，飲起嚟確係比加重藥材嘅福建派清新啲。可能慣咗以為肉骨茶都係濃味，所以，初頭飲時覺得怪怪咁！

鮮灼豬潤 SGD5.5
依個都算係人氣之一，同肉骨茶個樣一樣，只係肉骨換咗豬潤啫。豬潤食落新鮮無臊豬味，切得夠薄，口感帶爽，當然成兜湯係重點，一定要飲晒啦。

炸油條 SGD2.0、白飯 SGD0.5（細）0.7（大）
肉骨茶通常都撈白飯或油條蘸嚟食，再配醬油、碎紅椒嚟吊吊味。所以，我哋當然都叫咗客炸油條（折番港紙成十幾蚊，都幾貴）同一碗大白飯同食。

自制羅漢果涼茶 SGD2.0
有時老婆都會晌屋企煲羅漢果水，我都幾鍾意飲，加上外間依刻都幾熱，所以都叫咗一杯嚟試試，果真有啲驚喜，冰凍嘅羅漢果涼茶，飲落很順喉，令人感覺很清涼，好過飲汽水啦。

少少題外話，明明係湯，點解叫「肉骨茶」呢？網上就查咗3個典故，熟真熟假，就自行取捨喇：
1. 「肉骨」如其名，是以肉與骨配合中藥煲成的湯。而「茶」字則是源自品嘗此餚時常配茶以解油膩感，故得肉骨茶之名。
2. 使用豬骨和一些普遍常用的中藥，以及一些家傳的偏方一起熬成湯，這就是最早的肉骨茶。當時的中國人也把藥湯稱為「茶」。
3. 據說肉骨湯的創始人名字是「林文地」，因為賣肉骨湯而被顧客稱作「肉骨地」，福建話中的「地」與「茶」音近，故後來被稱為「肉骨茶」。 

新加坡都算係個多元民族嘅城市，當地印度人都唔少，否則都唔會有個「小印度」啦。跟太太對印度文化唔係好認識，亦唔係好熱衷，尤其印度廟宇（雖然啲塔頂雕有好多不同造形嘅雕像，色彩繽紛），更加唔啱睇，所以都係晌依度花個幾鐘打個轉，行行逛逛一吓。

小印度唔係好大，但見得最多除咗印度人之外，就係賣花環嘅小檔，隔兩、三個鋪位就見有一檔，一大串一大串五顏六色吊晌鋪前，真係幾靚幾搶眼。此外，賣雜貨、香料嘅鋪頭都唔少，確係幾有趣。唯一可惜係，因為預咗朝早食肉骨茶，晏晝去食海南雞飯，所以，就無晌依度試咖喱。旅遊書都介紹咗好多咖喱食店，所以不愁無得揀，最好就係以竹腳市場（Tekka Centre）做起點，一來嗰度有極之多印度特色小食同甜點，二來又有好多小商鋪，仲係家庭式經營，所以，可以讓人感受吓印度人生活嘅點點滴滴。

近二百年前初嚟新加坡嘅華人，大多數聚居晌牛車水，同族聚居自然同聲同氣，隨後一代又一代嘅土生華人，當然開始陸續會散居新加坡唔同地區。

要數土生華裔嘅祖屋，保留得較好較完整嘅晌東新加坡依邊有好幾處，而正正晌Koon Seng Road嘅就算係最好。其實，由MRT開始行過嚟依區，感覺同芽籠嗰邊（相等於深水埗）已經好唔同，所見都係一啲好靚、矮細嘅平房，樓高一般兩層（相等於又一村），覺得係相對有錢人住居多。

講番啲土生華裔嘅祖屋，沿路行都見有幾組，而街尾嘅一組又確係保留得幾好，外觀好有特色，每戶又油上唔同柔和嘅顏色，外牆又見到有好多龍呀、雀呀、馬呀……嘅浮雕，依啲房屋顯示咗華人對裝飾華麗嘅熱愛，如路線好好安排一下，值得造訪！

晌新加坡食海南雞飯多少都係指定動作，唔通搵星洲炒米咩！其實睇旅遊書都有好多介紹，如：文東記、天天、幸運……多不勝數，無咩可能試得晒，就揀間近近哋，又就腳，「五星」就較為順路，睇完土生華裔祖屋，行一陣就去到。五星都有好幾間，但好似以東海岸路依間較為人氣同多被介紹。

東新加坡依邊唔係咩旅遊區，出名嘅景點都無乜，所以依間五星位處都係住宅區，去到單睇周圍環境已經有啲街坊，鋪內亦無咩特別裝潢，平實得很，眼見嚟食飯嘅人都係以附近嘅打工仔同街坊為住，睇落唔多見有遊客。

睇睇菜牌，就點咗一個海南雞飯，同一個炸魚，加多個白飯，夾埋晒都係SGD15.7，無銷售稅，無加一。菜牌中英對照，部份菜式有相，一目了然，再者啲侍應一係同你講廣東話，一係同你講普通話，點菜無難度。

海南雞飯 SGD10．Rice SGD0.7
據書描述，老闆堅持用走地雞，雞隻由馬來西亞進口，雞身較細，但肉質結實。食落，無乜皮下脂肪，雞肉都幾嫩滑，又好有雞味。墊底仲有啲青瓜，好爽脆。而個雞油飯好香、好油潤，枱上已放有成盤醬料，點雞三寶：薑蓉、黑豉油、辣椒醬，多少隨意。

Fried Sambal "Salad" Fish SGD5
睇返張單個英文名係咁寫，無記到個菜牌印咩中文名，所以唔係好知條咩魚。不過，條魚炸得非常之香脆，魚肉唔乾又唔嚡，食落又唔係話好油。最正淋晌魚身上面嘅汁，係爆香洋蔥再加入參巴醬，極之惹味。其實參巴醬係東南亞嘅辣椒醬，以十多種唔同嘅辣椒、蒜頭、乾蔥、炸過嘅乾貝同無去殼嘅蝦一齊炒製，辣辣哋，富有層次。

聖淘沙捷運（Sentosa Express）晌2007年1月15日通車，唔好睇佢只係得4個站，全程行車時間約莫得8分鐘，就已經耗資咗成1億4000萬坡元（相等港紙9億元），歷時3年時間先興建，以取代舊有嘅單軌聖淘沙列車。

雖然建築成本咁貴，但收費就超抵，因為俾低3蚊雞（新加坡元啦，折番港紙廿蚊左右），當為入島費，就包晒全島交通，正呀！

坐MRT去到港灣站（HarbourFront），上去怡豐城（Vivo City）三樓，就係接駁入島嘅Sentosa Express。全線4個站係：聖淘沙捷運站（Sentosa Station）、濱海捷運站（Waterfront Station）、英比奧捷運站（Imbiah Station）、海灘捷運站（Beach Station）。島上嘅3個站已涉及多個景點，跟住去到海灘站，又有海灘電車（Beach Tram）分走海灘區東、西兩邊，加埋幾條線嘅巴士，就已經可以兜勻全島，無處不達，慳番唔少車費之餘，唔使下下搵散銀搭車呀。3蚊雞真係一餐飯都唔得啦！

有啲酒店網譯「喜樂聖淘沙度假旅館」，有啲就譯「西羅索海灘度假村」，總之都係講同一個度假村。位處聖淘沙島嘅西南面，酒店對出就係西羅索海灘，如果住晌高層，又或上到屋頂花園，可以俯瞰晒成個海灘，景觀可謂一流。

酒店貴為Best Green Hotel，絕非浪得虛名，全新加坡只有兩間酒店係Best Green Hotel，另一間就係Regent Singapore。此外，佢仲獲得其他環保獎項，如新加坡嘅Eco Hotel。確實，佢真係有別於一般酒店，一入去完全同奢華對立，成間酒店都被大樹綠草包圍，好似住咗晌熱帶叢林裡面，佢抵死到仲整咗間樹屋，唔係裝飾，係客房之一嚟架！晌正門轉上去，仲有一排共12個獨立別墅（Villa）形式嘅客房，好有私隱度。

搭Beach Tram所到達嘅酒店門口，其實係佢個「後門」，正門晌半山上，不過從後門進入酒店都唔係咩問題，只係要搵番接待處就要轉嚟轉去啫。最講多少少佢個環境，除大樹環抱外，周圍仲有啲茂盛嘅花園同各種水景，好似天台就有個農圃，種有好多花同其他植物；二樓客房層外有一道長長嘅荷花池，荷葉漣漣。中央嘅95m長大泳池、人造瀑布、寬敞草地、藤椅、吊床，都令人感到好輕鬆自若、寧靜盎然，叫做彷彿置身晌世外桃源也不為過呀！

雖然西羅索海灘度假村被定性為三星級酒店，有啲網站定為四星級，但絕對值得一住。

講過晒度假村啲環境，依篇就講講住房係點。上一篇「棲息叢林裡-環境篇」已介紹過佢係間環保酒店，所以，內籠一啲奢華嘅設備都唔會有，換嚟就係平實、簡約、舒服嘅住宿環境，亦簡接成為佢唔係太高星級嘅原因。

整間酒店有172個客房、10個家庭大房、1間樹屋同12間獨立別墅，除後兩者，絕大部份客房都係面向西羅索海灘嘅，不過咁，又唔係個個房都睇到海灘，因為仲要睇你住晌邊個樓層。小弟被安排住晌222號房（據知因為有一批商務客嚟咗開會幾日，客房供應有啲影響），亦即以客房計，係最低嗰層，啱啱被酒店外嘅樹遮擋咗個景觀，但塞翁失馬，焉知非福，因為上文都有講，二樓客房對外有一條長長嘅荷花池，荷葉、荷花、蜻蜓，幾有意境嘅一幅圖畫。

入到房間，感覺好寬敞，因為一來無太多餘嘅設施，二來就係佢樓底超高，成十幾呎，加上對海嘅一方，有個陽臺，配上大型玻璃窗，夕陽斜照，悶氣全消。如果住得高層啲，相信個景仲正。我就唯有上上屋頂花園，感受一下個景啫。

全房都係木地板，比起地毡感覺乾淨好多，而床鋪、枕頭都好軟綿舒適。每個客房都有免費提供樽裝水俾客人飲用，亦有啲即沖紅茶、咖啡。而浴室亦都好整潔，咁話明佢哋都盡量係環保，所以基本上唔提供牙刷、牙膏俾客人，不過，你亦可以去接待處免費索取；而梘液、沖涼液、洗頭水並唔係一次性嗰隻，已晌浴室安裝咗「唧唧裝」，確係較環保！

晌巴拉灣嗰邊有個小露天劇場，首個「景點」係睇睇佢個動物匯演，話明依次旅行嘅優先係休悠，所以，做乜都要輕輕鬆鬆、休休悠悠，睇動物就最易引發樂趣。

依個小劇場，每日有幾場表演，以及同小動物近距離接觸時段，全部都唔使錢，當然最啱帶住細路嘅親子遊，時間大致如下：
** 動物表演（每節20-30分鐘）-
12.30pm-12:50pm（靈長類動物類Primate Encounters）
3.30pm（雀鳥類Bird Encounter）
5:00pm（動物大集合，即係多種類Multi-Animal Encounter）
** 近距離接觸（每節15分鐘）-
12:00pm（爬蟲類Reptiles）
2:00pm（吸蜜鸚鵡Lories Feeding）
3:00pm（獼猴Macaque）
4.30pm（鸚鵡Parrot）

時間關係，我哋就啱啱好睇到5:00pm場嘅大匯演，黑人主持表情多多，動作鬼馬，主角陸續出場，有色彩繽紛嘅鸚鵡，有型有款嘅大鷹，敏捷靈巧嘅馬騮，雪白龐大嘅蟒蛇……等等，眨吓眼就渡過咗半粒鐘。臨尾，你唔驚嘅話，仲可以留多陣同條大蟒蛇影下相添。

依個「最南點」位處巴拉灣海灘對出嘅一個迷你小島，由一道吊橋連接，而島上有兩座瞭望台。

唔係小弟拋書包，只係八八卦翻查吓網上資料啫，亞洲嘅最南點應係印尼嘅小巽他群島（Lesser Sunda Islands），但依度所講嘅係亞洲「大陸」最南點，但印象中新加坡好似香港咁，都係個島嶼啫，何以黐埋為「亞洲大陸」呢。上到個小島，有個介紹牌，啊！原來咁都得！

一大段英文解釋，大意就係話依個小島透過一條吊橋連接住聖淘沙，而聖淘沙同新加坡本島又有橋樑相通，跟住新加坡同馬來半島嘅柔佛州又有長堤相連，所以，就叫做連繫住整個亞洲大陸喇！問你服未？唔怪之得馬來西亞人都「拿拿淋」晌柔佛嘅丹絨比艾國家公園立番個正版「亞洲大陸最南點紀念碑」，以示名正，天之涯、海之角。再講多少少，大家從地圖睇睇，就知最南點都唔係依個小島，因為聖淘沙係倒三角形，最南位應該係聖淘沙嘅南端尖角！

雖然佢係A貨亞洲大陸最南點，但企上瞭望台回望聖淘沙景色唔錯，橫掃成個巴拉灣海灘，遠望仲見到魚尾獅塔，又遇著係黃昏時段，景致怡人。相反，南面對住新加坡海峽，本應大海一望無際，可惜外海好多貸輪，大煞風景啫！

節慶酒店（Festive Hotel）嘅Fiesta西餐廳，係由早到晚提供自助餐或散叫西餐嘅地方，偶然從旅遊書發現，原來佢有個好抵食嘅前菜、甜品自助晚餐，價錢都係SGD19.9，為番港紙都係百鬆啲。如果你怕唔夠飽，就算加個主菜變成為半自助晚餐，都係SGD25-38（視乎揀咩主菜），都唔算貴，仲係可以由6.30pm食到10.30pm添。不過，溫馨提示，半自助晚餐供應日係星期一至四，而星期五、六、日就轉為BBQ自助晚餐（SGD58）喇。

同老婆都少咗食自助餐，因為佢覺得食唔得幾多嘢，俾嘅錢又唔係平，無理由為咗回本搏命質，撐爆自己個肚皮，係好反智嘅行為。相反，俾四、五百食嗰少少嘢，不如搵間有情調，高質素架啦。

之不過，既然依度咁抵，又係個半自助晚餐，當然，老婆唔會反對食得好啲、食得豐富啲嘅！睇過有多款前菜、自助沙律吧、生果、朱古力噴泉、甜品，對我哋嚟講，已經好夠食，結果就連主菜都無叫，一樣滿載而歸。

環境闊落光猛，裝修摩登型格，一室以橙色為主調，十分醒神，包唔會食到恰眼瞓。雖然我哋只係食前菜、甜品自助餐，無加主菜，招呼依樣殷勤有禮。

野菌湯
餐前先由侍應奉上每人一客野菌湯同一個小餐包，餐湯頗大碗，但最緊要就係好有水準，菌香味濃，幼滑柔順。小餐包則中規中矩，只提供橄欖油蘸點。

前菜
大致上有8款，小弟覺得都係精選，包括：露筍沙律、烤蔬菜拼盤、雞肉腸（當然比樂奇牌高好多檔次啦）、新薯沙律、蕃茄配水牛芝士、西班牙火腿搭哈蜜瓜……等等，款款味美有質素。當中又以烤蔬菜、水牛芝士、西班牙火腿作為翻兜又翻兜嘅對象，無辦法啦，好食丫嘛！

沙律
主要有3款沙律菜，如羅馬生菜、火箭菜；主配料多達14款，如車厘茄、橄欖、雞心豆、醃青瓜、粟米粒、鵪鶉蛋……，要數較特別係意大利風乾蕃茄、羊奶芝士粒；而仲有6款副配料：乾麵包粒、合桃粒、杏仁片、雜乾果、煙肉碎、芝士粉，再加埋5款醬汁，如意大利油醋汁、蜜糖芥末……，左拼右搭，食沙律都可以食飽。我前後食咗兩大碟沙律，先試勻所以材料！

生果
未落甜品之前，先嚟一輪生果，有火龍果、西瓜、士多啤梨、木瓜、蜜瓜、哈蜜瓜、菠蘿多款選擇，自選一個綜合生果拼盤，食得我何等滿足。

甜品
最後，要為此晚餐畫上完美句號，甜品當然唔少得。除朱古力噴泉外，有10款甜品，除前菜有名牌介紹外，其他食物都欠介紹，所以甜品時間就係考各人嘅「味力」喇。總體，離不開慕絲、奶凍、布甸、蛋糕……等等，雖則唔叫得好突出，令人一食難忘，但尚算平穩，唔會話太差嘅！呷著杯熱咖啡，慢慢嘆，絕對輕鬆咁KO成碟甜品無難度。

食半自助餐有依樣好（加上我哋又無叫主菜），真係樣樣試勻無走雞，食到飽一飽，但又唔係硬撐咁食落肚喎，話明要休悠，唔係買難受嘛！不過，講嚟有啲怪，咁嘅價位，咁嘅質素，睇勻成個場，真係客人唔多，頂多叫做3乘客左右，可能今晚係閒日啦。

「海之頌」個表演場地，就係晌海灘捷運站對出嘅沙灘，數十步之遙，好易搵。依個星光水火海上大匯演，原來都耗資咗數百萬坡元，佢係以海上夢幻嘅實景（佇立晌海灘邊嘅一排小木屋），加以真人歌劇形式，再配合激光鐳射、水幕電影、電腦動畫、水柱舞動、燈光變幻、煙火特效、動感音樂嚟營造出令人嘆為觀止嘅舞台效果。收SGD10一位（標準座），真係值回票價，佢仲有一款高級座（Premium Seats），收SGD15，只係獨立座椅有得挨，個人覺得無必要買貴飛，除非閣下無腰骨啦，哈哈！

其實個故事好簡單，好童話，就係一個男仔點樣以其天籟之音嘅歌聲解救咗被禁錮嘅公主，就算英文聆聽水皮如我，唔知佢哋唱乜，唔知啲動畫講乜，都大意明佢哋做緊乜，最重要係欣賞到佢哋營造出嚟嘅各種效果。

最可惜係小弟部DC仔能力有限，影唔到咩靚相，就算拍咗段短片都係得一小部份，不過，晌youtube大鬼把海之頌嘅影片，網上同樣大把精彩靚相添。當然，現場睇絕對感受唔同，值得捧場。