最近分享過的旅程 |
共找到 67 篇遊記, 正顯示第 41 至 50 篇遊記 |
由於今日景點較多(雖然每個景點所花嘅時間唔長),所以都想早少少出發,又要有勞包車司機梁先生喇。可惜今日天氣麻麻哋,大部時間天陰,久唔久有陣雨,對行程影響唔大,但對心情影響不少。
朝早時段,喺先到晌濟州市附近嘅龍頭岩(용두암)影影相,順路經過神秘道路(신비의도로),跟住就一直南下,向偏西面進發,玩埋濟州西區,包括:噢雪綠茶博物館(설록차 뮤지엄 오설록)、玻璃城堡(제주유리의성),之後前往西歸蒲市。
午餐過後,開去旅館嘅路途上,順便參觀埋天帝淵瀑布(천제연폭포)及柱狀節理帶(주상절리대)兩個自然景觀。大概5:00pm梁先生送抵我哋晌西歸浦市住上兩晚嘅旅館!安頓好一切,晌附近打個轉,感覺西歸浦市無咁繁盛,屬大型啲嘅市鎮咁,由於附近無咩大商場或景點可去,故此,晚飯過後都早少少休息。
是日天氣:8℃ ~ 9℃ 陰.陣雨
抖咗一晚精神好啲,而濟州嘅天氣又比釜山好啲,所以,今日大家嘅心情都同步好啲。話雖如此,腸胃仍然要小心吓,所以,早餐都喺繼續簡簡單單、清清淡淡,食屋主崔姐姐嘅愛心白粥。
想大家玩得輕輕鬆鬆,唔好太緊湊,所以今日都只安排睇4個景點,都喺屬於濟州東區,啱啱好可以話晌濟州東面逆時針兜咗個大圈。10:00am先出車起行,出發我哋晌濟州嘅第一個景點:3D奧妙藝術博物館(트릭아트뮤지엄),其實個位置都幾遠,由濟州市中心揸車,都要45分鐘先到。
食完晏,下一個景點就喺較出名嘅濟州民俗村博物館(大長今迷你主題公園)제주민속촌박물관(대장금미니테마파크),亦都花得較多時間晌度,因為個地方真喺幾大。然後沿東區海岸線驅車往上走,向世界文化遺產之一嘅城山日出峰(성산일출봉)進發,由遠而近咁接近個景點,加上沿路有燦爛陽光,有廣闊海景,依刻心情特別開朗。而是日最後一個景點萬丈窟(만장굴),又喺世界文化遺產,不過行完之後感覺流流哋。
行完萬丈窟先6:00pm,不過出到嚟天都已經黑齊,仲見到月亮伯伯。幸好,萬丈窟離市中心唔遠,唔使1個鐘已返回民宿。返到民宿,崔姐姐已為我哋預備好窩心晚飯,備註:崔姐姐嘅民宿只包早餐,唔包晚飯,都喺見我哋病得咁慘先有此特別安排啫。
是日天氣:10℃ ~ 12℃ 晴
未天光,已覺得自己唔多妥,成晚瞓得麻麻,感覺頭重重,有啲燒,快到清晨仲嘔咗一鑊,尋晚餐日本嘢無晒。勉強撐落去酒店「飯堂」,完全無胃口,再問番姨仔、舅仔,佢哋都不遑多讓,成晚又痾又嘔。
原先打算一早退房兼寄存行李,去行甘川洞文化區(감천동문화마을),依家4個人有3個咁榭,一於返房再抖。但最「撈攪」喺所計劃嘅行程,今日下午搭機飛過去濟州,都唔好諗咁多,抖多陣先再算。由於東橫Inn喺10:00am退房,延遲退房要加錢,仲KRW11,000一個鐘,都無辦法,實在需要休息吓。
瞓多幾個鐘,差唔多到12:00pm,大家感覺都OK啲,一致決定照飛過去濟州先,因為機票、民宿都訂好晒,回程都喺由濟州返香港,始終都要過去。所以收拾好行裝,唔好再操勞,寧願花KRW13,600打的一程車去機場,半個鐘頭就到。乘搭釜山航空(Air Busan)BX8113(14:45 – 15:40)航班,搞好機位登記,好彩搭內陸機安檢唔緊,發住燒幾怕上唔到機呀!入到候機室再瞓過,點知航班延誤,無緊要,繼續瞓,卒之3:50pm起飛,4:45pm到濟州,預訂好嘅民宿晌濟州市中心,坐的士KRW4,000就夠。
原本今日濟州嘅行程,打算晌民宿安頓好,就先去睇龍頭岩(용두암),再行東門市場及夜市(동문시장)及中央地下商街(증앙지하상가),飯後再睇場韓國出名嘅「亂打劇場」(제주난타극장),但全部取消晒。取而代之就喺瞓覺、睇醫生。幸好,決定過嚟濟州先真喺明智之舉,因為出門遇上貴人 x 2,點解?睇埋下文講「診所之旅」同「民宿」時,你就會完全明白。多多休息,總算捱過今日,明天會更好!
是日天氣:3℃ ~ 4℃ 天陰
之前兩日晌釜山去咗唔少地方,今日衝出釜山,去慶州,新羅王朝嘅古都,當地文化遺址處處,仍有很多古建築,算喺保持唔錯嘅古城。老實講,如果唔喺揀正秋天紅楓漫山嘅季節,又或你基於信仰不便參神拜佛,依個被聯合國教科文定為世界文化遺産嘅古都,未必好啱你嚟!
一早起身食個飽飽嘅早餐先,由東橫Inn行去釜山站都喺20分鐘,地鐵車錢都可以慳番,極之方便。而嚟釜山站,就喺一試韓國高鐵KTX,由釜山往慶州,都喺半小時車程,未夠10:00am,就到達慶州。不過,今日天氣極之差,全日近乎未停過落雨,煙雨濛濛,而且氣溫徘徊0℃之間,又凍又大風,唔多好受!
先去國立慶州博物館,諗住當喺避吓雨,點知睇完都仲落緊。沿路再去雁鴨池、半月城、石冰庫、瞻星臺、路經雞林,行到去近慶州市中心。此時此刻真喺飢寒交迫,大陵苑側有好幾間食店,就搵咗間專做旅行團嘅韓菜館,品嚐當地特色飲食「菜包飯」,相信就喺依餐,食到我哋又痾又嘔。天氣實在太差,所以決定食完飯,行埋大陵苑就離開慶州返釜山,原計劃好嘅普門觀光園區(보문관광단지)、新羅千年公園(신라밀레니엄파크)、晚上睇韓國正統音樂劇「貞洞劇場美笑:神國之地-新羅」……等,亦無乜心情去。
不過,因為小弟一個錯誤嘅決定,令大家苦上加苦。回程想試試坐傳統國鐵,其一行錯路關係,要大家晌風雨橫橫行咗好耐先搵到火車站,其二跟售票員溝通問題,買咗車票先知仲要等大半個鐘才有火車,而車程竟然要兩個多小時!唉,真救命呀!慶州,留下好多非常唔愉快嘅回憶。
是日天氣:0℃ ~ 1℃ 陰雨
尋日行咗咁多路,自不然好瞓。自由行有樣好,就喺唔使被領隊催起身趕行程。9:00am起身落去食早餐,早餐喺酒店包埋嘅,唔算好豐富,但一定夠飽肚。
今日第一個「景點」就喺距酒店幾個街口嘅40階梯文化觀光主題街,以及伏兵山壁畫村,然後順路行過去龍頭山公園,依刻日光日白睇睇釜山全景,原打算夜晚再上過嚟,登釜山塔睇埋夜景,但行程有變。之後行完都成1:00pm,都喺時間食晏,晌龍頭山公園另一邊路下山,偶爾經過一間日式飯堂,好多本地打工仔晌度食,我哋又走咗入去試吓。
下午行程,都比較輕鬆,就喺去太宗台行吓山同睇日落,因為擔心日落快,所以預鬆啲,不過又確喺預得太多時間,因為我哋晌南蒲洞坐巴士過去,其實幾近,半小時車程左右。睇完日落就出返去札嘎其市場。
因為咁啱姨仔有同事都嚟韓國玩,佢哋就遊首爾 + 釜山,今日下午由首爾過到嚟釜山,所以就相約晌札嘎其市場食海鮮大餐。由於餐飯食到好夜,加上聽日預咗一早出發去慶州(尚慶北道一個古城),唔想太夜瞓,故此就無再上龍頭山睇夜景。搭地鐵去釜山站買定聽日KTX火車票之後(KTX喺韓國嘅高鐵),就打道回府。
是日天氣:4℃ ~ 6℃ 天晴
10多年前跟團到訪過首爾,當時仲稱為漢城,今回再次踏足韓國,目的地喺釜山、慶州、濟洲三地。香港人到外地自由行,喜歡「喪食」、「狂玩」、「瘋買」,我哋一行4人(小弟、太太、姨仔、舅仔)都喺「風遊」,只喺寒風伴遊,去到邊就吹到邊,寒風凜凜,吹到頭暈。
原打算11月中去喺最佳時節,但多方因素,難以成行,所以才推遲至12月中起行,開始此趟8天艱辛之旅。除咗寒風,讓我哋食咗唔少苦頭仲有氣溫同天氣,氣溫長期徘徊晌-1℃~6℃,晌慶州整日嘅長命雨,又食錯嘢,令我哋痾嘔肚痛發燒都嚟埋,亦喺小弟第一次外遊病到要睇醫生,仲有仲有……,想知我哋嘅行程喺點,請繼續觀看下文。
坐港龍飛釜山,開凌晨02:35機,對於唔慣捱夜嘅我哋,其實有啲辛苦,但每日就只得依個航班。06:40抵達釜山金海國際機場,第一時間去酒店寄存行李先,再去海雲臺Spa Land體會一下地道汗蒸幕,順道「恰一恰」瞓陣先。食完午飯逛下好出名嘅海雲臺海水浴場逛,而路經嘅海雲台市場,亦值得打個轉了解當地(街)市況,黃昏時份,行完沙灘就啱啱好行到冬柏島,喺市內嘅睇日落勝地。
大家行得攰,搵間麵包咖啡店嘆杯啡兼歇一歇,晚上再返回南蒲洞,逛一逛光復洞美食街,一嚐當地美食。因為我哋住晌中央洞附近嘅東橫Inn酒店,都喺隔一個地鐵站,行返去都喺十多廿分鐘嘅事。第一日行程到此結束,大家都要好好休息回下氣,明日再戰。
是日天氣:2℃ ~ 5℃ 天晴
第二朝起身,就一試房內嘅蒸餾咖啡機,嘆杯醒神嘅咖啡,食埋尋日晌法蘭度帶走嘅農夫包,塗點牛油。跟住去咗行黑沙水庫健身徑,呼吸吓大自然空氣,一早行山,空氣特別清爽。
返回酒店休息下,收拾好行裝就過去氹仔食個晏,再搵酒店穿梭巴士去關閘,純粹睇下依邊嘅澳門係點,原來感覺好唔同。沿路去澳門市中心行,逛一逛孫中山紀念公園、望廈公園、望廈炮台,臨尾再去三盞燈買啲手信,晌雅韾緬甸餐廳食埋晚飯先搭夜船返香港。
就快又到結婚周年,啱啱見到渣打信用卡出咗個推廣,迎新禮品係平價換澳門旅游套票(一張新卡)或免費換取(兩張新卡),咁著數當然唔執輸啦。遇著冬至、聖誕、新年,同屋企人、親友食幾餐飯都夠數達標簽帳額,所以,就以幾百蚊換咗個澳門假期返嚟!
酒店揀咗晌黑沙灣嘅威斯汀渡假酒店,原因有4:
1. 未住過渡假式酒店,想住一住吓,睇吓係點;
2. 之前嚟澳門已去過澳門半島、氹仔同路環市區,係未到過黑沙灣;
3. 唔使跑景點,想hea啲,多留晌酒店,所以就想搵個環境幽靜啲嘅;
4. 佢係澳門少有(唔知係唔係唯一?)無賭場嘅酒店。
雖然話威斯汀位處澳門最南最偏,但由外港碼頭,坐酒店嘅免費穿梭巴士都係30min就到。搞好登記手續,上房小休,之後再參觀一吓酒店。
黃昏時份,漫步黑沙海灘,細賞夕陽斜照。其實酒店對出已經就係黑沙海灘,唔需刻意搵。行到黑沙海灘另一盡頭,就係我哋搵食嘅地方:法蘭度葡國餐廳,嘆番餐葡國菜。
晚上嘅餘興節目就係享受酒店嘅設施,有游水、浸按摩池、焗桑拿、嘆蒸汽室,其實仲有健身室,不過一晚真係玩唔到咁多嘢。雖然外面天氣幾凍吓,但焗桑拿、嘆埋蒸汽室,個人成身暖晒。啱啱好電視播英超,仲可以睇埋先瞓覺。
去到新加坡行程嘅尾聲,雖然整日天氣時陰時晴,但又唔算好熱好熱,保持住27-30C。尋日早瞓,所以今朝就可以輕鬆早起身。
8:30am晌酒店嘅餐廳食番個自助早餐先,嘆飽嘆夠喇,就去行吓沙灘,幫助消化。尋日嘅活動範圍晌晒「中部」嘅巴拉灣海灘,故此,今日個範圍就輪到酒店依邊「靠西」嘅西羅索海灘。晌沙灘都逛咗成個鐘,跟住返酒店泳池游早水,然後先施施然收拾行李,辦退房。
中午時段,就去行程最後一個景點,就晌酒店後山上嘅「蝴蝶公園、昆蟲王國」,聖淘沙西邊本身有好多行山小徑,佢哋叫「Nature Walk」,經依啲小徑好快就可以由酒店兜去蝴蝶公園。完成埋依個行程,返酒店拎行李,再出番怡豐城(Vivo City),晌大食代美食廣場食埋個午餐先直踩前往機場。
都聽聞樟宜機場好大,共3座客運大樓(查實唔止,下文有分解),不過時間上預得有啲緊咗,未有機會去睇睇T1同T3,就只有晌要上機嘅 T2兜個圈,同向日葵打個招呼影影相,旁晚機返香港,未夠10:00pm已經返到屋企,正式結束4日嘅「新加坡優休悠遊」,真係輕輕鬆鬆咯!
嚟到新加坡嘅第三日,由於尋晚去唔成Night Safari,所以早瞓咗,故此,今朝就可以早早起身!朝早收拾好行裝,先退房,再搞行李寄存,就可以安心出去玩。
第一站,係去食早餐。尋日去亞坤咖央吐司咖啡店,衰咗,今朝就計劃好去食黃阿細肉骨茶,好彩無甩拖,係位置偏咗啲,搵咗段時間。食完早去附近嘅小印度行吓,都有少少特色,但就唔算好特別,所以就兜咗大半個鐘左右就走喇。
跟住坐MRT去番東新加坡嗰頭,搵一搵土生華裔祖屋影吓相,然後去五星海南雞飯食晏,兩者都好相近。搭番兩個站MRT,就返到酒店攞番啲行李,再直踩入聖淘沙!
入聖淘沙都好方便,MRT直到Harbour Front站(NE1),再轉Sentosa Express入島,入到去有巴士同沙灘電車,全部唔使再俾錢,方便又慳錢。約莫4:00pm去到酒店,一如過往,行程尾段我哋都會住得好啲、舒服啲、輕鬆啲,所以就揀咗仿如置身晌森林嘅Siloso Beach Resort(新加坡喜樂聖淘沙度假旅館)。
由於我哋2007年去過一趟關西旅行,所以新加坡環球影城唔係我哋嘅目標景點,反而一眾悠閒玩樂才是主菜。
聖淘沙南面海灘區一共有3個海灘,最西係西羅索海灘 (Siloso Beach),最東就係丹絨海灘 (Tanjong Beach),而較中間位正正就晌聖淘沙捷運嘅海灘捷運站對出嘅就係巴拉灣海灘 (Palawan Beach)。巴拉灣海灘有幾個「景點位」,所以今日玩「中部」嘅巴拉灣先,首站係巴拉灣嘅動物天地睇動物匯演,之後再去亞洲大陸最南點影影相。6:30pm左右,去節慶酒店嘅Fiesta,因為有個好抵食嘅前菜加甜品自助餐(Appetizer & Dessert Buffet),食到飽飽,再睇住時間落番沙灘區睇8:40pm場次嘅「海之頌」表演。然後,梗係散散步啦,行吓去魚尾獅塔,欣賞吓月色,返到酒店都先係十點鬆啲,早啲沖涼早啲抖,咁先玩得閒適。