山區麵包王
我是山區麵包王。 我是一名高級打雜經理。 我最喜愛到日本,台灣,馬來西亞旅遊 , 最鍾意遊覽自然景觀,歷史建築/遺跡,鄉郊農田,動物園/植物園/水族館, 住宿通常會揀3星酒店,渡假村。
留言  留言給此旅遊家
  遊記數目 62
  上載相片 3000
  上載影片 29
最近分享過的旅程
新加坡4天輕渡小周末
國家/地點: 新加坡
旅程日期: 2014-06-28 至 2014-07-01
馬來西亞9天暢玩南北4地
國家/地點: 馬來西亞
旅程日期: 2014-03-15 至 2014-03-23
北再宜嬉盡享郊區之旅
國家/地點: 台灣
旅程日期: 2013-11-30 至 2013-12-06
肯亞野生動物15天大歷險
國家/地點: 肯亞
旅程日期: 2013-07-20 至 2013-08-03
韓冬風遊釜慶濟
國家/地點: 韓國
旅程日期: 2012-12-12 至 2012-12-19
懶懶hea遊澳門
國家/地點: 中國
旅程日期: 2012-01-08 至 2012-01-09
新加坡優休悠遊
國家/地點: 新加坡
旅程日期: 2011-09-13 至 2011-09-16
輕裝飲食逛馬交
國家/地點: 中國
旅程日期: 2011-07-01 至 2011-07-02
雲南省東遊記.羅平油菜花海
國家/地點: 中國
旅程日期: 2011-03-19 至 2011-03-25
台南高雄墾丁自在遊
國家/地點: 台灣
旅程日期: 2010-08-30 至 2010-09-04
共找到 62 篇遊記, 正顯示第 51 至 60 篇遊記
雲南省東遊記.羅平油菜花海 (中國)
(旅程日期: 2011-03-19 至 2011-03-25 ,  旅程性質: 觀光攝影, 消閒度假)
 整個旅程  (共7篇遊記)
 分享至Facebook 
發表日期: 2011-07-30
之前去市郊景點九鄉,為搭車搞到嘥咗好多時間,所以,今日要去嘅石林,同樣係好市郊嘅景點,搭車都會係麻煩啲。咁啱之前嚟昆明時晌機場收過啲單張,有啲石林一日遊(昆明康輝旅行社),每位收費RMB180,包來回接送、景點入場費、一餐午飯、導遊解說,價錢非常吸引,因為單單石林門券都已經RMB175喇,經大家商量後,都決定試吓跟一跟吧!

早上晌酒店餐廳食過早餐,7:30am旅行社有車嚟接我哋,不過,接埋其他人之後唔係即刻出發去石林,而係先去旅行社附近一個停車場作為集散地,來個「大散拼」,多部小車接載大批小批旅客到此,再按人數分批安排坐上大大小小嘅旅遊巴。即場俾錢即場發收據!搞吓搞吓都成8:30am先出發。不過,我哋有啲唔好彩,同車有幾位阿姐,係班麻煩友,當中有個當兵嘅,真係只可以潑婦形容,全日嘈嘈貢,上車又唔守時,唉,臨尾仲同個導遊口角,影響晌成車客嘅心情

早上係行舊路,未到石林,已呻咗去睇兩個購物景點,一個賣玉,另一個賣雲南僰銀,其實都係「指定」景點,因為鋪外泊滿多部旅遊大巴,鋪內就人山人海,我哋梗係齋睇無幫襯啦,純粹參觀下人哋啲手工藝,不過就浪費咗啲時間。

跟住就食午飯先,雖然係團體餐,都算OK喎,至少熱飯熱湯暖暖身,因為今日天氣真係幾凍,估計都係十多度左右。飯後,卒之到咗石林,由導遊帶住邊行邊講解,大概行咗兩個鐘就完結。回程行高速公路返昆明,個多小時就到,不過,仲有一個購物景點,賣精油(即係香薰)。大概5:00pm返回市中心解散。老實講,咁平團費就一定預咗帶你去「購物」,不過,整日導遊小聶都有很多昆明、石林嘅講解,去完購物點無乜人買嘢佢都無俾說話你聽,真係算係咁啦

跟住打的先去一去雲南大學打個轉,再漫步翠湖公園,依兩個地方就晌酒店附近,所以好方便用嚟攝時間。行完返酒店先休息一陣,夜啲先去金碧廣場嘅建新園食滇味小炒,兼晌附近商場掃手信
餐廳內有個兒童區,細路仔食完可以晌入面玩住先,唔使食完扯住走,係怕佢哋玩到唔願走啫。
餐廳內有個兒童區,細路仔食完可以晌入面玩住先,唔使食完扯住走,係怕佢哋玩到唔願走啫。
一列不同種類麵包,仲有粥及配料
一列不同種類麵包,仲有粥及配料
中間大圓枱擺咗好多熱盤,中西式都有。
中間大圓枱擺咗好多熱盤,中西式都有。
另一邊有生果、沙律、飲品、乳酪及多穀麥食品
另一邊有生果、沙律、飲品、乳酪及多穀麥食品
最後兩日晌昆明,住晌旅遊套票所揀嘅5星酒店,包埋自肋早餐,既然係5星酒店,自然很有期待。加上一早要出車去本地團,所以大清早就落去樓下嘅小棕園咖啡廳食過痛快。

餐廳晌酒店大堂一入門口左手邊,好易搵。地方都幾大,裝修簡約,光猛潔淨,座椅排得唔算逼,最有趣晌餐廳最入位置,有個兒童玩樂區,細路仔食完可以晌入面玩住先,媽咪爹哋可以安心繼續食,幾好安排

食物方面,真係可以話勝預期,可能以前晌其他大陸地方住過所謂4星,啲自助早餐真係好「雞」,依然好地道化。不過,晌小棕園依度個早餐,就國際化好多,食物選擇多,種類多,款式多

右排,有白粥、南瓜粥及多款佐料,跟住一列十多款麵包,我已經分兩日盡試,都試唔晒咁多,難得款款包都有水準先緊要,今日就試咗丹麥蜜桃酥、芝士酥、烘多士……都真係好味!

中間環型大枱,
擺咗好多熱盤,中西式都有,例如:煙肉、烤大蕃茄、德國豬肉腸、即製煎蛋、炒菜、意粉、蕃茄炒蛋、即煮米線……等等。質量、味道同樣唔錯

左排,就係
生果、沙律、任斟果汁、鮮奶、啡茶、乳酪、乾果及多穀麥食品。生果好鮮甜,最正係有黃肉西瓜,雖然唔係話超甜,但自己少食就變得特別。沙律就選擇少啲,3款沙律同3款醬汁;乳酪都唔係太OK,反而多穀麥食品就比較多,配啲乾果加鮮奶,又幾好食

本想食過痛快,但今日因為要趕車跟本地團去石林,時間有少許匆忙,未能盡興,不過,已同「團友」講好,聽日行程景點得一個,早餐放心慢慢嘆,絕無時限
每人消費: 約0人民幣元 (早餐)
評分: 味道4   服務4   環境4   衛生4   抵食4
石林地質國家公園嘅介紹
石林地質國家公園嘅介紹
導遊圖
導遊圖
國內同胞佔據戰
國內同胞佔據戰
無品嘅旅客,肆意亂爬!
無品嘅旅客,肆意亂爬!
從觀景亭望向其中一面石林
從觀景亭望向其中一面石林
園內民族音樂及舞蹈表演
園內民族音樂及舞蹈表演
出名嘅阿詩瑪石
出名嘅阿詩瑪石
雲南省昆明石林 -- 人多逼到爆呀!

一早嘥咗啲時間等人(散團客),又去咗兩個無鬼謂嘅「景點」,12:30pm卒之到咗石林,其實石林唔係雲南獨有,只係依度係比較多同高度集中嘅地區,所以,成為石林風景區,而整個景區係由大、小石林、乃古石林、大疊水、長湖、月湖、芝雲洞、奇風洞7個風景分區組成,因為分區遍佈地方太大喇,而且有啲分區都未開發好,所以,一般都係去內石林,即係大、小石林,其他嘅就稱為外石林。

原本,個導遊小聶問我哋想行住睇,定坐車仔睇(每人收RMB20),各有長短,行住睇當然辛苦少少啦,但就集中啲,景區主要就係小石林;而坐車仔就輕鬆啲,兜遠啲,景區主要就係大石林。加上團中有少少老人家,本來都有過半人讚成「跟車」,但之前提過個幾個麻煩阿姐,一邊同個導遊講價,一邊又唔信人哋,結果咪齊齊行住睇,我哋後生都無所謂,係戥個老人家辛苦啫

睇導遊圖覺得石林好似好大,可能我哋淨係逛咗小石林,感覺又唔係好大,雖然山石奇形怪狀,奇石拔地而起,千姿百態,被譽為“天下第一奇觀”,但係未有想像中咁犀利。此外,另一點石林始終係昆明附近嘅人氣名勝,多人多到不得了,同埋啲人又唔係好禮讓,又唔守規矩,成日見到啲後生仔晌啲石上攀爬,但又無人理架喎(有相為証),所以有啲亂,加上嗰幾個麻煩大姐,勁唔合作,咁巴閉就唔好跟團啦,跟團就麻煩合作吓啦,所以都影響咗一齊玩嘅團友仔!

參觀時段: 下午
入場價錢: 每人175人民幣元
評分: 值得去4  
一邊食飯,一邊有拍賣字畫活動。
一邊食飯,一邊有拍賣字畫活動。
8人一圍,七餸兩湯,白飯任裝。
8人一圍,七餸兩湯,白飯任裝。
飯店門外有小販擺賣,都係啲民族工藝品。
飯店門外有小販擺賣,都係啲民族工藝品。
因為跟本地團關係,餐晏仔唔使愁去邊度食。差唔多去到石林時,經過一個「大飯堂」,明顯係專做團嘅大飯堂啦,外面泊咗十架八架大大小小旅遊巴,一入門口就有人安排坐邊圍,預備好餸菜。

飯堂環境唔太差,都叫得做乾淨企理架喇,係較為幽暗啲,大陸好多時啲鋪頭都係為慳電唔開晒啲燈。一圍枱預8-10個人,一坐低就陸續上好餸菜,有兩個湯(一個汽鍋雞湯,一個紫菜湯)、蒸水蛋、洋蔥炒肉片、炒芽菜薯仔絲、炆芋頭、炒椰菜、燒鴨、煮南瓜,7餸2湯,白飯任裝,難得啲餸菜仲係熱嘅,而且味道又唔差,算係咁啦!再者,我哋個圍得7個人,女多男少,就更加好夠食!

食飯期間,晌餐廳中間有個台,原來係有人喊叫賣畫,不過,以我所見,都應該無乜人理佢哋。怪不之得一入餐廳,見牆上掛咗咁多水墨畫,原來如此!食完未上得車,最好嘅餘興就係晌大門口睇吓小攤檔賣嘅民族工藝品、小飾物喇
每人消費: 約0人民幣元 (午餐)
評分: 味道3   服務3   環境3   衛生3   抵食3
校園平面示意圖,可睇出雲南大學都幾大!
校園平面示意圖,可睇出雲南大學都幾大!
呢個景,有無啲港大feel呢?
呢個景,有無啲港大feel呢?
至公堂,現為中式劇院。
至公堂,現為中式劇院。
 至公堂內部
至公堂內部

雲南大學只係作為我哋攝時間嘅景點,所以無話花太多時間去行,只係行咗一小部分,其實雲南大學佔地都幾大,面積大概有4,551畝,即係有幾多平方米?抱歉,我都唔係好識!不過,她被定點為全國50強,努力建成「西部一流、國內先進、國際知名」嘅區域性高水準研究型綜合大學,自有其特點。

講番個校園,幾寧靜,環境清幽,建築物有中有西,部份仲起得好典雅,原來雲南大學都有近成90年歷史。輕輕鬆咁晌度行下,都可緩和一下心情

參觀時段: 下午
入場價錢: 每人0人民幣元
評分: 值得去2  
翠湖公園入口分東南西北,依個係其一!
翠湖公園入口分東南西北,依個係其一!
翠湖公園嘅外圍
翠湖公園嘅外圍
翠湖公園係昆明市一個幾出名嘅景點,正正晌我哋住嘅酒店對面,可惜我哋個房唔係湖景,唔可以晌高位鳥瞰番翠湖。

因湖東北有9個出泉水眼,古時稱九龍池,因為依家嘅昆明都有好多高樓大廈,而翠湖又綠樹成蔭,湖水盪漾,所以,稱得上昆明城內嘅一顆綠寶石,亦有個綽號叫“城中之玉”,都好似幾巴閉咁。除非你對行公園好情有獨鍾,否則,你嚟到都只係當佢係個普通公園,好似九龍公園咁。但細心啲,依度都幾多嘢睇,但要睇時節喇,我哋去嘅時候係初春,所以有萬千垂柳在湖旁。唐堤就見翻緊土,夏天嚟就有碧葉紅荷吐豔之景,秋有就睇百花爭豔,冬有就會棕櫚青青。當然仲有其他景觀!

不過要數翠湖嘅奇景,就非睇紅嘴鷗莫屬,每年11月份左右,它們就從西伯利亞飛嚟昆明過冬,日頭就集結於翠湖,晚間就飛過去滇池,何其壯觀,到翌年2月左右就飛往西伯利亞。一到睇紅嘴鷗時節,翠湖就成為熱鬧景點,龍友嘅聚腳處。可惜,小弟此行,無緣同紅嘴鷗一會
推介項目: 睇紅嘴鷗
參觀時段: 下午
入場價錢: 每人0人民幣元
評分: 值得去3  
三樓係食小菜,亦有好多廂房。
三樓係食小菜,亦有好多廂房。
點菜單
點菜單
橙汁蓮藕 RMB8
橙汁蓮藕 RMB8
山椒爽毛肚 RMB16
山椒爽毛肚 RMB16
牛肝菌爆牛柳 RMB28
牛肝菌爆牛柳 RMB28
青椒炒河蝦 RMB22
青椒炒河蝦 RMB22
建新金肘 RMB28
建新金肘 RMB28
過橋米線 RMB10
過橋米線 RMB10
依間晌金碧廣場嘅建新園,樓高三層,地下係專賣過橋米線同小食,消費比較大眾化;二樓好似係食火鍋;三樓就食滇菜,即係雲南菜小炒,而且環境雅緻少少,有少量堂座,其餘大部份係廂房,亦有露台位,對住金馬碧雞坊,不過,天氣得嗰十零度,都係坐入面好

雖然我哋得三個人,但既然依餐係晌昆明嘅「最後晚餐」,點可以待薄自己架,一於食大佢。打開餐牌,選擇幾多,不過,估唔到價錢比想像中平。結果,點了2個涼菜、3個熱菜及1客過橋米線,都真係幾豐富。

橙汁蓮藕 RMB8
涼菜之一,叫嘅原因不外乎新奇,橙汁+蓮藕依個配搭,絕對有啲騎尼嘅感覺,但大家又想試,睇吓佢會係咩味道。薄片嘅蓮藕好爽好脆,色澤鮮橙,食落都好橙味,不過似係芬達糖漿未打soda入去咁,甜到爆。

山椒爽毛肚 RMB16
依個涼菜就傳統兼正常啲,毛肚做得爽,山椒嘅辣食得令人醒腦醒神。

牛肝菌爆牛柳 RMB28
以味道計,好得,牛肝菌好香,爆炒牛柳後,牛柳有肉味並多少帶點菌香,確係幾好配搭。以健康計,死得,油到爆,未食都見到碟底成朕油,啲牛肝菌同牛柳多油多到「令立立」。

青椒炒河蝦 RMB22
啲河蝦係蝦毛仔,先油泡,再回鑊純以青椒粒嚟炒,啲蝦連殼食,好重青椒味,睇唔出都幾辣,但都幾惹味。

建新金肘 RMB28
算係招牌菜,類似上海菜嘅元蹄。雖然一份只係半隻,但份量相當,幾大碟,醬汁味濃,應該叫番碗白飯撈汁食。肘子做得肥而不膩,淨肉部分都炆煮得好鬆化。只賣MRB28,真係抵食到暈!

過橋米線 RMB10
之前試過江氏兄弟橋香園嘅米線,今趟都想一試建新園嘅,所以就點咗個較普通嘅過橋米線,配料唔係好多,但米線仍然一大碗。味道,兩者都好似差唔多,算係打平手。不過,RMB10就有咁大碗過橋米線,真係另一抵食之選。

仲有一個抵讚之處,就係晌度食嘢,有晒服務員斟茶遞水,招呼左右,但竟然唔收加一之類嘅服務費,Good
推介菜式: 山椒爽毛肚, 建新金肘
每人消費: 約38人民幣元 (晚餐)
評分: 味道4   服務4   環境4   衛生4   抵食4
  0 個留言    |  加入你的留言
雲南省東遊記.羅平油菜花海 (中國)
(旅程日期: 2011-03-19 至 2011-03-25 ,  旅程性質: 觀光攝影, 消閒度假)
 整個旅程  (共7篇遊記)
 分享至Facebook 
發表日期: 2011-07-05
嚟到第五日,都係時候同羅平講拜拜,出番去昆明。今朝羅平天陰陰、雨濕濕,各人抖足精神,先去對面街小店醫肚先,之後收拾好行李退房,去長途巴士站等車返昆明。

由羅平返昆明嘅長途車,比入嚟時平幾蚊喎,RMB62位,3.5小時嘅車程,睇吓景,恰吓眼瞓都好快過。架車一出羅平縣,天氣變得好唔錯,有陽光,中途站又可以休息吓,買吓小販檔嘅炸薯仔食,好抵架,RMB2已經有一小袋,兩個薯仔切開有六、七粒。不過依程車臨尾香,真係死火,好彩都叫入到昆明市,只係外圍少少,都唔等啦,直接打的去酒店快手啲。點知遇到個女司機唔係好熟路,擾攘咗陣再問人先到!原本預計兩點前都應該到酒店,結果遲咗成個幾鐘先去到。

君樂大酒店,係港龍套票包嘅酒店,會住兩晚。一安頓好,就第一時間打的去遊雲南民族村,去到都成4:00pm鬆啲,話6:30pm閂門,所以遊得急少少,但查實6:30pm後都無人趕,只係裡面啲商鋪閂晒,「靜蠅蠅」啲。睇埋日落,行到天都差唔多黑先走。

因為聽日一早跟本地團遊石林,所以今晚都係早啲瞓,晌酒店附近搵咗間德克士(國產KFC),食完就算!
地踎小店,小鎮地方係咁上下
地踎小店,小鎮地方係咁上下
不同形狀嘅麵條
不同形狀嘅麵條
任添配料,閣下自便
任添配料,閣下自便
三碗都係唔同嘢(限於啲粉麵)
三碗都係唔同嘢(限於啲粉麵)
口感幾似烏冬嘅雲南地方麵食-餌絲
口感幾似烏冬嘅雲南地方麵食-餌絲
小店就晌羅平汽車站附近
小店就晌羅平汽車站附近
晌羅平嘅第三日,天氣都仍然幾凍,雖話無心水早餐想食乜,但就至少都揀食滾熱辣嘅嘢。出咗酒店斜對面,見到有檔賣粉麵,甚麼餌絲、麵條、卷粉、米線…好似幾得意,儘管鋪面樣衰啲,店內環境污糟啲,整體格局地踎啲,但小鎮小店都係咁上下架啦,咪入鄉隨俗體驗下囉

首先我哋三人各自叫,有餌絲、麵條、水餃,基本上,都係一大碗粉,上面放少少豬肉碎,配料如雪菜、蘿蔔、蔥粒、薄荷葉、芹菜粒……就放晌入口旁木枱,任意添加,多少隨意。餌絲猶如厚身嘅河粉,係雲南嘅地方麵食,將大米泡浸後蒸熟,磨成糊狀後再搓成方形變成餌塊(晏啲去雲南民族村時就試到燒餌塊),切成條就變成餌絲,放湯煮口感都幾幼滑,但咬落就煙煙韌,其實都幾似食烏冬,只係個樣扁平啲。水餃,唔好搞錯以為同我哋食開嘅水餃有好多餡,查實佢無餡凈係得層皮,同樣當麵食!湯底本身算唔上好鮮甜味美,之但係晌十幾度又雨濕濕嘅天氣下,一碗熱湯已覺好味。跟住大家都知道一陣坐長途車,要食飽少少,所以就加多碗米線一齊分!

以往上開大陸工作,晌小鎮街邊食碗二兩份量嘅羊肉粉,都係大概RMB4左右,所以,依家三個人食四碗粉麵,係無乜餸料嘅粉麵,原本預計都係RMB12左右,最後收廿蚊,成五蚊碗,自覺有啲被劏,不過,事前無問清楚,都無得好講,反正都係幾蚊嘅小事!
每人消費: 約6人民幣元 (早餐)
評分: 味道3   服務3   環境2   衛生3   抵食2
從翠湖望過去君樂大酒店
從翠湖望過去君樂大酒店
酒店正門
酒店正門
酒店大堂 - 接待櫃台
酒店大堂 - 接待櫃台
酒店大堂 - 地下、二樓係商場
酒店大堂 - 地下、二樓係商場
客房層電梯位
客房層電梯位
雙人房,另加床,咁就變咗有少少逼。
雙人房,另加床,咁就變咗有少少逼。
浴室非常乾淨企理,設備齊全。
浴室非常乾淨企理,設備齊全。
由於係套票包嘅酒店,好難講我今次住嘅房價幾多,不過事前都有上去佢個網站睇睇,以雙人房計,門市價就RMB1,200,不過大陸乜都興打折,透過佢個網訂,唔連早餐就大概RMB450,要埋早餐都係RMB550,話晒都5星啦,算抵住喎

君樂大酒店係今次行程最正嘅酒店,所以梗係留番尾嗰兩晚住啦。除咗客房、服務好之外,最正係個自助早餐,幾豐富,點豐富?留番第六日行程先寫!而佢嘅地點都幾理想,位處昆明較北方置,但對面就正正係翠湖、雲南陸軍講武堂,再行遠少少就係雲南大學、昆明動物園,可以唔使坐車,行路去都得

食方面,晌東風西路、人民中路交界附近,由酒店行大概十分鐘左右有個嘉香百味小吃城,叫半露天嘅美食廣場,都有成十多檔唔同特色、地道嘅小吃或套餐,可以不妨一試。
每晚價錢: 0人民幣元 (雙人房)
評分: 設備4   服務4   環境4   衛生4   抵住4
入券費,一年貴過一年!
入券費,一年貴過一年!
遊覽指南,廿五個小數民族一目了然。
遊覽指南,廿五個小數民族一目了然。
除咗睇,仲有陶藝品可以買。
除咗睇,仲有陶藝品可以買。
白族的白塔
白族的白塔
納西古樂宮,可以買番個樂器當記念品
納西古樂宮,可以買番個樂器當記念品
蒙古族的蒙古包
蒙古族的蒙古包
依個就真係唔記得屬於咩族
依個就真係唔記得屬於咩族
村內有間民族餐廳,中菜館,可以擺結婚酒,不過當日所見,一對新人都係著西裝婚紗,未有民族色彩。
村內有間民族餐廳,中菜館,可以擺結婚酒,不過當日所見,一對新人都係著西裝婚紗,未有民族色彩。
顧名思義,雲南民族村相信都唔使多介紹,一個地方睇晒雲南25個少數民族文化嘅主題公園,可謂俾錢入場上一堂雞精班,濃縮了解下雲南少數民族豐富多彩嘅民族風情同民族文化。

雲南民族村離市中心唔遠,大概20min車程,幾方便。側邊係滇池,對面有西山風景區,龍門石窟(有索道連接西山龍門),可一條龍睇晒,不過我哋唔多好寺廟,西山唔啱我哋。如民族村作為獨立一個景點,都要預一個朝旱或一個晏晝,因為除咗有唔同嘅民族村落散居其中,讓你輕輕鬆鬆咁走村串寨,了解各族嘅建築風格、民族服飾、民族風俗之外,周圍仲有園林景觀、秀水綠樹,唔少得梗係唔同民族嘅歌舞表演、或一啲民俗節慶表演,如白族的「三月街」、傣族的「潑水節」。又可以試吓民族風味小食,或者買番啲民族工藝品。

最可惜係我哋因為長途車出咗少少意外而延誤,嚟到民族村都4:00pm,好多表演都完晒。幸好,成個村夠鐘閂門都無人趕,可能地方太大都唔知點清場,再者,村內有間民族餐廳,可以擺結婚酒,我哋走時都仲見有賓客入園赴宴,所以,我估如果你夠膽嘅話,過埋夜都仲得呀!哈哈!
參觀時段: 下午
入場價錢: 每人90人民幣元
評分: 值得去3  
昆明故城示意圖
昆明故城示意圖
昆明故城之內仿古建築
昆明故城之內仿古建築
昆明故城之內仿古建築
昆明故城之內仿古建築
賣雲南小食嘅小店
賣雲南小食嘅小店
烤餌塊製作中
烤餌塊製作中
醬料有甜有鹹
醬料有甜有鹹
烤餌塊夾烤腸RMB3
烤餌塊夾烤腸RMB3
未入雲南民族村,先會經過一個叫昆明故城嘅仿古建築肆,唔係好大,一陣行晒,但就好有種古味盎然。不過,其實全是商鋪,賣紀念品、餐廳、小食店……等等。

其中一間小食店,賣烤餌塊,其實頭兩日晌昆明街邊都見過。今朝晌羅平食早餐就食咗餌絲,依家唔食「絲」,就食「塊」。每塊餌塊都幾大,成張A4紙咁,厚0.5cm左右,放晌碳爐烤熱烤香,再搽啲醬,捲起其他食材就大功告成,夾腸嘅話好似食熱狗咁款!

我哋分別點咗以下兩款:烤餌塊夾油條RMB2.5、烤餌塊夾烤腸RMB3,兩者都幾好食。不過揀醬料要小心,因為醬料有甜有鹹,甜嘅一致認為好食啲,而甜嘅味道類似我哋食開嘅海鮮醬之類;鹹嘅味道就唔多OK,因為類似腐乳味,感覺比較怪怪哋!不過咁平,就幾抵食囉,當下午茶唔錯喎!
每人消費: 約3人民幣元 (下午茶)
評分: 味道3   服務3   環境3   衛生3   抵食4
  0 個留言    |  加入你的留言
台南高雄墾丁自在遊 (台灣)
(旅程日期: 2010-08-30 至 2010-09-04 ,  旅程性質: 觀光攝影, 生態探險, 飲食購物, 消閒度假)
 整個旅程  (共6篇遊記)
 分享至Facebook 
發表日期: 2011-06-05
南台灣之行嘅最後一日行程喇,有啲唔捨得,咁快過咗5日,因為玩得開心!不過,今日嘅行程都好豐富,無悶場,又唔匆趕。

先晌酒店大堂側嘅波麗露咖啡廳擦餐飽,面對豐富嘅自助餐美食,點可以忍口架,慢慢食,食到飽,嘆到夠,一餐頂晒朝早、晏晝兩餐。跟住返房收拾好所有行李、手信,落去退房及搞行李寄存,輕身走我路!

朝早、中午就去壽山動物園,晌華王嗰邊有56路公車,好快到。然後,先路經入一入雄鎮北門,作為同場加映秘而不宣嘅景點。再兜上去打狗英國領事館,觀海兼afternoon tea。因為見仲有啲時間,無無聊聊走過去真愛碼頭 打個轉,巧遇台南縣農特產展售活動

校啱時間慢慢行返酒店取行李,6:00pm出發去機場,搭8:30pm夜機。不過離開酒店之際,見斜對面有間小王子麵包鋪,身上又仲有剩番嘅新台幣,所以就嚟兩件cake外帶,晌機場等機時慢慢嘆。
餐廳一入門口直望就見到,地方幾闊落。
餐廳一入門口直望就見到,地方幾闊落。
令人坐得好舒服嘅皮椅
令人坐得好舒服嘅皮椅
擺放食物區唔算大,一眼睇晒!
擺放食物區唔算大,一眼睇晒!
專業咖啡機,沖出嚟嘅咖啡幾掂。
專業咖啡機,沖出嚟嘅咖啡幾掂。
沙律配冰凍鮮橙汁,加少少熱食
沙律配冰凍鮮橙汁,加少少熱食
沙律再戰多輪,加少少生果
沙律再戰多輪,加少少生果
一口氣試咗5款包,正!
一口氣試咗5款包,正!
咖啡,醇香細滑!加多杯牛奶粟米片,平衡吓!
咖啡,醇香細滑!加多杯牛奶粟米片,平衡吓!
位於華王大飯店地下嘅波麗露西餐廳(Bolero),一入門口直望就見到,環境幾現代感,地方幾闊落,唔同色系嘅皮椅,坐得好舒服

基本上,波麗露作為酒店嘅西餐廳,都係主要供應自助早餐、午餐、晚餐俾客人,此外,佢都有做埋下午茶自助餐,仲係平日假日都有。自助早餐成人TWD350(另加一),唔算貴,不過,我哋訂房時已包咗雙人自助早餐喇。值得一提係佢嘅自助晚餐,成人TWD459(平日)、TWD529(假日),相對起香港,真係好抵喎,仲係5:30pm食到9:00pm,不過,質素就唔知係點!當然,除咗食自助餐,散叫都得嘅。

自助早餐,唔算話好多好多嘢食,但種類OK,都係以多種異國美食為主,有中式(粥、油炸鬼、蒸包、點心…)、有日式(味噌湯…)、有西式(自助沙律吧、火腿豬肉腸煙肉、芝士、麵包、粟米片…)、台式(鹵肉飯、涼菜…),以及生果、果汁、豆漿、牛奶及茶啡。

今次小弟主打西式,狂攻沙律吧同麵包,因為沙律配料非常新鮮味美,襯番杯冰凍鮮橙汁,開開胃,醒醒神先。跟住食啲熱食間場,火腿、豬肉腸、煙肉、炸魚柳……等等。臨尾就唔好錯過啲麵包,因為都幾多選擇,況且台灣啲西式糕餅一向唔差架,我就一口氣試咗5款,各有特色,少有哋見到丹麥方包,所以食完一片又一片;而另一款芝士香草方包都好正,呷著杯咖啡,仲以為自已食緊下午茶添呀!加多杯牛奶粟米片,咁就滿足晒喇。
每人消費: 約0新台幣 (早餐)
評分: 味道4   服務5   環境4   衛生5   抵食5
「壽山動物園」嘅入場券好可愛
「壽山動物園」嘅入場券好可愛
「壽山動物園」平面圖
「壽山動物園」平面圖
園區嘅指示路標,非常清晰實用。
園區嘅指示路標,非常清晰實用。
玻璃屋內嘅大蜥蝪,真係好大隻!
玻璃屋內嘅大蜥蝪,真係好大隻!
友禽天地,裡面好多飛鳥同孔雀
友禽天地,裡面好多飛鳥同孔雀
半開放式展區,前面係動物介紹牌
半開放式展區,前面係動物介紹牌
封閉式嘅老虎籠
封閉式嘅老虎籠
中央水池,好多細路在嬉水
中央水池,好多細路在嬉水
我同太太都幾鍾意去睇吓啲動物園,可能晌香港無乜依類設施,有都係好似中環動植物公園嗰種小規模,或者要俾幾百入去嘅海洋公園,今次嚟到高雄,偶然發現佢都有個動物園晌鼓山嗰邊,又近我哋住嘅酒店,咁就梗係上上佢個網址睇睇,原來個動物園都幾多嘢睇,而且仲好平,TWD40,為起港紙$10蚊雞,所有食完早餐後第一個景點就安排咗去動物園探趣,足夠消閒一個朝早呀。

「壽山動物園」雖然位處高雄市壽山,但其實晌壽山東南方邊位,鄰近緊接著市區,所以交通相當之便利。原來,壽山動物園最早晌1978年成立於『西子灣風景特定區』,名為「西子灣動物園」,2年後因市政府想爭取中山大學設校,就將原處嘅動物園搬遷去現在嘅『壽山風景區』,所以都改埋名叫「壽山動物園」。1986年年中先完成園區內全部設施,隨後對外開放參觀,不過,個人感覺之前啲規劃有啲兒戲喎

壽山動物園雖然佔地面積唔算好大,不過,園區內飼養咗成百多種來自世界各地嘅珍禽異獸,數量多達一千三百多隻,都算得上非常齊全,仲有啲稀有品種添,如台灣黑熊。而且,園區以多元化設計,有開放式(如「友禽天地」,以天網罩住上頂,所有雀鳥可隨意走動;或馬棚、羊棚)、半開放式(大部份動物區)、同封閉式(獅子、老虎、黑猩猩)。仲有,每個展區,都為每款動物製作介紹牌,各有故事,相當有寓教於娛樂嘅地方。加上動物園內仲有數百餘種嘅原生植物,所以令到「壽山動物園」環境更閒適!

參觀時段: 早上
入場價錢: 每人40新台幣
評分: 值得去5  
大貨船正駛入打狗港
大貨船正駛入打狗港
影貨船景觀唔錯
影貨船景觀唔錯
向出一望,成個海洋,仲見到防波堤!
向出一望,成個海洋,仲見到防波堤!
有路可行去打狗英國領事館
有路可行去打狗英國領事館
對岸嘅旗津燈塔
對岸嘅旗津燈塔
「雄鎮北門」相信都無乜人聽過依個景點,書都唔會點介紹,點解我又去咗,都係一個機緣!話說去完壽山動物園,等咗好耐未有公車,咁啱有個的士大佬林長信師傅,見我哋等車,佢問咗知我哋去打狗英國領事館,而佢又係去接老婆返西子灣屋企,問我哋介唔介意載埋佢老婆,車費就收少啲,正所謂一家便宜兩家著,睇佢個樣又老老實實,而且依幾日嚟,遇到啲高雄人都幾友善,咁樣就跟咗佢車

沿途林師傅不停介紹高雄嘅景點,到打狗前,佢無啦啦車咗我哋先上雄鎮北門(其實只係大路向左屈上斜路少少),極力推介,話個景點正點正,又介紹埋個歷史背景,成個導遊上身,喂!真係好得喎。查實,雄鎮北門係哨船砲臺嘅門額題字,清光緒元年建造,為國家三級古蹟,與對岸旗津南岸嘅旗后砲臺同時期建成,鎮守住打狗港。不過,大砲就無咗,得番個弧型砲座。

當然,依家殘留嘅古蹟唔算好吸引,最得係佢開闢咗近海個灣位,對正港口。近距離睇住啲超大貨輪出出入入,多多少少都有啲震撼力,望過對岸就見到尋日去過嘅旗津燈塔,所以,尋日晌燈塔就可以高抄影貨輪,今日晌雄鎮北門就可以少少低抄影貨輪,感覺好唔同!而且,向出一望,就係成個海洋,幾爽呀!睇完依個景,林師傅又繼續車我過隔離嘅打狗英國領事館,又熱情咁介紹一番!真係出門遇貴人呀。
參觀時段: 下午
入場價錢: 每人0新台幣
評分: 值得去4  
打狗不打搞 笑臉2011-06-05
從下面望上去嘅「打狗英國領事館」
從下面望上去嘅「打狗英國領事館」
Z形樓梯,上領事館必經之路
Z形樓梯,上領事館必經之路
打狗英國領事館近入口位
打狗英國領事館近入口位
領事館全景平面圖
領事館全景平面圖
好懷念嘅紅色英國皇冠郵筒
好懷念嘅紅色英國皇冠郵筒
對住高雄市全貌嘅一方,最窩心係設置咗啲枱,安心坐晌石壆上飲住嘢吹水睇景!
對住高雄市全貌嘅一方,最窩心係設置咗啲枱,安心坐晌石壆上飲住嘢吹水睇景!
迴廊一景
迴廊一景
內部嘅史蹟文物館
內部嘅史蹟文物館
依個英國領事館叫「打狗」,其實並無貶意,只係以前高雄市舊稱叫「打狗」,既然作為一個領事館官邸,佢哋梗係識搵好位啦,座落晌海天一色嘅西子灣山上,雄據高雄港嘅半山位,真正背山面海,對著視野遼闊嘅天然景致:前對高雄港無敵大海景、左擁高雄市全貌市景、右抱西子灣醉人日落美景(可惜要就時間搭飛機,未有機會晌度睇日落,只好幻想吓),係咪好正先

打狗英國領事館為二級古蹟,建於1865年,至今都近150年歷史。其實除咗美景天成之外,本身幢建築都好有味道,就係古建築嘅味道。翻查資料,領事館屬於後文藝復興時代巴洛克式建築風格,咁講其實我都唔係好識,但一講到係一舊一舊紅土磚,外牆、內牆弧拱磚砌咁就易明啦,一個又一個羅馬式半圓拱設計,力學嘅計算。迴廊嘅圓栱晌太陽斜照下顯得古意盎然,最有趣係以竹節狀造形嘅去水管,係清末洋樓嘅特色,都可以話係結合西方、東方巧藝建築而成。足見證出一個半世紀嘅歷史。

1986年始經考證研究修復,現在內部做咗高雄史蹟文物館,陳列咗有關打狗開拓及近代史嘅文獻、照片同模型,不少珍貴歷史可以係度搵到;有時,亦有啲臨時展,好似我依期去就係叫「雙城故事-利物蒲與高雄」,仲有啲The Beatles嘅嘢添!增值之後,使其成為一個內外兼備嘅古蹟領事館,所以,依個官邸值得一睇唔好怕打搞

除咗睇古蹟,依度仲係好多遊客嚟tea嘅地方,源於佢個靚景,坐晌露天茶座,嘆啡食cake真係好hea嘅享受!想知係點,睇下一節「舌尖舞芭蕾咖啡」介紹啦。
推介項目: 露天茶座Afternoon Ta
參觀時段: 下午
入場價錢: 每人0新台幣
評分: 值得去4  
露天茶座
露天茶座
大樹好遮陰,仲有太陽傘!
大樹好遮陰,仲有太陽傘!
Pu Lsate做嘅簡單推介,好似小學生勞作仔。
Pu Lsate做嘅簡單推介,好似小學生勞作仔。
TWD390,幾抵架!
TWD390,幾抵架!
傳統風格,三層架方式相隔,配兩杯嘢飲!
傳統風格,三層架方式相隔,配兩杯嘢飲!
依邊位就對住咗旗津
依邊位就對住咗旗津
另一邊就對住高雄市市景
另一邊就對住高雄市市景

上文介紹過打狗英國領事館環境真係幾正,而晌領事館側有個露天茶座,由Pu Lsate(舌尖舞芭蕾咖啡)經營,係度嘆番個英式下午茶,曬曬樹叢透下嘅陽光,望望海,望望山,幾賞心樂事呀

雖然之前講到領事館個景點正點正,但露天茶座就縮晌一邊,景觀唔係咁全面,主要對住高雄市同旗津島,望正旗津渡輪站,不過,咁嘅景觀都好唔錯啦!但坐位你都要眼明手快,因為個場大概廿多張枱,只有近邊嗰6、7張至係揀手位,坐低都望到海,其他「內陸」位就當然差少少啦。之不過,整體個場都幾舒服,因為大樹好遮陰嘛,又架起咗太陽傘,唔怕有嘢跌落嚟。

講到食,其實唔單只嚟tea嘅,佢營業時間由朝到晚,選擇有風味餐點(如:義大利肉醬麵、和風咖哩雞腿飯……)、銅鑼燒、蛋糕、點心(如:東港鮮鮪魚捲、脆皮薯條……)、茶飲果汁(如:奶茶紅茶、有機鮮果汁、氣泡水……)、有機咖啡,所以話呢,食晏又得,晚飯開餐都得,得咗!

至於我同太太試嘅英式傳統下午茶,就只晌2:30om-5:00pm供應,TWD390一份兩人用,唔收10%服務費。傳統風格,三層架方式分層呈現,再配任何飲品兩杯,冷熱隨意,折番唔使港紙一百,有靚景睇,有嘢飲有嘢食,確係幾抵

第一層(上層):蛋糕加手工餅乾,而蛋糕三選一(重乳酪、提拉米蘇、黑森林),我哋揀咗重乳酪,即係焗嘅芝士蛋糕,質感就如同美國芝士餅,芝士打得頗挺身,芝味超濃;而手工餅乾係幾條朱古力餅乾條,唔算有咩特別。
第二層(中層):時令鮮果拼盤,有哈蜜瓜、西瓜、菠蘿、提子、熱情果同番石榴(芭樂),都幾大堆頭!
第三層(底層):一整份公司三文治,烘底麵包,餡料包括蛋、蕃茄、青瓜、火腿,用料較簡單。
老實講,整體食物唔算好突出,除咗件餅,其他只可用中不錯嚟形容。

反而,兩杯嘢飲又幾OK喎,一杯係熱嘅卡布奇諾咖啡,另一杯係凍嘅香柚綠茶;前者甘醇細滑、後者清甜有個性,正正各有所長

每人消費: 約195新台幣 (下午茶)
評分: 味道4   服務3   環境5   衛生4   抵食4
遠望真愛碼頭全貌
遠望真愛碼頭全貌
標誌嘅大風帆
標誌嘅大風帆
台南縣農會搞嘅「文旦農特產展」
台南縣農會搞嘅「文旦農特產展」
各式台南縣農產品
各式台南縣農產品
大堆「文旦柚」
大堆「文旦柚」
真愛碼頭原本係散裝貨輪碼頭(舊稱高雄12號碼頭),但近年來因貨櫃輪興起而令散裝貨輪逐漸沒落,故此,將荒置嘅12號碼頭打造出一個新興嘅遊憩景點,仲俾咗個全新嘅名佢:「真愛碼頭」,據介紹依度將會係未來多種藝文活動嘅舉辦地點,市政府想將佢塑造成充滿浪漫氣息嘅休憩公園,所以命名為真愛碼頭。不過,除咗一個好大嘅招牌寫住真愛碼頭之外,真係感受唔到咩浪漫

她位處愛河嘅出海位,碼頭有兩座雪白嘅風帆標記,融入咗節約能源嘅概念,所以風帆有太陽能發電板及發電量顯示器嘅裝置,此外,仲有啲觀景木棧平台,同埋開通真愛碼頭去旗津嘅航綫,大大紓緩原本就人山人海嘅鼓山輪渡站,不過只限假日開航。其次,開辦固定觀光航線,如遊愛河、旗津小島,所以,都難以理解點浪漫!

偶然下,見附近空地由台南縣農會搞咗個「文旦農特產展」,就好似天星擺農墟咁,主要販賣台南縣特色農產品,尤其出名嘅「文旦柚」(即係好似我哋食開嘅沙田柚),標名柚香柚甜,仲有其他農產品,包括米、茶、咖啡、酒、保健養生食品及加工食品……等等,又幾有趣喎
參觀時段: 下午
入場價錢: 每人0新台幣
評分: 值得去1  
芒果慕斯蛋糕.朱古力蛋糕
芒果慕斯蛋糕.朱古力蛋糕
丹麥酥麵包
丹麥酥麵包
係度買餅都真係個意外,因為之前來來回回五福四路,都無發現小王子,係到臨走,拉住行李去捷運站,先遇上佢,可能走時開始入黑,開咗燈就比較顯眼!見佢櫥窗面擺咗好多麵包,就走入去睇睇,睇到啲西餅好似好有水準,手上又凈返唔少新台幣,加上成8:30pm機,起碼9:00pm先有得食,所以就把心一橫,買兩件cake去機場嘆吓兼頂一頂肚

小王子烘焙坊所賣嘅嘢都幾多元化,有歐陸麵包、特色麵包、西餅、蛋糕、手工曲奇……,應有盡有,仲以「精緻,天然,健康」製作忠旨。怪不得幫襯當日都唔少人買包買餅。

芒果慕斯蛋糕TWD55
長條形蛋糕,造型簡潔,牛油消化餅底,加一層芒果果肉,再上就係海綿蛋糕,面面唧出芒果忌廉花,簡單得嚟又見其心思,味道多層次,芒果果肉清甜,只係嫌佢少。

朱古力蛋糕TWD60
經典嘅朱古力蛋糕,黑朱古力來自比利時,以微微濕潤嘅朱古力蛋糕,配上黑朱古力同忌廉打做嘅朱古力醬,一層疊一層,再晌上面砌出朱古力裝飾,灑啲唂咕粉。味道苦甜而濃郁,柔軟而有質感,無可媲美嘅滋味

丹麥酥麵包TWD75
見佢一磚磚金磚丹麥酥麵包新鮮出爐,一袋袋大概好似平時晌超市見嘉頓隻8片方包份量,只係賣TWD75,即係廿蚊唔使,真係撞鬼囉,抵食到咁。你晌香港出晒名嗰間博洛尼亞度買,都成十幾蚊先得一片,所以,順手買一袋走,拎返香港當第二朝早餐啦。雖然隔咗一日先食,但依然咁好食,外層丹麥酥外皮,酥香非常,裡面包身帶點嚼勁,烘番熱,搽點果醬,簡單而好味嘅早餐,雖然杯咖啡係三合一,但麵包先係主角,都無所謂啦!

每人消費: 約60新台幣 (其他)
評分: 味道5   服務5   環境4   衛生4   抵食5
瑪莉食品門面
瑪莉食品門面
旗鼓餅、木棉酥、栗子燒
旗鼓餅、木棉酥、栗子燒
因為正正係我哋所住嘅華王大飯店斜對面,所以,之前嘅行程都無乜點買啲食得嘅手信,諗住係度一鋪過,唔使走嚟走去周圍搵,慳番時間又唔使麻煩

入到去,鋪仔細細,擺咗好多款手功糕餅,前後左右都擺滿晒。得個疑似老闆娘嘅婆婆係度招呼我哋,佢人就非常熱情,猛咁叫我哋試食啦試食啦,當然我哋就梗係東試試西試試,先再決定大手入咩貨啦!佢都有好多產品賣,如鳳梨酥、手工壽桃、古仁片、坦克酥、幸運餅、台式銅鑼燒、水果酥……等等,但買手信始終都係想帶有當地特色,所以主打揀咗「旗鼓餅」同「木棉酥」,兩者都稱得上係「高雄市餅」。

「旗鼓餅」
好似日本啲銅鑼燒咁,不過餅型就唔係銅鑼而係個大鼓咁款,餡料只有3款:蕃薯、芋頭、紅豆味。咁旗鼓何解,原來「旗」與「鼓」係指旗津同鼓山,因為高雄最早嘅發源地就係始於依兩處。婆婆補充話,依家「旗」、「鼓」仲代表埋高舉大旗,擊鼓出發,奮勇前進,開創未來。真係咁有寓意!食起嚟口感就同食銅鑼燒差唔多,軟軟甜甜,可能用咗其他餡,所以相比感覺同銅鑼燒有少許分別。個人比較喜歡蕃薯味,因為鍾意食蕃薯嘛。

「木棉酥」
意思嚟得簡單,因為高雄市花就係木棉花,所以就以木棉花為型,整咗依個「木棉酥」,餡料有4款:柑桔、藍莓、小紅莓(台稱蔓越莓)、哈密瓜,口感較鬆軟,都唔錯!

「愛河栗子燒」
除咗上述嗰兩樣,婆婆嘅極力推介就係依個栗子燒,新產品,叫話起源自愛河河畔嘅幸福,真係難想像呀!但總之又幾好食,軟綿綿栗子蓉做餡,外層餅皮薄薄又帶有咖啡苦甜,真係幾得

你想散買又得,而每款餅亦有獨立禮盒裝,仲加埋唔同分量配搭嘅綜合禮盒裝,即有齊旗鼓餅、木棉酥、栗子燒,共冶一爐,所以好有彈性,買吓買吓我哋都買咗成千幾銀喇,不過,係新台幣啫!
每人消費: 約1200新台幣 (其他)
評分: 味道4   服務4   環境3   衛生4   抵食4
  9 個留言    |  加入你的留言
台南高雄墾丁自在遊 (台灣)
(旅程日期: 2010-08-30 至 2010-09-04 ,  旅程性質: 觀光攝影, 生態探險, 飲食購物, 消閒度假)
 整個旅程  (共6篇遊記)
 分享至Facebook 
發表日期: 2011-05-29
抖足精神,晌酒店嘆飽早餐,收拾行李離開墾丁返高雄,踏出酒店,卒之見到墾丁嘅燦爛陽光,雖然遲來,影響咗好多行程部署,但見番咁好天氣,心情都返晒嚟

2.5個鐘車程,正午返到高雄火車站,天氣依然晴朗,拖著行李,第一站自不然是先到酒店。如果行程中有需要住唔同酒店,我哋鍾意越住越好,所以尾站就揀嚟鹽埕區嘅5星華王大飯店。安頓好,先晌幾街之隔嘅老宋牛肉麵食番碗麵,跟住再去旗津。

揀華王除咗可以住得好,食得好之外,因為佢晌鹽埕區,過條隧道或兜個圈就係西子灣,去鼓山渡輪站搭程小輪就過咗旗津島,慳番啲時間,行程又好安排。今日晏晝先玩旗津島,夜晚行夜市;聽日就玩鹽埕區、西子灣,掂晒!
越住越好 笑臉2011-05-29
酒店外觀
酒店外觀
大堂
大堂
大堂個古老大鐘
大堂個古老大鐘
穿旗袍奏中樂的少女
穿旗袍奏中樂的少女
房間內部整潔
房間內部整潔
小小心意 - 酒店自家製作鳳梨酥
小小心意 - 酒店自家製作鳳梨酥
洗手間衛生令人滿意
洗手間衛生令人滿意
晌高雄好幾間中價位嘅5星酒店中,揀咗華王大飯店,多少都係因為位置問題,因為尾依兩日嘅行程都係晌晒鹽埕、西子灣同旗津,可要慳番多少少時間。

華王原來都有成40幾年歷史(1968年成立),有300間豪華客房,但去到第一眼係睇唔出咁多年,因為晌2009年投放上億元大裝,從大堂、客房內部以至房間設備全部都改頭換面,執到最好,等於老店新開。以新裝計,經網站訂,雙人房連自助早餐都係HK$568一晚,絕對住得過,老婆都讚好,我都安心啲!

酒店外觀唔算好特別,但大堂都算瑰麗典雅,擺咗個古老大鐘,有啲雅致嘅木枱椅,又有啲穿旗袍少女彈奏中樂,頗有韻味。服務都好好,大門口嘅門僮,前台嘅服務員,都感受到佢哋真係殷勤咁招呼你,雖然早到,佢哋都好快安排到房間俾我哋。佢哋話自己會秉持著『尊客以誠,敬客以心』嘅理念嚟經營,我都覺得佢哋做得到喎。上到房,房間整潔不在話下,基本設備齊全,窗外景觀開揚,送你兩樽水好多星級酒店都有,仲送咗兩笠酒店自家製作嘅鳳梨酥作小小見面禮,味道香而鬆軟,外層餅身唔太乾

由於從酒店步行5-10min就去到愛河,愛河被喻為高雄城市靈魂,入夜後,河畔燈光迷人,被當地人稱為一條美麗嘅藍絲帶,大可閒逛,感受下幾分浪漫。題外話,酒店仲有免費單車借用,當然數量有限啦,如果有閒情,都可以踩單車遊西子灣添。
每晚價錢: 568港元 (雙人房)
評分: 設備4   服務5   環境5   衛生5   抵住5
真假老宋? 笑臉2011-05-29
大大個鋪面好易搵
大大個鋪面好易搵
調味醬料,特別係最上一樽芳香豬油
調味醬料,特別係最上一樽芳香豬油
「老宋牛肉麵」招牌大字,碗外碗內都見
「老宋牛肉麵」招牌大字,碗外碗內都見
特製筋肉麵TWD160
特製筋肉麵TWD160
寬麵,口感QQ,有咬勁。
寬麵,口感QQ,有咬勁。
滷豬腳麵TWD80
滷豬腳麵TWD80
被稱為仿冒嘅老宋牛肉麵
被稱為仿冒嘅老宋牛肉麵
由捷運鹽埕埔站行去華王大飯店,途中會經過位於五福四路146號嘅老宋牛肉麵,都頗有名氣,之前晌墾丁遇過一對港人情侶,都推介此店。晌佢門口有此聲名:「真正的老宋在此,在愛河橋下有一家32XXX是仿冒」,事後去開愛河都見過嗰間老宋,仲寫住32街老宋牛肉麵(五福四路32號),30年老店新開。熟真熟假?邊間開先?恐怕都可能係類似海天堂鬍鬚佬同大家姐嘅問題!不過,都唔理真假,食咗先講。

佢叫得牛肉麵,自己依個係主打,不過,麵類以外,都仲有飯類、湯類、小菜(或小食)。上上佢個網址就一目了然,有晒種類同價錢。無論麵飯湯,種類離不開牛筋、牛肉、牛雜、排骨、榨菜肉絲、豬腳,價錢TWD80-160。而小菜方面,如涼拌海帶絲、酸辣泡菜、皮蛋豆腐、滷豆乾、滷牛肚、現炸排骨……等10多款,價錢都係TWD30-100。特別要提嘅係佢嘅麵條分咗寬、中、細三種。

招牌特製筋肉麵TWD160
筋肉即係有牛筋加牛腩,麵條要寬麵。特製筋肉係以紅燒方式煮,味道香濃,筋腩各半,前者柔軟而有韌勁,後者鬆軟而重肉香。至於寬麵條,似山西刀削麵嗰種闊度同厚度,口感充滿QQ嘅勁道有咬口;湯頭都好出色,感受到牛肉原汁味道,帶著濃甜香!

滷豬腳麵TWD80
依個就試細麵,同我哋廣東嘅粗麵差唔多闊,但亦都係厚身啲,口感較柔滑。滷豬腳浸滷時間足,所以好入味,咬到最入都一樣好味,而且,咬落富膠質感,同樣好食!
推介菜式: 招牌特製筋肉麵, 滷豬腳麵
每人消費: 約120新台幣 (午餐)
評分: 味道4   服務4   環境4   衛生4   抵食4
高雄的天星 笑臉2011-05-29
鼓山渡輪站正面
鼓山渡輪站正面
鼓山渡輪站側面
鼓山渡輪站側面
碼頭內
碼頭內
 碼頭外
碼頭外
摩托車都上船喇
摩托車都上船喇
船艙客位,前面道門可去船頭
船艙客位,前面道門可去船頭
回望鼓山渡輪站碼頭
回望鼓山渡輪站碼頭
高雄港,望向85大樓
高雄港,望向85大樓
鼓山渡輪站,就好似我哋嘅九龍天星,搭5-10分鐘左右小輪就過到對面海旗津島,依條鼓山-旗津航線,收費唔貴,大人TWD15,學生TWD12,班次都幾密,約4-6分鐘就有一班。船分兩層,上層坐人,下層就俾摩托車用。其實,仲有一條真愛碼頭-旗津航線,同樣去到旗津,不過假日先有,而且班次較疏。

鼓山-旗津航線渡輪唔單只係旗津居民嘅公共交通渡輪,亦係遊客觀光線。碼頭本身無咩特色,應該係改造過,比較現代化。到此,只為搭程船,不過,晌船上就記得出去去船頭,渡輪橫越壯闊嘅高雄港,景觀「二流」,因為小弟覺得一陣上去旗津燈塔,景觀就真係「一流」喇


參觀時段: 下午
入場價錢: 每人15新台幣
評分: 值得去3  
在渡輪上望向旗津渡輪站
在渡輪上望向旗津渡輪站
旗津渡輪站
旗津渡輪站
旗津島,感覺有啲似我哋香港嘅長洲,但係都有好多嘢唔同,小島得嚟又比較發展咗,佔地更大,又住咗好多人。同長洲明顯唔同嘅係旗津可以行車(長洲就只係島上特定嘅「車仔」),所以,過嚟旗津除咗晌鼓山渡輪站搭船過嚟,仲可以坐公車,公車35路(前鎮站<>旗津站),大概近捷運凱旋站,穿過海隧道去到終站旗津渡輪站。所以,我哋晌旗津島嘅路線圖,係搭船過嚟旗津,沿路玩到去風車公園 ,再坐35路公車去夢時代逛下,不走回頭路。

旗津話大唔大,話細唔細,個人覺得預半日都OK,如果深度遊,景點大小通吃,就預番一日啦。首個景點,自不然係落船嘅旗津渡輪站,據講,目前晌台灣除咗台北淡水外,旗津係唯一有渡輪嘅地方。不過,依家個渡輪站唔係昔日嗰個,因為渡輪站晌時間嘅洗禮下,已帶點夕陽餘暉,加上1984年高雄過港隧道通車,使旗津的對外交通大為改善,其實旗津嘅觀光資源豐富、古蹟眾多,所以,為了讓旗津展現新風貌,近年來係市政府嘅建設下,逐漸形成觀光導向嘅名勝地區,可踩單車環島遊,晌廟前路近海一帶嘅海產街食海鮮,……等等

1987年,高雄市政府亦將旗津渡輪站換新裝,將渡輪站外型改建為復古建築,充滿古典味道,二樓對海一邊以落地玻璃窗設計,可將高雄港海景盡收眼底。有閒暇嘅,大可晌碼頭上層嘅「河邊曼波咖啡館」享受繁忙嘅高雄港口及對岸景致
參觀時段: 下午
入場價錢: 每人0新台幣
評分: 值得去3  
環迴景觀360 笑臉2011-05-29
山腳嘅圖形牌
山腳嘅圖形牌
上山小路,唔太辛苦
上山小路,唔太辛苦
旗津燈塔
旗津燈塔
旗津燈塔
旗津燈塔
燈塔園區模型
燈塔園區模型
柴山(遠)、西子灣(近)
柴山(遠)、西子灣(近)
西子灣
西子灣
 旗津島全貌
旗津島全貌

抄少少網上嘅介紹資料俾大家睇睇先:「旗后山頂上的旗津燈塔,又稱高雄燈塔,是台灣少數僅存的清代燈塔之一。建於西元1883年,是台灣本島上的第二座燈塔(第一座為屏東鵝鑾鼻燈塔)。1918年整修過後,塔身為磚造八角形白色建築,黑色圓形頂,高15.2m。」

由碼頭行過嚟,計埋上山到燈塔,大概預
20min左右。不過,通往旗津燈塔嘅路隱身晌老街、巷弄內,啲指示被人塗鴉得唔太清楚,不過一般都搵到上山條路,因為山腳有大大個嘅圖形牌。燈塔位處旗津島嘅盡頭,一眼望晒成個島係點,而最正係晌眺望台上可以盡覽台灣海峽、高雄港、柴山、西子灣美景,以及近距離望到進出港口嘅大型船隻,景致真係一流。我哋仲晌燈塔旁嘅樹下吹吹風,幾鬼寫意,係差咗杯凍啡同件cake啫。

此外,燈塔園區裡其中一幢建築物開闢為小小博物館,有燈塔園區模型,燈塔嘅不同景觀相片及一啲相關物品嘅展示,所以,絕對值得一遊

參觀時段: 下午
入場價錢: 每人0新台幣
評分: 值得去4  
嚇鬼黑沙灘 哭臉2011-05-29
沙灘前區嘅亭
沙灘前區嘅亭
更衣設備
更衣設備
沖身設備
沖身設備
椰樹棕棕,感覺輕鬆!
椰樹棕棕,感覺輕鬆!
依邊個灘就唔係咁靚喇
依邊個灘就唔係咁靚喇
求先晌旗津燈塔望落嚟見到依個沙灘,睇落好靚,所以離開燈塔嘅下一個景點就係佢「旗津海水浴場」。旅遊書有對佢咁嘅介紹:「位於旗津區廟前路,沙質細軟,海水清澈,與海岸公園相鄰,也是海岸公園北邊的起點,一個擁有救生設備的海水浴場,為夏日消暑、玩水、游泳、衝浪、拖曳傘等水上活動最佳的處所。」

其實,遠睇個灘真係幾靚,椰樹棕棕,又有綿延數公里嘅海岸線,你話到傍晚時分,夕陽西斜、雲彩變幻,襯埋浪花拍打聲響,感覺幾浪漫呀!不過,椰樹叢為界,一邊個灘就OK,另一邊都唔知搞乜,個灘巖巖巉巉,枯枝、爛木、垃圾乜都有,感覺好影響。個「喊面」係俾啲無公德嘅人架
參觀時段: 下午
入場價錢: 每人0新台幣
評分: 值得去2  
斗六冰城好易搵,成幢屋大大個招牌!
斗六冰城好易搵,成幢屋大大個招牌!
木卡位,有種70年代啲冰室仔感覺
木卡位,有種70年代啲冰室仔感覺
大樹幹木凳,好有原始古早味
大樹幹木凳,好有原始古早味
有乜嘢賣,一目了然
有乜嘢賣,一目了然
綜合冰淇淋TWD30
綜合冰淇淋TWD30
綠豆冰淇淋TWD30
綠豆冰淇淋TWD30
咁消暑,清晒啦!
咁消暑,清晒啦!
行咗陣海灘,天氣又熱,入番內街,就撞正係「斗六冰城」,啱晒啦,消消暑解吓熱,仲可以乘機休息抖抖

斗六冰城好易搵,晌中洲三路,成幢屋大大個招牌。原來依間係本店,仲有三間分店:旗津二店(旗津區旗津三路)、海邊店(高雄市海邊路57號)、鹽埕店(高雄市建國四路375號),所以,想試依個古早味雪糕,都唔一定要嚟旗津。

斗六售賣嘅商品有冰餅(即係我哋叫開嘅雪糕三文治,但底面就用大塊克力架餅夾雪糕)、冰棒(即係雪條)、雪糕(依個無詳問,但睇樣似係我哋食開嘅脆皮雪條)、冰淇淋(咁叫法先等於我哋常叫開嘅一球球雪糕),同埋飲品(例如冰紅茶、梅汁牛乳冰、檸檬冰淇淋),總之樣樣都能令你消暑解渴。而環境有啲回歸到70年代啲冰室仔咁款,木卡位,個人比較喜歡坐晌近馬路邊嘅行山通道位,因為好似樹幹嘅大木凳,好有原始古早味!服務方面,自助形式,都無嘢好講,唯一係當係正左度右度唔知想點乜時,老細都唔會催你,仲笑容滿面!

綜合冰淇淋TWD30
同太太先試綜合冰淇淋,唔晒講,都係貪佢一次過可以試勻六款味道啦。冰淇淋一共有8種味:桔仔、綠豆、牛乳、可可、芋頭、酸梅、花生、草莓。不過綜合就唔係任揀嘅,係指定6種,都無所謂啦,反正都係試試吓。果真係冰淇淋,質感似富豪雪糕車所賣嘅珍寶橙冰咁,奶味唔重,似冰多啲,非常傳統嘅手製「雪糕」,但味道鮮活唔造假,個人較鍾意係桔仔同綠豆,前者甘桔味清新,後者綠豆味濃郁。

綠豆冰淇淋TWD30
因為太太都覺得綠豆好食,所以再添食一杯,凈綠豆冰淇淋,都係6球,夠晒皮啦!哈哈!
每人消費: 約30新台幣 (下午茶)
評分: 味道3   服務3   環境3   衛生4   抵食4
晌旗津風車公園,巧遇彩虹。
晌旗津風車公園,巧遇彩虹。
7座三葉式風車,醒目搶眼。
7座三葉式風車,醒目搶眼。
色彩繽紛嘅海洋生物拼貼創作
色彩繽紛嘅海洋生物拼貼創作
蟹仔凈係識出剪架咋!
蟹仔凈係識出剪架咋!
有海螺、有魚……做鍋底得唔得呢?
有海螺、有魚……做鍋底得唔得呢?
碧海藍天,吹吹海風,舒暢到極。
碧海藍天,吹吹海風,舒暢到極。
擊出數尺澎澎聲嘅浪花
擊出數尺澎澎聲嘅浪花
夕陽永遠係美景
夕陽永遠係美景
旗津風車公園位處旗津島中部海邊,對住西面,而面向台灣海峽,於2003年完工啟用,叫得風車公園,賣點就係7座三葉式風車,但其實賣點豈只於此!

7座三葉式風車,油上鮮黃色,十分醒目搶眼,不過,只有7座,而且風葉比較細,好聽就係造型獨特,唔好聽就有啲似小兒麻痺,做到好似南丫島風車嗰類先有番啲氣勢嘛!所以,個人覺得風車未係咁吸引。反而,有其他嘢仲有睇頭

第一,就係園區裡面色彩繽紛嘅海洋生物拼貼創作,有海螺、有魚、又有蟹……,造型生動有趣,散佈園區多個地方,有啲仲整到有成個人咁大,同蟹仔玩包剪揼,佢凈係識出剪,必贏啦。所以,同啲海洋生物可以影出好多有趣嘅相片。

第二,係睇「泊浪」,對出嘅台灣海峽,海水不斷一進一退,朝向岸邊嘅防堤一碰一撞,澎澎聲之餘,擊出數尺浪花,幾有動感

第三,由於公園面向西邊,不妨晏啲先嚟,睇埋日落先走,夕陽永遠係美景;如果遇埋碧海藍天,吹吹清涼海風,感覺舒暢極啦
參觀時段: 下午
入場價錢: 每人0新台幣
評分: 值得去4  
統一夢時代購物中心
統一夢時代購物中心
B1層美食天地
B1層美食天地
美食天地其中一鋪「台南擔仔麵」,格局都做得似模似樣
美食天地其中一鋪「台南擔仔麵」,格局都做得似模似樣
B1層台南特產大街
B1層台南特產大街
B2層家居生活,幾多特色家居嘢賣
B2層家居生活,幾多特色家居嘢賣
「小熊家族」,好多得意家居儲物箱
「小熊家族」,好多得意家居儲物箱
台灣惠康(頂好),撞到「陳慧琳」賣月餅
台灣惠康(頂好),撞到「陳慧琳」賣月餅
特惠牌都出鳳梨酥
特惠牌都出鳳梨酥
我同太太去旅行唔多購物,鍾意睇景,所以夢時代都係必然「景點」,只不過晌旗津坐公車出嚟,終站都係去到捷運凱旋站,就不妨到夢時代打個轉。題外話,坐公車由旗津穿過港隧道返高雄嘅時候,隧道嘅設計好有心思,就係私家車同電單車係分開行,電單車條路係獨立挨牆而升高七、八尺,咁就減少好多意外,抵讚!

呢個果然係一個Dream Mall,都好大,以水(B1-B2:家居生活、美食天地)、花卉(1F-2F:國際精品、時尚樂活)、自然(3F-6F:都會新貴、新潮流行、兒童王國、運動休閒)、宇宙(7F-RF:潮流美饌、流行雜貨、影城會館、摩天輪樂園)為四大主題規劃,為夢時代打造出購物、休閒、娛樂、餐飲、藝文嘅生活空間。我哋無花太多時間行,主要走咗去B1台南特產大街買買手信,咁啱依度有惠康(台灣叫頂好),睇睇超市物價,連特惠牌都出鳳梨酥圖分一杯手信羮

由於一陣會去瑞豐夜市,所以,下面個美食廣場都係齋睇絛幫襯,留肚大作戰。夢時代有免費穿梭巴士車去捷運,故此,都好方便,晌依啲大熱天時,入嚟過過冷河,或「竭竭腳」,可以再為去下一站前叉充電
參觀時段: 晚間
入場價錢: 每人0新台幣
評分: 值得去3  
抉擇對戰 笑臉2011-05-29
火鍋
火鍋
萬國鐵板麵
萬國鐵板麵
日式鹽燒雞腿
日式鹽燒雞腿
水煎餃
水煎餃
鹵味大雜會
鹵味大雜會
芭樂汁(左)、芒果汁(右)
芭樂汁(左)、芒果汁(右)
懷舊玩意彈波波
懷舊玩意彈波波
瑞豐夜市唔使多介紹,揀佢作為晌高雄嘅最後晚餐,一句講晒,全因係全高雄最大。其實,本地人都比較鍾意去瑞豐夜市,因為依度攤販常有創新產品,吸引力自然大增。

夜市就唔一定凈係食,瑞豐依度仲有玩嘅(懷舊玩意彈波波贏獎品)、買嘅(衫褲鞋襪、流行飾品),商品五花八門。不過,檔口雖多,但就過於擠逼,所以,總係人山人海,還好嘅係嚟到嘅人都頗有秩序,唔會左推右擠,算係好有氣氛,非常熱鬧。

無數過有幾多檔小食,總之就多,粗略斷估都上百檔,就係唔知點抉擇,真係心緒交戰。反正小弟食乜都無所謂,重任就交晌老婆手上,由佢發辦,我俾錢

食過以下幾款,未必係最好,只係想食就想嘅決定:
日式鹽燒雞腿 - 慢工出細貨,等好耐,拎住個籌食完一兩樣嘢返去攞都未遲。TWD40一串,雞肉燒我鹹香惹味,肉質都唔錯,只係唔算太特色!
水煎餃 - 水煎變奏,餃底香脆,肉餡OK,此外就唔算有咩特別。
鹵味大雜會 - 色澤頗深,滷得入味,而無過鹹
鮮果汁 - 飲嘢晌台灣永遠係最抵,真才實料,睇住佢落,又夠晒大杯喎。芭樂汁(即係番石榴)TWD25、芒果汁TWD30,前者味道帶酸,冰凍醒神;後者味道鮮甜,濃郁果香,正呀

仲有好多嘢想試,但老婆話夠皮,而且都成十點幾,就咁算住先。

每人消費: 約100新台幣 (晚餐)
評分: 味道4   服務3   環境3   衛生4   抵食4
  0 個留言    |  加入你的留言
雲南省東遊記.羅平油菜花海 (中國)
(旅程日期: 2011-03-19 至 2011-03-25 ,  旅程性質: 觀光攝影, 消閒度假)
 整個旅程  (共7篇遊記)
 分享至Facebook 
發表日期: 2011-05-23
今日全日包車遊羅平重點景區,約咗毛師傅一早8:30am出車,為省時,所以之前嗰晚就買定麵包、嘢飲,留晌酒店食完就出發

離開縣城唔使30min車,就到達咗今日第一個景點「金雞峰叢」,一落車我哋又嘩嘩聲,因為一望無際嘅油菜花海盡收眼底,大大小小嘅山丘前前後後咁散佈花海其中,猶如金雞獨立,一個又一個。好彩今日著夠衫,除咗因為氣溫唔夠十度之外,金雞峰叢比較空曠,上到山丘好扯風,唯一係天色差,影響晒成個景觀!

再下個景點「九龍瀑布」,由金雞峰叢開車過嚟半個鐘多少少,又係唔算遠。唔使多講,主要梗係睇瀑布啦,九龍瀑布嘅特色在於瀑布形態,由上游荷花塘至至下游景區入口嘅碧日潭,全長4公里左右,密佈著鈣化灘和瀑布,層層疊疊,蔚為優美

早上行程到此完結,午飯就一試地道私房菜「農家樂」,晌小村落食餐農家飯餸,體驗一下農家嘅清淡。跟住,下晝嘅行程,原先係先到魯布革小三峽,可惜去到遊客一個都無,遊小三峽係要坐觀光船,唔夠客係唔開船。可以揀包快艇,價錢當然貴一截,但最大問題係快艇類似「大飛」咁,今日天氣又咁凍,晌水上揸得咁快,實凍病呀,最後都係決定放棄依個景點。睇唔成小三峽,都可以順路去睇睇魯布革水電廠,再一個可惜,設備檢修期間,停止參觀廠房

唯有向最後一個景點進發 - 多依河,書係咁樣介紹:多依河纖塵不染,一身清嫩碧綠,有桂林之靈秀,版納之風惰,遊完一轉環境確係幾優美,但又有啲言過其實,唔係一個好必然要去嘅景點,但假若有時間都一遊無妨嗰類!

行完多依河都成6:30pm,天都變得灰灰濛濛,所以回程途中都無去睇另一個出名景點「十萬大山」,直接返入縣城都要成7:30pm喇。總結整日行程,啱啱好係以縣城為中心,向東北方面行,再南下,跟住再兜返上去縣城,轉咗一個大圈。所以,如果要走勻晒咁多個景點,一日應該唔係好夠時間。

今晚又搵毛師傅介紹今餐食乜好,不過,依次間嘢較地道,相反就唔太啱口味,既辣且油,要俾個苦面佢
田間小路,可通向各個小山丘
田間小路,可通向各個小山丘
一望無際嘅油菜花海,同連綿不絕嘅山嶺
一望無際嘅油菜花海,同連綿不絕嘅山嶺
油菜花田間嘅蜂蜜場
油菜花田間嘅蜂蜜場
新鮮蜂蜜現賣
新鮮蜂蜜現賣
「進地每人一元」,係農民嘅外快
「進地每人一元」,係農民嘅外快
雲南省羅平縣油菜花田 -- 金雞峰叢
金雞峰叢係晌羅平睇油菜花另一個熱門景點,好難講得明個位置,包車師傅自然會帶你去,所以唔使操心交通問題。如果要講嘅,就位處於羅平縣城沿324國道東北方12公里左右,非常近,唔使半個鍾就到。佢亦係睇日出嘅靚位,好可惜,之前一日嘅天色都開始轉差,值搏率低,所以唔決定去睇日;今朝起身,仲落過雨添,天氣唔好,陰陰沉,其後都係想落又唔落之間,所以,嚟到睇金雞峰叢,整個景觀有氣勢,但色彩打咗個五折

依個景出名在於數十萬畝油菜花開得漫山遍野,連綿不絕,而多不勝數嘅錐狀小山丘,錯落散在花海之上,阡陌縱橫。油菜花盛開,匯集成一片片金色汪洋,因為地方夠空曠,風勢比較大,造就花海好似泛起層層波瀾咁,感覺真正!據講國道左邊嘅大黑山觀賞金雞峰叢係景觀最正,不過,我哋揀咗走入其中一個峰叢上面,可環徊咁睇個景。一個個形態各異、玲瓏浮突嘅山丘猶如花海中蕩漾嘅小島,群峰聳翠,景象獨特,又可幻想下佢哋係一個個春筍,剛剛破土而出

雖然金雞峰叢係一幅又一幅農田組成,無收門票可言,不過,你都可以走入廣闊嘅油菜花田中影相,但按規矩:「進地每人一元」,可以話係對農民嘅補貼。之不過,你影完唔俾嘅話,佢哋又唔會追你九條街問你攞,依一蚊雞我覺得係對佢哋辛苦種田嘅謝意

因為好奇,我問毛師傅點解全縣嘅農民都種油菜花?佢解釋,因為油菜花可以用嚟生產食油,叫「菜花籽油」(唔等於芥花籽油,係兩種唔同植物),效益比種其他嘢高。可惜,油菜花每年得一造,春節過後,春暖時節才花開,所以年年花期都唔同!好似今年,因為年初有多轉寒流南下,比以往延遲開花,今年春節晌二月初,而二月尾先開始開花,花期一般長達42日,當然花期中段時間比較好,我哋今次個時間都OK!總之,油菜花海係個可遇不可求嘅壯麗美景
參觀時段: 晚間
入場價錢: 每人0人民幣元
評分: 值得去5  
九龍瀑布群導遊圖
九龍瀑布群導遊圖
To Kowloon?
To Kowloon?
迎賓瀑
迎賓瀑
月牙湖及登山纜車
月牙湖及登山纜車
觀景台
觀景台
一目觀十瀑
一目觀十瀑
堪稱九龍第一瀑布嘅「神龍瀑」
堪稱九龍第一瀑布嘅「神龍瀑」
遠睇神龍瀑
遠睇神龍瀑

每逢去到一個景點,總係鍾意搵佢張導遊圖影張相,留念之餘,亦影低一啲景點資料。嚟到九龍瀑布群,依個又係指定動作。不過,個圖有啲搞笑,上面大字嘅九龍瀑布英文就意譯(nine-dragon waferfall),下面嘅細字就用咗廣東話嘅音譯(Kowloon),咁快就返到九龍就好呀,唔使又飛機,又長途車嚟羅平喇!

九龍瀑布群,係國家AAAA級旅遊區、雲南省省級風景名勝區,都幾有名氣,雖然叫「九龍」,但就有十個高低寬窄不等嘅瀑布,稱得上形態各異,美不勝收。原來「九龍」之意係在於瀑布位處九龍河上。景區有成4公里長,一般都唔會行晒,多數入咗景區後,穿過迎賓瀑,過橋經過月牙湖,再坐登山纜車(入場費唔包,另外再收RMB30位),上到觀景台,先嚟個鳥瞰一目觀十瀑,再由山頂行番落山,睇番幾組瀑布,波光閃爍,行吓影吓相,輕輕鬆鬆咁行,兩個鐘都夠晒

講到瀑布,最主打係最大嘅「神龍瀑」,高56米,寬112米,堪稱九龍第一瀑布。至於,第二瀑布「情人瀑」(高43米,寬39米)、第三瀑布「白絮瀑」(高19米,寬120米)及「石龍漫游瀑」(高16米,寬40米)都係晌上游較高較遠位置,行去要再花較多時間,除非想睇晒所有瀑布,否則,可考慮睇完神龍瀑就打道回府,再者,回程仲有其他規模細啲嘅瀑布及唔同景觀,均各具特色。

因為依家未係雨季,唔係咁啱時間,所以,只係睇到九龍瀑布嘅形態,就差咗啲氣勢。如果唔係,晌豐水季節,遠在數里之外都聽到水流巨響,應幾有震撼山河之勢。

九龍瀑布門票原價RMB75,同程網(http://www.17u.cn/)預訂價為RMB70,慳得一蚊得一蚊。

參觀時段: 早上
入場價錢: 每人75人民幣元
評分: 值得去5  
紫竹園
紫竹園
紫竹園嘅後欄,種有新鮮蔬菜
紫竹園嘅後欄,種有新鮮蔬菜
紫竹園附近嘅農民房
紫竹園附近嘅農民房
紫竹園附近嘅農民房
紫竹園附近嘅農民房
廚房又幾整齊潔淨
廚房又幾整齊潔淨
真正白飯任裝
真正白飯任裝
農家菜,8餸1湯
農家菜,8餸1湯
是日推介,燻肉,口感似煙肉,你敢唔敢食?
是日推介,燻肉,口感似煙肉,你敢唔敢食?
去完九龍瀑布都成12:00pm,都係時候食晏啦!師傅問我哋想食咩,晌咁郊區,真係唔知點答你,倒不如問番師傅有咩好推介啦。佢介紹去九龍瀑布附近嘅「紫竹園」,食餐農家飯,品嚐布依族嘅特色風味

離開九龍瀑布揸咗10min車左右就到,來到一個小村落,人跡渺渺,靜得緊要,不過,就係咁就有一種寧靜盎然嘅感覺,令人好平和,感覺閒適、恬靜。紫竹園位處小路旁,門外掛住一串又一串嘅粟米,最鍾意係正門兩側嘅對聯:「清啖鮮味招來千里客,布依鄉情留住萬人心」,幾有韻味

農家作飯甚需時,因為平日唔係經常有客,而我哋又係即興決定去食,所以,晌度食餐飯唔急得,慣住大城市嘅人都要將心情調校一下。故此,趁此空檔晌依個小村落遊走一下,親睹鄉村嘅生活環境。

等咗近半個鐘,終於有得食(其實只得我哋一枱客人),內裡環境好家居,成個大客廳咁,擺放幾張矮矮嘅木枱木凳就係架喇,隔離仲有幾個村民「打牙骹」、抽吓水煙!初初以為得4個餸,跟住陸續有來,最後就係8餸1湯,白飯任裝。本來飯店會另外有飯餸招呼師傅,不過,我哋都邀請埋佢一齊同枱食飯,反正仲係有咁多餸。講明係農家菜,自不然不會大魚大肉,山珍海錯。8個餸,都係啲炒豆、炒菜、煎蛋、燻肉、臘肉……等等,味道來得清啖自然,食出材料本身真味,尤其蔬菜嘅菜味同新鮮度最突出。埋單索價RMB120,我哋就覺得有啲貴,因為都係啲平價材料,只不過,體驗吓農家樂,推動吓佢哋有生意做,況且出嚟玩都無得下下計住計住,所以都覺得無所謂。
每人消費: 約40人民幣元 (午餐)
評分: 味道4   服務4   環境4   衛生4   抵食3
魯布革水電站紀念碑
魯布革水電站紀念碑
魯布革水電站介紹牌
魯布革水電站介紹牌
「設備檢修期間,停止參觀廠房」
「設備檢修期間,停止參觀廠房」
水電站車道入口,望入去睇唔到盡頭。
水電站車道入口,望入去睇唔到盡頭。
截流水壩
截流水壩

魯布革水電站位於雲貴兩省交界嘅深山峽穀之中,為混合式水電站,電站問1957年開始初步規劃,1982年11月開工建設,1985年11月截流,1988年12月第一台機組投產發電,1990年底建成,歷時成幾十年架,係雲南電網嘅電廠主力,所以,佢都幾巴閉,95%嘅電量輸往雲南昆明市、曲靖市等地,其餘嘅就輸往貴州省興義市。

歷史嘢唔多講,依個電站作為「景點」,吸引地方係廠房對外開放,電站領導真醒,抓住機遇,對內部接待資源進行整合,把電站工業觀光旅遊作為開展多種經營嘅龍頭產業,仲成為全國首批工業旅遊示範點之一。而整個電站由首部樞紐、引水系統及地下廠房三部分42個洞室群組成,總長3.12千米,主體隱藏晌山體之中,洞室群呈立體交叉佈置,縱橫交錯、撲朔迷離,有「地下迷宮」之稱。當然一定唔會成個電廠都開放曬啦,不過,能一窺電廠內部對我哋嚟講都係新鮮事物!最可惜,門口指示牌寫住「設備檢修期間,停止參觀廠房」,令我哋摸門釘,緣慳一面。但聽毛師傅講,近年電站都少咗對外開放,成日都話檢修 
參觀時段: 下午
入場價錢: 每人0人民幣元
評分: 值得去2  
多依河導遊圖
多依河導遊圖
布依婦女,賣手製水車、五色花飯。
布依婦女,賣手製水車、五色花飯。
類似哥爾夫球車嘅觀光車
類似哥爾夫球車嘅觀光車
沿河布依婦女賣烤河魚仔,RMB1串。
沿河布依婦女賣烤河魚仔,RMB1串。
河道上滾動緊嘅水車
河道上滾動緊嘅水車
沿河兩岸,種植咗好多古榕灌木,錯落有致。
沿河兩岸,種植咗好多古榕灌木,錯落有致。
鈣化灘
鈣化灘
水車功能展示區
水車功能展示區

國家AAA 級風景旅遊區,係一個以亞熱帶同布依族風情相結合嘅自然景區。晌全長約12公里嘅河道上,分佈著40多個小型瀑布、疊水、鈣化灘,主要景觀有:多依勝景、板台瀑布群、飛花碎玉、水車功能展示區、仙人潭、水車群、一目十灘、雷公灘瀑布、處女瀑布、鴛鴦瀑布……等。個人建議,晌景區入口位坐觀光車(類似哥爾夫球車,另車費單程RMB20位)先去到觀光車終點站,再由裡面行番出嚟,咁樣就慳咗啲時間,又唔使走回頭路。不過,就算係咁,終點站都只係去到雷公灘瀑布,仲有打後嘅景點就要另外再兜入去。所以預幾耐時間要睇你取向,如果只有雷公灘瀑布行番出去,大概1.5-2鐘搞掂,假如入到盡,可能要多1個鐘!晌裡面仲可以玩竹筏漂流、橡皮艇漂流、騎馬,不過,唔知係咪淡季,遊客少,見竹筏漂流、橡皮艇漂流晌河邊拋晒錨,騎馬就都見有個疑似負責人係度嘅。

其實成條多依河都幾清幽,尤其今日我哋所見,遊人唔多,就更加寧靜,仿佛一片世外桃源咁款。多依河晌山坳中蜿蜒流淌,沿著如層層梯田般嘅鈣化灘、瀑布群溢流而下,山坳中又見到布依山寨散落期間,不時冒出一縷縷炊煙,時有一、兩個布依村民來來往往。沿河兩岸,種植咗好多古榕灌木,錯落有致;河道之上,又不時見到大大小小水車在滾動,若細心留意,就會發覺每個水車都展現出不同功能,有運水嘅,有推動石磨嘅,都幾得意有趣。再配上水聲鳥語立體聲,洋溢著淳樸風情

布依族,逐水草而居嘅少數民族,散居於貴州、雲南及四川一帶。晌景區門口,就滿眼都係頭戴頭巾、身穿藍衣嘅布依族婦女,有啲兜售精巧嘅手製水車,有啲就售賣以鮮花染成嘅五色花飯,我哋好奇但未有試。整體嚟講,多依河景區可考慮晌遊覽之列,但就唔係必然景點喇。

溫馨提示:多依河門票原價RMB75,同程網(http://www.17u.cn/)預訂價為RMB50,又可以慳5蚊 

參觀時段: 下午
入場價錢: 每人55人民幣元
評分: 值得去3  
環境算企理,係唔鍾意用啲絨布笠住啲凳
環境算企理,係唔鍾意用啲絨布笠住啲凳
5個餸,合共RMB65,好抵!
5個餸,合共RMB65,好抵!
唔好見咁紅以為辣,係酸酸甜甜嘅煮菌
唔好見咁紅以為辣,係酸酸甜甜嘅煮菌
依碟好辣,雲南版麻婆豆腐
依碟好辣,雲南版麻婆豆腐
炒豬肚絲
炒豬肚絲
雖然唔辣,但勁油呀!
雖然唔辣,但勁油呀!
尋晚毛師傅嘅介紹「七里香」,天寒地凍嘆野山葯竹笙雞鍋,非常正;今晚再搵佢推介,找來依間地道嘅小炒王,價位平,又地道,不過,唔係好得喎,唔可以話好難食,只係唔太啱口味,同埋較油較肥,過鹹而偏辣!可能食得唔暢快,鋪面相又無影,連間嘢個名都無記添!

環境算企理,不過燈光就有啲昏昏暗暗,啲凳用啲絨布笠住,令人感覺比較唔乾淨,不過出嚟玩,都唔介意咁多嘅!依度叫菜好搞嘢,佢哋無餐牌,晌佢個大雪櫃前揀食咩蔬菜、菇菌,佢會問你想點食,又或者想食咩菜,佢哋好似乜都識整咁!

結果就嗌咗5個
餸,合共先係RMB65,價錢就真係非常抵!一個大湯碗,看似火紅辣爆,查實只係酸酸甜甜煮菌;至於個雲南版麻婆豆腐,夠晒辣;一個炒豬肚,同佢講想食豬肚,就由廚房發辨點炒,辣得惹味,辣度又頂得住;而個炒野菌,其實味道幾好,又唔辣,可惜就勁油,碟底係油浸野菌;最啱食,就係個清炒菜心,菜心翠綠鮮嫩,真正有菜味
每人消費: 約22人民幣元 (晚餐)
評分: 味道2   服務2   環境3   衛生4   抵食5
  0 個留言    |  加入你的留言
雲南省東遊記.羅平油菜花海 (中國)
(旅程日期: 2011-03-19 至 2011-03-25 ,  旅程性質: 觀光攝影, 消閒度假)
 整個旅程  (共7篇遊記)
 分享至Facebook 
發表日期: 2011-05-21
依日行程簡單,目標只有一個,就係九鄉風景區,如果早玩完,就返嚟補番去雲南省博物館,諗住會好輕鬆,所以,晌酒店慢慢嘆早餐,然後施施然出發

九鄉風景區基本上係屬於宜良縣嘅一個著名景點(宜良縣九鄉彝族、回族鄉境內),宜良係省會昆明嘅直屬郊縣,被譽為「滇中糧倉」和「烤鴨之鄉」,距昆明市區45公里(註:九鄉離昆明就成90公里),唔算遠,自己揸車應該好快到。不過,坐公車就煩啲。先由昆明市打的去市外嘅東部汽車客運站(30min,~RMB35),依個客運站主要目的地係雲南省嘅東部地區,如宜良縣、石林縣、羅平縣……。其實個客運站都係新搬過嚟,不過都有啲亂,最大件事係無書所講嘅直車去九鄉風景區,而先到宜良縣(1hr40min,@RMB18),再轉細巴去九鄉(1hr20min,@RMB8)。結果,由原先預算兩個零鐘昆明去九鄉風景區,就變咗9:30am由酒店出發,包埋等車、轉車、再等車、又轉車,晏晝2:00pm先到九鄉風景區,唉,為咗玩,連晏晝都未有時間食!好彩我哋都醒,帶咗唔少零食跟身,都頂得吓!

晌九鄉風景區,遊咗三個多鐘,不愧為「溶洞之鄉」,真係幾多嘢睇,景物夠多元化,值得一遊,跟團可能好啲,唔使好似我哋咁轉折,不過相對又要攝啲購物點入行程度,如果包車就幾貴,除非夠晒人多先諗得過吓。

去完九鄉,返回宜良,雖近傍晚,但趁有啲時間,一試宜良烤鴨滋味,雖然唔及我哋香港嘅燒鵝燒鴨,但味道都算係唔錯,不妨一試。晌外地食嘢,又唔需要吓吓都要同邊度邊度比嘅,抱著見識心態,自然有所體會!

搭番尾班車返昆明(7:20pm),差唔多成十點先到酒店,好肚餓,唔使怕,酒店對面就係祥雲美食城,超方便,平民大排檔,絕對平靚正之選
環境整潔企理,幾夠光猛
環境整潔企理,幾夠光猛
烚蛋、煮南瓜、粟米、炒青豆
烚蛋、煮南瓜、粟米、炒青豆
煎火腿腸仔、炒椰菜菜心
煎火腿腸仔、炒椰菜菜心
油炸鬼、自助米線
油炸鬼、自助米線
餐包、蛋糕仔、西瓜
餐包、蛋糕仔、西瓜
原本無打算晌酒店食早餐,因為本身唔係完全免費,雖然我哋住家庭三人房,但只送一個早餐,有時啲「國策」真係古怪。結果都係晌番酒店食,除咗費事出去周圍搵之外,落過酒店餐廳望望,雖然地方唔太大,廿零三十個位左右,但都整潔企理唔樣衰,難得一個自助早餐賣RMB15,我哋三個人,只需補番兩個人錢,咁就唔使煩喇,所以就幫襯吓佢。

自助早餐賣個RMB15,究竟有咩食?靠牆長枱一字排開,有咩食一眼見晒仲數得出:烚蛋、煮南瓜、粟米、炒青豆、煎火腿腸仔、炒椰菜菜心、油炸鬼、米線、蒸菜肉包、餐包、蛋糕仔、西瓜,再配咖茶、橙汁、豆漿任斟。話好唔好,話差又唔係好差,咁嘅價,你仲想點

有時做人嘅嘢,好又一餐,唔好又一餐。至於今餐……OK嘅,至少比我晌內地三線細縣城嘅酒店好,啲嘢唔太齣,油少少就走唔甩架啦,況且啲菜肉包同粟米又幾好食。依啲酒店仔嘅橙汁飲唔過,通常仲係晌搵粉開嘅年代,飲豆漿就應該味道有保證啲!
每人消費: 約15人民幣元 (早餐)
評分: 味道3   服務3   環境3   衛生3   抵食3
「疊虹橋景區」介紹圖
「疊虹橋景區」介紹圖
蔭翠峽,要幫手扒船仔
蔭翠峽,要幫手扒船仔
密集飽滿囓鐘乳石洞
密集飽滿囓鐘乳石洞
錯綜複雜嘅伏流
錯綜複雜嘅伏流
雌雄雙瀑
雌雄雙瀑
神田
神田
險峻山谷索道
險峻山谷索道

九鄉風景區就唔詳細晌度寫,因為有網址,上網大把資料慢慢睇啦,簡單講幾句當開場白。俗語有話:地上看石林,地下游九鄉;石林之美在於峰,九鄉之美在於穀。原來,九鄉風景名勝區共有六大景區,即係現已建成開放嘅「疊虹橋景區」和擬將建設嘅「三腳洞景區」、「大沙壩景區」、「馬蹄灣景區」、「阿路龍景區」、「馬蹄河景區」。話「擬將」,但就唔知係幾時嘅事。而已開發嘅「疊虹橋景區」,景域多達10多處:峽谷旅遊觀光電梯、蔭翠峽、驚魂峽、古河穿洞、疊虹橋、雄獅廳、仙人洞、雌雄雙瀑、神田、林蔭寨、蝙蝠洞和旅遊索道

不過,點都要寫寫對依個國家AAAA級旅遊區景點有咩感受嘅。個人建議,輕鬆咁行,預留3小時遊晒成個疊虹橋景區已夠晒。晌九鄉,你會睇到洞中有洞,洞中有河,洞中有天。九鄉嘅地底真係個充滿神秘嘅世界,有奇形怪狀嘅岩石、錯綜複雜嘅伏流、深邃黑暗嘅峽谷、滂沱氣勢嘅瀑布、千姿百態嘅鐘乳石、險峻山谷索道……等等,唔止景觀多樣化,類型齊全,區區有特色,謀殺咗唔少記憶卡位置。而且溶洞群量大體宏,好似洞中啲鐘乳石咁,密集飽滿,真係可以用琳琅滿目嚟形容;再者,難得係景觀夠集中,單程路兜一圈就睇晒咁多景域,唔使轉左轉右周圍搵,或者要走返回頭路咁嘥時間。

一個九鄉風景區,就殺咗成差唔多三百張相,我都已經唔算係龍友,所以鍾意影相嘅朋友就需要再預多少少時間。此外,俾多兩個溫馨提示:第一,離開林蔭寨,進入蝙蝠洞時,因為係行程尾聲,開始上番山,數百級樓梯等住你,好多轎夫兇你有排行,會好辛苦,但唔好被佢拋到,搭級而上,有好多影相位,唔覺唔覺就行到上出口!第二,跟住要坐索道一程過返到去風景區起點,畏高嘅朋友就有啲麻煩,因為索道跨越個小山谷,風景幾正,但風大加上離地十幾廿層樓高,真係令人有啲怯懦。唔坐索道有無路返去,我估有啩!

仲有多個慳錢溫馨提示,國內嘅同程網 (http://www.17u.cn/),可以預訂九鄉門票原價RMB120,依家減至RMB105元,最好就係佢唔使俾錢先,費用都係景區現付。不過,預訂之後,佢會發短訊去你手機,到景區以短訊對認,因為小弟有內地手機號碼,如果只提供香港號碼,恐怕用唔著依個著數喇!

參觀時段: 下午
入場價錢: 每人120人民幣元
評分: 值得去5  
店外掛住好多烤鴨,仲邊烤邊賣
店外掛住好多烤鴨,仲邊烤邊賣
環境地踎少少都係必然
環境地踎少少都係必然
依個就係宜良烤鴨
依個就係宜良烤鴨
因為失晒預算,花晌交通時間上超晒標,所以去完九鄉返番宜良縣城都成6:00pm,問過尾個幾班車返昆明有:7:00,7:10, 7:20pm,不過搞笑係唔可以買預售車飛,佢哋興即買即走,個工作人員話你想搭邊班,到時嚟貫飛就得架喇。計計數仲有成個鐘,所以就晌附近搵間小店一嚐宜良烤鴨。問咗當地人,晌車站附近步行10min左右有一間小店,即刻動身搵食

未食前,睇睇書中介紹:宜良烤鴨別具一格,製作考究,將“湯褪”乾淨的鴨,從腋下開洞,剔棄內臟和腳爪,配以佐料,在鴨的皮肉間吹氣,把鴨身吹鼓,再用鐵絲鉤吊住鴨脖將鴨掛於爐壁內側慢慢燒烤。烘烤時,以松毛結為燃料,待其燃到煙盡,適時翻轉鴨身,塗沫蜂蜜水、豬油和鴨唷撲於表皮。這樣烤出的鴨,皮黃脆不焦,肉酥鬆軟,甜嫩離骨,色鮮味美,香氣四溢,非常可口。

好快搵到「花園烤鴨食堂」,即點一隻烤鴨當「下下下午茶」,原來有分本地同外地兩種:本地就宜良養嘅,細隻啲,肉質細嫩,食味香甜;外地只係指非宜良養嘅,一般都大隻啲又肥啲,油脂較多,肉質老香。我哋點咗前者,配以蔥白、花椒鹽或烤鴨醬同食,算唔上有咩大驚喜,但風味唔錯,肉質都OK,有鴨香,總算見識見識過!由於來去匆匆,都無時間攞間食店嘅資料,好多資料不詳請見諒!

隨後為穩陣起見,預早少少去車站,本預算搭7:10pm尾二班車,我哋已經7:00pm就到咗車站買飛,佢哋話7:10pm班車買晒喇,依家啱啱買緊7:20pm尾班車,嘩,晌大陸確係咩嘢都要預鬆啲,唔係就出事,尤其晌依啲細縣仔,無車返昆明我都唔知點搞
每人消費: 約10人民幣元 (下午茶)
評分: 味道3   服務3   環境3   衛生2   抵食4
祥雲美食城環境
祥雲美食城環境
竹筒野生菌湯
竹筒野生菌湯
炒魷魚
炒魷魚
涮菜盤
涮菜盤
乾燒豆腐
乾燒豆腐
飲品,RMB6-8杯
飲品,RMB6-8杯
風塵僕僕返到昆明,不假思索,就係去所住嘅酒店對面「祥雲美食城」搵食,時為差唔多10點咁滯,好肚餓。祥雲美食城係將在南屏電影院周邊火爆多年嘅小食店匯聚一起,係昆明最集中嘅小食城。晌度有好多選擇,形式就如美食廣場,有小炒、有老昆明風味、有緬泰風味、更唔少得傣族、白族等民族風味小食

一口氣點咗幾樣嘢,竹筒野生菌湯、炒魷魚、涮菜盤、乾燒豆腐,共銀RMB113,很抵食,再加3杯嘢飲,共銀RMB22。

- 竹筒野生菌湯,全晚最啱食又最欣賞嘅一道菜,除咗因為味道清香,仲有好多野生菌,撈整都有咁。
- 炒魷魚,其實佢都好惹味,只係估唔到佢咁辣,靠老婆頂咗大半碟。
- 涮菜盤,本身係一串串蔬菜或肉丸,你晌攤子揀好俾老闆涮兩涮就係架啦,再淋啲辣汁。服務員醒目,辣汁另上。
- 乾燒豆腐,麻麻哋,又乾又嚡!
- 木瓜牛奶RMB8,果汁,果汁牛奶,蔬果汁、沙冰……等等都係RMB6-8,用料足喎,好飲!
- 綠豆汁RMB6,味道幾得意,果然係好綠豆。
推介菜式: 竹筒野生菌湯
每人消費: 約45人民幣元 (晚餐)
評分: 味道4   服務3   環境3   衛生2   抵食4
  0 個留言    |  加入你的留言
雲南省東遊記.羅平油菜花海 (中國)
(旅程日期: 2011-03-19 至 2011-03-25 ,  旅程性質: 觀光攝影, 消閒度假)
 整個旅程  (共7篇遊記)
 分享至Facebook 
發表日期: 2011-05-17
大概七、八年前,由於工作關係去過一轉昆明,但只係工作,未有周圍逛,所以對此地無乜印象。今趟自由行再嚟,「感受」到大西北發展果然迅速,另一方面,去咗睇唔同自然景觀,絕對值得一遊。其實,依次行程主打係去羅平縣睇油菜花,但昆明作為對外口岸,自不然順道遊覽。大致行程如下:
Day 1 – 昆明(雲南省博物館,金馬碧雞坊)
Day 2 – 昆明(九鄉風景區)
Day 3 – 羅平(螺絲田油菜花田)
Day 4 – 羅平(金雞峰叢油菜花田,九龍瀑布,多依河)
Day 5 – 昆明(雲南民族村)
Day 6 – 昆明(石林風景區,雲南大學,翠湖公園)
Day 7 – 昆明(昆明動物園)

中午12:00機,所以唔使咁趕,由香港直飛,2.5鐘機程就到達昆明巫家霸國際機場,而由機場落市中心,都係廿多分鐘車程,車費二、三十蚊人仔。不過,等吓行李,搞吓搞吓,去到酒店都成四點鐘!頭兩晚晌昆明住,雲上四季快捷酒店,國內連鎖式酒店,平靚正,位處市中心,我哋一行三人(我、太太、舊同事),三人房都係RMB249,不過只包一份自助早餐,真騎尼

安頓好之後,立即出發市內遊!首站去雲南省博物館,書寫去到7:00pm,點知4:45pm去到,話5:00pm閂門,4:30pm已經截止入場,即係摸門釘,依個係發展迅速嘅第一個「感受」。跟住提早下一個景點,昆明地標「金馬碧雞坊」,同埋附近嘅昆明老街,依區確係幾旺,感覺好似去完尖咀,再落佐敦。

晚餐返番去金馬碧雞坊旁,因為多嘢食,晌雲南嘅第一餐,梗係試試地道嘅過橋米線,所以揀咗「江氏兄弟橋香園」,見佢人氣夠旺,有信心嘛!食完行返酒店,都係20min腳程,所以間酒店真係幾方便。
酒店外觀
酒店外觀
迷你大堂
迷你大堂
酒店樓層通道,幾新淨
酒店樓層通道,幾新淨
三人家庭房,一張單人床,一張雙人床
三人家庭房,一張單人床,一張雙人床
 晚上,從酒店望出嘅街景
晚上,從酒店望出嘅街景
大陸好多中下價連鎖式酒店,而雲上四季酒店品牌屬商務酒店,主要紮根晌雲南省,而依間寶善店地處市中心商業繁華地區,距機場5公里,打得廿零蚊人仔搞掂,約20分鐘車程。附近就有景店金馬碧雞坊、南屏步行街、昆明老街(珠寶花鳥市場),而斜對面就係祥雲美食城,周邊又有啲大型商場,作為第一日落腳點,真係超方便。昆明依家未有地鐵,不過舊年初已在興建中,聽當地人講大概2012年尾左右通車,到時去可能仲方便,不過,市內景點集中唔太遠,三幾個人下下打的都唔太貴!

大堂細細,服務員幾好笑容幾好禮,客房樓層通道新淨無異味。入到房間,基本設備都有,每間房配備液晶電視及高速寬頻,如果無帶私人電腦嚟,大堂都有部,不過都頗慢吓!如要風筒就要問大堂借,退房先還。

我哋訂嘅係三人家庭房 ,一張單人床加一張雙人床,每晚都係RMB249,認真抵住,最緊要都係乾淨企理,瞓得安心啫。不過,最搞嘢係辛盆隔離裝有一個中央直飲水系統,話可以直接飲用,但我哋都係用房內個電熱水壺煲煲穩陣啲。
每晚價錢: 249人民幣元 (三人房)
其他消費: 自助早餐RMB15位
評分: 設備3   服務3   環境3   衛生4   抵住4
平民烤餅 笑臉2011-05-17
麥琪香烤餅
麥琪香烤餅
價錢平民化
價錢平民化
紅薯餅RMB1.5
紅薯餅RMB1.5
香菇餅RMB2
香菇餅RMB2
晌酒店一落樓下對出條大街「寶善街」又真係幾旺,兩旁好多商鋪,車水馬龍,正正街口位就見到依家小店好多人嗡埋去,原來係賣烤餅,平民嘅烤餅,因為價錢都係RMB1.5-2一件就有交易,熱豆漿亦係RMB2杯!

除咗晌機食咗個晏,大家都有少少肚空空,天氣又有啲寒,所以就各一整番件烤餅tea一tea先。烤餅共有10多款,例如牛肉、肉鬆、蔥油、豆沙、香芋……等等,輪住新鮮出爐,未有貨嘅,你會見到窗口上個款烤餅嘅竹牌反轉。我同舊同事各要一件紅薯餅、太太就要香菇餅,加多杯熱豆漿暖胃。

紅薯餅RMB1.5
餅皮包住紅蕃薯,熱辣辣,餅皮鬆化,紅蕃薯蓉都幾多,又富蕃薯香。

香菇餅RMB2
同樣新鮮熱辣,餅皮下填滿香菇粒,雖未至菇香撲鼻咁誇,但味道都好唔錯。
推介菜式: 紅薯餅, 熱豆漿
每人消費: 約3人民幣元 (下午茶)
評分: 味道4   服務3   環境3   衛生4   抵食5
昆明版廟街 哭臉2011-05-17
昆明老街?
昆明老街?
「老街」內所擺賣嘅手工藝品
「老街」內所擺賣嘅手工藝品
穿過市場所見嘅破落民房
穿過市場所見嘅破落民房
破爛房子,仍繼續做生意。
破爛房子,仍繼續做生意。
老街風情 - 老居民晌門外打麻雀耍樂
老街風情 - 老居民晌門外打麻雀耍樂
晌雲南省博物館斜對面有個「珠寶花鳥市場」,亦即係「昆明老街」,聽個名以為好有古舊情懷,載有昆明歷史嘅地方,但係入到去原來係個普通市場仔,賣吓手信、工藝品、珠寶、玉石,簡直就係昆明版廟街

反而,穿過市場走到景星街個邊,倒先有啲老街風情,破破落落嘅紅磚青瓦、矮矮民房、邊批邊賣馬蹄嘅小販、街邊小食燒豆腐乾、老居民晌門外打麻雀耍樂……一幅幅老區景象,算係最能體現「老街風情」嘅象徵喇!不過,暫時所見,都好似整頓咁,有啲地方拆卸緊,處處地盆,可能過多一、兩年依啲老街風情都無埋!

個人點評:順路行過一睇無妨,「專燈」去搵就好無謂!
參觀時段: 下午
入場價錢: 每人0人民幣元
評分: 值得去1  
金碧廣場
金碧廣場
對面嘅柏聯廣場有間大百佳,方便入貨。
對面嘅柏聯廣場有間大百佳,方便入貨。
金馬碧雞坊 - 近黃昏景
金馬碧雞坊 - 近黃昏景
金馬碧雞坊 - 夜景
金馬碧雞坊 - 夜景

金馬碧雞坊就好似我哋嘅金紫荊咁,一個出名地標牌坊,高12米,寬18米,具有昆明民俗特色,雕樑畫棟,確係幾精美細膩,東坊臨金馬山而名為金馬坊,西坊靠壁雞山而名為碧雞坊;其實,向北遠少少仲有個“忠愛坊”,合稱“品字三坊”,成為昆明鬧市勝景。

另一個出名嘅地方,係「金碧交輝」,據說每60年兩坊會出現一次嘅奇景,農曆8月15日中秋節,下午5、6點左右,太陽將落未落,金光餘輝從西邊照射碧雞坊,佢嘅倒影投到東面街上;同時,月亮則啱啱從東方升起,銀色光芒從東面照射金馬坊,將佢嘅倒影投到西邊街上;兩個牌坊嘅影子漸移漸近,最後會互相交接。隨後,日落月升,交輝奇景逐步消失!據說,由於地球、月亮、太陽運轉嘅軌跡關係,咁嘅奇景要60年先有一次。反映出遠古雲南民族把數學、天文學同建築學結合埋一齊嘅高度智慧。

不過,乜都無喇,金馬碧雞坊因為文革動亂被拆毀晒,晌1997年在改造擴寬金碧路時,先決定同時重建「金馬碧雞坊」,1999年至建成開放,仲定為昆明市徽。我估「金碧交輝」個奇景都無架喇,取而代之嘅係,周圍發展蓬勃,金碧廣場周邊,起咗好多大型商場同食店,熱鬧非常,我哋住晌附近,所以夜晚唔憂無地方逛

參觀時段: 下午
入場價錢: 每人0人民幣元
評分: 值得去4  
江氏兄弟橋香園
江氏兄弟橋香園
門口有個價錢牌,一目了然
門口有個價錢牌,一目了然
雅座位,有啲民族表演
雅座位,有啲民族表演
大堂位,似粉麵店咁
大堂位,似粉麵店咁
溫馨提示:碗裡的湯非常燙!
溫馨提示:碗裡的湯非常燙!
進士過橋套餐、狀元山珍過橋套餐
進士過橋套餐、狀元山珍過橋套餐
撈咗生料後嘅過橋米線
撈咗生料後嘅過橋米線
涼拌三味:豆腐絲、蓮藕片、海帶,幾辣下!
涼拌三味:豆腐絲、蓮藕片、海帶,幾辣下!

有20多年歷史嘅「江氏兄弟橋香園」,雖然唔係話好老字號,但20多年屹立不倒,仲直營店、加盟店晌大陸唔同地方一間接一間咁開,依兩兄弟雲南蒙自人江勇、江俊真係唔簡單呀!雖然周圍都有,但策略上佢哋晌雲南省內係唔開放加盟店,換句話講,即係雲南省內全部都係直營店,而且佢哋晌昆明市西郊有個4000平方米嘅原料配送中心,暫時嚟講係同行中規模最大,所以,晌雲南省內嘅橋香園,相信質素有保證

橋香園屬餐飲連鎖店,走大眾化路線,好似我哋食開嘅譚仔咁,一般嚟講價格唔貴,當然,唔同檔次嘅過橋米線套餐系列滿足番唔同消費者嘅需求。

先講環境,得地下一層,入門左邊有「雅座」,枱凳靚啲,又有啲開放式小個室,不時有啲民族歌舞表演;另一邊右面「大堂位」,似粉麵店咁。不過,基本上係自助形式,買票排隊攞,坐晌邊都得,但你亦可以買票後,搵個靚位先,再將票俾服務員代勞都得

食物分4類:「過橋類」,即過橋米線套餐;「煮品類」,即係一碗過放好曬餸料嘅米線;「鹵菜類」,如鹵豬尾、鹵豬耳、涼拌黃瓜……之類小食;「名小吃」,如紅油血旺、三七汽鍋雞……等等,叫有特色少少。

過橋米線套餐,一共有7款,有平有貴,當然越貴越多料啦:
秀才過橋套餐RMB10
滇味肥牛過橋套餐 RMB12
舉人過橋套餐 RMB15
金牌肥牛過橋套餐 RMB18
海鮮過橋米線RMB20
進士過橋套餐RMB29(包一盅三七汽鍋雞RMB9)
狀元山珍過橋套餐RMB58(包一盅三七汽鍋雞RMB9)

我哋揀咗最貴嘅「進士」同「狀元」,果然幾有氣勢,一大碗滾燙雞湯,面層泛油,一小碟疊一小碟生料,係靠啲燙湯整熟,我哋掛住係咁影相,個服務員都「睇唔過眼」提我哋快啲落生料,哈哈。另外,仲有一大碟裝住好多隻碟仔,係伴米線小食,不過隻生蛋就應該係用嚟撈勻生料嘅,我哋搞笑咁事後補落番啲湯度!米線本身熟嘅,事後慢慢落都未遲,而且份量非常多,我哋三個人,叫兩個過橋套餐,飽到上頂呀!加上餸料新鮮、湯燙味美、米線滑溜,真係好滋味。而三七汽鍋雞雖然細細盅,但完全係精華,雞肉細嫩、湯汁鮮美,三七屬名貴藥材,滋補強身,之不過賣RMB9盅,令我有少少懷疑啫。

鹵菜類可以隨意配搭,結果揀咗涼拌豆腐絲、涼拌藕片同涼拌海帶,成碟都係RMB7,非常抵食,不過頗為辣,小弟唔嗜辣,但都輕嚐一吓。

推介菜式: 橋米線套餐
每人消費: 約30人民幣元 (晚餐)
評分: 味道4   服務4   環境4   衛生4   抵食4
  0 個留言    |  加入你的留言
台南高雄墾丁自在遊 (台灣)
(旅程日期: 2010-08-30 至 2010-09-04 ,  旅程性質: 觀光攝影, 生態探險, 飲食購物, 消閒度假)
 整個旅程  (共6篇遊記)
 分享至Facebook 
發表日期: 2011-05-15

尋日比較hea,早睡故然早起,今朝要早啲起身都係有原因,因為報名參加咗恆春半島半日遊(東海岸線)。首先,係食番個豐富嘅早餐先,因為酒店包咗自助早餐,當然要食飽飽啦,如果住民宿早餐就可能簡單一啲喇!

屏東客運(http://www.ptbus.com.tw)有搞恆春半島觀光巴士團,好似我依啲唔識揸車,景點咁散又無公車到,得兩個人包車唔划算,跟本地團就乜都解決晒,報團好方便,早一日搵酒店或民宿代辦就OK,到時先俾錢,又包埋來回接送、導遊解說、部份門券,真係一條龍,唔使煩

觀光巴士團分為:
1. 恆春半島東海岸線(TWD450)08:00各飯店接駁-12:00返回各飯店
恆春-出火-港口吊橋-龍磐公園-鵝鑾鼻-貝殼砂島-船帆石(包鵝鑾鼻門票、吊橋門票)
2. 恆春半島西海岸線(TWD350)13:30各飯店接駁-18:00返回各飯店
恆春-海生館-貓鼻頭-關山日落(唔包海生館門票)
3. 恆春半島全島遊線(TWD1,100)
東海岸 + 西海岸 + 恆春風味餐
4. 古城溫泉巡禮行程(TWD1,000)16:00各飯店接駁-21:00返回各飯店
恆春-古城東門-福安宮-四重溪溫泉(南台灣飯店)(包溫泉風味餐、泡湯費用)
多種選擇,悉隨尊便!

晏晝就晌恆春古城自由行、隨意兜、亂咁行,話晒古城唔係好大。行到中山路(恆春老街)突然落大雨,勁大,就好隨意搵咗間小店食晏兼避雨。

四點幾,行到又有啲餓,就去咗小杜包子食包當下午茶,依檔嘢係之前撞到啲香港人介紹,去到果然好旺,包子亦好有特色,絕對要試

之後返墾丁大街,逛入大街小巷,睇吓啲特色民宿,外觀裝修幾盞鬼。然後再行遠啲,參觀埋凱撒大飯店同福華渡假飯店,睇吓有幾豪!

傍晚返酒店竭一竭,夜啲先落墾丁大街搵食。因為今晚無晒雨,檔口開多咗,遊客亦都多咗,我哋都飽肚而歸!

餐廳環境寬敞
餐廳環境寬敞
自助西式組合
自助西式組合
自助中式組合
自助中式組合
雖則話早餐食得豐富啲,質素就不過不失啦。「海洋風味餐廳」晌酒店大堂直入位置,地方都幾大,全部都係圓枱,查實佢係間中餐廳,朝早擺自助餐,其餘時間就提供「墾丁風味餐」,10人一圍又得,兩個人嘅「墾丁雙人風味套餐」都得!

自助早餐裡,食物中西式都有,不過係大路嘢,沙律、烘多士、火腿腸仔、生果、白粥、多款醃菜、醬油豆腐、擔仔麵、幾款熱盤、奶茶咖啡凍橙汁,咁就已經寫晒有咩食喇,所以,款式唔太多,但要食得飽飽相信無問題。不過,諗番起平日趕返工食早餐嘅情景,咁依餐都算叫做嘆架啦,哈哈!
每人消費: 約0新台幣 (早餐)
評分: 味道3   服務3   環境3   衛生4   抵食3
出火.死火 笑臉2011-05-15
由停車場落咗樓梯,見一個又一個水氹,已知賴嘢!
由停車場落咗樓梯,見一個又一個水氹,已知賴嘢!
依個就係狂風大雨後嘅出火喇
依個就係狂風大雨後嘅出火喇
積水真係多到變咗個小池塘架!@@
積水真係多到變咗個小池塘架!@@
地底下嘅天然氣變唔出火,就唯有變做一炷炷氣泡啦。
地底下嘅天然氣變唔出火,就唯有變做一炷炷氣泡啦。
由墾丁大街出發,穿過恆春古城,觀光巴士團嘅第一站就係著名嘅大自然奇觀「出火」,所謂出火係由於地底下自岩層裂縫溢出嘅天然氣燃燒嘅景象,全台只有墾丁依度有,睇旅遊書都知夜晚嚟睇嘅視察效果最正,但跟團就無得揀喇

更無得揀係遇正打風落雨囉,尋日到步墾丁已經未停過雨,所以晌車上阿導遊小姐已經講定今朝都未必睇到個「出火」會出火,果然,唔只死晒火,仲積水多到變咗個小池塘呀!唯一認証依個奇觀,就只有「池塘」中不斷湧出嘅微弱氣泡囉

所以,我手揸本旅遊書「第一次自遊行Easy Go!墾丁南台灣P.42」(誇版生活出版)對出火寫過段咁嘅介紹:「從地上冒出的火焰就算在雨天時也不會熄滅,當地的朋友說,就連颱風也撲不掉哩!」,基本上都唔太信架喇,而依次嘅親身經歷可以敢講,佢都係吹水囉
參觀時段: 早上
入場價錢: 每人0新台幣
評分: 值得去5  
晌停車場望去吊橋
晌停車場望去吊橋
吊橋嘅入口位
吊橋嘅入口位
由入口位直望吊橋
由入口位直望吊橋
橋中望出太平洋
橋中望出太平洋
從橋尾望返轉頭
從橋尾望返轉頭
附近賣茶葉嘅鋪頭
附近賣茶葉嘅鋪頭
港口吊橋近在茶山,又叫「茶山吊橋」,港口吊橋停車場附近都有啲賣茶葉嘅鋪頭。白色橋墩,紅色鋼索嘅大橋,係日治時代嘅產物,紅白對襯,非常搶眼。橋嘅另一邊係個私人椰子園,行到橋尾都可以望到。而行到橋中,望出去嘅大海就係太平洋,一望無際呀,只可惜今日天氣差,一空都係灰濛濛,大剎風景
參觀時段: 早上
入場價錢: 每人10新台幣
評分: 值得去4  
吹水莫吹砂 哭臉2011-05-15
展牌介紹
展牌介紹
觀景位旁較大面積嘅砂丘
觀景位旁較大面積嘅砂丘
觀景位側邊嘅「砂崖」
觀景位側邊嘅「砂崖」
觀景位望去另一邊景色
觀景位望去另一邊景色
再望遠啲,都係啡啡綠綠,又砂又草嘅景色
再望遠啲,都係啡啡綠綠,又砂又草嘅景色
唯一睇到沙粒由沙灘吹上公路嘅「証據」
唯一睇到沙粒由沙灘吹上公路嘅「証據」
據聞風吹砂係南台灣超出名嘅景點,因為景觀獨特,砂河、砂瀑、砂丘…等珍貴風蝕地形景觀,成因係源於東北季候風將沙粒沿山坡吹向崖頂,沙粒積晌內位形成砂瀑,一片沙漠風情

聽落好似幾正,親身去到睇一睇,沙漠風情就無喇,荒漠一片就幾貼切,因為一片「沙漠」唔係好大,一啲壯觀感都無,而且雜草叢生,成個灘啡啡綠綠,除咗有啲砂丘,真係好難幻想到佢仲有砂河同砂瀑,更感受唔到佢係一大片沙漠,覺得個景係「吹水」多過吹砂囉!或者,真係需要遇到有番咁上下強嘅東北季候,先至有啲野睇。
參觀時段: 早上
入場價錢: 每人0新台幣
評分: 值得去2  
入園無耐,去燈塔前途經一片草原,幾有東南亞感覺!
入園無耐,去燈塔前途經一片草原,幾有東南亞感覺!
鵝鑾鼻燈塔
鵝鑾鼻燈塔
鵝鑾鼻燈塔嘅近鏡
鵝鑾鼻燈塔嘅近鏡
晌燈塔另一邊草地,就係對住太平洋,可惜今日天氣比較差!
晌燈塔另一邊草地,就係對住太平洋,可惜今日天氣比較差!
鵝鑾鼻燈塔旁嘅小博物館,有全景模型
鵝鑾鼻燈塔旁嘅小博物館,有全景模型
燈塔手信,幾別緻,不妨買個留念
燈塔手信,幾別緻,不妨買個留念
燈塔手信
燈塔手信
因為跟巴士團關係,鵝鑾鼻公園已經係我哋晌台灣最南嘅「最南點」,但實際上墾丁就真係有個叫「最南點」嘅景點,巴士行程無安排去啫,佢就名正言順台灣嘅最南點喇,依家,我哋唯有睇住個A貨先啦

導遊介紹,問知唔知點解叫「鵝鑾鼻」,佢話曾經有人以為同奧運有關,「鵝鑾鼻」係Olympic嘅譯音,哈哈,美麗嘅誤會。「鵝鑾」係台灣某少數民族話,意思係「帆」,因為附近有塊出名嘅船帆石,故取其名;而依度形態如突鼻,所以就叫做「鵝鑾鼻」。

因為鵝鑾鼻公園唔算好大,當中又分咗幾條步道,長短隨意,就好似嚟個小遠足咁!一入園,好多草地,又種咗好多熱帶植物,好有東南亞風情。沿主步道走上啲,好快見到燈塔,一抹全白,晌今日灰濛濛嘅天色,燈塔就更突出。站在高地,又可以見到太平洋嘅景色,好靚廣闊嘅海景,係可惜在無蔚藍嘅天空幫吓手襯托。燈塔內又有個小型博物館,介紹吓鵝鑾鼻燈塔嘅歷史,以及曾以此為主題所發行過嘅郵票,及一啲燈塔模型。假如想「拎走」個燈塔,旁邊嘅特產店就有好多燈塔嘅手信,例如用砂石貝殼砌嘅燈塔、名信片、木刻書簽……等。真係值得花一、兩小時嚟行吓!仲有,好鍾意鵝鑾鼻介紹牌對下嘅幾句小語:「除了足跡,什麼都不留;除了攝影,什麼都不取。」到大自然地方旅遊應有嘅心態!
參觀時段: 早上
入場價錢: 每人40新台幣
其他消費: 鵝鑾鼻貝殼燈塔, 鵝鑾鼻燈塔木刻書簽
評分: 值得去4  
貝殼之砂 笑臉2011-05-15
貝殼砂展示館外嘅觀景平台,可觀賞砂島沙灘全貌及海天一色嘅景緻!
貝殼砂展示館外嘅觀景平台,可觀賞砂島沙灘全貌及海天一色嘅景緻!
砂島周邊植物介紹
砂島周邊植物介紹
砂島貝殼砂展示館
砂島貝殼砂展示館
展示館內部
展示館內部
展示館部份展品
展示館部份展品
各灘含貝殼砂量
各灘含貝殼砂量
砂島嘅貝殼砂含量
砂島嘅貝殼砂含量
展館內嘅小型貝殼砂池,可隨意摸!
展館內嘅小型貝殼砂池,可隨意摸!
砂島沙灘係墾丁國家公園中面積最細嘅生態保護區,亦係台灣僅有嘅一處沙灘,仲係未經墾丁國家公園管理處許可不得進入嘅地方。貝殼砂係墾丁國家公園內各沙灘中嘅主要組成物質,貝殼、珊瑚等長期受海浪沖刷、研磨所造成嘅細砂堆積晌灣內,依啲細砂就叫做貝殼砂,如果透過放大鏡下觀察,粒粒晶瑩剔透、色澤亮麗。而砂島沙灘含貝殼砂量高達98%,而帆船石附近嘅沙灘都有近70%,風吹砂就47%左右……

咁點算?好彩晌砂島沙灘旁有個「貝類砂展示館」,對外開放介紹砂島生態,主要介紹吓砂島地形、貝殼砂成因及展示吓各灘含貝殼砂量、利用顯微鏡、放大鏡對貝殼砂更細微嘅觀察,仲有一個小型貝殼砂池,等遊客可以摸一摸,睇一睇。由於展示館地方唔大,唔晒花太多時間就遊完,資訊都幾全面,都值得一遊

雖然唔可以落灘,但展示館對海一邊,設有一個觀景平台,等大家都可以觀賞到全長約220M砂島沙灘全貌及海天一色嘅景緻,感覺幾令人舒暢
參觀時段: 早上
入場價錢: 每人0新台幣
評分: 值得去4  
好煩唔帆 ok喇2011-05-15
船帆石介紹板
船帆石介紹板
觀景位遠望船帆石
觀景位遠望船帆石
船帆石對開一列民宿,外觀設計幾特別!
船帆石對開一列民宿,外觀設計幾特別!
船帆石,顧名思義,都唔使點解釋,船帆石高18M,不過,小弟近望定遠眺,都唔係話好似即將開動嘅帆船咁,俾2星佢,都係因為晌船帆石附近有一列民宿,外觀設計幾特別,各間都別出心裁。順帶一提,離船帆石唔遠嘅船帆石沙灘,有好多水上活動玩!
參觀時段: 早上
入場價錢: 每人0新台幣
評分: 值得去2  
小店門面
小店門面
街坊格局
街坊格局
叫咗4樣嘢,盛惠TWD135,抵食!
叫咗4樣嘢,盛惠TWD135,抵食!
大焢肉飯TWD40(前)、白滷菜TWD20(後)
大焢肉飯TWD40(前)、白滷菜TWD20(後)
滷蛋TWD10隻
滷蛋TWD10隻
虱目魚條粥TWD55
虱目魚條粥TWD55
之前晌台南嘅周氐蝦捲試過虱目魚丸湯,今次,啱啱落雨落到澎澎聲,與其齋等雨停,不如邊食邊等,所以就入咗對面嘅「台南無刺虱目魚專賣店」。因為依餐當食晏,所以點多少少嘢,一共叫咗4樣嘢,盛惠TWD135,真抵食!

其實間嘢都算幾多選擇,有虱目魚、蚵仔、焢肉、肉燥,又有唔同煮法,就算虱目魚,亦有唔同部位,如虱目魚肚、虱目魚皮、虱目魚丸、虱目魚頭……等,加埋少少小食類,都OK喎。

大焢肉飯TWD40
第一次見焢肉,所以點個試試,焢肉其實係滷五花腩,就好似扣肉嘅厚切版。五花腩肉質夠晒腍,肥少少就一定,但好入味,配幾株滷筍干,白飯溝埋滷水汁,好味喎。

白滷菜TWD20
紹菜煮到爛咁滯,厚獻汁,味道係唔錯,不過質感麻麻!

滷蛋TWD10隻
睇色水就知滷得入味,直頭滷到入蛋黃,雖然咬落比較硬身啲,但係味道才是賣點。

虱目魚條粥TWD55
一如以往,虱目魚本身無乜味,靠湯頭,依度都叫OK啦,而所謂粥,其實係類似潮州粥或湯飯一類。
推介菜式: 焢肉飯
每人消費: 約70新台幣 (午餐)
評分: 味道4   服務4   環境3   衛生4   抵食4
入城「地標」,好有古圖風味!
入城「地標」,好有古圖風味!
恆春古城南門
恆春古城南門
阿嘉的家,海角七號場景之一!
阿嘉的家,海角七號場景之一!
恆春古城商圈
恆春古城商圈
特色嘅木屐鋪「木屐王」
特色嘅木屐鋪「木屐王」
恆春古城西門,又係海角七號場景之一!
恆春古城西門,又係海角七號場景之一!
恆春古城北門,可晌城牆上走一走。
恆春古城北門,可晌城牆上走一走。
路邊小食賣香腸,麻麻哋,因為超肥!
路邊小食賣香腸,麻麻哋,因為超肥!
古城自清光緒年間建成,都成百多年歷史,係國家二級古蹟,依家保留得比較完整嘅都係四個城門,同埋二大截城牆(中正路去到北門,再去到東門,至恆春國中完)。雖然天氣唔多好,細雨濛濛下,但我又幾鍾意恆春古城l喎,城門悠悠,環境寧靜,民風古樸,幾有種小鎮風情。雖然曾因電影「海角七號」掀起過一陣熱潮,但依刻又未有破壞小鎮安寧。

恆春古城確實幾好行,一東一西,一南一北,處處都有4個城門路標指示,無地圖都唔慌走失。除咗城門景點,其次,主通道嘅中正路,及隔離有恆春老街之稱嘅中山路,組成咗恆春古城魅力商圈,已包晒恆春大部份嘅特色餐飲、各種小食、伴手禮店鋪,非常方便

題外話,恆春原名「瑯嶠」,話說清同治年間,日本派大軍侵略,沈葆楨奏請朝廷晌度築牆註兵,佢見依度四季如春,就改名「恆春」
參觀時段: 下午
入場價錢: 每人0新台幣
評分: 值得去4  
招牌起司 笑臉2011-05-15
留意玻璃窗,竟有首小杜包子出爐歌,唔知點唱?
留意玻璃窗,竟有首小杜包子出爐歌,唔知點唱?
頭上有相有價錢,背後鋼櫃就係蒸好咗一盤盤嘅包
頭上有相有價錢,背後鋼櫃就係蒸好咗一盤盤嘅包
再入啲,就係整包工場,全開放,點睇點影相都得。
再入啲,就係整包工場,全開放,點睇點影相都得。
起司包
起司包
洋蔥烤肉包
洋蔥烤肉包
依間小店,係其他港客介紹,老闆小杜,花兩年研究做包子,中式包做基礎,不過同我哋飲茶食開嘅叉燒包唔同,佢啲包身應近似奶皇包一類,表面比較光滑,包肉唔太厚,同樣成個包鬆軟唔黐牙,而餡料有中又有西,有成10款選擇!同老婆各揀一款,坐晌店門口外嘅小凳,趁熱快嘆。

洋蔥烤肉包TWD40
包內夾有大量洋蔥炒豬肉絲,食落好濃郁胡椒香,而洋蔥鮮甜,確實豬肉絲比正常厚身,叫做有咬口,但感覺比較粗疏。

起司包TWD35
餡料就係得芝士一樣咁簡單,一定要趁熱即食,一咬開包身,連包帶芝士一扯,即時拉起幼幼長長嘅芝士,而芝士味濃香,真係好正。

仲見有一款麻糬泡芙包,個名睇落好神奇,望吓張樣辦相,真係包裡面係個芙包,芙包裡面係麻糬,麻糬帶有濃濃奶香,雖然無試,但幻想吓個包都覺得好搞嘢。

每人消費: 約40新台幣 (下午茶)
評分: 味道4   服務3   環境3   衛生4   抵食4
墾丁凱撒大飯店
墾丁凱撒大飯店
飯店正門口
飯店正門口
飯店大堂一角
飯店大堂一角
大堂酒吧
大堂酒吧
戶外泳池,椰林成蔭。
戶外泳池,椰林成蔭。
泳池嘅水質公佈
泳池嘅水質公佈
到處都係椰樹棕棕
到處都係椰樹棕棕
南洋櫸木步道
南洋櫸木步道

係外地,我哋都鍾意參觀吓一啲靚酒店,雖然未必會住,但去見識吓都無妨!今次晌墾丁,就去咗由墾丁大街行遠少少嘅墾丁凱撒大飯店,1986年落成,雖然都成廿幾年,但外觀都保持得唔錯,一入酒店,到處都充滿五星級水準,無論大堂裝修、酒吧、員工招待,都感受到確係一間五星水準大飯店。

穿過大堂,出面係峇里熱帶風情嘅渡假式環境,椰樹棕棕、戶外泳池、池畔南洋櫸木步道……好似我哋依啲街坊客,一樣歡迎參觀,員工永遠笑容滿面。雖然未有機會睇睇各類客房係點,但置身晌椰林樹下,感覺令人好閒適,下次再去墾丁,值得豪一晚嘅飯店!

每晚價錢: 0新台幣 (其他)
評分: 設備4   服務5   環境5   衛生5   抵住3
「無字頭」烤魷魚
「無字頭」烤魷魚
路邊烤魷魚
路邊烤魷魚
「墾丁阿勝」烤珍珠玉米
「墾丁阿勝」烤珍珠玉米
沙茶味烤珍珠玉米
沙茶味烤珍珠玉米
「扛棒」醬烤雞排
「扛棒」醬烤雞排
人氣王蜜汁醬雞排
人氣王蜜汁醬雞排
「青家」果汁吧
「青家」果汁吧
香蕉牛奶TWD50(前),紫蘇梅茶TWD30(後)
香蕉牛奶TWD50(前),紫蘇梅茶TWD30(後)
墾丁大街叫得做「恆春的不夜天」,相信絕非浪得虛名,之前一晚因天雨,墾丁大街著實過静,開嘅鋪唔多,遊客都少。今日唔同喇,除咗朝早,中午落過雨,跟住都收晒,所以,一入夜墾丁大街燈火通明,有賣各種手工藝品嘅特色小店,亦有各樣街頭小食,更有鬧哄哄嘈嘈貢嘅Pub,唔少得仲有不同國家菜系嘅餐廳。錯失第一晚,依晚定位清晰,就係「掃街」

「無字頭」烤魷魚
晌墾丁大街,依類烤魷魚小販隨處見,由街頭行到街尾,印象中都已經見過4檔,TWD100有3支,質素我估相差無幾。依檔睇落啲魷魚比較大隻,所以揀佢,有辣有唔辣,燒得香口又柔軟,可以成支揸住食,又可以叫老細剪件袋住食!

「墾丁阿勝」烤珍珠玉米
燒粟米好似得佢一檔,一條條粟米有保鮮紙包好唔會食晒塵,放晌檔前隨你揀,揀好俾阿勝拆袋放入自動烤爐燒,味道有沙茶或牛奶花生醬,每支只賣TWD40。試咗前者,粟米燒得香,外層卜卜脆,沙茶又係惹味嘢,正!

「扛棒」醬烤雞排
炸雞排係台灣小食界係名物之一,今晚都要試一試。雖然「扛棒」以醬烤為名,但實際佢都係炸一炸,再放上爐烤,搽上醬汁,再灑芝麻即成。味道有5款:扛棒蜜汁醬、美國黑胡椒醬、韓國辣醬、泰式酸辣醬、原味椒鹽粉,一律TWD60件。我哋揀咗人氣王嘅蜜汁醬,大大塊雞排為方便食用,已斬好一件件,雞排做到外脆內嫩,肉汁豐盈,蜜汁醬嗒落唔會過甜,添幾分蜜糖香。

「青家」果汁吧
食咗好幾樣燒烤油炸嘢,要降降溫先,搵嚟「青家」,無他嘅,一來老闆娘人靚聲甜,溫柔聲線唔刺耳,反而晌嘈雜嘅墾丁大街有另一種吸引力,二來佢個檔口光猛之餘,仲「十幾杯」蔬果曬晒冷咁擺晌度,確係有啲睇頭。叫咗兩杯,我要香蕉牛奶TWD50,太太要紫蘇梅茶TWD30,杯杯都係700ml,非常抵飲,而且真材實料,睇住佢整,味道濃郁,飲完一杯,爽晒!

跟住再掃,係度唔多講,實在好多嘢食。比起晌台北或高雄嘅夜市,依度好行啲,雖然小店、貝販係晌街兩旁,第一墾丁大街都幾闊落,其次,入夜行車唔多,所以無咁逼
每人消費: 約150新台幣 (晚餐)
評分: 味道4   服務3   環境3   衛生3   抵食4
  0 個留言    |  加入你的留言
雲南省東遊記.羅平油菜花海 (中國)
(旅程日期: 2011-03-19 至 2011-03-25 ,  旅程性質: 觀光攝影, 消閒度假)
 整個旅程  (共7篇遊記)
 分享至Facebook 
發表日期: 2011-05-03
因為要坐長途巴士去羅平縣,所以沒有刻意安排景點,一來唔想同行隊友太辛苦,二來無旅遊網可以訂羅平縣嘅酒店,甚至ctrip都無,之前晌其他網站搵到啲羅平縣酒店資料,點知全部都流嘅,一係打唔通,一係就話自己唔係酒店,唉!所以,依日行程有啲見步行步,去到當地先算!

今朝,先晌酒店斜對面嘅小店食菜肉煎包同蒸包做早餐,跟住輕鬆收拾行裝去東部汽車客運站,由昆明坐大巴要3.5hr先到羅平縣,RMB65位,全程高速公路,幾穩定。當進入羅平縣範圍,初初開始見到零星嘅油菜花田,跟住再見到一大幅一大幅油菜花田,高速咁駛過,已經覺得幾靚

2:30pm到咗羅平縣縣城,羅雄鎮,第一件事搵酒店落腳先啦,搵咗幾間,卒之搵咗間距離羅平汽車站唔遠嘅羅平大酒店,佢自己標三星,我哋就覺得二星差唔多,三人房RMB268一晚,唔包早,上房睇過叫做住得吓,反正預咗晌羅平都係住得麻麻,而且都係兩晚,所以就扑鎚成交!

一搞掂好啲行李,準備出發去玩,經酒店介紹咗個包車師傅,毛師傅,大家咁上下年紀,啱傾,又幾好人。因為都已經成3:30pm,唔可以去得太遠,所以只去另一邊嘅牛街螺絲田睇油菜花,車程半個鐘。

離開縣中心,向著田間出發,已見到周山周田都係油菜花,多都你唔信,晌北海道富良野睇著名七色花海,都只係用一大遍嚟形容,而依度嘅油菜花田,真係漫山遍野,睇唔到盡頭,啲油菜花又越過高山又越過谷,毛師傅話今年油菜花開得好,二月尾開始開花(花期約42日),全縣開咗成四十萬畂,四十萬畂有幾多?我都真係唔知!總之去到邊,就見到邊

晌高位睇完牛街螺絲田睇油菜花,就落咗去下面螺絲田睇,再入去田裡面睇,總之你想點睇,毛師傅都唔介意車我哋落去睇。所以,都搞到成五點幾先返番去縣城!

第一次嚟羅平,都唔知有咩好嘢食,旅遊書都無乜好介紹,所以搵咗毛師傅介紹,佢知我哋廣東人,偏清淡,唔嗜辣,所以介紹咗一間食竹笙雞鍋嘅小店俾我哋,果然好食啱口味!食完,再夜遊縣城,其實縣城主城區本身唔係好大,最旺嘅都係得條振興街,長度大概係太子行去旺角咁大把。所以,所謂夜遊縣城,其實係去當地超市逛吓,了解當地物價,買吓生果食,順路行返酒店啫!

有煎包、油炸鬼賣
有煎包、油炸鬼賣
內在環境
內在環境
煎包蒸包,都係十個賣RMB4!
煎包蒸包,都係十個賣RMB4!
素煎包
素煎包
蒸肉包
蒸肉包
寶華包子店晌酒店斜對面,第一朝經過見都算乾淨企理,所以就決定第二朝過嚟食。除位置方便,環境衛生以國內街邊小店嚟講,依間已經係幾OK,最吸引係個價位,煎包、蒸包都係十個RMB4,係咪抵到爛先。所以,眼見都好多當地人晌度食早餐。

我哋三個人叫咗一份煎包,一份蒸包,再加三杯甜豆漿(熱,RMB1.5杯),夾埋都係RMB12.5,食到好飽!煎包係素,蒸包係肉,食法各異,兩者味道都唔錯。總之就抵食啦!

每人消費: 約4人民幣元 (早餐)
評分: 味道4   服務2   環境3   衛生3   抵食5
大堂環境,好似幾好!
大堂環境,好似幾好!
客房樓層,走廊通道,實景有啲幽幽暗暗。
客房樓層,走廊通道,實景有啲幽幽暗暗。
一入門口單人床位,有「獨立」洗手盆,好搞嘢嘅設計!
一入門口單人床位,有「獨立」洗手盆,好搞嘢嘅設計!
「守門口」位嘅單人床
「守門口」位嘅單人床
再入大房嘅兩張單人床
再入大房嘅兩張單人床
電視、書枱、水機……等設施
電視、書枱、水機……等設施
由於依段時間都係睇油菜花嘅旺季,而羅平嘅旅遊資訊相對少,無論旅遊書抑或網上資料,都唔多準確,之前都有少少擔心去到羅平搵唔到地方住,所以一到羅平就第一時間搵酒店先!

符符碌碌,都搵到間距離羅平汽車客運站唔遠嘅羅平大酒店,行10min就到,雖話三星,大堂又幾呃得吓人,不過,查實都幾舊吓,房內設施真係好基本,十幾廿年前絕對稱得上係三星,不過,到依家就變咗又殘又舊喇!「鄉下」地方,我哋都預咗住宿會差少少,上去睇過個三人房,夠晒大,入門口有張單人床,就由小弟瞓,兼職「守門口」,再入另一個房,有電視、書枱同兩張單人床,就由兩位女士瞓,咁樣佢哋就夠晒安心。大家一致決定,可接受,又費事再周圍搵,就扑鎚晌度住兩晚,但求有個安身之所。

晌度住最大收獲係,經酒店介紹識咗個麵包車師傅「毛師傅」,為人幾好,又啱傾,所以晌羅平包車周圍遊都係搵佢,收費合理,又無話有咩蠱蠱惑惑嘢,有朋友去羅平嘅話都會推薦
每晚價錢: 268人民幣元 (三人房)
評分: 設備3   服務3   環境2   衛生3   抵住4
牛街螺絲田(較左景觀)
牛街螺絲田(較左景觀)
牛街螺絲田(較右景觀)
牛街螺絲田(較右景觀)
下面仲見到好多農戶,而我哋就係企晌路邊平平哋嘅山坡影相喇!
下面仲見到好多農戶,而我哋就係企晌路邊平平哋嘅山坡影相喇!
牛街螺絲田(特寫)
牛街螺絲田(特寫)
落到去螺絲田下面嘅景色
落到去螺絲田下面嘅景色
油菜花嘅真身
油菜花嘅真身
在超市,有「菜籽油」賣,自用送禮都得!
在超市,有「菜籽油」賣,自用送禮都得!
依度就係羅平縣睇油菜花三大景點之一「牛街螺絲田」,其餘兩個叫「十萬大山」、「金雞峰叢」,其實,全縣開咗成四十萬畂油菜花,即係開到周圍都係,差唔多有農田嘅地方,就係種咗油菜花,所以去到邊,就睇到邊,只不過上述所謂三大景點,係形態方面各有特色,唔係就咁得片花海咁簡單

之前上網睇天氣預測,都話羅平依幾日會落雨,我哋都算好彩,今日第一日天晴,聽日第二日先陰陰天,起碼無雨,係第三日走嘅時候先落毛毛雨,個天真係唔話得

毛師傅車我哋到半山位,就係睇牛街螺絲田嘅心水位,當場都見唔少龍友係度影相,我哋都第一時間落車睇睇啦!景觀真係一流,180度景觀,廣闊開揚,全片山谷下嘅農田都係一片金黃,幾壯觀,最獨特之處,就係油菜花田嘅形狀一個圈一個圈咁,加上又一層一層,好似啲螺絲,所以叫螺絲田

晌高位睇完牛街螺絲田睇油菜花全景,再落去下面田間睇油菜花嘅真身,感覺又唔同咗,各有睇頭,真係影相都影唔停!唔好以為油菜花得個睇字,毛師傅話油菜花本身個價值比一般農作物高,主因係可以用嚟生產食油「菜籽油」(唔係芥花籽油,係兩樣嘢),所以每年進入花期,就會全縣人都種油菜花。
參觀時段: 下午
入場價錢: 每人0人民幣元
評分: 值得去5  
一個個開放形個室,多少少私隱,又無咁大騷擾!
一個個開放形個室,多少少私隱,又無咁大騷擾!
野山葯竹菰雞鍋
野山葯竹菰雞鍋
多款配料,記得食先好攞。
多款配料,記得食先好攞。
牆上有竹笙介紹
牆上有竹笙介紹
羅平溫差都幾大,日頭廿幾度,入夜就得十度左右,食乜好,最好梗係打鞭爐,依間七里香係毛師傅介紹,佢車埋我哋去之餘,仲講埋一啲「注意事項」、「價錢參考」俾我哋知。由於我哋去完睇螺絲田返到縣城都係5:00pm,所以晌附近行一陣,6:00pm先去食!

七里香賣嘅係獨沽一味,就只有「野山葯竹菰雞」,竹菰即係竹笙,雲南出名係菌,竹笙都出產唔少。一鍋過,走地雞一隻,大量竹笙,加埋少少蔬菜,個湯頭好清甜,竹笙爽脆,蔬菜又新鮮,每人仲配給一包藥粉「三七粉」,係飲湯時自己加,老闆解釋係藥用價值,補補身,無乜味,係信佢架咋!就算唔係包藥粉,外面天寒地凍,飲碗滾熱雞湯,都好滋味啦!

除咗個鍋,仲有好多一籃籃配料,唔使你點,佢連個鍋一次過拎嚟,毛師傅所講嘅「注意事項」就係依堆嘢,你食先計錢,唔想計錢又唔打算食,就原封不動唔好掂!其實我哋三個人凈食個竹笙雞鍋都七乘飽,所以,配料都係揀啲蔬菜同黑柏葉食,而個湯就一定同佢清晒去啦,咁正!
每人消費: 約43人民幣元 (晚餐)
評分: 味道5   服務4   環境4   衛生4   抵食5
  0 個留言    |  加入你的留言
台南高雄墾丁自在遊 (台灣)
(旅程日期: 2010-08-30 至 2010-09-04 ,  旅程性質: 觀光攝影, 生態探險, 飲食購物, 消閒度假)
 整個旅程  (共6篇遊記)
 分享至Facebook 
發表日期: 2011-04-29
颱風「萊羅克」打到嚟,吹正墾丁,依家高雄都橫風橫雨,因為高雄酒店就住到今朝,墾丁個邊酒店又訂咗,為咗有地方落腳,所以趁未有長途巴士停駛,決定提早出發去墾丁先,去到大不了咪晌酒店hea!

9:00am巴士出發去墾丁,成架大巴只有5個客,而外面風雨未停過,接近墾丁時,沿岸白頭大浪處處,所以都一路擔心緊個行程,預咗三日兩夜晌墾丁,只好見步行步。

11:30am到咗酒店,原先都打算住民宿,但要去到10/9之後先收平日價,依家仍當旺季,嫌太貴,所以揀咗間平平哋嘅墾丁統茂高山青大飯店,查實都要成四百幾蚊港紙一晚,包早餐!安頓好之後,醫肚緊要,因為仲落緊大雨,就晌近酒店嘅「一品鹵味」搞掂餐晏仔。

照睇天色都係落足全日雨,所以,唯一景點可去嘅就只有國立海洋生物博物館(海生館),話晒全室內,好彩個博物館都幾夠大,足以俾我哋消磨成個下午,唔使無無聊。睇到個館閂門,不過,墾丁交通真係唔多方便,入到嚟海生館個位,話打風無公車返,幸好,遇到另一pair港人,夾份打的返墾丁大街

原本一早網上訂好晌社頂自然公園嘅2小時夜間生態遊,天雨關係,中午到達酒店時已留有口訊,生態遊取消咗。故此,夜晚嘅節目就只有搵食一環,可惜係墾丁大街有開嘅檔口都係寥寥無幾,遊客都唔多!唯有早啲返酒店,睇吓台灣啲綜藝節目解解悶。
一品滷味創辦人董瑞萍個嘜頭好易認
一品滷味創辦人董瑞萍個嘜頭好易認
好似我哋港式車仔麵咁,不過就自己執!
好似我哋港式車仔麵咁,不過就自己執!
鹵味櫃,擺咗多款鹵味。
鹵味櫃,擺咗多款鹵味。
創辦人董瑞萍攞咗好多獎架!
創辦人董瑞萍攞咗好多獎架!
室內約有廿個位左右
室內約有廿個位左右
一兜餸,一兜麵,好大份!
一兜餸,一兜麵,好大份!
唔覺唔覺點咗成盆餸出嚟。
唔覺唔覺點咗成盆餸出嚟。
嘩,食咗成TWD270!
嘩,食咗成TWD270!
估唔到嚟到墾丁第一餐就係食車仔麵,無辦法,外面風大雨大,「一品滷味」就係晌酒店隔無耐,好一餐,唔好又一餐,醫飽肚先講!

小弟都係第一次晌台灣食「車仔麵」,用個筲箕自己揀餸,因為唔係好知價錢,費事逐樣逐樣問幾錢(其實檔口上面有個細細個嘅價錢牌,不過橫風橫雨,無留意啫),所以,見啱食就夾,唔覺唔覺夾咗成TWD270出嚟,為起港紙$60-$70,晌香港真係未試過食車仔麵食得咁豪。初頭以為又好似香港咁,麵餅放湯,餸料晌上面,原來係餸一兜,麵又一兜,仲好大份添,三個人都夠食呀!

結果揀咗7樣餸,加兩個麵,所以叫佢做七品車仔麵
1. 蘭花干,即係豆腐干,鹵好之後色澤醬紅,以精細刀工正反兩面鎅切,再拉開就形似蘭花,所以見佢得意就揀咗嚟試。不過變咗車仔餸之後,細細件咁切開晒,就睇唔番個蘭花形。味道OK嘅,就如食一般豆腐干咁!
2. 鴨翼,滷水味幾醇,鴨翼都幾厚肉。
3. 糯米腸,無腸衣嘅腸,純粹以糯米做成香腸形,查實係食緊一舊舊糯米飯,不過添咗滷水香。
4. 白蘿蔔,清甜無渣。
5. 大貢丸,無咩特別。與其叫貢丸,似肉丸多啲,因為裡面都無餡嘅!
6. 滷蛋,滷水嘢算唔錯,依個滷蛋都入味。
7. 豬大腸,去咗肥膏,食落唔算肥。

總括而言,的確唔錯,仲食得我好飽
每人消費: 約135新台幣 (午餐)
評分: 味道3   服務3   環境3   衛生3   抵食4
大鯨同幼鯨實體模型嘅鯨魚親水廣場
大鯨同幼鯨實體模型嘅鯨魚親水廣場
「觸摸池」,可以親手觸摸嘅生物池
「觸摸池」,可以親手觸摸嘅生物池
「觸摸池」內嘅寄居蟹
「觸摸池」內嘅寄居蟹
大洋池,展示大型魚類
大洋池,展示大型魚類
珊瑚礁預覽區,超巨型水缸有珊瑚礁不同嘅生態
珊瑚礁預覽區,超巨型水缸有珊瑚礁不同嘅生態
81M長嘅海底隧道,號稱亞洲最長,體驗下海洋世界。
81M長嘅海底隧道,號稱亞洲最長,體驗下海洋世界。
海底下嘅爛破船?
海底下嘅爛破船?
特展區 - 「海洋X檔案」
特展區 - 「海洋X檔案」

原先海生館唔係我哋打算去嘅景點,因為以往去過香港嘅海洋公園、大阪嘅海遊館,諗住都差唔多,所以未被列入行程之一。但出面打大風落大雨,既來之,則安之啦,書都有介紹海生館有全球最大活珊瑚,亞洲最長海底隧道,結果,就搵咗海生館做我哋嘅避風塘,總好過晌酒店齋hea浪費時間啦!結果晌度消磨咗3個鐘,查實又幾多嘢睇,都值得一去

海生館分三個展區:台灣水域館、珊瑚王國館及世界水域館,仲有個特展區定期舉辦特展。入場無耐,又有個迎賓廣場,其中一個叫鯨魚親水廣場,有大鯨同幼鯨躍出水面嘅實體模型,地標性影相位,哈哈!

台灣水域館
「以水的循環為故事主軸,藉由一滴小水滴的旅行,呈現台灣從冷冽的高山溪流到一望無際的海濱外洋等等,多樣的水域生態環境。並逐一介紹棲息於其中的各式物種及其生物多樣性。」
我就最鍾意個「觸摸池」,因為係個可接近嘅生物池,可以親手去觸摸如海星、海參、海膽、螃蟹……等等!最搞嘢係池中個告示牌:「觸摸池小叮嚀:可以摸我,不要抓我、不要捏我,不然我會痛痛喔!」另外,一個大洋池,係海生館最大嘅生態展示區,闊16M,高4M,展示數十種大型魚類:鯊魚、魟魚、鰹魚、石斑等。

珊瑚王國館
「以珊瑚礁漂潛為故事主軸,藉由逐漸下潛海底所看到的海底生物景觀及沈沒的海上交通工具「沉船」,是如何成為海底生物的樂園。最後,介紹全球努力拯救珊瑚的觀念在告訴遊客珊瑚在海洋中的重要性。」
依部份最有睇頭係一入展館嘅珊瑚礁預覽區,三個超巨型水缸提供珊瑚礁不同嘅生態區域的預覽,從斜緩嘅礁緣,到陡峭嘅礁壁。另一個係有成81M長嘅海底隧道,號稱亞洲最長,穿梭依個巨型人造海洋中,體驗下海洋世界。

世界水域館
「以時空探查艇遨遊時空及各海域為故事主軸,藉由即時運算之虛擬科技,配合3D或2D的成像方式,重新呈現無法到達或難以到達之水域。並透過展示手法的運用,讓遊客穿梭於虛擬與真實之間,感受遠古時期的海洋、巨大的海藻森林,深不可測的深海水域及寒冷的極地水域。」
依部份叫做大包圍,全世界水域乜都有,最有趣自不然係極地水域分區,因為有企鵝、海鸚鵡睇。至於3D部份,個人覺得「流流哋」

特展區
不時推出唔同嘅專題,好似我去嘅時間係做緊個「海洋X檔案」,即係利用X光透析海洋生物結構嘅相片,都幾得意有趣。

推介項目: 觸摸池, 大洋池, 珊瑚礁預覽區, 極地水域分區
參觀時段: 下午
入場價錢: 每人450新台幣
評分: 值得去4  
華陽川浙小館門面,寫明賣四川菜。
華陽川浙小館門面,寫明賣四川菜。
小鋪格局,地方唔大,勝在乾淨企理,價位唔貴。
小鋪格局,地方唔大,勝在乾淨企理,價位唔貴。
蚵仔清湯
蚵仔清湯
陽春麵
陽春麵
炸菜豬扒肉碎飯
炸菜豬扒肉碎飯
飯後無再落雨,墾丁大街先多番啲人咋!
飯後無再落雨,墾丁大街先多番啲人咋!
打咗成日風雨,入夜天氣開始好啲,不過,仲係有啲雨,墾丁大街有開嘅檔口唔太多,由街頭行到街尾,去到尾見依間華陽川浙小館,燈火通明,主打小炒,而外面有啲悶熱,想搵個坐得舒服嘅餐廳,加上佢嘅價位唔貴,就決定入去!

華陽小鋪格局,地方唔大,不過仲有埋二樓,地方都乾淨企理。除老板娘,另個兩個店員都似係一家人,屬於家庭式經營。有咩食?門面寫住「正宗川菜、熱炒火鍋、合菜單點」,合菜即係我哋叫嘅套餐,三菜一湯到八菜一湯,啱晒大棚人,我兩公婆單點都夠晒喇,況且太太唔大食,飲個湯,叫啲粉麵就算!

蚵仔清湯
滾湯一個,湯底好清,味薄,不過蚵仔就好多好多,好似撈極都有咁,肉質都算得上肥厚,伴啲薑絲食,都OK嘅!

陽春麵
即係有湯無料嘅凈麵,麵條係較粗身一種,煙韌而爽滑,湯底一般。

炸菜豬扒肉碎飯
碟頭飯,炸豬扒碎上(即係切好咗一小件一小件),伴有炸菜同肉碎,叫做填飽肚,無話好味唔好味。

雖然依餐簡簡單單,但總算晌風風雨雨下,平安渡過咗依日,仲有溫飽呀!飯後無再落雨,墾丁大街先多番啲人!
每人消費: 約160新台幣 (晚餐)
評分: 味道3   服務4   環境3   衛生3   抵食3
門面細細,內裡都保持得幾新凈。
門面細細,內裡都保持得幾新凈。
大堂,旁邊有個小賣部,日常用品都買到!
大堂,旁邊有個小賣部,日常用品都買到!
泡茶區,近門口有張大型泡茶枱,hea吓幾好!後面嘅單車係免費借!
泡茶區,近門口有張大型泡茶枱,hea吓幾好!後面嘅單車係免費借!
大堂放有動動腦根嘅考智慧小玩兒,回復童年回憶!
大堂放有動動腦根嘅考智慧小玩兒,回復童年回憶!
娛樂室有桌球,不過好殘好舊!
娛樂室有桌球,不過好殘好舊!
房內玄關位
房內玄關位
雙人房變咗雙床四人房,一人瞓一張大床,點碌都得。
雙人房變咗雙床四人房,一人瞓一張大床,點碌都得。
小茶几,藤椅,小休一吓!
小茶几,藤椅,小休一吓!
墾丁 嘅住宿都唔係點平,我依家仲計緊暑假旺季收費,一般民宿都要TWD2,200-2,600,靚啲型啲嘅差唔多TWD3,000,咁搵到間統茂高山青飯店,TWD1,700一晚,無必要一定住民宿,反正依家墾丁 嘅民宿都商業化晒咯。

飯店位置幾好,墾丁公園牌樓正對面,即係入墾丁大街路口,後面好近大灣海水浴場。雖然飯店話95 年斥巨資全新裝修,不過都成十幾年啦,感覺有少少舊,但係環境同設施唔算殘,以三星嚟講,都OK架!唔好睇佢門面細細,原來入面都幾深幾大。

一入門口左邊有個泡茶區,有張實木大型泡茶枱,hea吓幾好!大堂細細,旁邊有個小賣部,日常用品、小食都買到,半夜肚餓都唔怕!側邊仲有個童玩區,放有動動腦根考智慧嘅小玩兒,可以搵番啲童年回憶!而地庫有個綜合娛樂室,有桌球,乒乓球,卡啦OK,不過好殘好舊。飯店尾有多部投幣式洗衣、乾衣機,睇樣好似幾OK,但我就無試。此外,仲有單車係免費借用,限借用到晚上6:00,都夠晒啦,當然數量有限,先到先得,可惜,我哋遇正風雨,未有機會借用。

講到啲客房,最正係我哋訂嘅係豪華大床雙人房,入房變咗雙床四人房,同老婆一人瞓一張大床,點碌都得。此外,房內洗頭水、牙刷、牙膏、風筒……基本日用品都有,仲有免費礦泉水、茶包。住宿仲包自助中西式早餐,有咩食,留番聽朝講!瞓覺先!

每晚價錢: 1700新台幣 (雙人房)
評分: 設備3   服務4   環境4   衛生4   抵住4
  0 個留言    |  加入你的留言