基本上依個唔係一個景點，更唔係我哋行程嘅一部份，只係要去搵亞坤咖央吐司咖啡店，所以晌MRT (EW15站)出，順路經過依度。

但當嚟到依度，好鬼有親切感，簡直好似返咗去香港嘅屋村咁。無論環境同人，親切到不得了，啲樓嘅格局，好似我哋啲公屋，上面住人，下面有啲街市同商鋪，再入面有停車場，周圍又聽到好多廣東話對話，同聲同氣。

搵唔成亞坤，就去麥士維熟食中心，出咗丹戎巴葛坊，見有好多矮矮細細、色彩鮮明嘅南洋古屋，不過，依家都變咗一排排嘅酒廊、酒吧同卡拉OK，但仍舊保留著二戰前優雅嘅形貌。

麥士維熟食中心位處牛車水邊陲，離地鐵站有少少遠，但唔難搵嘅。佢係由菜市場改建而成嘅，所以都幾大，庭位排列都幾闊落，樓底好高，都幾通爽，至今都有成20多年歷史喇。而由於近牛車水，即係唐人街，所以食物較多偏向中國色彩。雖然係咁，但都好受當地人歡迎！

我哋一共試咗4檔嘢，有麵線、米粉、咖喱角同凍飲，樣樣都係一、兩蚊，兩、三蚊坡幣，唔貴唔貴。

炎記 - 招牌乾撈麵線SGD3
同佢晌檔口打出嚟嘅相有段距離，碗乾撈麵線唔係好大碗，加咗啲無乜味嘅肉碎、江魚仔（脆魚乾），淋上啲醬油，另加跟一碗清湯、4粒魚圓（魚蛋），整體味道一般。

福海（芳林）- 咖喱雞粗米粉SGD3
晌佢檔口放有一大盆滾住滾住嘅咖喱，所以，吸引到我去幫襯。可以配白飯、油麵、粗米粉（米線）、幼米粉，而咖喱內有雞肉、豆卜、薯仔同豆腐。咖喱味道濃郁，帶有好香椰奶味，有層次唔單調，好食！除咗咖喱雞，福海仲有叉燒賣，招牌就係蜜汁叉燒麵。

東陵 - 酥皮咖喱角SGD1.4
東陵獨賣3樣嘢：雞肉咖喱角、沙丁咖喱角、芋泥角，我哋見佢啲咖喱角大大隻，就買咗一隻雞肉咖喱角試吓，原來裡面唔只雞肉，仲有蛋，都幾得意，加上以酥皮包裹，形狀有別於我哋食開三角形嘅咖喱角，而係有啲似過年食嘅角仔咁，酥皮唔算好鬆脆，還可以啦！

848 Fruit Juice - 榴槤牛奶 SGD$2.5、蘋果百果香汁 SGD $2.5
新加坡無乜天然資源，好多物資都係由馬來西亞運嚟，嗰邊嘅物價又相對平喎，所以依類鮮榨即做嘅生果飲品都好抵飲。我要咗杯榴槤牛奶，好鬼大杯，成公升咁滯，夠晒冰凍，而且口感滑，榴槤味十足，貨真價實，正呀！老婆嘅係蘋果百果香汁，百果香即係我哋叫開嘅熱情果，比起我杯就細杯好多，百果香酸酸咪，加上蘋果嘅甜，飲落感覺好清爽，夏天飲好啱！

牛車水係新加坡著名嘅唐人街，亦係新加坡著名旅遊景點之一，MRT設有牛車水站（NE4），一出就係牛車水，所以，嚟依度非常方便。

「牛車水」名字嘅由來，係由於早期當地居民每日都用牛車來運載用水，久而久之依處就取名為「牛車水」。由1821年開始，已開始有華人晌度聚居，足足近兩百年歷史，保留咗豐富嘅華人歷史同文化，從小巷中，可以搵到各式各樣傳統嘅手工藝品，如書法、雕刻、木偶……等，當然向香港長大嘅我哋，對依啲嘢就唔會有太大好奇；別以為牛車水只係老套古舊嘅地方，其實近10年都有唔少新式型格小店進駐，為該地注入創意同活力，正正係度結集咗新舊文化。

牛車水內，仲有條史密斯街（Smith Street），係一條露天美食街，街道兩旁建築全都改為餐館，再加上十多檔路邊攤，美食應有盡有，讓人可以晌處品嚐美味嘅本地小食。可惜，我中午去到，只有少許餐館有營業，而路邊攤就一檔都未開，所以，「不時不食」嚟唔啱時間就未有得食。

此外，出名嘅星洲牛肉乾鋪「李志源」、「美珍香」，晌牛車水都有分店，可以買啲當手信！

國家胡姬花園（國家蘭花園）係晌新加坡植物園內其中一個主題花園，亦係園內唯一一個要俾入場費嘅設施。

胡姬花係新加坡嘅國花，園內除了國花品種卓錦萬黛蘭外，還有超過1,000種純種胡姬花、2,000種配種胡姬花，不少更以世界名人命名，園內每年仍繼續培育出更多高質嘅配種胡姬！除胡姬花外，園內仲有瀑布、噴泉，令整體嘅設計更互相配合。

同樣，胡姬花園都劃分咗好多分區，區區都有特色，如仙鶴噴泉、純種胡姬區、鳳梨科展覽室、貴賓胡姬園、霧室、冷凍室……等等！

依個大榴槤無咩臭味，但就好有藝術氣味。作為星州嘅第一個景點，無話刻意揀依度，純粹近Makansutra大牌檔同魚尾獅公園。

2002年落成嘅濱海藝術中心，佔地成6公頃，外形設計非常獨特，真係十足十一個大榴槤，由頭到尾起晒釘，原來係由7,000多塊鋁製三角形遮光罩組成，確係別樹一格，當地人都統稱叫依度做「榴槤」，正名都好少人講架喇。入夜之後著晒燈仲靚，無論近影定晌對面岸影番轉頭，都好靚吓。

「榴槤」好似我哋香港嘅文化中心咁，內裡有音樂廳、大劇院、小劇場、藝術圖書館、購物中心及餐廳同一啲戶外表演場地，成為集文娛、購物、餐飲、娛樂於一身嘅綜合性建築。

晌新加坡嘅第一餐必然試一試佢哋出名嘅黑胡椒蟹，正正濱海藝術中心隔離，就有一個露天熟食中心「makansutra gluttons bay」，其實星洲仲保留好多熟食大牌檔，除咗係當地嘅飲食文化，亦已經成為旅遊景點添，就好似台灣嘅夜市咁。

Ｍakansutra大概有十來檔大牌檔左右，規模唔算大，但都已包括多款地道美食，如叻沙、炒貴刁、沙嗲串燒、炭燒雞翼、煎蛋蘿蔔糕、咖吷多士、新鮮螄蚶……。

大牌檔坐落海邊，並且以露天茶座為設計，晚間涼風陣陣，通爽非常，雖然係盛夏，但都覺得頗涼快。本來我貼老婆都揀咗露天木條長凳，但突然整咗場雨，就只好揀番啲有瓦遮頭（有太陽傘）嘅膠凳位，感覺係差少少。

食物分別試咗3檔嘢，包括「水安煮炒」嘅黑胡椒蟹、「Alhambra Padang」嘅沙嗲、「The Gluttons Bar」嘅檸檬甘蔗汁、洋桃西芹汁。

黑胡椒蟹SGD28
一份有兩隻蟹，不過咁嘅價位，你都知無可能係斯里蘭卡蟹架喇（厚肉又大隻好多），老闆亦有講明係本地蟹，勝在新鮮肉甜，而且檔前有晒「樣板」，童叟無斯欺。雖然隻蟹無咁有肉地，但正如老闆所講，肉質非常之鮮甜，而且黑胡椒炒得好香好惹味，食到要吮晒手指先罷休。

牛肉、雞肉沙嗲SGD7.5
可以單點，我就要雙拼。一客有成8串，牛肉、雞肉各半，肉嫩有碳火香，靈魂在於兜沙嗲醬，成碗仔一大兜，絕對夠你啖啖肉都醮足沙嗲，最重要係濃稠度啱啱好，又有花生香，好味道！唯一唔OK係啲伴菜，好似啲米糕咁，無味，軟軟爛爛，口感較差啫。

檸檬甘蔗汁(SGD$2.3)、洋桃西芹汁(SGD$3)
新鮮即榨，配搭又夠特別，難得唔會溝到不倫不類，而且夠晒冰凍，真係辣住食蟹，凍住解渴，爽呀！

當開始預備搵酒店時，真係覺得新加坡啲物價幾貴吓。偶然發現有啲平價嘅鏈鎖酒店，屬二、三星級，低價格真係平到暈，經一輪參考網上嘅評語同資料，就決定膽粗粗試吓Hotel 81 Lucky。

酒店位處芽籠區，環境就好似返咗去深水埗咁，平民化啲，而酒店離地鐵EW9站唔遠，約5-10分鐘步程，附近有很多街坊食肆。而從酒店去機場或市中心，搭地鐵非常之方便。所以，地點都幾OK架。

唯一唔好嘅，係附近有啲紅燈區。晚間確實有比較多流鶯，閒雜人也較多，但治安感覺都算良好，啲人都唔會理你、兜撘你，個人覺得就算係女仔入住，只要唔係一個人，有得三幾個，也可以考慮！如果你行過旺角嘅砵蘭街都唔怕，依度都應該無咩問題喇。

上到房，第一時間睇下咩環境，簡單嚟講，整潔無異味，只係櫃比較少，焗住要把行李雜物放晌地上，幸好地板係木地板，感覺較地毯乾淨。洗手間掛勾亦太少，沖涼時掛衫有啲唔方便。牙刷有提供嘅，不過係無牙膏，原來牙膏已附晌牙刷之上，即係真真正正嘅「一次性」牙刷。整體而言，幾百蚊瞓一晚，可算為慳錢整潔之選。頭幾日就慳住少少先，留番最尾一晚先晌聖淘沙住得正啲！

以往好少花時間晌酒店啲設施上，酒店只係俾小弟瞓一覺嘅地方，但既然今次係輕鬆自由行，就要玩得輕鬆舒暢，唔好為景點趕趕趕，尋晚又瞓得咁好，就晌酒店游個早水，真係好彩有落一落嚟咋，如果唔係就走寶。

Hard Rock個泳池唔係標準嗰款直身長方形嘅泳池，係好休閒、好渡假感嘅一個圓形小泳池。泳池設計好特別，水深係分兩層，中間係較深嘅部份，不過都係1.2-1.3M左右，供人游水，加埋一啲吹氣道具，啱晒細路仔；外圍圓週就只得0.2M左右淺，但放滿晒籐椅，曬住太陽又輕軾浸住水，感覺真係好爽。此外，泳池一邊仲有個人造沙灘，同樣放有好多籐椅同太陽傘；另一邊就有個沙灘排球場，如果識打排球可以晌度一展身手。而且，泳池尾還有個poolside bar，坐晌籐椅嘆杯嘢又得，直情坐住吧位對開水池中嘅石凳都得。可惜晨咁早，未有服務提供。

游完水都仲有嘢玩，就係泳池隔離有個大型按摩池，衝擊力強勁，池水係熱嘅，被佢「衝擊」一陣，真係消除到肌肉嘅繃緊，最可惜係依家先發現，如果早知，尋晚已經預番早少少時間返酒店「衝擊」下！

上次行色匆匆，嚟到大利來記見超長人龍，就無試。今次住得咁近，當然要嚟會一會佢啦，其實睇食評都知到佢劣評如潮，但唔試過又唔心息，就等小弟犯賤下啦！

差唔多11:00am嚟到，唔算多人，同當日嘅超長人龍不可同日而語。瞄瞄餐牌，就晌推介嗰張餐牌度揀晒。因為招牌硬豬仔包要晏晝3:00pm先有，所以就點咗豬扒菠蘿包、豬扒甜餐包、一份咖喱魚蛋、一杯凍啡同一杯青檸柑桔蜜，一共MOP95，感覺有啲貴。

豬扒菠蘿包 MOP20、豬扒甜餐包 MOP20
豬扒菠蘿包同豬扒甜餐包係佢哋嘅新推介，有個疑問，究竟佢哋有無試過依個配搭呢？其實，個包都幾大個，豬扒肉質鬆軟又醃得入味，煎得都幾香，但係一夾埋個包一齊食，無論係菠蘿包，抑或甜餐包，包嘅甜味同豬扒嘅鹹香，係絕對唔襯囉！加上依兩款包係軟身包，一「扲」就會扁晒，唔曉得彈番起，尤其菠蘿包更甚，好影響口感，因為件豬扒都要用少少力咬，結果就一咬包身扁埋變咗糰粉！

咖喱魚蛋 MOP22
一客有8粒魚蛋，個人覺得好普通咋喎，魚蛋唔算話好差，只係無咩亮點，無話好彈牙，又無話好有魚味，總之就係普通啦！咖喱，講到係秘製，散買仲收到MOP80樽，小弟只係覺得有咖喱味，但無層次嘅香啫。

凍啡 MOP13、金皇蜂青檸柑桔蜜 MOP20
睇人寫佢無禮貌都略知一二，今次招呼就無乜嘢。相反，杯青檸柑桔蜜收到成MOP20，勁俾足料呀，老婆話第一口飲落，真係甜到爆，飲幾啖再叫人加番啲水溝溝先易入口。

我同太太都鍾意大自然景色多過金雕玉砌嘅景點，所以，就特別揀咗過嚟澳門第一個郊野公園「石排灣郊野公園」行吓，呼吸吓多點新鮮空氣。

由氹仔過嚟好快，搭巴士幾個站就到。面積雖則話約20公頃之大，但除非你行埋佢啲山徑，否則主打動植物公園部分唔係好大，個幾鐘都行晒。

園內設施都幾多樣化，有動物園（鴕鳥、山羊、獮猴、天鵝…）、趣異植物園、藥用植物園、觀鳥園、土地暨自然博物館（澳門農業同自然地理嘅濃縮版介紹），梗唔少得係2011年初先開放嘅大熊貓館及大熊貓資訊中心啦。基本上，石排灣郊野公園係免費開放，但大熊貓館就收費MOP10。當然唔係好多旅客願意嘥時間嚟依啲地方，但帶有小朋友嘅，就好應該帶佢哋過嚟行吓，親親大自然喇。

去到路環，逛過路環市區，搵個海堤旁樹陰位睇睇書，原來都成2:30pm，係時候下午茶去，一心一意想去安德魯花園咖啡餐廳嘅，同樣目標清晰。

下午茶時段唔算多人，唔使點等位就有得入。環境有啲逼，啲枱拍得無乜位行，被安排最埋牆嘅二人枱，感覺上冷氣有啲唔夠。幸好食物仍有水準，否則就要俾個喊面佢！

葡撻MOP8
依度嘅葡撻唔係即做，係附近街嘅老店做，再拎過嚟。有位落單先再放入焗爐輕輕翻熱，所以，效果應該會打咗折扣。

泰式雞肉沙律 MOP42
晌安德魯食泰式沙律，都算有少少破格啩。不過，唔好理，個泰式雞肉沙律確係正，有芹菜、青瓜、紅蔥頭、蕃茜、車厘茄，以及好多雞肉，配以魚露、酸醋，非常醒胃，啱晒今日咁大熱天時食。

木瓜奶昔 MOP20、紅蘿蔔蘋果汁 MOP18
木瓜奶昔好大杯，食唔飽都可以飲飽。雖然木瓜好夠，但質感比較水，可能加奶或雪糕加得少，而且唔夠凍，要問侍應再加加冰先OK。相反，老婆杯紅蘿蔔蘋果汁正好多，飲落紅蘿蔔同蘋果嘅味道比例50/50，好平衡，無話邊個搶邊個味！

栗子芝士餅 MOP18
咁嘅價一件芝士餅，真係好抵吓。栗子味勁重，相對地芝士味就比較薄，而且餅身口感稍為實咗啲，唔係擺得耐嗰種「硬」，覺得係魚膠落得多出嚟嗰種「實淨」，欠缺咗芝士餅一向嗰個柔軟感。

之前都未有認真考慮去睇太陽劇團依個表演，但啱啱遇到佢做推廣，除VIP票價（MOP1,288），原價成人一位由MOP388-MOP788，都咪話唔平，但依家推廣價最平只係MOP188咋，足足平一半有多，但只限星期六、日5:00pm嗰一場，其實時間仲啱我啦，反而睇8:00pm場次仲要搞到好夜先返到香港，結果，睇ZAiA就成為晌澳門最後嘅娛興節目。

ZaiA（薩雅）係一個少女嘅太空旅行之夢，個故事講到好玄，雖然睇落唔太覺得啲場景同個故事好有串連（可能小弟嘅領悟力低），但當中穿插好多獨特嘅舞蹈、創意嘅動作、飛行嘅特技同一啲輕巧嘅表演，足見70多名來自世界各地演藝家嘅真功夫。再配合燈光、音效，極盡視聽享受。全個表演大概90-100分鐘，無乜冷場，都可謂值回票價，絕對值得一睇。

由於掛住睇，現場又唔俾影相，所以無相提供參考，但可以去佢個網址細閱，小弟就掃描咗當日張飛以作留念！

嚟瑪嘉烈故然因為佢個名夠晌啦，雖然都唔有少劣評，但好評都佔一面倒，況且心想都只係試個葡撻啫，蝕得幾多丫。

係殷皇子大馬路轉入小巷就見，好易搵，人氣即係人氣，一望已十多廿人排緊隊，但流速快，因為個個都係買一兩件嘢就走。

好老實，佢哋嘅葡撻確實唔錯。首先葡撻去得快，自己個個手接住都熱辣辣，新鮮出爐嘅已佔咗少少優勢；其次，酥皮很鬆化，咬到一袋都係酥皮碎，又好有牛油香，因為無試過安德魯嘅，無得比較；蛋心方面，好軟滑，質感有啲似食炒鮮奶咁，不過覺得有少少偏甜，而撻面嘅焦香亦拿捏得不錯。只係$8一個葡撻，著實有啲偏貴。

撻雖好，但服務態度就欠奉喇。開始排到入鋪，舉起相機已鬧定你先：「依度唔俾影相架！」。去到買嘢位，如果你遲咗少少反應，佢又話你：「想要咩，快啲講先得架！」好彩唔係晌度食餐飯對佢哋成個鐘啫。

以往都好少去啲觀光塔，難得近近哋澳門有個，加上晌油麻地旅遊見到個套票「旅遊塔下午茶套餐連58及61觀光層門票」，都係HK$120位，因為事前睇過澳門旅遊塔本身觀光門票都要成舊水，就算同樣經油麻地旅遊買，都要HK$75，所以就諗住俾多少少可以晌60樓嘅旋轉餐廳嘆吓茶。

塔身最高處達338米之高，而觀光層分別晌58樓（室內觀光層223米）同61樓（室外觀光層233米）。以玻璃子彈升降機，僅1分鐘時間左右，就可以攀升到塔內主要觀光層，於觀光層可遠眺四周，飽覽澳門半島、氹仔，以至珠海，一覽無遺，今日天氣幾好，陽光充足，無霧無煙霞，所以睇景一流，賞心悅目！

最有趣係晌58樓觀光層，有數段地板以特製玻璃舖設，可以直望到地面，令人有一種懸空嘅感覺，雖然明知係安全，但初時踩上去都有啲心慌慌，哈哈，老婆試咗好多次都係無唔敢踩上去。而61樓觀光層設有一系列挑戰膽量嘅冒險刺激活動：健力士世界紀錄最高的「笨豬跳」、「高飛跳」、「空中漫步」或「百步登天」，小弟年紀唔算大，都唔係好敢玩，或者有一大班老友同行壯壯膽可能唔同啲。雖然無玩，但睇人玩都多少感受到嗰份刺激同興奮。

初時買油麻地旅遊依個套票時，「旅遊塔下午茶套餐連58及61觀光層門票」，價錢HK$120位，個名係寫住「下午茶套餐」，加上比淨買觀光層門票俾多幾十，當期時啲食評又無乜人講過佢個下午茶套餐，所以一心諗住佢個下午茶套餐應該係一份三文治、蛋糕之類，再配杯熱飲。就算去到旅遊塔等lift時，見佢有個「下午茶套餐」廣告牌，寫住High Tea Set，有晒相，都仲係半信半疑，因為個High Tea Set成人每位就收MOP148+10%喇，我個套票邊有咁數呀？

準時上到餐廳，都未係好有人。登記好，安坐，好快侍應就送上食物，依刻仲唔嘩嘩聲咩，睇到我同老婆都眼突，原來個所謂「下午茶套餐」真係廣告牌上嘅High Tea Set嚟，完全會錯意呀！更喜出望外嘅係，除三層架嘅食物外，仲額外有另一碟嘅小食同甜品。我哋俾個套票價，真係連個下午茶套餐嘅價錢都未夠啦，兩公婆都覺得抵到暈呀。

無諗過個下午茶完全係兩回事，所以有少少打亂小弟部署。原先諗住食個下午茶半粒鐘內就走，但既然今日天朗氣清，又對住一大份High Tea Set，就決定慢慢嘆，由3:30pm嘆到5:00pm收場，邊食邊睇景，間餐廳慢慢轉，就鳥瞰澳門唔同景觀。

餐廳環境同景觀就一流架喇，靠窗全是4人枱，排得又唔密，絕對坐得輕鬆舒服。落地大玻璃，又身處二百多米高，景觀無遮無擋，飽覽無遺，因為樓上就係61樓室外觀光層，久唔久就見有班人玩「空中漫步」經過。

食物方面，三層食物架，分別有十多款食物，款款兩件，絕對同老婆唔使爭。最下層有：朱古力曲奇、紅桑莓蛋糕、芒果奶凍、迷你士多啤梨果撻、士多啤梨林明頓；中層有：迷你燒牛肉漢堡、蟹籽煙三文魚雪糕筒、迷你泡芙、壽司卷；而上層係多款新鮮水果；至於另一碟嘅係印度烤雞、咖喱豬肉卷、炸三文魚球、奶皇糯米糍，啡茶任斟。當中有幾樣嘢有較深印象，好似士多啤梨林明頓，中間加咗士多啤梨林果占做餡，味道鮮活咗；蟹籽煙三文魚雪糕筒，內裡加咗牛油果芝士醬，感覺濃郁；印度烤雞，香料頗入味；咖喱豬肉卷，皮薄口感鬆脆；炸三文魚球，醮咗黑白芝麻脆炸，味就層次豐富啲！相反，芒果奶凍質感較為削身；而迷你燒牛肉漢堡個包身有啲硬。整體質素算屬於中上，兼且食得飽飽，所以晚餐就順延晏啲先食喇。

松山纜車就晌二嚨喉公園入口處，連接東望洋山山頂位，係澳門唯一一個纜車系統，1997年落成啟用，全程186米，只得個1分多鐘嘅途程，非常短，有可能係全球最短嘅纜車。而車廂細細好得意，話就每架供4個人坐，但坐晒就覺有啲逼。都未睇得徹周圍景色，位都未坐暖，就到咗頂喇！

松山有兩個公園，山腳就係二龍喉公園，山上就係依個松山市政公園。整個區域話大唔大，話細唔細，晌度有出名嘅東望洋燈塔（中國南岸最古老嘅燈塔）、聖母雪地殿小教堂，仲有一座古舊炮台、松山防空洞展示廊，又有大型露天劇場、小型足球場、回力球場（不過睇唔明點玩 =.=!）、多款康樂器械（又幾好玩架喎），真係估唔到山上有咁多嘢喎。此外，唔少得係依度景觀廣闊，另一鳥瞰澳門全市靚位之一。

不過，有樣可惜，就係求先晌360 café嘆得耐，再嚟到東望洋燈塔就閂咗門，無得入去睇燈塔同參觀聖母雪地殿小教堂。行完松山市政公園，可以沿石級落山，松山算係城市綠洲，係輕鬆散步、呼吸一下新鮮空氣之選，再順路逛埋二龍喉公園。

二龍喉公園，只係順路景點。賣點唔太多，只可叫做澳門半島依邊唯一放有動物園嘅公園，但其實動物不多，飼養咗多款哺乳動物、雀鳥同爬行動物，較特別咪有受保護動物，如黑葉猴、黑熊、獼猴等。驟眼所見都係附近嘅居民上山打吓波，行吓公園，跑吓步，無乜遊客到。

二龍喉哩個名來自公園門口嘅兩個獸頭噴泉，前身係個荒丘，後來成為早期澳門總督嘅官邸，1931年因附近嘅火藥庫發生爆炸，做成多人傷亡，而建築物又受損。結果富商何東購買咗部分土地，闢為公園，故又稱為何東花園，其後在公園擴建時再將此地贈予政府。澳門總督遷出後，庭園開放埋供公眾遊賞，並於1959年改建成公園，其後再晌1996、1997年擴建為依家嘅模樣。

澳門有好多葡萄菜館，上次去澳門未有機會試到，今勻就揀定幾間心水，全部都無訂枱，視乎時間同玩到去邊區。最後，就決定去試吓晌大堂街嘅Restaurant Escade，位置就在郵政局後面上梯級，唔難搵。

今日係星期五，都幾旺，由於無訂位，要多等半粒鐘，啱晒啦，因為晌360café食咗個好飽嘅High Tea Set，係估唔到咁飽，所以已經將食晚飯時間推晏啲，再等多陣都無妨。

之前已晌openrice做咗少少功課，所以點菜時雖睇勻個餐牌，但查實心裡有數，都無乜懸念。

紅酒雜飲 Sangria 0.5L/MOP78, 1L/MOP148
澳門好多葡國餐廳都無免費開水供應，依間都無例外，所以索性先嚟半公升Sangria。我都係第一次飲依種葡式雞尾酒，本身小弟同太太都唔係好酒之人，可以飲，但唔多，而半公升大概倒到5-6杯（以每杯為半杯份量計），所以今晚都叫飲大咗，但因為隻酒係由紅酒再加啲蘋果、橙嘅果皮果肉，酒味少許濃，味道帶甜，易入口，真係唔錯唔錯，值得一試，所以清晒半公升Sangria無難度。

檸檬炒蜆 MOP95
炒蜆堆滿一大碟，份量頗大無呃秤，雖然蜆隻唔算好大，但感覺蜆肉肥厚、鮮甜無霉無爛，無乜死蜆，食落亦唔覺有沙。以檸檬同炒，所以蜆肉帶有一朕檸檬清爽鮮香，我哋連汁都唔放過，以麵包醺嚟食！

葡式焗鴨飯 MOP128
另一滿意嘅菜式，上枱時個賣相平平無奇，飯面就只有兩大塊煙肉、兩片葡式肉腸、蕃茜、黑橄欖而矣。但一滔起個鴨飯，真係禾稈冚珍珠，飯裡面鴨肉多到不得了，啖啖都有鴨肉絲，而且個飯又焗得夠香夠乾身，確係意外咁好食。唔好睇佢好似細細缽，查實份量可不少。

整晚食物好好味，環境亦都一流，餐廳設於一幢舊樓之中，樓高三層都係餐廳。內裡裝修古雅，一室潔白，懷舊吊燈，加上昏黃燈光，實在幾有氣氛。美酒，佳餚，浪漫情調，為今日行程畫完整美句號。

位於澳門新濠天地嘅Hard Rock Hotel，屬4星嘅精品酒店，由於係獎品關係，所以可免費晌度住番一晚，舒舒服服瞓一覺，感覺真係好正。

酒店嘅客房類型大致分為標準大床客房、標準雙人客房、雙連標準客房，除基本設施外，房內還配有多功能iPod播放器、視頻點播系統、視頻遊戲……等服務，當然，衛星電視頻道、吹風機、免費寬頻、無線上網依啲增值服務就唔使多講啦！

另一亮點係房間幾大吓，我住嘅係1673號房（雙床房，實質房租要成千三、四），一入門口左邊係超大入牆衣櫃、小酒吧，右邊就有個迷你吧台，放有兩張高腳凳，坐吓飲杯嘢都不知幾爽。話就話係雙床房，房中嘅單人床同我屋企張雙人床差唔多大咋，真係瞓4個人都得呀！房尾仲有一張復古風格嘅梳化，好鬼好挨啫。個房真係好鬼大，放咗咁多嘢，都仲係覺得啲空間好寬鬆。雖然有落地大玻璃窗，但我住嘅房就無乜景，對住新濠天地同澳門君悅酒店，其次就係路氹啲爛地盆。

洗手間都好正，乾淨企理，同樣設備齊全，紅啡配搭，好夠型格。不過有個大疑問，沖涼房同廁所係分開嘅，其實咁設計都無問題，有時仲有啲方便，但奇在廁所無洗手盆，咁去完開大又好，開細又好，點都要洗洗手啩？

此外，昆明動物園另一個賣點，就係一個賞櫻勝地，園內種咗上百棵櫻花樹，初春時節，開得正盛嘅櫻花樹，紅嘅白嘅布滿圓通山上，景致煞食到暈。不過，我哋今次到訪算係晌春尾，櫻花無咁盛放，此外，當然規模上未必及得上日本一啲知名嘅賞櫻公園，仲有，花種亦有所不同，日本常見嘅櫻花係五瓣嗰隻，依度見到嘅就成個繡球咁款。所以，整體效果唔算靚到嘩嘩聲，但都叫第一次睇到咁多櫻花，都心足架喇！聽說每年都會搞個櫻花節，有心嘅嚟嘅都可以留意吓。

1953年建園時，展出嘅動物僅有4種，共4只；目前，全園已有動物140多種，大小夾埋近千隻，如大象、野牛、棕頸犀鳥、黑尾蟒、小熊貓、黑長臂猿、金錢豹、葉猴、金絲猴、東北虎、大熊貓、大雕、袋鼠、美洲獅、非洲斑馬……等等，雖然種類多，但打理得唔多好，啲動物睇落好殘、好孤伶伶、兼且無乜精神。仲有個兒童娛樂區，竟然係廿多三十年前荔園見嗰啲，勾起啲孩童回憶。

雲南大學只係作為我哋攝時間嘅景點，所以無話花太多時間去行，只係行咗一小部分，其實雲南大學佔地都幾大，面積大概有4,551畝，即係有幾多平方米？抱歉，我都唔係好識！不過，她被定點為全國50強，努力建成「西部一流、國內先進、國際知名」嘅區域性高水準研究型綜合大學，自有其特點。

講番個校園，幾寧靜，環境清幽，建築物有中有西，部份仲起得好典雅，原來雲南大學都有近成90年歷史。輕輕鬆咁晌度行下，都可緩和一下心情。

「壽山動物園」雖然位處高雄市壽山，但其實晌壽山東南方邊位，鄰近緊接著市區，所以交通相當之便利。原來，壽山動物園最早晌1978年成立於『西子灣風景特定區』，名為「西子灣動物園」，2年後因市政府想爭取中山大學設校，就將原處嘅動物園搬遷去現在嘅『壽山風景區』，所以都改埋名叫「壽山動物園」。1986年年中先完成園區內全部設施，隨後對外開放參觀，不過，個人感覺之前啲規劃有啲兒戲喎！

壽山動物園雖然佔地面積唔算好大，不過，園區內飼養咗成百多種來自世界各地嘅珍禽異獸，數量多達一千三百多隻，都算得上非常齊全，仲有啲稀有品種添，如台灣黑熊。而且，園區以多元化設計，有開放式（如「友禽天地」，以天網罩住上頂，所有雀鳥可隨意走動；或馬棚、羊棚）、半開放式（大部份動物區）、同封閉式（獅子、老虎、黑猩猩）。仲有，每個展區，都為每款動物製作介紹牌，各有故事，相當有寓教於娛樂嘅地方。加上動物園內仲有數百餘種嘅原生植物，所以令到「壽山動物園」環境更閒適！

上文介紹過打狗英國領事館環境真係幾正，而晌領事館側有個露天茶座，由Pu Lsate（舌尖舞芭蕾咖啡）經營，係度嘆番個英式下午茶，曬曬樹叢透下嘅陽光，望望海，望望山，幾賞心樂事呀！

雖然之前講到領事館個景點正點正，但露天茶座就縮晌一邊，景觀唔係咁全面，主要對住高雄市同旗津島，望正旗津渡輪站，不過，咁嘅景觀都好唔錯啦！但坐位你都要眼明手快，因為個場大概廿多張枱，只有近邊嗰6、7張至係揀手位，坐低都望到海，其他「內陸」位就當然差少少啦。之不過，整體個場都幾舒服，因為大樹好遮陰嘛，又架起咗太陽傘，唔怕有嘢跌落嚟。

講到食，其實唔單只嚟tea嘅，佢營業時間由朝到晚，選擇有風味餐點（如：義大利肉醬麵、和風咖哩雞腿飯……）、銅鑼燒、蛋糕、點心（如：東港鮮鮪魚捲、脆皮薯條……）、茶飲果汁（如：奶茶紅茶、有機鮮果汁、氣泡水……）、有機咖啡，所以話呢，食晏又得，晚飯開餐都得，得咗！

至於我同太太試嘅英式傳統下午茶，就只晌2:30om-5:00pm供應，TWD390一份兩人用，唔收10％服務費。傳統風格，三層架方式分層呈現，再配任何飲品兩杯，冷熱隨意，折番唔使港紙一百，有靚景睇，有嘢飲有嘢食，確係幾抵！

第一層（上層）：蛋糕加手工餅乾，而蛋糕三選一（重乳酪、提拉米蘇、黑森林），我哋揀咗重乳酪，即係焗嘅芝士蛋糕，質感就如同美國芝士餅，芝士打得頗挺身，芝味超濃；而手工餅乾係幾條朱古力餅乾條，唔算有咩特別。
第二層（中層）：時令鮮果拼盤，有哈蜜瓜、西瓜、菠蘿、提子、熱情果同番石榴（芭樂），都幾大堆頭！
第三層（底層）：一整份公司三文治，烘底麵包，餡料包括蛋、蕃茄、青瓜、火腿，用料較簡單。
老實講，整體食物唔算好突出，除咗件餅，其他只可用中不錯嚟形容。

反而，兩杯嘢飲又幾OK喎，一杯係熱嘅卡布奇諾咖啡，另一杯係凍嘅香柚綠茶；前者甘醇細滑、後者清甜有個性，正正各有所長。

小王子烘焙坊所賣嘅嘢都幾多元化，有歐陸麵包、特色麵包、西餅、蛋糕、手工曲奇……，應有盡有，仲以「精緻，天然，健康」製作忠旨。怪不得幫襯當日都唔少人買包買餅。

芒果慕斯蛋糕TWD55
長條形蛋糕，造型簡潔，牛油消化餅底，加一層芒果果肉，再上就係海綿蛋糕，面面唧出芒果忌廉花，簡單得嚟又見其心思，味道多層次，芒果果肉清甜，只係嫌佢少。

朱古力蛋糕TWD60
經典嘅朱古力蛋糕，黑朱古力來自比利時，以微微濕潤嘅朱古力蛋糕，配上黑朱古力同忌廉打做嘅朱古力醬，一層疊一層，再晌上面砌出朱古力裝飾，灑啲唂咕粉。味道苦甜而濃郁，柔軟而有質感，無可媲美嘅滋味。

丹麥酥麵包TWD75
見佢一磚磚金磚丹麥酥麵包新鮮出爐，一袋袋大概好似平時晌超市見嘉頓隻8片方包份量，只係賣TWD75，即係廿蚊唔使，真係撞鬼囉，抵食到咁。你晌香港出晒名嗰間博洛尼亞度買，都成十幾蚊先得一片，所以，順手買一袋走，拎返香港當第二朝早餐啦。雖然隔咗一日先食，但依然咁好食，外層丹麥酥外皮，酥香非常，裡面包身帶點嚼勁，烘番熱，搽點果醬，簡單而好味嘅早餐，雖然杯咖啡係三合一，但麵包先係主角，都無所謂啦！

抄少少網上嘅介紹資料俾大家睇睇先：「旗后山頂上的旗津燈塔，又稱高雄燈塔，是台灣少數僅存的清代燈塔之一。建於西元1883年，是台灣本島上的第二座燈塔（第一座為屏東鵝鑾鼻燈塔）。1918年整修過後，塔身為磚造八角形白色建築，黑色圓形頂，高15.2m。」

由碼頭行過嚟，計埋上山到燈塔，大概預20min左右。不過，通往旗津燈塔嘅路隱身晌老街、巷弄內，啲指示被人塗鴉得唔太清楚，不過一般都搵到上山條路，因為山腳有大大個嘅圖形牌。燈塔位處旗津島嘅盡頭，一眼望晒成個島係點，而最正係晌眺望台上可以盡覽台灣海峽、高雄港、柴山、西子灣美景，以及近距離望到進出港口嘅大型船隻，景致真係一流。我哋仲晌燈塔旁嘅樹下吹吹風，幾鬼寫意，係差咗杯凍啡同件cake啫。

此外，燈塔園區裡其中一幢建築物開闢為小小博物館，有燈塔園區模型，燈塔嘅不同景觀相片及一啲相關物品嘅展示，所以，絕對值得一遊。

夜市就唔一定凈係食，瑞豐依度仲有玩嘅（懷舊玩意彈波波贏獎品）、買嘅（衫褲鞋襪、流行飾品），商品五花八門。不過，檔口雖多，但就過於擠逼，所以，總係人山人海，還好嘅係嚟到嘅人都頗有秩序，唔會左推右擠，算係好有氣氛，非常熱鬧。

無數過有幾多檔小食，總之就多，粗略斷估都上百檔，就係唔知點抉擇，真係心緒交戰。反正小弟食乜都無所謂，重任就交晌老婆手上，由佢發辦，我俾錢。

食過以下幾款，未必係最好，只係想食就想嘅決定：
日式鹽燒雞腿 - 慢工出細貨，等好耐，拎住個籌食完一兩樣嘢返去攞都未遲。TWD40一串，雞肉燒我鹹香惹味，肉質都唔錯，只係唔算太特色！
水煎餃 - 水煎變奏，餃底香脆，肉餡OK，此外就唔算有咩特別。
鹵味大雜會 - 色澤頗深，滷得入味，而無過鹹。
鮮果汁 - 飲嘢晌台灣永遠係最抵，真才實料，睇住佢落，又夠晒大杯喎。芭樂汁（即係番石榴）TWD25、芒果汁TWD30，前者味道帶酸，冰凍醒神；後者味道鮮甜，濃郁果香，正呀！

仲有好多嘢想試，但老婆話夠皮，而且都成十點幾，就咁算住先。

每逢去到一個景點，總係鍾意搵佢張導遊圖影張相，留念之餘，亦影低一啲景點資料。嚟到九龍瀑布群，依個又係指定動作。不過，個圖有啲搞笑，上面大字嘅九龍瀑布英文就意譯（nine-dragon waferfall），下面嘅細字就用咗廣東話嘅音譯（Kowloon），咁快就返到九龍就好呀，唔使又飛機，又長途車嚟羅平喇！

九龍瀑布群，係國家AAAA級旅遊區、雲南省省級風景名勝區，都幾有名氣，雖然叫「九龍」，但就有十個高低寬窄不等嘅瀑布，稱得上形態各異，美不勝收。原來「九龍」之意係在於瀑布位處九龍河上。景區有成4公里長，一般都唔會行晒，多數入咗景區後，穿過迎賓瀑，過橋經過月牙湖，再坐登山纜車（入場費唔包，另外再收RMB30位），上到觀景台，先嚟個鳥瞰一目觀十瀑，再由山頂行番落山，睇番幾組瀑布，波光閃爍，行吓影吓相，輕輕鬆鬆咁行，兩個鐘都夠晒！

講到瀑布，最主打係最大嘅「神龍瀑」，高56米，寬112米，堪稱九龍第一瀑布。至於，第二瀑布「情人瀑」（高43米，寬39米）、第三瀑布「白絮瀑」（高19米，寬120米）及「石龍漫游瀑」（高16米，寬40米）都係晌上游較高較遠位置，行去要再花較多時間，除非想睇晒所有瀑布，否則，可考慮睇完神龍瀑就打道回府，再者，回程仲有其他規模細啲嘅瀑布及唔同景觀，均各具特色。

因為依家未係雨季，唔係咁啱時間，所以，只係睇到九龍瀑布嘅形態，就差咗啲氣勢。如果唔係，晌豐水季節，遠在數里之外都聽到水流巨響，應幾有震撼山河之勢。

九龍瀑布門票原價RMB75，同程網(http://www.17u.cn/)預訂價為RMB70，慳得一蚊得一蚊。

魯布革水電站位於雲貴兩省交界嘅深山峽穀之中，為混合式水電站，電站問1957年開始初步規劃，1982年11月開工建設，1985年11月截流，1988年12月第一台機組投產發電，1990年底建成，歷時成幾十年架，係雲南電網嘅電廠主力，所以，佢都幾巴閉，95%嘅電量輸往雲南昆明市、曲靖市等地，其餘嘅就輸往貴州省興義市。

國家AAA 級風景旅遊區，係一個以亞熱帶同布依族風情相結合嘅自然景區。晌全長約12公里嘅河道上，分佈著40多個小型瀑布、疊水、鈣化灘，主要景觀有：多依勝景、板台瀑布群、飛花碎玉、水車功能展示區、仙人潭、水車群、一目十灘、雷公灘瀑布、處女瀑布、鴛鴦瀑布……等。個人建議，晌景區入口位坐觀光車（類似哥爾夫球車，另車費單程RMB20位）先去到觀光車終點站，再由裡面行番出嚟，咁樣就慳咗啲時間，又唔使走回頭路。不過，就算係咁，終點站都只係去到雷公灘瀑布，仲有打後嘅景點就要另外再兜入去。所以預幾耐時間要睇你取向，如果只有雷公灘瀑布行番出去，大概1.5-2鐘搞掂，假如入到盡，可能要多1個鐘！晌裡面仲可以玩竹筏漂流、橡皮艇漂流、騎馬，不過，唔知係咪淡季，遊客少，見竹筏漂流、橡皮艇漂流晌河邊拋晒錨，騎馬就都見有個疑似負責人係度嘅。

其實成條多依河都幾清幽，尤其今日我哋所見，遊人唔多，就更加寧靜，仿佛一片世外桃源咁款。多依河晌山坳中蜿蜒流淌，沿著如層層梯田般嘅鈣化灘、瀑布群溢流而下，山坳中又見到布依山寨散落期間，不時冒出一縷縷炊煙，時有一、兩個布依村民來來往往。沿河兩岸，種植咗好多古榕灌木，錯落有致；河道之上，又不時見到大大小小水車在滾動，若細心留意，就會發覺每個水車都展現出不同功能，有運水嘅，有推動石磨嘅，都幾得意有趣。再配上水聲鳥語立體聲，洋溢著淳樸風情！

布依族，逐水草而居嘅少數民族，散居於貴州、雲南及四川一帶。晌景區門口，就滿眼都係頭戴頭巾、身穿藍衣嘅布依族婦女，有啲兜售精巧嘅手製水車，有啲就售賣以鮮花染成嘅五色花飯，我哋好奇但未有試。整體嚟講，多依河景區可考慮晌遊覽之列，但就唔係必然景點喇。

溫馨提示：多依河門票原價RMB75，同程網(http://www.17u.cn/)預訂價為RMB50，又可以慳5蚊！