最近分享過的旅程 |
共找到 117 篇遊記, 正顯示第 51 至 60 篇遊記 |
9月5日(炎):鑽石公主郵輪東瀛遊第六日之Otaru 小樽
其實一年前已跟家人去過北海道,當時單靠火車及地鐡自遊行咗五日,記得印象最深刻就係「小樽」(Otaru)。「小樽」o既購物熱店,觀光景點及餐廳食肆位置都好集中,有咗上一次o既經驗後要規劃是次小樽一天遊亦簡單得多。
同上次一樣,我地主要都係以雙腿及散策循環巴士往返不同地點。由於行程都幾緊密吓,大隊朝早八點半就出發,買完頭輪手信後即喺市內名店「LeTao」嘆杯熱朱古力及超人氣芝士蛋糕做早餐,然後就由街尾開始掃起,由音樂盒博物館到試酒場,由皮革店到蜂蜜專門店,去到邊買到邊,買到差不多夠鐘就喺附近o既巴士站度上車去壽司街間「旭壽司」狂食魚生。
可能早上行得都幾多路吓,長輩們都話飯後想飲番杯咖啡先再繼續逛,無奈壽司屋並無咖啡供應,團友們只好順住條路搵,咁好彩行咗一分鐘就俾我地發現到一家細小o既家庭式茶屋「茶房おこばち Okobachi Café」。喺小屋內休息咗一個鐘頭左右,十二人又再次起行去運河嗰邊睇景,喺免稅店買咗第N輪手信後就慢慢行去「北之漁場」豪食即燒活鱈場蟹做下午茶。
食完個豐盛o既下午茶,幾位較年長o既團友就由大肥爸爸帶領下,搭巴士返回郵輪。其餘八人則襯歡樂時光,喺附近一家隱蔽o既小酒吧「Nikka Bar Rita」度飲咗round限量版威士忌,緊住再去觀賞運河o既夜景,之後仲要食多碗巨型拉麵後方才趕回「鑽石公主」,可謂玩到盡呀!
9月4日(陰):鑽石公主郵輪東瀛遊第五日之Korsakov 科爾薩科夫
繼早一日喺海中心遠觀過世界自然遺產「知床半島」後,「鑽石公主」即往北航行,與日本暫別,並於俄羅斯最大o既島嶼「庫頁島」(Sakhalin Island)附近o既海域停泊咗大半日。
由於俄國入境深嚴,新法例好多限制,據悉市內治安又唔係咁好,未有參加岸上觀光團o既旅客好多都情願留返喺郵輪上,團友十二人中亦僅有五個夠膽短遊小鎮「科爾薩科夫」(Korsakov)半小時。五人當中最驚青都應該要數年紀最輕o既小肥,不過好好彩,落咗船後居然俾蕃薯Uncle搵到兩個同為香港遊客o既「森湯」壯漢作伴及保鑣,總算無驚無險。
中午時份大隊喺十四樓度會合食自助午餐,然後就睇大肥爸爸學跳舞,三點再轉場去咗歡樂時光有買一送一優惠o既「Wheelhouse Bar」輕鬆度過,飲吓傾吓就夠鐘去船上另一間主題餐廳「Sterling Steakhouse」鋸扒食晚飯。扒房o既牛扒只可以話係一般,反而啲海鮮菜式更為精巧,似乎有少少諷刺囉。9月3日(多雲):鑽石公主郵輪東瀛遊第四日之Shiretoko Peninsula知床半島
對上兩次郵輪河「水晶號」都會喺每一個站停泊半日至兩日,好讓旅客上岸遊玩一番,今次「鑽石公主號」就有少少唔同,因為其中一站為只可以從郵輪上遠觀o既世界遺產「知床半島」(Shiretoko Peninsula),聽落好似有啲新鮮神秘感,不過感覺其實同「At Sea」日無異。
從「公主日報」得知船隻將於下午三時喺「知床半島」區域慢駛及現場廣播,團友們就約好中午時份先去「鑽石公主」另外一間主題餐廳「Kai Sushi」度食日本料理作午餐,然後一齊上去甲板霸定個靚位睇半島靚景。
吹完幾個鐘頭唔知係西北定東北風之後,幾位長輩都有感頭痛不適,眼見個景冇乜料到,團長就提議自由活動一陣,傍晚歡樂時光再喺酒吧「Wheelhouse Bar」度會合,飲到夠鐘先去主餐廳度食晚飯。飯後o既的士高舞聚就冇開頭嗰兩晚咁過癮啦,儘管我地中途採取罷跳以示不滿,個DJ都毫無意識要為音樂作出調整,結果大隊飲完一輪即起身離開,返回房間休息。
9月2日(霧):鑽石公主郵輪東瀛遊第三日之Kushiro 釧路
由橫濱出發,「鑽石公主」第一個目的地為「釧路」(Kushiro)。釧路係北海道第四大都市,而且係北海道東部最大o既城市,因市內經常起霧,所以又有「霧城」之稱。釧路接近太平洋o既位置有利漁業,故亦好順理成章地成為日本最大o既幾個漁港之一,喺度食海產當真好似食頭啖湯咁新鮮。此外,由於春至夏季o既暖流風向,郊區有好多濕地公園勝地,好多旅客都會專登搭火車去探索一下大自然o既氣息。
雖然「鑽石公主」受颱風影響而遲咗幾個鐘頭起航,結果卻能依照原訂計劃於早上七時到港,證明船長喺掌握時間上控制得好好。因為郵輪只係會停留喺釧路港口六小時,搭客於下午一點半前必需返會碼頭,肥肥家族對大自然風貌及博物館又唔係話十分有興趣,團長就棄選參加郵輪o既貴價濕地及博物館旅行團,而堅決玩自遊行。我地朝早七點半就起行,坐免費穿梭巴士入城。城內主要有兩個值得遊覽o既景點,巴士站就設於其中之一o既「漁人碼頭MOO」旁,從該處步行去另外一點o既「和商市場」都只係需要十五分鐘左右,一個朝早o既時間要遊哂兩個地方話都冇咁易。
中午過後返回船隻,團長就帶隊上去十四樓o既「Trident Grill」度醫肚。喺游泳池旁o既餐廳雖屬快餐店,但其熱狗、漢堡包及薯條全為即叫即煮,新鮮熱辣又美味,好食過嗰個貴多不貴精o既自助餐多多聲囉!
可能大家朝早實在早起,飯後都要去小休,好少午睡o既小肥就走咗去做運動同打咗陣機,到傍晚時份先再會合長輩們一齊去公主號主題餐廳之一o既「Sabatini’s」度食意大利餐。上滿電o既團友精力充沛,飲完幾輪酒後就去咗頂樓個「Skywalkers Nightclub」度跳舞消脂,玩到盡興至返房。
評分: 味道4 服務5 環境5 衛生5 抵食4
9月1日(炎):鑽石公主郵輪東瀛遊第二日 之At Sea
通常郵輪河於開船後翌日都會係「At Sea」日,即全日喺海中渡過,今次「鑽石公主東瀛遊」亦是如此。深知接著落黎成個星期都要早起,XO仔就襯依日咁空閒瞓耐少少,中午時份先起身同班團友喺十四樓個「Horizon Court」度會合,食個自助式早午餐。
飯後我地有幾個爛賭鬼去拉機、其他人就去咗學跳舞、做gym等等,總知各有各忙,中途大約三點三就再集合一齊去六樓個「International Dining Room」度嘆下午茶。
當晚o既晚餐為「Captain’s Welcome Dinner」,喺指定餐廳用膳要跟隨服裝指引,亦即不能穿著短褲、牛仔褲、波鞋等便服,搭客都會襯機著靚啲,排隊搵駐船o既專業攝影師拍番幾輯靚相。平心而論,晚餐美味程度只可以話係比一般好少少,反而女士們o既盛裝打扮就贏得不少途人及服務生o既讚賞,逗得佢地十分高興。
同遊o既長輩雖然個個年過六、七旬,但係佢地真係精力旺盛,首個晚上暢飲完幾輪,大隊仲上咗去十八樓個disco包場跳舞,玩到盡興先返房休息,勁爆!
8月31日(炎):鑽石公主郵輪東瀛遊第一日之Yokohama 橫濱
由於日本受到颱風「獅子山」襲擊,海上強勁o既風浪影響到「鑽石公主」郵輪於8月31日遲咗泊岸,我地o既郵輪河亦因而有所延誤,當日登船時間由原定o既中午時份押後為下午四時。幸好今次入住o既「橫濱灣喜來登酒店及觀景塔」(Yokohama Bay Sheraton Hotel & Towers)位置方便,乘搭電梯往下即通往地下街,連駁住多間商場,向上經行人天橋又可直達「高島屋」,要購物覓食真係話都冇咁易。
既然區內四周都係食肆,酒店早餐連加一又要成差不多5,000円一位,朝早起牀大隊就先喺大堂集合,一齊行去地下街度搵咗間咖啡屋歇腳。食完個簡單o既早餐後,部分團友先去「東急ハンズ横浜店」(Tokyu Hands Yokohama Shop)濕咗陣平,然後先返房收拾行裝,趕及中午前辦理退房手續。
愛情電影就玩「向左走,向右走」,肥肥家族當日則玩「向下走,向上走」,早上向下行完地下街,下午就向上經行人天橋通往日本名百貨公司「高島屋」,食晏同行街街,多咗個四個鐘頭眨吓眼就過咗。下午四點正,團友十二人就分乘三架的士往橫濱「大さん橋」郵輪碼頭登船。郵輪結果要到晚上用餐時間,即八點過後方才起航,向北海道進發。
大肥爸爸給予「鑽石公主」號(Diamond Princess)第一句評語可謂一針見血,真係「最怕貨比貨」!「鑽石公主」同之前肥肥家族搭過o既「水晶平靜」號(Crystal Serenity)無論係房間配套、船上設施、服務質素、膳食質量、娛樂項目等,各方面都明顯更為遜色,當真為天壤之別,詳情就等細佬喺接著落黎o既遊記度慢慢敘述。
自從坐過超級豪華o既「水晶號」渡假之後,家人彷彿已獨愛上郵輪式旅遊。無他o既,郵輪河除咗可以喺船上享用美酒佳餚,更可一次過遊覽多個城市,又唔洗擔心要重複收拾行李、轉換酒店等,當真節省不少氣力同時間。2016年初,聽到親友極力推薦「鑽石公主號」郵輪其中一條北海道航線後,家人就立即組團兼訂位,規劃八、九月o既東瀛遊。
8月30日(晴):鑽石公主郵輪河前夕之 Yokohama橫濱
「鑽石公主號」定於八月三十一日黃昏由橫濱出發,環繞北海道一周後,於九月九日返回橫濱。肥肥家族與親友一行十二人早一日就喺香港出發,乘搭香港航空暑假新增之航班HX 610直飛東京成田機場,到步後即轉乘巴士前往橫濱,於酒店「橫濱灣喜來登酒店及觀景塔」留宿一宵。
大隊抵達酒店時已經係午夜時份,雖然飛機上有晚餐供應,不過質素麻麻,又早食,喺機場坐完個幾鐘頭車後個個肚仔都打行哂鼓,所以喺酒店辦妥好手續後,我地就行咗去間營業至深夜o既居酒屋度醫肚,旅程第一晚經已玩到凌晨先返房休息。11月21日(陰)
廣告話齋,去旅遊要盡興梗係要「早機去,晚機返」啦,所以六人就選擇乘搭傍晚時份o既航班離台。
朝早食完個自助早餐,即由酒店出發前往台灣名牌麵包店「吳寶春麥方店」度瘋購最後一輪手信。午餐就聽旅遊書推薦,去咗一間有小籠包食o既「邊田庄」度品嚐潮派江浙菜;菜式美如花藝,味道出眾又抵食,女士們都話下次要帶埋班好姊妹返轉頭。
因為早一日未能成功朝聖,XO仔同表妹去機場前決意比多次機會大家,睇吓同「StayReal Café」係咪真係咁緣薄。哈,點知原來相反,店子除咗地庫剛巧有張八人枱之外,該週六仲要係店慶日,飲品全部買一送一,配埋個可口窩夫在甜品,口裡心中都洋溢著甜絲絲,更為是次台北之旅增添美好o既回憶,當真不枉此行!11月20日(陰)
由於早一日已拜會過幾位長輩親友,我地第三日就好輕鬆咁喺表姨所介紹o既「台南三哥海鮮」度食咗頓豐富o既地道海鮮午餐,然後就去咗「梅林水果行」訂生果做手信。
下晝再戰「StayReal」間旗艦店時,其實原本諗住下午茶時間可以順道行過去隔離同屬阿信開設o既「StayReal Café」度繼續朝聖,服務生卻告知全店已滿座,最快都要成個鐘後先有機會有位。眼見姨媽們已面露疲態,外出又開始有少少雨粉,XO仔同表妹兩個五月天迷最終決定轉場,留待臨去機場前先再一試同阿信間咖啡屋有冇緣份。
應堂細佬推介,六人晚餐去咗「寬巷子」度打邊爐。火鍋店不但環境高雅,服務稱心,單憑每道餸菜o既外型,足以教人眼前一亮,未食已大飽眼福,食後更令團友們讚不絕口,成功為視覺及味蕾帶黎無限o既驚喜。
11月19日(陰)
表妹經常外遊,深知台北o既商店大多要十一點後先開門,故訂酒店時亦一早注明要包埋早餐,好等姨媽們唔洗急於起牀出動。團友六人每朝早就喺酒店餐廳「探索廚房」度集合,食完個自助早餐就出去行街街。
由於今次旋風式訪台只有三天時間,抵台翌日XO仔迅即把握機會約會已多月不見o既台灣女朋友,搵佢帶路與家人一同品嚐近日喺香港都頗有名氣o既「三井」日本料理。
享用完一頓又靚又好味o既日本菜,女士們都急不及待要以血拼黎消脂,六人由書店逛到去文具店、服裝店、鞋店、精品店等,淨係鞋都每人最少有一對收穫,講真小肥同表妹少啲手力都未必會應付得到。買到太陽差不多落山時,大家終於咖啡癮起,忍唔住要喺商場內搵個地方嘆下午茶。由於傍晚時份約咗居台多年o既舅父仔同舅公食晚飯,姨媽們飲完咖啡後就決定要返酒店,放好戰利品,稍作休息,並略為梳洗一番。
兩位長輩真係相當客氣,除咗油淡水揸咗架車黎接送我地六個人,仲請我地去酒店中菜廳「天香樓」度食高級杭州菜,飯後仲每人一大袋手信,身為晚輩o既小肥又食又拎,真係覺得唔係幾好意思,請容許細佬在此再次向舅父仔同舅公道謝!