最近分享過的旅程 |
共找到 117 篇遊記, 正顯示第 71 至 80 篇遊記 |
2月20日(晴):Crystal Serenity Day #11 之香港
是次東瀛郵輪河終站為香港,泊岸時間預定為傍晚六時,代表旅程只剩下半天時間於公海讓小肥與姨媽及媽咪攻打老虎機。我地三人並非病態賭徒,喺賭場其實都只係短短逗留咗一、兩個鐘,成績雖未如理想,但都玩得好開心。
當日除咗拉機活動,團友十人朝早都有一齊睇表演,午餐後亦一同上跳舞班,學「American Style Viennese Waltz Variations」。而晚上因肥肥家族要出席兩代好友之飲宴,故船隻到港後便與團友們暫別,相約翌日再見。
2月19日(多雲):Crystal Serenity Day #10 之At Sea
全因早一晚玩得太顛,溝酒溝得太勁,加上南中國海波濤洶湧,小肥實在無法九時半起床,參與客席廚師Hans Peter Fink先生o既甜品烹飪班,到餓醒o既時候已經差不多中午。見距離午餐集合時間尚有十分鐘,XO仔就靜靜雞走咗落去Crystal Cove度先飲返杯回魂酒,定一定神再上十二樓Lido Café食自助午餐。
話就話休息咗成個上午,但可能海勢不穩,個人精神狀態未為最佳,故午膳後小肥自行於七樓步行運動,兩點鐘再會合團友們一同參加老虎機大賽。比賽中隊友四人都空手而回,拉機心情卻無減,玩多個幾鐘頭後先各有各活動。
郵輪河最後一個「At Sea」日,船長於傍晚舉辦咗個雞尾酒會與搭客會面傾談道別,由Crystal Sextet伴奏音樂,歡迎賓客飲酒跳舞。當晚衣著規定為「formal」,梳洗亦較費時,既然男女老幼都扮到咁靚,郵輪上o既專業攝影師又準備咗幾款不同佈景,好多乘客都會襯機影返幾輯相留念,極少會到影樓拍照o既肥肥家族當然係唔會執輸啦!由於加插咗雞尾酒會,Crystal就將晚上o既歌舞節目順延至八點四十五分同十點四十五分兩場;我地八點半食晚飯,睇完第二場表演都已經係深夜十二點。
評分: 味道5 服務5 環境5 衛生5 抵食5
2月18日(陰):Crystal Serenity Day #9 之上海
團友們曾多次遊上海,亦已參觀過市內大部份o既名勝,小肥兩兄弟又唔係咁有興趣於上海觀光,故此當日行程較為他條簡單,只為一個「食」字。
早上起牀,大家各自各進食過自助早餐,十一點半就集合乘坐穿梭巴士出市中心外灘,再轉搭的士前往「上海老站」享用午膳。午餐後即返回郵輪,步行運動上兩小時,嘆咗個下午茶,再經梳洗一翻,Happy Hour未到就已經開始飲酒。Crystal原定晚上七時駛離上海港口,但不知為何,歌唱表演完畢後,船隻都未有動靜離開,要等到晚餐中途,大約九點鐘左右先起錨向香港進發。
大隊喺上海兩日比較hea,翌日又為「At Sea」日,所以飯後仍精力充沛,毫無欲睡之意;既然冇人想訓,當然係一齊去玩啦!十人同行,九點半鐘先去六樓個disco bar「Pulse」度唱K跳舞,到十一點就再轉場上去十二樓Palm Court食宵夜跳交際舞,結果玩到成點幾先捨得返房休息。
評分: 味道5 服務5 環境5 衛生5 抵食5
2月17日(陰):Crystal Serenity Day #8 之上海
小肥手持回鄉証多年,卻未曾飛往祖國,今次坐郵輪遊日本終於有機會到訪全國主城之一o既上海!由於團友們對上海毫不陌生,又能用國語跟當地人溝通,大家決定逗留喺上海o既兩日都以的士代步尋找美食。
Crystal Serenity於朝早八時泊岸,九時開始提供每半小時一班o既免費穿梭巴士來往碼頭及外灘黃浦公園,但搭客必需於十時半前先跟入境主任進行會面後方能外出,就連持中國護照或回鄉証者都唔例外。
我地團友八人,早上食過自助式早餐後,就乘坐九點半班車前往市中心。當日只有兩個目的,就係去買手信同埋食人氣食品「南翔小籠包」,由於餐館離巴士站只有半小時步行路程,故團長決定健康啲,由黃浦公園一邊行去「南翔饅頭店」,一邊觀賞以其建築物聞名o既上海外灘,飯後團員可自行選擇直接打的回巴士站或搭地鐡先購物再回郵輪。
因穿梭巴士每程約個多鐘頭,加上放工時間路面情況擠塞,我地差不多成七點先返上船。稍作休息,睇咗場超高水準o既平衡體操表演,再於Crystal Dining Room食完餐勁之後,仲有餘力o既肥肥家族決定步行消脂,夠鐘再戰當晚特備節目之buffet宵夜!
評分: 味道5 服務5 環境5 衛生5 抵食5
2月16日(多雲):Crystal Serenity Day #7 之At Sea
郵輪駛離長崎鶴港翌日係旅途o既第三日“At Sea”,Crystal當然係為搭客排滿咗精彩節目及活動啦!
小肥十一點起身,剛好教啱時間食Sunday Brunch,下午則忙著學跳舞、學攝影、玩老虎機。入夜就更加精彩,Happy Hour過後我地先欣賞咗場歌舞表演,跟住就參加咗個為舊搭客舉行o既雞尾酒會。於Prego享用完一頓豐盛o既意大利晚餐後,換上裝備,活力充沛o既團友們又再勁跳rock & roll!
全晚高潮位就發生於特備節目「‘50s & ‘60s Sock Hop」中,當全場最肥o既大肥爸爸同靚靚媽咪攜手贏取扭腰舞比賽冠軍!其實大肥o既勝利得來不易,因為除咗輸蝕在其巨大o既身形之外,跳到中途對鞋已經出咗事,比賽結束時鞋底仲甩埋添,哈哈,蝦碌得黎總算有個happy ending!
評分: 味道5 服務5 環境5 衛生5 抵食5
評分: 味道5 服務5 環境5 衛生5 抵食5
2月15日(多雲):Crystal Serenity Day #6 之Nagasaki長崎
Crystal郵輪停泊於日本o既最後一站為長崎(Nagasaki);一講起長崎,團友們都異口同聲話一定要去市內最具代表性o既「長崎原爆資料館」(The Nagasaki Atomic Bomb Museum)。眼見市內除咗原子彈博物館之外,亦有不少歷史文物及觀光點,自行遊覽又較為繁複費時,所以團長就決定索性參加Crystal所安排o既Panoramic Nagasaki Tour,有旅遊巴坐,唔洗咁頻撲,又有導遊講解,一舉多得。
Panoramic Nagasaki Tour朝早八點半出發,全程約四小時,當大隊返回郵輪都差不多成一點鐘。由於所有搭客必需於下午三至五時,與入境主任進行面談,長輩們都唔想再出去逛,然後又趕返碼頭,最後只有小肥同哥哥二人乘坐穿梭巴士出市中心,為東瀛購物作最後衝刺;購物o既同時當然亦不忘於超市買下超正魚生與團友們分享啦!
辦妥好離境手續,食完頂級魚生,話咁快Crystal Serenity就起航往上海進發。可能因為跟住嗰日唔洗早起身啦,喺Galaxy Lounge度睇完場視覺表演「iLuminate」,食完頓豐富o既晚餐之後,大伙兒都意猶未盡,結果就去咗Stardust聽鋼琴獨奏,再上頂樓繼續飲酒跳舞。
2月14日(多雲):Crystal Serenity Day #5 之At Sea的情人節
郵輪河第二日o既 “At Sea” 碰巧係情人節,雖然全日於海中心渡過,但氣氛有增無減!Crystal除咗悉心佈置郵輪每一個角落之外,更安排咗一連串o既特備節目及多款應節美食與搭客一同慶祝,真係花盡心思!我地由朝早十一點飲到凌晨十二點,由五樓玩到十二樓,無論係大人定細路,單身者亦或係有情人,大家都玩得咁開心盡興!!
評分: 味道5 服務5 環境5 衛生5 抵食5
評分: 味道5 服務5 環境5 衛生5 抵食5
2月13日(多雲):Crystal Serenity Day #4 之Osaka大阪
郵輪河首站為大阪,哥哥一大清早,六點都未夠就叫醒細佬起身睇Crystal Serenity泊岸!爛訓豬XO仔影完相當然係上返張牀啦,因為距離同團友們喺Lido Café集合o既八點仲有個幾鐘。
我地一行十人,食完自助早餐就一齊落船,乘搭Crystal安排o既免費旅遊巴士往大阪市中心o既心斎橋區(Shinsaibashi)進行瘋狂購物!雖然喺嗰區只係逗留咗一個上午同半個下午,而且有一大半商店我地都未行得到,但係我地四點半坐回程巴士返上船時,各人都滿載而歸;眼見我地拎住咁多野,其他搭客都不禁望多兩眼!
肥肥家族最愛遊日本,因為除咗有靚景睇,同勁多o既購物熱點之外,市內市外都有好多美食天堂隱藏於超級市場o既最底層,我地每次經過都例必購買多盒魚生作下午茶或於Happy Hour時段作送酒之用!嘻嘻,今次喺大阪,上回程巴士前,我地就走咗入去巴士站附近o既大丸度買咗幾盒返上船食,oishii desu nee!
我地喺The Bistro食完頓豐富o既魚生下午茶後就各自回房間梳洗休息,整頓戰利品,七點半鐘再約返落去五樓Crystal Dining Room旁o既Crystal Cove度Happy Hour。嘩,班女士們真係快手,轉個頭已經換上新衫,靚盡全場!正當大家一邊飲酒及讚美女團友時,Crystal Cove個舞池突然出現咗多位日藉工作人員,忙碌地set場,原來大阪市為歡迎及歡送一眾Crystal搭客,當晚特別安排咗約三十分鐘o既餘興節目。表演完畢後,正好係晚飯時間,我地就直接走咗入去Crystal Dining Room用膳。由於跟住嗰日將會喺郵輪上渡過,唔需要早起身,所以食完飯,我地成班就上咗去十二樓o既Palm Court度欣賞The Crystal Sextet現場彈奏音樂,一邊飲酒,一邊跳舞,玩到凌晨十二點半先盡興而返!
評分: 味道5 服務5 環境5 衛生5 抵食5
2月12日(多雲):Crystal Serenity Day #3 之At Sea
我地今次Crystal Serenity郵輪東瀛遊共有三天“At Sea”,即全天於海中渡過,而離開橫濱翌日就係是次郵輪河o既第一日“At Sea”。
嗰朝早我地八點半先喺Crystal Dining Room享用早餐,然後就各自各去自由活動:大肥爸爸去咗打橋牌、媽咪去咗做按摩、auntie去咗洗頭扮靚靚、姨媽姨丈同小肥兩兄弟就去咗做運動。十二點再約返喺十二樓會合食午餐。
當日Crystal安排比搭客o既午間節目非常豐富,不過我地大多選擇遊戲性質o既活動:
13:30 - 大肥爸爸同姨媽姨丈去咗十二樓Palm Court度學American Style Waltz Variations,而媽咪、小肥及兩位靚靚auntie就參加咗船上o既打麻雀活動。Crystal所提供o既麻雀配套極為簡陋,只有薄薄o既美式麻雀套裝,一套廣東牌或者台灣牌都冇,就連枱櫈都只係用Prego餐廳內o既餐桌及餐椅,文化欠奉,故我地四個人一致裁定唔合格!雖則如此,但係我地隔離枱嗰啲西人婆婆卻玩得純熟自然,興奮投入。
14:00 - 打咗二十分鐘麻雀,我地四人邦就同其他團友喺郵輪上o既賭場會合。團員中有四個參加咗拉老虎機比賽,一個參加咗21點比賽,其餘五個就做啦啦隊,可惜我地全軍覆沒,連安慰奬都冇。
15:45 - Bingo時間,參加者同拉老虎機嗰啲年紀相約,大多為公公婆婆級,小肥同哥哥係最後生嗰兩個。記得以前細細個玩Bingo係每人買幾張Bingo咭,慢慢對號碼,但原來Bingo早已被電腦化,而家玩Bingo興租部Bingo機,玩家唔再需要對號碼,只需等部機叫,通知勝出者,再經工作人員核實,遊戲好快就結束,一啲都唔刺激!
遊戲過後,大家個肚都開始叫,所以就過咗去Bistro食下午茶加Happy Hour,六點左右再各自各返上房為Formal Night裝身。
19:00 - 團友們喺Galaxy Lounge集合聽Michael Bell先生表演唱歌。
19:45 - 聽完歌就上咗去12樓Palm Court參加Captain’s Welcome Party,同船長會面及影相留念。
20:00 - 喺雞尾酒會逗留咗約十五分鐘,我地就落返去五樓,排隊等Crystal郵輪上o既專業攝影師幫我地影靚相。喺郵輪影相雖然最平嗰張相都要12.5美金,不過客人並無必要買下攝影師所拍下o既每一幅相片,唔滿意可以第二個formal night再影過,唔鍾意更可以一幅都唔要。
20:30 - 喺郵輪上o既Formal Night,Crystal Dining Room都必定有特別菜式,當晚Gala Welcome Dinner亦不例外,有多款海鮮及靚酒,食到我地個個都攬住個肚!
評分: 味道5 服務5 環境5 衛生5 抵食5
2月11日(多雲):Crystal Serenity Day #2 之 Yokohama橫濱
唔計小肥兩兄弟在內,團友們o既平均年齡為六十有多,故此我地o既旅遊活動大多以購物及飲食為主。小肥一早睇過旅遊書,知道橫濱有多個商場及百貨公司,絕對適合男女老幼「濕平」,所以特意安排大家喺橫濱o既第二朝早食過早餐後,先乘搭免費穿梭巴士前往横浜駅附近行街。買到咁上下,我地就去咗全日本最大o既唐人街度食午餐。
單看旅遊書上所印o既相片,橫濱o既觀光熱點當中最具吸引力o既係兩間同麵有關o既博物館,一間係「カップヌードルミュージアム」(杯麵博物館Cupnoodles Museum),另外一間係「新横浜ラーメン博物館」(新橫濱拉麵博物館Shinyokohama Raumen Museum)。因為我地逗留喺橫濱o既時間有限,兩者o既主題又差不多,醫飽個肚之後,我地最終就選擇咗去離「大さん橋」郵輪碼頭較近o既「杯麵博物館」度遊覽。
我地大約五點鐘左右返上船,飲咗個下午茶就各自回房穿上救生衣,為當日所有Crystal搭客必需參與o既緊急集合演習作出準備。演習完畢就落咗去Crystal Dining Room進食晚餐,並為姨丈牛一慶祝一番!
當晚十時正,Crystal Serenity正式起航向大板出發!
入場價錢: 每人500日圓
其他消費: 自製雞湯杯麵加500日圓,可以300日圓食半碗不同口味o既麵
評分: 值得去5
評分: 味道5 服務5 環境5 衛生5 抵食5