最近分享過的旅程 |
共找到 117 篇遊記, 正顯示第 11 至 20 篇遊記 |
3月8日(晴):2019瑪麗皇后二號郵輪河:第四天之胡志明市
遊輪河第二站為越南「富美港」。XO仔於規劃行程時已知曉由碼頭前往胡志明市中心車程約個半鐘頭,計埋估唔到嘅交通狀況,來回即要成三至四個鐘,其實去到嘅地方唔會多,嘻嘻,唯有主攻食!
越南美食中最出名應該都要數法國菜、咖啡、Pho,四小時內要食齊一啲都唔易,真係要感激導遊叔叔醒目又唔嫌麻煩,用餐時幫忙代買腰果同咖啡手信,先成功慳返唔少時間。十五人由中午起開波,先喺麻雀友極力推薦嘅「Trois Gourmands」食法國午餐,三個大肥佬(店名嘅來源)出品果然冇失拖!飯後塞咗陣車就當中場休息。接著喺發明貓屎咖啡嘅名咖啡屋「Trung Nguyên Legend Café」先嘆咗杯香濃嘅越南咖啡,肚肚仲有位嘅為食小組跟住就行咗去對面街間「PHỞ 24」食多碗越南牛河當下午茶。都要多得芽莊市嘅差劣,當日嘅胡志明市半天遊方才可由導遊到餐飲都贏得團友們一致嘅讚賞!
郵輪上最不缺乏嘅就係飲酒嘅地方,六點等待開船時,酒鬼當然係要繼續尋歡樂啦!意外地,新試嘅「Chart Room」竟然有雙重驚喜,而晚餐質素終見進步,只係為三八婦女節結尾嘅歌舞表演環節水準勁低。每人消費: 約68.50美元 (午餐)
評分: 味道4 服務4 環境5 衛生5 抵食4
每人消費: 約95950越南盾 (下午茶)
評分: 味道4 服務4 環境3 衛生3 抵食3
3月7日(晴):2019瑪麗皇后二號郵輪河:第三天之芽莊市
離開香港後,「瑪麗皇后二號」第一站先停泊越南芽莊市。雖然船隻早上八點已抵達目的地,但礙於其巨大嘅體積不能進入細小嘅港口,上岸必需轉乘救生艇。郵輪公司並非初次去芽莊,經驗理應好豐富,無奈當日嘅坐船仔安排竟然超級大混亂,毫不專業,直令全場遊客情緒鼓噪得很!
因為聽過不少有關越南嘅驚嚇搶劫故事,出發前早已經旅行社訂咗架旅遊巴連一個識講國語嘅導遊,HK$ 3,200包車九小時。真係冇諗到人未上到巴士,先收到香港公司嘅長途電話,告知導遊於閘口代出咗四十蚊美金嘅「過路費」,要即時加收;肉隨砧板上,似乎冇得話唔俾,不過最意料之外嘅就係當XO仔閒談時問及導遊哥哥時,佢就話自己俾咗四十萬越南盾,即約十八蚊美金,咁咪一半都冇,食水真夠深!
年輕嘅導遊先生可以普通話溝通,而且好有幽默感,上咗車先講咗個笑話搞吓氣氛,令大家放鬆心情:話說越南曾經係一夫多妻制,角色不同嘅太太均擁有特別嘅稱號,全部都係同食物有關。大老婆係「米飯」,因為每日都要食;二奶為「米粉」,食得多米飯間中都要轉吓口味咁話;三奶就叫「咖啡」,味香醒神,不時都想朝早嘆返杯;四奶名為「方便麵」,隨時食都得;最矜貴就要數五奶「腰果」,皆因有錢人先可以食得到!
第一站根據小肥規劃好嘅行程前往已訂好座嘅「Lanterns Vietnamese Restaurant」食午餐。飯後就由導遊先生帶大家認識芽莊嘅兩款沙灘,分別為最受俄羅斯旅客歡迎嘅比堅尼沙灘及本地人入夜後先會去嘅包到實沙灘。由於坐艇上船需時排隊,細佬原定計劃中嘅咖啡站及歡樂時光就二合為一,喺導遊哥哥相熟嘅「Nha Trang Sailing Club」進行,貴夾超級搵笨!
每人消費: 約151066越南盾 (午餐)
評分: 味道3 服務4 環境3 衛生3 抵食4
3月6日(晴):2019瑪麗皇后二號郵輪河:第二天之At Sea
團友中有多位天主教徒,適逢「聖灰禮儀日」要守大齋,早上就各自進食早餐或守齋,到中午時份先喺英式酒吧餐廳「Golden Lion Pub」會合食炸魚。郵輪全天喺公海,大家嘅喜好及體力亦有所不同,大多時間就玩自由活動,爛賭鬼去拉機、舞王去學跳舞、健康一族就行圈做運動、酒鬼當然係繼續歡樂暢飲啦!
到咗下午茶時間,十五人又再次集合,一同去體會英式下午茶,可惜結果失望到要轉場去同層嘅香檳酒廊「Champagne Bar」輕鬆返。晚飯前由船長Christopher Wells先生邀請搭客參加雞尾酒會,全場衣香鬢影,無奈場內所供應嘅酒品稀到好似溝咗水咁,也太沒誠意了吧?!契姨媽一向鍾情英國文化,亦最愛坐船,得悉「瑪麗皇后二號」於2019年春天將會路經香港前往越南芽莊市及胡志明市,並於新加坡結束,第一時間就約同親友十五人去體驗英式郵輪有幾豪華。
3月5日(晴):2019瑪麗皇后二號郵輪河:第一天之香港上船
旅程首天喺「啟德郵輪碼頭」上船,唔知係「皇后郵輪公司」定係碼頭本身嘅安排失當,即使根據指示兼預早到步,結果等咗成四個鐘頭先辦妥好手續,過埋安檢登上船隻。「瑪麗皇后二號」郵輪超級巨型,四周環境優雅,樓底高高嘅大堂最有氣派,房間亦好夠空間,唯一問題係冷氣唔夠勁。
團友們由中午一直未有進食,上船後第一時間就上咗去七樓嘅「Kings Court」食個尾聲自助午餐,醫好肚肚先返房安頓一切,再前往人人都要出席嘅緊急演習。學識著上救生衣後,一群酒鬼即相約於甲板層邊飲香檳邊睇開船,盡享歡樂時光。準八點半喺二樓西餐廳「Britannia Restaurant」食咗個質量平庸嘅晚餐其實都有少少失望,幸好晚上有靚女鋼琴家Van-Anh Nguyen精彩嘅表演,舒緩返大家整日繃緊嘅情緒。評分: 味道2 服務4 環境5 衛生5 抵食3
11月26日(雲):台北的第四天
離開台北嗰朝早,小肥原本想去新光三越A11內某家卡通主題咖啡屋度打卡兼食早餐嘅,無奈去到先知小店根本冇位坐。因時間有限,一行七人唯有急忙地喺商場另覓餐廳,幸好一上到三樓就俾眼利嘅姨長發現有間「Café MUJI」,快速咁食咗個高質早餐後就返酒店辦理退房手續。由於安排好乘搭晚機走,攜帶住行李走黎走去會好唔方便,XO仔就專登包咗兩架車接送十人,確保團友們唔會走失。
午餐揀咗去姨媽們一直念念不忘嘅地道海鮮餐廳「台南三哥海鮮」,不過真係好可惜,闊別幾年後,三哥出品嘅海鮮菜式竟然質素大幅下滑,大不如前,令人大失所望!飯後由年輕友善嘅司機哥哥帶領下,先買多輪手信,再走咗轉「迪化街」,最後喺「北芳園招牌牛肉麵」食咗碗一般過一般嘅台灣牛肉麵後,就去機場。「香港航空」嘅商務搭客喺台灣桃園機場可享用「長榮航空The Star貴賓室」提供嘅餐飲及設備,無奈室內人多擠迫,食物質量同回程機上嘅飛機餐一樣咁低!11月25日(陰):台北的第三天
去台北玩咗咁多次,XO仔印象中最好食嘅台菜應該係兒時同婆婆喺「欣葉」食過嗰一餐,不過邊間分店就真係唔記得啦!碰巧今次長輩們要求食台菜,細佬第一時間就諗到可以回味一吓,所以就揀咗出名高雅境靚嘅「欣葉食藝軒」食午餐,只可惜名店嘅質量甚為參差,或者是自己期望過高吧。晚餐方面,冬天最受歡迎當然係火鍋啦!由於團友十二人嘅口味不一,麻辣及藥材均屬太重口味,姨姨就提議清少少食日式涮涮鍋,一齊試試佢同事極力推介嘅「橘色涮涮屋」,真係估唔到除咗有好野食,更享受到驚喜禮待!
11月24日(雲):台北的第二天
今次去台灣最主要嘅推動力就係因為知悉台中人氣法國餐廳「樂沐」(Le Mout)將於年尾結業,幫襯過嘅都好想臨別秋波食多次,而未去過嘅姨媽們就更有興趣一試,結果XO仔幾經辛苦,出盡人情牌後先訂到位。深知要預備十多人嘅餐飲一啲都唔簡單,加上咁遲先搞得掂,日子同用餐時間就任由餐廳定好為週六晚嘅晚餐後,細佬先編排該日嘅行程。
當日原來係台灣選舉,幸好街上嘅人同車都唔多,交通十分暢順。朝早先同團友由酒店行咗去「真芳碳烤吐司紅茶牛奶」食「吐司」同「起司」做早餐,之後就搭的士帶太太們去血拼佢地最愛嘅品牌。中午喺連地擔姨姨都未聽過嘅「允壽司」嘆咗個超正嘅魚生午餐後就直接去咗台北車站。等待前往台中嘅高鐵列車時最興奮就係可以喺車站個地下街度同靚靚媽咪瘋狂掃咗不少玩具同手信,意外收穫有成三大袋架,認真唔講得笑!反而團友們萬分期待嘅「樂沐」晚餐嘅質量卻令人大失所望,餐廳的終結竟成為整個旅程嘅低潮位。2018台灣四天美食之旅
小表姨近年因工作關係經常出入台灣,適逢姨媽們回港旅遊,表姨丈又可抽空外遊,難得有地膽陪伴,十二人就組團去台北玩幾日,早機去時晚機返,一於吃喝玩樂一番。
11月23日(晴):台北的第一天
是次台灣週末遊,行程雖然話係全權由XO仔負責,但其實好多餐廳選擇都係聽取長輩嘅意見,而所乘搭嘅香港航空航班則由哥哥安排。
為怕遇上週五交通擠塞問題,朝早六點正就出發,預夠時間喺機場辦理好手續後可以喺香港航空貴賓室「遨堂」度輕鬆地食埋個自助早餐,先慢慢上機。HX252班機準時九點零五分起飛,空中服務員亦非常友善,不過機上嘅膳食真係幾恐怖吓囉!
應小表姨推介,首次入住信義區「寒舍艾麗酒店」,啲房又大又舒適,位置仲好就腳添。等待酒店房間時,小肥早已安排大家先去「寒舍食譜」醫肚,一嚐旅遊王Uncle介紹嘅招牌脆皮先知鴨;餐廳就喺隔離間姊妹酒店「台北寒舍艾美酒店」入面,行過去五分鐘都唔洗,夠哂方便。
飯後入房安頓好行李後,團友就各自各去行街街。行唔夠一個街口,竟然俾眼力超強嘅靚靚媽咪發現到「微風松高」門外有個臨時攤位賣名牌威士忌喎,不過六點後先開門,嘻嘻,圍內幾個酒鬼即約好一夠鐘就去八吓。嘩,點知除咗新出嘅限量品「White Walker」做緊特價之外,神秘舖位入面仲有禮物送架!時間啱啱好,玩到咁上吓就同地膽姨姨、姨丈會合去食晚飯。真係估唔到細佬喺網上搵到嘅「桌藏餐廳」除咗成個古屋亭園咁靚,帶有中華風味嘅分子料理更加係美觀又美味,席上嘅長輩食後都話一試難忘!4月7日(晴):洛杉磯的第八天
於美加輕鬆地渡過兩個星期後,假期終於結束,係時候要回港了。因復活節遇上多人旅遊,家人買唔到機票搭同一班機,XO仔就獨自一人搭國泰航空中午班機CX 885。估唔到單獨飛反而有幸坐頭等,個位成個獨立休息室咁豪華,除咗有靚酒飲之外,中西膳食意外地竟然可以令小肥用「好食」黎形容,直頭搞到細佬連覺都唔捨得瞓咁激動呀!4月6日(晴):洛杉磯的第七天
臨離開美國前一日,XO仔一早起身就執定哂行李,食完個雲吞餐就同哥哥去還車。因為細佬終於唔洗揸車車,下午茶時間姨媽就請肥肥家族上佢屋企飲歡樂香檳。舅父同姨媽們勁有靚靚媽咪心架,以餞行為名約哂區內所有親戚去相熟嘅「海天」晚聚,更悉心安排佳餚美饌,原來係順度為媽咪預祝壽辰,大家當然係盡興而返啦!