出門前打麻雀時，講起郵輪河會停越南胡志明市，其中一隻腳就好雀躍地推薦自己多年前食過嘅法國餐廳「Trois Gourmands」。難得有人指點迷津，XO仔當然係立即做野啦！店子嘅英文版官方網頁清晰易明，網上訂座流程亦簡易快捷，不過每人頂多只可訂十個位，十五人只好分兩個名訂兩張枱。

由碼頭坐咗個幾鐘頭巴士先正式入到去胡志明市。餐店位於市內較高級富裕嘅住宅區，四周可見不少獨立洋房，其綠色嘅圍牆標奇立異，夠哂搶眼。真係冇諗到越南治安竟然係唔好到商戶都要安裝閉路電視，連過一條馬路導遊叔叔都放心唔落，要續一陪同。

踏進豪宅，即步入掛滿紅燈籠嘅花園。草地上擺滿室外座位，旁邊有個游泳池，後方則為大型嘅烤爐及室外廚房，係開P嘅好選擇。由石獅子鎮守嘅屋子為室內用餐區域，以紅白為主嘅設計最突出就係洋式嘅窗簾，配上牆身嘅油畫及四周嘅蘭花擺設，感覺雅致大方。大廳排出多張二至四人散座，入面亦有幾間私人廂房，裝潢同樣貴氣十足，長輩們都不禁要影多幾幅相留念。

當日午餐除咗十五人分咗兩枱坐之外，其實係冇其他客人嘅，亦即無意中包咗場。年輕嘅服務生溫婉友善，只係記性唔多好，落單後要靠喺餐桌上貼出貓紙，標籤著各貴客所點嘅食物作為提醒，不過此舉似乎可以做得更專業。雪白嘅枱布上有齊備嘅西式餐具，餐墊卻用上越南美女嘅畫像，莫非係想道出大廚將融合法越兩國廚藝？！為怕過份複雜，全團人都點食包有松露炒蛋「Brouillade aux truffes」（Truffle scrambled eggs）、主菜、自加製芝士拼盤「Assortiment de fromages maison」（Homemade cheeses）、自選甜品「Dessert au choix」（Choice of one dessert）嘅精選套餐「Menu Degustation」，價格定於所選頭盤之數目，亦即一款頭盤（五道菜；USD 45或1,046,000 VND）、兩款頭盤（六道菜；USD 50或1,163,000 VND）、或三款頭盤（七道菜；USD 55或1,279,000 VND）。小肥自己就取咗個中間位，揀咗兩道頭盤及龍蝦作主菜：

1)      麵包：籃中嘅麵包外形肥嘟嘟，熱辣暖手，外脆內鬆軟。

2)      Brouillade aux truffes（Truffle Scrambled Eggs）：以透明高杯上嘅松露炒蛋芳香軟潤，十分輕盈，不過份量就比想像中少，隻杯裝到滿滿就差唔多。

3)      Tartare de crab（Crab Tartare）：頭盤左方嘅青瓜沙律爽脆醒胃，右方嘅蟹肉他他肉質厚而嫩，個人只係略嫌師傅用上同沙律一樣帶酸嘅調味就蓋過咗蟹肉原有嘅鮮甜，請恕小弟未能推介。

4)      Nem de Foie Gras（Goose Liver "Spring Roll"）：此味鵝肝春卷明顯係法越混血兒，為咗可令貴客作出比較，大廚巧妙地喺碟上同時擺出傳統版本，未食已感到其心思。鵝肝春卷外層乾脆鬆化，呈半溶狀態嘅鵝肝餡心惹味得黎其鮮濃慢慢滲進味蕾，比起傳統食法嘅鵝肝伴果醬精彩細膩得多！

5)      Lemon Sorbet：上主菜之前先有檸檬味雪葩間場，不過其過份濃烈嘅酸味真係唔係人人可以接受得到。

6)      Langouste au Beurre de Nage（Lobster with Butter Sauce）：炭燒龍蝦係由師傅仔喺外出嘅烤爐燒製，食落就知有少少過熟，好在質感仍然夠爽彈，簡單黏上香草牛油即能提升龍蝦嘅鮮味。

7)      Assortiment de fromages maison（Homemade Cheese）：在場嘅芝士迷大讚自家製芝士拼盤質素高，XO卻自認唔識食啲咁重口味嘅食物，結果當然係主力影相啦！

8)      Profiteroles au Chocolat（Chocolate "Profiteroles" with Vanilla ice cream）：朱古力泡芙打孖上，大大件好香脆，甜品簡單以朱古力醬、忌廉及雲尼拿雪糕點綴已夠清涼甜美。

喺互聯網上告知親友將遠遊越南，希望有人可教路去邊度飲咖啡，唯一回覆嘅居然係大肥爸爸相識五十多年嘅舊同學！Uncle真係好有心架，幫忙聯系上一位地膽朋友，仲介紹咗間連本地人都大讚嘅連鎖咖啡店「Trung Nguyen Legend Café」。

越南名牌連鎖咖啡店以創辦人之名號「Trung Nguyen」起名，傳奇在於其研發之「麝香貓咖啡」。由於「麝香貓咖啡」製造過程中先要麝香貓進食咖啡豆，等待豆豆在麝香貓體內產生某種化學作用後跟糞便排出體外，之後再撿拾回工場加工，故製出嘅咖啡被俗稱為「貓屎咖啡」。聽完「貓屎咖啡」是如何製出，好多人（包括自己在內）都會覺得極度嘔心，但其價格卻屬世界最昂貴咖啡之一，傳奇得有點離奇吧。

），但十五人都冇膽嘗試。個人推介價錢平一半，香濃柔滑嘅

越南粉快餐連鎖店「Pho 24」樓底高高，地方夠光猛。店子一啲都唔花巧，牆身只係貼咗幾幅寫滿越南字嘅海報裝飾。左邊嘅開放式廚房望落好簡潔，又唔會話好大陣油煙味，而右方嘅一排木造餐桌都好整齊。年輕嘅服務生友善且效率高，個個帶哂手套，感覺極之衛生。餐牌越英對照，簡單易明，同收銀員落單溝通亦毫無問題。落好單同俾哂錢即換來一個號碼牌，食物會由專人對應牌號送到食客枱上。越南粉套餐價格由VND 49,000（約HK$ 16）起，最貴都係VND 79,000（約HK$ 26），夠哂經濟實惠，快餐黎講質素算唔錯：

1)      Pho Dac Bie（VND 69,000；約HK$ 23）：特式牛肉河粉個湯底味道濃郁，又唔算特別油膩；麵條並非中式扁扁肥肥，而係條長方形啲嘅；牛肉片尚算軟腍，同夠薄。

團友們已習慣於歡樂時光喺郵輪上玩「每日一吧」嘅行程，等待離開越南時就去咗試三樓間「Chart Room」，因女士們收到風話有靚仔會演奏彈琴，適逢三八婦女節喎，當然係要順佢地意去𥄫野啦！

、果仁、橄欖，旺得有理！

遊輪河黎到第四晚，西餐廳「Britannia Restaurant」嘅出品終於有進步，叫做見得吓人，但都只係局限於主菜一環，因為甜品勁恐怖：

1)      Mushroom Soup, Tarragon Creme Fraiche：蘑菇湯味道還可以，輕巧清香，最大問題係唔夠熱。

2)      Roast Breasts of Squab Pigeon, Barley & Sage Risotto, Panchetta, Spring Pea, and Broad Bean Fricassee & a Red Wine Sauce：晚餐嘅亮點就係此道燒乳鴿。如相所示，燒乳鴿主菜有兩隻鴿肶及兩邊鴿胸，兩個部位嘅肉質同樣幼嫩軟腍，鴿皮亦軟潤甜濃。份量其實好足，只係大家都有個問題，就係唔知啲鴿翼去咗度呢？！

3)      Matcha Tiramisu, Yuzu Curd, Mango Pearls：貌似火山爆發中嘅抹茶味tiramisu賣相已經唔係咁得，食落去先驚嚇，因為當中嘅柚子及抺茶組合又酸又苦澀，客氣啲講就話係奇怪，但請恕小肥直言，甜品真係難食到要食剩咁差，堅唔掂！

「Britannia Restaurant」嘅早餐冇夜晚咁嚴謹，除咗冇固定座為之外，即使人多未到齊都可以喺門外排隊輪流入座。埋位後，好快就有服務生上前續一問及有否需要熱咖啡、茶、果汁，並即是斟出，任添唔嬲。小肥所點嘅法式多士「French Toast with Butter and Pancake Syrup」熱辣鬆化，絕對比晚餐美味得多。

第一日喺香港上船已經歷過「皇后郵輪公司」及「啟德郵輪碼頭」嘅失當安排，但有邊個會估到曾多次停泊過越南芽莊市港口對出海面嘅「瑪麗皇后二號」對轉乘救生艇上岸嘅運作居然可以咁混亂同不流暢。

其實早一日哥哥已經喺詢問處嘗試打聽過，接待生卻未能告知入境手續及轉搭艇仔嘅詳情，唯有見步行步啦！郵輪八點抵港，為怕麻煩，好多旅客都會選擇參加船公司搞嘅半天遊，XO仔就懶醒咁以為等朝早散咁啲人十點先去坐啦，仲預鬆咗時間約定私家旅遊巴十一點見；好在團中有醒目嘅長輩九點幾就去咗睇睇咩環境，仲即場攞埋籌，因為原來連一早要跟團出發嘅旅客都要輪籌上岸，十五人結果等咗成個幾鐘先排得到，試問場內嘅人又點會唔顛呢？！反而入境話都冇咁易，官員喺遊客轉船前只需核對身份就會喺張「Landing Card」上盦印，就係咁簡單。

朝早喺船上等都話有冷氣，下午四點回程時要喺個岸上暴曬，當真不是味兒，幸好細佬中有準備，每人派咗把手提電動風扇，唔係肯定個個溶哂都似！請恕小弟直言，依個城市真係去一次都嫌多。

由於圈內嘅親友冇人去過芽莊市，要搵食唯有自己上網搜尋，結果就喺旅遊熱網嘅排行榜上發現咗間可以用英語溝通嘅「Lanterns Vietnamese Restaurant」。

出發前一個月，XO仔已跟店主Robert哥哥聯絡上，以電郵為十五人訂好位之外，更跟經理道明可以美金付款，並付上詳細地址、電話及地圖，非常周到。到咗用餐當日，由於喺樓上舖午膳必先行上長長嘅樓梯，店員仲好細心地續一扶持七旬長輩慢慢登上，這份溫婉細心之情實在難得。

鐵板蓋頂嘅餐店簡單以紅燈籠裝飾，襯返個店名。堂內有幾把大風扇，不過大家自備咗手提電風扇都不停滴汗，啤酒竟然係跟冰上，明顯當地人都覺得好熱啦！店子提供免費Wi-Fi，服務生亦十分友善，午餐菜式質素雖然有點參差，但睇在價錢份上真係冇得投訴：

1)      Homemade Spring Rolls (Cha Gio) with Meat（VND 75,000/4pc；約HK$ 24.5）：熱辣辣嘅自家製春卷皮脆鬆化，肉餡鮮嫩惹味。

2)      Rice Noodle Soup (Pho) with Beef（VND 65,000；約HK$ 21.5）：一眾最期待嘅越南牛河可以話係最失望嘅一味，其湯底味道過於清淡，河粉厚身得黎又唔夠潤滑，面層嘅牛肉片算係最正常，不過人家只收約HK$ 21.5，又的確係好難同起碼收雙倍價錢嘅港版比嘅。

3)      Garlic Butter Shrimp “Tom Bo Toi”（VND 159,000；約HK$ 52）：鮮燈色嘅蝦隻嘅蝦背上雖然鎅咗一刀，可惜唔係條條黑腸都有挑起，加上蝦身粉粉地，食落唔夠爽脆，不吃也吧。

4)      Fresh Rice Paper Rolls “Goi Cuon” （VND 70,000/4pc；約HK$ 23）：如相所示，越式紙米蝦卷包得好夠扎實，咬落集軟嫩爽脆於一身，點上秘汁即倍添清新，必吃推介！

5)      Lanterns Special Fried Rice（VND 99,000；約HK$ 32.5）：用煲仔上嘅特色招牌炒飯混入咗雜菜、菠蘿、雞肉，乾就夠乾身，不過飯粒過腍，而且雞肉乾嚡，又唔係幾夠味，建議大家食多幾碟自家製春卷或越式紙米蝦卷好過。

原本XO仔規劃咗午餐後先喺餐廳附近一家咖啡店度嘆杯越南咖啡，之後轉場行一行沙灘方才順便飲一輪Happy Hour嘅，但係導遊先生卻提議十五人可以去佢相熟嘅「Nha Trang Sailing Club」，一個地方做哂兩樣野咁話。人家係地膽喎，咁梗係俾佢話事啦！

室外會所陽光充沛，通過正門，左右先有兩排帳篷式梳化位，中間有個長方形水池，感覺輕鬆雅致。入面最大面積嘅室內空間有個酒吧及舞池，十五人就被安排坐最近沙灘嘅室外散座，空間感足，最煞食就係個靚景，不過就唔係好見到導遊哥哥之前提及過嘅俄羅斯比堅尼女囉。估唔到二十多頁餐牌居然會係中英對照，明顯客路主要為遊客。年輕嘅服務生個個黑面神上身，問乜都冇反應，最後小肥決定慳返啖氣用手語溝通，指出各人想點啲乜野飲品。

，即成千蚊港幣喎，單價為香港街賣嘅三倍有多，仲要貴過喺郵輪飲嗰樽粉紅色香檳，深覺實在不值，所以最終都係飲咗杯凍咖啡就算。哈，如相所示，嗰杯

）嘅凍白咖啡不單水汪汪，飲落咖啡味欠奉，超劣劣劣劣劣劣呀！姨媽見到自己杯熱咖啡連餅乾上但同凍啡同價喎，諗住抵玩啲啦，點知睇單發現每塊餅乾收咗

），咁先知原來仲搵笨，因為嗰塊餅乾都幾難食吓！

喺芽莊市渡過咗一個不甚歡樂嘅時光後，大隊上船都要立即梳洗一番，過後約同於七樓嘅「Carinthia Lounge」度邊睇現場表演邊嘆香檳；無錯，就係早已成為此團嘅指定粉紅色香檳「Laurent Perrier Brut Rose」（USD 95/樽；約HK$ 741）。

上岸嘅日子好多搭客都會食埋晚飯先返上郵輪，又或者會買啲當地嘅美食返房食，可能餐廳因此就預計會少啲食客去「Britannia Restaurant」享用晚餐，菜式質量明顯下降：

1)      Oxtail Consommé with sherry：一碗湯最忌就係唔夠熱，牛尾清湯只屬和暖，加上淡而無味，飲水好過。

2)      Vegetable Gyoza, Chinese Black Vinegar, Sesame Dressing：齋餃子賣相都幾俹簁，就好似隨隨便便疊上隻碟度咁，或許是餃子隻隻唔同樣所以唔排好過排吧？！齋餃子嘅皮層厚薄不一，半乾半韌，有部份仲要係疑似未熟咁，入面嘅齋菜餡心酸酸澀澀，完全唔啱細佬口味囉！

3)      Grilled Fillet of Sea Bass, Potato Gnocchi, Asparagus, Peas, and Mustard with Tarragon Sauce：姨丈點，XO影，佢嘅評語係燒魚好乾好嚡，劣！

4)      Sautéed Garlic Shrimp, Wilted Spinach and Jasmine Rice：真係冇花冇假，白飯多過餸，大大隻餐碟上只有兩隻又乾又唔爽嘅中蝦。

5)      Bananas Foster, Rum and Raisin Ice-Cream：香蕉甜品個樣已經唔靚，食落咪就係有少少酒味嘅半生熟香蕉囉！不過最失敗嘅就係雪糕喺上枱時已呈半溶狀態，有相為證架，冇得抵賴。

位於二樓嘅英式酒吧「Golden Lion Pub」中午時份光猛鮮明，正門右方有個高櫈吧位區直播著球賽。廳內亦有多張散座，厚墊椅櫈十分舒適，窗邊嘅卡位可以欣賞海景，自然地最受歡迎。場內嘅服務生超級忙碌，每張枱落單又要等待指定嘅侍應喎，午餐爆場更顯其效率低得很！郵輪套票只包餐牌上第一頁嘅項目，飲品均額外收費。

貴為英式郵輪，「瑪麗皇后二號」當然係要隆重地對待國家聞名嘅女皇式下午茶啦！供應時間特定於下午三點半到四點半，地點安排於連名都高貴過人嘅「Queens Room」，座位先到先得。

」為樓底高高嘅宴會廳，中央有個大舞池，池內有幾位靚女現場合奏表演。氣氛原本應該幾好，無奈因廳內嘅散座排得太密，雖然有地毯吸音，爆滿時卻變得十分嘈雜。全場食客入座後，即可揀茶飲，並由多位服務生排隊式地送上一盤盤嘅小食糕點，任君選擇。茶品欠缺熱力，包點中

三文治及三文魚撻均偏乾同硬，令人越食越搖頭。唯一甜品有個輕巧甜美嘅

仔一個人食咗三杯，隔離枱見到想試時已經太遲了。

由於英式下午茶實在教人失望，大隊就決定去同層嘅「Champagne Bar」歡樂一番舒緩一吓。可能歡樂時光並無特別優惠，十五人居然包場，全廳任坐唔嬲。

及兩款小食送酒，周到得很

船長Christopher Wells先生誠邀搭客參加嘅「Captain’s Gala Reception」雞尾酒會於宴會聽「Queens Room」舉行，服裝限定為「Gala Evening Attire」，亦即隆重晚裝。為確保全船人可以一同參與，酒會跟晚餐一樣共有兩輪，分別為傍晚五點十五分至六點及晚上七點四十五分至八點半。

正當團友們都預計雞尾酒會後嘅晚餐會特別華麗豐盛時，打開兩頁餐牌後個個面上即流露出震驚嘅表情！無他嘅，頭盤其中一項為「Mackerel Teriyaki」（日式照燒魚），而主菜更離奇地有「Shrimp Mac & Cheese」（芝士蝦通心粉）及「Singapore Vegetable Noodles」（素菜星洲炒麵），係咪堅離地呢？！當晚嘅菜式質量甚為參差，唯一嘅亮點係甜品比早一晚精美：

1)      Sweet Corn Chowder with spiced popcorn：意外地，粟米湯比早一晚嘅香甜濃厚，但都只屬普通貨色。

2)      Seared Scallops with artichoke puree & tomato confit：香煎帶子主菜鮮甜幼嫩，個人卻不大接受到伴配嚡嚡嘅artichoke puree及重口味嘅tomato confit。

3)      Singapore Vegetable Noodles：如果食客必需遵從「Gala Evening Attire」個服裝規定進食晚餐，這份素菜星洲炒麵嘅尊容似乎第一個要被即場叮走啦！齋麵並非小弟所點，但睇見uncle個樣就知味道同賣相差不多。

郵輪公司所派發嘅旅遊指南中嘅資訊其實唔係好充足，就連登船嘅流程都只係簡單道出三點鐘喺「香港啟德郵輪碼頭」，所以團友都選擇中午時份早啲到步自行探索。

「啟德郵輪碼頭」又遠又荒蕪，附近真係「百無」，出入只能靠的士或私家車，難怪旅客個個都叫哂救命話唔方便。碼頭大就夠大，但感覺極之簡陋，通道多過人同商店，路牌唔多，莫講話保安，想搵個人問路都難，離境區及候船區嘅位置係冇餐廳嘅，所謂購物商場都唔知要行幾遠先到。

皇后郵輪「瑪麗皇后二號」體積龐大，通往接待大堂嘅弧形樓梯舖上厚厚嘅紅地毯，極具氣派。四周廳堂大多都有厚地毯，襯托埋厚墊椅櫈，舒適得好有格調。

十多人經旅行社所訂購嘅套票價格約HK$ 11,000/人，包咗六天嘅基本餐飲及住宿。船隻載客量高達二千六百多人，故餐飲方面都有不少選擇。所謂基本餐飲，首先係可以喺二樓西餐廳「Britannia Restaurant」於限定時間內進食早、午、晚三餐。西餐廳每日都有不同服裝限制，唔想咁拘謹嘅客人三餐其實可以揀去七樓嘅「Kings Court」食自助餐。船上所有酒品都要額外收費，所以最不缺乏就係酒吧及酒廊，試咗嘅有「Carinthia Lounge」、「Champagne Bar」、「Chart Room」、「Commodore CLub」等，連泳池旁都有得飲架！無奈郵輪酒價偏高，酒品套餐又不吸引，吓吓要就住黎飲都幾唔過癮。

首批團友成功登船時已經成四點，當時郵輪上只有七樓嘅「Kings Court」有野食，不過只剩半個鐘左右，所以第一時間就約咗上去邊食邊等。

」由早上十一點半開始就會有自助餐供應，分開中午十二點至下午四點半嘅午餐、下午六至九點半嘅晚餐及深夜十一點至凌晨兩點嘅宵夜三個時段，食物款式每天不同。近尾聲嘅自助午餐剩餘嘅熱食不多，包品及三文治已變得又乾又硬，甜品亦不甚吸引，結果酒鬼們當然係飲多兩杯啦！

皇后郵輪公司為答謝乘客幫襯，每間房都送贈香檳一枝；新客獲得半瓶裝（375ml），舊客就有全瓶裝（750ml）。每個房間都有專人打掃及管理客人不同嘅需要，如洗衫服務、晚上開床、加添被套、枕頭、日用品等，負責我地嗰區嘅Charles哥哥絕對貼身稱職。

因要費時找尋冇上到船嘅搭客，搞到郵輪遲咗開，好在喺甲板層嘅「Terrace Bar」等待時俾幾隻酒鬼發現有個粉紅搶眼嘅「Laurent Perrier」香檳攤位，結果等吓等吓就飲咗兩樽粉紅色香檳。

船上指定嘅香檳品牌價格都幾貴，普通嘅「Laurent Perrier La Cuvee」單杯都要成USD 16.50（約HK$ 129），每樽就USD 75（約HK$ 585），而粉紅色嘅「Laurent Perrier Brut Rose」則售USD 19.90（約HK$ 156）/杯及USD 95/樽（約HK$ 741），以一樽大約可斟出五杯黎計，點都係成樽叫抵飲啲。

郵輪套票包咗嘅三餐可於二樓西餐廳「Britannia Restaurant」內進食。晚餐共分傍晚六點及晚上八點半兩個時段，每晚嘅衣著限制有所不同，出門口前一定要先確認，因為門口嘅工作人員真係會叮走啲衣觀不恰當嘅食客架。

西餐廳環境優雅大方，空間感足，厚墊椅櫈十分舒適。服務生友善有禮，而且效率極高。可惜第一晚嘅菜式賣相同質量相當平庸，大家都有點失望：

1)      Corn Chowder：粟米湯好稀又唔夠味，感覺就好似廚房煮唔夠份量，溝咗幾次水咁。

2)      Roast Rack of Spring Lamb - Boulangère Potatoes, Crushed Minted Peas and a Mustard-Scented Jus：成餐飯最好食就係個羊架，色澤粉嫩嘅羊肉香濃得黎一啲都唔羶，加上肉質鬆潤，輕輕塗上碟上嘅芥辣味汁液即變得更為惹味。

3)      Valrhona Chocolate Fondant Cake with Chocolate Sauce：朱古力心太軟超甜同溜，雖然糕品浸住咁多朱古力汁，但其質感依然偏嚡，不吃也吧。

船上每日都有不同類型嘅表演睇，最大型嘅都會安排喺兩層高嘅「Royal Court Theatre」度進行。首晚由越南裔靚女得奬鋼琴演奏家Van-Anh Nguyen擔起大旗，將傳統古典音樂嘅元素及彈琴技巧混入現代流行曲目中，帶觀眾跨越時代地享受到不一樣嘅鋼琴演出，令團友們都聽出耳油，實在係嘆為觀止！其中一位uncle仲好捧場地買咗套CD排隊攞簽名添，認真唔講得笑！

家人對「無印良品」都非常熟識，亦好有信心，故唔洗多諗就入咗去搵位。意外地，店子樓面頗高，四周木造嘅間隔及傢俬嘅感覺極之溫和舒適，食客可隨意翻閱架上嘅雜誌刊物，輕鬆寫意得很。餐牌只有中文版，甜品款式則附有彩圖參考。落好單，俾哂錢後，友善客套嘅服務生隨即準備餐飲並續一呈上。餐具及開水均設於一旁供食客自助提取。

1)      冷手沖濃縮咖啡歐蕾（NT 100/大杯）：咖啡歐蕾香滑冰涼。

2)      蜂蜜烤雞芥末醬三明治（NT 200/一份）：即叫即烘嘅蜂蜜烤雞芥末醬三明治底層塊麵包鬆化香脆，雞件厚潤惹味。

3)      檸檬糖霜磅蛋糕（NT 70）：反而檸檬糖霜磅蛋糕就偏乾同硬，最為失色。

「台南三哥海鮮」家庭式作業，只限電話訂座，環境依舊咁街坊。嬸嬸得知可以台語溝通即變得友善得多，隨即先送上三款花生、青瓜、自家醃製嘅蛤仔，並強調小食全屬送酒佳品，嘻嘻，咁就要啤一啤佢啦！細佬兩款台灣啤酒都試哂，略嫌兩者嘅口味偏淡同有微微澀，只可以話唔係自己杯啤酒囉。

早已知曉店子並無餐牌，XO仔就根據上次嘅經驗點返自己推介過嘅菜式，另加嬸嬸即場提議嘅幾味小菜：

1)      白鯧米粉（NT 600/小）：十人用膳，看似人多可以點大份，但由於早已規劃咗會去食下午茶，結果就點咗小份。如相所示，連爐上嘅白鯧米粉細份都好大鍋，夾起哂啲芋頭、蔥、炸白鯧魚件後，可清晰地見到滾湯入面嘅米粉同蠔仔勁足料，無奈今次嘅魚湯底唔係幾夠味，差咁少少火候。

2)      黑腳太監雞（NT800/半隻）：嬸嬸極力推薦嘅「黑腳太監雞」隻腳當真係黑色架；點咗半隻雞，所以只見一隻黑腳。雞隻明顯好大隻，不過皮下脂肪唔多，外表健康得黎有光澤。正當大家以為太監雞嘅肉質會較為幼嫩時，食落口雞肉卻偏嚡帶韌，加上皮層仍可見到不少雞毛，衛生方面亦大打折扣，請恕小弟未能推介。

3)      蕃薯葉（NT200/中）：鮮綠色嘅蕃薯葉質感軟身得黎帶點嚡口，而且調味過咸，不吃也吧。

4)      蒜泥蚵仔（NT 400/中）：最令XO仔失望必選個人最期待嘅蒜泥蚵仔！碟上嘅蚵仔體積雖則看似肥潤，可惜用粉過多，咬落又腍又黏，毫不鮮甜，亦談不上惹味，碟底仲要水汪汪咁，難怪個個食到搖哂頭。

5)      香煎烏頭（NT 1,300）：據姨丈所講，整頓午餐最好食就係此味香煎烏頭，不過小弟因為怕骨冇試到。

6)      處女蟳（NT 1,000/隻）：萬眾期代嘅處女蟳外殼橙紅鮮美，上枱時夠哂震撼！但係當姨媽打開黎睇，即發現蟹膏不單色澤暗淡，不甚濃厚，吃畢更齊聲地有彈冇讚，完全唔掂當呀！

7)      清炒水蓮（NT 200/中）：最後碟水蓮菜外觀還好，但咬落老嚡之餘，仲要勁多渣，結果最怕浪費食物嘅長輩們都話與期食到成碟渣，倒不如食剩可能會好過啲。

訪台四天，點都要食返碗台灣牛肉麵先算遊過台北嘅，臨去機場前就應旅遊書推介一試「北芳園招牌牛肉麵」。

下午茶時間，麵店內只有兩枱客，所以唔洗排隊，座位仲任揀唔嬲添。店子面積不小，中間一排四人方形枱，埋邊則為二至多人嘅半梳化式散座，都幾闊落。一頁餐牌中英對照，並附帶彩圖及標明價格，清晰易明。點菜已全面電子化，十分先進，流程簡單快捷。餐桌上設有自助餐具，仲有個「服務小叮嚀」牌仔，提醒貴客如對麵品有任何不滿，可即時反映，廚房會馬上調整，似乎要求相當認真。收銀員態度溫和，知道十人為遊客顯得都好有耐性，告知調味料及開水必需喺出面自己攞。由於食完午餐冇幾耐，為怕浪費食物，全體都決定一嚐份量較少嘅「淑女版」，當中長輩大多都選擇食細麵。

1)      半筋半肉清燉王牛肉刀削麵（NT280/淑女）：麵品個湯底淡而無味，也過份地清了吧！入面嘅牛筋同牛展極其量只可以話係普普通通，冇乜特別；而粗厚嘅刀削麵雖然好夠嚼口，食落整體卻欠缺香濃及火候，一般到完全唔會令人想返轉頭嗰隻。

「欣葉食藝軒」位於台北101辦公大樓嘅八十五樓，第一次去原來都幾複雜，因為入口唔易搵，兜黎兜去後又要轉升降機，搭前仲要過埋保安區添。店子紅黑嘅正門及鯉魚牆均滲出時尚又傳統嘅中國色彩。進入大廳即見到台北101嘅畫品，道明分店嘅特色。

網上訂座，流程簡易清晰，對應部門嘅同事遇上問題少男都好有耐性地續一解答疑問。除咗要收取訂金之外，部份菜式必先預訂，而且規定每位客人基本消費為NT 1,080，另加一服務費，如要選坐靠窗位置，基本消費就會高少少。當日因席上有畏高人士，故選擇咗不靠窗位置，真係冇諗到十二人會被安排入座內廳高咗半級嘅開放式廂房內，私人空間足，厚墊椅櫈又夠舒適大方。

餐桌上有齊備嘅餐具，整潔衛生。衣著整齊嘅服務生大多客套有禮，不過如果可以友善地加返啲笑容，相信感覺會更良好。因細佬早以電郵訂下大部份招牌菜，用餐前只需加多幾味就已經好夠食：

1)      炸牛膀薄片（免費贈送）：唔講真係食唔出第一碟免費小食係牛膀所炸出嘅薄片。金黃閃閃嘅炸牛膀薄片好比薯片般巧薄香脆，食落清香得黎一啲都唔覺熱氣，實屬驚喜之作。

2)      醃提子（免費贈送）：小肥冇試，不過長輩們都大讚醃提子味道好得意同好開胃。

3)      辣豆乾（免費贈送）：小食中以此味辣豆乾最為惹味醒神。

4)      花膠佛跳牆 （必先預訂；NT 550/一份）：睇戲時就聽得多，但XO仔咁大個人都係第一次食佛跳牆，故亦十分期盼。如相所示，佛跳牆盅面有塊大大嘅花膠，NT 550黎講絕對足料，可惜以用排骨及雞所煲製黎講，個人就略嫌淡淡嘅湯底唔夠濃甜，就好似煲得味夠火候，佛祖點都跳唔過幅牆咁。

5)      麻油腰花（必先預訂；NT 450/份）：請留意，圖中之份量為兩份麻油腰花。色澤濃厚嘅湯中每件豬腰均爽厚震撼，其質感脆口之餘仲好夠潤滑，絕對冇話煮到過熟而縮哂水，必吃推介也！

6)      食藝軒冷三拼：三色拼盤包有烏魚子、五味宜蘭鮑、白切嫩土雞。每份拼盤單價為NT 960，但份量唔得平均，要十二人都有得分黎食的話，鮑魚為NT 150/隻、烏魚子NT 90/片、白切嫩土雞NT 420/份。三款冷盤都可以用個「乾」字黎形容，明顯唔係細佬杯茶！最重口味嘅烏魚子又咸又嚡又乾；白切土雞欠缺光澤，咬落一啲都唔嫩囉，就連雞皮都唔潤；鮑魚厚身得黎又硬又韌，不吃也吧。

7)      煎豬肝（必先預訂；NT 320/份）：睇相都睇得到每件豬肝好夠厚肉，外表亦好夠油潤，無奈食落口微爽得黎有啲硬同粉粉地，似係用火過猛，引致初期肝硬化嘅跡象，勁嘥料！

8)      蚵仔煎（NT 380/份）：台灣名菜個煎蛋底外觀好夠金黃吸睛，但就敗在蚵仔唔得肥嘟嘟，加上搵蔥易過搵蚵仔，NT 380絕對有搵笨之嫌！

9)      活處女蟳蒸米糕、活處女蟳蒸米粉（必先預訂；NT 1,380）：蟹品菜式必先預訂，可選米糕或米粉作底，伴配藍色醋汁。小肥因敏感問題未有食用，故只能同大家分享靚相。

10)  酥炸花枝丸（NT 70/粒）：圓碌碌嘅花枝丸色澤就夠光亮，入口卻過份軟腍，唔得香口鬆彈，甚為失色。

11)  香檳茸炒時蔬（NT 420）：反而香檳菇炒菜芳香爽脆，幾夠鑊氣。

12)  蒜香牛菲力（NT 720）：已熟透嘅牛菲力粒粒厚韌老嚡，加上肉汁欠奉，真係食唔過！

13)  櫻花蝦高麗菜（NT 350）：高麗菜新鮮清爽，簡單以櫻花蝦點綴已夠惹味。

14)  招牌杏仁豆腐（必先預訂；NT 120/碗）：招牌甜品杏仁豆腐清香嫩滑，微甜易入口。

人氣火鍋店暗黑嘅門面其實有啲難搵，幸好迷途小羔羊入錯咗第二間大廈門口都可以遇上好心人帶路，相信這就是出路遇貴人哦。

「橘色涮涮屋」品牌嘅「二館」分店全為廂房設計，走廊通道嘅石徑設計和風味濃，襯托上亮燈屏風，裝潢即顯得十分時尚。可能家人身型個個都有返咁上吓，感覺十二人嘅廂房有少少窄，但眼見餐桌上有足夠空間擺放齊備嘅餐具、調味料及兩個大爐，或許是自己過肥而已。

初次光臨，翻閱多頁餐牌後都未能決定如何點菜。友善嘅姐姐仔耐心地簡單解說後，得知多位長輩食量不多，就建議十二人不妨點選九份套餐，每四人一組分黎食，唔夠先再追加，細心得很！

落好單，先有熱辣辣嘅清湯兩大鍋。第一道上場嘅為每款套餐都包有嘅「綜合菜盤」。細佬影好相相後，帶著手套嘅肥哥哥即代勞將雜菜有系統地轉移入熱鍋中，衛生非常。「綜合菜盤」中有甜甜嘅粟米及魚蛋片、嫩滑嘅豆腐、香軟嘅冬菇、減肥佳品嘅芋絲等。

等待蔬菜煲煮時，各人可先享用前菜。套餐嘅前菜共有三款可選，分別為「和風蕃茄」、「和風生菜沙拉」、「和風蘆筍豆腐」。因共點咗九份套餐，小肥就好順理成章咁每款要三客，點知上枱時居然全部都有四客，亦即十二人都有一份！據悉此舉原來係店子特別「招待」，亦即送贈給大家，確真令人感激不盡。前菜中嘅「和風生菜沙拉」因內含果仁，故小弟未有緣一試。鮮紅潤澤嘅「和風蕃茄」已預切成四至五件，蕃茄軟腍多汁，以豉油及蒜粒調味即倍添惹味。「和風蘆筍豆腐」嘅主角豆腐幼嫩輕盈，頂面伴配清脆嘅蘆筍及甜甜嘅蟹柳，組合十分清新。

平心而論，三款和牛主菜同樣高質，單憑相片都可以清楚睇到和牛薄片嘅紅白雪花紋理清晰粉嫩，如果唔係同場比較下，當真難而道出大大片嘅「頂級日本松阪和牛」（NT 4,200/套餐）最為軟嫩柔潤。「黑毛和牛嫩肩」（NT 3,000/套餐）嘅脂肪率看似偏高，但入口半溶於口腔嘅同時又帶有微微嚼口，吃畢亦不感到溜滯，個人覺得性價比屬三款套餐中最高也。反而因有對比下，最後上嘅「黑毛和牛板腱」（NT 2,480/套餐）就顯得偏嚡咗少少，不過食落和牛潤而不膩，絕對唔係劣品。

套餐嘅單尾同前菜一樣共有三個選擇，分別為以越光米煮出嘅「白飯」、「烏冬麵條」、「煮粥」。哈哈，真係冇諗到十二人竟然會咁齊心地要「煮粥」。粥品同「綜合菜盤」一樣由肥哥哥即場撈煮，即煲即食，包保新鮮滾熱辣。混入咗紫菜、蛋花、碎蔥等配料煲製嘅靚粥索盡涮涮鍋中嘅精華，每人一碗後仲有得添，份量十足，而且鮮甜濃郁，窩心暖胃。送粥附帶爽脆醒胃嘅醃菜三味，都係有十二份架，這就是盡在不言中的無微不至！

可能係見到酒瓶內仲有半樽酒未飲啦，肥哥哥突然呈上十二碟小食「龍膽石斑南蠻漬」以作送酒之用，似乎這種「招待」應改稱為「禮待」才恰當。

據餐牌所示，甜品環節應有三款可選，分別為「杏仁豆腐」、「焦糖布丁」、「當日甜品」。「杏仁豆腐」清涼微甜；「焦糖布丁」軟滑甜濃；「當日甜品」嘅「椰香雪花糕」則芬芳香潤。除咗每款甜品送上四份之外，最後每人仲額外加送清爽清甜嘅「節令水果」。

每次外遊小弟最怕就係食酒店嘅自助早餐，所以除非係房費包咗，小肥盡量都會去訪尋區內嘅小店。多得近年網上流行分享飲食日誌，令團友們有緣遇上街坊熱店「真芳碳烤吐司紅茶牛奶」，食簡單嘅吐司早餐仲學埋國語，掂呀！

「真芳碳烤吐司紅茶牛奶」嘅招牌上寫明創辦年份為2015年，咁都幾新吓喎。玻璃門上清楚道出營業時間為每天早上六點半到下午一點半，明顯只做早餐及午餐。店內面積不大，木地板上只有四張木造餐桌，配上好街坊嘅圓櫈仔，望落都好乾淨企理。四周亦有不少聖誕及可愛佈置，場內氣氛倍添溫馨。

兩頁彩圖餐牌相當詳細，真係估唔到喺台北食早餐都學識唔少國語用詞，例如「吐司」係「多士」、「起司」等同「芝士」咁，非常有趣！大概六人嘅樣子也太外省了，所講嘅國語又充滿著口音，在場年輕嘅服務生都估到大家對點菜流程不太熟識，所以安排好座位後，即好客地介紹餐牌上嘅項目，並友善地告知要先喺收銀處點選食物及付款後，食物準備好就會續一呈上。落好單，俾埋錢，先有清晰嘅單據一張，原來餐店並無設加一服務費嘅。

呵呵呵，講個笑話俾大家笑吓先！話說姨丈叫咗杯「熱真芳紅茶」（NT 45），眼見熱飲被透明膠封實飲唔到喎，佢居然用手撕開塊膠黎飲。。。同桌嘅長輩其實都唔係好明小肥點解會笑爆咀，冇計啦，唯有等自己杯「冰紅茶牛奶」（NT 45）上枱時先玩真人示範。原來台灣嘅「冰紅茶牛奶」亦即香港嘅「凍奶茶」，凍飲香滑醇濃，絕不比港式絲襪奶茶遜色。

1)      豬肉蛋起司（NT 60）：「豬肉蛋起司」每客有兩件。得悉團友們有意分黎食，姐姐仔仲好客氣地免費幫我地一開二後再開四，實在太周到啦！豬肉蛋起司嘅兩塊多士好鬆脆，夾喺中間嘅豬肉、蛋蛋、芝士餡又夠惹味爽潤，掂呀！

2)      真芳三明治（NT 90）：「真芳三明治」其實係以豬肉蛋起司作基礎，面底另加兩層薯仔南瓜沙律，要留意嘅一點係內含花生醬，好似細佬咁有敏感問題就唔食得啦。

3)      起司起司蛋（NT 50）：顧名思義，「起司起司蛋」主材用上兩款車打芝士及水牛芝士，並加上煎蛋，孖芝蛋三文治香濃鬆軟，簡單可口。

4)      真芳蛋餅（NT 30）：姐姐仔推介嘅真芳蛋餅外表有啲似薄罉，但個蛋餅係軟腍腍嘅，入面有韭菜、蔥、同蛋蛋，濕潤得黎咸咸甜甜咁，都幾得意。NT 30絕對係又平又正，結果當然係要追加啦！

去台灣玩，除咗要食台菜、小籠包、火鍋之外，家人例必要食餐日本菜；有心要為親友嘅飲食日誌增添驚喜，XO仔今次就好大擔咁喺互聯網上挑選咗間唔係咁多人認識嘅「允壽司」。

壽司屋隱蔽於窄窄嘅單程橫街內，雲石閃光嘅門面新潮得黎甚為低調。餐店面積不大，右方為師傅嘅大舞台，面前排出十二個吧位，以透光嘅雲石小牆分隔，貴氣得黎不失時代感。牆上掛上以毛筆寫出店名中大大個「允」字，充分地表演出中國書法藝術嘅氣勢。

網上訂座流程簡易快捷，可慳返長途電話費之餘，小肥又唔洗講國語，對話有哂記錄唔洗驚會誤解，十二人包場仲可以一早訂下NT 3,500/位嘅精選午市套餐，並道明團友們有啲咩特別飲食要求及敏感問題。掌舵人小穎師傅相當好客同細心，用餐當日先確認同行邊幾位長輩只能食熟食，及邊個係有超多食物敏感嘅XO仔，態度絕對認真！

食物全權由師傅安排，清酒就由識少少扮代表嘅小弟揀咗樽果香及花香味討好嘅「澤姬純米大吟釀」（NT 3,800）。

1)      伴配魚生嘅青瓜、蘿蔔及靚薑全為師傅自家醃製，均爽脆醒胃。

2)      開胃小點「鮑魚豆腐沙律」：沙律以幼嫩嘅豆腐、腍潤嘅鮑魚、清爽嘅無花果、鮮爆嘅三文魚籽及麻醬所混製而成，組合新穎獨特，集齊爽嫩脆腍，口感極之豐富，以葫蘆碟仔承載更覺精緻矜貴。

3)      「真鯛二重奏」：真鯛以黑碟呈上，睇得出師傅喺視藝上都花下不少功夫。兩片銀光閃閃、魚肉透光嘅真鯛上分別擺放咗雪白嘅白蝦仔及橙黃嘅馬糞海膽，建議連同山葵及黑色嘅昆布碎花續件捲起一口食落肚。白蝦真鯛卷清香軟嫩，海膽真鯛卷則鮮濃甜美，卷物中嘅昆布碎花所散發出嘅咸香慢慢滲進味蕾，感覺就好似舌尖喺沙灘吹緊海風咁，何其妙哉！

4)      喺無添加嘅赤貝及間八刺身輕輕點上山葵豉油已夠清甜芳香，這個返璞歸真嘅對比舖排突顯出後者嘅清麗脫俗，同時亦反映出設計者嘅心思細密。

5)      厚厚嘅中拖羅刺身色澤粉嫩油潤，同伴配嘅淮山及昆布半溶於口腔。

6)      見外出天氣有點寒冷，小穎師傅好體貼地叫廚房先蒸出鮮甜暖胃嘅「蟹肉茶碗蒸し」作為壽司環節前之間場菜。

7)      大廚事先講明六款壽司均已調好哂味，味道編排由淡至濃。第一件深海池魚壽司爽厚潤澤，清香肥美。

8)      寒鰤魚壽司軟嫩甜潤。

9)      右口魚壽司用火槍輕輕燒過，魚肉幼嫩滑溜，魚味更為鮮濃突出。

10)  以紫菜包住嘅燒帶子外層香脆，帶子肉厚鮮嫩。

11)  相信整頓午餐製作最複雜嘅都要數件「昆布鯖魚壽司」，因為要由兩位師傅合作切割魚片、於木盒上舖砌食材、擠壓木盒、包紮成卷物、再添置調味，每個動作都一樣咁乾淨俐落，實在另人嘆為觀止。昆布鯖魚壽司大大件咬落去好爽厚，當中最濃郁就係個昆布味，食食吓又傳出陣陣嘅紫蘇香同柚子香喎，確真細膩得很。

12)  大拖羅壽司粉裡透白，其鮮香甜美盡化於舌上後，吃畢仍齒頰留香，令人回味無窮。

13)  真係估唔到壽司屋除咗有高質嘅魚生之外，連熱食都絕不失禮！午餐所包有嘅天婦羅三品用上源自日本嘅北海道洋蔥、北海道粟田、白子炸製，聽落都覺得名貴得好有驚喜！三款金黃乾巧嘅天婦羅層炸皮香脆鬆化，以竹籤串起嘅北海道洋蔥爽潤惹味、躲於洋蔥下嘅北海道粟田亦爽甜多汁。第三件白子因有紫蘇葉包住，所以炸物就透出綠色。此道紫蘇白子天婦羅芳香脆皮，中間嘅白子柔潤白滑，且軟嫩非常，黏上碟邊嘅咖哩鹽粉即能提升鮮香。

14)  「海膽拖羅手卷」由師傅以「心連心」嘅方式續條直接轉交到貴客嘅手上，確保新鮮又窩心。橙美嘅手卷鮮甜無比，外脆內香嫩，正爆呀！

15)  甜品「黑糖粉抹茶麻糬」細細杯嘅份量啱啱好，麻糬煙煙韌韌，當中嘅黑糖味微甜且不溜滯，可口味佳。

16)  飯後一杯暖胃嘅特濃咖啡剛好為午宴畫上完美嘅感嘆號！

由台北去台中最快捷嘅方法就係坐高鐵，車程約四十五分鐘。外國遊客可於網上預先訂飛及揀選座位，出發當日只需於指定櫃檯就可取得車票，流程十分簡易。來往台北及台中嘅高鐵列車每程NT 2,250，車上厚墊座椅舒適闊落，包咗每人一件糕點及飲品，絕對方便又抵。

兩年前左右，多得越台工作嘅肥叔叔推介，肥肥家族方才有幸於台中「樂沐法式餐廳」品嚐過美女廚神製作嘅不一樣感官旅程：

<https://tw.openrice.com/zh/taichung/review/%E6%A8%82%E6%B2%90%E4%B8%8D%E4%B8%80%E6%A8%A3%E7%9A%84%E6%84%9F%E5%AE%98%E4%B8%96%E7%95%8C-e124169>

點知冇幾耐就收到風，話餐廳於2018年尾將會結業。因家中多位親友都未有緣一訪，所以小肥就幾經艱辛咁托上托，務求要訂到位一同去道別，嘻嘻，皇天總是不負有心人嘅，日子時間當然係任由餐廳定啦！十二人嘅晚餐必先預定菜單、道明各人對咩食物有過敏及收取訂金，全程以電郵溝通，非常簡易。

闊別一年多，三層高嘅洋房依然貴麗大方。由於早已訂下菜譜，埋位即由最識飲嘅姨媽點選酒品，不過因餐店不再入貨，大多項目都已售罄，只係牌上未有標明。溫婉有禮嘅哥哥仔極之有耐性，除咗推介仲有貨嘅精選紅酒外，對待臨時對菜單有異議嘅auntie更加係有求必應，十分相就，態度專業得很。

處理好飲品後，姐姐先送上兩款海鹽味及海藻味牛油。正當細佬懶醒地同各人提到2017年嘅「感官」午餐中有多款自家製麵包，印象最深刻有香醇惹味嘅高梁酒臘肉包及芳香微甜嘅蜂蜜麥包時，即令大家滿心期盼，真係冇諗到晚餐嘅麵包居然只有含果仁及不含果仁兩種！雖然包品熱辣鬆脆，但喺有比較下就覺得廚房孤寒咗，誠意也大打折扣囉！

店內全場嘅晚餐均清一色由兩道是日下酒菜作序。第一道海鮮二重奏先以石春拼盤呈上，外表閃爍耀眼，精緻美觀。應建議由左邊起食，橢圓形嘅「青蘋果煙三文魚啫喱」質感軟潤，無奈底層件餅塊過份腍身，加上入口即嚐到三文魚籽嘅腥味，這種重口味也太不令人開胃了吧！幸好旁邊金光閃閃嘅匙羮上件「海膽蟹肉牛油果卷」清新甜美，可口脆巧，叫做挽回少許失落之感。第二道下酒菜「苦瓜／帶子／芝士」以彩色嘅食用花點綴，睇落就靚啦，但係可能個芝士苦瓜組合嘅苦味過份剛烈，細佬真係食唔出任何帶子嘅元素囉，不幸中之大幸就係兩啖就食完，算係唔會咁浪費食材。

接著嘅「冷燻鵝肝：桂花／杏桃／蓮藕／蓮子」外型典雅，可惜主角鵝肝偏嚡同硬，唔得軟滑，其味道亦不夠香濃，甚為失色！碟上最正反而係舖面巧薄乾脆嘅炸蓮藕片及隱藏喺底件脆卜卜嘅鴨舌！

或許係自己期望太高吧，傳聞嘅招牌菜式「八戒：豬心／薏仁／四破魚／煙燻豬骨汁」除咗輕巧脆薄嘅卜卜脆討好之外，雖則豬心嘅質感尚算爽腍，敗筆在於調味滲出一股不易接受嘅腥與押，就連汁液中嘅煙燻味都未能蓋過，莫非「八戒」未洗白白？！

晚餐高潮位必選「小牛胸線：黃菇／香料麵包／山茼蒿」！熱辣嘅醬汁由專人續一喺食客面前斟上，小牛胸線方塊外脆內軟嫩，香口惹味得黎一啲都唔溜滯，一個人食兩份都冇問題。

壓軸嘅鵝肉主菜登場前，每人先要揀選一把靚刀，每把都咁有睇頭同份量架！跟小牛胸線一樣，汁液上枱時先會即場淋上。記得上次黎食「感官」午餐時，當中嘅嫩烤鵝肉主菜是何等精妙，想不到餐店結業前出品嘅「嫩烤鵝肉：無花果／可可香料醬」竟然會係韌到切唔斷，咬唔開！牙力唔好嘅長輩們好多都勁不情願地食剩喺碟，睇日劇學懂此舉可算為對廚師最低嘅評價。

換轉甜品環節前，先由清新爽涼嘅「鳳梨：卡蒙貝爾乳酪／野薑花／馬告」作間場。正常版甜品「楓蔦黃」為楓葉栗子蛋糕。不含果仁版甜品為中西合璧、微甜滋潤嘅「睡蓮」。而不能進食甜品嘅食客就有份酸都佢地咪哂眼嘅「生果盤」。

結尾嘅「精緻茶點」中只有粉紅小天鵝一如名字般精緻，但僅此而已，因為三款茶點極度酸澀，食到連牙仔都哂打冷震，聽落恐唔恐怖呢？！好在飯後有杯正正常常嘅特濃咖啡中和吓先舒服返咋。

最佳餐廳」之美譽，當真萬萬估不到於二零一八年十二月正式結束營業前嘅告別宴居然會教人如此驚嚇地失望！雖則店內嘅接待員及服務生依舊友善體貼，但對遠由香港越洋嘅家人黎講，菜式偏低之質量及廚神未有親身烹調嘅情況下，也顯得「樂沐」的落幕過份草率及敷衍了，感覺就好似餐店喺度夾硬頂埋個租約咁。因深深體會到名廚店主對食客嘅尊重都消失埋，在座嘅各位都表示即使餐店日後會重開都絕不會幫襯！店子已沒有了，更談不上有進步空間，唯有搖頭高歌一曲「忘記它」。

由「寒舍艾麗酒店」前往「寒舍艾美酒店」只需行過一條街，五分鐘唔洗就行得到，可謂超級方便。酒店中餐廳「寒舍食譜」樓底高高，極具氣派。用餐大堂開揚通爽，地上舖出厚厚嘅紅地毯，配上牆上嘅國畫，中國風味濃厚。服務生體貼友善，點心小菜質高味佳，整頓午餐當真猶如店名般謙遜，絕對值得推介。

1)      椒鹽鴨舌（NT 520）：台式鴨舌同港版嘅唔同，每件都係連埋下巴嘅，所以大隻得多，細佬唔係幾識點咬，唯一只可以講得出椒鹽鴨舌嘅炸皮好鬆脆惹味。

2)      脆皮先知鴨（NT 1,880/隻）：旅遊王Uncle介紹嘅招牌菜「脆皮先知鴨」原來係由寒舍集團創辦人蔡辰洋先生以蘇東坡嘅名作「春江水暖鴨先知」起名。每隻均由帶上手套嘅師傅即場切出。脖子長長嘅先知鴨當真如餸名般脆皮，皮下脂肪不多，鴨肉芳香軟嫩，堅掂！

3)      欖菜四季豆（NT 480）：砌到成幅畫咁靚嘅四季豆翠綠香脆，簡單可口。

4)      XO醬乾炒蘿蔔糕（NT 420）：雖則炒蘿蔔糕好夠乾身，無奈其炸皮過厚及腍，蘿蔔糕方塊偏韌而不鬆潤，甚為失色。

5)      手創花枝軟絲丸（NT 680/客）：色澤金黃嘅花枝丸香脆鬆爽。

6)      肥牛潤腸粉（NT 280）：腸粉嘅甜豉油係上枱後由服務生代為淋上，以確保腸粉唔會被浸到腍哂。此味肥牛潤腸粉嘅肥牛並非捲入腸粉內作餡，而係舖喺腸粉上蒸煮嘅。墊底嘅腸粉柔軟潤滑，伴配軟嫩嘅肥牛碎即增添肉香。

7)      百花油條腸粉（NT 240/客）：百花油條腸粉亦即釀入蝦膠嘅炸兩，香滑嘅腸粉皮下嘅油條鬆化脆口，中間嘅百花蝦膠亦爽潤彈牙，點上甜豉油已夠滋味無窮！

8)      櫻花蝦豚肉絲炒高麗菜（NT 480/客）：以櫻花蝦豚肉絲點綴嘅高麗菜爽脆惹味。

9)      金瑤蟹肉乾燒米粉（NT 880/客）：金橙亮麗嘅乾燒米粉幼嫩軟滑，油潤芬芳，蟹肉則鮮甜香嫩，撈入清新爽口嘅芽菜即加添口感，十分細膩。

10)  熊貓流沙包（NT 300/三隻）：熊貓流沙包外型趣緻可愛，肥嘟嘟嘅包身鬆軟熱辣，中間嘅奶皇餡心亦香濃甜美。

小表姨所介紹嘅「寒舍艾麗酒店」座落於超級方便嘅信義區，附近嘅購物熱點如「新光三越」、「誠品書店」、「微風松高」等全部不用坐車，步行只需幾分鐘就到。

正門嘅哥哥仔非常客套有禮，除咗會自動為新住客提取行李之外，得知十多人每天出門都要三部的士往同一個地址後，更會即場安排，效率高且極之妥當。樓上接待處嘅姐姐們亦十分友善及有耐性，雖則多間房間均由細佬於網上預訂，但團友們對房間嘅要求不一，同時間可有兩位同事幫忙登記，實在令人感動。

台北商場最不缺乏咖啡屋，今次就俾姨媽們發現「新光三越A11館」內有間來自日本北海道嘅「小樽手作咖啡」。小店以木為主嘅裝潢十分簡潔，服務生亦相當友善。吧位配上小枱燈嘅設計令氣氛更為輕鬆寫意。

五頁餐牌均附上詳盡解說及彩式插圖。多款飲品中，外型最普通就係杯「凍小樽秘制煉乳調和珈琲」（NT 140），不過凍珈琲香醇甜美，而且滑溜非常。姨丈所點嘅「爵士炭燒珈琲」（NT 140）即叫即燒，芳香洋溢。最可愛必選靚靚媽咪及姨媽們所點嘅「橘皮風味拿鐵珈琲」（NT 140）及「沖繩黑糖拿鐵珈琲」（NT 140），因打起嘅奶奶泡沫為立體嘅史努比及其他卡通模樣。

造型可愛，芬芳味佳，實屬打卡熱點也。

美國HBO神劇「權力遊戲」（Game of Thrones）第八季之終極篇於2019年全球同步播出。為隆重其事，電視台更與名牌威士忌「約翰走路」（Johnnie Walker）攜手合作，調製出限量版系列「White Walker」，名字取自劇集中嘅角色，同時仲好吻合威士忌品牌嘅名，有意思極！碰巧是次台北之旅，竟然被酒鬼三人組喺「微風松高」購物時遇上正在佈置中嘅臨時攤位商店「Johnnie Walker Taste Lab」，難得大家咁有緣喎，結果當然係等到傍晚六點正式開門時，即探個究竟啦！

原來限時店舖係以酒吧形式向飲客介紹不同款式之威士忌，包括全新嘅「White Walker」，可即場淨飲烈酒或品嚐酒保特調之雞尾酒品。場內有個會噴假雪嘅藍白「約翰走路」（Johnnie Walker）模型及「權力遊戲」嘅皇者寶座佈景供貴客拍照留念。小店每日以特價NT 960限量推售「White Walker」，每位客人最多買兩樽，凡購一樽即送兩杯靚酒，於互聯網發佈靚相再加送酒版，認真抵玩！聽完哥哥仔嘅急口令解說，嘩卡卡，三口子當然係每人買兩樽啦，亦即每人可即場享用四杯酒酒！

亦一啲都唔馬虎，喺冰島形嘅擺盤加上乾冰營造出冰凍嘅效果，外觀相當震撼！相中嘅矮杯內為淨飲嘅

週末訪台數天，主要目的當然係離不開吃喝玩樂，但要為一行十二人編排膳食，絕非易事。幸好互聯網上嘅飲食資訊非常詳盡，XO仔方才發掘到連旅遊書籍都未提及過嘅隱蔽美食大宅「桌藏」。以電郵訂座，只需填回信用卡授權書並支付訂金，流程相當簡易。

的士停在以磨沙玻璃圍起嘅餐廳門前，第一刻感覺十分時尚。步進圓形嘅門框卻又踏上幽靜嘅石徑，庭園式嘅設計又充滿著中國風。店內嘅光線柔和，摩登嘅間隔開揚通爽，厚墊椅櫈亦好舒適。每個座位面前除咗有齊備嘅餐具，最搶眼就係把扇形菜單。反轉一看先知原來兩邊嘅內容為中英對照，這個中西合璧典雅得也真夠全面。八道菜餐單價格為NT 3,300/位，當中每人需點選湯品及主菜兩個項目。湯品有「干邑龍蝦海鮮湯佐擔仔麵」及「日本瑤柱、金華火腿、雞煲湯」兩款可揀；而主菜則有四款之多，當晚有「澳洲羊肩排」、「澳洲和牛臉頰」、「美國安格斯牛扒」、「櫻桃鴨油封鴨腳」。

點好菜，晚餐即由一小杯清香怡神嘅「台南有機紅心芭樂茶」作序，據悉有養生紓壓之效。接棒嘅四式麵包有紅豆包、火腿包、橄欖芝麻包、芝士包，每件不單外表金黃，而且熱辣鬆軟，一人有成籃咁多，份量真夠堅！兩款牛油修長軟滑，中式嘅擺盤亦非常吸引。

菜譜中嘅前菜為二重奏，第一節「當令開胃菜」乃色澤鮮艷嘅小食拼盤。金邊靚碟上有鮮爽醒神嘅天使紅蝦、芬芳彈牙嘅松露鮑魚、鮮香潤澤嘅蕃茄仔、爽脆甜美嘅粟米仔及無花果。而第二節「台式蘿蔔糕微烤法國鴨肝醬」雖看似簡單，但菜式嘅複雜度卻絲毫不遜前段。長碟上兩件台式蘿蔔糕方塊質感厚潤有彈性，師傅巧妙地喺面塗上微烤過嘅法國鴨肝醬，除咗為糕品添上柔軟滑溜，同時亦能帶出鮮濃惹味，神來之筆確真細膩得很！

湯品一環，小肥揀咗「干邑龍蝦海鮮湯佐擔仔麵」，熱湯均由服務生即場續一倒入石碗中。橙黃色嘅海鮮湯底香濃醇厚，幼身嘅擔仔麵條又夠柔韌，混入鮮甜爽脆嘅龍蝦肉，龍蝦湯麵絕對真材實料！

人家聽歌學國語，小肥則用餐學中文！今次就由「桌藏」老師教曉三魚組成嘅「鱻」字為「鮮」之異體字；接著嘅一道「鱻盤」就係指當日最時令嘅海鮮「處女蟳」，即「螃蟹」，所烹調出嘅「處女蟳焗越前米」。菜式用上秋天最肥美嘅處女蟳，師傅拆出蟹肉後，就用返個殼加入飽滿晶瑩嘅越前米焗製，頂面再以翠綠嘅菜苗點綴，蟹飯入口鮮香濃甜，且毫不溜滯，當真如餸名咁「鱻」！

主菜出場前，貴客眼前突然煙霧四起，感覺猶如置身於仙境中般奇妙。霧裡透出嘅點點紅原來係清涼醒神且消滯嘅「洛神花冰沙」。真係冇諗到一頓晚餐除咗可大飽口福之餘，更可享盡眼福！

兩三成熟嘅「美國安格斯牛扒」主菜不單紅潤有光澤，油脂不多，一刀切落去已感其肉質十分鬆軟，入口更覺美國靚牛極富彈性，且肉汁豐厚，惹味可口。

由咸轉甜，間場先有杯清爽微甜嘅小红莓凍飲為味蕾洗滌一番，冇錯，入面仲有朵食用花架。大廚嘅心思相當精密，甜品嘅設計跟前菜好對稱地一同譜出二重奏，第一節亦同為拼盤，不同之處在於前菜拼盤以西餐碟上，而甜品拼盤則換上鮮紅嘅中式錦盒承載。錦盒中嘅四件甜點均一口一件，中央淺啡色嘅「烏龍茶泡夫」外鬆內軟，烏龍茶味芳香，而上方件「焦糖芒果辣椒糕」則清甜得黎帶有少少辣勁，好得意。由於細佬早於訂座時說明對果仁敏感，自己嗰份就冇咗含果仁嘅嗰粒朱古力，而多咗件又彈又潤又清香嘅芭樂糕。甜品第二節就帶點分子料理元素，連餐具嘅組合都新潮過人。下方嘅白碟上有件被雜果圍住嘅法式多士方磚，碟子上方凹咗嘅一角剛巧連接住另上嘅糖漿。法式多士方磚鬆化輕盈，頂面以黑糖魚子醬點綴能增添濕潤及微甜，食客可因應自己嘅需求再淋上糖漿，伴配爽甜嘅鮮果又夠清新健美，整個設汁除咗美觀及美味之外，更很是周詳。

晚膳以餐後飲作結，小肥杯洋式特濃咖啡屬刺激性飲品，咖啡師不知是有意定無意地揀選咗隻刻有「靜」字嘅木碟呈上，莫非係要傳遞喝畢要靜下來嘅訊息？！

於台北化身為一所型格住宅嘅「桌藏」由外到內、裝潢到菜式，都散發著中西匯萃嘅氣息。時尚嘅用餐大堂由年輕友善嘅服務生掌舵，到步一刻已續一扶持長輩們入屋就座，離開時仲親身陪同去搭的士，體貼入微之情盡在不言中。大廚端上餐桌上嘅無國界美食精緻味佳，中段更締造出煙霧迷漫嘅特效仙境，這個感觀之旅確真豐盛，而且仲極之抵玩添！

國泰航空CX 885由洛杉磯直飛往香港，十五個半鐘頭嘅長途航班選用B777-300ER型號客機，首次感受到超豪嘅頭等體驗，實在難能可貴！

頭等機艙儲物位置堅多，每個獨立座位可以成個人打平之餘，伸直對腳瞓咗喺度仲有位左右碌黎碌去，闊落舒適得很。前方又有個座椅方便同行嘅友人埋黎傾計，搖身變成一個迷你客廳咁，私人空間勁足。

空中服務員態度誠懇，細心體貼。每位搭客都會送贈一套睡衣、拖鞋、眼罩及個人用品套裝，周到齊全。機上嘅音響隔音系統好強好出色，影片選擇又夠多，結果XO仔連卡通片都睇埋，冇去戲院咁耐反而有機會一次過追返哂多部好戲，正呀！

膳食方面亦相當豐富，只係平心而論，午餐及小食比晚餐明確地高質吸引。一上機先有香檳飲，伴配雜錦果仁，不過小肥因有敏感問題未能進食。起飛後不久即為午餐時間，頭盤仲要係成盒魚子醬拼香檳，這份高級實在令人期盼接著嘅餐飲！蜆蚧周打湯及煙鴨胸均輕巧甜美，不過最有驚喜就係個超級軟腍入味嘅「燴牛仔麵頰肉配芹根蓉及焦糖胡蘿蔔」主菜。細佬一直冇瞓，狂煲電影，眼見晚餐選擇唔係咁啱心水，所以當其他客人都休息緊嘅時候，自己就續一食齊兩款心儀嘅中、西小食。中式嘅榨菜肉絲湯麵湯底夠清、麵條夠爽、榨菜肉絲又夠味，而份走咗包嘅烤牛肉漢堡亦厚潤多汁，鬆軟惹味，配埋靚靚甜酒，啲戲都變得好睇得多。

長輩居美多年，對於區內嘅中餐廳都非常熟識，「海天」可以話係近年最常幫襯嘅一家，全因小店老闆Ricky哥哥平易近人，好客又抵得諗，家人每每要求佢煮啲新餸或者係懷舊菜，做得到嘅佢都必定會試，包場開P收費亦十分合理，難怪會咁受街坊歡迎。壽宴當晚共有兩圍，以下大多功夫菜式並未列入餐牌上，故亦必先預訂，敬請留意。

1)      冬瓜盅：每圍一大盅冬瓜盅，外表已夠震撼，如相所示，甜濃嘅靚湯入面有爽脆嘅竹笙及香濃嘅鴨絲，絕對真材實料！

2)      椒鹽鮮魷：椒鹽鮮魷香脆惹味。

3)      花膠鮑魚：珍藏雙寶之花膠鮑魚均厚潤滑溜，鮮濃美味！

4)      燒鴨：燒鴨大大隻，皮脆肉鬆軟。

5)      江南百花雞：傳統江南百花雞色澤金紅，雞皮香脆鬆化，皮下嘅蝦膠亦爽潤彈牙，轉兩轉已成功清碟，美味程度不言而喻。

6)      酥炸生蠔：酥炸生蠔香口皮脆，肥潤鮮美。

7)      花菇扣海參：海參爽厚潤滑，花菇芳香厚腍，正到暈呀！

8)      龍蝦伊麵：鮮橙美艷嘅上湯龍蝦鮮甜無比，爽脆多汁，墊底嘅伊麵索盡精華入哂味，堅掂！