日期 : 19/02/2008 (Day 4) 

行程 :  藏王溫泉街 ~ 山寺

呢朝早只得維妮, 張生同dor神食早餐!  原來車厘子尋晚半夜成晚嘔咗N噤多次  所以佢無食早餐啦!  唉! 維妮仲以為佢尋晚喺溫泉嘔完已經無晒事tim! dor神仲一邊食早餐一邊講番尋晚嘅情形, 佢話車厘子死都唔肯嘔落個馬桶到 攪到成個洗手盆都係, 仲要佢去清理...喂...喂...喂...好啦喎 我哋食緊早餐架, 再講就連我哋都嘔埋啦! 不過維妮真係擔心佢唔知可唔可以繼續之後嘅行程呀......

原本plan嘅行程係今日朝早上山睇樹冰, 但因為尋日已經睇咗, 所以今日我哋多咗半日出嚟, 所以我哋決定喺藏王呢度周圍行吓影吓相 check out 咗之後我哋又行番去滑雪場, 唔知係咪我哋尋日太心急去睇樹冰呢? 我哋今日慢慢睇先發覺到原來條橋仔後面嘅雪景係超靚架, 好似童話噤好靚好浪漫呀! 維妮又狂影相!

影完相我哋就揸埋架車落去溫泉街行, 順便要買啲藥比車厘子! 我哋買咗藥比車厘子食之後我哋三個就去咗溫泉街行, 睇吓其他啲溫泉旅館, 而車厘子就喺架車到休息, 真係有啲戥佢慘呀 維妮希望佢食咗啲藥會無事啦!

原來溫泉街啲景色都好靚架, 我哋仲行埋啲小路tim呀, 其實好多小路都比雪封咗, 啲樓梯又比雪封埋, 但我哋都要照行!  噤行法真係有啲危險架, 噤我哋噤危險都要行為咩呢? 其實都係想睇吓會唔會發現到啲咩靚靚雪景啫! 行行吓比我哋見到高見屋呀!  呢間高見屋有咩噤特別呢? 就係特別~貴囉 其實真係唔知佢貴喺邊呢? 除咗個外表靚啲之外!  行到噤上下都係時候走啦! 但維妮依然都係好唔捨得藏王呢個地方呀!

根據我哋嘅行程我哋下一站應該就直去銀山溫泉架啦, 但其實我哋都仲有好多時間, 所以我哋就決定順路去埋山寺  去到山寺已經成1點鐘啦, 我哋架車去到山寺門口就見到有個嬸嬸手指指叫我哋泊架車入去car park到 ! 但係寫住有料架噃? 點解呢 ?噤我哋就攪低個窗睇下嬸嬸講咩啦, 喺維妮聽得一半聽唔到一半之下, 知道原來嬸嬸係隔離間餐廳嘅人嚟架, 噤我哋泊咗入去係咪一定要幫親佢呢?  雖然我哋都諗住食咗嘢先上山寺, 但都比我哋揀吓好庥!  噤維妮就同dor神落車周圍睇下仲有無其他餐廳可以選擇啦!  睇來睇去, 其實都無咩好揀, 所以我哋都係決定喺番嬸嬸到食啦, 入到去嬸嬸就指我哋叫我哋換雪靴, 吓?食嘢都要著雪靴? 維妮呢個時候先知道原來嬸嬸以為我哋唔食嘢淨係上山寺, 噤維妮咪同佢講我哋想食完嘢先上去!  入到去食嘢嘅地方見到有個好kawaii嘅小朋友 又見到有個BB仲有個mama, 睇得出呢間餐廳係一家人開架啦, 呢間餐廳食嘅嘢真係好簡單, 連memu都無 啲memu全部掛晒喺幅牆到, 仲要全部係日文, 連公仔都無呀! 呢個時候車厘子話要食淨烏冬, 張生又話要食咖喱, dor神就話要食有肉嘅嘢, 維妮好似做咗呢度嘅待應噤, 個個都同維妮落order 佢哋真係當正維妮啲日文好勁噤喎, 一陣維妮唔知叫咗啲咩比佢哋食就慘啦! 噤維妮就唯有用有限嘅日文同嗰位mama落order啦, 好彩mama又聽得明維妮啲唔咸唔淡嘅日文喎~~ 不過呢位mama都好細心噤聽, 當維妮聽唔明, 佢仲帶維妮入廚房指比維妮睇係啲咩嚟tim 呢位mama真係好細心呀!  不過維妮見到佢好忙架, 又要招呼我哋啦, 又要揪住個BB, 又要開飯比嬸嬸同個小朋友食, 又要行番出去睇舖(佢哋出面其實係一間賣手信嘅舖頭嚟架!)佢真係一腳踢呀! 

食完嘢我哋就起行上山寺啦, 因為車厘子都仲係好唔舒服, 所以我哋決定留佢喺度等我哋返嚟 我哋換咗雪靴就出發啦, 其實起初維妮都唔知點解要換雪靴架, 因為維妮一直都以為山寺其實只係一間廟 噤參觀一間廟又點解要著雪靴呢?

日期 : 18/02/2008 (Day 3) 

行程 :  藏王樹冰

越接近藏王, 心情就越興奮呀! 去到藏王都成兩點幾啦, 我哋首先就梗係去咗酒店check in先啦! 我哋今晚住嘅係藏王國際, 揀呢間嘅原因除咗係兩位大少話個風呂正之外!  其中一個原因就係因為佢同去睇樹冰嘅吊車非常之近, 只要過條橋就到! check in時我哋見到原來酒店都有吊車飛買, 仲有discount tim, 不過就只有夜晚飛! 好唔好喺度買呢? 其實我哋原本plan嘅行程今日只會夜晚先去睇樹冰, 但因為我哋早咗到, 所以我哋要考慮下好唔好依家就上去睇樹冰先呢? 我哋又要考慮埋幾點食飯喎! 因為酒店要我哋比食飯時間佢哋, 食飯時間我哋改完又改, 我哋左諗右諗.....最後決定同酒店買咗7:30嘅吊車飛, 跟住依家就上去睇樹冰, 睇到5:00落番嚟, 食6:00嘅懷石料理, 食完7:30就再上去夜探樹冰! 係咪好似好 perfect呢, 但其實......我哋係蠢咗架, 仲係超級蠢嗰隻呀! 大家睇落去就知啦!

攪掂完check in手續, 決定依家就上去睇樹冰, 講真, 維妮嘅心情真係又緊張又興奮架, 因為我哋知道上到去係超級凍 所以我哋係成套武裝上去架,真係咩保暖嘢都著晒上身呀!

由藏王國際去吊車站係要經過一條橋仔, 到咗個滑雪場就會見到個吊車站啦, 一上到架吊車時, 梗係要霸番個窗邊位企啦! 呢個時候維妮見到個窗掛咗一塊膠板喺到, 維妮好奇怪究竟要嚟做咩嘅呢 ? 但因為出面啲雪景太靚啦, 維妮都無再細心去研究啦, 喺吊車到維妮只係不停講好靚好靚同不停噤影影影 哈哈~好興奮呀 到咗轉車站啦, 喺呢度已經見到有兩棵樹冰喺度啦, 我哋又影影影 嚟到轉車站, 見到有個溫度計睇下, 嘩~ -9度呀, 好凍呀!唔理啦, 快啲去轉車再上啦, 終於上到終站啦, 嘩~呢度個溫度計係 -11度呀! 但興奮心情係蓋過冰凍架, 維妮第一時間就衝咗出去睇樹冰啦 嘩~嘩~嘩~嘩~~樹冰~樹冰~樹冰呀!真係想攬住佢呀! 我同車厘子都凍到塊面紅晒呀, 好彩呢度有間餐廳可以入去暖下, 我哋就係噤暖完又再出去再睇, 睇完又入返去, 來來回回好似過冷河噤,  唔知點解啲樹冰睇極都唔厭嘅~哈哈~ 

其實我哋除咗嚟睇樹冰之外, 我哋上嚟係有一個任務架 就係要做一個實驗, 就係要睇下一條濕毛巾喺呢度"fing"係咪真係可以變雪條呢? 呢個任務我哋交咗比張生去負責!

經過3分鐘嘅過程, 係真係得架! 哈哈, 真係笑死維妮啦,做完實驗見到啲人越嚟越少, 天氣都好似越嚟越差, 明明頭先都仲可以隱約見到地藏尊, 依家都已經見唔到啦, 所以啲工作人員都開始欄繩唔比人行過去, 我哋見時間差唔多所以我哋走啦, 真係有啲唔捨得走呀 好彩今晚我哋又會再上嚟啫, he~he~  

我哋坐番吊車落去時, 有兩個工作人員同車, 呢個時候維妮終於知道掛喺窗邊塊膠板係要嚟做咩啦!  原來係用嚟捔走窗上面啲冰架, 噤睇出面啲雪景就會清楚好多啦!又幾好噃!  又喺呢個時候見車厘子神情有啲呆滯原來佢話佢唔係好舒服呀! 呀~唔通頭先凍親? 我哋今晚仲要上去架噃......

 

日期 : 18/02/2008 (Day 3) 

行程 : 夜探樹冰

我哋落番去滑雪埸見仲有少少時間先夠鐘食飯!  我哋就去咗一間買手信嘅舖頭睇嘢, 順便維妮要買番啲樹冰Postcard寄比啲好朋友!  行完之後我哋又差唔多夠鐘返酒店食飯啦! 今晚我哋係食懷石料理, 我哋去到食飯嘅地方, 哝~原來啲嘢食已經擺好晒等緊我哋啦, 啲嘢食擺得好靚呀, 真係靚到唔係幾捨得食  但啲份量好似少咗啲喎, 樣樣都細細件, 會唔會唔飽架?  但原來我哋錯晒, 如果我哋真係只食依家枱上面嘅食物, 相信我哋真係唔會飽, 但我哋食食吓, 又有人攞啲嘢過嚟, 食食吓又有嘢攞過嚟, 來來回回應該都有成三四次呀 再加上車厘子唔舒服話無謂口, 我哋又食埋佢嗰份, 食到我哋要話:{好啦, 唔好再嚟啦, 食唔落啦喎!}  點知最後佢仲問我哋要唔要飯, 梗係唔要啦, 想食傻我哋咩!  懷石料理係咪最後先食飯嘅呢, 因為我哋每餐嘅懷石料理都係最尾先問我哋要唔要飯架喎!? 呢餐食極都食唔完嘅懷石料理食咗我哋成個半鐘呀

我哋食完都已經夠晒鐘要再坐吊車! 點解會話夠鐘?  因為我哋同酒店買咗夜晚飛睇樹冰, 係酒店啲人叫我哋7點半喺大堂等架庥, 我哋以為唔駛坐吊車, 酒店會有車上去啦, 點知去到大堂, 再問吓啲staff, 佢就指我哋去搭吊車! 唉~都係自己搭咋庥, 做咩要人哋7點半喺到等啫 真係唔知為咩! 夜晚坐吊車出面啲景真係無日頭噤靚啦, 因為黑得濟咩都睇唔到~又上到嚟啦, 嘩~今次天氣好咗好多呀 雖然係夜晚, 但因為天氣好, 所以啲樹冰清楚咗好多呀, 日頭同夜晚睇嘅樹冰真係唔同呀, 夜晚啲樹冰增加咗啲神秘感, 加埋射咗啲彩燈落去又多咗幾分浪漫嘅感覺呀~ 神秘還神秘, 浪漫還浪漫我哋依然係好凍好凍呀 噤梗係又入餐廳過冷河啦, 就喺過冷河嘅時候, 維妮同張生發現咗樓梯上面有個牌寫住展望台?  噤我哋就梗係唔執輸走上去八下啦! 點知一上到去, 真係比個場面嚇親呀 因為喺維妮眼前見到嘅係數唔盡嘅樹冰, 維妮真係唔知點去形容呢一刻嘅感覺, 真係超級壯觀呀, 係成個山都係樹冰呀 嗰一刻真係有啲感動架! 點解日頭我哋發現唔到呢個地方架~~~不過....就算真係比我哋發現到, 都可能因為天氣唔好都睇唔到啲咩(唯有噤安慰自己) 車厘子因為唔舒服所以dor神(即係丹尼斯)要陪住車厘子, 所以佢哋無同我哋一齊行留咗喺餐廳到, 但噤壯觀嘅場面點可以錯過呢, 唔睇真係好洩架, 所以張生就走番落去捉佢哋上嚟睇, 但都係得dor神上嚟, 睇睇下見到啲工作人員開始叫人走, 原來已經9點幾啦, 人哋關門啦, 呀~唔得呀, 維妮一定要捉車厘子上嚟睇呀!   望一眼都好呀, 呢啲場面真係好難得見到架庥, 所以維妮即刻用9秒9嘅速度跑落去捉咗車厘子上嚟!  比噤多$上嚟唔可以洩架! 捉咗車厘子上嚟睇咗一陣真係要走啦, 真係十萬個唔捨得呀 勁唔想走呀, 但始終都係要走......要同樹冰講bye bye啦, 維妮會永遠記得你哋架......
 

之前維妮話過我哋噤嘅安排係超級蠢, 大家知道點解未? 答案就係雖然嗰度啲人有講過話5點鐘就要清場, 但維妮覺得係可以賴死唔走, 噤我哋就唔駛分兩次上嚟曬多一次吊車$, 噤我哋就唔駛食完飯就趕住去睇樹冰! 我哋啲安排係完全錯晒呀!

好唔捨得噤同樹冰講byebye之後 我哋就返番酒店嘆溫泉啦, 但車厘子嘅狀態真係好差噃, 我哋都叫佢唔好浸啦!  一陣浸完仲衰, 噤點繼續我哋之後嘅旅程呢! 但車厘子又唔想洩~  噤佢就話比佢喺房抖一陣先! 因為我哋知道呢度有個足湯, 所以維妮就同張生去咗足湯一邊等車厘子一邊浸吓腳先! 呢個足湯都幾正架, 同張生一邊浸腳一邊談心, 個感覺好寧靜好舒服呀~~ 係唯一因為出面黑咩咩, 咩都睇唔到囉 如果仲有個雪景望住就仲perfect呀!  浸浸下車厘子同dor神就嚟到啦, 我哋四個又一邊浸腳一邊傾計, 真係好relax呀! 浸到噤上下我哋就入去浸溫泉啦, 但車厘子都仲好似.....但佢都係要照浸, dor神都無佢辦法, 唯有交帶維妮睇住佢, 放心喎, 我實同你睇住佢! 例牌一入到去一定係第一時間睇下個露天風呂正唔正先啦, 哝~又幾正喎, 仲可以掂到啲雪tim, 但我哋都係要喺入面浸下熱一熱身先 熱完身我哋就出去露天風呂啦, 凍凍地又暖暖地, 啲環境又寧靜, 真係好舒服呀~ 浸浸下仲得番維妮同車厘子, hee~我哋又包咗成個溫泉啦 我哋仲一邊浸一邊玩雪, 真係好正呀! 維妮仲砌咗個雪人tim呀, 哈哈~唔知點解維妮去到邊都要砌雪人架 係咪有啲頂維妮唔順呢?hee~ 唔好以為維妮只係掛住舒服無理到車厘子呀, 維妮都有時不時問下佢點, 得唔得架?  唔得我哋就走啦, 但佢又好似無咩事噤喎, 維妮仲以為佢可能浸完溫泉會好番啲tim! 但點知維妮浸完溫泉換完衫之後....哝~點解唔見咗車厘子嘅? 維妮就周圍搵啦, 呀~原本佢對住咗個垃圾桶勁嘔呀 wah~真係嚇死維妮呀, 即刻走埋去睇下佢點啦, 點知維妮走到埋去, 佢就嘔完啦, 佢仲同維妮講:{嘩!嘔完舒服晒!} 維妮見佢又真係好似精神咗好多喎! 舒服晒就好啦! 我哋就再坐多陣就返房啦 ! 最攪笑, 車厘子仲喺度諗番自己嘔咗啲咩出嚟, 又話整到人哋個垃圾桶污漕晒, 維妮仲同番佢講, 唔係呀, 妳嘔嗰啲嘢粉紅色都幾靚呀~哈哈~ 唔知車厘子有無比維妮激死呢?

日期 : 18/02/2008 (Day 3)   
 

行程 :  紅葉館 ~ 米澤牛

我哋喺紅葉館食完個超正早餐後, 再出去玩咗一陣雪我哋就開始起程啦, 未去藏王之前, 我哋要去一嚐米澤牛 講到噤出名, 攪到維妮唔食牛都好想去試一試!　

越接近山形縣，周圍啲雪就越嚟越多，啲雪境就越嚟越靚，睇到我哋四個嘩嘩聲靚到我哋話要搵個地方落車影相，終於搵到個位停車啦，但其實我哋落車嗰度都唔係最靚，但都夠我哋玩啦，一落車我哋就衝埋啲雪到啦，啲雪真係好厚呀，噤嘅環境等我哋齊齊拍番個羽絨廣告先啦！雖然個境唔係最靚，但我哋喺呢度就玩得好開心呀！

 玩完一大輪，我哋又起程啦，沿途我哋都係繼續嘩聲四起!  啲雪境真係好似童話噤靚呀！

去到食米澤牛嘅地方都差唔多成十二點啦根據GPS講我哋已經到咗JJ話嗰間米澤牛啦喎，但點解唔見嘅? 我哋咪唯有再兜多幾個圈啦，點知兜兜下終於比維妮見到間舖啦，好彩維妮嘅資料有間舖張相先認到間舖咋，如果唔係都唔知搵到幾時呀！我哋搵地方泊低咗架車之後，就入間舖到諗住食米澤牛啦，點知入到去靜嬰嬰，只係見到有個靚女好專心喺到煮緊嘢食維妮叫咗佢幾次佢先識得應呀，佢真係好專心呀！維妮同佢講話四人啦，噤佢又問我哋有無預約，噤就梗係無啦，點知佢話無預約無得食喎！佢仲叫我哋去後面嗰間食tim !   我哋都知後面有一間都有米澤牛食，但嗰間好似係食西餐架喎！但佢話無得食都無辦法架，咪唯有去靚女話嗰間到食囉，之後維妮再睇番啲資料，又真係有寫住三點前要預約喎，呀～點解維妮噤失策之前睇唔到架！激死！我哋入到去靚女話嗰間，一入到去係有啲失望架因為好扒房feel呀，但最後我哋再細心啲睇，其實除咗有扒房feel之外，都好自家feel架，因為呢度周圍都放咗好多公仔又有啲自製嘅飾物噤！其實個feel都幾warm架！但我哋真係一心係想食日式燒米澤牛架庥！所以打開餐牌都唔知叫咩好，最後我哋叫咗鐡板米澤牛set，鐡板縣產牛set，鐡板豬set，咖喱豬扒飯！主角就梗係個米澤牛啦, 我哋即刻要試下先，嘩～唔係講笑，維妮真係呢一刻先知道咩叫做入口即溶呀，之前喺香港食過什麼和牛噤，但都無呢個米澤牛噤超級好味呀，真係滿足都暈呀再試下個縣產牛先，嘩！雖然米澤牛同縣產牛個樣係一樣，但真係一食都食得出，縣產牛真係無嗰種入口即溶嘅感覺呀！真係一分＄一分貨呀！因為米澤牛同縣產牛相差啱啱好係一個double！雖然我哋食唔到日式燒米澤牛，但呢餐我哋四個都覺得好滿足呀！食完噤滿足嘅一餐之後，我哋就正式上藏王，去睇好期待嘅樹冰呀！

日期 : 17/02/2008 (Day 2)    
 

行程 :  那須高原中途站 ~ 紅葉館

紅葉館位於盤梯熱海, 去到盤梯熱海都已經係6點幾啦. 個天已經黑, 根據GPS話我哋已經到咗啦喎 ! 但點解見唔到紅葉館嘅? 只係有個牌寫住紅葉館駐車場, 但紅葉館呢? 當時天又黑, 又係雪地, 啲路又窄, 又搵唔到間酒店, 點算呢 ?我哋再睇下個地圖, 發覺我哋係真係到咗喎, 不過係後門囉! 噤點去前門呀? 無車路行架喎? 噤我哋咪唯有又去番頭先嗰個駐車場泊低咗架車先算啦! 點知我哋泊低咗架車後, 就有人行出嚟啦, 當時真係唔知佢喺邊到彈出嚟架! 原來個駐車場側邊有個門仔係可以通去紅葉館架, 好彩佢哋有人出嚟接我哋咋, 如果唔係我哋就真係會做傻仔拎住晒啲行李兜個大圈去番前門啦! 

其實喺book酒店嘅時候, 維妮覺得最唔得係紅葉館 因為佢個web site影啲相真係唔係好得架, 成日都話睇web site都噤差啦, 真正咪仲衰! 但原來維妮呢個觀念係錯架 雖然紅葉館唔係大, 又唔係話好靚, 但佢就有一種好親切, 好warm嘅感覺, 有種民宿feel, 但就乾淨過啲民宿好多啦! 佢哋仲好有心思送咗啲鎖匙扣比我哋tim呀!   今晚我哋無book到一泊兩食, 因為一來上網見啲餐唔係好得, 再加上唔知邊個話紅葉館出面係溫泉街, 應該有好多嘢食嘅呢~
點知我哋行到出去, 人影都無隻 只係見到一兩間食そば嘅, 而有一間係食壽司, 但我哋又唔係好敢入去喎, 驚貴呀庥, 正諗緊食咩好時, 有位亞叔行埋嚟問我哋係咪住紅葉館, 傾咗兩句, 發現原來佢係紅葉館嘅社長嚟架, 噤正好問佢邊到有嘢食啦, 佢都係指下嗰幾間そば, 維妮又問嗰間食壽司貴唔貴架? 社長話好貴架, 真係好彩無入去咋, 最後我哋決定都係返紅葉館食, 你哋話係咪自己攞嚟衰呀!一早book埋一泊二食咪好囉!    

食完飯抖咗一陣我哋就去浸溫泉啦, 嚟東北浸溫泉就好似例行公事噤!  我哋呢兩位大少揀旅館時首要條件就係要個露天風呂夠"正"! 真係有少少頂佢哋唔順, 不過講真佢哋又真係完全無揀錯呀, 我哋喺東北所住嘅旅館嘅溫泉, 間間都 "正"到暈架!  紅葉館唔係大, 所以入住嘅人都少啲, 今晚我哋就包咗成個溫泉啦, 成個場就得維妮同車厘子, 感覺好寧靜呀! 點知喺噤寧靜嘅環境之下, 我哋竟然聽到有兩把男人聲, 我哋一聽就知係嗰兩隻大少啦, 原來男湯同女湯只係一板之隔咋, 佢哋仲衰到潑啲水過嚟, 好彩無人啫, 如果唔係真係失禮死呀!    

 

日期 : 17/02/2008 (Day 2) 

行程 :  士多啤梨園 ~古怪美術館 ~那須高原中途站

上回講到維妮要去入油, 去到油站, 真係雞同鴨講 完全唔知佢講咩, 維妮唯有不停噤話:{Gasoline, Full} 但個職員都係繼續不停噤唔知講咩, 擾攘一輪之後, 維妮相信佢係無我哋噤好氣, 決定放棄, 唔再問, 照同我哋入就算, 但過後維妮先知原來佢哋其實係問我哋入邊種油, 因為Gasoline都有分靚同唔靚, 之後我哋就知啦, 除咗要講:Gasolin, Full之外, 我哋都講埋Regular! 維妮要讚一讚日本油站啲職員呀, 佢哋啲service真係一流呀, 當你一入到去, 佢哋就會有成兩三個人同你抺車, 抺玻璃, 當你走時個個職員又90度躹躬送你走, 真係低讚呀! 

維妮揸咗成百km終於到咗 "古怪美術館" 啦, 真係有啲攰呀! 呢個美術館總共有三個展館, 而第二同第三個展館原來又要再揸車過去架! 其實呢個古怪美術館主要都係玩佢哋啲立體畫, 有啲真係好似架 其實維妮覺得都唔知係我哋去玩啲畫呀, 定係啲畫玩我哋呢? 佢教我哋擺啲post, 有啲真係高難度post嚟架, 有時一幅畫又要影幾張相先影到, 真係唔知邊個玩邊個呀!

玩完第一個, 我哋就再揸車過去第二個啦, 其實第二個都係噤上下, 都係玩啲立體畫, 呢個展館入面有一part畫咗隻好大嘅怪獸張開咗好大個口喺幅牆到, 而我哋就要穿過去先可以繼績行, 但維妮行到去見到有個男人抱住咗個小朋友企咗喺到唔行唔知做咩喎, 維妮正奇怪啦, 原來個小朋友驚唔敢穿過去, 最攪笑係個男人只要一踏入去, 個小朋友就即喊, 一行番出嚟就即刻收聲 噤個男人就係噤行前行後, 個小朋友就喺噤喊~ 收聲~ 最後要勞煩到啲職員帶佢哋由第二個通道行先攪掂! 個小朋友真低死呀! 去到第三個展館, 呢度主要都係睇畫, 不過就唔係立體畫, 而係要你睇下啲畫有啲咩噤最無嘢睇就係呢個展館啦, 係有啲無聊tim架! 

玩完三個展館後, 我哋都話好肚餓呀, 因為我哋好似仲未真正食過嘢噤, 原本諗住嚟到美術館應該會有嘢食, 但原來係無架, 無辦法啦, 唯有上車食我哋啲小食啦, 真係唔好話我哋買噤多小食呀, 佢哋好多時就係我哋呢個旅程嘅lunch嚟架 唔知點解我哋成日都無lunch食架! 篇行程嗰個快啲解釋呀! 無lunch食唯有繼續行程, 呢程維妮可以抖下啦, 因為呢程由丹尼斯做司機, 我哋直上今晚嘅酒店紅葉館! 

行highway真係好, 因為好多時都會有中途站, 比你去下toilet噤, 而日本嘅中途站維妮就最鍾意啦, 因為一定會有間便利店, 又有嘢食, 有啲仲有餐廳tim! 今次我哋就停咗呢個那須中途站, 因為我哋實在太肚餓啦,  嚟到呢度其實已經差唔多5點, 但我哋好似淨係勁食咗士多啤梨之外, 就無食過嘢啦, 唔肚餓就有鬼啦, 所以我哋決定喺呢度食啲嘢先, 其實我哋都唔敢食噤飽, 因為我哋好快就會到紅葉館, 到時又食啦! 

 

日期 :  17/02/2008 (Day 2)

行程 :  池袋~士多啤梨園 

一早喺房食完個超簡單早餐之後, 8:45出發 去返駐車場到攞車, 開始玩個全自助駐車埸 首先要禁咗個車位號碼先, 跟住部機就會自動計個銀碼出嚟, 嘩~5800yen? 當堂比個銀碼嚇咗一嘢, 但再諗吓, 我哋係尋晚泊到今朝呀, 足足泊咗十一個半鐘, 噤徐番開, 都係三十幾蚊一個鐘, 又好似啱喎 不過就算真係唔啱我哋都唔知去邊到搵人問啦, 呢個駐車埸連管理員都無個呀!  

上車set好個GPS後正式踏上我哋嘅日本東北之旅啦  第一站就係位於櫪木縣嘅士多啤梨園, 行咗134km終於到啦, 離遠已見到好熱鬧, 我哋都未停定就已經有個嬸嬸手指指噤叫我哋泊好架車啦! 士多啤梨園係1200yen無限時間任摘任食, 但唔可以拎走!  對於維妮噤鍾意食士多啤梨嚟講, 真係超正呀! 個嬸嬸帶我哋去到其中一個溫室, 個溫室真係好暖呀, 暖到係有啲熱呀!  一入到去我哋就急不及待噤係噤摘, 係噤食, 開頭真係覺得好似無咩士多啤梨噤架, 但我哋越摘越發覺其實係唔少架, 喺溫室入面來來去去都只係聽到我哋講: {嘩~睇吓幾大粒!}, {嘩~好甜呀!}, {嘩~呢粒個樣幾攪笑!}, {嘩~呢粒好靚呀!}, {嘩~點解粒粒都噤甜嘅!}維妮真係從未試過食士多啤梨食到噤滿足架 亦都未試過一次過食噤多呀, 食完我哋仲將啲頂一排排噤排晒喺溫室門口, 食到噤上下, 我哋真係食唔落啦, 但又唔捨得啲噤好味嘅士多啤梨喎, 呢個時候我哋開始密謀做士多啤梨賊, 唔係講笑, 我哋真係有賊仔袋, 哈哈~其實係機場派嗰啲密實袋嚟架, 噤啱我哋又攞咗無用過喎, 真係啱晒! 偷~ 偷~ 偷.... 但最後我哋發覺我哋搵咗個笨賊, 嗰個就係張生, 佢竟然無裝滿個密賓袋呀! 真係笨賊呀! 食完士多啤梨我哋就行咗過隔離, 嗰度好熱鬧, 又有好多旅遊車泊晒喺度!  之後我哋發現又有個士多啤梨園受付所?  其實一直維妮都有個疑問就係其實呢度係咪有兩間士多啤梨園呢?  而噤熱鬧嘅呢間就係我哋原本要去嘅嗰間? 不過其實都無咩所謂啦, 我哋都食過好正嘅士多啤梨啦!

食完士多啤梨我哋就繼續上路啦, 下一站就係, 古怪美術館! 呢一程係由維妮擔任司機一職! 唔怕話比大家知維妮已經唔記得咗有幾多年無揸車啦, 妳哋話驚唔驚, 唔好話你哋, 連維妮自己都驚驚地呀! 喺日本揸車真係有啲唔慣, 好似啲紅綠燈係喺頭頂, 轉左又要睇人, 不過呢樣都唔係大問題, 都可以好快習慣到, 但有一樣嘢係維妮嘅死穴. 就係比IC費呀, 仲要係無人要自己攞飛嘅IC呀, 維妮永遠都係唔敢攞埋啲, 攪到每次攞飛都要除安全帶, 又要開門先攞到張IC飛呀, 真係瘀爆呀 點解日本噤多嘢都係自助架!  再加上又驚左住後面啲人, 攪到都不知幾狼狽! 唉~ 個GPS都唔知係咪知道維妮好耐無揸車呢? 竟然老點維妮  我哋行錯路呀, 仲要上咗啲唔知咩IC, 只見行極都只係見到啲路牌~ 日光, 鬼怒川, 鬼怒川, 日光,  個GPS又無指示喎!  呀 ~ 究竟我哋去咗邊呀~~............經過咗大約十五分鐘嘅前路汒汒, GPS終於有番指示啦, 我哋終於可以繼續行程啦, 呢個時候領航員張生竟然要維妮去入油, GPS玩我啫, 連你都玩維妮 頭先行錯路, 維妮都係啱啱先定番神咋喎, 而且個油錶都仲有一半, 係咪玩嘢呀! 但維妮無得反對, 鬼叫佢係領航員, 維妮唯有遵照指示啦! 去到油站後.....

日期 : 16/02/2008 (Day 1) 
行程 : 香港 ~ 成田機場 ~ 池袋

今日我哋坐早上10點幾機去成田機場 但我哋差唔多9點先去到機場, 但Check in手續又好快喎, 可能因為我哋一早已經喺網上劃咗位啦, 下次都一定耍噤做! check完 in我哋仲有時間可以去Teminal 2食啲嘢! 食完嘢我哋就行去閘口lu, 其間丹尼斯唔知做咩, 張生同車厘子叫佢, 佢就越叫越走, 叫極都聽唔到!  好! 等維妮出馬:{三萬蚊!}ha~丹尼斯話都無噤快就擰個頭過嚟啦, ha~ha~ 呢"三萬蚊"嘅由來係因為佢話佢個背嚢值三萬蚊喎, "三萬蚊"係丹尼斯呢個旅程嘅其中一個花名(轆續有嚟呀!hee~)

差唔多日本時間下午4點到咗成田機場, 一去到成田機埸, 梗係即時搵日產租車間舗啦, 行吓行吓真係唔多覺有間舗頭喎, 但就見到有個細細counter仔貼咗好多租車公司招牌喺到, 其中一個就係日產啦, 唔理啦, 照隊啲文件比佢睇囉, 呀~佢又真係同我哋攪手續喎 真係無諗過原來一個噤細嘅counter仔可以做幾間租車公司噃! 等咗差唔多成三四個字先有個架仔(其實都係頭先同我哋攪手績嘅其中一個人)帶我哋去攞車, 去到見到架車, 幾靚仔吓噃, 跟手個架仔就比晒啲文件叫我哋簽名, 唔係化, 我哋都未睇清楚架車噃, 呢個時候張生梗係發揮佢平時工作嘅本色啦, Q車呀, 唔知係咪平時啲人係無Q車呢 定係因為我哋職業病呢, 當我哋手指指呢度嗰度時, 個架仔竟然陰陰咀笑喎, 之後我哋簽咗名啦, 佢就走啦! 喂~咪住 佢都未教我哋用GPS, 第一時間拉番佢轉頭, 最後佢都好用心教我哋, 即使佢啲英文係有限公司, 但其實佢教咗5分鐘都唔知有無, 但個GPS的而且確係好似好簡單噤嘅, 但其實我哋都比佢老點咗唔知幾多次呀! set 好資料就出發啦, 真係話都無噤快, 未出到機場範圍就已經行錯路啦, 原因係未習慣個GPS, 錯過咗個路口啦, GPS就係噤啦, 成日都唔知究竟係呢個路口轉呀, 定係下一個呢? 呢個問題喺成個行程經常發生! 好彩個GPS都好快教我哋再行過! 途中遇著塞車, 成7點先去到池袋, 終於我哋都去到間酒店, 但我哋唔係要去酒店先, 而係要搵car park泊車先......
因為之前我哋已經上網check過suncity後面應該有個露天駐車埸, 而且我哋一去到suncity都已經見到個駐車埸, 噤咪照泊啦, 但一入到去, 問題就出現啦, 點解無人嘅?  點攞飛呢?  點比$呀?  淨係見到有部機喺到, 但部機又無話要攞飛, 只係比$咋喎? 又見其他人個個都係泊咗架車就去走人, 噤佢點知我哋泊咗幾耐呀?  再去睇下個告示牌, 以維妮有限嘅日文去理解, 好似話咩泊咗三分鐘之後就會有啲唔知咩咩咩鎖住, 攞車時先攞飛噤, 噤我哋就等佢三分鐘..... 三分鐘後就見我哋個車位底有嘢彈上嚟鎖住架車啦, 嘩~嗰刻真係覺得好神奇呀! 哈哈~ 攪掂咗架車之後, 就那那臨去check in啦! 呢間suncity嗰個lobby真係"大"呀, "大"到我哋四個人加埋啲行李, 已經差唔多迫爆咗佢個lobby呀!  心諗個lobby都噤, 啲房都唔方好得去邊啦, 不過呢樣維妮都就有心理準備噃! 但入到房竟然有驚喜, 因為間房比想像中大呀, 有張茶機不特只, 仲有張雙人梳化tim! 真係比想像中好呀!  

我哋放低咗啲嘢之後, 就即刻出動搵嘢食, 因為我哋四個都勁~肚~餓~呀!  我哋一早plan咗諗住去一間叫"串家物語"到食自家燒串燒架, 但點知我哋搵咗成個鐘都揾唔到 再問下人啦, 終於搵到座大廈啦, 但搵暈都無呢間嘢嘅 我哋一至都認為應該係執咗! 喺又攰又肚餓嘅情況之下, 我哋白撞噤去咗一間叫り鮨大漁食迴轉壽司, 不過呢間迴轉壽司真係普通過普通呀, 所以我哋食咗幾碟, 決定行完街夜啲再揾拉麵食!

我哋去咗池袋最旺嗰幾條街行, 行行下見到有間食小丸子, 行埋去八吓啦, 嘩~唔係小丸子喎, 係大丸子呀! 唔係講笑, 真係大過維妮個拳頭呀, 梗係第一時間買嚟試下啦, 佢有成十種味道架, 但為咗安全起見, 我哋都係要番原味隱陣啲 , 味道同小丸子真係無咩分別, 但入面就多咗好多料, 最奇怪係竟然有半條腸仔喺入面呀! 320yen一個貪得意真係不防一試架, 但如果係食飽嘢去食, 維妮就建議大家同人share一個好啦, 因為我哋兩個人share一個都已經飽飽地呀!

再行咗一陣我哋就搵拉麵食啦, 左揀右揀最後揀去咗間叫"光麵", 我哋一人叫咗腕拉麵再加一碟餃子, 拉麵平平無奇, 餃子, 大板王將好食好多!      

嚟到日本, 藥房係女人最鍾意行嘅地方, 我哋就去咗一間好大嘅藥房到行, 有幾層, 除咗一般化妝品之外, 連小食都有, 喺呢間藥房到比維妮見到上次小虎妹去日本買比維妮嘅kose產品, 見到成set有body soap, powder sheet同powder spray, 成set有晒packing好靚都只係840yen, 但唔知點解維妮同車厘子諗咗好耐都唔知買好定唔買好 理論上840yen成set嘢送比人真係好得啦, 但可能我哋係啱啱到步, 又驚會買貴, 所以先諗噤耐, 最後我哋都只係一人買咗一盒, 買得噤少, 最後咪後悔囉! 因為之後我哋去到新宿淨係支body soap都要1050yen呀! 後悔! 後悔! 後悔! 之後我哋掃咗一堆小食, 張生就狂掃唧唧啫喱, 買埋聽朝早餐, 好! 一袋二袋返酒店lu!  準備聽朝一早向東北出發

行程: 西門町  ~ 香港

因為尋晚太攰嘅關係, 維妮同張生今朝係無食酒店嘅早餐, 寧願訓晏啲~ 點知我哋出發時, 發覺原來dady mami同亞妹都無食早餐喎, 既然係噤, 我哋就去搵嘢食先啦! 未去食嘢之前, 張生同衝鋒人去退番悠遊咭啲$$先, 點知退$時比人發現我哋其中一個人尋日喺淡水搭船無比$, 嗰個人咪係dady囉! 都唔知佢係有心定無意嘅, 但就係噤先知道原來無比$人哋都check到架喎! 今日我哋主要係要買手信!  我哋去咗永來香, 老天祿同埋太和, 去永來香當然係買豬肉乾啦, 而老天祿就梗係買鴨舌啦, 但原來老天祿啲嘢係超貴架, 鴨舌貴就不在話下啦, 連其他嘢都好貴架, 唔係受人所托, 維妮真係唔會喺呢間嘢買手信呀! 原本我哋去完老天祿都準備走架啦, 點知行行吓, 比我哋見到一間舊式嘅餅舖有鳳梨酥賣, 呢間嘢叫太和, 我哋試過啲鳳梨酥又真係幾好食喎!  個老闆娘仲好好人叫我哋唔好買呢啲啦, 佢整啲新鮮嘅比我哋, 叫我哋晏啲先嚟攞, 老闆娘真係細心啦! 買齊晒手信, 我哋就要搵嘢食, 因為我哋有幾個人仲未食早餐呢! (都已經唔係早餐啦!)  行番去西門町睇下有咩食啦, 見到有間有雞絲飯食喎, 就呢間啦, 除咗雞絲飯, 我哋仲叫咗蘿白糕, 蚵仔煎, 米線, 仲叫咗珍珠奶茶, 唔知係咪肚餓呢, 樣樣嘢都好好食呀!尤其係個雞絲飯同蘿白糕呀!

食完嘢我哋就各自喺西門町行街街啦! 行完街我哋就返去攞鳳梨酥，啲鳳梨酥真係熱辣辣架！真係好新鮮呀！但新鮮又點呢？我哋又唔係即刻食，哈哈～夾啱時間我哋就行番酒店準備出機場返香港啦，去到機場我哋最後衝刺，又買手信，唔知點解噤多手信要買嘅呢? 之前我哋喺台灣買咗啲薯片, 諗住沿途坐車食嘅, 但點知我哋一包都無食過, 所以我哋上到飛機食完個食咗好似無食過嘅飛機餐之後我哋就開我哋喺台灣買嘅三包薯片食, 唔駛一個鐘, 我哋就掃晒三包薯片啦,好厲害哦!

行程: 書局街 ~ 淡水 ~ 漁人碼頑 ~ 士林夜市 

經過尋晚嘅一番相量之後, 我哋都係.....未決定到究竟去 淡水好呀定係九份好!講真維妮對九份一啲好感都無, 因為之前去過只係覺得嗰度濕濕笠笠, 地方又窄! 而且張生仲話因為去九份會比較遠及晒時間, 所以最終我哋都係揀咗淡水! 未去淡水之前, 我哋要去一去書局街, 因為亞妹有成張list嘅書要買,行咗兩三間書局亞妹同維妮都有少少收穫, 但維妮好似買得多過亞妹喎, 一心準備好晒嚟買書嘅就買得唔多, 無諗過會買書嘅, 就買咗一大堆! 連mami都掃到幾本歌書! 好勵害呵! 行完書局街, 我哋就去淡水啦, 喺西門去淡水, 如果搭捷運要成個幾鐘, 識得維妮嘅人都知, 維妮係有地鐵恐懼症, 而捷運維妮真係覺得同香港嘅地鐵無咩分別, 依家仲話要坐成個幾鐘, 維妮可能會窒息架喎! 但可能衝鋒人對地鐵有情意結, 佢堅決坐捷運, 噤我哋唯有跟隊啦!上到捷運發覺原來都幾多香港人去淡水架喎!

一出淡水嘅車站就發覺呢個車站原來係紅磚牆起, 又幾靚喎! 車站後面仲係個海, 環境都幾靚架!喺呢度仲比維妮見到有人影緊婚紗相, 維妮都唔執輸, 偷影埋一份, 點知影影下, 比個新娘示意叫維妮唔好影tim, 維妮都係見妳幾靚女先影下啫, 唔比影就算數啦! 之後我哋行咗去老街, 老街有好多手信買架, 嚟到呢度就發覺我哋無揀錯! 呢度真係好行過九份好多呀! 起碼條路都闊啲呀! 聽講老街出名魚丸, 我哋又未食lunch, 就搵間魚丸食吓啦, 呢度係老街, 就搵間叫老店魚丸食啦!啲魚丸又唔係唔好食, 只係無咩特別啫, 反而啲雞同啲菜又幾好食,

食完嘢我0哋就繼續行老街, 行行吓我哋見到不可思議博物館, 細佬好有興趣噤, 但啲dady mami無興趣, 噤唯有我哋陪佢入去啦! 唉~維妮仲以為會好似泰國信不信噤大啦, 點知一入去就已經一眼睇晒, 真係搵鬼笨! 行完老街, 我哋原本諗住再搭車去漁人碼頭, 點知比我哋見到可以搭船去架喎, 我哋一於試下搭船啦! 去到漁人碼頭, 亞妹即刻變成維妮嘅御用model 所有廿年前嘅超高難度post都出晒嚟, 真係笑到我哋扒晒地!影到差唔多, 我哋又坐番船返去老街行番去車站搭捷運去士林夜市啦!自從 士林夜市唔知幾時改頭換面之後, 維妮今次都係第一次嚟, 依家嚟到同以前相比係好似整齊咗, 有規模咗! 但賣啲嘢就好似無以前噤有特色噤啦, 賣啲嘢就好似 旺角嘅女人街啲貨式噤, 行行吓, 見到阿宗麵線, 嚟咗台灣三日都未食過, 一定要試下啦, 真係keep到水準喎, 同以前一樣噤好食呀! 之後我哋又見到超大塊雞扒, 勁多人排隊, 我哋更係又排埋一份啦, 原本維妮以為同家鄉雞差唔多啦, 一食先知原來係超好味呀! 同家鄉雞差好遠呀! 正!正!正! 呀! 之後我哋再行去以前嘅鐡皮屋, 睇下仲咩好食, 果然同以前食嘅嘢差唔多! 但就好似少咗好多舖噤嘅! 哈哈~ 一入到去以前食過嘅台式鈇板燒仲喺到喎, 要回味下呀! 但好似無以前噤好食啦! 之後亞妹話未食過棺材板, 所以佢哋就去咗買棺材板食, 之後我哋就去咗食冰, 我哋個個都試咗唔同嘅綿綿冰, 嘩~呢幾日, 維妮日日都食冰, 但發覺最好食都係綿綿冰呀, 好似食雪噤, 超超超好味呀!喺士林食完嘢, 維妮原先係諗住今晚去美麗華影犘天輪, 但食完嘢都已經10點9啦, 維妮都預咗要放棄~ 因為坐得捷運去, 去到真係驚咩都影唔到呀, 噤dady就話坐的士去, 但我哋又驚會好遠喎! 噤啱我哋就企正喺的士站隔離, 於是dady就走咗去問去美麗華大約要幾$, 原來都只係二佰幾蚊, 噤我哋就123坐的士去lu! 去到美麗華維妮即刻set好晒腳架狂影, 維妮都係第一次影夜景咋, 但唔知點解影極都唔係好滿意囉! 我哋特登坐的士嚟到無理由影幾張相就走架, 所以我哋一於趕去坐最後一班嘅摩天輪! 上到摩天輪, 維恨又影, 但發覺係咩都影唔到囉! 坐完摩天輪我哋又要趕頭趕命噤去搭最後一班捷運, 維妮呢一刻係有少少內疚架, 如果唔係維妮話想嚟影摩天輪, 大家就唔駛趕頭趕命噤啦! 但之後發生嘅事仲令維妮更加唔好意思!事情就係, 就喺我哋趕緊去捷運站時, 就有位保安哥哥話我哋應該趕唔到去搭捷運架啦! 噤點算? 咪唯有搭的士啦, 但我哋之前搭捷運都搭咗個幾鐘, 搭的士咪好貴!!! 呢個時候我哋就見到有架的士, dady就走去問佢去西門幾多$$啦, 個的士佬就話二佰幾蚊! 我哋一聽到, 唔係庥, 噤平? 呢個時候張生先醒起, 係喎, 我哋依家唔係喺淡水, 我哋去過士林, 依家又嚟到美麗華, 加加埋埋都已經去咗一半路程啦! (點解噤遲鈍架)但我哋又諗, 路程行咗一半, 噤二佰幾蚊係咪貴咗呢? 我哋又唔識路, 佢可能會兜路兜到二佰幾蚊架喎! 我哋又唔想洩, 於是dady再去問多架幾多$啦, 點知頭先嗰個的士佬又跟住dady一齊行, 仲用潮州話同另外個的士佬講:{我話咗二佰幾蚊架啦! 唔好平比佢哋呀!} ha~你以為講潮州話我哋就唔識聽呀!你知唔知維妮dady係咩人呀! 咪ga ge la囉, ha~ha~ 跟住另一架的士就話同我哋講:{要三佰蚊!} 奸得佢哋呀! 於是我哋決定離開呢個範圍, 去另一邊再揾的士, 就當我哋問緊一架的士時, 頭先嗰個奸的士佬竟然出現喺對面線, 佢仲落埋車食住支煙企喺度!  佢噤嘅衰格樣, 擺明就係特登過嚟睇我哋點衰啦呢個時候我哋就知, 佢一定call晒台啦! 好彩呢個時候又有個保安哥哥見我哋噤, 就叫我哋行返出去大街嗰邊捷! 最後我哋出到大街捷, 返到去酒店係NT275,  呢個的士佬有無兜路我哋唔知, 但都好過搭嗰個衰格司機呀! 關於喺台灣搭的士, 我哋前一晚搭的士返酒店時, 其中一架都兜我哋路, 但佢兜咗路我哋都唔知架, 都係另一架的士佬好心話比我哋知咋庥! 返到去酒店後, 酒店職員問我哋係咪聽日返香港, 話如果係可以幫我哋叫的士NT1000去機場, 依~ 噤都係貴我哋搭巴士幾佰蚊咋噃, 都低呀! 經過一番商量之後我哋決定放棄聽日搭巴士出機場, 改搭的士啦! ho~ho~ho~ 商量完之後, 雖然已經係12點幾, 但唔知邊個仲話要去食宵夜, ha~ha~跟住我哋又再出去食宵夜, 我哋真係 ~好勵害哦~ 我哋一路行條街靜嬰嬰, 都唔知有無嘢食嘅, 終於我哋行咗成半個鐘先搵到一間仲好多人食嘢嘅舖頭, 但啲嘢食就認真庥庥哋啦! 食完嘢我哋就真係返酒店訓覺啦!