「The David Duncan House」外觀看似為一間教堂，室內四周可見金光閃閃嘅擺設及燈飾，兩層高嘅西餐廳裝潢傳統典雅有氣派。地上有華麗吸音嘅地毯，餐桌與餐桌間夠空間，厚墊椅櫈十分舒適，年長嘅服務生亦非常客套，淨坐都覺得好享受。西式午餐各有各點，個人因宗教理由只係食咗半份沙律同焗蠔，質量相當不錯：

1)      Fresh Oysters (CAD 26/6pc)：生蠔可選半打或一打，大肥教落外遊最好食熟蠔，所以就揀以芝士菠菜焗製。熱辣辣嘅芝士菠菜焗生蠔肥美滑溜，香濃鮮甜。

2)      Caesar Salad (For One; CAD 15)：凱撒沙律新鮮爽脆，醬料適中，簡單味佳。

加拿大航空於多倫多皮爾遜國際機場嘅貴賓室「Air Canada Maple Leaf Lounge」（楓葉貴賓室）面積其實一啲都唔細，不過獨立梳化偏矮，坐咗落去有啲難起返身，較高嘅餐桌位置則冇咁乾淨，枱面有啲黐立立，感覺唔得衛生。下午茶時間，室內只有沙律及餅乾小食，相比起下，酒品嘅款式更為吸引。XO仔過境時因遭受到不禮之對代後氣在心頭，等待登機時竟然唔覺意咁飲咗兩杯啤酒試圖冷靜落黎，但當記得自己守緊齋時已經太遲，結果變得更加氣憤。

位於「Queen’s Quay Terminal」嘅「明珠酒樓」樓底唔係好高，但勝在環境優雅，服務佳，最殺食就係窗邊嘅散座可欣賞到「Ontario Lake」（安大略湖）嘅湖景，視覺絕對係一種享受。

中菜廳嘅點心菜式喺美加黎講算係唔錯，但午餐最有水準必選「榨菜肉鬆煎米餅」：

1)      香茜牛肉腸 （中點）：半透光嘅腸粉質感柔軟，香茜牛肉餡心亦嫩滑清香。

2)      干扁四季豆（特點）：四季豆微辣香脆，不過以特點黎睇份量就好似細碟咗啲。

3)      鮮蝦燒賣（中點）：如相所示，燒賣當真用上原隻鮮蝦所製，咬落爽脆香潤，比起香港好多中餐廳都做得更美味。

4)      潮州粉果（中點）：粉果因內含花生，細佬冇食到，不過大肥就嫌個皮粉咗啲。

5)      雪花蝦餃（大點）：蝦餃尚算清香爽甜，無奈餃皮唔夠輕盈，就係差咁嗰少少。

6)      鼎湖上素餃（中點）：上素餃係咁多款點心中最厚皮嘅，而且味道亦最為淡口，不吃也吧。

7)      干蒸牛肉（中點）：又大又圓嘅干蒸牛肉鬆厚香嫩。

8)      榨菜肉鬆煎米餅（CAD 21）：午餐之最嘅肉鬆煎米餅個煎米粉底香脆非常，連同淋面嘅榨菜肉鬆食即變得濕潤惹味，超正！

契舅父與契舅母自結婚已移居加拿大，極少返港，XO仔都係今次探視先初次認識契舅母，並發現原來佢喺美加飲食界及各大社交網站相當活躍！有食家帶領，方才有幸於古堡「Casa Loma」（卡薩羅馬城堡）內用餐。

旅遊景點有代客泊車服務，收費比停車場貴少少。入夜後嘅堡壘外圍綻放出神秘嘅光芒，一級一級步進高高嘅城門，感覺有氣派極！枱頭一望，即留意到接待處用上雲石作牆，以白色射燈照出扒房「Blueblood Steakhouse」個標誌，型格時尚得很。宏偉嘅城堡樓底極高，吊燈嘅花款有古式嘅亦有新潮嘅，最潮當然係餐廳入面嗰啲啦！

據悉，店子每天爆滿，訂座不易，可能正因如此，服務生總是忙個不停，連耐性都好似差咁啲啲。西餐廳嘅食物餐牌合共有三頁紙，反而多頁電子酒牌就造到成個木盒咁，明顯邊樣最賺錢！堡壘餐廳以牛扒聞名，不過大小雙肥都覺得菜式中最正就係兩味牛肉他他連牛骨髓及生和牛薄片頭盤，而最有睇頭就係鬍鬚叔叔即場煮製嘅甜品：

1)      French Onion Soup – Housemade Croutons, Gruyere (CAD 16)：法式洋蔥湯以鐵碗承載，故熱力十足。洋蔥湯味道鮮濃，最正就係面層入哂味塊芝士，香軟無比，不過一個人飲哂成碗洋蔥湯絕對會好滯，建議可以三、四個人分一碗，咁就可以試多幾款美食。

2)      Wagyu Beef Carpaccio – Truffle Crumb, Pickled Mustard Seeds, Garlic Chips (CAD 32)：生和牛薄片色澤粉嫩，溶於口中，簡單捲入頂面嘅松露碎碎及蒜片足以為靚靚和牛添上香濃惹味，堅掂！

3)      Prime Steak Tartare in Bone Marrow Canoe – Cured Duck Egg, Housemade Pickles, Toasted Sourdough (CAD 26)：混入咗牛骨髓嘅牛肉他他鮮紅潤澤，肉香軟嫩，塗上烘熱嘅包品上黎食可一解膩感。

4)      Jumbo Lump Crab Cake - Dill Aioli (CAD 24)：蟹餅雖炸至金黃，其皮層亦為鬆化，無奈當中嘅蟹肉餡心帶點嚡口，質感唔得幼嫩，加上調味過酸，請恕細佬未能推介。

5)      Crispy Kale - w/ Lemon Aioli (CAD 16)：潮流興食羽衣甘藍，但係小肥都只係食過沙律原味版，總覺得味道有啲苦。。。意外地，黎到新潮堡壘餐廳竟然可以食到香脆輕盈嘅羽衣甘藍薄片，以檸檬蛋黃醬點綴實在清新美味！

6)      Table-Served Banana Crepes for Two – Vanilla Bean Crepes, Banana, Rum Flambé (CAD 28)：火焰香蕉薄餅由專人於桌旁慢煮，視覺效果最得！兩片薄餅柔軟輕巧，酒味濃得黎偏咗少少酸，不過加埋啲忌廉同朱古醬，兩者嘅甜味剛好可中和番嗰陣酸。

入住「Hilton Toronto/Markham Suites Conference Centre & Spa」，哥哥所選嘅房間包享「Hhonors Executive Lounge」之餐飲及設備。貴賓室猶如一個大客廳般，闊落舒適；有梳化椅位置睇電視、小偏廳俾人睇報紙、及幾張合併式餐桌，任貴客隨意入座。

自助式早餐非常簡單，飲品有果汁機、咖啡機、盒裝奶品、罐裝汽水、樽裝水、茶包等。食物則有不同嘅包品、cereal、盒裝乳酪、炒蛋、薯餅等，款式唔算好多，但質素都唔錯。

位於「Toronto Dominion Centre」（多倫多道明中心）五十四樓嘅「Canoe Restaurant」分開餐廳及酒吧兩個位置。用餐大堂面積寬廣，裝潢有格調，高層更有無敵靚景，環境高雅大方。餐桌均配上厚墊椅櫈，闊落舒適。四周用上木造嘅地板、敞門，再配上不少樹幹及盆栽擺設，感覺簡潔且富大自然嘅色彩。服務生友善專業，知悉幾位長輩食量不大，點菜時更建議可以頭盤作主菜，部份主菜更可安排廚房一開為二，細心得很！

西餐廳嘅午市餐牌只有一頁，一系列嘅潮派加拿大菜式精美豐盛，色香味俱全，實不容錯過：

1)      Wild Mushroom Soup (CAD 13)：忌廉蘑菇湯以新鮮雜菌攪成雜菌蓉，菇味輕盈芳香，師傅喺湯面刨上蘑菇薄片即為湯品增添口感。

2)      Steak Tartare (CAD 21/Starter)：牛肉他他色澤鮮紅，濕潤軟嫩，香濃惹味。

3)      Pasta of the Day：是日意粉為細佬最愛嘅雜菌風味，闊身扁平嘅意粉麵條煙韌有彈性，厚切蘑菇方塊軟腍入味，簡單可口。

4)      Chocolate & Nancy's English Mint (CAD 12)：此道薄荷朱古力甜品可謂整頓午餐嘅高潮位！其黑、綠、啡、白嘅立體造型鮮美吸睛，深色嘅代表有鬆軟微甜嘅朱古力蛋糕、香濃嘅朱古力泥、脆巧嘅朱古力薄片及柔潤嘅朱古力忌廉；綠色嘅則有清涼嘅薄荷雪糕、軟滑嘅薄荷慕絲及鬆化嘅薄荷蛋白塊，將所有元素撈埋黎食，效果極富層次，而且非常清新，教人拍案叫絕！

XO仔唔算係「星巴克」嘅鐵粉，但因從契妹口中得知名咖啡屋嘅美加分店於三月份推出咗個限量特飲「Crystal Ball Frappuccino」（水晶球星冰樂），所以就襯靚靚媽咪喺「Toronto Eaton Centre」（多倫多伊頓中心）購物時就走咗去買杯黎試。

小小嘅咖啡店躲藏在大型書店嘅後方，木造嘅枱櫈都已坐滿客人，幸好小肥只係買外賣而已，唔洗搵位坐。服務生態度正常，但效率就唔係咁高啦，最要不得就係擺放自助餐具嘅枱頭黐立立，衛生欠奉！

網上嘅「水晶球星冰樂」彩圖均有紅、紫、藍、綠嘅色調，但細佬嗰杯卻只隱約透出少少綠色，灑上忌廉面嘅亦只有零碎嘅棗紅色糖粒，點睇都唔似水晶球，個人覺得有啲貨不對辦囉！小肥真係飲唔出特飲嘅糖水味有任何桃味，這個水晶球由外表到味道都一樣咁唔魔幻，用「宇宙最弱」黎形容一啲都冇誇張架！

多倫多不乏中餐廳，幸得大肥於當地嘅好友介紹，先可與親友一試區內較新嘅「全聚德」。店子門面極有氣派，除咗兩隻獅子陣守正門，大大個招牌仲有隻鴨大廚代表歡迎賓客。室內樓底高高，光猛企理，四周有小紅燈籠高高掛，不過最型就係中央嘅透明山水畫屏風，富中國色彩得黎極為時尚。

大肥請客，例必預先訂埋菜，因宴席剛好有十人之多，佢就應推介點咗個「節日8-10人套餐包房專用B餐」（CAD 888）。新店服務體貼稱心，飯前經理哥哥先拎出原隻龍蝦「show一show quali」，之後每碟送上枱時都會略作簡解，仲會俾足時間大家相機先食；有專人幫忙撈起；招牌「盛世牡丹烤鴨」有師傅即場片皮起肉，砌出牡丹，實在令人嘆為觀止！就連餐具都用上鴨型筷子座及3D鴨鴨碟，淨睇視覺效果已經好「Duck」！

十人套餐共有十三道菜，當中有冷盤、湯、雞、牛、豬、鴨、龍蝦、鮑魚、魚、海參、豆腐、菜、甜品，相當豐富：

1)      五彩拌金銀時蔬：為晚宴作序嘅蔬菜冷盤等同「撈起」，由經理哥哥親自喺五色嘅青瓜絲、蘿蔔絲、雲耳絲、芽菜絲、紅蘿蔔絲淋上秘汁，即場撈製而成，好有睇頭！五彩撈起微辣清爽，輕盈健美。

2)      老店醬肉雙拼：同樣為凍食嘅兩款醬肉為燻蹄及牛展，食客可自行點上豉油食用。相中左邊嘅燻蹄質感爽脆，右邊嘅牛展都好入味。

3)      鹽水鴨肝：鹽水鴨肝已預先切成薄片，香潤易入口，點上辣油則更為惹味。

4)      松茸鴨舌貝絲羹：每位客人面前都有一盅鴨舌羮以明火滾住上，夠哂熱辣辣！大大碗鴨舌羹內含軟滑嘅鴨舌、乾瑤柱及松茸菇，羮品芳香厚濃，滋味無窮。

5)      盛世牡丹烤鴨：「全聚德」主打烤鴨由師傅喺旁邊展示刀功，切出薄薄嘅鴨肉後仲重組成一朵牡丹花形，令席上嘩聲四起，震撼得很！烤鴨肉香皮脆，肉質鬆軟腍潤，美味可口！

6)      八磅龍蝦：八磅龍蝦肉厚爽脆，鮮甜香濃，正呀！

7)      蔥燒海參：蔥燒海參厚潤爽滑，簡單味佳。

8)      黃金貝絲豆腐：外表確真金黃嘅炸豆腐皮層香脆，豆腐心熱辣嫩滑。

9)      金牌松鼠魚：細佬外遊最怕哽骨，故唯一咁多味菜入面冇試到條魚。

10)  宮保雞丁：雞丁香辣惹味，且爽潤有彈性。

11)  皇子菇扒豆苗：鮮綠嘅豆苗清新爽甜，伴上厚潤嘅皇子菇則倍添清香。

12)  松茸鮮鮑丁：切成粒粒嘅鮑魚混入咗松茸菇粒去炒，鮮香輕巧，柔潤煙韌，都幾得意。

13)  小鴨酥：正當長輩們都話全晚之絕為師傅即席片出鴨肉牡丹時，服務生竟然靜悄悄地喺餐桌上放下一群湖上小鴨鴨！小鴨酥不單造型可愛，惟妙惟肖，一口一件，皮酥餡潤，微甜不膩，真係「好Duck（得）」！

選乘大韓航空購下商務票，旅客可於「天合聯盟香港貴賓室」候機，不過室內並無廣播服務，大家要自己留意登機時間。

長形嘅貴賓室面積寬廣，最入嘅偏廳有多張獨立梳化櫈，大部份嘅白色枱仔都有插蘇位，方便旅客可邊等邊叉電。除咗個較輕鬆舒適嘅偏廳之外，中央有個大型少少嘅用餐大堂，散座嘅餐桌大啲又高啲，只係枱面唔係太乾淨。

尾段拍牆為自助飲品區，有咖啡機、啤酒雪櫃、汽水、蒸餾水等等。XO仔就當然係選擇飲酒啦！自選食物中有西式嘅麵包、三文治、沙律、甜品等。最有型都要數部班戟機，少入廚嘅小肥都係第一次見。亞洲菜中都有不少熱食及炸物。唯一要排隊嘅就係個麵檔，由專人即點即煮四款麵品。由於出門口前已經喺屋企食咗晚飯，細佬就簡單啲試咗碗台灣牛肉麵。牛肉麵只屬微暖，湯底稀而味淡，麵條同牛展塊一樣偏硬，個人覺得唔係好掂。

香港機場內有不少貴賓室，論環境、設施及餐飲質素，「天合聯盟香港貴賓室」當真不及本港主場嘅兩間航空公司。

大韓航空於韓國仁川國際機場嘅商務貴賓室「KAL Lounge – Prestige Class」環境開揚寬廣，有獨立方形廂座、二人單邊圓枱仔散座、梳化式客廳位、餐飲部合拼式長枱及圍繞嘅酒吧嘅卡位。同香港個「天合聯盟香港貴賓室」一樣，室內最不缺乏就係叉電插蘇同埋會添嘅紅酒、白酒、烈酒（對唔住，當日啤酒機壞哂。。。）。

由於航機抵達韓國時實在太早，貴賓室內只有飲料及零星嘅香蕉、乳酪、鬆餅食，唔怪得知個個都選食韓式杯麵啦！約六點半左右終於有早餐熱食出爐，無奈水準唔係咁高，小肥只好主攻咖啡同乳酪。

大韓航空長途機KE 73選用B787-9型號班機，商務艙之獨立座位同頭程一樣咁好坐，且空間感足，音響隔音系統出色，細佬啲戲接住黎睇，成功追咗幾套新片，正呀！遺憾在於空中服務員笑容欠奉，而且只會按本子辦事，毫不體貼，亦不細心。

膳食方面，小食明顯比正餐美味。早機提供嘅正餐為午餐，前菜「烤雞沙律」又嚡又乾，「韓式牛肉蓋飯」味道雖然唔錯，但牛肉又老又硬，就連甜品「莫卡蛋糕」都唔得鬆潤，個餐其實可以用一個「乾」字黎形容！航班嘅小食中，細佬只係試咗兩款；新鮮煮出嘅「泡菜拉麵」湯底熱辣惹味，麵條煙韌彈牙，而「朱古力曲奇」則香脆甜美，邊食邊嘆埋杯香檳確真享受。臨落機前有份「簡單的用餐」，主菜「中式海鮮豆腐」還過得去，不過個蒜蓉包就硬到咬唔到，XO仔唔想咁後生就做蹦牙仔囉！

機場酒店「Sheraton Gateway Hotel in Toronto International Airport」連接著多倫多皮爾遜國際機場，入面間西餐廳「Sheraton Mahogany Grill」最方便啲早機及轉機嘅旅客休閒地享用早、午、晚餐。店子樓底唔高，不過舖有地毯，所以人多都唔覺嘈吵，無奈中午時份樓面只有兩位服務生，雖則其態度唔係惡劣，但明顯各佔不同地盤，落單、斟水都要等同一個人得閒先做，效率就唔係特別高。

最好彩就係啱啱坐完長途機攰多過餓，因餐店嘅午餐份量雖多，但水準一般過一般：

1)      Soup of the day（CAD 10）：是日例湯之芝士西蘭花忌廉湯一啲都唔算杰，但味道實在過咸，真係食唔過！

2)      Mahogany Caesar （CAD 17）：大大碟凱撒沙律爽脆鮮濃，係成餐飯最好食嘅一味。

3)      35 Day Aged 8oz AAA Striploin (CAD 37)：原本點咗要「medium rare」嘅牛扒一刀切落去一啲粉紅都唔見，過熟程度似係「medium well」多啲囉，肉質偏韌同硬，即使夠薄都有啲難咬，當真不吃也吧！

經常外遊嘅哥哥早已成為「希爾頓榮譽客會」，今次去加拿大探親，見集團企下嘅「Hilton Toronto/Markham Suites Conference Centre & Spa」就喺契婆家附近，離主要嘅高速公路又近，位置極之方便，所以唔洗多諗就決定一試。

酒店限定下午三時才可辦理入住手續，退房則定為早上十一點。住客可以優惠價十蚊加幣於停車場內泊一日車，車位全部可用頭入，非常易泊。一家四口入住之豪華套房共有兩間雙人房、兩個洗手間及一個大客廳，面積寬廣，且極為舒適。客廳內除咗有梳化同大電視之外，仲有張大大嘅玻璃飯枱。雙人房空間足，單人及雙人床都好大好彈。套房唯一最大嘅問題就係兩個洗手間入面只有一間有得沖涼，當真奇怪得很！

由於事隔太耐，XO仔當時又忘記咗留起張單，房費幾多真係唔記得，還請讀者們見諒！細佬只係記得包咗免費上網服務，及可享用「Hhonors Executive Lounge」之餐飲設備。

「漁膳房」為多倫多Richmond Hill嘅一家中菜廳，門外有多個車位供食客免費泊車。除咗門面極有氣派之外，接待大堂亦可見魚缸內多隻生猛嘅海鮮游黎游去。用餐大堂樓底高高，光線充裕，環境十分時尚雅致。

契婆特別點咗個「六人溫蟹龍蝦套餐」（CAD 468）為肥肥家族洗塵：

1)      刺身拼盤：刺身拼盤嘅冰陣效果十分吸睛，七款魚生均鮮香潤甜，極之美味。

2)      燉湯：大大盅圓肉燉雞湯每人可分成兩碗，不過湯品淡而無味，請恕細佬直言，真係情願飲一碗濃味啲嘅燉湯，都好過飲兩碗稀稀嘅。

3)      十磅避風塘龍蝦：金黃橙美嘅龍蝦山可以話係全餐最震撼嘅一道！龍蝦爽厚彈牙，香辣惹味，正爆！

4)      油爆鱔球（中）：鱔球又腥又多骨，食唔過。

5)      磅半蒸青斑：XO仔都係第一次見到中式蒸魚會豉油另上，食落的確係冇咁油同健康啲，但係魚肉就偏嚡同老，唔得嫩滑，感覺好似欠缺火喉咁。

6)      五磅蒜蓉蒸溫蟹：蒜蓉蒸溫蟹一上枱時即食的話確真鮮甜香濃，無奈餐店上餸速度太快，要食完避風塘龍蝦先轉食「溫」（暖嘅）蟹就流失咗啲鮮味。

7)      上湯豆苗（中）：豆苗色澤鮮綠，調味都好清。

8)      龍蝦膏炒飯：同龍蝦一樣成座小山丘嘅龍蝦膏炒飯好夠乾身，而且好足料，香口爽脆，惹味非常！

格調高雅嘅「漁膳房」海鮮套餐菜式量足且大多新鮮，可惜食物一窩蜂上，食客根本冇可能襯熱續款去細嚐，個人覺得有啲嘥料！最奇怪就係餐廳居然唔接受信用卡付款，加上服務生態度不甚友善，加茶、換碟等基本功夫要問先會做，似乎有點唔係好合理囉！

繼續食Brunch 之旅,今次試的是 Beast Restaurant。

"Poutine'', gnocchi, braised rabbit, sheep's milk cheese curds ,
就是炸gnocchi 配上芝士及兔肉。Gnocchi炸得剛剛好,雖然沒有脆的外皮,但內裏很煙韌及柔軟,有點像吃炸年糕般,再配上那燉得很淋的兔肉碎及富有羊奶味的芝士粒,的確是一道很不錯的頭盆,不過兔肉沒有什麼特別的味道。
 
the beast breakfast, pan fried pate, smoked bacon, mushrooms, buttermilk biscuit, 2 fried eggs, home fries
先說說肉類:類似漢堡扒的pan fried pate 及 smoked bacon,前者有洋蔥令口感更豐富,只是有點兒過鹹;而smoked bacon很厚很大,有點像煎五花腩,但味道沒什麼特別,就是油脂味很香而爾。蘑菇是冷的,而味道略帶點酸,挺開胃。蛋則是普通的反蛋。煎薯仔煎得剛剛好,而且調味亦挺不錯,但那個biscuit的味道麻麻,好像有點點梳打粉的味。

Cardamon pancakes, smoked pork belly, summer fruit compote, maple syrup 
Pancakes煎得很薄但亦很鬆軟,如果再厚多一點點口感會更好。Smoked pork belly跟 smoked bacon 味道應該是一樣的,只是帶更多的肥膏。Summer fruit compote是那甜甜酸酸的cherry sauce,跟pancake是蠻搭的。

Spot prawn po' boy, "dressed", coleslaw, mayo, tomato, pickle
大大件po' boy材料很豐富, spot prawn 的size不少,就是說不上很新鮮再加上炸衣,味道跟普通蝦沒大分別。其他配料的份量很足,如果可以減點酸味味道會更平衡。

Rachelle's maple-bacon doughnuts
看見差不多每枱都叫而加點的。一客兩件,doughnut上鋪滿了煙肉碎看起來相當吸引。Doughnut異常鬆軟,而且甜味適中,就是略嫌bacon不夠鹹味,令味道的對比沒有很大。

整體來說這裡的brunch比 Barque Smokehouse 好,但也說不上很好吃。咖啡味道一般,而且侍應要我們再三提醒下才不情頤地拿糖及奶來,但給予的份量卻只足夠一杯(我們點了兩杯)。明顯地,侍應的心情因為多了人在用膳而變差,什至在我們面前反白眼,但當時只有Patio是坐滿人的,那full house 的話什麼辦呢?
 

因為是周日的關係,餐廳只供應Brunch,而且沒有一道菜是有 ribs的。
先要了一杯Cappuccino,味道算很好,只是個人喜好不愛用這種不保暖的杯。

Barque Benedict-Cornbread, Two Poached Eggs, Smoke Brisket, BBQ Hollandaise
Smoke Brisket的肉很嫩滑,輕輕一叉就會散開,而且味道甜甜的很不錯,如果味道再濃一點會更好。但,除了smoke brisket外,其他食物的水準都麻麻。Cornbread很鬆化,但用在benedict上有點不太配,因為食的時候一叉就散,很難加上那brisket一起吃,而且上面的醬汁有點濕,令到cornbread像發水面包一樣難吃。Poached Eggs則是凍的,配上那過酸的所謂"BBQ" Hollandaise,真的,大家都說這是吃過最不好吃的 Benedict。
另外餐還附有Barque Potatoes 及Arugula Salad,Potatoes是炸薯粒。一上桌就看見炸成深啡色的薯仔有點失望,是連簡單的炸物也做不好嗎?味道是挺好的,蓮花露說有點像珍珍薯片的味道,不過每一粒都是乾乾扁扁,有些更是叉不進去, 小妹吃了三分一就不想吃了。

Scrambled eggs-aged cheddar, parmagiano, BBQ Pulled Chicken
試了點scrambled eggs 及pulled chicken。Scrambled eggs 有點兒過老,而且芝士味一點也不特出,份量倒是挺大的。Pulled chicken味道跟Smoke Brisket的差不多,而肉質並沒有說很滑漱。

Barque Brisket-Red Cabbage, Fried Onions
Barque Brisket跟第一個餐的一樣,就不再多講,份量倒是很多的。包有點韌,估計面包並非新鮮貨。Red cabbage 沒什麼特別,而fried onions 則是少得忘記了它的存在。

小妹估計Barque Smokehouse最好吃的會是smoked ribs,所以這次來只吃到Brunch是有點可惜。下次(有機會)要在晚上來用餐試試他們在行的smoked ribs!題外話,所有窗、門都開了,因此有不少蒼蠅及蜜蜂在店內飛來飛去。小妹不介意把門窗盡開,增添吃 Sunday Brunch的閒情,但我很介意邊吃邊要趕蒼蠅。 

每次經過阿拉廚房都有很多人在門口等,想必味道是不錯吧。
四鮮烤夫的賣相一點也不吸引,全部材料都切得小小的,四鮮極少,數來數去也只有少少的薄冬茹片及木耳。 看見那用刀切的正方形烤夫就知道不會有多好味,事實是烤夫不夠鬆化及入味。

怪味雞第一眼以為有很多雞粒,結果70%是豆乾粒,而那20%的雞切得很碎亦有點鞋口。不過醬汁是不錯的,至少可以用作撈面。
 
南翔小籠包,一籠四隻熱辣辣的小籠包,皮有點厚但尚可接受,內有不少肉汁。點了一些醋,但是沒有醋酸味的。

上海炒年糕有色無味,看似不錯,配料也不少,有津菜及肉絲。 但真的沒什麼味道,最後大家吃掉配料便算了。

嫩雞煨麵的雞在哪裡!?雞在哪裡!?看到的只有青菜浮游...雞大槪只有十粒吧,也是切得碎碎的。味道就是...沒有味道,就連賣相也不對,一點也不像煨面,倒是有點像湯面。有點想念在香港吃的煨面了...

 

一年一度的Summerlicious來了幾經思考便訂了Malena去吃Summerlicious ($35 prix-fixe)。
First Course
ritto misto del giorno,也就是炸蝦,魷魚,伴碟的還有一款炸豆(蠶豆?)。 蝦及魷魚都挺新鮮,而且炸完沒有很多油,粉漿亦很輕身。沾醬略帶點辣味,很配那些炸海鮮。

albacore tuna crudo, 兩片吞拿魚配上 green bean 同olive及一隻poached quail egg。吞拿魚很新鮮,其他配菜卻沒有什麼特別。值得一提的是poached quail egg無論是看還是吃起來都只是水煮全熟蛋,至少我是第一次見到可以完整地開半又沒有流蛋汁的poached egg。

marinated sheep’s milk feta, 一大件Feta cheese加上蕃茄片。嗯...沒什麼特別,但芝士味是挺重的及沒記錯是有點辣的。

Main Course
½ grilled rock hen ‘al mattone’, 滑嫩!沒想到連雞胸也烤得很嫩滑,充滿肉汁,但略為烤焦了點及黑椒味有點重及辣。配菜沒有特別,就是普通的煮蔬菜吧,印象沒有很深。

tagliatelle with braised lamb, Braised Lamb既淋又嫩,略帶點羊羶味,而且份量是挺合理的。Tagliatelle煮得剛剛好,很彈牙,最好的是每一口的意粉都充滿了淡淡的羊羶味。不過,吃多一口倒是覺得醬汁有點過鹹及...我看見了辣椒片。

sea bream ‘in padella’, 配菜是有點甜甜酸酸少少辣的紅、黃椒,小顆薯仔及火箭菜沙律。沙律還可以,但調味略為重了一點,而且跟薯仔說不上很夾。魚份量很大,可惜有點煮得太熱,令魚有點乾及散,說真的是有點兒失望。

Dessert
Lemon phyllo tart,整個甜點外觀很漂亮,味道都很夠檸味,很清新。

warm white chocolate ‘bougatsa, Bougatsa裡有點水果(蘋果?蜜桃?)泥。熱的bougatsa加上冷的white chocolate及blue berries的醬汁,感覺很不錯,white chocolate真的很好吃。 

artisanal ‘soma’ gelato, 一球是chocolate,另一球是vanilla。呵,完全沒興趣。Vanilla 的那球有點像sorbet般冰的,而且非常甜。Chocolate的聽友人說是很好吃。

是次食評寫得最多是"辣"這個字,基本上所有餸菜都略帶點辣...
又,我們等Main Course等了45分鐘,因此就算有多好吃,整個印象都變差了。 

先談談小菜,總共有八碟:泡菜,辣蘿蔔,酸蘿蔔,芽菜仔,韓式魚旦,薯仔沙律,疑似西洋菜同不知名高麗菜。泡菜是可以的,但不及曾提及的ShabuShabu好,其他也就是中規中舉,反正來這裡的重點又不是超水準小菜。

Chulpan Sundae Bokkeum (二人份量)
用辣醬炒糯米腸及豬雜,再加上其他材料例如年糕、金針菇、韓式粉絲、紅蘿蔔等。送上枱的是一盆還未煮的材料,侍應會在顧客面前炒至杰身就可以吃了。糯米腸口感煙韌,再加上甜甜辣辣的醬,送飯一流!要補充的是菜單上沒有寫附上兩碗白飯的,而且同行嘅二人都覺得此菜頗辣,我就認為剛剛好,所以怕辣的要小心啊!

 Chik Bibim Naeng  Myeon
這間食店有兩種冷面,一種是只有 icy broth,另一種是有icy broth 加 spicy sauce的。我最喜歡的是後者,spicy sauce不會太辣。配料不多,就只有青瓜絲,酸蘿蔔,半塊梨及半隻蛋,煙韌的冷面,爽口的配料加上有點兒辣的醬,配搭起來就剛剛好。這個是我們去朝鮮屋的鐵膽呢!每次必叫!
 
最後值得一提的是有些侍應會說流利的國語,有任何問題他們都很願意用國語解答的!還有就是飯後糖也是超級好味,不要錯過呵!