3月7日（晴）：2019瑪麗皇后二號郵輪河：第三天之芽莊市

離開香港後，「瑪麗皇后二號」第一站先停泊越南芽莊市。雖然船隻早上八點已抵達目的地，但礙於其巨大嘅體積不能進入細小嘅港口，上岸必需轉乘救生艇。郵輪公司並非初次去芽莊，經驗理應好豐富，無奈當日嘅坐船仔安排竟然超級大混亂，毫不專業，直令全場遊客情緒鼓噪得很！

因為聽過不少有關越南嘅驚嚇搶劫故事，出發前早已經旅行社訂咗架旅遊巴連一個識講國語嘅導遊，HK$ 3,200包車九小時。真係冇諗到人未上到巴士，先收到香港公司嘅長途電話，告知導遊於閘口代出咗四十蚊美金嘅「過路費」，要即時加收；肉隨砧板上，似乎冇得話唔俾，不過最意料之外嘅就係當XO仔閒談時問及導遊哥哥時，佢就話自己俾咗四十萬越南盾，即約十八蚊美金，咁咪一半都冇，食水真夠深！

年輕嘅導遊先生可以普通話溝通，而且好有幽默感，上咗車先講咗個笑話搞吓氣氛，令大家放鬆心情：話說越南曾經係一夫多妻制，角色不同嘅太太均擁有特別嘅稱號，全部都係同食物有關。大老婆係「米飯」，因為每日都要食；二奶為「米粉」，食得多米飯間中都要轉吓口味咁話；三奶就叫「咖啡」，味香醒神，不時都想朝早嘆返杯；四奶名為「方便麵」，隨時食都得；最矜貴就要數五奶「腰果」，皆因有錢人先可以食得到！

第一站根據小肥規劃好嘅行程前往已訂好座嘅「Lanterns Vietnamese Restaurant」食午餐。飯後就由導遊先生帶大家認識芽莊嘅兩款沙灘，分別為最受俄羅斯旅客歡迎嘅比堅尼沙灘及本地人入夜後先會去嘅包到實沙灘。由於坐艇上船需時排隊，細佬原定計劃中嘅咖啡站及歡樂時光就二合為一，喺導遊哥哥相熟嘅「Nha Trang Sailing Club」進行，貴夾超級搵笨！

越南天氣實在悶熱，團友們流足一日汗，四點半上返船後都要梳洗一番先去七樓嘅「Carinthia Lounge」會合，一邊欣賞現場表演一邊等開船。喺酒廊發生咗嘅一段小插曲就留返下文短述，但係正當各人都認為岸上嘅越南餐唔係咁得嘅時候，萬萬估唔到郵輪嘅晚餐清一色地「乾爭爭」，為極度不爽嘅一天再度減分！