check-out了之前的酒店後 今天check-in 這間5星級的酒店 本來一晚普通房要HK$1,500  但今次有discount!! 平左好多!!^^
酒店外表比較普通 於agoda book的時間要求了高層  有做到 而且房間是大得驚人! 床是king size 的!! 超舒服! 地理位置超好 行去地鐵站只需2-3分鐘 行去東大門都只需15分鐘 超好 下次都會再住! 

外觀美麗 影下相都不失為一個好地方 
其實我們只係咁岩經過 無刻意去搵佢 哈哈 發現梨大商圈D衫普遍價錢較貴 所以行左陣就去kitty cafe 買了2杯chocolate 拎走 之後去搵韓國朋友去食好野LU 

韓國朋友提議不如食D地道D既野食 於是介紹了一間好地道既餐館俾我地 成間鋪得一個阿珠媽(估計係老板) 都得一木台食客 我地係第2木台 哈哈  餐館無英文餐牌 亦無會說英語或普通話我店員 但不用擔心 因為佢地得一樣野食 就係炒豬內臟 你只1需選擇size就OK 食過後覺得好好味 用鐵板炒好惹味 完全無異味 當地人喜歡邊食邊飲燒酒 我地2個外地人實在接受唔到果陣味 所以決定飲米酒 Makgeolli 本身甜甜地 好易入口 有人喜歡飲前搖一搖 顏色會深D 唔搖的話顏色就淺D 各人有各人喜好 另外好多韓國人喜歡加Spite 因為2者味道好夾 有機會可以試下 我地一行4人 由於再會去食其它野 所以只叫了一個細size HK一百蚊左右  老板娘個樣都唔係咁高興 哈哈 不過知我地係遊客後即刻笑番

之後韓國朋友又同我地去左另一間店搵食 原來係韓劇上成日見到既炸雞店 佢地好中意約埋一班朋友去呢D店一邊食野一邊傾計 炸雞店響首爾有好多間 出名的如有TWO TWO, 今次去呢間都有幾多分店 (連釜山都有) 我地店了一份4人份量的無骨炸雞 Draft beer係韓國本土啤酒 無泡的 亦不是冰凍的 味道好清香 不重啤酒味 唔錯! 我地叫了3杯細 1杯大 大既真係好大杯嫁!! 哈哈哈!!! 店員俾左4個汁我地食雞 有一個類似星黃醬既汁同雞肉好夾 好好味! 呢餐大約HK$200 坐得又舒服 雞又滑 推介!

下午明洞行完duty free 幫所有香港朋友消費左5位數字後 實在係要補充體力 但時間又唔夠 唯有食個快餐 呢間"忠武飯捲"係連鎖經營的 好多地方都有 佢地得一種食物 你可以2個人SHARE一份咁樣 會有miso soup 有carrot kimchi,辣章魚,同埋主角"KIMBAP"紫菜捲飯。 辣章魚真係好 食完可再免費加 不過太辣 食唔落...由於響明洞區 價錢較貴 我地叫左1人一份 差唔多都要HK$100 唔抵!

特色欠奉 但試無妨 

由東大門歷史文化公園站搭地鐵坐三個站，便到達光化門站，由5號出口步出，即見和清溪川廣場著名的海螺形雕塑Spring。不過，遊覽前先醫肚，雕塑旁的Tom n Toms Coffee就最理想。

咖啡室的面積很大，布置好似星巴克咖啡咁好舒適，客人唔多，座位任你坐。我揀左個套餐（Special Pretzel + Americano），盛惠6,800韓元。付錢後，收銀員將收據和電子牌仔交俾我。

在等餐的百無聊賴之際，發現收據上有wifi登入密碼，於是立時用手機上網打發時間。等左十幾分鐘，我的早餐終於有啦！原來係沾滿芝士粉的麵包圈，附送芝士醬，沾著來吃，超好味，略嫌分量唔多夠！美式咖啡同樣係要問佢先會俾奶，糖和清水則自取可也。

估唔到一個人盲中中都食到美味的早餐，好滿足呀！

嘆完一個人的早餐後，在海螺形雕塑側落去清溪川！清溪川沿著首爾中心街道流動，流經多個地區，起點正是光化門站5號出口東亞日報前，海螺形雕塑就係清溪廣場的地標，從呢度開始的清溪川一直涓流到漢江。好多朋友都話光化門呢一段最美麗，據講廣場上有縮小版清溪川模型，每逢夜晚，光打在每座特色不一的橋上，標示出位置。可惜，我在上午到來，而且遇上下雨天，睇唔到咁靚的夜色！

由海螺形雕塑側行落清溪川，即見小型瀑布，溪水清澈見底，遊人唔多，寧靜得只聞淙淙的溪水聲，感覺亦不錯；可惜天公不造美，細雨紛飛加天色昏暗，影出來的相片黑沉沉的，略嫌美中不足！

遊左一小段清溪川後，原路折返，轉到光化門廣場去。光化門廣場佔地面積19,000平方公尺，位於連接首爾市鍾路區光化門至世宗路十字路口與清溪廣場的世宗路中央。

廣場上，打頭陣的是李舜臣將軍（朝鮮時代的日本侵略戰爭爆發時，打敗日本立了大功的名將。）的銅像。跟住見到一大班警察，嚴陣以待，發生咩事呢？原來廣場有一個名為Special Olympics FINAL LEG的慶祝活動，一大班韓國人同外國人手舞足蹈，齊齊跳緊江南Style，強勁的音樂令暮氣沉沉的廣場充滿歡樂，氣氛好熱鬧，我都忍唔住停低湊熱鬧。不過，難為坐在背後的世宗大王（朝鮮王朝第四代王）被強勁的音樂同熱舞嘈到無眼睇！

經過世宗大王的銅像後，最後到達光化門（朝鮮時代的宮殿）了。門外擠滿左唔少遊人，都係為左同守門將影相，我就興趣不大，睇左陣便坐地鐵返酒店，預備check out啦！

酒店Check out兼寄存行李後，仲有大把時間，於是又在東大門周邊遊走，行埋東大門一段的清溪川，又去埋平和市場，居然在平和市場又出血，買左五對毛巾襪，朋友就買左三件衫俾個女同姨生孫，真係廿四孝媽媽，就算腸胃病發作，仍忙住為家人張羅手信！

午飯時分，朋友仍然無胃口，由得我想食乜就食乜！我好想食位於Migliore商場與Hello aPM之間的一條橫街二樓小店（在東華飯店側，旁邊有好多化妝品店如THE FACE SHOP、ETUDE HOUSE、 Nature Republic等，大家大可掃貨然後上二樓慢慢嘆），因為店舖的雞排鐵板炒飯宣傳易拉架好吸引，一於又再次獨食午飯！

原本店員要求我地要點二人份的炒飯，但我話朋友有病無胃口，只要一人份，佢可能唔識聽又奈我唔何，就照俾我叫一人份的雞排鐵板炒飯（5,500韓元），仲叫我自己去旁邊任取酸蘿蔔和凍湯。

店員先將雞肉放在鐵板上炒熟，然後放埋加左紫菜同泡菜醬的白飯同炒，炒埋一堆後，美味的炒飯就完成啦！炒飯帶微辣好香口同惹味，朋友齋睇無得食，真係可惜。我見隔籬檯的炒辣雞仲滋味，再加埋拉麵落去同炒，搞到我口水直流，不過，真係好飽，希望下次再遊時，可以試試呢種鐵板辣雞啦！

25號的正日 真係好凍!!! 得-18度  廣藏市場咁岩就響油店旁邊 所以大約正午時間我地就去搵食了 

入到去係好地道既街市 有傳統碗碟賣 有好多自家制既泡菜!! 其實呢個市場最出名既係生牛肉 不過小妹唔敢食 所以就無食了! 我地食左煎綠豆餅 食左豬內藏既湯飯 好味! 呢個市場影下相食下付統風味小食 都好值得去

未出發前已在香港search好 打算要別這間由韓國明星姜虎東開的烤肉店 其實它設有很多分店 像東大門 明洞等都有 *注意某些店是沒有蒸蛋送的* 而我選了這間位於弘大附近的 是因為X'mas Day當天我要在這邊血拼 哈哈哈 說實在的 烤肉店周圍都係 呢間試過後都覺得可以再試其它更好的. 由於距係明星開既 所以有感價錢比一般的貴哦  MEUN很易看 有簡單的英文 但店員只能以韓文溝通.  我們點了2份  三層肉(豬來的) 1份牛肉  1份的份量只有一塊 店員會幫遊客服務 剪成一小塊的 至於旦 是ORDER後就會自動過來幫你加的. 有很多人會再另外加$食多份 都係W1,600/份 還可以! 牛肉一般 反而豬肉更香 唔錯! 叫了2個白飯^^ 前菜都是好著通的 只有一個類似沙律的比教好食 我續食了3次!!     

由安國站及2號出口向前行，沿裁判所直走，到達小學時過馬路左轉，見小藥店便知已到達北村韓國村的入口。

入口的另一邊有間書香味極重的咖啡室－－Dooroo Cafe，正係吃早餐的好地方。全店的書櫃放滿書籍，燈光柔和，樓底好高，感覺好舒服，最正係只有我地兩個客人，包晒全場，影乜都得！

我地揀左一個套餐（Double Toast + Amercano,，8,000韓元）兩個人吃。厚多士即叫即烘，雖然等得耐少少，但送上時超熱辣辣，咬落好鬆軟，配埋士多啤梨果醬和忌廉同吃，好好味，在香港未食過咁好味的鬆軟熱辣的厚多士呢！分量極大，好在係兩人同吃，否則真係食唔晒。

至於美式咖啡亦不錯，不過唔知點解唔一併送上糖同奶，要我開聲先有，難道呢度興飲齋啡？！

北村韓屋村係指位於景福宮、昌德宮和宗廟之間的區域，村內民居保留住首爾600年歷史的傳統韓屋，穿梭其中，彷彿時光倒流，饒有趣味。

韓國村有著名的北村八景，不過要搵齊八景一Ｄ都唔容易。到達村口時，雖然遇到好心的日本少女俾左張北村八景的地圖我地，但間間韓屋都差唔多，真係認唔到，唯有見到人多聚集的地方，跟住齊齊影相就無錯，到最後都唔知自己影左第幾景添！

沿途見到北村最高展望台的指示牌，於是跟住行，登上位於三樓的展望台。呢個展望台其實係一間民居，不過屋主利用居高臨下的優越位置開放俾遊客眺望北村全景。每人收費3,000韓元，送一杯飲品（橙汁或啡茶）。

的確，呢間位於三樓的民居可以睇盡北村全貌和特色屋瓦之外，仲可以遠眺昌德宮和Ｎ首爾塔，民居老闆仲指示邊度係第六和第七景，不過落到樓，又係記唔到。

繼續在北村遊走，見靚屋就留影，見人多又去湊熱鬧，總之乜景都影！唯一可惜的是搵唔到《個人取向》中孫藝珍的屋企（回港後，朋友話原來係43號，我地一直以為係40號，曾經路過都認唔出，真係大懵！），真係唔抵。

逛完傳統特色韓屋，轉往睇首爾現代化的地標－－N首爾塔。

由地鐵明洞站4號出口，往前直走到新世界百貨旁的十字路口，然後進入新世界百貨斜對面的大路，不遠處就係南山玻璃傾斜升降機，唔使三兩分鐘就上到纜車站，快捷方便！

再乘坐南山纜車，參觀當日係周二兼且係中午時分，遊人唔多，等幾分鐘即可登上纜車。大約12分鐘的車程，便到達山頂。山頂平台除有八角亭之外，四周仲有好多堆滿愛情鎖的地方，好多愛情鎖仲生晒鏽，可見年月久遠！亦印證愛情都係經唔起時間的考驗！（哈哈！）

N首爾塔的N為南山(Namsan)的第一個字母，也有全新(New)的涵義。塔高236.7公尺，建於海拔243公尺山上，加上塔身更高達至480公尺，正是觀賞首爾全景的最佳地方。

購買N首爾塔的門票時，因為出示購物節的優惠券，所以有9折，兩個人慳番1,800韓元。甫進入口，即被工作人員拉埋牆邊強行拍照，原來係將我地個樣退地Key入首爾塔日、夜背景之中，兩張相合共要15,000韓元，太昂貴啦！所以我地決定唔買。

到達展望台，360度的透明玻璃設計令到每個角落都可以清楚欣賞到首爾全貌。日間景致雖然唔及夜景璀璨，但午間參觀勝在遊人唔多，而且可以清晰見到漢江，以及江南、江北的分界和特色，都算唔錯啦。展望台仲有一個角落係俾人寄Love Letter，只見唔少人埋頭密密寫，真係佩服佢地咁溫馨同埋咁有閒情逸致！

由升降機原路下山返回明洞，居然俾我發現旅遊書推介的全州中央會館，當然要幫襯食番碗石鍋飯啦！

朋友因為腸胃唔舒服，無乜胃口，原本打算我食豬肉石鍋飯，佢飲個大醬湯。

豬肉石鍋飯（10,000韓元）新鮮熱辣送上，經我快速攪拌後，飯餸撈埋一堆後，香味勁濃帶微辣，密密食到停唔到口，真係無得頂！

輪到更為濃郁的大醬湯（7,000韓元）上場，可惜朋友完全無胃口，寧願只飲石鍋飯送的大豆芽清湯，而我只好捨命飲埋成碗大醬湯，湯料好多，用鮮蝦、蜆等海鮮熬製，一飲之下，哇，真係不得了，超級濃郁！不過有少少鹹，所以我再用附送的白飯撈湯，中和鹹味！

食完石鍋飯又飲完大醬湯，我仲食晒所有五六碟冷菜，居然剛剛好，無飽到上心口的感覺！一個人食左17,000韓元，完全值得回味！

廣藏市場由鍾路五街站8號出口向前行一分鐘即到。市場成立於1904年，係最具代表性的傳統市場之一，除左有好多韓服布料店、韓服店、手信店如紫菜、人參外，仲有新鮮蔬菜、海鮮同醃菜攤檔

另外，市場巷子裡密密麻麻的傳統小吃攤就最能滿足要開餐的人士，呢度最多的係煎綠豆餅、豬血腸、炒大腸、餃子等傳統風味小吃。

由於已食左兩次綠豆餅，所以今次試刀削麵同泡菜餃子。刀削麵腍腍的，加上清湯底，味道普通，無咩特別；泡菜餃子的餡料係肉末碎，唔覺泡菜味，實在難以跟香港的水準媲美。埋單只係10,000韓元。

 

出發時，首爾落大雨，天色黑沉沉，但由於兩日前已買好直通巴士車票連入場費（每人要23,000韓元），惟有硬著頭皮照去（後來先知錯有錯著，南怡島氣溫較低，下雨變下雪，驚喜萬分！）！

直通巴士在朝早九點左右已經停在仁寺洞塔谷公園側，一到九點半便開車，所以一定要早到呀！

大約一小時廿分的車程即到達加平渡頭（唔使好似坐火車咁，要再轉的士，好方便！），落車見漫天飄雪，真係驚喜不已，當然唔上船住，慢慢在渡頭影到夠為止！

上船前，要經過Immigration（有「關員」會檢查門票！），然後先可以上船。經過幾分鐘的船程，便到達心儀的南怡島，開始尋找《冬季戀歌》中有珍和俊相的足跡！

周一兼落雪，遊人唔算太多（雖然有齊中國、日本、香港、泰國、南亞等唔同人種，但至少唔覺人滿之患！），部分離開渡頭較遠位置更加杳無人煙，合晒我地心意！

飄雪之下的南怡島淒美又浪漫，就算傻瓜機隨手一拍都美得令人讚嘆；加上各處皆見《冬季戀歌》的印記，滿足晒迷哥迷姐朝聖的心態！其中最鍾意的景點，當然係俊相和有珍經過的水杉林蔭道同埋佢地初吻的位置！

追蹤完佢地的足跡後，原來想搵埋佢地食過的懷舊便當，點知搵極搵唔到，結果去左一間叫古木的韓國料理店，食左拌飯同綠豆餅，拌飯唔係用石鍋上，唔夠熱，味道麻麻，反而綠豆餅又厚又大件，熱辣辣，好飽肚，埋單係15,000韓元！

由於落雪的關係，鞋襪同褲腳盡濕，臨尾只好去碼頭附近的便利店買對毛巾襪替換！下次都係要做足防落雪的裝備（雪鞋加雨傘唔少得！）啦！

直通巴士的回程時間係四點鐘，所以我地搭三點半的渡輪返回加平碼頭，順利完成今次尋找《冬季戀歌》俊相和有珍的足跡之旅。經過個半小時的車程，大約五點半前便到達仁寺洞。

我地行完明洞的樂天免稅店，在地面向著Lotte Young百貨公司方向直走，過對面即見明洞的入口，原來那度香正正就在對面的一條橫街（應該在明洞站的15號出口直達行一分鐘！），估唔到咁易就搵到！

那度香烤肉店設有席地而坐或普通檯椅，我地當然揀後者，起碼有椅背又唔使盤膝而坐，舒服好多！

我地揀的係優惠券內的牛肉＋豬肉烤肉套餐，有九折優惠，兼送蒸蛋一缽。齋食烤肉驚唔夠飽，再加一個石鍋飯打底。我食豬唔食牛，朋友就好牛唔好豬，各有所愛唔使爭！

店員先將大大件的肉塊放在烤爐上燒，燒得差不多後，便逐塊肉剪得細細條。最初覺得豬腩肉好肥，但燒好的烤肉用生菜加甜醬包著吃，似足吃北京填鴨咁，好香口惹味又唔覺熱氣！

至於石鍋飯，又係自己撈勻後慢慢嘆，不過可能之前食過梨大的芝士泡菜石鍋拌飯，呢度的石鍋飯普普通通啦！

食完烤肉，店員送上兩支免費迷你益力多。埋單計，兩人折實合共44,000韓元（呢餐已經係我地整個行程中最貴的一餐，折合港幣只係330元，好抵食！）。臨走時，收銀阿珠媽仲任我地揀兩張明星相，朋友鍾意裴勇俊和張根碩，所以兩張送晒俾佢，滿足而歸！

由市政廳地鐵站1號出口，兩分鐘腳程即達德壽宮，對面便是首爾廣場。

到達時，大約下午3點半，雖然睇唔到王宮守門將交接儀式（只離遠見到遊行的門將在對面馬路的背影！），幸好在德壽宮的大漢門門外，有幾位高大威猛的守門將俾我地任影，而且仲會幫我地影合照！

跟古裝人影完相之後，順便俾1,000韓元參觀一下德壽宮，畢竟睇古裝韓劇睇得多，都想睇下拍攝的宮廷實景。

宮內四周有積雪，加上古色古香的宮廷環境，影相幾好！我尤其鍾意通往中和殿前的兩旁印有不同官階（由正九品至正一品）的小石柱，皆因睇古裝韓劇經常出現大臣在此覲見皇帝的場面，來到實地體驗一番，別有趣味！

遊完德壽宮，便過對面馬路睇睇變身做溜冰場的首爾廣場。

首爾廣場在首爾市政廳的對出位置。每逢冬季都會變身為溜冰場，供溜冰愛好者以超低廉的價錢享受冰上時光。今年的開放時間由舊年12月15日起至今年2月3日營運，入場費為每小時1000元韓元，有興趣的朋友要留意啦！

周日的午後，溜冰場充斥著大大小小的溜冰愛好者，畢竟用幾蚊港幣的入場費即可玩足一小時，過下癮都抵！可惜我地係門外漢，無謂顯醜，影影相看看便算了！

提提大家，進入滑冰場必須戴手套。另外，還有滑冰教室提供學習，使大家更容易上手。

由於周日的關係，上午購物街行人唔多，部分店舖尚未開門。

我們在附近的漢堡包店吃過早餐後，街上店舖陸續開門，遊人亦漸多，除左本地少女外，仲有不少香港人都到此一遊！購物街的主街道以化妝品店為主，化妝品店比明洞的折扣更多，好似一間名叫Shara shara的化妝品店，便全部產品半價，送Samples之外，再送唇膏和眼影添！真係唔買就走寶！

不過，想尋寶的話，記得到橫街小巷內穿梭，畢竟橫街小巷的時裝店更多，兼且多小攤檔，價錢很便宜，衫褲鞋袋襪樣樣齊，要買的話真係會買到癲！幸好購物街的街尾（近梨大校園）有找換店，想換韓圜的朋友唔使煩！

逛完街又掃完貨，「平復」左心情之後，就去著購物街街尾前行，直接進入梨大校園本部！

梨花女子大學因為電影《我的野蠻女友》（全智賢迫車太賢著高跟鞋在校園內疾走的情景實在經典！）而聞名，龍友尤其愛在呢度獵影！呢度雖然叫女子大學，男士們都可以入去參觀的。

梨大的校園環境真的很優雅，充滿高尚學府的氛圍，建築物的設計亦別具特色，其中的多功能館外牆更是龍友熱門拍攝地，據講呢座建築物由法國建築師Dominique Perrault建造，兩棟埋在地底的建築間夾著一條長長的走道，恍似一座峽谷。

由於遊覽當日，部分地方有輕微積雪，更添美態，難怪龍友遊人甚多，大家齊齊去唔同位置取景拍影，左影右影，大家都影得不亦樂乎。

遊玩梨大校園，返回購物街搵食午飯的地方。在購物街街頭的左面第二條橫街，發現一間好吸引的石鍋飯小店，而且標明只係4,000韓元，於是膽粗粗入去試試。

店內全部都係年青的本地人，以女士為多，一直覺得若多本地人幫襯的小店，味道一定唔錯，而且比做遊客生意的店舖更便宜！今次又再證實。

我食芝士泡菜石鍋飯，熱飯用熱辣辣的石鍋奉上，表面睇好似好平實咁，只有芝士碎、粟米同紫菜碎，好似好Dry咁，點知攪拌後，發現飯裡加有甜中帶微辣的泡菜醬，芝士碎攪拌後溶入飯粒之中，香氣撲鼻而來，食落真的好惹味！呢度奉送酸蘿蔔和泡菜，我連食幾碟，再加免費冷熱水，呢餐真係超值之至！