2017京阪神六天遊

11月10日（晴）：京都的第三天及大阪的第一天

外遊訂酒店，如果要包埋個自助早餐每每都要加成兩、三千円一日，小肥覺得絕不化算，因有心要留肚食個豐富嘅晏，早餐其實只需要飲杯咖啡，另加件蛋糕或多士已經好足夠。離開京都嗰朝早路經「Inoda Coffee」，見到地方夠大又有位，所以好隨意地就行咗入去，點知居然俾肥肥家族發現店子有超正西多士食。

之後返酒店辦妥好退房手續後就由哥哥就帶隊去咗「JR京都伊勢丹」狂購多輪，並於商場入面間「天一」食埋餐即叫即炸嘅天婦羅晏，午後先搭車去大阪。

今次喺大阪逗留三晚，應長輩推介入住「Fraser Residence Nankai」，公寓式單位豪華舒適得黎設備齊全，可謂超掂呀！安頓好一切就出咗去條街到慢慢行去「ぜろはち」（Zerohachi），同居大阪嘅表弟一家四口食咗完頓抵食且服務一流嘅燒肉放題後就早啲休息，準備明早繼續血拼！

11月9日（晴）：京都的第二天

肥肥家族初遊京都，對歷史悠久嘅前日本首都頗為陌生，印象中只係市內好多寺廟，所以姨媽就提議不如參加半天巴士遊，唔洗行太多路又可以睇啲最具代表性嘅景點。由於旅行團朝早八點就要集合，XO仔就訂定京都得奬品牌「Flavor's」嘅千層蛋卷俾大家做早餐，只可惜質素遠低於預算，令團友們都大感失望。

坐咗四個鐘頭巴士，遊過「二條城」、「金閣寺」、「京都御所」後，九子就去咗酒店與落車處中間位嘅「モリタ屋JR京都 伊勢丹店」（Moritaya）食咗頓正爆油燒和牛午餐。飯後就轉由哥哥帶路狂購多輪京都限量版精品。全日最有驚喜都要數當晚喺「よねむら」（Yonemura）嘅潮派法國大餐，大廚喺法式料理混入咗不少和食精髓，美鐉組合新穎可口，感覺就好似味蕾都去咗次旅行咁，食得實在暢快！

2017京阪神六天遊

姨媽們近年尾都會回港一段時間，期間更會出一出門，遊玩一番。因得知肥肥家族於年頭喺大阪玩得好開心，所以就命小肥兩兄弟安排一次京阪神之旅。哥哥為是次六天東瀛遊再次選乘「香港航空」早機去、晚機返。

 

11月8日（晴）

京阪神六天遊出發當日，八口子又再次遇上航班稍為延誤，幸好「香港航空」新增之貴賓室「遨堂」設備齊全，餐飲亦不錯，有要求嘅長輩們都滿意到毫無掃興之感。

到達關西國際機場後就直接搭「HARUKA」列車去最遠嘅京都。哥哥早已於車站樓上嘅「Hotel Granvia」訂好房間，安頓好行李後大家都急不及待外出覓食。由於難以掌握抵京時間，首個晚餐只能誤打誤撞地一試可容納八人嘅日本餐店「すき焼き炭火居酒屋北斗」。講真食物質素認真麻麻，加上可能人多冇訂位，又令到服務生遲咗收工啦，服務態度更可用一個「劣」字黎形容，家人飯後都話唔會有下次，唔怪得知成條街只有佢一家有位囉，旅程第一個晚餐也太令人印象深刻了！不過都可算為好事，因為真係好難遇上更差的。。。