來東涌水鄉之前，導遊已說過這景點很細，而且只是仿古的一條小街，但街內有一檔美食是大家不容錯過的，是一家馳名做薑撞奶的小店，名字叫《肥婆甜品店》。

這《肥婆甜品店》出名的原因，最主要都是因為有明星效應，最主要都是因為有廣東電視臺同亞洲電視來做旅遊節目時介紹過，所以籍此做吸引遊客的生招牌。

小店的地方，因應了景區的設計的營造出中式茶檔的感覺，感覺很簡單，而最重要，當然是令人覺得他衛生啦。

奶，在大煲內不斷的以慢火煲著，行近廚房，會立即感受到熱牛奶香味撲鼻的味道。

我們二人，一個薑汁撞奶，一個雙皮奶，而這兩個，可以說是南、番、順一帶的特產美食，每一次來南沙、番禺、順德，尤其是大良一帶，牛奶產品，基本上是不試不可。

姜汁撞奶，薑味很濃郁，但入口時又不覺其辣，而且是很完美的半膏狀，既香又甜，冬天來一電熱辣辣的薑汁撞奶，的確是駒寒良物。

另一個是奶味濃郁而且帶芳香的雙皮奶，不過，我只可以說這是燉奶，因為這奶沒有另外結出一層皮，若不追求這一層小皮，這奶味濃郁而香甜的雙皮奶，十分之滋潤，十分甜美。

是日凍，吃了這兩碗美味的甜品，頓時令自己的身體和暖起來，感覺非常是窩心同開心。

旅程的第二站，我們到達了番禺的市區，而目的，就是享用我們的中午飯。旅遊車帶我們來到番禺汽車旁的一家酒店，用餐的地點就是該酒店的中菜廳，名字叫《彙泰豐海鮮酒家》。

第一餐，通常都會比較豪華，貴氣一點，所以安排了我們坐入了樓上的包箱房，延席兩圍。(因為我們的旅行團共有19人。)

在旅行社給我們的行程單中，說這一餐是《番禺風味宴》，所以這一餐應該是以南番順一帶的河鮮為主題的宴席。

首先，來了一個很素的炒三絲，當中有茄子、豆角 同 涼瓜，以豉油醬爆的三絲，入口很香很惹味，雖然沒有肉，但該味道已經令大家吃不停口。

之後是順德的名菜，炸鮮奶。炸鮮奶，是一個比較考功夫的食物，但對於南番順一帶的餐廳來說，這不是什麼難做的菜式。而這餐廳炸出來的鮮奶，達到了外面酥脆酥香，內心是輕綿綿，呈膏狀的香滑牛奶，非常之可口。

燒鴨半隻，頓時令食肉獸的大家把筷子舞動起來，肉厚油香，皮雖然不是太脆，但鴨味正，味道濃，再者其肉感豐富，也是夠水準的一隻燒鴨。

豆腐，很簡單的蒸好再放豉油，再加少少蔥花，入口感覺到滑嫩有豆香，是簡簡單單的美味道。

金針雲耳蒸雞，我覺得好的原因就是金針的味道沒有太濃，也許只是我個人的口味，因為我知道金針雲耳蒸雞，著重的其是就是金針的味道。另外，雞肉皮滑肉嫩，做得不差。

此午餐被稱為番禺風味宴，河鮮就是這餐的主角，應該是一魚兩味的，首先有蒸魚，淡水魚，肉質的爽甜是甜帶清新的，入口的味道很好，惟是多細骨。

另一味就是魚羹，這羹是今餐的主角，而且一看就知道，這是一個很有水準的魚羹，入口時，味道鮮香，多魚肉，多配料，此羹絕對是老少鹹宜。

安排得不錯的一餐午飯，而我們也太耐沒有參加廣東的短線團，好多朋友說短線團的食用不錯，這一餐，我感覺對了。

聖誕假期，就是一家大細出遊的好日子，而我們就由暑假講到聖誕，說要陪小孩去《長隆》一遊，結果，我們在冬至前的一個週末實現了。旅行團簡介說一次過玩晒番禺三大樂園，而首先到的，就是此行的主角，《長隆野生動物世界》(又名《香江野生動物世界》)。

當我們的旅遊巴駛到園區的最深處，來到了售票處，而這就是我們是次旅程的主要目的地的大門口了。

導遊把門票弄好給我們，就立即是園內的自由活動時間，而第一時間，當然是進入他們的野生動物園區。而要入該處，就一定要乘坐園內的小火車，或若有國內朋友駕車來，自己開車入園更不受時間的限制。由於國內的真人 show 電視節目《爸爸去那兒》的拍攝取景地點就是《長隆》，所以他們就充份地利用他們，令到園內的處處，都充滿了他們的海布，強制性宣傳。

列車一轉彎，就有好多動物看了，每到一個有動物觀賞的地點，列車就會停留長一點的時間，整個車程大概45分鍾，不用行，不用跑，就能夠觀賞到世界各地的珍禽異獸。整個小火車的旅程是最開心的，我們一共坐了兩次，在第一個園區，我們看見孔雀，而當我們在第二之入園時，孔雀開屏來迎接我們了。

熊出沒注意，看了兩次，原本牠一見有車來，便會企直向遊客表示歡迎，而在牠的角度下，是人出沒注意，一有人出現，就會企定定係度。另外，我們好想落車，詳細地檢查一下，這熊會否是人扮......

猛獸，有凶猛的老虎，而動物園的保護遊客措施做得好好，老虎的棲息地同行車的馬路是隔有一段小距離的，再者，每一系列動物的園區，都有一度閘間開，以放老虎、獅子、狐狸、狼、豹等山凶猛的野獸去襲擊遊客及其他動物。

下一個園區，是非洲的大草原區，我們看見班馬.... 羚羊.... 仲有長頸鹿.....仲有好多好多，不過篇幅所限，我冇理內放成百幾張相於文中，所以自說到這兒。

另外，沒有入鏡的，就是位於這非洲的大草原區的五間小屋，原來是拍畢《爸爸在那兒》之後，保留作為景的的。更可愛的是，五間小屋的門前，均有主人父子倆的一比一紙板人像來化表進住過這屋。

遊畢野生動物園，我們就去步行參觀的景區，那時候，兒子問，這兒有沒有 Dinosaur 的，我們笑說，而家冇 Dinosaur 架啦，有的話只可以見到佢地既骨頭。不過，真的如小朋友所願，他真的可以見到 Dinosaur...因為園內有這一個《青龍山侏羅紀森林》。經過一段煙霧彌漫的通道，再穿越一個叫做時光隧道的山洞，我們就回到了 "侏羅紀"....

首先，迎接我們的，是一台機器人，這機械人很細心，說園內的恐龍會嚇人，有心臟病，同太年幼的小朋友要小心一點。大人就知道，這園區的東西全部是假，不過非常迫真地，園內所有的恐龍全都會動，並會發出叫聲....

有勇猛的角龍....這一個把我的四歲小兒子嚇到了，他拉著我說......爸爸我好驚呀，我要走呀.....我回說他們不會咬人，也不會食左你落肚，之後他才戰戰兢兢地跟我們走.....後來他意識到是安全的，恐龍是假的才安心地一齊行。之後的有一個不知什麼龍，就真真正正地嚇到人了。若大家記得《侏羅紀公園》那一套電影，這就是一口嘛出毒液，麻痺了那件肥佬之後把其吃掉的那一隻恐龍。這兒的一隻，就會不定時，向經過它的遊人，嘖水.....

我們花了太多時間在恐龍館了，所以我們並沒有遊畢整個園區，而我們慢慢地步行，慢慢地細賞不同的動物，而猴子，永遠是動物員的主角，而途中有一個小型劇場，就是以小猴子為主，表演各式各樣的東西，非常之精靈。

園內另有一個長頸鹿區，是圈養的長頸鹿，牠們特別的溫馴，也特別的親切。另外，可以給大家喂鹿，不過人民幣15元一支樹枝，《長隆》直頭是 profit maximisation!!!!!

因為要在外用餐同等待我們下一個環節《長隆大馬戲》，五點多便要出園了，實在是未玩夠，不過，玩了也有5小時了，是絕等的累，出園上車休息同食晚飯，是必須的，況且，在園內飲食，是很很貴的....

很充實的半天，孩子開心，大人開心，老人也開心，我們一團，三個家庭，合共19人當中有7個小朋友，可是開心。

游畢長隆野生動物園之後，通常團隊為了慳成本、慳時間，當日的晚餐都會叫團友在園內自理。但此團不同，我們5點多集合之後，導遊帶我們回到番禺市區，食晚飯，而晚飯的地點就叫《南崗漁港》。品味的，就是天麻燉鱘龍宴。

這一餐就沒有包箱房招待了，我們就坐在大廳，但一入門口，一個盆滿水溢的擺設，看得出這是風水陣，也知道此店的老闆很著重好兆頭這家野。

這一餐，是鱘龍宴，主角就是造天麻燉鱘龍湯。藥味不重，但有一種很濃的味道，味道鮮甜可口。

群蓮百合腰果丁，這一味小菜，在廣東式的飯宴也可以見到，夠鑊氣，炒得很香，味道又落得足，雖是全蔬，但很是惹味。

脆皮燜鱘龍球，鱘龍魚的肉嫩滑，骨亦不多，魚肉走過油之後再用醬炒，味道香口，魚肉爽脆，而且又不需要像其他淡水魚般要留意細骨，很好。

紅蔥頭走地雞，在廣東食雞，不會不好食，這雞用上了濃濃的醬去蒸煮，豉油同蔥的香味，早已滲入了雞的每一個角落，味道一流。

農家燜飛天鴨，最惹味的部份，不得不說是那一個濃濃香香的醬汁了，單是個醬，已經可以令你增添多幾碗的白米飯，鴨肉也是夠香的，而且肉夠厚，眾人都很欣賞這道菜式。

特式小炒王，小炒，是我們廣州以南一帶的漁村風味特式，把魚幹、蝦幹等爆香再炒菜，就是鮮味十足的小炒王，夠鑊氣去炒，不會不好食，而且是一個又經濟又美味香口的菜式。

荷葉蒸西江魽魚，這魚，食落同鱔魚非常之相似，肉既厚又嫩，再者用荷葉包著去蒸，魚肉多了幾分的荷香，再與豉油作出一個完美的配合，嫩滑鮮香，無得彈。

最後是一個農家大包，包子的確是夠大，但餡很細，不過細得黎，又十分次鮮美，而且包子鬆軟帶甜，這一團多小朋友，所有家長，包括我們，都塞個大包給小孩，塞飽佢。

跟廣東遊的團餐的確是不錯，是日兩餐，均有水準，均有特色，非常之滿足。

在 Tripadvisor 上，原來《長隆國際大馬戲》的評價比起《長隆長隆野生動物世界》更高，說是廣州市排名最高，最多人讚好的景點。當我們遊完動物園之後，晚飯後的《長隆國際大馬戲》表演，我們也是充滿了期待的。

飯後，回到《長隆》這一個樂園，而馬戲的場地沒有動物員般那麼深入，一過了《長隆歡樂世界》的大門口，下一個門口路口，就是馬戲大劇院的位置。

這一個《長隆國際大馬戲》，每隔一段時間就會換一換表演的主題，而是次的主題叫做《魔幻傳奇II》，說起來是會有夢幻感覺的一場表演，而且時近聖誕，這一場表演，也當場會加插一些聖誕的原素啦。

布景，是一流的，隨著時代的變遷，科技的日新月異，馬戲園的佈景、場景，已經可以媲 West End 的音樂劇。而在開場前，LED 銀幕不斷地為是晚的表演者作出介紹，而我發現，這一個《國際大馬戲》的演員陣容，的確是很國際。

場地，是半露天的，我們在冬天來，的確是要包住件大褸，而且表演的台夠大，令我們相信，這將會是一個精彩的表演。始了，所有表演人員盛裝繞場一周，像一個嘉年華會似的，員工向觀眾揮手及拋出小禮物，可是我們沒有加錢坐 VIP 區，要有禮物，等運到吧....

表演真正地開始，慣例就是由小醜們負責開場，而當中也因為聖誕而增添了一個很可愛，而且又很搞笑的聖誕老人，不過派禮物同互動....肯買貴飛咪有囉....

這些表演，配合了燈光同特殊效果，說真，的確是有West End 舞台的感覺，有煙火，有水，當中有一些有煙火效果的表演，沒有嚇到我小兒，但這一場 show 實在令他驚訝萬分。

馬戲，當然有馬術的表演，演員在馬鞍上做出了多種高難度的動作，令全場指爛手掌。其實是有故事連串的，不過我們的 focus 都著重在表演多於故事，不過，檯上的兩隻大獅子也挺舒服的，坐定定係度、乜都唔駛做，直至個馬術表演完畢。

馬戲團，有動物表演之餘，當然有空中飛人啦，這是最最最傳統的馬戲表演，完全沒有半秒鐘的冷場。換幕換得很快，表演台在換裝置，一下子就讓觀眾的眼光轉到空中或者是台邊，這一個空中跳舞的表演，換來了不少的掌聲。在空中的表演，既高難度又危險度很高，而且因為要自由地舞動身體，我看不到他們有使用任何安全措施。

做過場，梗有小醜同小動物的出現，的確是令半秘鐘都不會悶下來。小醜同小動物走了之後，就有傳統的大象表演，動作雖然很簡單，但也是令人拍掌叫好的。棕熊表演，都是簡單地叫他們推下車，拉下車，及用兩隻腳直立跑，表演簡單而帶點搞笑，令觀眾的笑聱不絕。

又是間場的時間，聖誕老人來了，在台邊，坐在車上，不停地向觀眾拋禮物，所以全場人都站起來，攞到隻公仔也是開心的。伴隨的，是聖誕嘉年華，所有團員的盛裝，比起之前開場的那一次巡遊，更盛裝，更華麗。

雜技，跳躍，依然是馬戲團的主力，之後是一段配合了水幕的空中舞表演。再之段，有雜技跳水，但當時的我看得太緊張了，沒有為跳水同電單車的表演拍照。不過，當中我最欣賞的，是這一個摩天輪的表演，表演者的平衡力一定要好好，當中位於最下面的隊長，搞笑地做出了非常多令人驚心動魄的高難度動作，嚇了一嚇大家之後，就是一連串的掌聲。

兩個多小時的表演，始終都要終結，很快，也到了謝幕的時間了，全體的表演人員向觀眾道謝後，大家也興盡而歸了。

Tripadvisor 評此為廣州最受歡迎的旅遊景點，的確是實至名歸的，我太太本來很抗拒看馬戲的，因為通常都有好多動物的臭味，同只是一些簡單的嘉年華音樂，加上動物跳火圈而已。

現今的馬戲，尤其是《長隆》的這一個馬戲，從舞台、燈光、音樂、表演的多元化等等，令大家對小時候看馬戲團表演的童年感覺，是大大的不同。是晚，大人小朋友都盡興而回...

18/04/2014  由於要搭9:05早機到昆明, 我哋要搭最早嘅機場巴士出發, 因為Hong Kong Express 不可在網上做check in, 但可以提早3小時在機場做mark 位check in。Hong Kong Express 其實要改善下喇, 基本上大部份嘅航空公司都可以做網上check in, 咁樣競爭性就會弱好多囉, 希望佢哋快D upgrate 其電腦系統啦! 方便好多架!

好彩, Hong Kong Express算係準時起飛，但就要喺跑道等咗40分鐘至起飛，到達昆明係11:45; 昆明長水機場係新機場，有機場巴士及地鐵(地鐵暫時只能到達東部汽車站，要待昆明地鐵正式通車後，來往機場嘅交通就會更方便)到市區，內部有多間食肆及免稅店，配套算完善，機場巴士叫「空港快線」，有多條路線來往市區，我哋因為要寄存行李，所以我哋選搭空港快線2號線到昆明火車站，每位人民幣25元，如去昆明火車站落車，車會在錦江酒店停，乘客再向火車站方向行5分鐘便可。

在長水機場， 一出閘，已有很多旅行社的男女職員向各旅客問是否要車、參團否、買了火車票......等，非常煩厭，我一路都不理睬佢哋，但另一半就同佢哋講價坐車到市區，佢哋起初會用好平嘅價去吸引旅客坐佢哋嘅車，然後就會遊說旅客參團包車等，我已同另一半不用理會他們，可惜佢依然被他們緊盯住而"落搭"，仲話二十元人仔可車我哋去昆明火車站...... 唉! 我就即管睇呢班人攪咩嘢!

起初佢帶我哋到樓下停車場話攞車，在一路落停車場其間，不停遊說我參加佢哋嘅麗江團，又叫我包佢哋架車一天在昆明到處遊，又話幫我在麗江訂旅館等等....... 我一一推佢我已全部攪掂，不用他操心，我亦坦白同佢講我只想去火車站，不用佢哋嘅旅遊產品喇，佢見我企硬不動容，佢就婉轉咁推我不如坐空港快線, 因佢哋仲要等其他人云云...... 好囉，等另一半知道呢班人係想點，好彩佢哋都冇咩威逼利誘我哋，只係浪費咗D時間，我馬上上返樓上空港快線坐2號線去火車站，真幸運係一上車就即刻開車，算係順利了。

上到空航快線，車上服務員同我哋講不用到火車站寄存行李的，叫我哋在第二個站的泰麗酒店落車，哪處有好多店子可寄存行李喎，而且較方便行街添，咦....攪到我一頭霧水呀!

最後我哋信咗服務員所講落車，不過我哋搵唔到寄存行李嘅店子，我哋走咗去泰麗酒店寄存行李，酒店方面好好，我哋冇喺處住都可以免費寄存，而大堂經理知道我哋第一次嚟昆明，仲教我哋點様搭車去南屏路添，真好呀！錯有錯著呢！ So Lucky!

泰麗酒店經理教我哋出咗酒店轉左，直走見紅綠燈便過馬路，再向左方向走150米，就會見到公交車站，就在此站等5號巴士，約6至7個站左右，南屏街口落車便可。

就在南屏街口下車，約走5分鐘就到步行街， 由於已是2:30，大家個肚都在打鼓，於是就在此處搵食。

原來昆明市好多餐廳都會在下午2:00後收市，最後在百大新天地(昆明市中心的一個大型商場)內8樓搵到呢間荷叶香閤餐廳，主要食function， 中西合壁，可惜佢哋做到不三不四呢!

餐廳在商場的8樓， 呢個百大新天地係行中產路線, 唔係低價貨商場，所以場內的餐廳亦是走中檔路線，裝修亦唔差，原本在6樓揀咗兩間餐廳，一間食泰菜， 一間食韓食, 但全部都收市，只有8樓呢間餐廳全天候營業，見佢食品種類繁多， 本餐牌印刷又精美，亦比佢嘅相中食物吸引， 所以就入咗去囉!

我哋真係好肚餓，見價錢亦唔係太貴，於是大家都點咗多款相中非常吸引嘅菜餚喇，評價如下:

1) 手拍青瓜，6元人仔， 地道菜， 所以有水準，味道好，青瓜脆，就因為第一道送嚟嘅菜，所以咪有期待囉;

2) 金槍魚茸野菜卷，21元人仔， 類似西方的沙律卷，千島汁，裡面有好多菜，入口清新， 沙律+菜+少少吞拿魚肉，唔錯;

3) 蒜泥白肉，19元人仔，地道菜，有水準，我哋叫少辣，味道好，肉不膩及爽脆，好食;

4) XO 醬炒飯，16元人仔，熱辣辣，飯亦辣辣辣，好香口，冇選錯;

5) 野菌肉醬撈面，26元人仔，本身野菌肉醬味道唔錯，又唔辣，可惜麵條煮過火大軟，就咁失分;

6) 意大利黑醋燒軟排，29元人仔，佢想做到中西合壁，不過失敗咗，肉排被醋汁醃到太酸，又唔似中式嘅鎮江肉排，而黑醋又太多，調味不好，真係不倫不類，同餐牌張完全不一樣;

7) 楊枝金露，16元人仔，餐牌相中好吸引，但嚟到就係兩回事，芒果顏色係淺黃色，芒果好少， 而且有少少酸，又冇柚子，甜味主要來自人工芒果汁，期望越大，失望越大;

8) 凍荷香金桔特飲，15元人仔，金桔味唔夠，只可說可以解渴;

9) 蘆薈桂花雪梨蜜，9元人仔，竟然比7) 及8)好飲好多，桂花好香，雪梨係切粒粒，蘆薈就唔多，算係咁，幾滋潤；

10）姬蟲茸竹笙炖湯，10元一盅，見唔到有姬蟲茸，内裡有幾種菇同竹笙，第一啖飲落去，唔係有正常飲湯味，而係好似飲緊番梘水，有浸番梘香味，所以我哋全部退回。

以上全單一共173元，雖然唔算好貴，食品一半ok，一半唔得算打和啦！唔係太差就算吧！

食完飯, 已是下午四點了, 原本打算去翠湖公園睇吓海鷗, 另一半同港童就話留在南屏街走走, 都係唔去了。

漫無目的咁行，南屏步行街其實都係同中國其他步行街一様，冇咩分別，但當轉入正義路，感覺就完全唔同， 一條古代小街就在眼前， 雙腳就跟住古代小街走入去。

原來呢條小街叫景星街，裡面有一座古老嘅庭院，叫馬家大院，係二十年代三合院設計，已成保護文物，又係民初劇外景拍攝場地，眼見大門口售賣玉器，大院裡就賣茶葉，應該睇嚟就唔似有人住喇。

由馬家大院出嚟，繼續沿景星里走，兩旁都係小攤檔，全賣遊客喜歡的手工藝、玉器、茶葉、小飾物等⋯⋯沿路亦順道去埋昆明出名嘅花鳥市場。

其實由南屏街轉入景星里，再出正義路，所有街鋪售賣嘅貨品，新舊交替，平中高檔，比比皆是，琳琅滿目，大家都能和諧共融。

 

行到熱熱地, 想起今晚冇得沖涼, 靈機一動, 不如搵間有得沖涼嘅按摩中心鬆一鬆啦!

左睇睇、右睇睇，周圍望 ，問行人，幾位行人都叫我哋一路沿正義路行，見到牌坊就會搵到云云，行到牌坊，見兩排都有一列盲人著住白袍，企在路邊同人按摩，吓！喺路邊按，我想沖涼後，在有私隱度的舒服地方按摩喎！

而朋友就急不及待走去問價，又去問按摩中嘅客人按後感等等，然後二話不説，搵啱盲人師父就按，朋友話D客人都話得，咪試吓囉，好唔好都係廿元一part，啱咪揼多part，唔啱咪走囉，見佢咁講，我都加入埋一份，另一半同港童就話唔慣當街當巷按摩，所以佢吔揀咗繼續行街。

我就㨂咗位盲人阿姨，可能係佢件白袍夠乾淨吧！起首佢先按頭部，約5分鐘，然後按肩膀，因我較累，佢約按了8分鐘，跟住就係背及手，真係好到位，都可以一解我燃眉之累話咁快廿分鐘就過，見朋友仲揼緊，我都encore 多一part，如果有得沖埋涼，瞓喺張按摩床上按多個半鐘，仲正啊！

揼完骨, 又買完手信, 我哋就行入金馬碧雞坊旁邊尋食喇!

我哋走咗入去金馬碧雞坊旁，周圍亦有好多小檔賣小飾物及食肆，行咗個圈，見呢間酒樓幾多人，個名又幾攪笑，宣威「杀豬」飯酒樓，「杀豬」？原來呢間酒樓係專門食宣威火腿，金華火腿就食得多，宣威火腿就未食過，不如就試試啦！

酒樓裝修一般，好平民式，我哋被安排響樓上一間房坐， 1房4張4人枱，我吔㨂近窗口位置，比較通風，因當日天氣都幾熱，室內係冇冷氣。

講番菜式，我哋點咗宣威火腿脾肉位例牌， 雜菌氣鍋、兩個青菜、苦瓜炒蛋，最好味係首兩味。

宣威火腿脾肉肉質嫰滑，唔喺太䶢，好甘香，好好食啊！

雜菌氣鍋，冇洗潔精味，裡面有幾種菌類及木耳，有龍骨在內，湯味清香，大家都喜歡。

最後埋單都係176元，價廉物美。 

由於2014年3月1日發生咗昆明火車站維族人亂斬人事件，曾經忐忑是否應継續原本嘅計畫，但最後都係保持原有計畫，因為較慳時間，容易多去幾個地方遊覽。

我托朋友在4月6日喺深圳先買去程票（昆明至麗江，車次K9614 22：35開），再在4月12日買埋回程票（麗江至昆明，車次K9620 21：28），兩程車都係約9小時左右。

** 溫馨提示

如在攜程網訂火車票，可在出發日前20日訂票，但親臨火車站或火車售票點買票，就要在出發前15日至可買到票，火車售票點要每張票加5元手續費，另要出示回鄉証副本。

晚上嘅昆明火車站，燈火通明，警車不停巡查，紅藍燈隨處可見。喺入口處，有關卡檢查車票，核對票上持票者身份証，跟住所有嘅行李要放進X-Ray，包括小手袋、小腰包，通通都要查，都幾嚴呀！ 

** 溫馨提示

行李放上X Ray 前，最好用膠袋包好大包小包，因架X Ray 非常污糟。

我哋喺乘22:35 K9614/K9615班次，由昆明出發至麗江(終站)嘅軟卧火車，全程行車9小時10分鐘，我哋一共四人，所以順理成章要到一間房，不須有陌生人同房。呢架車有兩層，仲好新淨，原來兩層高嘅車箱，多咗一排三人房，房內係一大床及一吊床，空間比四人房細，亦是一樣軟卧價226元人民幣，上車如有空房或空床，可直接跟車上服務員詢問轉房，網上暫時冇得賣，但可到火車站或售票點查詢出發班次是否雙層車。

過年前(24/01/2014) 見到Booking.com呢間民宿做promote, 由人仔376元減至188元, 即刻訂咗三間房, 其中一間是幫朋友預訂的。

19/04/2014早上, 一早已電郵民宿老闆替我哋訂車由麗江火車站到其客棧, 一趟40元人仔, 直接比司機; 我亦提醒老闆我哋嘅名字, 叫佢帶人名牌接我哋, 但佢冇同司機講, 只企响火車站旁的停車場等我哋出嚟。 唉! 當時真係幾徬徨, 火車站出站的人已散, 只剩我哋, 我哋又冇大陸手提, 周圍搵公共電話, 但服務員話整個火車站都冇提供公共電話, 好彩出門遇貴人, 有位年青人剛買完火車票走出車站, 見我嘅情景, 佢非常好心借其手電比我致電民宿老闆, 最後終於揾到司機, 真係非常多謝呢位年青人, 佢仲叮囑我小心麗江旅遊陷阱, 提醒我哋街上的旅行社用好平嘅價錢吸引遊客參團, 其實好多附加費用, 計埋仲貴過實際嘅市場價等等..... 我在網上亦見過佢所講嘅資訊, 所以亦非常多謝佢嘅提醒。

講番客棧, 同網站所述一樣, 非常對板, 客棧設計優雅古典, 共有十間房, 每間房都有自家名稱, 我哋共兩晚分別住咗佢哋五間房:

花忽夢 : 房間喺二樓, 有小木欄圍繞, 有吊藍喺門口，圍成一角，私穏隱度好高，房內最觸目嘅，就係張圓床，可惜好睇唔好用，張床直徑太短了，眼量就唔過1.75厘米，我同另一半都凸腳囉，成晚都瞓得唔好，所以我要求老闆小劉同我換過另一房。我相信佢亦知圓床既問題，後來換過二樓另一大床房。

花靜好 : 房間亦在二樓, 有30平米大, 設計好書卷味, 有一張古雅嘅長椅及枱, 房間中央有一6呎古式大床, 而且此房光線充足, 窗又大, 呢間嘅房價比其他貴80至100元左右。原本老闆係換呢間房比我, 但我另一朋友一家三口原住地下另一榻榻米房 - 花亦尋, 所以我把房轉讓比佢哋, 佢哋反映房間晚上好靜, 床好舒服, 一家三口瞓6呎床非常夠。

花相悅 : 由於我讓了「花靜好」比朋友, 小劉就轉給了二樓另一大床房 - 花相悅, 房間面積比以上兩間房較細, 但足夠, 一樣有小梳化同茶几, 可惜係開窗不方便, 因為門及窗外就係對住走廊, 睡覺為有關門關窗, 開著浴室嘅抽氣扇, 另此房有玻璃天窗, 可瞓在床上看星星, 有窗簾, 早上不怕陽光照入。

花忽夢 : 港童和朋友住呢間，係客棧唯一嘅雙床房，陳設大致跟「花相悅」差唔多，床同枕頭適中，唯一係晚上頗嘈吵，因此房係位於接待處旁，亦係所有住客必經之處，所以較吵。

花亦尋 : 是榻榻米床，我另一朋友一家三口住，大致亦不錯，但亦同「花忽夢」一樣較吵，此房係响「花忽夢」隔離，亦是所有住客必經處，所以朋友話太吵而轉房。

另以上房間內的浴室潔凈, 有沐浴露及洗頭水供應, 牌子係威露士, OK嘅, 但冇護髮素, 冷熱水水壓暢順, 冇斷水情況。

 

暖花居除咗房間好 "得"外, 老板小劉及其太太小羽亦好"幫忙" 呢!

但仍有些少投訴，佢倆唔多願覆電郵，由其是email問佢哋去香格里拉行程及包團安排，佢哋只覆一次，後來小劉解釋話行程安排可到達麗江至攪都唔遲喎！所以咪唔覆我囉！我明白佢嘅意思，但都應該覆我一次告之麻

不過經過正面接觸，小劉真係好盡責，雖然喺麗江火車站擺了烏龍，差點接晤到我哋，佢亦親自在客棧對出路口接我哋；另我房嘅大圓床唔夠長，唔夠我哋瞓，佢亦馬上幫我換房；佢亦幫忙為我安排出遊香格里拉，搵佢朋友扎西帶我哋去玩，雖然行程唔係我心中所想，但都ok啦！

暖花居老闆小劉帶我哋去食麗江嘅第一餐 - 食早餐也。

其實另一半見到呢間餐廳，唔係好想喺處食，但見到唔多早餐店開，"是但"啦! 又近民宿，食碗熱嘢暖吓肚先仲好過。

餐廳門口有個黑板，上面寫住10元自助早餐，包括有白粥、油條、小饅頭及涼菜，另一半試咗呢個，佢既comment係除咗白粥有少少暖外，其餘都係凍冰冰，硬掘掘，唔得。

我就叫咗碗雞肉米線，米線算多及大碗， 但雞肉碎濕濕，都食唔到鷄肉嘅質感，咁孤寒，又係唔得囉，所以我哋冇再幫襯。

今次嚟麗江, 參考咗TripAdvisor嘅麗江食店排名去嘗美食, 我真係專程由五一街行去玉緣路, 雖然路程頗遠, 好在麗江古城店舖多, 行吓睇吓, 經過完大水車, 向黑龍潭公園方向走多5分鐘就到。

可能已過兩點, 咖啡店人不多, 老闆都坐喺門口嘅梳化同人傾計, 見我哋入嚟就馬上招呼。我哋揀咗二樓坐低, 港童即刻睇餐牌揀嘢食, 先嚟飲品, 芒果奶昔, 好好飲呀! 好香嘅芒果味! 熱辣辣嘅Latte, 又係好正, 咖啡香濃, Mocha, 賣相好靚, 起初味道適中, 但飲到中段就較甜。

主菜就聽咗老闆娘嘅介紹, 佢係正宗印度人, 個樣一D都唔似印度人, 而且又識講普通話, 真係以為係自已人呢! 老闆娘幫我哋叫咗瑪婭印度咖哩雞, 唔辣帶甜, 同在香港嘅印度咖哩味道截然不同, 老闆娘就話佢印度家鄉喺咁煮, 印度咖哩都有好多種類, 所以都會有唔同, 另外所叫嘅牛肉咖哩又唔同味, 呢個有些少辣, 但唔過份, 咖哩汁比牛肉更好味, 附有的印度沙律可沖淡吓咖哩嘅濃味, 好得呀!

港童同另一半就非常欣賞瑪婭雜錦薄餅, 又多料, 又大個, 又好味, 除清邁Duck's那個海鮮薄餅令佢哋回味外, 呢個Pizza真係令佢哋一試難忘。

甜品我哋叫咗一件New York Cheese Cake, 都幾大件, 30元, 港童同另一半比較喜歡, 我就略覺甜咗D, 但芝士味好濃, 用料的確十足。

果然在TripAdvisor高居第一位, 值得推薦

由Maya Cafe' 轉右一直走約十幾分鐘就到黑龍潭公園，門口跟一般國內嘅公園冇咩分別，而且不斷見到好多國內旅行團出出入入，人頭擁擁，而門票要80元人仔，嘩！巧貴囉！在猶豫好唔好入去，就有幾位阿姨走埋嚟，開價30元入去，我哋冇理佢，跟住佢再開20元，就即刻帶我哋入公園。

原來幾位阿姨帶我哋走「後門」，一路靜靜走，佢哋就四周望實有冇公園管理員，最後爬落公園後面的小溪，直至走到公園𥚃，再爬上公園內的小路就成功。當然此做法係相當不好，我決定以後有幾「荀」都不再嘗試，始終都係壞榜樣吧！

黑龍潭公園嘅主要亮點，就係黑龍潭中的自然湧泉泡出來的奇景。好幸運，我哋能睇到，而且此景亦是公園內唯一最有睇頭，除此之外，一切與其他公園冇分別。不過黑龍潭當然屬於華麗版的公園，特別係廁所呢！

所以，個人認為如要比80元人仔入公園, 係非常唔值嘅, 可以唔入去囉。

PS

1) 如比咗麗江古城維古費80元, 可憑該收據免費入公園。

2) 民宿老闆説湧泉係假的，因為人為破壞大自然，令湧泉唔係常出現，只係政府為保旅遊業，就會泵水進潭中，形成湧泉。 噢！原來係咁.......

午餐食咗外國菜, 晚餐就食番中菜, 不如就試吓納西菜啦!

出發前，參考咗TripAdvictor上麗江古城食肆排名，石破天江湖莱館排名亦在前十名，而且亦在當旺的五一街，食完方便打度回府。

點菜篇: 

1) 野生菌雞煲, 48元, 唔太大煲, 但夠食, 雞味尚濃而野菌鮮甜, OK;

) 過江茄龍, 30元, 好大一條茄子, 切成龍形, 把茄子炸後, 再加酸汁淋面, 樣好靚, 不過實在太多油, 真係食到成口油, 唔推薦;

3) 西紅柿牛肉, 48元, 好穩陣嘅配搭, 當然係有穩陣嘅味道, 牛腩鬆軟及有濃濃嘅牛肉味, 唔錯;

4) 炒白菜, 16元, 係小白菜, 好清甜;

5) 水性楊花, 22元, 估唔到最好味係佢, 平平冇奇嘅菜, 竟然隱藏住美味無窮; 水性楊花真係呢種菜嘅名字, 係當地所種植嘅菜種, 菜味香甜又冇臭草味, 一碟清哂。

最後埋單係164元, 好抵食呀!



 

食完晚飯, 就慢慢行返客棧, 晚上的五一街越夜越多人行, 經過一間叫丁丁酸奶的餐廳, 主要係賣酸奶, 鮮奶麵包等, 一於入去食甜品。

我哋叫咗芒果及士多啤梨＋酸奶布丁各一，另外又叫了一客鮮奶麵包。

芒果＋ 酸奶布丁：芒果新鮮，仲好甜，當然要睇季節，而酸奶布丁係原味，賣相似軟雪糕，混合一齊食，甜酸合一，好好味呀！

士多啤梨＋酸奶布丁：同樣士多啤梨新鮮又夠甜，唔同平時食士多啤梨味酸奶，酸味加「糖」味，好假，食呢個就新鮮無比。

鮮奶朱古力麵包同香港食嘅分別唔大，但包型較大，唔似香港嗰D中間空心，面頭有塊朱古力, 有D似菠蘿包那塊皮一樣, 食食吓會掉落嚟! 食落都算飽肚，味道同我哋平時食嘅差晤多，而且夠鬆軟，最好係熱辣辣麻。

20/04/2014，一早起床準備check out出發去香格里拉，小劉已幫我哋約咗佢嘅朋友導遊扎西9:30嚟接我哋，執好嘢，7:45就出去食早餐。

港童同另一半都想食西式早餐，所以決定沿五一街搵吓有冇西餐廳開咗，約行咗5分鐘，終於搵到喇！

紫藤花園客棧，一間唔係太起眼嘅民宿，係由一間民宅改成，如果唔係見到張白紙寫住「coffee」貼喺個窗處，行過都唔知餐廳喺對外開放。

入門口左轉，就係用餐區，馬上睇吓有乜食，我吔點咗全早餐及一份麥皮。全早餐好豐富，有兩隻大荷包蛋、3片煙肉、兩片大方包，煮呢個早餐根本係冇難度，將所有材料煎煮同方包烘底，只要全部唔過火就得，味道相當穩陣，食完一定飽；不過話係全早餐，但唔包餐茶架！咖啡或茶要另計嘅。

另麥皮一大碗，12元人仔仲係用中式中型湯碗盛載，明副其實中西合壁，味道同阿媽煮嘅差唔多，唔太甜，但麥嘅成份頗多，又有香蕉再加蜜糖, 係呢碗麥皮甜味主線, 所以又係飽肚之選。

喺麗江住期間, 都係喺呢度食早餐。

8：30am 我哋準時返到客棧，西藏導遊扎西馬上把我哋嘅行李放上佢架銀色8人私家車，然後出發去第一個景點 - 長江第一灣。

其實今次嘅香格里拉兩天遊安排唔係我心中所想，我一直屬意麗江論壇魚頭嘅行程，因為上次去陽朔都係搵佢嘅朋友幫手, 而且我亦介紹了魚頭給我幾位朋友, 朋友話魚頭好盡責, 安排麗江周邊旅遊到位, 可惜魚頭唔肯接我呢單生意，我諗係我唔係住佢間民宿有關係，魚頭嘅兩天香格理拉行程係如下：

第1天 ： 8：00 am 出發 ＞ 拉市海 ＞ 坐船及自費騎馬 ＞ 虎跳峽 ＞ 自費午餐 ＞ 香格里拉 ＞ 獨克宗古城 〉自由活動 ＞ 自費晚餐＞ 包住三星商務酒店 （可自費參觀松贊林寺每人120元）

第2天 ： 普達措國家公園 ＞ 回程麗江 ＞ 旁晚到達麗江

全程乘私人四驅車, 一定要四人同行, 費用係850元／人

而西藏導遊扎西嘅行程如下：

第1天 ： 8：30 am 出發 ＞ 長江第一灣 ＞ 虎跳峽 ＞ 自費午餐  ＞ 香格里拉 ＞ 藏族歌舞表演 ＞自費晚餐 ＞ 宿獨克宗古城民宿 （開心時光客棧）

第2天 ： 8：30 am 出發 ＞ 普達措國家公園 ＞ 回程麗江 ＞ 旁晚到麗江

全程乘扎西私人7人車, 最好5人同行, 留番一個位擺行李, 現費用係900元/人 (5至6人有得再平D)。

以上都係私人包團嘅行程，司機就係導遊，全程唔包餐，亦不須請導遊食，費用包括門票丶車丶路費及住宿，唔須要比小費，如自家想比亦可。如想去行程不包嘅景點，可同導遊再商量，順路的話都會帶，但門票要自理。

扎西係藏族人，廿多歲，高大健壯，在昆明大學畢業，能講字正腔圓嘅普通話，家住香格里拉，佢主要係接私人團，整個雲南省及西藏旅遊都可搵佢，可用微信接洽佢以上地點嘅行程安排。

喺麗江古城內, 有好多旅行社小店辦麗江周邊地方嘅旅行團, 有大班團, 亦有私人包團, 費用參差; 由於在網評好壞參半, 所以我完全冇考慮呢D旅行社, 我一路都係參考攜程網嘅local tour, 而攜程商譽亦較好, 佢哋有D團都幾抵, 我亦安排了我另外同行嘅朋友參加玉龍雪山一天遊, 690元一人, 包旅遊巴酒店接送, 午餐及水, 入場費, 索道費, 朋友参團後嘅評語話係只要唔介意與同胞同行同食, 就會覺得冇問題。

講番長江第一灣，只係帶到一個高點觀景台遠眺，並唔係落到長江第一灣。事實上，真係要喺高位至睇到實景，如低地平望，係完全睇唔到第一灣。

除可遠眺俯瞰長江第一灣外，仲可仰望哈巴雪山，可惜當日天色較朦，睇得唔太清楚，不過唔緊要，去香格里拉途中仍可欣賞到。

嚟到第二個景點, 亦是其中的重點景區 - 虎跳峽

經導遊扎西介紹, 虎跳峽分為上虎跳, 中虎跳及下虎跳峽, 我哋只會到上虎跳遊覽, 行麗江區那邊, 因為時間關係, 中下虎跳都不會去。

上虎跳峽主要分為兩個景區, 麗江縣嘅上虎跳同香格里拉縣嘅上虎跳, 其實係以金沙江作分界, 在麗江縣上虎跳對岸就係香格里拉縣嘅上虎跳, 大家在岸邊都有隻老虎狀似跳躍對岸嘅石像。

麗江縣嘅上虎跳位於金沙江玉龍雪出腳下, 在景區入口行至虎跳峽景區約走2公里, 沿途係棧道, 當中有幾個山洞,山洞清涼無比, 一路都係平路, 行得相當舒服, 如覺累亦可坐轎 160元一人一程; 只係到達虎跳峽風景區, 要落約幾十級樓梯, 總計上落都不用100級樓梯, 所以較適合唔想行長梯級嘅人士。

至於香格里拉縣嘅虎跳峽, 呢邊嘅觀景台設計較新穎, 而車輛可直接停在虎跳峽觀景台處, 所以大部份嘅旅行團都會在此觀虎跳峽, 但就要走落約100米的石級, 睇完亦要走上番100米石級至可上車, 我在對岸見到嗰排100米石級都滴哂汗, 上落100米石級都幾攞命架。

起初嘅1公里多, 金沙江十分平靜, 河水碧綠, 完全感覺唔到虎跳峽嘅氣勢, 直至到了觀景台入口, 沿路落石級, 就聽到河水澎湃洶湧嘅聲音, 落到觀景台, 嘩! 激流水花淺入欄杆, 好勁呀! 果然名不虛傳, 不枉行咗2公里多加埋幾十級石級, 值啊!

今次係我旅遊生涯中，第一次入咗黑店食飯，真係第一次「黑店經歷」。

遊覽完虎跳峽，已經係兩點多，導遊扎西就車咗我哋去一間路邊中餐廳，遠離虎跳峽風景區，但仍然係沿金沙江岸邊。 

夢里灣食府冇豪華裝修，冇優質嘅服務，亦冇美味嘅菜餚，但就有既高昂又神秘嘅收費。

食府冇餐牌， 伙計帶我哋去雪櫃旁自行選擇食物材料烹調，所有肉類，素菜類及河鮮等，就放在客人面前自行挑選，材料算是新鮮，而食府伙計猛力推薦河鮮，問價錢多少，佢哋只講 「很便宜」「放心吧」，完全唔講價錢，好彩我唔係太鍾情食河鮮，如果唔係就比佢哋 「劏」得一地血.......

由於當日天氣炎熱乾燥，大家都唔想食得太重口味，所以只挑了以菜為主的食材，而肉類係伙計話加的，說是用來調味，只加少少，反正肉顃係配角, 所以我亦冇問價錢, 諗住貴得幾多吖.....最多都係150元人民幣左右埋單，點知唔係囉......

茶樹菇炒西椒，細細碟，一D肉都冇，只係清炒，味道好清甜，菇同椒幾新鮮，係3個餸中最得我哋歡心，全部食哂。雖然較合我哋口味，但呢碟菜完全唔值68元，食府屈我哋有肉炒，但根本就冇肉，佢哋仲好惡話我哋食哂至話冇肉，但我有相為証，但佢哋仍然硬要收呢個價。

肉片炒紅西椒，味道亦唔差，但油較多，冇食哂, 68元人民幣, 因為有肉炒, 所以較貴。

醃肉炒樹芽，初時選材料時唔知樹芽係乜嘢，伙計話好食，咪試吓囉! 點知係..... 樹芽含有好重嘅草青味, 仲有D苦;  醃肉係好似臘肉, 唔特別, 但唔難食, 因只得幾小片, 醃肉size同成人手指甲(食指)大小差唔多, 整個菜唔係難食嘅, 係我哋食唔慣啫...... 係48元人仔。

蕃茄蛋花湯, 係一個非常普通嘅即滾湯, 毫冇難度, 味道穩陣, 佢哋收28元, 但麗江古城D菜館大致都係10元至20元之間，當然係同級食店啦！

找數時當然非常驚訝，我哋完全冇諗過會超過180元人民幣，竟然要224元找數，咁普通又平凡嘅餸菜，而且仲係細細碟；相對昨日在麗江古城石破天，兩肉三菜，又大碟過佢吔，都係收164元咋，明屈啦！ 佢哋嘅回應係地處山區及偏遠，物價會較貴等籍口，但我見佢地在江邊種莱攞河鮮，唔係所有食材都由外面供應，而且佢哋根本自由向客人開價，客人完全冇反抗能力。

我當然要據理力爭, 導遊扎西見我哋同侍應氣氛不大對勁, 過來調解 (當時扎西係坐在菜館外的枱吃零食), 我哋堅持茶樹菇嗰碟冇肉片, 如果硬要比224元, 我會報公安, 侍應商量完後, 答應200元埋單, 我見時間都不早, 佢哋係地頭虫, 唔想再耽誤, 所以比了200元了事, 點知.......

一比完錢, 成班侍應就變得兇神惡剎, 特別有一男一女嘅侍應, 竟然陏手推撞我哋, 更甚是想用拳頭解決佢哋啖氣, 扎西馬上把我哋同侍應隔開, 叫我哋即刻上車, 佢就攔住那一男一女, 我當時未及時間拍下呢兩個人嘅相, 所以未能放上網給大家參考, 扎西亦馬上開車離開。

上車後, 扎西馬上同我哋道歉同解釋在虎跳峽及金沙江一帶因係遊客區, 所以飯店相對較麗江古城貴好多, 佢話呢間已經唔算太過份, 但亦同我哋講剛才那幾碟餸的確份量很細, 亦真係唔合理, 不過都冇辦法, 周圍都係咁開價云云.....

我哋亦明白, 整個中國嘅遊客區都係以劏遊客而出名, 出入公園或各大景點要比高昂嘅入場費, 食飯要驚比人劏, 甚至比人打, 現在嘅中國就係因為咁, 令我已卻步不少, 中國美好山河美景通通都放在"錢字頭上一把刀",  唉!  中國地方政府幾時可以唔好咁貪腐呢?

在網上已睇過此表演嘅評價，主要正負面都有，如參團（大陸團）嚟香格里拉，當然會安排此行程，大陸網多數話遊客唔加錢食羊或雞，或買紀念品，會被導遊遺棄喺荒山公路等，真恐怖啊！

而導遊扎西 就同我哋講絕冇此情況會喺我哋處發生，其實我喺唔想去，但扎西話此歌舞表演可令遊客更了解藏族人的文化, 誠意我哋去睇睇, 如中途覺悶, 可馬上叫歌舞團嘅工作人員call佢接番我哋, 所以至答應睇藏族歌舞。

到達藏家, 門口已企咗幾位中年男子迎接每位賓客, 先幫客人戴上白色哈達, 再奉上一杯水酒, 中年男子要客人干杯, 唔干係冇禮貌喎! 我就唔怕飲酒, 至怕個杯用完又用, 至慘係另一半一向滴酒不沾, 今次難為咗佢啊!

我哋講明唔幫襯加料美食, 所以被安排坐第三行坐位, 前兩排係比國內旅行團包咗, 坐位嘅枱上已放咗幾碟小食及酥油茶材料, 客人一坐低, 工作人員會馬上沖熱水在壺內, 然後教客人加上枱面嘅酥油茶材料沖水即飲, 哎呀! 咪攪我, 以前喺九寨溝都試過, 超難飲, 但朋友就飲咗一啖, 佢話唔難飲, 不過就唔啱我哋口味喎!  真廢話呀!

歌舞表演前, 前排嘅國內團就獲分派到加料美食 - 烤羊及烤雞, 雖然幾香, 嗰樣都唔差, 但對羊完全冇興趣嘅我, 一D都唔吸引呢!

攪咗差唔多個幾鐘, 歌舞先至開始, 一班舞蹈員圍圈又轉又跳, 另一舞蹈員就用唔係太純正嘅普通話作旁白, 又講笑話, 見國內強人好多都識笑又投入, 但我哋就完全唔識笑, 連自認普通話唔錯嘅港童, 都話聽唔明, 啊.......

睇咗半個鐘, 最精彩嘅係作旁白嘅舞蹈員放低支咪高峰, 走到中間位置, 跟隨藏音樂, 極速自轉咗幾分鐘, 然後打咗幾個後空翻, 係呢個情節令到我突然醒神, 不過我亦馬上叫工作人員幫我call扎西嚟接我哋, 由於室內人多, 又多人抽煙, 空氣實在混濁, 我哋都走咗出屋外吸吸新鮮空氣。

而太陽已落, 香格里拉果然比麗江嘅溫度低好多, 麗江入夜都有18至20度, 但當日香格里拉剛入夜時應只有11至12度左右, 都幾寒呀!

等咗15分鐘, 扎西嚟喇, 扎西問我哋看後感, 我哋當然唔可以講唔啱睇啦, 只推說聽唔明, 笑唔出囉! 扎西後來話連佢都聽唔明, 更何況我哋喎!

真後悔去咗睇藏族表演, 浪費咗我兩個鐘, 令我未能去到龜山公園睇夜景.....

已是7點半, 天氣又冷又乾燥, 係時候坐低食嘢喇!

由於獨克宗古城燒咗一大半, 令原本好旺嘅四方街變得好肅條, 扎西就載到我哋較近民宿, 又較多食肆嘅小街, 全條街最搶鏡就係呢間幸福味覺, 一於入去開餐暖胃啦!

幸福味覺係小品式裝修, 好溫馨優雅嘅感覺, 食物亦以西方咖啡為主, 大多是外國遊客, 唔多人食煙, 好舒服啊!

餐廳嘅餸菜由老板娘親自主理, 我哋叫咗如下:

秏牛肉眼排, 79元一客, 賣相唔靚, 非常唔吸引, 老板娘刻意裝飾個碟, 佢煮咗個較黑嘅黑椒汁, 肉眼扒嘅份量亦唔係好大塊, 普通size, 我哋每人有四分一, 下刀一切, 感覺相當容易切, 一D根都冇, 亦唔多肥肉, 係7至8成熟, 冇血水, 一淡入口, 嘩! 真係唔好比佢個衰樣呃咗而唔食, 一定係你嘅損失, 肉質鮮嫩, 牛肉味濃而不酥, 老板娘冇用醃肉粉, 係原汁原味, 雖然個汁好黑, 但相當配合到秏牛肉, 果然冇揀錯;

肉醬意粉, 同樣賣相唔得, 個茄汁係啡色唔係橙紅色, 將肉醬撈勻意粉, 味道唔差喎, 仲幾好味添;

楊州炒飯, 賣相稍好, 係比較穩陣嘅選擇, 材料係好簡單嘅火腿, 紅蘿蔔粒及蔬菜, 炒得都乾身唔多油;

吉列豬排飯, 賣相好靚, 豬排幾大塊, 夠juicy同脆口, 唔錯;

花茶一壺, 喺咁乾燥嘅環境下, 有此茶潤一潤, 舒暢啊!

連埋兩碟炒青菜, 280元人民幣找數, 唔平架, 但坐得舒服, 食得開心......

我哋亦在翌日早上7:30 過嚟幫襯食早餐, 原本佢哋係上午9點至開門做生意, 老板娘知我哋要7:30食早餐, 所以專登開早就我哋, 好體貼呀! 多謝老板娘呢!

早餐雖然冇麗江紫藤花園客棧咁大份量, 而且都唔平, 一份30元人民幣, 含一杯熱咖啡, 但喺度食嘢感覺良好, 雖然貴D, 都係一次啫, 又有免費wifi, 睇埋報紙至出發去普達措國家公園。

另幸福味覺茶餐吧附設郵政局, 亦有明信片賣, 有好多款以香格里拉風景嘅明信片選擇, 寄到返香港, 約要1個月。

一入獨克宗古城, 車走兩分鐘就到今晚住嘅藏族民宿 - 開心時光客棧。

扎西話佢屋企亦係民宿, 但衛生條件關係唔適合我哋住, 而佢話呢間民宿較好, 我哋應該可以接受。其實當初我係想由我自已揀住宿, 但魚頭或小劉都極力推薦由佢哋攪掂, 而攜程網就可以自行定住宿, 當然價格就由住宿房費決定包團旅費嘅價錢。

開心時光客棧完全係一間傳統嘅藏族房舍, 由泥及木所建, 非常近大街及龜山公園, 好方便。

地下係民宿主人起居室, 大廳中央有煤炭暖爐, 所以晚上好溫暖, 樓上二樓就係客房, 一共四間房, 最前嘅兩間價錢較貴一點, 但都好抵住, 120元 - 140元人民幣(攜程價), 分別係溫馨大床房及陽光大床房, 我同另一半就住呢間房, 朋友同港童就住藏式雙人房(100元), 位置在後面。由於民宿係木板建造, 所以晚上行路要細聲, 房裡說話要輕聲, 另三樓係閣樓, 就係星星房, 但冇獨立浴室。

陽光大床房, 房內係藏式佈置, 由於用咗唔同嘅油漆顏色, 咁就可以令簡陋嘅房美化不少；天花有盞吊燈, 都令房間冇咁單調; 一張6呎大床, 床有電暖毯,  床同枕頭軟硬尚可, 大床旁邊係浴室, 浴室係自行改建, 地台比房間高一截, 浴室打掃唔係太清潔, 洗手盤同坐廁旁有頭髮及塵埃, 感覺係打掃馬虎, 最麻煩係冷熱水調節, 一係就熱到熟哂, 一係凍到過緊冷河, 完全唔可以冷熱水一齊用, 最差係咁。而最重要係整個房係冇窗, 得一道玻璃門, 開門又唔安全, 唔開又空氣不足, 雖然香格里拉比麗江冷好多, 晚上就只有8-10度左右, 半夜仲會再冷D, 但因太乾澡, 只有十幾度濕度, 在瞓覺時好似有D呼吸困難, 真係非常唔慣。

藏式雙人房, 同樣係藏式佈置, 只係用咗光管, 好用唔好睇, 但浴室較大床房乾淨及闊大, 沖涼冷熱水都係調節問題, 不過都好過大床房一點。

二樓房外有一大陽台, 有椅有枱, 係望星星嘅好地方, 四月份天朗氣清又少雨, 可惜晚上太冷太大風, 只能望星一會兒.....可惜啊!

民宿老闆娘係藏人, 好幫忙, 因本人及港童不能適應乾燥天氣, 在到麗江第二日已開始流鼻血, 當晚在民宿簡直係流血不止嘅狀態, 原本老闆娘要在晚上12點要關熱水爐, 但我哋因以上未能及時沖涼, 她索性當晚不關爐, 又教我哋如何止血, 真多謝她! 如民宿在衛生及熱水方面有改進, 亦不失係一間好住嘅民宿。

早上8:30，check out 出發香格里拉重點景區 - 普達措國家森林公園。

從獨克宗古城乘車到公園，約半小時就到。 

公園外觀頗有規模，一大片停車場，井然有序分開旅遊車、 轎車、摩托車等; 扎西導遊帶我哋入了公園售票部，裝修不俗及面積頗大，拿了門票，就走向公園嘅遊覽專車站，搭專車遊覽公園。

門票都幾貴, 要258元/成人, 坐埋遊覽船仲要另加50元, 但我覺得 "值" 呢!

公園有指定嘅遊覽路線，大概最快可在3小時至4小時內完成遊覽，但會較急趕。扎西冇同行，但就叫我哋乘專車在第二個站至落車，因第一及第二個站都係屬都湖，在第二個站落車嘅觀景台影相會較靚及較容易上番車繼續遊覽，然後就跟住公園嘅專車順路遊覽便可，遊覽船要我哋自費，如唔坐船，佢就話要行快幾步，約定我哋1點15分喺入口停車場等我哋。

我哋跟咗扎西嘅指示落車，果然第二個站係冇錯，路線如下：

普達措國家森林公園入口 ＞ 屬都湖觀景台第二個站 ＞ 彌里塘高原牧場 ＞ 碧塔海 ＞ 碧塔海棧道走2公里/乘遊覽船 ＞ 終點 > 乘專車回公園入口

普達措國家森林公園喺中國第一個國家公園，海拔約4000米，整個公園係以屬都湖、碧塔海及彌里塘高原牧場為主要景區，一路搭專車在主要景點上落，慳時間兼可睇到重點，主要走路點係响碧塔海棧道，都係行兩公里，由於我哋趕時間，又要到處影相同欣賞美景，所以我哋寧願比多50元搭觀光船，因此冇走哂全個棧道，如有時間，其實行棧道會較有風味，但就要預留多2個鐘時間了(停吓影吓係咁上下)。

喺天朗氣清下，雖然當日早上時分只有5度，大風又寒冷兼乾燥，但對整個國家公園嘅感覺好好，屬都湖同碧塔海風景好靚，山清水秀，兩個湖嘅水都好清澈，彌里塘牧場有秏牛，野馬及羊，動物隨處在草原走動，遊人可近距離見到以上動物嘅活動情況，所以令我哋都感覺到此刻嘅自由自在，可惜4月底只能見到小花蕾及花苗，不過仍然都非常籍得到此一遊，如果在6月初，整個公園嘅草原會成為花海，那時會另一番美的景象，希望有機會在6月初再嚟睇花海吧!

雖然昨晚好夜至瞓（流鼻血），但亦冇阻我咃早起去龜山公園一遊。

晚上，龜山公園嘅夜景好漂亮; 朝早，龜山公園嘅日出好寧靜。

6:00 AM，由客棧行去公園嘅月光廣場只係3分鐘，廣場只有零星嘅老人家在做運動，冇下午商販遊人出動嘅熱鬧，好寧靜呢!  時間剛好，廣場同整個山頭都開滿桃花，好靚呢! 謀殺咗好多相機記憶咭嘅位; 在桃花滿開襯托下，早上嘅龜山公園一D都唔遜色，莊嚴嘅喇嘛廟，加埋金燦燦嘅巨形經輪，小小嘅龜山公園就成為獨克宗古城嘅地標，在月光廣場完全可影到全景。

走上幾十級石級，就可上到公園上的喇嘛廟同巨形經輪，一早人流稀疏，影相參觀都非常舒服，經輪被日光照得非常耀眼，要帶太陽眼鏡，佛殿已有喇嘛頌經，在此亦可360度俯瞰整個獨克宗古城，一面係完整古老小房舍，一座高樓都冇，好古樸啊! 另一面就喺已被火吞噬後變成一片荒涼平地，可惜啊!

嚟龜山公園, 一定要早晚都嚟一次, 咁至可以睇到唔同嘅景色呀!

 

在我哋去普達措國家公園途中，比我哋睇到大禿鷹搶食腐屍嘅場景，猶如睇天葬一樣，不過屍體係一隻病死嘅豬，但已經好震撼，唔單止我哋第一次睇到，連西藏導遊扎西都係第一次見到，所以大家都不停用手機或相機拍下奇景，我吔係第二部車停喺度，唔洗5分鐘，車龍已長長排在一邊，車上嘅人就落車影相拍片。

我哋12:00PM 由遊覽船上岸, 行約一公里左右就到終點, 大家都有D肚餓, 睇吓有冇嘢醫肚, 就喺終點有間美式快餐店, 主食漢堡包, 都好, 要快, 因為約咗扎西1點鐘呢!

呢間漢堡餐廳裝修好似麥記, 睇落都乾淨企理, 價錢貴過麥記, 我哋叫咗兩個不同套餐, 一個係雞堡+薯條; 一個係蝦堡+薯條, 全部改飲景紅天茶, 所以每個餐加多2元

雞堡同蝦堡香脆無比, 個人覺得蝦堡較好味, 景紅天茶係第一次飲, 甜甜哋, 易入口, 完全冇中藥味, 餐廳話景紅天茶防高山症, 雖然身處4000米海拔高山地帶, 嚟到至飲有鬼用咩, 不過喺咁寒冷嘅時候飲杯熱嘢, 真係暖在心頭呀!

由麗江去香格里拉時, 扎西千叮萬囑我哋千祈唔好在車上瞓覺, 因由金沙江去香格里拉都要2個鐘, 如瞓著覺醒番會較易有高山症, 所以扎西馬上開強勁音樂, 令我哋精神精神, 不過反正在夢里灣黑店都令我哋一肚氣瞓唔著

而扎西亦在途中停吓車, 好讓我哋睇吓風景影吓相, 順便感受下氣溫逐漸下降嘅感覺, 果然在影哈巴雪山時感受到

在回程由香格里拉到麗江, 沿途嘅感覺剛好同以上相反, 由高到低, 由冷到暖, 仲可重溫此段路嘅風景, 真好啊!

由香格里拉普達措公園回到麗江古城, 真的足足走了4個鐘, 當中完全冇停下休息或上洗手間, 都要5:30PM 才到暖花居客棧, 因扎西要馬上返回香格里拉, 所以佢都幾辛苦

放下行李, 告別扎西, 我哋就出去搵食, 今次去搵另一間TripAdvisor麗江食肆十大名次的中餐館 - 和叔食府

由五一街走去不到10分鐘, 但亦不好找, 因和叔食府位處小街後巷, 要轉入小路後巷, 所以6:10PM 才到, 但小店已人頭擁擁

等咗約十分鐘, 有枱喇, 食府不大, 約20張枱, 大多是四人小枱, 中間有兩三張大枱

馬上叫餸, 價錢唔貴, 大眾化, 叫了如下:

1) 腊排骨煲, 48元, 認真抵食夾大件, 排骨唔會因價錢咁平而得幾舊, 仲幾多添, 仲有娃娃菜, 木耳, 大蒜, 排骨嘅鹹味滲入湯中, 令湯底呈白色, 再加菜同大蒜, 整個湯底味道清甜冇比, 排骨應該腊了較短, 但仍然非常入味加肉質鬆軟, 好正, 後再加一碟娃娃菜, 蕃茄及雲耳, 每碟都係8元咋

2) 雪山魚, 38元, 唔係太大條, 但對我哋嚟講就啱啱好, 魚好鮮好甜, 怕食淡水魚嘅最忌多小骨同有泥味, 不過呢魚一掃我對淡水魚嘅誤解, 好味道啊!

我哋只叫了以上兩個餸菜, 再加咗三個蔬菜作打火鍋, 冇叫白飯及飲料, 埋單117元人民幣; 朋友問我計錯數架, 咁平嘅, 我答當然係真啦!

大家一致認為平靚正絕對係和叔食府評價

今晚要搭21:28 K9620/K96火車返昆明, 所以一早出去紫藤食早餐, 然後快快回客棧執好行李check out, 客棧短期靚仔義工阿驕幫忙搵車去束河古鎮, 原本想坐公交車, 但阿驕話公交車站距離客棧頗遠, 要行差不多半小時, 所以提議坐的士, 他幫忙為我們截車, 問了幾架藍色小Van及的士, 都要收我哋30元, 咁我哋就搭咗藍色小Van去

司機提醒我哋會在束河古鎮正門外旁邊遠些少放低我哋, 叫我哋輕鬆走入人群中, 就可免比古城維修費50元, 我哋走過正門附近, 有幾個小亭子, 但唔覺有人收古維費, 所以我哋亦順利免費入鎮

束河古鎮比麗江古城細好多, 冇麗江古城咁人多擠擁, 所以亦較寧靜及舒服, 物價亦冇麗江古城咁貴及上落大, 如買手信或紀念品, 可考慮束河古鎮的小店, 大致上同麗江古城差唔多貨式

我哋在古鎮見到有藥材舖, 走入去睇睇, 見D牛肝菌幾靚, 另一半同朋友就各買了半斤, 講價後成交價係230元一斤, 返嚟喺裕華國貨睇番個價錢, 另一半就後悔買得少, 好啊! 有籍口再去雲南喇!

行到咁上下, 有係食飯嘅時候, 走咗入束河古鎮嘅美食街睇睇, 有好多食店, 任君選擇

美食街的食店, 全部都有侍應企喺門口招客, 大致上都係以食納西菜及雲南菜為主, 我哋都係合眼緣, 走咗入一間叫阿媽美食坊

嚟到雲南都冇食過雲南米線同氣鍋雞, 今次要叫嚟試吓 :

1) 氣鍋雞68元, 叫咗個細, 夠食, 約有半隻雞, 湯底清甜, 雞亦新鮮, 唔錯;

2) 雲南米線, 叫咗個中份, 非常夠食我哋四個人食, 都幾大鍋, 由侍應幫我哋逐小碟餸放入熱湯中, 最後放入米線, 港童非常喜歡, 食咗三碗, 唔洗講好唔好味啦!

3) 叫咗多兩個小菜, 肉絲炒青椒絲及清炒娃娃菜, 味道穩陣可靠

其實仲有好多菜式係想試, 例如麗江粑粑同秏牛乳扇都好想食, 但實在肚皮唔爭氣, 咁快就飽喇

食到飽飽, 都係156元埋單, 可知夢里灣黑店收費幾咁過分吧!

係好急趕嘅情況下，返到麗江古城已是5:45, 行番五一街仲要十幾分鐘, 我哋要搵間速食店解決晚餐問題, 就喺五一街見到呢間東北餃子店，還掂成個行程都未食過餃子，就試吓吧！

餃子店面積不大, 只放了四張小枱, 以快餐店形式經營, 先在櫃位落單付錢, 佢哋就即煮稍後送上; 我哋坐低叫嘢食時已有兩枱客人, 全部都係年青人, 都把舖面擠得水洩不通; 我哋約等咗15分鐘至20分鐘至有嘢嚟, 因為佢哋真係手作工夫, 係咪慢工出細貨, 評價如下:

1) 手掰面, 15元, 有D似公仔麵, 但老闆話係佢哋手造嘅麵條, 唔怪得粗幼不一, 麵條灼得剛好, 軟硬適中, 而整個麵嘅味道主要來源係個汁, 係乾撈麵, 個汁唔辣, 味道較普通, 好住家式, 味道未算突出, 但都OK;

2) 韮菜豬肉餃, 係較好味, 韮菜好香好新鮮, 豬肉餡唔太多, 共有20隻, 我哋encore多一次;

3) 芹菜豬肉餃, 味道較清淡, 芹菜未算太香, 所以未能夠帶到整個芹菜豬肉嘅鮮味人民幣

佢哋用嘅材料算新鮮, 亦係老闆手作工夫, 勝在有家庭感覺同乾淨企理, 價錢又平, OK之選人民幣

上午6:40分準時到達昆明火車站, 另一朋友提議去百年老號 - 建新園昆明站店食過橋米線。

由昆明站出閘, 轉右, 第一間食店就係建新園, 旁邊仲有美式快餐店同康師傅牛肉麵專門店。

總括幾間食店外觀, 裝修最普通嘅就係建新園, 門口就係落單付錢處, 有d似以前開放初期d食店, 只係電燈光猛好多。由於尚早, 胃口未到, 但又想食過橋米線, 所以大家都揀咗傳統過橋米線, 20元。

好快米線就到, 送菜阿姐架輕就地先放上小碟材料, 大碗米線, 冇耐就大叫 "滾水"到, 熱湯就送上, 又問我哋是否知道點下材料, 都算細心, 今次我哋自已嚟, 先放生豬肉片, 好薄, 一灼即熟, 然後放兩片醃火腿, 跟著係腊鴨肉及熟豬肉, 再把整碗乾米線放進, 最後放埋隻生雞蛋, 枝竹及蔥段, 好玩, 完成使命, 大家即刻試味, 個湯好熱好濃, 好多胡椒, 所以都幾辣口, 但好暖胃, 而店裡又冇空調, 個個食到大汗搭細汗人民幣

講番碗米線, 材料唔錯, 算新鮮同豐富, 米線份量好大, 知得叫兩個比我哋一家三口食, 我哋都食唔哂, 好浪費囉! 20元咁嘅價而食到咁嘅質素同份量, 非常收貨啦!

總括整個行程, 雲南麗江非常商業化, 原住民都唔多住在古城裡, 城內多數都係外來人士來開店做生意, 冇我想像中嘅古城風貌, 而麗江政府好有錢, 在基建上非常配合到麗江發展旅遊業, 就以麗江香格里拉高速公路, 路旁嘅花卉裝飾及園藝設計好靚, 路燈亦採用了LED燈, 而路面及隧道非常整潔, 呢D都係花費不少, 而旅遊點嘅保養都做得好到位, 尤其係洗手間, 完全係配合各地遊客嘅須要; 至於香格里拉雖仍有美麗嘅自然風景, 但隨環境嘅變化亦趨向商業化, 向錢看嘅地步。

我希望下次再嚟雲南, 能去下大理, 瀘沽湖及稻城亞丁等地方, 導遊扎西亦講2015年年尾或2016年年初, 由麗江去瀘沽湖女兒國高速公路會開通, 到時會由六小時車程減至三小時, 時間會慳好多, 但荷包就慳唔到喇!

總計今次旅費如下(3人計) :

1) 3套來回香港至昆明機票 : HK$2,658

2) 3套來回昆明至麗江軟卧火車票 : 1,386 人民幣

3) 兩晚暖花居客棧住宿 : 564 人民幣

4) 香格里拉包團團費 : 2,700 人民幣

5) 用餐, 手信及雜項使費 : 3,000 人民幣

以上全數約港幣12,220, 即每人HK$4,074, 依加去國內省外線, 係一D都唔平囉!

官渡古鎮位於昆明市東南邊的官渡區，離市中心約10公里，是一個歷史悠久的城鎮，更是昆明和整個滇文化的原點。

遠在南詔大理國時期(公元937-1253年 – 對應中國是「後晉至南宋」)，已是滇池東北岸的大鎮和交通樞紐，保留著較多的古建築如佛寺、閣樓、廟宇等。經政府修繕後成了旅遊區。

坐公車的話，選途經站名「官渡古鎮」和「寶象河(官渡古鎮)」的車就可以，也有8條路線能到。但旅館沒有公車直接前往，指示說要轉一次車，而且不是原站轉，為免麻煩就坐計程車前往，由所在環城北路去車費40多元。

這裡主要是走3條街，一是接連廣福路下車處「官渡古鎮」牌樓接連的九轉花街，兩旁的商店多是賣些街頭小吃，不少都宣稱是百年老店，見其中一家賣「官渡粑粑」的很多人圍著，不執輸的幫襯了。

這應該是用拌以白糖搓的粉團烘乾，再加花生、核桃、紅豆蓉做饀料的傳統小吃，入口鬆軟香甜，值得一試。

走至中段就會見到列為重點保護文物的「金剛塔」，再前是少林寺和改成了「碑林博物館」的文明閣。

金剛塔有點泰式佛塔的風味；少林寺內有僧人教導小孩耍棍練拳，參觀一下感覺新鮮；碑林博物館有點失色，像是一個中小型的收藏館，內裡卻點不出重心何在。之後再看了零星散佈的廟宇，就走了到多是賣工藝品攤檔的「官渡長街」。

這邊的攤檔跟昨天在翠湖的差不多，但訂價較高，議價的空間也不大，幾戰下來也沒有甚麼收獲。

時近中午，開始留意吃飯的地方，官渡長街的後段已見不少大宅改成的食店，看門面多是「名廚」主理或「著名食家」推介的，生意卻有點冷清。一眾都有選擇困難，自然是行多會才決定，最終走到狀元街的牌樓。

狀元街兩旁的小食店、小菜館，不少都人頭湧湧擠滿客人，花多眼亂，比剛才更難選擇，結果，看中了一家有不少公安/市政人員光顧的，因為心想他們能聚集於此，估計這店是價錢相宜，出品也過得去的。

結果，看中了一家有不少公安/市政人員光顧的，因為心想他們能聚集於此，估計這店是價錢相宜，出品也過得去的。

地下的一層被他們佔了，獲安排到2樓包場，要了幾個家常小菜，不能說十分突出，總之是合乎胃口，去完再走回街上吃些街頭小吃，很滿足了。

飯後散步，打算向著彩雲北路的出口坐巴士到金馬碧雞坊，被該路段一列銀器店吸引，工匠們多數在店外打製首飾，好奇的看著工匠將一條有點厚度的銀條敲打，沒幾下手勢就將之敲扁，很快就有手鈪的雛型。

入店內看看，問價是每克7元，一隻手鈪約30-40克，售價都是300元之內，團友們都有點心動，看多幾個款式後就決定買了，見大夥買得高興，本貓也買了雙銀筷子玩玩。

選好貨後等老闆再拋光打磨一下，期間閒談知道打製銀器是大理白族的傳統手藝，他們的製品除了首飾受歡迎，茶具也很有市場，不少賣茶葉的也會訂幾套奉客試茶，說是用起來令茶味更醇厚。

除了銀器店，也有些賣未剖開的玉石，一大籮很平的任選，稱之為「賭石」。

沒想到，臨時加插了購物環節，到3時才離開官渡古鎮。

金馬碧雞坊位於昆明市最繁華的地段(西山區與五華區交界)，始建於明朝宣德年間，已有400多年的歷史，可說是昆明市的市徽。

據說大概是中秋時節的黃昏，太陽的金光餘暉照射在西邊的「碧雞坊」及月亮初升的銀光反射到東邊的「金馬坊」，兩座牌樓再折射的倒影交集之處稱為「金碧交輝」的情景。

而廣場要出現這場面，有說是60年才會遇上…

到來的原因純粹因為這裡夠旺，敝大的廣場除了擠滿遊客，也有些少年人在排練舞蹈，更特別的是開闢了一角給人上訪，展示冤情，現場有公安駐守，但苦主卻沒多少人理會。

本貓八卦去看一看內容，至少有兩組本是建制中人，或退休或失勢或失去利用價值後也身受其害…或者是如此背景才可作有限度的抗爭？

看過廣場的情況，轉入身後的小區，有一列的攤檔和小商店，攤檔賣的多是織繩等小餘物，商店多是藥材、茶葉和銀器，銀的門市賣價每克9元，已比剛才在官渡時高約3成，有點誇張，既已買了也無心講價混吉了。

攤檔方面，開價和翠湖與官渡比都貴，也是看看就算。

來時家裡說買些「田七」回去，但只見到「三七」，原來這是田七的別稱，一直都不知道…結果當然是無法完成任務。

想到今天是周末，轉到南屏步行街，不少地攤已開始營業，兩旁都擠得水洩不通，賣的都是些衣服、小飾物、手機輔件之類，攤主多數是些年青人，大部份都標明「不議價」。

整體的氣氛都很熱鬧和充滿新氣，要挑剔的時明明出入口已標明了「嚴禁行車」，但騎摩托車的仍不停穿梭，又沒有人執法制止，逛起來有點顧忌。

一直在正義路一帶遊蕩至傍晚，慢慢的步回旅館方向，沿途都留意能否找到家企理一點的店家晚飯，不過除了米線店，就只有火鍋店…

終於離旅館約10分鐘步程的錦江大酒店找到這家老字號的滇菜店，亳不猶疑地入去了。

由於當晚有人辦婚宴，散客較為集中在偏廳，環境顯得有點擠。

附設在酒店的食店裝修自然有一點水準，但價錢並不昂貴。

圖文碰茂的菜牌花多眼亂，選了很久才決定菜式，其中棄氣鍋雞而選的松露雲腿湯最有印象，滷肉夠入味但略為油膩，炸蓮藕亦爽脆香口。

但這道菜有些小插曲，事緣下單時已列明了少油走辣少鹽走味精 (有這些選項，不算額外要求吧…)，這道菜端上來時發現撒了些七味粉。

我們只是問問為何如此，也沒有不滿拒收之類，但領班查單後知道有誤，也就主動換了。本相安無事重新上菜，但領班似有不甘，追究起剛才上菜的服務員來，還在客人面前大加斥訓。

拜託，小事一樁而已，就算要「教女」也返回休息室吧…弄得我們也有點不好意思。

完成整個旅程最後一頓晚餐，慢慢的散步回去，補充一下零食就回旅館了，明天吃過早餐就要到機場，結束行程。

其實這兩天都這家旅館旁邊的米線店吃早餐，提供多款配料與份量不同的米線，較特別的是有這幾天未嚐過的「豆腐花米線」。

豆腐花米線在家附近有一家，一直都不以為意，沒有嚐過；近排多點人認識都因電視節目介紹一對在深水埗創業的年輕人，吹捧為特色出品，店子每天都排長龍。

故此來到發源地，見到自然挑起了興趣。

豆腐花的確夠滑，拌以微甜微辣的肉末，口味也很配合。

招牌出品的汆肉米線，是以滾湯灼熟切片的豬里脊肉，澆上一層油和生葱而成，點最大碗的再加隻滷蛋，才不過10多元。

認真抵食夾大件。

雖是12時半的班機，但吃完早餐也無事可做，就早一點到機場。

昆明市區要到機場十分方便，919號有一系列的車選擇，車費一律13元，通常20分鐘一班車，順利的話1小時之內能到達。

旅館門外已有919C的公車站，更好運的是剛到站頭就有車，路上暢通無阻的40分鐘左右便到機場，航空公司的櫃位仍未開放呢…

總結多天行程，一早知到主場景的「元陽梯田」已過了最佳到訪時節，拍不到滿意的相也不覺十分失望。亦因察覺到不合時節的地方會重蹈前幾天的覆轍，故及時放棄油菜花已結籽的羅平，改了到比較四季皆宜的「建水古城」和「元謀土林」，使中段的行程可觀一點。

後段到昆明待機已有點疲，對再遠赴石林不太著緊，只想悠閒的逛上一天半。

也不是特別節省，不計機票，9天下來才每人花了約2100元，再加上一點手信和即興買的銀器，總數也不過2500元，真的十分抵玩。可能是去的不是發達的地方，消費指數較低，聽說到麗江、香格里拉、玉龍雪山的等閒也是兩倍以上。

由於在元謀的住宿與伙食都不太滿意，早上吃過早餐就匆匆乘9時開出的車到昆明。這程車需時2.5小時，車費50元，車款和來時到個舊的一樣，是寬敞的金龍大巴，總站的地點比較偏遠，在西北客運站。 

車程十分順利，問題卻出自下車後找車到酒店的一段路。現場的確是有很多計程車在等客，但司機們聽見我們要求按錶收費就拒載。

同場還有不少裝扮似從鄉間出來的，他們很受歡迎，乖乖的聽司機開價，所以很快就有車了…

找了近15分鐘，差不多只剩下我們，情況明顯改善，先前不理睬我們的司機開始回話了，有的說我們要到的「環城北路」很遠，開價200元；也有說他的車不能到城裡營業，除非給附加費…(我們在搜狗地圖查過，車費只需30元左右)

又拖了好一會，正想屈服150元包車之際，一個剛替乘客落完行李的司機前來搭口，說她的車按錶收費，更說這裡到北京路最多也不過30元，當心黑心車云云。

和我們的資料差不多這麼老實，自然高高興興的上車。

車上，司機跟我們說這幫人專宰鄉間坐長途車出來的，像我們衣著較為光鮮的一般沒甚麼興趣，因為鬧起上來找公安，公安也知道他們的底細。

隱約感到這幫人都是求財為主，該不會害命，雖然找公安有勝算，但浪費自己時間也很無辜，慶幸最終沒有上錯「賊車」。

商量了很久在昆明住哪個區域，火車站一帶怕環境混亂，畢竟早前才發生過恐怖襲擊，早兩天在火車站內也感到明顯的氣氛凝重，主要出入口都有特警持槍駐守。

五華區的翠湖公園附近環境優美，多家高等學府座落於此，文化氣息濃厚，那昆明少女極力推薦。但翠湖到機場有一定距離，後天要很早出發才可以。

同屬五華區的正義路/金馬碧雞坊附近人氣十足，除了是主要商業區，也是省級和市級政府機關最密集的地區，附近酒店的檔次較高，價格不夠實惠。

最後的選擇是位於盤龍區環城北路的連鎖酒店「如家」，這家店團友的朋友住過，大力推介，說是交通方便，出門就有公車到機場及市中心旅遊購物熱點。

建水往昆明的火車途中已上網預訂，但一直都未收到回覆，以為要Walk in碰碰運氣，幸好剛才元謀至昆明的車程收到短訊確認，才150元左右一間房。

到達現場見裝潢新淨企理已覺感覺不錯，服務員都是偏向年青、笑容可掬的，大堂放置了幾本旅遊指南，詳列了主要景點的乘車方法，也有公用電腦上網查用，懶一點的可以開口詢問，服務員也樂於作答。

上房，電梯有拍卡裝置，但日間似乎毋須使用，房間內用品齊全，已超出對一家商務旅館的預期。

安頓好後已過了一時，還是先醫肚再進翠湖公園。

這幾天小鍋米線吃得多，一直嚷著的過橋米線還未吃過，見到這家門面企理的連鎖店，沒多考慮就進去試。

花款很多，除了小鍋米線，還有甚麼秀才、舉人、狀元米線，定價普遍10多20元，價格最高的「過橋」套餐也有多款，更有季節限定的出品，只是20多30元的消費。

賣相的確不錯，但配料的份量有點少，每碟都是薄薄的一兩片，湯底方面不管辣與不辣都鹹味十足，吃完足足灌了一瓶水。

服務方面也不太好，又不是人手不足，入座後上手的碗碟一直要求清理都不得要領，直到我們點的送到，端菜的在咆哮拿著的盤子很重才有人動手，當然，這服務員剛才也是圍在一旁聊天不做事的一員…

味道跟期望有落差，有點失望，往後見到些甚麼建新園、老滇味等已不想再試。

安頓好後已過了一時，第一站是位處五華區的翠湖公園，附近有雲南大學等多家高等專上學府及省政府總部，文化氣息濃厚。

由於交通便利，有多款公車在周邊停站，這裡是市民日常晨運休閒的熱點。

園內主要由兩條有不少商店攤檔和植有楊柳的長堤，以「十」字狀分割成5個區域，中間的湖心島景區以湖心亭和觀魚樓是清代建築；東南面是水月軒和金魚島；東北面是竹林島和九龍池；南邊是葫蘆島和九曲橋；西邊是海心亭。

每逢冬季，都吸引到大批紅嘴鷗在此過冬避寒(據稱來自西伯利亞？！)，遊人會到來欣賞牠們飛翔的姿態和餵食，視為一大樂趣。

遊覽之時是四月，紅嘴鷗早已歸家，已見不到這時令特色，不過園內楊柳飄飄、綠樹成蔭，加上中式的亭台樓閣，在此散步也十分寫意悠閒。

公園門外有不少旅行社藉派市內旅遊地圖，順手推廣各類本地一天團，價錢只需90-120元不等，包門票及交通，兼有一餐特色午餐，如在市區酒店居住，早上更有車送至集合處，很是吸引。

拿著傳單到旅行社又不是這一回事，宣傳單上的是「內賓價」，作為「外賓」，團費普遍高50%，甚至Double；早上到旅館接往集合處是真的；雖然價格高了仍十分吸引，因為石林的入場費已值180元，未計往返約60元的交通費。不過再問就有重大分歧了。

再看行程的安排，包括了參觀商店、足浴場，雖沒說明指定消費(你懂的…)，但註明了這兩個行程佔去近3小時，當它兩程車花時2小時，吃飯1小時，加上這購物時段，在石林的時間大概只有1.5-2小時左右…

果然沒有那麼「著數」的事，本來也想自行前往的，但又不是全部團友想去，已經人少，無謂再拆團，明天還是按旅館的旅遊指南找些易去的地方閒逛。

逛完公園由近雲南大學的出口離開，進去沾一沾文化氣息就坐公車到正義路，因在旅館看旅遊指南時見到這裡有個叫「南屏美食步行街」的地方。

介紹圖片見到的小食和地攤皆不見蹤影，剩下的只有幾個商場，原來只有週末週日才開放，只好逛一逛商場。

從正義坊購物中心步向錢王街方向，除了活化了成商店的馬家大院，再深入一點就見到一列鐵皮攤檔，賣著各類型的雲南特產，如煙草、茶葉、咖啡、手工藝品、衣服等，盡頭是「雲端花鳥市場」。

圍繞著兩旁的都是些舊式建築，青磚牆、四合院、高門樓、花牆裙，這新舊交錯，商住並行的老區，不失為一個有特色的好去處。

漫不經心的逛至黃昏，走回正義坊購物中心晚餐。

場內的確有不少食店，但款式來來去去都是火鍋、燒烤、豉油西餐等，團友感冒開始失聲，燒烤火鍋等還是少碰為妙，豉油西餐就覺得不值冒險嘗試。

滇菜店倒不覺有，最終這家連鎖經營的廣東茶餐廳。對我們來說自然沒有甚麼特色，尚幸出品有點水準，燒排骨和南乳煎藕餅不錯，還有手撕包心菜以醋調味非常開胃。

吃完，想去家樂福逛逛消磨時間，但找不到，只好坐公車回旅館。

「物茂土林」又稱「虎跳灘土林」，位於元謀縣物茂鄉羅興村，是元謀土林旅遊景區開發最早也是範圍最廣的土林群落，距縣城約30多公里，車程約40分鐘。

沿途所見除了靠旅遊業吃飯，也有些開山挖土的產業(有礦產吧？)，農業主要是洋蔥田和葡萄培植場，據司機說葡萄是出口商品，投資者多是日商，成品鮮有流出市面，有的少說也是賣幾十元一磅。路旁亦不難見到縣政府決心「打造」物茂為「葡萄之鄉」的雄心。

說回土林，兩個土林景區有100元的聯票發售，單售則要60；學生票40元，但沒有聯票。陽光實在猛烈，加上今早起床後就頭痛，狀能欠佳，安全起見還是在服務處買頂闊邊大草帽才進場。

景區內主要由一條主路徑(中後段再分了內環和外環)和30多條小徑組成，分為4個區域，大景點9個，小景點127個。

介紹上說：「千奇百怪的土柱造型、深遠寧靜的幽谷地縫、高懸半空的洞穴天門、原始粗獷的沙溝荒漠、怪模怪樣的五彩奇石和種類繁多的遠古植物化石，組成了景區內豐富的景觀。」

的而且確是造型千奇百怪，是非常好的拍攝場地，但配上的名字就不敢恭維了，或許真的是純天然，但套上名字就覺得…OVER了，硬是堆砌而成似的。

我們由10時開始遊覽，一路到12時才走到算是中間的休息亭，天氣酷熱極需補充水份。

休息過後繼續走，經過了一座被稱為影城的土堡，標明了是某影片/劇集的取景場地，人去樓空，只得零星三兩張檯，進去瞄一瞄就算了。

其後走到了一個岔口，主徑分成繼續平走的內環線，和要上山的外環線。外環線標榜著景色壯麗、震憾，猜想該是形容從高處看下來的景色吧？

念及近看的景色有點膩，換個角度看會有新感覺，雖懷疑是誇大了，但也決定上山。也不是上得太高，只是上幾段梯級，再爬上一條環迴鐵梯就到山頂，才10分鐘路程左右。

看見壯麗的景色，不禁倒抽一口涼氣，這個題為「刺破天」的場景，是取名副其實的命名，其實單單看這裡也覺得值回票價。

一輪瘋狂拍照下山已過了1時，時候不早，接著都只走主路徑，幾條小路都沒有看了，至少錯過了某個名為「外星人」的小景點。

走回入口已是1時45分，在入面差不多4小時，5公里左右的路程共喝了近2公升水…

時近二時，請司機開車到市集，吃過午飯才繼續行程。

這家飯店一如之前都是農家菜，或許剛才走路消耗體力後特別肚餓，又或離開建水後吃的東西實在太恐怖，總覺這店很值得回味。

吃飽得小休一會，約3時就上路，到下一站「新華土林」需約1小時車程。