完全相象不到一家CBD商業中心內會臥虎藏龍，這家店一抵埗的感覺已經非常喜歡，乾淨及有氣派，肯定非常放心光顧。我們二人被帶到靠邊的廂座，很舒服。點了茶之後當然要看看點心紙。食順德菜, 一定要食炸牛奶，本店的炸牛奶是用一塊薄薄的麵包卷著牛奶炸，外脆內軟滑，要不是太貪心要試多幾款不同點心，我一定來多一客。

 

甜薄餐感覺像炸的盧打滾，裡面包的是糖、椰絲及大量芝麻，超香口，要趁熱食。

 

另外就是鯪魚餅啦~ 也是必點！一口鯪魚餅，香口彈牙又多料。挺意想不到的是他們的豆豉鯪魚炒油墨菜，以為是廣東菜，佢地卻勞駕得好好！

 

我打包了他們馳名的雞及乳鴿返港，都非常出色呢！下次要帶老公來！

這裡要不是朋友是本地薑，根本不知道有一家那麼棒的咖啡店。賣的以景觀為主打，就可以chill 一個下午的寧靜地方。 

花茶咖啡都是跟連鎖店的差不多價錢，不同的是他們有獨家口味的。這次點了茉莉花茶很驚喜，淡淡的花香，配上會開花的模樣，好靚！

我地仲選了綠茶mousses cake，意外地高質，比起十年的件裝餅，真係完全追得上香港的步伐。

住麗江古城，一般民宿都可以訂車去機場，每人收費RMB80，今天都要坐車去機場離開了。

來到機場chkin，然後辦離境手續後去到候機室等上機，早上坐機還是都準時，看著飛機起飛，便帶點要走的心情離開。

終於地達了深圳機場，然後準備取行李離開。

真的都不太明白，為何回國內坐機，總是愛delay!!!

到達麗江，便直接坐車回住宿放下行李。

真的沒想到團購的房間也很抵入住，因為在麗江古城，以類似的房間和裝修，都要超過RMB200/間，所以我們真的很抵住。

只為找吃，沒想到今天的晚霞是如此美，可惜我的相機拍不下美景。

要了一個腊排骨土雞湯中鍋，RMB58。然後我們選了些配菜，雞豆涼粉RMB3，腐皮RMB10，麵RMB10，菜RMB10，和當地出名的菜，水性楊花RMB28，連餐具每人加收RMB1，這餐我們吃了RMB119/2人。  坦白說，這腊排骨很韌難咬口，沒有西藏的做的好吃，湯底也是很一般。  那水性楊花的菜是腍口沒什麼特別，就賣RMB28很貴。腐皮也不像香港的好吃，麵也太多吃不完，總結這餐確實是不好吃。

每次來到這裏，都要在願望牌和水車影相留念。

由商店看東西，到最後走進美食廣場遊。

小吃真的很多，看了很真的很想吃呢!

第一天便這樣完了，期待明天遊麗江。

來到惠東，辦好事情之後，我們第一件要做的事就是找一家酒店下榻。就在外父專程來做野的地點對面，就有一間簡潔的酒店，名字叫《南湖灣酒店》。

登記的時候是星期五的中午，我可以說，酒店的大堂是一個人都沒有，與前台的小姐講好價錢，拿了匙牌，我們就直接上床間。

簡單的酒店，設備是齊全的， 兩張床都十分之大，但感覺很硬，不過睡一晚就算了。房間有獨立的冷氣機，有足夠熱的熱水洗澡，有電視。再好的，就是打開窗的南湖公園景。

此酒店保存得不錯，應該是人流不太多的關係，而且離縣城中心亦的確有一段小距離，在酒店競爭算是幾大的惠東縣城中心區，能支持到這好些年，算是好了。

說真，作為簡單住一晚的酒店，可以叫好。

中午飯後，我們便往惠東城的中心區進發。惠東的中心地帶不大，橫橫直直幾條街就是他們的主要商圈。之不過，我們在途中發現了一個令我們逗留了超過一小時的地方。而這一個就是《平山中心市場》。

惠東縣城，正確的名字叫做平山鎮，行政區方面就稱為平山街道，所以，這一個《平山中心市場》，我相信就是惠東縣的真正墟鎮中心。因為，在比較之下，我們覺得這一個市場比起時尚以年青人為主的中心商圈更加之旺盛。

行入去中心的內部，原來是一個服裝的批發中心，女裝內衣店居多、其次就是童裝店同鞋店，做的，是批發加零售。我們在這兒亦揀了不少衣服給自己小孩。另外，我們也覺得，有不少店舖的店員是長期上網的，當中，應該有不少是淘寶能找到的店。

以購物來說，有排揀，有排格價..... 

行完市場，行完市中心，也行完 Walmart，我見到一個公園，名字叫《飛鵝嶺》。本來想入去行行的，誰知道公園門前的牌坊在裝修，同行的其他人亦不太願意入，所以我只好在門口影影相就走。

公園門前有一個很大的廣場，有一個黑更鵝的銅像，之後就沒有其他了。後來翻查一下資料，也在酒店的房間看看這地方。發現這一個公園原來一直伸延至小山丘之上，從公園入口，可由充滿樹木的山徑一直走上山頂，可鳥瞰整個惠東縣城的風光。附近亦有好幾間寺院，令我相信，這是一座靈山。

是次，簡單在門口看看算了，有機會再來時才考慮上不上山行行啦。 

南湖，算是惠東縣城的一個地標，是市鎮中心內的一個天然小湖。我們下榻的小酒店，也就是座落在這一個小湖的旁邊。

惠東大道把這湖分成了兩邊，一邊是民居住宅，被平民百姓的住所包圍著，另一邊的湖，是一個悠閒地方，一邊，是舒適的湖濱長廊，另一邊，是一侸巨大的市民公園，名字就叫《南湖公園》。

這《南湖公園》也是一個佔領了一整個山頭的公園。我們早上來行一行，吸收一下新鮮的空氣，單是從湖邊的路行入去，是一個小小的森林小徑區，感覺份外的舒適。看過公園內的地圖，公園的深處有一個烈士碑，有一個博物館，遠處我們見到有摩天輪，因為公園內附設了一個小型的機動遊樂場。

行回正門，我們發現了一個很大的草地，有不少人在做早操，看見這草地，真的有少少想脫鞋脫襪，在草地上跑個夠。

公園的正門亦有一個大廣場，是大媽們跳舞之地......

 《南湖公園》是一個很寫意的公園，早上走一走，晚飯後走一走，身心舒暢。

一來到潮州，第一個景點就是看一條斷橋，這就是潮州著名的景點之一，《廣濟橋》。原本，這是一條像連環船般，把多艘喬固定連起來的浮橋，後來經過明、清兩代的修建，便成為了現時的半石橋半浮橋的設計。

為何依然要用船來連接兩橋，因為可以方面其他船隻通過，相傳是中國第一座啟閉式浮橋。

另外 《廣濟橋》另有一個名稱叫《湘子橋》，相傳是，韓湘子同廣濟和尚，一人修一邊，故，廣濟和尚修的一邊叫《廣濟橋》，韓湘子修的一邊叫《湘子橋》。

不得不說，這是一條很特別的橋。 

來到潮州，也算是第二個景點，就是濱江長廊大道。說真，這是我們真真正正下旅遊巴之後的第一個腳踏實地景點。

濱江長廊很長，由潮州城的外圍進入城中的主要景點，也有很長的一段路程，所以旅行團建議我們每人付15元，坐電瓶車遊江邊同進出城區。

慢慢行，是可以細味韓江兩岸的景色及古城牆的風光。但，坐電瓶車遊，也有大同小異的風景，而且不一會，我們就到了廣濟門同廣濟橋的旁邊了。

廣濟門，是潮州城牆中，現存最宏偉的城門。正正對著更著名的廣濟橋，在這兒，一口氣可以睇晒潮州城最有名的其中兩個景點，的確是好。

現今，這兒依然是一個進出潮州城的城門， 不過城門很小，只可以給小型的汽車通過。

最宏偉的，就是樓高三層的城樓，可以上去的，但要收費，因為內裡是一間小型博物館，展示出廣濟門，廣濟樓同廣濟橋的歷史。

跟團沒機會進去了，看完拍完照，電瓶車回來了，我們就進入城內，遊覽。 

潮州最出名的，固然是潮州菜，但以景點來說，位於老城區內的開元寺，就是最有名的景點了。

開元寺，早在唐代已經建成，是廣東最老的一間寺廟之一。說宏偉，其實一點也不宏偉，只是此廟香火甚為鼎盛而已。

地方不算大，但無時無刻都會見到前來拜祭的人士，幸好我們來的時候不是假日或週末，不然，這開元寺應該會是人山人海的。

在外，是老街道同為遊客而粉飾過的牌坊街，寺內，是一個大型的廣場，有十分空曠廣闊的空間。不過，寺內能隨便參觀的地方不算多，我們還是多花一點時間行出面的街更好。 

潮州古城是遊客區，所以同好多名勝地點一樣，早已經把周邊的街道粉飾得靚靚，對某部份遊客來說，突意造出來的景點一定不會喜歡，但有時候，景點的本身早已經是日久失修的建築群，重點地粉飾一下，其實又不是一件太壞的事。

這一條《牌坊街》顧名思義是由一大堆牌坊組成，基本上每10多米的路，就有一個由不同人士捐建的牌坊，甚有特色。

這，是一條很商業化的遊客街，之不過我們來的時候是平日， 人不多，店舖亦沒有全開，再者下普細雨，所以，我們看不到《牌坊街》繁華的一面。

幸好，大部份的店舖都是特色手信同地道的食店，總好過北方古城般，把舊城區變成酒吧街...... 

自費的下午茶，我們就在食豆腐花的店對面，看見一間只由一位大叔經營的牛丸、牛雜小店，心想會是比較地道的，我們不管他是否真的是區內最好食，只知道就近，就叫一碗牛丸，大家分。

雖然位於遊客區，但小店保持街坊店的作風，也保持到算是 local 的價錢。大概10元一碗，對遊客來說，一點也不貴。

湯，充滿了牛內臟的羶香，是很正統的牛肉丸麵食湯底，淨湯，已經令人覺得，這一碗牛丸的分數會是中至高。

肉丸，結實而爽口，也可以說爽到可以用來打乒乓，另外，牛丸的肉味不錯，爽口加上可口，值得我們給一個讚，而且，同團的人都像我們，邊食豆腐花，邊食牛丸，證明讚好的，不只是我們一家人。 

潮州市，是一座依然有保留古時城牆的古城市，亦因為有古城的存在，令大家知道，潮州不是只有食，也不是只有李嘉誠。

潮州是一座小城，所以我們見到的城牆，不算高大宏偉，相信，古時的江南、越國一帶比較和平，建城也許是因為要防海賊而已。

城牆保存得最好，也許只是保留了向韓江的一邊，最高的，也是廣濟門，其他的地方，若有保留，都是一些亂石牆。不過，有保存是好，城池，絕對是中國人必須保留的古建築之一。 

最後一天 (第三天)的行程，因把龍泉岩改了在第一日遊覽而變成食食食食食的一天。我們早餐後，旅遊車立即出發....去的地方不是什麼景點，而是一早11點幾來到一間叫《幸運酒樓》的酒家，食午餐。

潮汕十八式宴，顧名思義是有十八款潮汕區的特色美食，但所謂的十八式，其實包括了前菜小食及花生，所以真真正正的菜式，根本沒有十八樣。

不寫不看前菜酸菜花生了，白灼沙蝦也因為我只能發8張相而不評了。所以，先說豬頭粽片。豬頭粽片，是一個鹵水凍糕，咸咸香香的，充滿了豬頭肉的骨膠原感覺，亦因為是凍糕，入口時的膠質不會太過重，是一個幾特別的菜式。

鹵水鵝，一分錢一分貨的概念出現了，這只是一隻普通的鹵水鵝，味道雖鮮，但肉不厚，皮雖嫩，但不爽口，只是一份一般般的鹵水鵝。

烏魚飯，是一條很好味的烏頭魚，魚肉香口，切開時亦有完美的黃油，香滑好味道的烏魚飯，該點豆醬食的，但不點醬更能吃到魚的鮮味，非常之正。

龍須菜肉丸湯，湯底被龍須菜自身的味道增強了，所以帶著一種好特別的菜香味，配合了豬肉丸，令我可以對湯底的味道作出一個小讚，而肉丸本身的味道鮮，我們飽都要食晒佢。

蠔仔烙，是好食的，是正宗鴨蛋的，但吃了三天，也有少少麻目了，不過，蛋香味是一流，只是嫌蠔仔不夠多。

鼠殼粿，輕輕的甜，入口也煙韌得非常。潮汕的特色甜點中，鼠殼粿是我其中一樣最喜歡的甜食。

再來就是潮州粽，細細隻的粽，是可以一啖一個的。 打開，是甜粽，是甜米包豆沙，大人小朋友看見都非常之開心，有少少像在吃豆沙水晶包的一樣，外面甜，內餡更甜，絕對是美妙。

很豐富的一個午餐，也就是我們離開汕頭前的最段一餐正餐。這一席，雖不是什麼精美的潮州菜，但已經能簡單地，把平民潮菜的精華帶給大家。 

好多人說，來汕頭玩，基本上沒有什麼景點可去，最重要都是食。的確，我們來到汕頭的第一站，就是去食，食我們的下午茶。

旅遊車一下子就帶我們來到汕頭的老城區，本來第一站是看天后宮的，但因為下大雨而安排我們先來這一家被喻為百年老店的《飄香小食店》食潮汕小食。

這小店，說是有過百年的歷史，單是看店子的內部就知道，這應該是晚清時代的建築風格，雖然因為要做生意而令店子帶點點現代的裝潢，但抬頭一看，尖頂的舊屋，就知道這房子是一間老房子。 

在這兒，我們吃了最地道的蠔仔烙，雖然我覺得有點點炸過龍了，但這是一份正宗用鴨蛋煎的蠔仔烙，食落香口有蛋味，也有足夠的蠔肉，很不錯，只是十分之油。

另外，就是五花百門的粿，粿是潮州一帶的小點，用糯米包，有甜有咸，也可以肉餡，再用油炸好，煙煙韌韌，甜的如豆沙，有其特別動人的味道，咸的如有肉餡的，也有特別的肉香感，總之，這就是鄉下人掛在口中的茶粿，一定要飲杯茶送食才好，原因，好多油呀.........

本來是最後一日才去的景點，但導遊知道這三天行情都在落雨，眼見天色有少少好轉，他立即建議大家先去《龍泉岩》。

 《龍泉岩》，就是汕頭大學的後山，是一座靈山，整個山頭都充滿了大大小小的寺院，所以，龍泉岩寺院群之稱。

入寺，其實我見不到什麼名字，感覺上，這兒是一群不同的寺廟，越建越多，越建越近，就慢慢地變成了 《龍泉古寺》。

名字叫《龍泉古寺》， 當然有龍的出現，我們沿著樓梯上山，上到去，就會見到一條龍，而這一條龍，也就是此山的神龍，而龍的前面有一口井，相傳這就是聖水。

什麼民間故事我沒有聽了，只知道來過地標，也就是到此一遊吧。 

跟團去旅行，總會住到冇雷公咁遠。這一次下榻的酒店，位於汕頭市的邊界，行一行就是潮州市的潮安區。的確是好偏僻。

酒店的名字叫《格林豪泰》，是一個連鎖酒店的品牌，所以質素算是有少少保證，加上此酒店的位置的確是偏遠，所以啱晒旅行團，就算個人遊來到，價錢也不會貴得去邊。

房間不錯的，由床至浴室，都感覺清潔衛生，設備齊全，也足夠地大，睡了兩個晚上，我可以說，是舒適的。

地點雖然離市區很遠，但這一區有小食肆，有藥店，而酒店旁也有一間便利店，晚上行遠少少，同團朋友也找到火鍋店同牛丸麵店。日頭一看，這其實是一個兩個本地人生活小區的夾心地段，又有公交車來往潮安及汕頭市區，感覺不差。 

本已托朋友在出發前20天幫我買12月25日嘅10:45嘅D2XXX車次嘅高鐵票, 點知朋友諗住一定會買到, 所以遲咗兩日至幫我買, 當然買唔到啦! 最後就只能買到08:35嘅D2308車次, 咁就要上午5點45分搭港鐵直去落馬洲過關, 再搭地鐵龍華線去深圳北高鐵站。

25/12/2014, 一早5:50分由家出發, 去到落馬洲已是7:25, 好多人過關, 因為大部份嘅旅行團都係呢D時間集合, 雖然人多擠迫, 過關都算快, 只用了20分鐘, 然後馬上跑去地鐵站買票搭地鐵, 到達深圳北高鐵站已是8:15, 在B出口出閘再跑入檢票處排隊驗車票及大小行李照X-Ray, 好彩可趕及到閘口入閘, 上車擺好背包, 高鐵已開動了; 真的"馬不停啼", 如打算高鐵自由旅行, 奉勸最好買9:30至10:30左右出發的高鐵, 咁就冇咁趕喇!

 記住開車前十分鐘要到高鐵站入閘口, 過鐘就關閘呢!

呢間民宿係在攜程網訂的, 原先係訂石敢當客棧, 但普通房已訂滿, 只有較貴嘅房, 攜程網工作人員打長途通知是否改, 我便揀我的第二選擇 - 廈門一米陽光客棧。

喺廈門高鐵站出口左邊行, 就係公交車站, 我哋搭咗943路公車在海韵站落, 差唔多個半鐘至到, 落車行出環島路, 就可見到一片海洋景色, 然後徒步約1500米到曾厝垵, 原本可以同另一半浪散步到曾厝垵, 可惜雨越落越密, 真係要快步行, 令我哋唔可以慢慢細膩沿途風景, 真可惜。

沿環島路一直走到阿川海鮮酒家(有兩家阿川海鮮, 一間舊D, 一間新D, 在新那間走入), 就會見到曾厝垵嘅大牌坊, 沿路直入, 再穿過小巷, 終於搵到一米陽光。

我訂咗兩晚, 25號係星期四, 所以係101元人民幣, 26號星期五就139元, 合共240元, 非常抵住, 但房就係屬超細房....... 

超細房在2樓, 我哋住206號, 一上樓梯就係, 一入去, 房間真係好細, 整個房冇十步距離, 而且係劏房形式, 廁所係自行間出, 面積都係非常細; 床係5呎, 旁邊有一書枱, 約2呎多些少, 所以好肯定間房連廁所不足100呎, 雖然如此, 但整體總算乾淨企理, 床褥有D軟及枕頭有D低, 其餘都OK, 平均120元一晚, 算係咁喇!

至於地點, 係在曾厝垵最旺嘅位置, 只須走出兩旁其中一條小巷, 就能走出旺點逛街, 屬旺中帶靜, 係好位置。


 

曾厝垵以前係廈門嘅一條古老漁村, 村民主要以捕魚為生, 近呢幾年, 村民轉謍旅遊業, 將曾厝垵改成另一鼓浪嶼, 現在小村充滿著好多特色小店, 尤其係精品店及零食茶葉店, 店舖裝修美輪美奐, 不乏又靚又可愛嘅精品店或連鎖小食店, 遊客完全會被佢吸引內進購物, 仲非常適合年青人行街添。

購物小貼士 :

曾厝垵嘅精品店比鼓浪嶼略平些少, 有D舖在鼓浪嶼都有, 如睇中心頭好, 睇多幾間隔吓價, 比較吓至好買, 不然街頭至街尾個價, 可以相差一半不等。

曾厝垵除咗有得行街街外, 掃街搵食都好掂。

曾厝垵嘅小食店舖或攤檔隨處都係, 小食款式好多, 甜酸苦辣, 冷熱飲食, 周街都係, 仲有好多連鎖食店, 炸蝦, 海鮮, 甜品, 甚至咖啡奶茶, 比比皆事, 而且仲有好多手信店, 如賣零食或茶葉等; 在手信店食完零食糖果, 行過隔離舖飲杯茶, 清清個口, 又食過, 唔使買都食到飽啦！

 

喺一米陽光放低D背囊, 已經差唔多兩點半, 又凍又落雨, 由民宿向右行就係天泉街, 屬旺街之一, 就喺處覓食吧!

隨便走入一間有得食粥粉麵飯嘅小店, 叫食堂小灶, 由於天氣幾凍, 所以叫咗個排骨粥同活蝦麵, 老闆話包好食喎.....

排骨粥, 以小瓦煲上, 好有風味, 令到個粥更香, 粥底同我哋廣東粥有分別, 米同米水分開, 但又唔似潮州粥, 佢有些少綿綿感, 鹹排骨完全融入粥裡, 所以令粥更香, 份量都算OK, 可分到5小碗, 30元人民幣。

活蝦麵, 睇住老闆在魚缸攞起幾隻蝦, 佢話碗麵包新鮮, 就走入去做麵; 果然真係好鮮味, 蝦好甜, 雖然湯底冇點餚製, 湯味完全係由鮮蝦出嚟, 如果唔係活蝦做, 整個麵一定唔得囉! 只係個麵焯得過了火, 軟身咗, 整體屬唔錯, 份量就一般, 算夠食。

喺食堂小灶食完粥麵後, 就沿天泉路走, 轉入國辦街, 見到呢間門面咁卡通嘅小食店吸引咗, 就走埋去睇吓有咩食同影相。

熊如意手工料理, 主要係食吐司及飲品, 淨喺响曾厝垵, 我都見到有3間分店, 另鼓浪嶼及廈門中山路都有分店, 完全係連鎖式經營。

店內堂食好窄及坐位唔多, 得5至6張小櫈, 客人買完都係喺街邊食或一路行, 一路食; 我哋點咗一份巧克力厚吐司, 諗住先試吓味.......

個厚吐司賣相幾靚, 但一D都唔夠熱及脆, 麵包心仍然係凍嘅, 非常失敗, 當時客人又唔多, 店員又有5個, 完全有充份嘅時間煎多1至兩分鐘至拎出嚟比客人享用, 好馬虎囉!

呢個小食係我喺廈門食咁多餐中, 最唔得嘅一餐 。

其實在食堂小灶食完行過幾個舖, 就見到有個大石頭招牌, 寫上"紅犰狳", 就走入去睇吓係咩嚟。

原來裡面有一間民宿及一間西餐廳, 西餐廳英交名叫 Roy's red armadillo, 有位小姐走出嚟用廣東話招呼我哋, 仲推銷佢哋係美國人開嘅餐廳, 食物質素好好等, 而且仲叫我哋上去餐廳旁邊嘅小山丘, 睇睇環島路一帶的海景, 好熱情呀!

由於時間尚早, 又剛食完粥麵, 所以就打算晚上七點左右再嚟食晚餐。

我哋亦約7點幾返嚟食晚餐, 點知整間餐廳都冇客人, 只有寧靜嘅輕音樂聲, 不過我哋仍照舊坐低點菜........ 第一次包場啊!

另一半一向喜歡食Pizza, 所以就叫咗個海南Pizza, 材料主要係雞肉, 洋蔥, 菠蘿及茄醬, 76元; 份量好大, 材料好足, 賣相好好, 五顏綠色, 好吸引, 最好就係薄批, 又熱辣辣, 批脆料足, 正！

另外女店員介紹我哋食芝士卡餅, 46元; 佢講話餅底同pizza 同樣都係自家搓製, 所以一定可靠, 我選了辣牛肉做餡, 卡餅嘅牛肉一D都唔辣, 加上沙律配菜一齊食, 好正呀! 餅身好脆口, 要趁熱食, 果然冇介紹錯。

其實亦想試其他食品, 佢亦有介紹肉醬意粉, 但以上兩樣都令我哋飽到不得了, 可惜啊!

我哋食完, 已經8點幾喇, wifi上完網, 仍未有第二枱客人入嚟, 其實餐廳整體唔差吖, 環境食品都好喎, 價錢亦唔係太貴, 可接受呀!  希望佢唔好執笠啦!

食完西餐, 就慢步行吓天泉街同國辦街呢兩條旺街, 就行到國辦街街尾(近公廁), 有間蟹黃湯包店, 門面光猛企理, 可以用大眾化嘅價錢食蟹黃小籠包, 一於入去試吓啦!

蟹黃湯包有三款, 有魚翅, 貢品及普通, 我哋只叫了28元的普通蟹黃湯包及一碗10元嘅秘製魚丸湯; 湯包有8粒, 外皮唔太厚, 只係封頂位嘅位較厚皮, 內裡湯唔太多, 清甜有蟹黃味, 但唔濃, 豬肉味較重。如此價錢, 要求就唔好咁高, 有70分啦! 而魚丸湯係醬爆類,  湯底係好清甜, 有紫菜味, 但佢最唔好係有落味精, 魚丸都算OK, 但得四粒, 唔抵食。

此店屬連鎖店, 好多旺區都有, 如行得累, 都可以坐低休息食個湯包嘅！

26/12/2014, 一早已起床出去搵食, 其實已鎖定一間食店, 就係响國辦街中間的一間家庭式小食店, 主要賣粥及水餃, 叫曾嫂粥店。

由於喜歡食蝦, 所以又係叫一碗活蝦粥, 28元及一份手工水餃18元。

曾嫂活蝦粥比昨日在食堂小灶嘅粥更好食, 蝦味更鮮, 粥更香滑; 手工水餃就普通咗D, 材料主要係豬肉同菜，咁又唔係唔好食嘅, 有家庭feel囉，總算食到一餐暖笠笠又滿足嘅早餐。

食完早餐都係9:30, 在曾嫂粥店向海邊方向走, 行至曾厝垵公交站(分站), 乘112號車到廈門第一碼頭公交總站落車, 全程約坐12個站, 半個多小時左右, 1元車費, 再在此公交總站轉乘1號公交車到廈門國際郵輪中心, 車費亦是1元, 再乘遊客渡輪到鼓浪嶼。

奇怪！點解唔喺第一碼頭搭船而去郵輪碼頭嘅？原來在2014年10月20日, 廈門已不准外來遊客, 包括中國公民等非廈門市居民及鼓浪嶼居民者, 全部都要到廈門國際郵輪中心乘遊客專船去鼓浪嶼, 船票一律每人35元/來回, 咁咪冇得搭8元來回嘅渡輪囉！呢D福利只留比廈門居民,  嘩! 真係"禁"住嚟比佢搶, 除非唔去鼓浪嶼, 否則都要 "硬比"啦! 5分鐘船程收來回35元人仔, 真過份, 心想尖沙咀去中環真係好抵呀!

唔好以為咁貴冇人坐, 就係大把人坐, 所以唔係去到就有船搭, 我哋約11:00到碼頭, 都只可搭12:50嘅船, 買完票, 排在我後面買飛嘅亦只能買下一班(13:10)嘅船, 可想而之呢條渡輪線幾好賺呀！

PS : 如想搭早上嘅船到鼓浪嶼, 最好提早一日到碼頭買票, 否則多數都只能買到個幾兩個鐘後嘅班次。

多年前已曾嚟過鼓浪嶼, 以前冇咁多遊客, 島上亦冇咁多店舖, 主要係海鮮飯店，另外都會到島上嘅名勝睇睇, 而且仲唔駛門票添; 但今時唔同往日, 昔日免費嘅景點, 通通都要收入場費, 最平都要收30元, 而日光岩就收60元, 又要行餐死上山, 又要比錢, 真係......

如要去島上名勝, 千萬唔好續個景點比錢參觀, 可買100元參觀5個景點嘅套票, 在郵輪碼頭諮詢處有售；另外亦可在攜程網買套票, 仲平多10元, 只須90元, 套票包含五個島上景点: 日光岩、菽庄花園、皓月園、風琴博物館及國際刻字藝術館, 可在島上嘅旅遊中心取票。另外亦可在所住嘅民宿隔價, 好多民宿客棧都有提供以上呢!

而我哋就冇買任何名勝嘅門票,  無受門票景點嘅路線及時間束縛, 總之隨處行, 隨處睇啦!

鼓浪嶼除咗有靚景睇外，周街都係美食。

由碼頭向左行，約十幾分鐘，就會行到食街 - 龍頭路，所有小食店，小飯店都集中此處，真係一個掃街好地方。而有幾間食店或攤檔喺曾厝垵及廈門中山路都有分店，如之前錯過某些小食，都仲有機會搵到。



 

鼓浪嶼碼頭附近，有幾檔賣魚丸，而呢檔鄭家墨魚丸，鄭婆婆就非常強調其墨魚丸係由佢親自主理，每日用新鮮嘅墨魚手打而成，由製造、烹調及銷售都係由佢負責，行過見佢D魚丸幾大粒，又幾好樣，咪買咗一碗試吓，15元有8粒，口感非常好，好彈牙，唔太多粉，仲有實質嘅墨魚小粒在魚丸內，果然真材實料，雖然有落味精，但可接受，呢個墨丸喺我喺廈門食嘅魚丸中較難忘，味道、份量同價钱都係較好，值得推薦。

趙小姐的店喺廈門都算係名牌字, 名下除趙小姐的店, 仲有張三瘋歐式奶茶及潘小蓮酸奶。

趙小姐的店主要係賣餡餅, 茶葉及歐式茶具精品; 據聞此店係由趙小姐後人由南洋回流中國開嘅, 趙小姐家住廈門鼓浪嶼, 接受西方教育, 懂得自製西式餡餅, 後來移民至南洋, 家人好喜愛其餅食, 於是在改革開放後回歸故鄉開咗趙小姐的店。

由於趙小姐的店裝修華麗, 真係比佢吸引咗入去睇吓, 入到店裡真係好想幫襯佢哋買嘢, 包裝好吸引, 店員又打哂bow 呔或著住女僕製服, 餅食唔太貴, 但茶葉就唔平, 因重量太輕喇。

我買咗一包10元嘅餡餅, 裡面有4種味道各一, 包括鳳梨酥, 蜜柚餡餅, 紅豆餡餅及綠豆酥; 鳳梨酥味道一般, 而且係冬瓜餡, 冇得同台灣微熱山丘比啦! 蜜柚餡餅唔算太甜,  綠豆酥都係喺南普陀寺買嘅好, 主要係餡唔得; 三款較好嘅係紅豆餡餅, 唔太甜。

所以唔好睇佢係名牌就一定啱食, 好彩只買散裝包, 試過就算吧! 

我哋本著掃街精神, 繼續覓食, 見到有人排隊買嘢食, 門口咁多蒸氣, 原來賣腸粉也。

走入去, 買票叫咗個鮮蝦腸+蛋+肉+菜, 18元, 用大紙杯裝住一條大腸粉, 賣相有D唔整齊, 但顏色配合得幾靚, 有蝦有肉有蛋有菜, 鼓油味有調過, 蝦好鮮及夠彈牙, 共有4隻蝦, 配合蒸豬肉, 係唔錯嘅選擇。

食完腸粉, 沿龍頭路行, 好多小食店, 人頭擁擁, 遊客企哂喺店前等做好嘅小食, 我哋當然在其中, 等燒好嘅醬烤豬腳, 約五分鐘後, 整好嘅豬腳就在手中, 企在街旁慢慢品嘗。

豬腳當然骨膠原好豐富, 醬汁亦唔錯, 當然唔及阿媽嘅手筆, 但味道OK, 只係豬腳冇豬手咁多肉, 骨較多,  其實我覺得在大陸30元一隻豬腳都幾貴, 但遊客區, 就係咁喇!

食咗咁多嘢, 要飲番杯嘢解吓渴, 在趙小姐的店旁就係張三瘋奶茶, 在廈門係好有名嘅奶茶店, 網上個個讚, 就試吓係咪真先.....

我叫咗奶茶, 另一半叫咗朱古力, 兩款都係20元一杯,  先講朱古力, 真係非常普通, 完全係喺超市買返返嚟嘅朱古力粉開嘅一樣, 完全冇特別; 而奶茶就同係台灣或香港嘅街邊茶店差唔多, 唔會太差, 不過佢嘅特色係喺奶茶裡加咗提子乾同瓜子, 可以一路飲茶, 一路食小食, 而奶茶又配合到提子乾同瓜子嘅味道, 真係非常好嘅配搭。

除咗奶茶, 佢哋仲有咖啡, 芝士餅同牛軋糖及曲奇餅賣, 另外亦有佢哋隻貓做商標嘅紀念品賣添, 牛軋糖同曲奇餅又細又少, 賣36元, 認真唔平呀! 不過就深受年青人歡迎喇。

我哋在鼓浪嶼食完又行, 行完又食, 都行咗食咗幾個鐘, 好彩唔係主食, 喺以小食為主, 所以行到入黑, 就喺處食番餐海鮮晚餐至搭船返廈門。

在食街龍頭路走咗個圈, 睇吓D食店海鮮價, 有平有好貴, 貴到拍得住香港西貢區都有, 兩個人食吓蠔, 蝦, 蟹等, 冇魚嘅話, 都要5至6百元, 我寧願返西貢食啦!, 最後搵到間小店, 叫國耀小吃店, 個男知客猛咁落咀頭, 猛話平靚正, 好, 因為真係唔貴, 就入咗去試吓!

我哋叫咗5個餸, 4個海鮮1個菜, 其實海鮮嘅味道係OK嘅, 海鮮算新鮮, 而我哋嘅海鮮一律用同一個汁烹調, 簡直係連個鑊都唔駛洗, 一口起煮哂佢, 10分鐘後, 5個餸一齊上, 但全部都唔熱嘅, 我覺得係煮完咗, 放咗喺度冇人拎比客人咁囉, 而蜆及聖子雖然新鮮, 但好似冇洗過咁, 好多沙囉, 而海瓜子係第一次食, 味道同質感好似淡菜, 亦有些少沙喺裡面, 而較差竟然係個芥蘭, 唔單止苦, 而且仲有D生添, 雖然價錢好平, 只係整數100元, 但真係有D失望囉!

 

食完餐失望海鮮餐, 慢慢走去碼頭搭船, 一路沿海邊行去, 順便欣賞埋廈門鷺江夜景, 有D似縮細咗嘅上海黃埔灘, 原來廈門都真係好繁華喎, 不過都係香港維港夜景最靚!

回程返廈門嘅渡輪唔駛去國際郵輪中心, 而係去第一碼頭上岸, 咁就方便搭車, 上岸唔係行去碼頭前面嘅巴士站, 而係行去(向番曾厝垵方向行)十幾米嘅另一公交車站, 乘29號返曾厝垵(阿川海鮮對面)落車。

同另一半拍拖行返去客棧, 在天泉路行吓, 見到一間非常colourful嘅小食店, 主要售吐司, 咁就食埋宵夜至返客棧休息。

阿信吐司店係由年青兩夫妻經營, 兩小口子嘅偶像係五月天, 所以整間店就以五月天做主題, 在店外牆身畫上五月天的漫畫俏像, 店內又掛上五月天的演唱會照片, 又放上電子結他作裝飾, 而店內牆壁貼滿五顏六色嘅報示貼, 報示貼上面寫上客人嘅心聲及支持阿信吐司店嘅留言, 既溫馨又可粉飾牆身, 一舉兩得。

我哋先叫咗一客雙層奶酪吐司及一客雙皮奶試試, 老闆娘極力推薦佢自家製嘅雙皮奶, 只係6元, 試吓都冇妨, 果然冇介紹錯, 雙皮奶好滑, 做法有D似啫喱, 可能有落魚膠粉, 而且最好係唔凍又唔太甜, 好啱口味; 而吐司就係由老闆負責, 睇住佢即做, 約10分鐘送上, 熱辣辣嘅厚吐司, 芝士融化喺麵包上, 又香又脆, 鹹甜交雜, 而麵包心熱烘烘, 超好味嘅厚吐司啊! 所以再encore多一份煉奶厚吐司, 9元一份, 好抵又好味; 相比在熊如意手工料理, 老闆就用心做好吐司給客人, 而熊如意就超級馬虎快做給顧客, 真係天淵之別。

 

27/12/2014

10:30 天氣非常唔好, 一路落大雨, 天氣又寒冷, check out 一米陽光客棧後, 連早餐都唔食, 搭751號公交車出發去南普陀寺, 只須坐到廈門大學總站落車, 車站旁就係南華寺同廈門大學, 非常方便。

到南普陀寺主要唔係拜佛, 只係為美食而來, 南普陀寺斋菜一向有名, 多年前嚟嘅時候已一試難忘, 今次重遊舊地, 斋菜依然美味, 特別是"香泥真藏", 真係我嘅至愛, 一向唔太愛食芋頭嘅我亦被 "佢" 打動呢!

除咗斋菜, 南普陀寺亦自家製作糕点餅食零售, 我亦買咗幾款試試, 特別係普提蘇, 味道及品質亦相當不錯, 推薦!

PS : 南普陀寺有兩處斋堂, 我所去嘅係海會樓, 內裡裝修較舊, 要到售票處點菜買票, 如只得2至4人, 此處較適合及可點例牌(小), 價錢約30幾元左右; 但如去近公交總站那間, 那裡裝修較華麗, 招呼較好, 不用出去買票, 而斋菜大致差唔多及有得獎斎菜選擇, 但就冇例牌供應, 最少都要選中牌, 而得獎斎菜多數係供10人以上享用, 當然價錢較貴點, 大家要留意吧!

食完斋, 雨冇咁大, 順便入寺走走, 寺廟仍在進行翻新工程, 大約已完成7成修葺, 翻新後的殿裡內外非常堂皇華麗, 雖然天氣唔好, 但仍然有好多遊客, 特別係旅行團, 一定必到, 但就冇得喺處食斎。

當然南普陀寺亦屬名勝, 而且交通方便, 又鄰近廈門大學, 值得到此一遊!

參觀完南普陀寺, 順便去埋廈門大學睇吓, 廈門大學係中國其中一間美麗大學之一, 以前亦曾參觀其運動場部份, 好宏偉, 今次再重踏校園。

從南門入口入大學前, 一律要交身份証比保安員檢查及Scan, 先至可入內參觀。

其實廈門大學好大, 近南普陀寺嘅廈大喺其中一處入口, 屬南門處, 另可從曾厝垵那邊入廈大, 那邊則屬西門入口。

大學內周圍綠樹成蔭, 環境優美, 由於我冇買大學地圖, 所以就以 "有路就行, 有景就影"嘅原則"隨意走, 約走10分鐘, 就見到主要地標 - 芙蓉湖及廈大主樓, 影完幾張相, , 原本想再行入去參觀魯迅紀念館及人類博物館及去埋大學裡嘅咖啡街嘆coffee, 但雨就越落越大, 實在唔可以再行入去了, 唯有馬上出去搭車在7天連鎖酒店check in, 真掃興啊!

在booking.com訂此酒店, 好平, 只係人民幣176一晚, 地點唔錯, 可惜清潔方面唔得全面。

去完廈門大學參觀, 就喺公交總站等959路車到中山公園對面落車, 落車後向右邊走10米左右就見到7天。

(PS : 在廈大公交站等959號車, 要在路線牌旁路邊等, 959號冇站頭, 司機會在總站旁上落客)。

第一次住7天連鎖, 呢間中山公園分店座落在一幢住宅大廈嘅地下至4樓, 附設一間擺貨凌亂嘅便利店; 第一個印象係好唔整齊, 大堂張梳化仲好污糟同凹咗添。

我要求要一間有窗嘅大床房, 在二樓, 一入房, 即見浴室門口的地板破損但未有修理, 這容易令客人拌倒; 洗手盤外底有好多污漬; 淋浴玻璃門同樣有污垢及關不到, 最可怕是房裡的牆身, 有很多被打死嘅蚊子屍骸黏在牆壁上, 但仍沒有清理, 所以對此酒店印象認真麻麻。

自主大床房的大床夠大, 床褥軟硬適中, 只是枕頭較扁; 雖然房間在清潔上做唔出基本水準, 但幸好床舖尚算潔淨。

至於地點, 交通方便, 慢行10分鐘就到中山路; 門口有公交車站, 坐4路公交車到二市站下車, 在此轉BRT公車就可到機場, 火車站及廈門北高鐵站。

整體酒店已稍舊, 應要再裝修, 如在清潔加把勁, 是非常推薦 。

中山路步行街係廈門最古老嘅商業街, 亦同中國其他城市嘅步行街一樣, 用古建築群襯托著現代零售店舖, 而廈門係以古南洋騎樓式樓群串連, 同廣州北京路及上下九相對成姊妹作品, 樓群外部有油漆翻新, 夜晚配合燈光, 的確幾靚。

同其他中國步行街一樣, 主街主要係連鎖式集團店舖, 所以我較喜歡行橫街, 可發掘到特色小店, 而且有時貨品價錢仲比主街平添。

中山路橫街主要以一條街形式經營, 成條街一係賣茶葉, 又或掃街小食, 甚至係淡水珍珠等一條街, 想買咩嘢, 就行嗰條街隔價又隔貨就得。

由7天酒店慢步至中山路約10分, 見在中山路頭段有間外型古色古香嘅建築物, 就被佢吸引咗, 原來係賣魚丸及廈門小食, 即刻入去試佢出名嘅至尊鯊魚丸湯, 同時叫多一客簿餅, 先試試味......

至尊鯊魚丸湯, 內裡只得5粒, 20元, 都幾貴, 魚丸size唔係好大, 諗住好味補番數, 點知食落唔係好特別, 只係幾彈牙, 但食唔出係鯊魚定其他魚味, 反而鼓浪嶼鄭婆婆嘅墨丸仲好味。

至於簿餅, 8元兩條, 餡料以蔬菜為主, 有紅蘿蔔絲, 青瓜絲, 蛋絲及生菜絲, 其實係一個唔錯嘅素小食, 但唔知點解簿餅外好多油, 一喺煎餅時用好多油整, 攪到整個餅油淋淋咁, 失哂色囉！

其他嘢就冇試喇, 所以千奇唔好被個"百年老店"四個字就諗住一定有好嘢食。
 

喺中山路行咗個幾鐘, 個肚開始打鼓, 又係時候坐底食杯嘢, 食個包。

在中山路中後段, 有一間樓上Cafe', 叫小豬找茶, 最得意係上樓處有隻高過大人嘅麥兜毛公仔作招牌, 一於入去食嘢。

小豬找茶唔係以主食為主, 零星有幾種飯食, 如咖哩雞飯同牛腩飯, 佢主要係飲嘢同包點小食, 我哋各叫了一杯美式凍咖啡及原味熱紅茶拿鐵, 分別係14元及12元, 唔係貴D就好D, 相反係原味紅茶拿鐵好飲好多, 唔加糖都好飲過凍咖啡, 另一半又揀錯嘢飲喇!

另外又叫咗個芝士焗地瓜10元, 一客兩件, 細細個, 焗地瓜香口又香甜, 好食; 乳酪烤吐司9元, 即係煉奶烤吐司, 都好好味, 冇揀錯地方嘆茶。

小豬找茶環境舒適, 一共有兩層, 仲有免費Wifi, 所以我哋都喺處坐咗個幾鐘上網, 好讓雙腳休息吓, 繼續周圍行。

離開小豬找茶已經5點, 個天都黑哂, 我哋從小豬出嚟向右轉入另一旺街, 又再行過, 經過一個大型商場, 叫南中廣場, 見全部嘅廣告都係食肆, 咁就入咗去睇吓有咩嘢食先。

地下商場舖, 都係零售時裝同飾品為主, 都好凋零, 上二樓睇吓, 全部都係酒樓飯店, 有粵菜, 私房菜, 川菜及閩菜, 行咗二樓一個圈, 決定選一間廈門菜試吓, 但時間尚早, 所以諗住出去行多一個鐘再返嚟食。

一小時後, 返嚟呢間叫 "清菜家老廈門菜館", 但見人山人海, 好多人等位, 咁旺場嘅, 全層最好生意係呢間菜館; 我哋最終都等咗個幾鐘( 約8:00)至有位。

馬上叫菜, 在等位時已click定菜式如下 :

1) 當歸枸杞炖赤肉, 一盅18元, 賣相及材料都係非相唔靚同簡單,  個湯係呈透明，真係估唔到佢超甜超好味, 全冇味精, 真係只有以上三種材料, 但竟然可以炖到呢個效果, 好嘢!

2) 金蒜娃娃菜, 16元, 最特別係個豉油, 佢係加咗豬油一齊住嘅豉油, 所以令到個菜好香甜。

3) 古法醋燒雞, 28元, 用甜醋炆雞, 第一次試, 雖然賣相「黑蚊蚊」,  一D都唔靚, 但醋令雞有酸甜味, 酸甜鹹融入雞裡, 唔錯喎, 而且例牌都有半隻雞, 抵食。

4) 酸菜魚, 42元, 超大鍋, 大魚片在面, 娃娃菜同酸菜在底, 賣相唔錯, 大魚好甜好新鮮, 雖然我唔好食淡水魚, 但真係被佢嘅配菜同湯味吸引, 辣得好好味, 但由於得兩個人, 實在食唔哂, 我覺得好浪費囉, 早知唔叫 金蒜娃娃菜啦! 

5) 花生綿綿冰, 20元, 係佢哋嘅招牌飲品, 果然好飲, 濃濃嘅花生味, 凍飲唔太甜, 剛好中和番食酸菜魚嘅辣味。

 清家菜除咗菜式好得外, 環境同服務都一樣咁得, 最初揀呢間都係見佢裝修唔錯, 又多人等位, 價錢又唔貴, 可以話抵食夾大件添, 所以至選呢間, 果然選擇正確。

台灣小吃街，位於第一碼頭對面嘅一條小街，由碼頭過去有行人隧道，亦好近中山路，係一個小吃掃街嘅好地方。

據知，呢條街係由一班台灣人嚟到廈門做生意而攪起，整條短短小街，中間及兩旁都係小食店，中間攤檔全部賣台灣小吃，如烤海鮮, 烤魚丸, 章魚小丸子等, 連鐵板牛排都有, 就坐喺檔口度据排, 真係另有風味; 一入到呢條街，真係好似置身於台灣夜市，特別係同宜蘭夜市相當似，形式都係一模一樣，所以深受遊客及當地市民歡迎，條窄窄嘅街都被遊客包圍住食嘢，而我哋只係幫襯買咗半個芒果食，因為剛食飽麻。 

個芒果好甜好掂, 10元, 其實都幾貴, 半個都要10元, 整個要25元, 為起上嚟個芒果要差唔多要30元港幣, 廈門消費真係幾高呢!

28/12/2015, 今日下午要南下回港了, 所以8:30就出去食早餐, 7天連鎖係唔包早嘅。

其實我已一早鎖定食早餐嘅地方, 就係世界連鎖店Pizza Hut, 中山路頭段有分店, 因昨日經過見佢show牌有早餐食, 而且款式幾多, 中西都有, 價錢都係十幾廿元, 一於試吓!

咁早, 餐廳只開樓下一半地方, 亦只有兩枱客人, 我哋中西各一點了如下早餐 :

1) 鮮蝦粥配煎餃子, 15元,  個粥雖然唔大碗, 但都唔太少, 唔係之前食嘅活蝦粥, 但都唔差喎, 蝦一樣鮮甜彈牙, 個粥好綿, 係廣東粥, 而煎餃子有5隻, 整個中式早餐份量及價錢非常合理 。

2) 經典美式早餐, 21元, 含麵包, 烟肉, 薯餅, 煎蛋各兩件, 仲有熱飲冇限添飲, 飲Latte 唔加錢, 我哋最後各飲咗三杯, 超級抵呀! 埋單都係36元, 香港食大家樂都唔得啦!
 

食完早餐, 由橫街行返7天check out, 酒店職員教我哋在門外的公交車站搭4號巴士至二市站(搭三個站)落車, 再轉搭BRT就可去到廈北高鐵站會快好多, 果然真係在一個半鐘內到達車站。

當時真係唔明咩嘢係BRT, 以為係軾輕軌鐵路, 原來係起咗條高架來回單線路,  全部只准指定巴士行駛, BRT有3條線, 其中一條係往廈門國際機場及廈北高鐵站, 我哋在市二開始搭至高鐵總站, 都係約50分鐘, 全程唔塞車, 票價係3.5元/位, 比一般巴士貴1.5元, 好合理。

廈北高鐵站, 建築得美輪美奐, 可以講係幾宏偉, 果然係有大車站風範,  其實來往嘅交通公都算係多選擇及方便。

我哋係搭2:49嘅D2317車次返深圳北, 約在6:35到達。

我哋早咗到廈北高鐵站, 仲有成個幾鐘至開閘上車, 一於搵處地方坐低食吓嘢先。

廈北站雖然面積大, 但食店就唔多, OK嘅就只得兩間, 就喺二樓嘅KFC及一間叫一尊食尚匯, 主要售中式飯餐為主, 我當然揀呢間, 因為佢有售姜母鴨。

我當然叫姜母鴨套餐啦!, 喺廈門冇食呢個名菜, 套餐係36元, 如要例湯再加5元, 我冇加, 不過嗰套餐都算豐富, 有白飯, 油菜, 小蕃茄及熱茶, 最重要係主角 - 姜母鴨, 味道唔錯, 姜味濃郁, 姜好味過鴨, 鴨肉瘦但唔"鞋", 如果喺酒樓食此菜, 可能仲好仲地道, 希望下次嚟廈門/福建其他地區時食得到。

今次旅費(人民幣二人計)如下 :

1)  來回高鐵票2套 : 622元

2)  一米陽光客棧兩晚 : 240元

3)  7天連鎖酒店1晚 : 176元

4)  全程公交車費 : 23元

5)  廈門鼓浪嶼渡輪來回兩套 : 70元

6)  茶葉及飾物 : 400元

7)  全程用餐費 : 920元

以上合共2451元/2 = 1225.5元/人
 
後記 : 一向都係以 「民以食為天」作出外旅遊最重要嘅部份, 可能920元作為兩人嘅用餐費會貴一點, 但各人睇法吧! 能享受各地美食係一件樂事, 最緊要開心。

現在嘅廈門係一個非常方便旅遊嘅地方, 由香港出發搭高鐵, 3個幾鐘就到, 係又平又快嘅方法, 而市內交通方便, 今次完全冇搭過的士, 對此我非常樂意, 又慳錢又可體驗當地人生活, 如時間許可, 我亦想去埋金門及福建各地。