我地第一個景點黎咗水鄉一條街,領隊由出發到 ....到達,佢都係同我地講...係蘇州一條街,後尾有團友望到門口個牌寫住水鄉一條街,先知搞錯咗.

中午,去咗呢間東云閣大酒家食飯,嘩....第一味,我鍾意...就係大頭蝦炆伊麵,賣相都靚過人.
食落仲好好味道.呢餐食得好豐富.

除咗呢間酒樓,全條街都係食肆,係呢度只要有錢,真係唔驚餓親.

旅遊車因車身太大,要係山腳停低,我地轉坐農莊裡面既專車上山.

入到農莊,先安排我地去食糖水,跟住拎行李返入房.

每間獨立屋,有2層,2層咁有四間雙人房同埋一間三人房,三人房個間冇冷氣,所以冇安排團友入住.

個度D洗手間麻麻,冇間隔,一沖完涼,全個洗手間濕晒,而且D水唔去....搞到我阿媽一大餐.

仲有裡面D冷氣,負責人話只可以開到26度,叫我地唔好較低過26度,唔係電壓負荷唔到,個陣仲衰,我話下.....

而且佢個廳冇冷氣,得間房有咋,所以我地要吹風扇.

我地擺低晒D行李,出去搵節目,個度有提供卡啦OK,釣魚,游水,但我諗個泳池唔會有人游卦,一來都冇救生員,二來D水乾唔乾淨.

我見到D團友去釣魚,先借魚杆,再買魚餌,釣魚釣到上黎,而又要既話,好似要5蚊一斤,而有D團友去咗唱卡啦OK同跳舞.我就同屋企人四圍行下.

係農莊有咩食,見到相片就知啦,菜係最多既,咁都好,食菜好呀.

我習慣早起,而伯父伯娘,阿媽都習慣早起,起咗身,冇野做,咁...我係間屋四圍影下,再影埋外邊

係間屋影完相之後,再同阿媽,伯父伯娘出去行下山,影下相.

行完東,再行埋西,行完番到營舍,其它D團友先岩岩起身.

農莊裡面,早餐提供雞蛋,蕃薯,金瓜餅,粥....等等食物,算係咁啦.

農莊裡面其實冇乜好玩,所以我地提議領隊早D離開,去第二個景點耐D仲好啦.