離台當日，小肥再次跟隨超閃旅遊書覓食，訂定位去一家被形容為「低調小籠包名店」o既「邊田庄」度午膳。書上o既電話雖然正確，但原來餐店已搬往新址，幸好我地嗰日叫咗架車，司機哥哥又熟地頭，結果都安全及準時到步。

接待處用上雲石作桌，氣派十足。門旁擺放出紅地毯及印滿店名o既佈景版，喬遷開幕儀式應將於日內進行。步進樓底高高o既大堂，即可望見樑上o既水晶吊燈及四周美輪美奐o既鮮花，配合埋木製o既傢俱椅桌同牆上o既字畫，感覺極之大方典雅。女洗手間因可充當為新娘子專用房間，房內配套齊備，一樣咁華貴。

餐桌用上絨造枱布，飯前亦有熱毛巾抹手，服務生溫婉有禮，各方面都流露出細心與體貼。打開餐牌，首頁已道出店主為頌親恩，餐廳名字特意用上其父親之大名訂設，有意思得很！既然餐店蘊藏著濃情厚意，六人就應友善o既靚女姐姐推介，點咗多款鎮店菜式。

1)      豆酥鮮蚵豆腐（NT 280）：第一道豆腐以熱鍋燒住上，好夠新鮮熱辣。面層只見橙黃色o既豆酥，下面其實暗藏白雪雪o既豆腐同鮮蚵。豆酥香口得黎質感粗嚡，連同豆腐同鮮蚵一齊食則更能特顯豆腐如何幼滑如絲，蚵仔如何肥美鮮甜。

2)      芝麻牛蒡（NT 280）：修長o既芝麻牛蒡輕巧香脆，淨聽餸名好似一款平平無奇o既餐前小食咁，但當用上精美o既餐碟及靚花伴上，即令食客眼前一亮，就連身價都提升不少。

3)      酥炸蒜香肥腸（NT 380）：炸豬大腸喺香港可以話係屬大排檔食品，「邊田庄」o既師傅選用精巧o既花瓶黎承載，粗作頓成幼細o既藝術品，唔打得都睇得先呀！蒜香肥腸炸得好夠乾身爽脆，惹味得黎一啲押味都冇，妙極！

4)      經典原味小籠湯包（NT 180/八隻）及絲瓜蝦仁湯包（NT 200/八隻）：小籠湯包及絲瓜蝦仁湯包勻以木盒蒸煮，呈上枱時仍有煙霧散出。湯包皮層軟薄輕盈，小籠湯包鮮香嫩滑，個人只係略嫌絲瓜蝦仁餡心個味道清淡咗少少，唔夠濃郁。

5)      油淋去骨雞（NT 380）：XO仔最怕食骨，嘻嘻，依味油淋去骨雞就啱哂細佬口味。已去骨o既雞肉放置喺藤篩上，側旁插咗一小盆靚花，視覺上田園風味甚為濃厚。用油淋過o既雞肉香嫩柔滑，食落其實一啲都唔油膩，睇清楚啲先發覺原來此乃因為多餘o既油份就滴流喺藤篩下o既碟子上，結構編排得好有創意同效能。

6)      青蟹炒年糕（NT 1,280）：小肥因敏感問題唔食得蟹，不過靚餸已教細佬一飽眼福。單睇青蟹炒年糕o既心形大碟已夠震撼，仔細再睇兩隻青蟹不同部位o既舖排，又會覺得其擺位型似心臟，兩隻蟹蓋緊貼一起更營造出心心相印o既效果，廚師o既設計認真唔簡單。姨媽大讚青蟹鮮甜幼嫩，索盡精華o既年糕煙韌香濃，外觀味道同樣攞足一百分！