呢間民宿係在攜程網訂的, 原先係訂石敢當客棧, 但普通房已訂滿, 只有較貴嘅房, 攜程網工作人員打長途通知是否改, 我便揀我的第二選擇 - 廈門一米陽光客棧。

喺廈門高鐵站出口左邊行, 就係公交車站, 我哋搭咗943路公車在海韵站落, 差唔多個半鐘至到, 落車行出環島路, 就可見到一片海洋景色, 然後徒步約1500米到曾厝垵, 原本可以同另一半浪散步到曾厝垵, 可惜雨越落越密, 真係要快步行, 令我哋唔可以慢慢細膩沿途風景, 真可惜。

沿環島路一直走到阿川海鮮酒家(有兩家阿川海鮮, 一間舊D, 一間新D, 在新那間走入), 就會見到曾厝垵嘅大牌坊, 沿路直入, 再穿過小巷, 終於搵到一米陽光。

我訂咗兩晚, 25號係星期四, 所以係101元人民幣, 26號星期五就139元, 合共240元, 非常抵住, 但房就係屬超細房....... 

超細房在2樓, 我哋住206號, 一上樓梯就係, 一入去, 房間真係好細, 整個房冇十步距離, 而且係劏房形式, 廁所係自行間出, 面積都係非常細; 床係5呎, 旁邊有一書枱, 約2呎多些少, 所以好肯定間房連廁所不足100呎, 雖然如此, 但整體總算乾淨企理, 床褥有D軟及枕頭有D低, 其餘都OK, 平均120元一晚, 算係咁喇!

至於地點, 係在曾厝垵最旺嘅位置, 只須走出兩旁其中一條小巷, 就能走出旺點逛街, 屬旺中帶靜, 係好位置。