今次嚟麗江, 參考咗TripAdvisor嘅麗江食店排名去嘗美食, 我真係專程由五一街行去玉緣路, 雖然路程頗遠, 好在麗江古城店舖多, 行吓睇吓, 經過完大水車, 向黑龍潭公園方向走多5分鐘就到。

可能已過兩點, 咖啡店人不多, 老闆都坐喺門口嘅梳化同人傾計, 見我哋入嚟就馬上招呼。我哋揀咗二樓坐低, 港童即刻睇餐牌揀嘢食, 先嚟飲品, 芒果奶昔, 好好飲呀! 好香嘅芒果味! 熱辣辣嘅Latte, 又係好正, 咖啡香濃, Mocha, 賣相好靚, 起初味道適中, 但飲到中段就較甜。

主菜就聽咗老闆娘嘅介紹, 佢係正宗印度人, 個樣一D都唔似印度人, 而且又識講普通話, 真係以為係自已人呢! 老闆娘幫我哋叫咗瑪婭印度咖哩雞, 唔辣帶甜, 同在香港嘅印度咖哩味道截然不同, 老闆娘就話佢印度家鄉喺咁煮, 印度咖哩都有好多種類, 所以都會有唔同, 另外所叫嘅牛肉咖哩又唔同味, 呢個有些少辣, 但唔過份, 咖哩汁比牛肉更好味, 附有的印度沙律可沖淡吓咖哩嘅濃味, 好得呀!

港童同另一半就非常欣賞瑪婭雜錦薄餅, 又多料, 又大個, 又好味, 除清邁Duck's那個海鮮薄餅令佢哋回味外, 呢個Pizza真係令佢哋一試難忘。

甜品我哋叫咗一件New York Cheese Cake, 都幾大件, 30元, 港童同另一半比較喜歡, 我就略覺甜咗D, 但芝士味好濃, 用料的確十足。

果然在TripAdvisor高居第一位, 值得推薦