「Inoda Coffee」屬西式咖啡店，門外擺有多款餐飲嘅模型，極之清晰，食客可以睇啱先排隊入座。每天早上八至十一時更有兩款特價推介早餐供應。

咖啡屋環境開揚，坐得都幾舒服，但為怕影響店內其他食客，結果就冇四周拍下室內照，唯有希望透過門外嘅玻璃可以影到少少。

對早餐最講究嘅哥哥叫咗份「京の朝食」（1,380円），豐富得黎色彩很是鮮艷。細佬就點咗客法式西多士「フレンチトースト」（560円）。嘩，舖滿白糖嘅法式西多士不單熱辣辣，質感更加係厚潤鬆軟，夾入咗牛油食落都唔覺膩滯，大肥爸爸試咗一口即話要加多份，證實堅好味。襯埋杯香滑冰涼嘅凍牛奶咖啡「カフェオレ」（590円）可真夠爽！

「Inoda Coffee」面積寬廣，服務生態度良好，雖則繁忙時間九人未能同桌進食早餐，但平均每人一千円左右已可享用一頓簡單且美味嘅早餐，實屬抵食之列，個人誠意推介必吃法式西多士「フレンチトースト」！

天婦羅專門店門外貼有午市及節令推介之餐牌，不過經酒店訂座時早已選定好套餐。九人被安排入座圍繞著師傅大舞台嘅吧位；除咗可以邊食邊欣賞師傅炸煮食物，食客更可以喺天婦羅最新鮮熱辣嘅狀態下進食，可謂最佳位置也。

原來每位貴客可免費飲用烏龍茶一杯。餐桌上擺有任用嘅紙巾、蘿蔔蓉及調味料。午餐食炸野咁熱氣喎，XO仔當然係要先啤一啤佢啦！

天ぷら「梅」（2,160円）：點好哂飲品後，姨姨隨即每人送上載著午市套餐所包咗嘅麻醬豆腐前菜、蘿蔔蓉豉油、青檸、鹽及一隻吉碗仔嘅托盤。盤中嘅豆腐前菜幼嫩柔滑，以麻醬點綴即倍添惹味醒神。

銀髮老師傅迅即陸續為吧枱嘅客人炸煮各種天婦羅菜式。第一道出場有兩隻乾巧香脆，且彈牙爽口嘅天婦羅蝦。接著有厚潤芳香嘅靚菇拼爽脆嘅慈姑。青菜代表有味濃嘅青椒同清脆嘅蘆筍。最後黎多件一樣咁香脆美味嘅雜錦天婦羅蝦餅「かき揚げ」，連同白飯及麵豉湯食，腸胃確真滿足。

天婦羅專門店「天一」環境企理衛生，服務生友善有禮，天婦羅菜式即叫即炸，於吧位進食更可確保新鮮熱辣，午市套餐質高味佳，平均三千多円一位絕對稱得上超值。

平時外遊都會揀啲有分儲嘅連鎖酒店住，今次哥哥決定聽取經常出埠嘅長輩推薦，一試包羅萬有嘅「Fraser Residence Nankai」公寓式酒店。「Fraser Residence」位置夠中央，離各大車站不遠，大多購物熱點更加係行都行得到，附近亦不乏酒吧食肆，方便得很！

酒店大堂雖看似簡約，但每日當值嘅兩位職員都非常好禮貌，對住客不同需求都幫得上手，例如少咗毛巾會立即處理，唔識用洗衣機又會教路，面對小肥勁多問題仲好有耐性地續一解答，絕對值得一再加許。

肥肥家族一家四口租住咗一個有兩間雙人房嘅單位，包有廚房、爐頭、大雪櫃、小廳、洗衣機、乾衣機等，豪華舒適，且設備齊全。三晚收費不一，平均每晚49,648円，包哂四人早餐同稅，價格十分合理，所以下次黎大阪玩都一定會再住過！

小表弟啱啱搬咗去大阪工作，得悉XO仔與姨媽們會到訪，一早就約定搵晚一齊去食燒肉，地點就由地頭蟲揀咗去間方便佢一家四口嘅「ぜろはち」（Zerohachi）。餐店位於「OCAT」大阪市區航站中心內，方便又易搵。

店子門外已可見到有關120分鐘之燒肉放題簡介，並講及所提供之神戶和牛榮獲金牌，似乎都幾有來頭。眼見海報有型男福山雅治推廣朝日啤酒，不用多想小肥已決定啤啤佢，希望飲多幾杯可以變到福山咁型到凍齡。長輩們啱啱搬完酒店有感疲累，唔多想飲酒，結果就冇要埋飲品放題，邊個想飲先續杯叫，「福山朝日萬歲！」

由於表弟有兩位小朋友，大大小小加埋有成十三人，佢一早就訂定套餐，仲包咗間有四張卡位嘅廂房，好等大家可以食得舒服啲，細路仔又可以有更多活動空間。佢所點嘅「赤コース」晚市放題套餐分咗三個價格：小童為540円/位、成人為2,678円/位、六十歲以上嘅長者則為2,138/位，均可從指定餐牌上任意點選食物及飲品。細佬同兩位小姪仔姪女玩到忘哂形，之後先發現嗰晚自拍比拍食物照多，未能與大家分享燒肉之相片，還望讀者們見諒。

燒烤比較熱氣，故燒前及途中都有點泡菜及沙律中和吓，其中泡菜香辣惹味，海苔沙律「わかめともみ海苔のサラダ」更加係鮮香爽脆，極為清新。燒肉大都未經醃過，貴客可於燒煮時或後自行混入桌上嘅八款調味料。當晚主攻大路嘅豬肉、牛肉及雞肉，最有意外驚喜就係鬆爽厚潤多汁嘅燒豬肉。

食到差不多完場時，一位年輕嘅哥哥仔突然走入黎，估計唔係店主就係經理；佢話發覺十多人都唔係叫得太多野，擔心大家對食物有所不滿，傾咗兩句仲叫店員送上多片肥美柔潤嘅神戶和牛，其誠懇之態度實在令人感動。

小表弟推介之「ぜろはち」散座闊落，而且非常衛生，服務更加係「一番」（Ichiban）！燒肉放題本身已夠價廉，長者及小童更可特享折扣優惠，絕對抵玩！

閒來翻閱旅遊雜誌時，發現京都一家西餅店「Flavor's」以其抹茶味牛奶千層蛋卷「ミルクレープロール抹茶」榮獲「日本ギフト大賞 2016 京都賞受賞」，無奈店子只接受早成個月前之本地網購，故當時都只係影咗幅相做記錄。咁啱暑假期間，姨媽們提議入秋去京都玩喎，XO仔即諗到可以訂黎做早餐試試，點知細佬玩極都訂唔到，結果幾經艱辛，托酒店先成功購下蛋卷，並代為冷藏儲存，直至九人抵達酒店再轉交到手。

每個蛋糕都有獨立氣珠膠及紙盒包裝，非常穩陣。亦有詳細保溫、解凍及食用說明，但就只有日文一個語言。細佬所訂o既兩款原味及抹茶味牛奶千層蛋卷連稅單售1,242円，網購另加972円運費及324円手續費。

1)      ミルクレープロール抹茶（“Milk Crepe Roll Matcha”；1,242円）：解凍後o既抹茶味牛奶千層蛋卷質感濕潤過腍，忌廉厚濃溜滯，但蛋卷卻淡而無味，一丁點甜意都冇，當真唔明解如何可贏得奬項，莫非係對手太弱？！

2)      ミルクレープロール プレーン（“Milk Crepe Roll Plain”；1,242円）：講真原味牛奶千層蛋卷除咗同抹茶味唔同色水之外，基本上兩者連味道都差唔多，不吃也吧。

小肥一向對日本版o既西式甜品都幾有信心吓，但今次花盡精力早於兩個月前網購所謂得奬o既「Flavor's」抹茶味牛奶千層蛋卷只有包裝最好睇，一啲都唔好食，也太令人失望透了！

經好友介紹於「VELTRA」旅遊網選購巴士遊，比拼過各行程嘅簡介、時間表、亮點及價格後，XO仔就揀咗每位6,400円嘅「【京都巴士遊】二條城 + 金閣寺 + 京都御所」。

八點十分先憑電子發票於「AVANTI Sunrise Tours櫃檯」取票，再跟指示行去巴士站，相當方便。旅遊巴準八點二十五分開車。日藉導遊全程以英語解說，由於自己讀書時代歷史同地理都肥哂佬，所以聽得都幾辛苦吓；哈哈，後尾仲索性淨影相，唔聽書添。三個景點中最靚就係「金閣寺」，但係人山人海，真係好難影到靚相。「金閣寺」除咗寺廟夠金，就連下面嘅湖水都特別清澈，好多龍友影咗相都話「金閣寺」及其湖中嘅倒影一模一樣，實難辨真假咁話。小肥一向對觀景都不甚興趣，反而喺景點內嘅商店買到不少有記念價值嘅精品及手信，不過最搞笑就係居然見到有抹茶味生啤飲，認真棧鬼。

計落條數，平均2,100円左右去一個景點，包哂入場費同交通費，仲有人開路及解說一番，這個到此一遊唔算貴囉。

去旅行揀地方食飯，不外乎經親友介紹或跟隨旅遊網、書籍或雜誌推廣。舊年遊京都時，第一個午餐就去咗超閃旅遊書介紹嘅「モリタ屋」（Moritaya）；全因為睇到於明治二年創業嘅餐店擁有自家牧場，壽喜燒及涮涮鍋均只限供應極品京都和牛。

「モリタ屋」有多間分店，細佬當然係挑選咗間離酒店最近，唔洗行出街，步行只需五分鐘嘅「JR京都伊勢丹分店」啦！雖然人多要訂位兼訂埋指定午市套餐，幸得酒店幫忙，XO仔又預足時間，來回幾次電郵迅即搞掂，極之簡易。九人仲被安排入座窗邊最佳位置，一邊進食可一邊欣賞藍天白雲下嘅京都鐵塔及靚景，真爽！

店子午市套餐可選牛扒、壽喜燒、涮涮鍋、或油燒，價格以和牛級數而定。深知家人都怕極級和牛超強嘅油份，故小肥亦只為各人揀咗中間價位嘅「松」及「竹」。原本全部人都要點食同一款套餐架，好彩酒店成功爭取到四加五嘅組合，家人方才可以分批試壽喜燒及油燒京都牛，當真感激酒店及餐廳雙方都咁通情達理！

翻閱桌上嘅餐牌時，發現原來午市仲有個「最高的飯菜」之「極み」（一人前 10,260円）午餐，包齊五色冷盤、和牛頭盤、和牛壽司、特選壽喜燒、涮涮鍋、油燒、湯、飯及甜品。不過講真除咗肥肥家族三大壯漢可以食得哂整份「極み」之外，相信其他長輩都未必有能力一人食一份；嘻嘻，等下次再黎京都時先叫黎試試。

可能負責我地張枱位嬸嬸諗住溝通會有問題，起初佢都有少少冷淡，但之後聽到小弟可以簡單日語對答後，即變得好客得多。佢解釋話食物一般都會由食客自己燒煮，不過得知席上冇人有食油燒和牛嘅經驗，佢就好好心機地重複示範咗兩次，細心得很。並教路食油燒和牛有三種食法：第一種係原汁原味、第二種係點檸檬醬油、第三種就係XO仔誤以為係薯蓉嘅蘿蔔蓉混醬油；個人覺得第三種蘿蔔蓉混醬油清新解熱得最合襯。

午餐順序由前菜食起，指定項目有清脆嘅薯仔及鮮嫩嘅蟹肉沙律。「松」級套餐比「竹」級貴少少，所以前菜都多咗舊。。。惹味嘅燒和牛。

オイル焼き「松」（5,724円）：燒煮前，京都和牛色澤鮮紅，雲石紋理分明，油脂分布均勻，賣相超掂！嬸嬸教話以慢火燒至底部油份有聲出，邊邊位開始轉色，即可返轉燒埋第二面。小肥食牛一向越生越愛，意外地今次件五六成熟嘅油燒和牛肉質鬆爽，咬落更覺肉汁豐盛，肉香甜美，正爆！跟餐仲有一大盤色彩繽紛，新鮮爽脆，好睇又好食嘅蔬菜。另附清新醒胃嘅漬物及暖胃嘅白飯同麵豉湯。飯後再以一杯熱茶及爽甜嘅生果作結，腸胃確真大滿足。

好多謝超閃旅遊書咁好介紹，讓肥肥家族認識到「モリタ屋」，輕鬆舒適地初次品嚐到油燒京都和牛。餐店環境優雅有景睇，抽氣足，服務生友善，油燒京都和牛絕對貨真價實，食到長輩們都話要推薦俾親友，証明夠堅！

每次去日本濕平收穫都會好豐富。今次買得最盡興都應該係喺四条河原町「Sanrio Gallery Kyoto」血拼京都限量版XO仔同哈囉貓手信。購物完就行咗去隔離間星巴克咖啡屋「スターバックスコーヒー」（Starbucks Coffee），買咗杯節令紅莓特飲。

咖啡屋全球大部份嘅分店裝修佈局都差唔多，就連用上嘅餐桌椅櫈都係同一款式，唯一不同就係收銀處有個大螢幕顯示出賬單內容，不過唔係數目字就係日文，外國人絕對有機會睇唔明。

Raspberry White Chocolate Frappuccino（580円/Tall）：小肥初嚐之「紅莓白朱古力星冰樂」紅白嘅外表極富聖誕色彩，星冰樂香甜鮮美，頂面嘅紅莓脆脆清新醒神，就連忌廉都白滑過人，掂呀！

其實肥肥家族遊京都前，早一年嘅聖誕表妹舉家已經去過玩，所以小肥喺編排飲食行程前都好醒目地向佢索哂料。由於大家旅遊性質唔多同，表妹要照顧多位小朋友，而XO仔只需為一眾長輩們挑選美食，結果喺佢介紹幾間餐廳入面只能揀出潮派法國大餐「よねむら」（Yonemura）。

餐店為兩層高嘅獨立屋，門牌雖不太起眼，但只要有哥哥帶路就唔洗慌。步入正門，必先經過和風小花園。入到餐廳即變得洋化得多，四周圍都係木造嘅傢俬，光鮮涼爽。地下右方為吧枱，食客可邊食邊與廚師們互動一番。樓上廂房私人空間足，聽唔到樓下任何聲音，最緊要係有專人服務，絕對貼身稱心。

細佬啲日文屬有限公司，好彩有酒店代勞幫忙訂座，唔係相信都未必會聽得明九人嘅派對必須於廂房內進行。晚餐全權由大廚發辦，每位16,000円，並無他選。既然唔洗傷腦筋點食物，大家就應推介以日本清酒配潮派法國菜。。。冇錯，相中以白酒杯載住嘅係日本清酒，仲要係京都出品；嘻嘻，係咪碰杯都碰得潮過人呢？！

廚師除咗喺佳餚設計上花下心思之外，就連碗碟配套都一絲不茍。整套齊備嘅餐具都已擺放喺面前，各人更有自己嘅一小碗薄荷葉清水供洗手之用，衛生非常。

1)      Tomato & Pear Salad, topped w/ boiled lobster; Fig, young Japanese amberjack & raw ham; Toast topped with mussels & kelp：應建議逆時針方向由左邊起最淡嗰件食起：第一件龍蝦蕃茄沙律球清新潤甜；第二件無花果火腿鰤魚卷爽脆中滲出咸香；第三件昆布青口多士則香濃惹味，各有特色。

2)      Mushroom croquette topped the beef tongue stew w/ fennel sauce; Snapping turtle soup：以公雞靚碟承載嘅菜式原來一啲雞嘅成份都冇。右手邊嘅蘑菇炸球新鮮熱辣，外皮金黃香脆，芝士菇餡芳香味佳，頂面淋上腍滑嘅汁煮牛脷，組合新穎可口，再配上左手邊茶杯入面嘅擬鱷龜湯，更覺清甜暖胃。意外地，擬鱷龜湯一啲腥味都冇，唔講真係未必會估到係用龜所燉製。

3)      Steamed glutinous rice with crab：個人覺得此乃晚餐其中一個亮點。鮮蟹糯米飯不單有鮮橙美艷，幼嫩鮮甜嘅蟹肉及蟹籽擔當主角，就連小碗底層嘅配角蒸糯米飯都粒粒飽滿晶瑩，煙韌潤澤，堅掂！

4)      Gratin of Oyster：焗蠔肥美滑溜，厚潤鮮香。

5)      Meuniere of flounder with red wine & citrus pepper sauce & steak of turnip：潮派極都唔可以忘本，食法國大餐當然係要多舊魚啦，嘩卡卡！「よねむら」客奶油香煎比目魚可以稱得上為整頓晚餐最傳統嘅一味。比目魚白滑嘅魚肉鮮嫩無比，魚皮巧薄香脆，點上碟底嘅紅酒黑椒酸汁確真清新醒胃。

6)      Cold served pasta with surf clam, avocado, salmon roe & soft-boiled quail egg：西餐中嘅意粉通常都係熱食，今次師傅明顯係混入咗日式冷麵嘅構思製出凍食意粉。意大利粉麵條修長軟潤，師傅專登將色彩繽紛嘅食材，包括蜆肉、蕃茄、生洋蔥、紫菜絲、牛油果、及三文魚籽舖喺意粉面，再以小匙羮另上完隻流心鵪鶉蛋，好等貴客可自行混製意粉。XO仔可謂粗人一個，三兩吓手勢就成功撈起意粉！潮派海鮮撈起冷意粉集鮮香、濃郁、惹味、清新、爽脆、柔軟、潤滑於一身，口感味道豐富得黎毫不溜滯，超正！

7)      Wagyu beef steak with garlic peanut sauce：食過多味海鮮後，終於輪到靚靚和牛出場（細佬嗰份係走咗花生嘅，但賣相冇分別）。如相所示，三、四成熟嘅和牛色澤粉嫩紅潤，靚牛鬆軟得黎半溶於口中，每人三件份量剛剛好。

8)      Curry Rice：食和牛時加配一碗咖哩飯，效果醒神暖胃，真係估佢唔到會咁襯喎！

9)      Green perilla and blood orange sorbet：甜品環節前先有連隻杯都冰凍過人嘅雪葩，為味蕾洗滌一番。大家飲咗酒後其實都冇乜再點睇過個餐牌，所以見到杯中綠色嘅雪葩時個個都以為一定係綠茶味。。。點知食完第一啖，口腔卻洋溢著紫蘇香，之後再見到個底原來另有乾坤，藏著清新芳香嘅血橙味雪葩，方才搵返個餐牌對應一吓，發現橙綠組合係紫蘇味及血橙味雪葩。小肥才疏學淺，去到京都食法國餐先認識到「紫蘇」嘅英文乃「green perilla」，又上了一課。

10)  甜品兩部曲先有皮脆鬆軟嘅泡芙伴朱古力忌廉。

11)  生果拼盤食唔少，不過有邊個會諗到生果可以跟雪糕及朱古力醬以一隻西式透明玻璃碟上呢？！碟上嘅無花果及提子已起核，混入埋球雲尼拿雪糕及朱古力醬黎食，清甜涼快又潤滑，仲一啲都唔溜添，吃畢絕無罪惡感。

12)  一頓完整嘅法國餐以一杯特濃咖啡作結就最完美不過。

非常感激表妹極力推薦「よねむら」，讓肥肥家族於京都可欣賞到一場咁精彩細膩嘅潮派法式料理。餐店裝潢整潔簡樸，服務生客套友善，混入咗不少和風元素嘅菜式味佳又美觀，直令味蕾驚喜不絕，16,000円一位絕對係物有所值，XO 仔覺得店子實屬京都必食之列！

肥肥家族對「香港航空」情有獨鍾，今次同行嘅全為七旬長輩，為咗大家都可以舒舒服服，哥哥就訂購好較闊落嘅商務機位，諗住候機時可以佗佻地享用貴賓室嘅餐飲及設施，即使遇上延誤都唔洗太過狼狽或掃興。

記得上次仲去緊藏於地下室間「紫荊堂」貴賓室，真係估唔到航空公司可於三年內增設第二間貴賓室，仲升埋上樓，淨睇門面已覺樓底更高，面積更寬廣。唯一有少少失望就係見唔到「紫荊堂」嗰個懷舊磅重機。

如果唔係有哥哥介紹，XO仔根本唔會留意到兩間貴賓室嘅中英文名都完全唔一樣，新貴賓室「遨堂」其實係已拉丁文「Autus」起名，意味著「香港航空」正「豐盛成長」，故室內設計亦以此為題，四周可見不少鮮花綠葉作擺設，有意思極！光鮮光猛嘅貴賓室極富空間感，到處都有舒適嘅梳化椅櫈及用餐散座，人多都唔覺嘈吵或逼人。電腦區有多個差電插頭、幾部電腦及傳真打印機。小朋友仲可以揀坐彩色高櫈添，設備確真齊備。

室內嘅餐飲均為自助式，望落乾淨企理，衛生非常。餐具全擺放於中間嘅小涼亭內。飲品包冇酒精類嘅咖啡、茶、汽水、果汁及凍熱水。十八歲以上嘅旅客更可向酒保點選限定酒品，生啤都有三款揀架。早上十一點後連雞尾酒都出埋。由於當日遇上航班延誤，細佬同靚靚媽咪先可以飲多幾杯「遨堂」嘅招牌雞尾酒「Autus Delight Plus」。「Autus Delight Plus」滲透著荔枝嘅清甜及玫瑰嘅花香，很是清新。自助區內之食物中不乏大路嘅沙律、三文治、點心、炒麵、意粉、咖哩、甜品等。XO仔當然係主攻蝦餃同燒賣啦！喺機場食已預咗係叮叮點心，不過燒賣明顯比厚皮蝦餃美味，最正反而係潤滑而不太油膩嘅腸粉同煙韌爽脆嘅炒麵。

此外，廚房於不同時段都會提供幾款即叫即製嘅菜式。朝早六點到十一點有三款湯麵及煎蛋或炒蛋。個人推介熱辣辣嘅炒蛋，因炒蛋本身炒得好夠鮮黃香滑，加配埋菠菜、火腿、蘑菇則更為惹味豐富。碗榨菜肉絲米粉個湯底好清，米粉麵條唔會腍哂，加上榨菜肉絲夠味得黎又唔油膩，屬暖胃嘅輕食。廚房由早上十一點就換上另外五款湯麵，當中有辣有唔辣。最搶手就係貴賓室聞名中午十二點起先出嘅雞蛋仔！由於當真即叫即製，大家記緊要預十五至二十分鐘製作時間。辣手嘅雞蛋仔香脆無比，微甜輕巧，家人邊行去閘口，邊分黎食，一客話咁快就食哂，嘻嘻，下次一定要打孖黎叫！

以前離港，家人都唔會太早去機場，但最近身邊有親友因自己遲到而遇上不愉快事件，家中嘅長輩就變得更加謹慎，會預鬆多啲時間，橫掂買咗商務機票可以喺貴賓室享用免費餐飲及其他設施，等耐啲都冇妨。「香港航空」新增嘅「遨堂」貴賓室比起第一個貴賓室「紫荊堂」於各方面都明顯有所提升，真如其名般象徵著航空公司有所成長。「遨堂」環境開揚通爽，設施齊備，自助餐飲款式多，質量亦偏高，室內嘅服務生雖則年輕，但每位同樣友善客套，而且樂於助人，臨行前除咗順祝旅客有個愉快嘅旅程，亦不忘閒談兩句，問及各人對航空公司及貴賓室有否意見，這就是誠意！「香港航空」，肥肥家族支持你！

因為之前已經寫過幾次香港航空商務艙如何舒適、服務多麼貼身，故細佬在此都不想多費唇舌再次讚許。講真前幾次航空公司嘅膳食當真有啲參差，今次HX 618同上次一樣都係唔係咁掂。。。

午餐/晚餐仍舊請黎中菜廳「海景軒」合作，頭盤依然有上次食過嘅「日式冷麵」，但就換上咗「京式素鵝卷」。日式冷麵爽涼甜美。大概喺飛機上味蕾會冇咁敏感是常識吧，但係個素鵝卷真係好難食吓，除咗淡而無味，質感更加係乾乾嚡嚡，實在太齋了！主菜「家鄉沙薑雞球」完全食唔出有沙薑味，食落似係腍咗嘅唐揚炸雞咁，肉質乾噌噌，非常恐怖！成份餐最精彩嘅反而係暖手惹味嘅蒜蓉包同芳香清新嘅楊枝桂花凍糕。

詳盡地翻閱過旅遊書，方才得知於關西機場之二樓JR West站內可以優惠價3600円購買「JR Express Train HARUKA + ICOCA 卡」，包乘「HARUKA」列車前往京都市中心及鐵路儲值咭一張。「HARUKA」由關西機場往京都車站只需約76分鐘，相當快捷及舒適。哥哥所訂嘅酒店「Hotel Granvia Kyoto」就喺車站嘅樓上，路牌清晰，唔洗行出街又可以行得到，實在太方便了！

酒店客房寬敞衛生，空調充裕，大牀舒服，浴室亦光猛潔淨，日用品及茶、水、咖啡等應有盡有，配套十分齊全，大家都好滿意。

入夜後嘅京都街道上唔係太多人，反而沿路經過嘅所有餐廳都已滿座，唯一只有兩層高嘅「すき焼き炭火居酒屋 北斗」有位，眼見大家都餓到冇力再行，團長即決定一試。

八口子被安排入座樓上嘅合併式散座。話就話係包哂全層，因為當晚冇乜人幫襯，但埋位後想搵個店員都難，就連廚房仔同水吧都係吉嘅。不過搵到人都唔代表係好事，因明顯我地喺度阻住人家玩電話，應該都阻住埋佢收工嗰隻，其黑面及極不誠懇之態度可真係日本之最劣呀！

飲品餐牌共有四頁之多，除咗有大路嘅日式汽水、果汁、清酒等之外，當中仲有多款洋酒及雞尾酒可選。八頁食物餐牌附有彩圖，日英對照，簡單易明。

1)      小食（免費贈送）：等待廚房烹調晚餐時，先有巧薄脆脆嘅薯片送酒，真係冇諗到成晚最好食就係依碟免費送嘅薯片。

2)      牛すき特上盛り（一人前 2,290円）：全店均用上炭爐煮製壽喜燒，睇頭十足！雖然只係叫咗兩客一人份嘅壽喜燒，不過每人都有隻蛋黃鮮美嘅靚靚日本蛋。配料有廚房特選嘅蘋果蓉及解熱嘅蘿蔔汁。壽喜燒套餐包有一盒特上級「吟味重ねた國產上貨牛」（即和牛吧？！）及一盤雜菜。和牛主色鮮紅，但單睇紋理即覺油脂分佈唔得均勻，加上牛肉切得唔夠薄，煮熟咗後肉質偏韌難咬，唔得軟腍滑溜，長輩們要同牛牛做手術小肥亦冇話可說，實不能推介。成份餐最正常就係煙韌彈牙嘅烏冬，索哂啲壽喜燒汁則甜美可口。

3)      肉吸い仕立ての京風湯豆腐（790円）：以煲仔上嘅豆腐湯熱力十足，豆腐都好嫩滑，無奈湯底唔多夠味，頂面啲牛腩更加係集乾、嚡、厚、硬於一身，絕對食唔過。

4)      牛ステーキ大串（590円）：正當大家對壽喜燒及豆腐煲已大失所望時，食串燒時先知曉個壽喜燒其實算係店內好食嘅菜式，因為第一款牛扒大串燒韌到就連碗都可以咬崩嘅大肥爸爸都扯唔開，也太驚嚇了吧？！

5)      鶏もも大串（540円）：串燒雞肉雖則用上黑肉燒煮，食落都叫做有啲肉汁，不過可能雞肉較大件，啲肉就實咗啲，認真麻麻！

6)      豚バラ串（540円）：試埋豬排肉串燒，即可確認大廚燒功都幾九流吓，豬肉乾噌噌、嚡霎霎，真係後悔每款串燒都叫咗咁多條囉！

7)      山椒から揚げ（690円）：最後上嘅炸雞一樣唔多掂，但到咗依個地步小肥已再無餘力去彈啲餸菜。。。

肥肥家族東瀛遊最享往就係食同買，勢估唔到是次京阪神之旅第一晚居然遇上眾人都覺得「不可一」嘅「すき焼き炭火居酒屋 北斗」。餐店環境還好，上層散座寬廣開揚，食物菜式價格唔算貴，但質素偏低，最要不得就係劣等之服務態度。。。嘻嘻，XO仔個人比較阿Q，第一餐水準咁低，之後咪即係只會更好囉！

〒542-0071 Ōsaka-fu, Ōsaka-shi, Chūō-ku, Dōtonbori, 1 Chome−1−17

剛巧睇完Running man 都去食話好食, 之前去了幾次大阪都無去食過, 就今次去試下~
湯底都好香濃, 麵亦軟身, 最好是佢有泡菜, 蒜蓉, 辣菜任加任食, 好美味, 好抵食~

5 Chome-16-1 Nishinakajima, Yodogawa-ku, Ōsaka-shi, Ōsaka-fu 532-0011日本

ekimarushinosaka.com

因一早要坐2.5小時 JR 去鳥取, 日本人好喜歡買個便丼坐長途車時食, 所以我都買個便丼上車食~
海胆三文魚子便丼
雖然是一早整定既便丼, 但絕對感覺新鮮美味, 海胆不是全生的, 感覺有焗過, 但口感依然好, 有鮮味, 沒有胜味, 三文魚子就是生的, 有海水鮮味, 配上豉油就更好味, 壽司飯也有水準, 軟硬和酸度都適中, 好快就整盒食晒~HAHA

2083-16 Fukubechō Yuyama, Tottori-shi, Tottori-ken 689-0105日本

sakyu.city.tottori.tottori.jp

其實可以在砂丘會館站落車就可直接步行入砂丘, 如想乘搭吊車, 便去早一個站砂丘展望台落車便可, 在這處可從高處望落砂丘, 在售賣機買車票, 我只是買單程 200yen, 因回程可步行去砂丘會館坐巴士離開, 這裡有食堂和買手信的地方~
騎駱駝影相 500yen

上砂丘頂都要下一點功夫, 因當時是八月夏天, 係砂丘烈日當空毫無遮掩真係熱到熔, 還要步上斜度很直的砂丘頂, 真係很熱和消耗體力~記得要多飲水, 否則好容易中暑~

上到砂丘頂就很涼爽, 見到無盡的日本海, 很美麗~

好彩有帶雨鞋套來, 很好用, 否則成腳都是砂~ 

日本〒700-0901 岡山県岡山市 北区本町1-6 第二相互ビル 2階

monteroza.co.jp

横濱魚萬就在岡山駅前, 而且24小時營業, 很方便~

滿滿壽司 @ 1059yen 
分別是吞拿魚容, 白飯魚, 蟹肉壽司, 吞拿魚容不過不失, 白飯魚是熱的, 配壽司飯有點怪, 無乜味, 蟹肉都是無乜味~
雞蛋明太子土豆泥沙律 @ 322yen
呢個無乜驚喜, 無乜明太子味道, 感覺就是雞蛋沙律~
帆立貝剌身 @ 538 yen
總算有鮮味, 新鮮~
居酒屋小食 @ 430 yen
去居酒屋一定會給你一個小食, 就如酒樓會給你花生酸菜咁~
果汁葡萄酒 @ 322 yen
好味, 不要以為果汁酒就無乜酒精, 飲完都覺得酒精幾重~
青酒煮扇貝 @ 862 yen
味道最好, 熱青酒汁好好味, 扇貝亦很鮮~

搭JR 到達倉敷站步行15mins 便到倉敷美觀地區, 這裡古色古鄉, 是一個水鄉, 可以乘小船遊覽, 河流兩旁有很多商店, 售買很多特色貨品, 有一間商店叫貓敷屋, 是售買有關貓的貨品, 店鋪入面播放貓貓音樂很得意, 更可以600yen 參觀豹貓館, 可近距離親親可愛的豹貓仔~可惜本人當天要趕時間到下一目的地, 所以沒有參觀~

步行回倉敷站的另一方向, 便是 三井アウトレットパーク 倉敷 outlet,
mitsui-shopping-park.com,   買到好多日本牌子既衫褲, 幾十蚊港子都有好多~睇下大家有無時間尋竇~

1 Chome-9-13 Dotonbori, Chuo, Osaka, Osaka Prefecture 542-0077日本

osaka-ohsho.com

麻婆豆腐飯@370yen
這個飯很好食, 食落去很熱, 很像食緊煲仔飯咁熱, 但個汁很夠味, 配以胡椒粉辣辣地很香, 如怕太辣, 可孓走中間的一堆胡椒粉便不會太辣了~

餃子@260yen
皮薄餡靚~

泡菜@300yen
good, 但配菜竟然貴過餃子~haha

1 Chome-21-8 Nipponbashi, Chūō-ku, Ōsaka-shi, Ōsaka-fu 542-0073日本

因上幾次已到過黑門市場食野, 今次只是早上到來買零食手信, 晨早八點幾都不是太多店舖營業, 不過呢間就已經營業了~行過都是忍不住要食返客海胆壽司~

海胆壽司@1000yen

雖然是盒裝壽司, 但海胆明顯鮮味, 很甜, 夠新鮮, 好味~~ 

901 Higashishiokōjichō, Shimogyō-ku, Kyōto-shi, Kyōto-fu 600-8216日本

今次有時間於中午試下拉麵小路~在京都伊勢丹百貨公司十樓~搭lift 或室外空內扶手電梯都可到達

那裏大很多間食拉麵的店鋪, 見到あらうま堂有位, 便選了這間了~都是在門口售賣機先買食物, 再入內搵位坐下~  

あらうま-招牌特製拉麵@980yen
見廚窗食物模型見呢款有糖心蛋, 便選了這款, 但無乜特別, 湯底唔算好濃郁, 亦不會唔好食, 一試無坊~

からあげたまゆ-炸雞配塩味拉麵@1000yen
呢款就沒有蛋, 但配炸雞, 友人說都是一般~

ぎようざ-餃子@320yen
煎得燶左少少, 而且皮唔算太薄~

日本〒766-8501 Kagawa Prefecture, Nakatado District, 琴平町８９２−１

konpira.or.jp

從岡山駅乘JR特急到琴平大約一小時, 到了琴平駅步行10分鍾左右便到樓梯的起步點, 365級以下沿途都有小商店售買紀念品和有飲品機, 建議租枝行山竹會好點, 100YEN, 回程歸還去所屬店舖便可, 準備充足飲料, 經過第一段三百幾級樓梯(唔算太吃力)就到神社大門, 但好戲在後頭, 之後既樓梯就直好多~走到神社大門口後，小休片刻, 因那時是八月, 真的很熱, 在穿過大門後會看見售賣一種加美代貽的糖。給人補充體力, 但本人沒有購買~ 再繼續上了一段樓梯~

再上了一段樓梯到達一處旁邊會看到一頭可愛小狗的銅像，而這頭小狗就是一隻古時代替主人來參拜的參拜犬, 再往另一邊走，就能看到兩匹神馬了，其中一匹的名字是月琴號！白色很可愛, 再上了一段樓梯到達旭社, 以為到達本宮, 其實還未到, 只行到六百幾級, 這裡有一些座位可給人稍作休息, 可上多一段很直的樓梯, 終於到達金刀比羅宮御本宮, 旁邊可以求開運簽, 入下100Yen後，在簽文箱抽出一枝簽文。簽文裡面除了簽文外還包括了一隻可愛的小金犬, 一場來到, 還要買一個御守祈求好運降臨, 可能天氣太熱, 神社也放了幾塊冰柱給善信觸摸降溫~ 其實可以再上落去到1368級的奧社, 但當天天氣實太熱, 上到七百幾級已是很好了, 希望下次有機會鍛鍊好體能再挑戰上奧社~落山就輕鬆得多了, 很快便落到山腳, 由上山到下山共需時2.5小時~

又一間無意中發現的隱蔽大美味。

午餐連飲品和小份甜品，要了紅茶和自家製芝士布甸。期望不高之下，布甸是意想不到的清新好吃！上頭的是鮮製的香橙果醬，還帶著點點的甘澀橙皮。
最喜歡這種光線充沛的環境，愜意。完全被這走北歐風格的小天地迷住。

冬天的貴船人煙稀少，大部分食事処也不開門；夏天則擠滿慕名前來的觀光客，人山人海。一場來到，試試特別的川床料理，選了這間人氣最高的ひろ文。湊熱鬧拿個號碼吃夏期限定（五至十月期間）的流水素麵，足足等了一小時。

坐在鴨川源頭貴船川上所設的座敷，感受涼爽清流。吃流水素麵每人限時十五分鐘，吃完便要快快離座。很好玩，但挺考功夫的，因為流水急，要及時把麵條截著。透心涼的大美味，是很難忘的體驗。

在「ひろ文」等了個多兩個小時吃流水素麵後，其實仍然餓（XD），路過這間擠滿客人的「貴船倶楽部」，認得它就是在冬季時到訪過的「貴船Cosmetics & Gallery」的姊姊店。 

夏天絕對要來一杯特製parfait！光看樣子已夠吸引。更追加了一碗熱抹茶。

據說秋冬季節有釜飯，有機會也想一試呢。